Category Archives: Uncategorized

Uncategorized

26-1108 Okutongozebwa #3

Obubaka: 60-0522M Okutongozebwa #3

PDF

BranhamTabernacle.org

Abatongozeddwa Abaagalwa,

Gavumenti z’ensi yonna zigamba abantu nti, “Mwetegeke, mwetegekere enkomerero. Muterekere ab’enju zammwe emmere n’amazzi mube nga mwerinze ekijja.” Ensi eri ku bunkenke. Kiki ekigenda okubaawo? Olw’enkya lujja na ki?

Tulaba obunnabbi nga butuukirizibwa mu maaso gaffe. Ensi esasika. Okutya n’okubuguutana bibunye mu nsi yonna, nga tebamanyi kijja. Biki ebinaabaawo mu biseera eby’omu maaso? Kiki kye tuyinza okukola? Eno y’enkomerero?

Ebyo nga biri bityo, Kitaffe Katonda naffe abadde Atulabula n’okututeekateeka. Yatuterekera dda emmere n’amazzi, era tubadde tulya ekijjulo era nga tunywa ku luzzi lwaffe olw’ensulo. Twetegese, tetwetegekedde nkomerero, wabula Kukwakkulibwa!!

Omugole wa Kristo tabangako musanyufu oba omumativu okusinga kati. Kitaffe Katonda Agamba Omugole wE omutono okwetoloola ensi yonna nti, “TEMUTYA, musanyuke. Yemmwe balonde baNge. Mbategekera Okukwakkulibwa, Olunaku lwammwe olw’embaga. Mbaggya mu kavuyo kano. Yemmwe Batabani bange ne Bawala Abatongozeddwa. Ebiseera ebyagegerwa biri mu kutuuka webiggwerako.”

Nga kujaguza kwa maanyi kwetulimu. Buli Kigambo kye tuwulira eri ffe kaba kafunfugu akalimu zzaabu. Tukasoggolayo busoggozi ne tukanya kukasiimulako ttaka likeebulungudde enfunda n’enfunda. Olwo ne tugamba nti:

“Mutukuvu, mutukuvu, mutukuvu, Mukama.” “Mutukuvu, mutukuvu, mutukuvu, Mukama.” “Mutukuvu, mutukuvu, mutukuvu, Mukama.”

Amaaso gaffe tugatunuulizza Kaluvaaliyo, era tewali kigenda kutulemesa! Tutambulira mu Luguudo lwa Kabaka, nga tufukiddwako amafuta n’amafuta gali ag’omuwendo, nga tutambula tuyingira Awatukuvu w’Awatukuvu.

Omulabe bw’agezaako okutugamba nti tubuze era tetuli Mugole wE, tunyiga bunyizi ppeesa lya Zannya n’Aleekaana n’Atugamba nti:

Kiggye mu birowoozo byo nti ogenda kubula era ogenda kukola kino, era kino okitidde. Totya kintu kyonna , kubanga agezaako okukubuulira wa w’oli, ani gw’oli, n’engeri gy’oyimiriddemu.

Ensi eri mu KUTYA okw’engeri emu, ate mu kiseera kye kimu Kitaffe Katonda atugamba nti, “TEMUBAAKO kye mutya, Ŋŋenda kubabuulira kyemuli ne gyemulaga.” …EKITIIBWA!!

Mu bunafu bwaffe nga abantu tulemererwa buli lunaku. Tukola ensobi nnyingi nnyo. Tukola ebintu bingi nnyo bye tutasaanidde kukola. Olwo sitaani n’abitukubisa n’abitukubisa, ng’agamba nti tuyinza tutya okubeera Omugole.

Wabula tuyigirizibbwa. Tumanyi kyennyini eky’okukola: Nyiga Zannya owulire Kitaffe Katonda by’Ayogera.

Kati, oyinza okukola ebintu mu ngeri enkyamu, era buli lw’okola ekikyamu kyonna ogenda kukisasulirwa. Weewawo, ssebo, ojja kukungula ky’osiga! Wabula ekyo tekirina kakwate konna na bulokozi bwo. Bw’ozaalibwa Omwoyo wa Katonda, oba ofunye Obulamu Obutaggwaawo era oba tokyasobola kufa ddala nga Katonda bw’Atayinza kufa. Oli kitundu ku Katonda, oli mwana wa Katonda.

Kyasanyusa Katonda okututeekateekerawo. Kyasanyusa Katonda okutufuula Batabani era Bawala bE. Kyasanyusa Katonda okututongoza. Kyasanyusa Katonda okutuwa Okubikkulirwa okwa nnamaddala okw’ekyo ky’Ali ne kye tuli. Kyasanyusa Katonda okutwala malayika wE eyo ng’osomose olutimbe lw’ebiseera n’amulage FFE ku mutala guli tusobole okusanyuka era tuleme kubeera na KUTYA.

Ebyembi, entambi zino si za buli muntu. Za kkanisa ya nnabbi yokka…Ekitiibwa, abo ye ffe. Buli ddakiika gye tusobola, na buli mulundi nga tukuŋŋaanye, kye twagala okukola kwe kunyiga Zannya okuwulira Eddoboozi lya Katonda.

Abalala baabitegeera bulungi. Enjawulo eri bubeezi nti tebabiraba nga ffe bwe tubiraba. Baabitegeera kyekimu nga ffe, wabula eri ffe… Kitufaananira bulungi nnyo okukitunuulira; kubanga tumanyi nti lye kkubo lya Kitaffe Katonda ly’Ataddewo kulw’olwaleero.

Buli lunaku ensi n’abantu baayo beeyongera okwennyamira. Buli kimu kirabika nga ekyoyengera obweyongezi okukwata ekizikiza n’okujjula entiisa. Naye eri Omugole, buli lunaku luleeta okucamuka okuleetebwa Okubikkulirwa okusingawo. Tuwummudde, nga tujjudde Omwoyo wE Omutukuvu, nga tutudde wamu mu bifo eby’omu ggulu.

Wali weebuuzizzaako kyali kitya ku lunaku lwa Pentekooti bwe wajja empewo ewuuma n’amaanyi era Omwoyo Omutukuvu n’Ajjula ennyumba, na buli muntu eyaliwo?

Komya okukitebeereza obutebeereza. Jjangu otwegatteko Ssande ku 6:00 (Mukaaga) ez’omu ttuntu, mu budde bw’e Jeffersonville (z’essaawa 2(bbiri) ez’ekiro e Uganda), nga bw’Akuŋŋaanya empungu zE awamu, ng’Ajjuza ekisenge kyo n’Omwoyo wE Omutukuvu, era ng’Atuteekateekera okujja kwE okubindabinda ng’Atuliisa emmere yE eyaterekebwa. Ojja kuba olya ng’onywa ku biva mu ggwanika lyE, Eddoboozi lya Katonda ku ntambi.

