Tunao wakati mtukufu jinsi gani. Tunayo matarajio makubwa kila wiki tunapoungana pamoja kwenye Sauti Yake. Akili zetu za kiroho hazijachanganyikiwa. TUNAJUA Yeye ni Nani haswa. TUNAJUA kabisa-kabisa Yeye ni nini. TUNAJUA kabisa-kabisa sisi ni nani; familia moja kubwa PAMOJA NAYE!
“Yeye alimjalia mwanadamu kuwa mungu mdogo.” Kwa sababu Yeye ni Mungu Baba, na Yeye alimfanya mwanadamu kuwa mungu mdogo, kwa hiyo Yeye si anayeishi peke yake tena, Yeye anaishi na familia Yake. Elah, Elah, Elohim. Naam, sasa Yeye ni Yehova. Yehova, likimaanisha “Yeye aishiye pamoja na familia Yake.”
Familia ya Bibi-arusi Wake inakamilishwa na Sauti ya Yehova Mwenyewe. Yeye ametufundisha jinsi ya kupigana na kila adui anayetushambulia; jinsi tunavyoweza kumshinda na kumweza kwa Neno, kwa sababu Neno Lake linaishi na kukaa ndani yetu. Alituhakikishia, “SISI NI NENO”. Kwa hivyo chochote tunachoomba kwa Jina Lake, twaweza kukipokea kama tukiamini….NASI TUNAAMINI!
Yeye amenena na kutufunulia sisi jinsi ya kufikia kimo cha wanaume na wanawake wakamilifu ili tuweze kuwa makao Yeye anayoishi. Yeye ali honk na Aka honk ili kumkusanya Bibi-arusi Wake mpendwa pamoja ili kutujulisha kwamba Yeye ndiye Kiongozi wetu, na Yeye alikuwa akituongoza na kutuelekeza kupitia malaika-kiongozi Wake wa duniani, William Marrion Branham.
Sasa Yeye analo somo lingine maalum analotaka kutufundisha sisi na kutufunulia. Yeye anataka kutangaza kwamba sisi ni watoto Wake wenye mamlaka. Jina letu ni zuri tu kama Jina Lake Yeye. Tumetoka Kanaani, kutoka ulimwenguni, na SASA tumeketi pamoja katika ulimwengu wa roho, tukila ile Mana iliyofichwa, iliyohifadhiwa.
Sasa Yeye atatueleza kile tunachopaswa kufanya ili tuweze kuwa tayari kwa Ujumbe Wake unaofuata, na kile kinachoweza kutukia endapo tukifanya hivyo.
Yatupasa tuwe tumeomba vya kutosha na kuwa tayari kwa Ujumbe; Tukusanyike wenyewe pamoja kama watakatifu ili kuisikia Sauti Yake, Tumebatizwa na Roho Mtakatifu, Tukajazwa baraka za Mungu; Hakuna mawazo mabaya; Hakuna neno dhidi ya kila mmoja wetu; Tukizungumza katika upendo na upatanifu; Tuwe katika nia moja, mahali pamoja katika mahali pa Mbinguni chini ya hali ya Kimbinguni; Dhambi zetu zote zikiwa chini ya Damu, katika ibada kamilifu; Mikono na mioyo yetu imeinuliwa kwa Mungu, tukiabudu pamoja katika ulimwengu wa roho.
Tukiyafanya mambo haya, haya ndiyo yatakayotukia Jumapili hii:
● Uponyaji wa Kiungu ● Kutangulia kujua ● Ufunuo ● Maono ● Nguvu ● Tafsiri ● Hekima ● Maarifa ● Baraka za Kimbinguni ● Furaha isiyoneneka na iliyojawa na Utukufu
Kila moyo utajazwa na Roho. Ndipo kutakuja ghafla toka Mbinguni uvumi kama wa upepo wa nguvu ukienda kasi na Yeye atatubariki kwa baraka zote za rohoni.
Hilo ndilo litakalotukia Jumapili hii saa 6:00 MCHANA, masaa ya Jeffersonville, ambapo Mungu amepaandaa mahali maalum ambapo Bibi-arusi anaweza kukusanyika pamoja kuisikia Sauti Yake kwa moyo mmoja, mahali pamoja, huku mikono na mioyo yetu ikiinuliwa kwa Mungu, tukiabudu pamoja katika hali ya Kimbinguni.
Mungu aliahidi kumtumia Bibi-arusi Wake kiongozi katika siku hizi za mwisho ili Yeye aweze kujifunua Mwenyewe katika mwili, kama vile alivyofanya wakati alipokuja duniani katika Mwanawe, Yesu. Alituambia katika Neno Lake kwamba Yeye angemtuma Eliya nabii, ambaye angekuwa Mwana wa Adamu akijifunua Mwenyewe katika mwili wa kibinadamu; kwa maana Yeye angali bado anayo mambo mengi ya kunena na kutufundisha.
Kwa maana hatanena kwa shauri lake mwenyewe, lakini yote atakayoyasikia atayanena, na mambo yajayo atawapasha habari yake. Yeye atanitukuza mimi; kwa kuwa atatwaa katika yaliyo yangu na kuwapasha habari.
Yeye alimtuma William Marrion Branham kulitimiza Neno Lake na kutujenga sisi kama watu binafsi kuwa Kimo cha Yesu Kristo; mtu mkamilifu ambaye angeweza kumshinda kila adui, na ambaye angekuwa kituo cha nguvu na makao ya Roho Mtakatifu kuishi ndani yake.
Mungu daima hajawahi kamwe kushindwa kuwatumia watu Wake kiongozi. Bali ili uwe Bibi-arusi Wake, huna budi kumkubali kiongozi huyo. Huna budi kuamini jambo hilo. Huna budi kupitia njia anayosema la sivyo utapotea. Haidhuru tunafikiri nini, yale yanayoonekana ni ya maana, ama yanayoonekana ya kipuuzi, hatuwezi kupambanua jambo hilo, kiongozi ndiye tu anayeweza.