Owol. Joseph Branham

Obubaka: Okutongozebwa #3 60-0522M

Ebyawandiikibwa :

Matayo 28:19

Yokaana 17:7-19

Ebikolwa 9:1-6, Essuula 18 ne 19

Abaruumi 8:14-19

1 Abakkolinso 12:12-13

Abaggalatiya 1:8-18

Abeefeso Essuula 1

Abebbulaniya 6:4-6, 9:11-12

Uncategorized

26-1101 Okutongozebwa #2

Obubaka: 60-0518 Okutongozebwa #2

PDF

BranhamTabernacle.org

Omubisi Gw’Enjuki Abaagalwa,

Mwetegese, abaana ba Katonda abooleseddwa era abatongozeddwa, okutuula wamu mu bifo eby’omu ggulu, nga mwegasse n’Omugole okuva mu nsi yonna, okuwulira Eddoboozi lya Katonda nga lyogera nammwe kamwa ku kutu?

Weewawo!!! Tuli beetegefu okuwulira Eddoboozi lya Katonda nga litubuulira kyennyini ddala kye tuli.

Nze mbayita “omubisi gw’enjuki” kubanga kyemuli. Ye—yemmwe ba mubisi gw’enjuki bange. Omanyi ki nno? Leka…Kiikino Ekyawandiikibwa. Pawulo yagamba nti, “Kubanga mbakwatirwa obuggya (mmwe Ekkanisa yE) bwa Katonda, kubanga mbafumbiza.” Kiikyo awo kiri mw’ekyo, ky’ekyo. “ Kubanga mbafumbiza, mbagaba eri Kristo, nga omuwala omulongoofu.”

Ekitiibwa kibe eri Katonda, malayika wE atufumbizza gy’Ali. Tuli bawala abalongoofu eri Ekigambo kyE, Obubaka buno, eri Eddoboozi lyE ku ntambi. Kati tugabiddwa eri Kristo.

Tujja kuba beetegefu era nga tuli mu kusuubira okw’amaanyi ku Ssande. Tugenda kuluma ku lugalo lwaffe, tusune ku mmeeme yaffe, era tusune ku mitima gyaffe. Tujja kuba tuddamu okuleekaana omulundi omulala nate, nga tutendereza Mukama, nga tuleekaana nti “amiina, aleluuya”, ddala nga emmunyeenye ez’enkya bwe zaayimbira awamu, n’abaana ba Katonda bonna ne boogerera waggulu olw’essanyu; bwe baalaba enteekateeka y’obulokozi, Katonda bwe Yateeka amannya gaffe ku Kitabo kyE nga ensi tennatondebwa.

Tusobola okutegeera nti Taata waffe Katonda alinze, okuva ku ntandikwa y’ensi, okutuusa leero, NG’ALINDIRIRA FFE? Yalaba we twali tujja kwolesebwa mu nnaku ez’oluvannyuma, era Abadde Atulindiridde nga Asinda okusituka n’amaanyi g’Omwoyo Omutukuvu okutubikkulira ebintu eby’ekyama ebibadde bikwekeddwa n’okutuusa leero.

Okuyita mu mirembe gyonna, bannabbi balindiridde okutuusa mu nnaku zino ez’oluvannyuma ebintu bino okulagibwa. Kitaffe Katonda yagamba nti Alinze Ekkanisa yE okukula okuva ku mulembe gw’Abaluza, ogw’Ababaputisiti, ogw’Abamesodisiti, ogw’Abapentekooti, ne kaakano okutuukira ddala ku Jjinja eryo eritikkira enju okutuulako. Olwo Ekizimbe nga kiwedde okuzimba.

Ennaku ezaasuubizibwa Mukama waffe ze Yayogerako era ze yeegomba kati zigenda mu maaso era zituukirizibwa mu maaso gaffe… NE MU FFE. Kati tuli mu Kristo Yesu, nga tutudde mu mirembe egy’omu Ggulu, Emikisa egy’omu Ggulu, Omwoyo ogw’omu Ggulu, nga buli kimu kyaffe. Tuli mu Nsi ensuubize era nga tulina obwannannyini ku buli kimu mu bujjuvu.

Ezzadde lyE ebbereberye lyakula ne lyengera era ne liwuubibwa mu maaso g’Omugole wE. Omwoyo Omutukuvu n’Azzaayo amawulire eri Kitaffe Katonda n’Ayogera bw’ati ku malayika wE ow’amaanyi:

Malayika wO akula mu kisa! Akuba ebikompola mu nsiko okwerula ekkubo. Akwata endiga ezo era asobola okuzilabirira ddala nga Ggwe bw’Okikola. Taliziwa bimererezi bya ku nnyanja. Tajja kuziwa muddo gwe zinaawanda bulusu. Bwe zimwekuŋŋaanyirizaako nga zigamba nti, ‘Twagala kwegatta ku kkanisa eri,’ agamba nti, ‘Bunira, ogwo togwetaaga! Nedda ssebo. Guuguno gwe weetaaga, “Mwenenye, mubatizibwe, buli muntu mu mmwe, okuyingira mu linnya lya Yesu Kristo, okuggibwako ebibi byammwe. Munaaweebwa ekirabo gwe Mwoyo Omutukuvu.”’

“Oo, ddala bw’atyo ayogera?”

“Weewawo Ssebo, mazima ddala akikola.”

“Bwe bulungi, eyo y’engeri ddala gye nnaKiwandiikamu.”

“Eyo y’engeri ddala gy’aKyogera.”

“Omanyi ki nno? Nnalaba Ssaabalabirizi gundi-ne-gundi nga amugamba nti ‘tayinza kujja mu kibuga kino n’akuba olukuŋŋaana.’ Naye, Omanyi, nnina engeri gye nnamukulembedde, nnagambye nti, ‘Mala gagenda.’ Baamugambye nti abe mugezi aggyeyo entambi ze zonna, era aleme kuzireka kufuluma. Twamaze gagenda!”

“Oyo ye mwana waNge Atongozeddwa gwe mbadde nnindirira. Kati Nsobola okuMwogereramu ne Mbikkula ebyama byaNge byonna ebikise eri endiga Zange.”

“Taata Katonda ow’ekitalo.”

“Kati wandyagadde nkuwe amawulire ku baana bO abalala?”

“Weewaawo, bali batya?”

“Oh taata…Ogenda kubeenyumirizaamu nnyo. Kabajjo akameguddwa mu ndoddo eri ebaddengawo. Ba ssaabalabirizi abo ba k’awo kadda bakyabagamba ekintu kye kimu, obutagenda mu makanisa g’entambi ago okuwulira Eddoboozi lyO. Bagamba nti entambi si ze Ddoboozi erisinga obukulu lye bateekwa okuwulira; waliwo amaloboozi agazisinga obukulu kati.”

“Omanyi Endiga zO kye zigamba ababuulizi abo?”

“MUBUNIRE, TUGENDA KUSIGALA N’ENTAMBI, TUGENDA KUSIGALA N’EDDOBOOZI LYA KATONDA.”

“Ddala kyebakola?”

“Weewaawo Ssebo, bali ddala nga Ggwe.”

“Oh, nga kya kitalo. Ekyo kiNsanyusa nnyo. Mbadde mbalindiridde ebbanga ddene nnyo. Kati nabo beeteeseteekedde OKUTONGOZEBWA!!”

“Bagenda kubeera ku nkondo zaabwe gye bavunaanyizibwa ku Ssande eno ku 6:00 (Mukaaga) ez’omu ttuntu, mu budde bw’e Jeffersonville (z’essaawa 2(bbiri) ez’ekiro e Uganda), okuwulira Eddoboozi lyO. Bajja kuba bumu era nga bakuŋŋaanye okuva mu nsi yonna era bayite buli muntu okubeegattako.”

“Kyanjawulo, NJA KUBEERAWO NABO. ”

Owol. Joseph Branham

Akajjukizo: Tewerabira essaawa z’obudde bw’emisana z’ogenzeddwamu essaawa emu.

Obubaka : Okutongozebwa #2 60-0518

Ebyawandiikibwa:

Olubereberye 1:26
Abaefeso Essuula Esooka
Abaruumi 8:19
Abaggalatiya 1:6-9
Abebbulaniya Essuula ey’omukaaga
Yokaana 1:17

Uncategorized

26-1025 Okutongozebwa #1

Obubaka: 60-0515E Okutongozebwa #1

PDF

BranhamTabernacle.org

Abeesigwa mu Kristo Yesu abaagalwa,

Nga kiseera kya kitiibwa nnyo kyetulimu. Tuli mu kusuubira okw’amaanyi buli sabbiiti nga bwe twegatta awamu okwetoloola Eddoboozi lyE. Ebirowoozo byaffe eby’omwoyo byonna tebiriimu  kutabulwatabulwa. TuMANYI ddala y’Ani. TuMANYI ddala Ye ki. TuMANYI ddala ffe b’ani; ab’enju emu ennene WAMU NAYE!

“Yawa omuntu eky’okubeera katonda omutono.” Kubanga Ye Katonda Kitaffe, era Yafuula omuntu katonda omutono, n’olwekyo tAkyali Abeerawo Yekka, abeerawo n’ab’enju yE. Ela , Ela , Elohim. Kati, kati Ye Yakuwa. Yakuwa, ekitegeeza, “Oyo abeerawo wamu n’ab’enju yE.”

Ab’enju Omugole wE bali mu kutuukirizibwa Eddoboozi lya Yakuwa yennyini. Atuyigirizza engeri y’okulwanyisaamu buli mulabe atulumba; engeri gye tuyinza okumuwangula n’okumuvvuunuka n’Ekigambo, kubanga Ekigambo kibeera era kitudde munda mu ffe. Yatugumya nti, “FFE KIGAMBO”. N’olw’ekyo ekintu kyonna kye tusaba mu Linnya lye, tusobola okukifuna singa tukkiriza….ERA TUKKIRIZA!

Ayogedde era n’Atubikkulira engeri y’okufuuka ebikula by’abasajja n’abakazi abatuukiridde tusobole okubeera ekifo mw’Abeera. Yakookolima mu ddobooze ly’Empngu era N’Akookolima  okukuŋŋaanya Omugole wE omwagalwa awamu okututegeeza nti Ye Muluŋŋamya waffe, era nti Abadde Atukulembera era ng’Atuluŋŋamya nga Akozesa omuluŋŋamya malayika wE ow’oku nsi, William Marrion Branham.

Kati alinayo essomo eddala ery’enjawulo ly’Ayagala okutuyigiriza n’okutubikkulira. Ayagala okulangirira nti tuli baana bE abatongozeddwa. Erinnya lyaffe likola ng’Erinnya lyE. Tufulumye Kanani, ensi, era KAAKANO tutudde wamu mu bifo eby’omu Ggulu, nga tulya Emmaanu eyaterekebwa, eyakwekebwa.

Kati Agenda kutubuulira kye tulina okukola okusobola okwetegekera Obubaka bwE obuddako, na kiki ekiyinza okubaawo singa tukikola.

Tuteekwa okuba nga tumaze okusaba era nga tweetegekedde Obubaka; Tukuŋŋaane wamu ng’abatukuvu okuwulira Eddoboozi lyE, nga tubatizibbwa n’Omwoyo Omutukuvu, nga tujjudde emikisa gya Katonda; Nga tewali birowoozo bibi; Nga tewali kintu kyonna ky’olina eky’obutakkaanya ku munno; Nga twogerera mu kwagala n’okukwatagana; Mubeere mu ndowooza emu, mu kifo kimu wamu mu bifo eby’omu Ggulu wansi w’embeera ey’omu Ggulu; Ebibi byaffe byonna nga biri wansi w’Omusaayi, mu kusinza okutuukiridde; Emikono n’omutima gwaffe nga biyimusiddwa waggulu eri Katonda, nga tusinza wamu mu bifo eby’omu Ggulu.

Singa tukola ebintu bino, bino bye bigenda okubaawo ku Ssande eno:

  • Okuwonyezebwa okw’obwakatonda
  • Okumanyirwawo
  • Okubikkulirwa
  • Okwolesebwa
  • Amaanyi ag’enjawulo
  • Ennimi
  • Okuvvuunula kw’Ennimi
  • Amagezi
  • Okumanya
  • Emikisa egy’omu ggulu
  • Essanyu eritoogerekeka era lijjudde Ekitiibwa

Buli mutima gujja kujjuzibwa Omwoyo. Olwo amangu ago wajja kuva mu Ggulu okuwuuma ng’empewo ekunta ey’amaanyi era Ajja kutuwa omukisa n’emikisa gyonna egy’omwoyo.

Ekyo kye kigenda okubaawo ku Ssande ku ssaawa 6:00 (Mukaaga) ez’omu ttuntu, mu budde bw’e Jeffersonville (y’essawa 1(emu) ey’omu kawungeezi e Uganda), Katonda gy’Atadde ekifo eky’enjawulo Omugole w’asobola okukuŋŋaanira awamu okuwulira Eddoboozi lyE mu mwoyo omu, mu kifo kimu, ng’emikono gyaffe n’emitima gyaffe giyimusiddwa waggulu eri Katonda, nga tusinza wamu mu mbeera ey’omu Ggulu.