Unasema, Ndugu Joseph, huyo ni Roho Mtakatifu wa kutuongoza, si Ndugu Branham. Maneno aliyosema NI Roho Mtakatifu na si Ndugu Branham; bali yeye ndiye aliyechaguliwa na Mungu kumfunua Roho Mtakatifu ndani yake, na kuwa kiongozi wetu wa duniani.
Na sasa Mungu daima amewatuma viongozi Wake, Yeye daima hajakosa kuwa na kiongozi, katika nyakati zote. Mungu daima amekuwa na mtu fulani aliyemwakilisha katika dunia hii, katika nyakati zote.
Tunapaswa kumtambua ni nani huyo kiongozi wa duniani anayemwakilisha Yeye hapa duniani; hapo ndipo ulipo Ufunuo wa kweli wa Neno Lake.
Tunajua Roho Mtakatifu ndiye Kiongozi Mkuu ambaye Baba alimtuma kumwongoza Bibi-arusi Wake, lakini hapa Mungu alisema kwamba daima Yeye humtuma mtu kuwa kiongozi wa kumwakilisha Yeye Mwenyewe na kumwongoza Bibi-arusi Wake.
Kiongozi wetu alituambia kwamba Kornelio alikuwa mtu mashuhuri na mheshimiwa aliyejenga makanisa. Alitoa sadaka na aliomba kila siku. Bali wakati Roho Mtakatifu alipokuja, alihitaji Kiongozi.
Mungu alimtumia Roho Mtakatifu. Alimtuma katika utu wa Petro, “Bali Petro alipokuwa anasema Maneno haya, Roho Mtakatifu akamshukia.” Mungu alimtumia Kiongozi kupitia kwa Petro. Alimtumia, kwa sababu Yeye alimwongoza Kornelio kwenye njia sahihi.
Wakati petro alipokuwa angali akinena, Roho Mtakatifu akawashukia hao. Petro akasema,
“Mtu anaweza kukataza maji, kwamba watu hawa wasibatizwe?” Mnaona, Kiongozi angali anazungumza, si Petro.
Sisi hatuongozwi na mtu; tunaongozwa na Roho Mtakatifu, ANAYENENA KUPITIA MTU HUYO MUNGU ALIYECHAGUA KUWA KIONGOZI WETU WA DUNIANI.
Roho Mtakatifu akizungumza kupitia malaika-kiongozi Wake daima atanena Neno. Yeye alituambia, “Nina mambo mengi ya kuwaambia. Hamwezi kuelewa na jambo Hilo sasa, bali Yeye ajapo, atawaongoza kwenye Hilo.”
Yohana aliongozwa alipoandika Ufunuo. Aliongozwa na yule Kiongozi. Pia aliongozwa na yule Kiongozi kusema, “Mtu yeyote atakayeondoa Neno moja kutoka Kwake, ama kuongeza neno moja Kwake, yeye ataondolewa, sehemu yake, kutoka katika Kitabu cha Uzima.”
Roho Mtakatifu pia alimwongoza Ndugu Branham kusema tunapaswa kusema tu kile kilicho kwenye kanda; tusiongeze kwake au kuondoa. Na Yeye ameiandaa njia tunayoweza kufanya kile hasa yeye alichotuagiza kuwa ni lazima tukifanye, Bonyeza Play.
Naam, utabadilishaje kitu fulani kwa Neno la Mungu, na bado useme unaongozwa na Roho Mtakatifu?
Tunaongozwa na Roho Mtakatifu ambaye ametupa Ufunuo wa Yeye ni nani, ni yupi Yeye aliyemtuma kama kiongozi Wake wa duniani kumwita Bibi-arusi Wake atoke, na sasa lile jiwe la kifuniko: Ufunuo wa sisi ni nani. Yapita maneno ya kibinadamu kupata kuelezea.
Tazama kile Yeye alichotutendea, katika wiki hizi chache zilizopita. Alitufundisha jinsi gani ya kumshinda kila adui anayekuja mbele yetu; jinsi ya kuuchomoa Upanga wetu wa IMANI na kumpiga hadi kufa. Hatuna cha kuogopa. Hakuna kinachoweza kusimama mbele yetu.
Jinsi gani Yeye alivyokihifadhi Chakula kwa ajili ya Bibi-arusi Wake apate kula. Hata wakati mjumbe Wake yuko mbali, bado tungali tunaye Kiongozi ambaye ulimwengu haujui lolote kumhusu; bali kwa Bibi-arusi Wake, Ni Chakula cha Kiroho kwa Wakati Wake, Mana Iliyofichwa tunayoila siku kwa siku.
Ametujenga kufikia vimo vya watu wakamilifu ili Yeye aweze kuishi na kukaa ndani ya kila mmoja wetu. Alitutumia Roho Wake Mtakatifu na kujifunua Mwenyewe katika mwili, kama alivyofanya miaka 2000 iliyopita, kuwa Kiongozi wetu, akiishi na kunena kupitia kiongozi Wake wa duniani.
Ninawaalika kila mmoja wenu mje na muisikie, “Honk-honk, honk-honk!” Yake, ambapo Bibi-arusi watakuja moja kwa moja kwenye Honk hiyo. Yeye atafanya, “Honk-honk, honk-honk!” nako kutakuwa na yubile ya aina yake ulimwenguni kote. Kwa nini? Bibi-arusi wanaijua Sauti ya Kiongozi wao.
Ikiwa hutaki kupotea, njoo umsikilize Kiongozi wetu anenapo kupitia kiongozi Wake wa duniani Yeye aliyemteua Jumapili hii saa 06:00 MCHANA, masaa ya Jeffersonville.
Ndugu. Joseph Branham
Ujumbe: 62-1014E —Kiongozi
Maandiko: Marko Mt.16:15-18 Yohana Mt.1:1 / 16:7-15 Matendo 2:38 Waefeso 4:11-13 / 4:30 Waebrania 4:12 2 Petro 1:21 Kutoka 13:21
Ni mafunzo jinsi gani ambayo tumekuwa nayo. Sauti ya Mungu imekuwa ikinena na kutufundisha, Neno kwa Neno kwa Neno, jinsi ya kumshinda kabisa kila adui. Yeye ametufunulia na kutia nanga mioyoni mwetu, SISI NI NENO. Kwa hivyo, hatuwezi kushindwa.
Wakati adui anapotufuatia, sisi tunampiga tu na kumpiga tena na tena kwa bomu letu la atomiki, Neno Lililonenwa la Mungu, ambalo huishi na kukaa ndani yetu.
Kweli, vita viko tayari, bali sasa hatuna hofu tena; hakuna wasiwasi tena. Hatuzisikilizi dhamiri zetu. Hatuzisikilizi kumbukumbu zetu. Hatuyasikilizi matakwa yetu. Tumezifunga akili zetu kwa mambo haya na kuweka Roho wa Neno Lake mioyoni na rohoni mwetu. Tumekilipua kila kitu kilicho kinyume na Neno Lake.
Kila shaka imetoweka. Kila hofu imetoweka. Kila hisi ya shaka imetoweka. Kila hisi imetoweka. Hakuna kitu kinachosimama hapo ila Neno la Mungu linaloishi na kukaa NDANI YETU, naye Shetani hawezi kupigana na Hilo.
Tunafanyika Maskani iliyo hai ya Mungu aliye hai. Ni Mungu akiishi ndani yetu, akitufanya tufanane na Yeye, akiuakisi Utu Wake ndani yetu.
Tunapachukua mahali pa Kristo, tukiiendeleza huduma Yake. Yeye anaishi katika umbo la mwanadamu kama Yeye anavyojiakisi ndani yetu. Sasa tunayo ibada kamilifu pamoja Naye! Ni Mungu akijidhihirisha ndani yetu, tukiwa Maskani Yake.
Ni upi msingi wetu usiotikisika wa kuyaamini mambo haya? IMANI. Nayo imani yetu haihitaji chochote; kwa maana imani yetu inaliamini Neno la Mungu. Kwa maana imani huja kwa kusikia, na kusikia Neno la Mungu, nalo Neno la Mungu huja kwa nabii peke yake, na tunaweza tu KUMSIKIA nabii kwa Kubonyeza Play…PIGA!!
Kwa kuisikiliza Sauti Yake, tumwekwa kwa mrija Wake wa kutilia Nguvu Zake nasi tumekufa kwa mawazo yetu wenyewe. Imani yetu imekuwa imani halisi, nao Uhai Wake umewekwa ndani yetu. Tumekuwa viumbe hai vya Mungu, makao ambapo Roho Mtakatifu anaweza kutuma miali ya baraka Zake za upendo kupitia humo.
Sauti hiyo iloyo kwenye kanda inafanya nini?
Kristo alinituma kuwajenga watu binafsi wafikie kiwango cha Yesu Kristo, kusudi wapate kuwa kituo cha nguvu na makao ya Roho Mtakatifu, kwa Neno Lake. Kwa Neno Lake, unaona, kumjenga mtu binafsi afikie mahali hapo.
Kwa kuisikia Sauti Yake, na kuamini na kulifuata Neno Lake, imetujenga kufikia vimo vya Yesu Kristo; makao ya Roho Wake. Sisi ni nguvu hai, maarifa hai, saburi hai, utauwa hai, Nguvu iliyo hai, zitokazo kwa Mungu aliye hai, zinatufanya kuwa mtu aliye hai, sanamu hai, katika kimo cha Mungu.
Lakini Mwili uliniwekea tayari,” Mwili ambao Mungu anaweza kuishi ndani yake, Mungu anaweza kutembelea, Mungu anaweza kuona nao, Mungu anaweza kuzungumza humo, Mungu anaweza kufanya nao kazi. Amina! Chombo kilicho hai, Mungu, Mungu akitembea kwa miguu miwili, ndani yako. Utukufu! “Hatua za mwenye haki huongozwa na Mungu,” Mungu akitembea ndani yako. “Kwa maana ninyi ni waraka uliandikwa, unaosomwa na watu wote.”
Utukufu…!!! Kwa hivyo, hatujali kama tunaishi katika hema au kibanda, tuishi ama tufe, tuzame au tufe maji. Jambo hili ndilo tu tunalotaka, UJUMBE HUU, SAUTI HII, NENO LA MUNGU. Ndio Ufalme wa Mungu. Ndio njia ya Mungu iliyoandaliwa ya siku hii. Inajenga Kimo cha Mtu Mkamilifu, ambaye NDIYE SISI!
Hebu na tukutanike pamoja na kuyachunguza maisha yetu tunapomsikia Mwalimu wetu akitufundisha kile tunachopaswa kufanya, na jinsi gani tunavyopaswa kuishi, ili kufanyika wana na binti za Mungu W-A-K-A-M-I-L-I-F-U
Tutamwahidi Bwana kwamba kwa msaada Wake na kwa neema Yake, tutamwomba na kumtafuta Yeye kila siku bila kukoma, mpaka tutakapojisikia kila moja ya mahitaji Yake yanatiririka katika miili yetu. Tutakaa hapo mpaka tuweze kuwa dhihirisho la Kristo aliye hai.
Kila wiki msisimko na matarajio kwa yale Bwana atakayofanya na kutufunulia sisi yapita maneno kuelezea. Jinsi gani ninavyotaka ulimwengu mzima uungane nasi kwani hakuna kitu kilicho kuu zaidi, au kikamilifu zaidi kuliko kukaa katika uwepo wa Sauti ya Mungu na kuwa Kimo Kikamilifu cha Bibi-arusi Neno Wake Mkamilifu.