Owol. Joseph Branham

Obubaka:    Okutongozebwa #1 60-0515E 
    

Ekyawandiikibwa:

Yoweri 2:28
Abaefeso 1:1-5

I Abakkolinso 12:13

I Peetero 1:20

Okubikkulirwa 17:8

Okubikkulirwa 13

Uncategorized

26-1004 Olutalo Olukyasinzeeyo Mu Zaali Zirwaniddwa

Obubaka: 62-0311 Olutalo Olukyasinzeeyo Mu Zaali Zirwaniddwa

PDF

BranhamTabernacle.org

Ba Mikaaya Abaagalwa,

Olutalo olw’amaanyi olusingayo olwali lulwaniddwa kati lubindabinda okutandika. Katonda abadde alondobamu abajaasi be ab’omutindo ogusinga ku gwa bulijjo okumala emyaka egisukka mu kakaaga, era mwategekerwawo era mwerobozeddwa okubeera ejje lyE ery’ekitalo.

Abadde Abambaza, nga Abatendeka, era kati eddwaniro ttegeke, okulwana kunaatera okutandika. Takulonze kubeera mu Ggye lyE ery’ekitalo kyokka, n’okukulonda Akulonze okubeera Mikaaya nnabbi mu Ggye lyE.

Ekiseera kituuse, olunaku lutuuse; mugenda kuba mufuna okutendekebwa butereevu okuva ku Mpagi y’Omuliro Mwennyini okuwangula buli mulabe. Mugenda kufuna ebiragiro eby’enjawulo, Kigambo ku Kigambo, ku kiki eky’okukola okusaanyaawo buli mwoyo omubi. Kijja kufuumuula buli bulwadde na buli sitaani ajja mu maaso go. Tewali kiyinza kuyimirira mu kkubo lyo.

Oluvannyuma lw’okutendekebwa kuno okw’enjawulo, ojja kuba weetooloddwa nnyo olukomera lw’Ekigambo okutuusa lw’onoogobera ebweru ebibi byonna. N’osuula wansi okukubaganya ebirowoozo. N’osuula wansi by’obadde okkiriza olw’okutya n’obutamanya ebikubaddemu. N’osuula wansi okweraliikirira. N’osuula wansi endwadde. Osuule wansi ekibi. Ojja kutegeera nti oli waggulu waakyo, ozuukiziddwa mu Kristo Yesu, ng’otudde mu Bifo eby’omu ggulu, na buli sitaani nga ali wansi w’ekigere kyo. Ojja kutegeera mu bujjuvu era OKKIRIZE nti ggwe Ekigambo.

Ajja kuba akutendeka by’olina okwekengera. Ajja kukulagirira nti omulabe wo bw’awaguza n’akukkirizisa nti Eky’okulwanyisa kyo si kya maanyi kimala, ajja kukusikako buli kyakulwanyisa.

Wabula tujja kujjukira okutendekebwa kwaffe, ffe abajaasi, era tugambe sitaani oyo: Si ffe, tetulina kyetuli. Eky’okulwanyisa kyaffe Kye Kigambo kya Katonda era Kijja kuwangula BULI MULABE, essaawa yonna, mu kifo kyonna, kubanga kye KIGAMBO KYE, ERA ATUTENDESE N’ATUBIKKULIRA NTI KAAKANO TULI KIGAMBO KYE EKIFUUSE OMUBIRI. N’OLW’EKYO, tetusobola kuwangulwa, tuli jje lya KATONDA eritawangulwa.

Olumu ku nnaku ezisinga obukulu mu byafaayo by’ensi lugenda kubeerawo ku Ssande eno. Ba Mikaaya bE bajja kuba bagattiddwa wamu okuva mu nsi yonna wansi w’Eddoboozi lya Genero waabwe ery’ekitalo, gye tunaabeerera nga tulukibbwa bunywevu ddala wamu mu ndowooza emu, nga tewali kisiikirize na kimu kya kubuusabuusa awantu wonna.

Olwo, singa tunakkiriza bukkiriza, ERA TUKKIRIZA, tewajja kubaawo muntu munafu okwetoloola ensi yonna. Singa tunaasobola okutereeza obutereeza ekintu ekyo ekimu, tewajja kubaawo muntu yenna ayaayaana kufuna Mwoyo Mutukuvu ataaMufune, era wajja kubaawo okuwonyezebwa kw’emmeeme n’omubiri wano na wali awatali kuteebereza ani addako, singa tunaanyweza bunyweza bifo byaffe. Kaakano kye kiseera. Ye ffe bantu abo. Omwoyo wa Katonda ayimusizza omutendera ku buli mulabe; tuli OMU KU BO era tewali kutuyimiriza!!

Tufudde eri obusimu bwaffe, tufudde eri okukubaganya ebirowoozo kwaffe, tufudde eri ebintu ebyo byonna. Obulamu bwaffe bukwekeddwa era tuziikiddwa mu Linnya lya Yesu Kristo, ne tuzuukizibwa wamu naye. Era wonna w’Abeera, naffe we tubeera.

Tukoonye ekikalappwa kyo sitaani n’obumwa bwaffe obw’ekinyonyi okutuusa lwe tukifulumye, nga tukwasa tukozesa “BW’ATYO BW’AYOGERA MUKAMA. BW’ATYO BW’AYOGERA MUKAMA. BW’ATYO BW’AYOGERA MUKAMA.” Kyaddaaki kati tusika ku mpewo ensu. “BW’ATYO BW’AYOGERA MUKAMA.” Tuutuno tuzze sitaani, emitwe gyaffe tugiyisizzaamu giri wabweru. “BW’ATYO BW’AYOGERA MUKAMA, OWANGUDDWA.”

Sitaani tumuwangula na ki?

Ekigambo!
Leka tukyogere; Ekigambo! Ekigambo! EKIGAMBO!!

EBIRAGIRO BY’OKUTENDEKEBWA EBISINGAWO

Kati omulabe bw’alumba n’agezaako okukugamba nti olina okukola kino, olina okukola ekyo, toliiko kalungi konna, tosaanira, towonyezeddwa, okyalina ebizibu byo bye bimu. Kiki ky’ogenda okukola?

Va wendi.” Weppa! Omutema nga okozesa Ekigambo. Oba dayimooni, oba mulabe, oba bulwadde, oba kimbe, kyonna kye kiri, twala Ekigambo ekyo okigalule nga okozesa Ekitala kiri. Era bw’okitema omulundi ogusooka, ne kirabika nga ekitava mu kifo, ddamu okisanjage, oddemu okisanjage, era oddemu okisanjage.