Ndugu Joseph Branham
Ujumbe: Kimo cha Mtu Mkamilifu 62-1014M
Muda: saa 6:00 MCHANA Masaa ya Jeffersonville, IN.
Maandiko:
Mathayo Mtakatifu 5:48 Luka Mtakatifu 6:19 Yohana Mtakatifu 1:1 / 3:3 / 3:16 / 5:14 / 14:12 Matendo 2:38 / 7:44–49 / Sura ya 10 / 19:11 / 28:19 Waefeso 4:11-13 Wakolosai Sura ya 3 Waebrania 10:5 / 11:1 / 11:32-40 Yakobo 5:14 2 Petro Mtakatifu 1:1-7 Isaya 28:19
Vile vita vikuu sana vilivyowahi kupiganwa sasa viko tayari kuanza. Mungu amekuwa akiwachagua wanajeshi Wake wa hali ya juu kwa zaidi ya miaka elfu sita, nawe ulikusudiwa kimbele na kuchaguliwa kuwa katika Jeshi Lake Kuu.
Yeye amekuwa akikuvisha, na kukupa mafunzo, nao uwanja wa vita sasa umewekwa tayari, unajiandaa kuanza. Sio tu kwamba Yeye alikuchagua kuwa katika Jeshi Lake Kuu, bali Yeye amekuteua wewe kuwa Mikaya nabii katika jeshi Lake.
Wakati umefika, siku yenyewe imefika; utapokea mafunzo moja kwa moja kutoka kwa Nguzo ya Moto Mwenyewe ili kumshinda kila adui. Utapokea maagizo maalum, Neno kwa Neno, juu ya nini cha kufanya ili kuangamiza kabisa kila roho mchafu. Itaupeperusha kila ugonjwa na kila pepo anayekuja mbele yako. Hakuna kinachoweza kusimama mbele yako.
Baada ya mafunzo haya maalum, utakuwa umewekewa ngome mno kwa Neno Lake kiasi kwamba utauondoa uovu wote. Tupilia mbali hoja. Tupilia mbali ushirikina. Tupilia mbali wasiwasi. Tupilia mbali magonjwa. Tupilia mbali dhambi. Utaelewa uko juu yake, umefufuka katika Kristo Yesu, umeketi katika ulimwengu wa Roho na kila pepo akiwa chini ya miguu yako. Utaelewa kikamilifu na KUAMINI wewe ni Neno.
Yeye atawapa mafunzo ya lipi la kuwa nalo macho. Atawafundisha kwamba ikiwa adui yako anaweza kukufanya uamini Silaha yako haina nguvu vya kutosha, yeye atakupokonya silaha.
Lakini tutayakumbuka mafunzo yetu, enyi askari, na kumwambia huyo shetani: Sio sisi, sisi si kitu. Silaha yetu ni Neno la Mungu nalo litamshinda KILA PEPO, wakati wowote, mahali popote, kwa sababu ni NENO LAKE, NAYE ALITUPA MAFUNZO NA KUTUFUNULIA KWAMBA SISI SASA NI NENO LAKE LILILOFANYIKA MWILI. HIVYO, hatuwezi kushindwa, sisi ni jeshi LA MUNGU lisiloshindwa.
Moja ya siku zilizo kuu mno katika historia ya ulimwengu inaenda kutukia Jumapili hii. Akina Mikaya Wake wataungana pamoja kutoka kote ulimwenguni chini ya Sauti ya Jenerali wao mkuu, ambapo tutaungana pamoja hasa kwa nia moja, bila hata chembe moja ya shaka popote.
Kisha, ikiwa tu tutaamini, NASI TUNAAMINI, hakutakuwa na mtu dhaifu ulimwenguni kote. Ikiwa tukiweza tu kurekebisha jambo hilo fulani, hakutakuwa na mtu anayemtamani Roho Mtakatifu ila yule ambaye angempokea, nako kutakuwa na uponyaji wa ghafla wa roho na mwili, ikiwa tutashikilia tu nafasi zetu. Huu ndio wakati wenyewe. Sisi ndio watu hao. Roho wa Mungu ameinua beramu dhidi ya kila pepo; sisi ni MMOJA WAO na hakuna kinachotuzuia!!
Tumekufa kwa dhamiri zetu, tumekufa kwa hoja zetu, tumekufa kwa mambo yote hayo. Maisha yetu yamefichwa nasi tumezikwa katika Jina la Yesu Kristo, na kufufuliwa pamoja Naye. Na po pote alipo Yeye, hapo ndipo nasi tulipo pia.
Tumedonoa tukatoka, ewe shetani, kwa kukulipua kwa, “BWANA ASEMA HIVI. BWANA ASEMA HIVI. BWANA ASEMA HIVI.” Hatimaye tunainusa hewa safi. “BWANA ASEMA HIVI.” Sisi hawa hapa tunakuja shetani, tumetokeza vichwa vyetu nje. “BWANA ASEMA HIVI, UMESHINDWA.”
Tunamshinda shetani kwa kitu gani?
Neno! Hebu na tuseme; Neno! Neno! NENO!!
MAAGIZO ZAIDI YA MAFUNZO
Sasa wakati adui anaposhambulia na kujaribu kusema ati unapaswa kufanya hivi, unapaswa kufanya vile, wewe hufai, hustahili, hujapona, bado ungali una matatizo yako yale yale. Utafanya nini?
Ondoka kwangu.” Mpige dharuba! Kisha umkate kwa Neno. Iwe ni pepo; iwe ni adui; iwe ni maradhi; iwe ni ugonjwa; cho chote kile; chukua hilo Neno ulivute kwa Upanga, na kama ukilipiga dharuba mara ya kwanza nalo halielekei kusogea, lipige dharuba tena, na ulipige dharuba tena, na ulipige dharuba tena!
Tunalikubali tu Neno kwa msingi wa, “Mungu alisema hivyo,” na hilo linafanya kijito kati yetu na Yeye. Kila mkondo umefunguka kati yetu. Tunasema, “Sijui ni lini nitalipata, bali nitalipata. MUNGU ALISEMA HIVYO. Kila shaka IMETOWEKA…hata tunatilia shaka mashaka yetu.”
Tunampinga shetani na kulichukua Neno la Mungu. Ikiwa najisikia hisi fulani, au bila hisi, haijalishi kinatokea nini, Mungu alisema hivyo. Hilo latosha.
Yafuateni maagizo haya, enyi askari, kwa kina. Yarudieni Maneno haya wakati adui anaposhambulia. Si Maneno yenu, ni MANENO YAKE YEYE, NA MANENO YAKE HAYAWEZI KUSHINDWA. Yeye ametupa uwezo wa kulitumia Neno Lake kwa kutufanya sisi kuwa Neno Lake. Wakati Shetani anaposhambulia, msomeeni maagizo yenu.
MAAGIZO YA JENERALI WETU
Hiki ndicho hasa ninachowataka mfanye.
Rudia kiapo hiki na uamini kila Neno kwa ajili ya ukombozi mkamilifu.
Shetani, simile; ninatoka humu ndani; silali hapa tena; sikai hapa tena; siko kwenye ardhi hii ya ibilisi ya kale tena; ninadonoa nipate njia ya kutoka asubuhi hii! Amina! Mimi ni tai!” Amina! Haleluya!
Kisha nakutaka ufanye hivi:
Kulilipua na BWANA ASEMA HIVI. BWANA ASEMA HIVI. BWANA ASEMA HIVI.”
Fungua akili yako, useme, “Neno Lako ni Kweli.”
Bwana, sitajali jinsi ninavyojisikia, jambo mtu mwingine asemalo; ninafunga, ninasafisha kila moja ya njia zangu. Mahangaiko yote, na mashaka, na kutokuamini ambako nimepata kuwa nako; kila kuhisi ulikowahi kuwa nako; maradhi yote niliyowahi kuwa nayo; kila kitu kingine nilichopata kuwa nacho; ninavitupilia vyote nje; ninavipuuza vyote na kuja moja kwa moja kwa Roho yangu.
IMANI yako itaanza kupanda juu zaidi na zaidi. Kisha mwambie Yeye, “Ee Bwana, shuka; Wewe ulisema, Wewe ulinifanya mimi mtu mwenye hiari.”
“Ndivyo ulivyo, Mwanangu.”
Sawa, ninafungua moyo wangu na akili yangu.
“Karibu, Bwana Yesu.”
Uinyakue ile imani, Upanga wa Roho, BWANA ASEMA HIVI!
Piga kelele, Haleluya! Amina!
Kisha katilia mbali kila adui aliye mbele yako. Amina. Jambo ndilo hilo. Kata kila adui. Iwapo pe—pepo mchafu wa kale anakufanya ujisikie…Katilia mbali kitu hicho kwa Neno la Bwana.
MAAGIZO YAKO YA MWISHO EWE ASKARI. MWAMBIE ADUI:
“Ondoka kwangu.” Mpige dharuba!
Kisha umkate kwa Neno. Iwe ni pepo; iwe ni adui; iwe ni maradhi; iwe ni ugonjwa; cho chote kile; chukua hilo Neno ulivute kwa Upanga: na kama—kama ukilipiga dharuba mara ya kwanza nalo halielekei kusogea, lipige dharuba tena, na ulipige dharuba tena, na ulipige dharuba tena! Na ulipige dharuba mpaka umetoboa tundu, kama kifaranga mdogo akijitokeza mwenyewe nje; au tai, ndivyo ulivyo. Jitokeze moja kwa moja kutoka hilo gamba la kale la maradhi, fyeka upate njia ya kutokea, kisha useme, “Haleluya! yuko wapi mwingine?” Amina! Hivyo ndivyo vita; huyo ndiye askari. Huyo ndiye askari wa msalaba. Ndiyo, bwana! Mtupilie nje kila adui. Kwa nini? Kwa nini?
Sisi ni Mzao wa Kifalme wa Ibrahimu uliochaguliwa tangu awali.
Utukufu, kila adui ameshindwa. Hakuna kitu CHOCHOTE kinachoweza kusimama mbele ya Neno la Mungu, nasi ni Neno la Mungu. Sisi ndio Uzao Wake wa Kifalme na kila ahadi ni YETU.
Siku hiyo imefika, Bibi-arusi anaamini kila Neno naye analitendea kazi. Tumejiweka wenyewe tayari kwa kulisikia na kuliamini Neno Lake.
Kama unahitaji chochote, kama unataka kujazwa na Roho Mtakatifu, kama unataka kuponywa, kama unataka kila pepo atolewe, kama unataka kuwa Bibi-arusi wa Kristo, huu ndio wakati, kuisikia na kuiamini Sauti Yake ndio mahali penyewe.
Ikiwa una haja ya mambo haya na unataka kuwa katika uwepo wa Bwana, karibu zaidi kuliko ulivyowahi kuwa, njoo uungane nasi Jumapili saa 06:00 MCHANA, masaa ya Jeffersonville, [ni saa 1:00 JIONI ya Afrika mashariki–Mh] wakati Jenerali wetu mwenye nyota nne anapomwelekeza Bibi-arusi Mikaya Wake mwenye nguvu jinsi ya kumshinda kila pepo, kila adui, kuwekwa huru, na kujazwa na Roho Wake Mtakatifu, na kuwa tayari kwa ajili ya Kuja Kwake hivi karibuni.
Ndugu Joseph Branham
Ujumbe: Vita Vikuu Sana Vilivyowahi Kupiganwa. 62-0311
Maandiko: 1 Petro 5: 8-10 Waefeso 6:10-17 Danieli 12: 1-7
Ninyi ni Neno la Mungu lililodhihirishwa lile lililoahidiwa kwa ajili ya siku hii. Daima mlikuwa. Si kwamba mtakuwa, bali ninyi sasa hivi ni wana na binti za Mungu;, kwa maana Mungu, aliye mwingi wa rehema, alikuwa na wewe katika mawazo Yake hapo mwanzo kabisa.