Ekigambo tukikkiriza bukkiriza ku musingi nti, “Katonda bw’Atyo bwe Yagamba,” era ekyo kiteekawo ensulo etuyunga ffe na Ye. Buli mukutu gugguddwawo wakati waffe. Tugamba nti, “Simanyi ddi lwe ŋŋenda kukifuna, naye nja kukifuna. KATONDA BW’ATYO BWE YAGAMBA. Buli kubuusabuusa kwonna KUVUDDEWO…n’okubuusabuusa tubuusabuusa okubuusabuusa kwaffe.”

Tulwana ne sitaani ne tutwala Ekigambo kya Katonda. Bwemba nnina kye mpulira mu mubiri gwange, oba nga sirina kyempulira mu mubiri gwange, si nsonga kiki ekibaawo, Katonda bw’Atyo bwe Yagamba. Ekyo kikimala.

Mugoberere ebiragiro bino, abajaasi, okutuukira ddala ku nnukuta. Muddiŋŋanenga Ebigambo bino omulabe bw’alumba. Si bigambo byammwe, BIGAMBO BYE, ERA EBIGAMBO BYE TEBISOBOLA KULEMERERWA. Atuwadde amaanyi okukozesa Ekigambo kyE nga atufuula Ekigambo kyE. Sitaani bw’alumba, musomere ebiragiro byo.

EBIRAGIRO BYA GENERO WAFFE

Biibino byennyini bye njagala mukole.

Ddamu ekirayiro kino era okkirize buli Kigambo olw’okusumululwa kwo okujjuvu.

Sitaani, nviira! Wano ŋŋenda kuvaawo.

Sigenda kweyongerayo kugalamira wano. Sigenda kweyongerayo kutuula wano. Sigenda kweyongerayo kubeera mu ttwalwe lya sitaani lino ekadde. Njasa ekikalappwa kino, enkya ya leero.

Ndi mpungu. Amiina! Aleruuya!

Awo njagala okole kino:

Nga okyasa okozesa, “BW’ATYO BW’AYOGERA MUKAMA. BW’ATYO BW’AYOGERA MUKAMA. BW’ATYO BW’AYOGERA MUKAMA.”

Ggulawo ebirowoozo byo, ogambe nti, “Ekigambo kyo kituufu.”

Mukama, sigenda kufaayo ku ngeri gye mpulira, omuntu yenna ky’agamba, oba nze kye ŋŋamba. Ŋŋenda kuzibikira ebituli, nzibukule buli kkubo lyange, okutabulwatabulwa kwonna, n’okubuusabuusa, n’obutakkiriza byennali mbaddeko nabyo. Buli nneewulira y’omubiri gye nnali nfunye, obulwadde bwonna bwe nnali nfunye, ebirala byonna bye nnali nfunye, byonna mbifuumuulira wabweru. Ebyo byonna mbiyitako. Nzija butereevu ddala ku mwoyo gwange.

OKUKKIRIZA kwo kujja kutandika okweyongera era nga kweyongera waggulu. Awo mugambe nti, “Ai Mukama, kka wansi. Wagamba nti wankola nga ndi omuntu ow’eddembe eryesalirawo nga njawula ekituufu ku kikyamu n’olw’ekyo byenkola mbivunaanyizibwako.”

“Oli mwana wange.”

Kirungi, nzigulawo omutima gwange n’ebirowoozo byange.

“Yingira, Mukama waffe Yesu.”

Sikayo Okukkiriza, Ekitala ekyo eky’Omwoyo, BW’ATYO BW’AYOGERA MUKAMA.

Leekaana nti, “Aleruuya!” Amiina.

Olwo oteme buli mulabe akuli maaso. Amiina. Kiikyo awo. Tema buli mulabe. Singa ako—okooyo-yo k’edda akateekawo embeera y’okuwulira nga w’oli awali emizimu katandikiriza okukuleetera okuwulira nga… Tema akantu ako, n’Ekigambo kya Mukama waffe.

EBIRAGIRO BYO EKISEMBEYO OMUJAASI.
GAMBA OMULABE NTI:

“Nviira.” We ppa!

Omutema n’Ekigambo. K’ebeere dayimooni, oba nga mulabe, oba bulwadde, oba kimbe, kyonna kye kiri, kwata Ekigambo ekyo okigalule nga okozesa Ekitala. Era bw’okitema omulundi ogusooka, ne kiba nga ekitaseguka, ddamu okisanjage, oddemu okisanjage, era oddemu okisanjage. Era kifumite okutuusa nga okiwomogoddemu ekituli, ng’akakoko akato akayasa ejji mwekali kafulume; oba empungu, ggwe gy’oli. Koona ekikalappwa ky’obulwadde gwe mwennyini okutuusa okukifuluma. Kozesa kutema-tema nga engeri yo ey’okukifuluma, era ogambe nti, “Aleruuya! Addako ali ludda wa?” Amiina. Olutalo bwe lutyo bwe luli. Omujaasi bw’atyo bw’aba. Oyo y’aba omujaasi w’omusaalaba. Weewaawo, ssebo. Buli mulabe mukube tonziriranga. Lwaki? Lwaki?

Ffe, Ezzadde lya Ibulayimu eddangira, eryategekerwawo.

Ekitiibwa, buli mulabe awanguddwa. TEWALI KINTU KYONNA kiyinza kuyimirira mu maaso g’Ekigambo kya Katonda, era tuli Kigambo kya Katonda. Yeffe zzadde lyE eddangira era buli kisuubizo kyaFFE.

Olunaku lutuuse, Omugole akkirizza buli Kigambo era aKikolerako. Tweteeseteese nga tuyita mu kuwulira n’okukkiriza Ekigambo kyE.

Bw’oba olina obwetaavu bw’ekintu kyonna, bw’oba oyagala okujjuzibwa n’Omwoyo Omutukuvu, bw’oba oyagala okuwonyezebwa, bw’oba oyagala buli sitaani agoberwe ebweru, bw’oba oyagala okubeera Omugole wa Kristo, kaakano kye kiseera, okuwulira n’okukkiriza Eddoboozi lyE kye kifo.

Bw’oba oyaayaanira ebintu bino era ng’oyagala okubeera mu kubeerawo kwa Mukama, okusembera okumpi ennyo okusinga we wali obadde, jangu otwegatteko ku Ssande ku ssaawa 6:00 (Mukaaga) ez’omu ttuntu, mu budde bw’e Jeffersonville (y’essawa 1(emu) ey’omu kawungeezi e Uganda), nga Genero waffe ow’amayinja ana bw’Alagirira Omugole wE Mikaaya ow’amaanyi ku ngeri y’okuwangula buli sitaani, buli mulabe, okusumululwa, n’okujjuzibwa Omwoyo wE Omutukuvu, n’okubeera abeetegefu olw’okujja kwe okubindabinda.

Owol. Joseph Branham

Obubaka: Olutalo olw’amaanyi olusingayo olwali lulwaniddwa. 62-0311

Ebyawandiikibwa:
1 Peetero 5: 8-10
Abeefeso 6:10-17
Danyeri 12: 1-7

Uncategorized

26-0927 Katonda Omugagga mu Kusaasira

Obubaka: 65-0119 Katonda Omugagga mu Kusaasira

PDF

BranhamTabernacle.org

Ebikula Bya Katonda Abaagalwa,

Ye mmwe Kigambo kya Katonda ekyoleseddwa ekyasuubizibwa eky’olunaku luno.
Ekyo kyemubaddenga bulijjo. Temugenda bugenzi kukifuuka, wabula kaakano muli batabani era bawala ba Katonda; kubanga Katonda, omugagga mu kusaasira, yabalina mu ndowooza ye okuviira ddala ku lubereberye.

Nga tAnnaba na kufuuka mubiri gukwatibwako wano ku nsi; nga tewannabaawo kintu kyonna, wali omu ku Bikula Bye. Yamanya erinnya lyo ly’oliyitibwa. Yamanya langi y’enviiri z’oliba nazo. Yamanya byonna ebikukwatako.

Awo, bwe wawulira Eddoboozi lye nga liyakaayakana mu maaso go, waaliwo ekintu mu ggwe ekyaleekaanira waggulu; wamanya gyewava era n’ojja gyeLiri. Wamanya nti ago ge Mazima. Wamanya nti eryo lye kkubo lya Katonda lye yateekawo leero kubanga Ensigo eyo bulijjo lyalinga mu ggwe.

Kaakano ali mu kutusitula ng’Atutwalira ku biwaawaatiro by’empungu. Ekigambo kitugamba nti bulijjo ageraageranya bannabbi bE ku mpungu. William Marrion Branham ye mubaka wa Katonda empungu eyakakasibwa obutalekaawo kabuuza kulw’olunaku luno. Ebyo bye biwaawaatiro by’empungu bye tulina okusitulibwako okugenda mu Nsi ensuubize, kubanga ye, nnabbi-mpungu wa Katonda, yeetisse obubaka bwa Katonda, ng’akoowoolayo era ng’ayogera Ekigambo kyE, ng’atuukiriza Omugole wE.

Tugoberera Katonda nga bwe tugoberera William Marrion Branham n’obubaka bwe obw’okununulibwa. Era Baibuli yagamba nti, “…tebaazikirizibwa wamu n’abo abatakkiriza.” Kubanga Katonda yali mugagga mu kusaasira gyebali; kubanga baali mu kugoberera ebiragiro byE.

Katonda ayagala tugoberere ebiragiro bye, era ebiragiro bye byagamba nti: Nze Ddoboozi lya Katonda gy’oli. Yogera ebyo BYOKKA ebiri ku ntambi ezo. Eddoboozi lyaNge lye Ddoboozi lyokka eryogera Ebigambo by’obwa nnantakola-nsobi. Kyogerwa butuukirivu ddala era obifuna butuukirivu ddala okuva mu Ddoboozi lyaNge. N’olw’ekyo, Eddoboozi lya Katonda ku ntambi lye byonna bye weetaaga, kubanga Nze, Katonda omugagga mu kusaasira kwaNge, Ndikugabiridde. Ly’Ekkubo lyaNge lye Ntaddewo olw’olunaku luno.

Katonda omugagga mu kusaasira yakulonda era n’Akuteekateekerawo okuba n’Okubikkulirwa okwo okuwulira Eddoboozi eryo. Katonda omugagga mu kusaasira yamanya mu kiseera kino eky’enkomerero, lwe walibaawo okutegeera okukyamu kungi nnyo, amaloboozi mangi ag’enjawulo n’okuvvuunula ku Bubaka, nti twandyetaaze Eddoboozi Ettuukirivu, n’Ekkubo ettuukirivu lye twandisoboddenga okugendamu tusobole okwewulirira ku lwaffe, Kigambo ku Kigambo ku Kigambo, ekyo kyennyini kye Yayagala okwogera eri Omugole wE.

Toyinza kumala gatwala omuntu omulala bye yayogera. Olina okutwala Katonda bye yayogera. Yagamba nti, “Leka buli kigambo kya muntu kibeere obulimba, naye ekyange mazima.”

N’olw’ekyo, Katonda, omugagga mu kusaasira kwE, ataddewo engeri Omugole wE gy’ayinza Okuwuliramu Eddoboozi lyE 24/7 (essaawa abiri mu nnya mu nnaku musanvu eza sabbiiti), ennaku 365 mu mwaka, ng’anyiga (eppeesa lya) Zannya, era n’aweebwa obulamu ng’awulira Eddoboozi lya Katonda nga lyogera kamwa ku kutu eri emitima gyabwe.

Ye ffe Kigambo kyE ekifuuse omubiri. Tetulina maanyi, wabula Atuwadde obuyinza bwE. Buli omu ku ffe abulina. Bw’oBugaana, ojja kusigala w’oli. Wabula singa tunaaBusembeza, bujja kukola ebisukkiridde obungi, kubanga Katonda mugagga mu kusaasira kwE.

Era bw’oba nga oli omusajja oba omukazi, sifaayo mbeera ki gy’olimu, olina obuyinza bwa Katonda, olw’ekisuubizo ekimu, kubanga Mugagga era Yasuubizibwa okukola ebisukkiridde obungi. “Bw’ogamba olusozi luno nti, ‘sigulwa,’ n’otobuusabuusa mu mutima gwo, wabula n’okkirizza nti ky’oyogedde kijja kutuukirira, osobola okufuna ekyo ky’oyogedde.” Tolina maanyi, wabula olina obuyinza.

Omugole asobola okutuukirizibwa n’okugattibwa awamu ng’ayita mu ngeri emu yokka kwe kuwulira Ekigambo kyE ekituukiridde ekyatugabiririwa leero: Eddoboozi lyE. Lye Ddoboozi lyokka eriyinza okugatta n’okutuukiriza Omugole. Lye Ddoboozi lyokka Katonda lye Yatugamba nti tuteekwa okuwulira era OKUGOBERERA. Okufaananako Musa, Ow’oluganda Branham yakimanya nti ye yalondebwa okututwala ffe abaana mu Nsi ensuubize kubanga ekisuubizo kyaweebwa ye. Era alina okutwetikka atutuuse mu Nsi ensuubize.

Nabbi-mpungu waffe yatuyigiriza nga atugereza. Endagaano Enkadde yali kisiikirize kya Ndagaano Empya. Yatubuulira nga bwe tuteekwa okubeera abeegendereza na biki bye tulina okwekengera mu kiseera kino eky’enkomerero. Yatulabula ku mwoyo gwa Koola, ne ku Dasani, n’ekikoosi kyabwe eky’abantu abatakkiriza, nga bwe baagezaako okugeegeenya. Baagezaako okubaako kye banyigawo mu nteekateeka ya Katonda.