Kabla hata Yeye hajafanyika mwili hapa duniani; kabla hapajakuweko chochote, wewe ulikuwa mojawapo ya mawazo Yake. Yeye alijua jina lako lingekuwa lipi. Yeye alijua rangi ya nywele ambazo wewe ungekuwa nazo. Alijua kila kitu kukuhusu wewe.
Kisha, ulipoisikia Sauti Yake ikimulika mbele yako, kulikuwa na kitu fulani ndani yako kilichopaza tu sauti; unajua wapi unakotoka nawe ukakijia. Ulijua hiyo ilikuwa Kweli. Ulijua hiyo ilikuwa njia ya Mungu iliyoandaliwa kwa ajili ya leo hii kwa sababu Mbegu hiyo daima ilikuwa ndani yako.
Yeye sasa anatubeba juu ya mbawa za tai. Neno linatuambia Yeye huwafananisha manabii Wake na tai kila wakati. William Marrion Branham ndiye mjumbe tai wa Mungu aliyethibitishwa kwa ajili ya siku hii. Hizo ndizo mbawa za tai tunazopaswa kubebwa nazo hadi kwenye Nchi ya ahadi, kwa sababu yeye,; nabii tai wa Mungu, anaubeba ujumbe wa Mungu, akiita kutoka na kulinena Neno Lake, akimkamilisha Bibi-arusi Wake.
Sisi tunamfuata Mungu tunapomfuata William Marrion Branham mwenye ujumbe Wake wa ukombozi. Na Biblia inasema kwamba, “…Yeye, hawakuangamia pamoja na wale ambao hawakuamini.” Kwa maana, Mungu alikuwa mwingi wa rehema kwao;, kwa sababu walikuwa wakifuata amri Zake.
Mungu anatutaka tufuate amri Zake, nazo amri Zake zilisema:; Mimi ni Sauti ya Mungu kwenu. Semeni TU kile kilicho kwenye hizo kanda. Sauti Yangu ndio Sauti pekee inenayo Maneno ya kutokukosea. Yamenenwa kikamilifu nanyi mnayapokea kikamilifu kutoka kwenye Sauti Yangu. Kwa hivyo, ni Sauti ya Mungu iliyo kwenye kanda ndiyo tu mnayohitaji, kwa kuwa Mimi, Mungu niliye mwingi wa rehema Zangu, nimeiandaa hiyo kwa ajili yenu. Ndiyo Njia Yangu iliyoandaliwa kwa ajili ya siku hii.
Mungu aliye mwingi wa rehema alikuchagua wewe na kukukusudia kimbele ili uwe na Ufunuo huo ili uisikie Sauti hiyo. Mungu aliye mwingi wa rehema alijua katika wakati huu wa mwisho, Wakati kungekuwa na mitazamo mingi potofu, sauti nyingi na fasiri tofauti za Ujumbe, kiasi kwamba tulihitaji Sauti iliyo Kamilifu, na Njia Kamilifu, ambayo tungeweza kwenda kwake ili tuweze kuisikia sisi wenyewe, Neno, kwa Neno, kwa Neno, kile hasa Yeye alichotaka kumwambia Bibi-arusi Wake.
Huwezi kupokea alichosema mtu mwingine. Inakupasa kupokea aliyosema Mungu. Yeye alisema, “Na neno la kila mtu na liwe uongo, na Langu kweli.”
Kwa hivyo, Mungu, aliye mwingi wa rehema Zake, ameiandaa njia ambayo Bibi-arusi Wake angeweza Kuisikia Sauti Yake masaa 24/siku 7 za wiki, siku 365 za mwaka, kwa Kubonyeza Play, na kuhuishwa kwa kuisikia Sauti ya Mungu ikinena mdomo kwa sikio na mioyo yao.
Sisi ni Neno Lake lililofanyika mwili. Hatuna nguvu yoyote, lakini Yeye ametupa mamlaka Yake. Kila mmoja wetu anayo. Ukiyakataa, utakaa mahali ulipo. Lakini tukiyakubali, yatafanya yapitayo ufahamu, kwa sababu Mungu ni mwingi wa rehema Zake.
Na wakati mwanamume au mwanamke, si hoja uko katika hali gani, unayo mamlaka kutoka kwa Mungu, kwa ahadi, kwa sababu Yeye ni tajiri na ametuahidi kutufanyia mengi mno. “Kama ukiuambia mlima huu ‘Ng’oka’ na usione shaka moyoni mwako, bali uamini kwamba hayo usemayo yametukia, yatakuwa yako.” Huna uweza wowote, bali unayo mamlaka.
Bibi-arusi anaweza tu kukamilishwa na kuunganishwa kwa kulisikia Neno Lake kamilifu lililoandaliwa kwa ajili ya leo hii:; Sauti Yake. Ndio Sauti pekee inayoweza kumuunganisha na kumkamilisha Bibi-arusi. Ndio Sauti pekee ambayo Mungu alituambia yatupasa kuisikia na KUIFUATA. Kama Musa, Ndugu Branham alijua kwamba yeye ndiye aliyechaguliwa kutuchukua sisi watoto kutuingiza kwenye Nchi ya ahadi kwa sababu hiyo ahadi alipewa yeye. Naye yampasa atupeleke kwenye Nchi ya ahadi.
Nabii tai wetu alitufundisha kwa mifano. Agano la Kale lilikuwa kivuli cha Agano Jipya. Alituambia jinsi gani tunavyopaswa kuwa waangalifu na kipi cha kuwa nacho macho katika wakati huu wa mwisho. Yeye alituonya kuhusu roho ya Kora, na kuhusu Dathani, na kundi lao la watu wasioamini, walipojaribu kuiga. Wao walijaribu kuingiza kitu fulani katika mpango wa Mungu.
Hawakutaka mpango wa mtu mmoja. Hawakutaka hayo. Iliwapasa wapate jambo la kutenda. Kora alisema, “Mbona, kuna watu watakatifu kuliko wewe, Musa. Unajifanya kama kwamba wewe tu ndiye pwani kwenye…au ndiwe pekee kijiwe katika pwani, hasa.” Akasema, “Mimi—Mimi…haukupaswa kufanya hivyo. Na kuna watu wengine hapa.”
Ndugu na dada, Mimi sijaribu kuyatenganisha makanisa kwa kuyasema na kuyanukuu mambo haya, Roho Mtakatifu ndiye anayetenganisha. Usikilizeni Ujumbe huu tunaoenda kuusikia, Nabii ndiye anayemwonya Bibi-arusi ni kipi cha kuwa nacho macho. Yeye anatuambia kile hiyo roho ilichofanya wakati huo, na kile itakachofanya tena katika siku yetu.
Kwa kweli, sijaribu kuwakusanya watu katika huduma tano, wao hawawezi kabisa kumuunganisha Bibi-arusi. Mimi ninajaribu kuwaunganisha kwenye Neno la Mungu lililo safi, lisiloghoshiwa, Sauti pekee inayoweza kumuunganisha Bibi-arusi.
Tunasikia mambo yayo hayo leo,, ati Ndugu Branham si mtu pekee anayeweza kuuhubiri Ujumbe, tumeitwa kuuhubiri Ujumbe. Kwa kweli wameitwa, bali kisha, wanashindwa kutambua umuhimu wa kuisikia Sauti hiyo na kuamini Ni Ujumbe wa mtu mmoja, kwa kutoa visingizio VYA KUTOICHEZA Sauti ya Mungu katika makanisa yao, na kuiweka huduma yao kuwa muhimu zaidi.
Nayo Biblia ilisema, “Walikwenda njia ya Balaamu, na kuangamia katika maasi ya Kora.” Kuangamia katika maasi! Je maasi ya Kora yalikuwa nini? “Je, unadhani wewe tu ndiye mtu aliye mtakatifu peke yako? Kwa nini, wa Mungu…Sisi sote tu watakatifu. Kanisa lote ndivyo lilivyo. Kila…Sote tukusanyike, ndivyo inavyotupasa kuwa.” Hivyo ndivyo walivyoangamia, katika hilo. Na tulistahili hayo kabisa. Tulistahili hayo.
Ujumbe huu, Sauti Yake, ndio Sauti pekee inenayo waziwazi na inapokelewa wazi na Bibi-arusi. Huduma aminifu ni kuwatia moyo watu wadumu na Sauti Hiyo kwa kuuhubiri na kuunukuu Ujumbe. Lakini si tu kuuhubiri, bali LAZIMA waucheze makanisani mwao, na kuwaambia watu wao Hiyo ndio SAUTI ILIYO MUHIMU ZAIDI, ili Bibi-arusi aweze kuisikia Sauti ya Mungu, kutoka kwa Mungu Mwenyewe.
Hakuna kilicho kikubwa zaidi kuliko kuisikia Sauti ya Mungu. Hakuna upako ulio mkuu zaidi kuliko upako ulio kwenye kanda. Hakuna njia nyingine ya kumuunganisha Bibi-arusi ila kwa Sauti ya Mungu ilio kwenye kanda. Hakuna NJIA nyingine KAMILIFU isipokuwa kwa KUBONYEZA PLAY NA KUAMINI KILA NENO UNALOSIKIA. Kweli ni Mungu, Aliye mwingi wa rehema Zake kwa Bibi-arusi Wake. Ndio njia Yake KAMILIFU iliyoandaliwa ya leo hii.
Ninawaalika mje na muungane chini ya ule upako mkuu zaidi wa siku yetu Jumapili hii saa 6:00 MCHANA, masaa ya Jeffersonville, [ni saa 1:00 JIONI ya Afrika mashariki–Mh] tunapomsikia Mungu akinena na kuwafundisha watoto Wake Neno kamilifu kwa kuuleta Ujumbe:; Mungu Aliye Mwingi Wa Rehema 65-0119
Mpendwa 1 WAO, [ 1 of TM inamaanisha pia 1 of Tape Ministry- 1 wa Huduma ya Kanda—Mh.]
Watu wanapotuuliza:
S: Je, wewe ni mmoja wao “Bonyeza Play” watu wa kanda wale wanaoamini kwamba Mungu alimtuma William Marrion Branham kumwita Bibi-arusi wa Mungu atoke?
J: NDIYO, Mimi Ni Mmoja Wao.
S: Je, Unaamini kila Neno lililonenwa kwenye hizo Kanda?
J: Bwana asifiwe, Mimi Ni Mmoja Wao.
S: Basi lazima unaamini pia kwamba yakulazimu Kubonyeza Play na kuisikia Sauti Yake ili uwezekuwa Bibi-arusi wa Kristo?
J: Utukufu, huyo ndiye hasa Mimi niliye, huyo ni mimi kindakindaki…Mimi Ni Mmoja Wao.
S: Unaniambia, unaamini kweli kwamba wewe ni aliyechaguliwa, mteule, Uzao wa Kifalme ambao umekusudiwa kimbele tangu misingi ya ulimwengu kuliamini Neno Lake, kuwa Bibi-arusi Wake, na ni mkamilifu machoni Pake, bila dhambi yoyote, na huwezi kabisa kudanganywa?
J: Haleluya, umeelewa, huyo ni mimi kabisa kabisa, MIMI NI Mmoja Wao.
Kulingana na Yesu Mwenyewe, sisi ndio fasiri ya Neno Lake. Wana wa Ufalme. Dhihirisho la Roho Mtakatifu. Ule Uzao wa Ufalme wa wakati huu.