Tebaayagala nteekateeka ya muntu omu. Ekyo tebaakyagala. Baali balina okubaako kye bakola. Koola yagamba nti, “Nga lwaki, eriyo abasajja abatukuvu okukusingako ggwe, Musa. Weeyisa nga gy’oli ggwe lubalama lwokka oluli ku…oba akayinja kokka akali ku lubalama, manya.” Era ne bagamba nti, “Nze—nze…tosaanidde kukola otyo. Era wano waliwo abasajja abalala.”

Ab’oluganda ne bannyinaze, siri mu kugezaako kwawulamu makanisa nga njogera n’okujuliza ebintu bino, Omwoyo Omutukuvu y’Ali mu kukola ogw’okwawulamu. Wuliriza Obubaka buno bwe tunaatera okuwulira. Nabbi y’ali mu kulabula Omugole ku biki by’alina okwekengera. Ali mu kutubuulira omwoyo ogwo kye gwakola luli, era kye gugenda okuddamu okukola mu lunaku lwaffe.

Mazima ddala, siri mu kugezaako kukuŋŋaanyiza bantu ku buweereza obw’emirundi etaano, mu ngeri ennyangungu tebusobola kugatta Mugole. Ndi mu kufuba okubagattira ku Kigambo kya Katonda ekirongoofu, ekitatabikiddwamu birala, Eddoboozi lyokka eriyinza okugatta Omugole.

Tuwulira ebintu bye bimu leero, Ow’oluganda Branham si ye musajja yekka asobola okubuulira Obubaka, naffe twayitibwa okubuulira Obubaka. Mazima bwekiri, baayitibwa, naye olwo, balemererwa okutegeera obukulu bw’okuwulira Eddoboozi eryo n’okukkiriza nti Bubaka bwa muntu omu, nga bayita mu kwekwasa obusonga-songa OBUTAzannya Ddoboozi lya Katonda mu makanisa gaabwe, ne bateeka obuweereza bwabwe nga bwe bwa makulu agasingako.

Era Baibuli yagamba nti, “Ne batambulira mu kkubo lya Balamu, ne babulira mu kuwakana kwa Koola.” Baabulira mu kuwakana! Okuwakana kwa Koola kwali ki? “Nga lwaki, olowooza ggwe musajja omutukuvu wekka? Nga lwaki, Aba Katonda…Ffenna tuli batukuvu. Ekkanisa yonna terina buzibu. Buli…Ffenna tukwatagane, ekyo kye tusaanidde okukola.” Awo we baabulira [Perish – okuva mu bulamu buno n’okufiirwa ebitundu ebikozi ebitwala mu maaso obulamu – Omuvvuunuzi], ekyo. Era mu butuufu twakigwanira. Twali tusaanidde kukolebwa tutyo.

Obubaka buno, Eddoboozi lyE, lye ddoboozi lyokka eryayogerwa butegeerekefu ddala era nga liri mu kufunibwa Omugole butegeerekefu ddala. Obuweereza obwesigwa buliwo kukubiriza abantu okusigala n’Eddoboozi eryo nga babuulira n’okunokola Obubaka. Wabula si kububuulira kwokka n’okoma awo, wabula BATEEKEDDWA OkuBuzannya mu masinzizo gaabwe, n’okugamba abantu baabwe nti LYE DDOBOOZI ERISINGA OBUKULU, bw’atyo Omugole asobole okuwulira Eddoboozi lya Katonda, okuva eri Katonda yennyini.

Tewali kisinga kuwulira Eddoboozi lya Katonda. Tewali kufukibwako mafuta kusinga okufukibwako amafuta okuli ku ntambi. Tewali ngeri ndala yonna ya kugatta Mugole okujjako okuyita mu Ddoboozi lya Katonda ku ntambi. Tewali KKUBO TTUUKIRIVU ddala lyonnA okujjako OKUNYIGA ZANNYA N’OKKKIRIZA BULI KIGAMBO KY’OWULIRA. Mazima lye Katonda, omugagga mu kusaasira kwe eri Omugole wE. Lye kkubo lyE ETTUUKIRIVU ly’Ataddewo kulw’olwaleero.

Mbayita mujje mugattibwe wamu wansi w’okufukibwako amafuta okusinga obunene mu lunaku lwaffe Ssande eno ku ssaawa 6:00 (Mukaaga) ez’omu ttuntu, mu budde bw’e Jeffersonville (y’essawa 1(emu) ey’omu kawungeezi e Uganda), nga bwe tuwulira Katonda ng’Ayogera n’okuyigiriza abaana be Ekigambo ekituukiridde ng’Aleeta Obubaka: Katonda Omugagga Mu Kusaasira 65-0119

Owol. Joseph Branham

Ekyawandiikibwa eky’okusoma: Abeefeso 2:1-5

Uncategorized

26-0920 Ensigo Ekontana N’ey’Amazima

Obubaka: 65-0118 Ensigo Ekontana N’ey’Amazima

PDF

BranhamTabernacle.org

Omu Ku Bwo [Obw’Entambi – muvvuunuzi] era Omu ku Bo Abaagalwa,

Abantu bwe batubuuza,

Ekibuuzo: Oli omu ku bantu b’olutambi abo ba “Nyiga Zannya” abakkiriza nti Katonda yatuma William Marrion Branham okuyitayo Omugole wa Katonda?

Okwanukulwa: WEEWAWO, ndi omu ku bo.

Ekibuuzo: Okkiriza buli Kigambo ekyayogerwa ku Ntambi ezo?

Okwanukulwa: MUKAMA YEEBAZIBWE, ndi omu ku bo.

Ekibuuzo: Olwo oba oteekeddwa okukkiriza ne kino nti oteekwa Okunyiga Zannya owulire Eddoboozi lyE okusobola okubeera Omugole wE?

Okwanukulwa: Ekitiibwa, ekyo kyennyini kyendi, oyo yenze okutuukira ddala ku kikolo… Ndi omu ku bo.

Ekibuuzo: Kyogezaako okuŋŋamba, okkiririza ddala nti oli Nsigo yE Ennangira, ennonde, gye Yeeroboza, eyategekerwawo okuva ku kutondebwa kw’ensi okukkiriza Ekigambo kyE, okubeera Omugole wE, era nga otuukiridde mu maaso gE, nga tooliko kibi kyonna, era mu ngeri ennyangungu tekisoboka gwe okulimbibwa?

Okwanukulwa: Aleluuya, watuuse dda, oyo yenze kikumi mu kkumi ku kikumi, NDI OMU ku BO.