Unajua nini? Ni wakati wa kila mtu kujua sisi ni nani hasa ili kusiwe na kutatanika. Tutamwacha Mungu azungumze kupitia nabii Wake na ayaweke yote pamoja kwa ajili yenu.
Nguvu zizo hizo zilizounena ulimwengu ukawa ziko katika wale watu walio na Roho Mtakatifu. Hiyo ni kweli. Wanaume kwa wanawake, wakati umewadia kwetu kujua wewe ni nani. Ibilisi anajaribu kukuficha, kukwambia ya kwamba wewe ni maskini kitu kidogo kilichodhalilishwa. Sivyo ulivyo. Ninyi ni wana na binti za Mungu.
Uungu hauko Mbinguni; uko ndani yenu. Haleluya!
J: Uungu hauko Mbinguni, unaishi na kukaa ndani ya kila mmoja wetu!
Kwa kila siku mpya, kwa kila pumzi tunayotwaa, ule Ufunuo Yeye aliotupa wa sisi ni nani unakuwa mkubwa zaidi na zaidi. Sisi ni Neno lililo hai linalokaa katika mwili.
Tunalijua hili kwa sababu Yeye ametupa sisi Ufunuo ni nani Yeye aliyemtuma katika siku yetu; ni yupi ambaye Mungu Yeye Mwenyewe alisema angemtuma kuhubiri na kulifundisha Neno Lake katika Ufunuo 22.
Mimi Yesu nimemtuma malaika wangu kuwashuhudia ninyi mambo hayo katika makanisa.
Yeye alimtuma malaika Wake: William Marrion Branham, kunena katika MAKANISA YAKE…Hilo ewe rafiki linamaanisha ZICHEZENI KANDA KATIKA MAKANISA YENU. Hilo hata halihitaji ufunuo, unatakiwa tu kusoma.
Kulingana na Neno, huu ndio wakati wa udanganyifu zaidi kuliko katika historia ya ulimwengu. Ile roho ya kweli na ya uongo itafanana sana kiasi kwamba ingewadanganya walio wateule kama yamkini.
Mungu alimtuma MALAIKA WAKE kwa makanisa. Tunayo Sauti Yake viganjani mwetu. Tunaweza kusikia kabisa Neno kwa Neno kile hasa Yeye alichosema. Haihitaji ufafanuzi au fasiri, kile tu Bibi-arusi anachopaswa kufanya ni KUBONYEZA PLAY na KUAMINI.
Yeye alituonya, msibadilishe nukta moja au yodi moja kwenye kanda. Usiweke uelewa wako au mawazo yako, isikieni tu Sauti Yangu na muamini. Hadi leo hii, hilo halijawezekana; bali leo ni kwa sababu Ndio njia ya Mungu iliyoandaliwa ya siku hii.
Tumetoka kuzisikia Nyakati Saba za Kanisa na jinsi ambavyo katika kila wakati, roho hizo ziliinuka ili kuwatoa watu kutoka kwenye Neno la kweli. Jinsi ambavyo katika kila wakati, baada ya mjumbe kuondoka, vile walivyofanya ili kuwapeleka watu kwenye kanuni ya imani au fundisho la sharti; kwao wenyewe na kwenye wazo la mwanadamu.
Leo wao wanajaribu kuuua ushawishi wetu na kusema, “Loo, wanaamini kanda ndiyo Sauti iliyo muhimu zaidi unayopaswa kuisikia. Yakupasa ucheze kanda kanisani mwako… huo ni upuuzi. Ndugu Branham hakusema kuzicheza kanda kanisani. Hivi sasa ni sauti ya wahudumu ndiyo mnayopaswa kuisikia.”
Kwangu mimi, hiyo ndiyo mbegu ya hitilafu! NI LAZIMA MBONYEZE PLAY na muisikie Sauti ya Mungu makanisani mwenu kwani Ndiyo Sauti PEKEE iliyothibitishwa na Mungu Mwenyewe. Lazima mtii kila Neno alilonena Mungu.
Mimi Yesu nimemtuma malaika wangu kuwashuhudia ninyi mambo hayo katika makanisa.
Malaika huyo aliyethibitishwa ananena katika Kanisa letu, kwa hivyo Mimi ninawaalika mje muungane nasi kuisikia Sauti hiyo pamoja na Bibi-arusi Wake kutoka kote ulimwenguni kwenye mawasiliano ya simu saa 6:00 MCHANA, masaa ya Jeffersonville,(ni saa 1:00 JIONI ya Afrika mashariki) na kusikia: 65-0118 – “Mbegu Ya Hitilafu”.
Mpendwa Bibi-arusi wa Kristo, hebu na tukutanike pamoja Jumapili saa 06:00 MCHANA, masaa ya Jeffersonville,(ni saa 1 JIONI ya Afrika Mashariki) kusikiliza 60-1211E Wakati wa Kanisa la Laodikia.
Mpendwa Bibi-arusi wa Kristo, hebu na tukutanike Jumapili saa 06:00 MCHANA, masaa ya Jeffersonville,(ni saa 1:00 JIONI ya Afrika Mashariki) ili kusikia 60-1211M Wale Wanawali Kumi, Na Wayahudi Mia na Arobaini na Nne Elfu.
Mpendwa Bibi-arusi wa Kristo, hebu na tukutanike pamoja Jumapili saa 6:00 MCHANA, masaa ya Jeffersonville,(Ni saa 1 JIONI ya Afrika Mashariki) kusikiliza 60-1210 Wakati Wa Kanisa La Filadelfia.
Mpendwa Bibi-arusi wa Kristo, hebu na tukutanike pamoja Jumapili saa 6:00 MCHANA, masaa ya Jeffersonville,(ni saa 1:00 JIONI ya Afrika Mashariki) kusikiliza 60-1209 Wakati Wa Kanisa la Sardi.