Okusinziira ku Yesu Mwene yeffe kuvvuunula kw’Ekigambo kyE. Abaana b’Obwakabaka buli. Okulabisibwa kw’Omwoyo Omutukuvu. Ezzadde ly’Obwakabaka buli ery’omulembe guno.

Omanyi nno? Kye kiseera buli omu okumanya kyennyini kyetuli waleme kubaawo nsobi. Katuleke Katonda ayogere nga Ayita mu nnabbi wE kyonna akikukuŋŋaanyirize.

Amaanyi geegamu ago agaayogera Ekigambo ensi n’etondebwawo okuva mu Kyo gali mu bantu abo abalina Omwoyo Omutukuvu. Ekyo kituufu. Abasajja n’abakazi, ky’ekiseera tube nga twazudde kiki ky’oli. Omulabe agezaako okukukweka emabega, nga akugamba nti oli kantu akamu akabubiddwa ekigangabwa ne kafuuka kabwa kagonvu. Ekyo si ky’oli. Muli batabani era bawala ba Katonda.

Obulamba bwa Katonda tebuli mu Ggulu. Buli mu mmwe. Aleluuya!

Okwanukulwa: Obulamba bwa Katonda tebuli mu Ggulu, buwangaalira era butudde mu buli omu ku ffe!

Buli lunaku, buli mukka gwetussa, Okubikkulirwa kw’Atuwadde okw’ekyo kyetuli kweyongera era kweyongera. Yeffe Kigambo ekiramu nga kitudde mu mubiri.

Kino tukimanyi kubanga Atuwadde Okubikkulirwa kw’ani gwe yatuma mu lunaku lwaffe; ani Katonda Mwene gwe Yagamba nti alituma okubuulira n’okuyigiriza Ekigambo kyE mu Okubikkulirwa 22.

Nze Yesu ntumye malayika wange okubategeeza mmwe ebyo mu kkanisa.

Yatuma malayika wE: William Marrion Branham, okwogera mu KKANISA ZE… Ekyo mukwano gwange kitegeeza MUZANNYE ENTAMBI MU MAKANISA GAMMWE. Ekyo tekikwetaagisa na kubikkulirwa, weesomerako bwesomezi.

Okusinziira ku Kigambo, kino kye kiseera ekisingayo okuba eky’okukkirizisa abantu abantu ebintu ebitali bituufu [deceiving mu nkuluze y’olungereza kigamba “cause someone to believe an untruth” – Omuvvuunuzi] ekyali kibaddeyo mu byafaayo by’ensi. Omwoyo gw’amazima n’obulimba giriba gisembereganye nnyo kirikkirizisa abalonde ebintu ebitali bituufu oba nga kiyinzika.

Katonda yatuma MALAYIKA WE eri amakanisa. Tulina Eddoboozi lyE ku ntoli z’engalo zaffe. Tusobola okuwulira kyennyini-nnyini Kigambo ku Kigambo ekyo kye Yayogera. Tekyetaaga kutangaazamu yadde okuvvuunulwa amakulu, Omugole kye yetaaga kyokka okukukola kwe KUNYIGA ZANNYA era AKKIRIZE.

Yatulabula, temwetantala okukyusa ennukuta emu newankubadde akatonnyeze akamu ku ntambi ezo. Temuziteekako ntegeera yammwe oba endowooza yammwe, muwulirize buwuliriza Ddoboozi lyaNge era mukkirize. Okutuusa olunaku luno, ekyo tekisobosenga, wabula leero kisoboka kubanga lye kkubo lya Katonda ly’Ataddewo ku lw’olwaleero.

Twakamala okuwulira Emirembe Omusanvu Egy’Ekkanisa era nga okuyita mu buli mulembe, bwe waayimukangawo emyoyo egyo okuggya abantu ku Kigambo ekituufu. Nga mu buli mulembe, oluvannyuma lw’omubaka okuvaawo, byebaakolanga okuzza abantu ku kiyiiye ekimu oba ekikwate; ku bo bennyini ne ku ndowooza y’omuntu.

Leero bagezaako okutta okusikiriza kwaffe mu bantu nga bagamba, “O, abo bakkiriza entambi lye ddoboozi erisinga obukulu ly’oteekwa okuwulira. Oteekeddwa okuzannya entambi mu kkanisa yo… obwo butaliimu. Ow’oluganda Branham teyagambako muzannye entambi mu kkanisa. Kati ddoboozi lya buweereza lye muteekeddwa okuwulira.”

Nze gyendi, eyo ye nsigo eyawukana ku y’amazima! MUTEEKWA OKUNYIGA ZANNYA ne muwulira eddoboozi lya Katonda mu makanisa gammwe anti lye Ddoboozi LYOKKA eryakakasibwa Katonda Mwene obutalekaawo kabuuza. Muteekwa okugondera buli Kigambo Katonda kye Yagamba.

Nze Yesu ntumye omubaka wange okubajulira mmwe ebintu bino mu makanisa.

Malayika oyo omukakase obutalekaawo kabuuza ayogera mu Kkanisa yaffe, na bwentyo mbayita mmwe okujja okutwegattako ffe okuwulira Ekigambo ekyo wamu n’Omugole wE okuva wonna mu nsi abayungiddwa ku mukutu ku ssaawa 6:00 (Mukaaga) ez’omu ttuntu, mu budde bw’e Jeffersonville (y’essawa 1(emu) ey’omu kawungeezi e Uganda), tuwulire: 65-0118 – “Ensigo Eyawukana Ku Y’Amazima.”

Owol. Joseph Branham

Uncategorized

26-0913 Ekkanisa y’Omulembe Gwa Lawodikiya

Obubaka: 60-1211E Ekkanisa y’Omulembe Gwa Lawodikiya

BranhamTabernacle.org

Omugole Wa Kristo Omwagalwa, leka tujje wamu ku Sande ku ssaawa 6:00 (Mukaaga) ez’omu ttuntu, mu budde bw’e Jeffersonville (y’essawa 1(emu) ey’omu kawungeezi e Uganda), okuwulira 60-1211E Omulembe Gw’Ekkanisa Ogwa Lawodikiya.

Owol. Joseph Branham

Uncategorized

26-0906 Embeerera Ekkumi, N’Abayudaaya Emitwalo Ekkumi N’ena Mu Enkumi Nnya

Obubaka: 60-1211M Embeerera Ekkumi, N’Abayudaaya Emitwalo Ekkumi N’ena Mu Enkumi Nnya

BranhamTabernacle.org

Omugole Wa Kristo Omwagalwa, leka tujje wamu ku Sande ku ssaawa 6:00 (Mukaaga) ez’omu ttuntu, mu budde bw’e Jeffersonville (y’essawa 1(emu) ey’omu kawungeezi e Uganda), okuwulira 60-1211M Embeerera Ekkumi, N’Abayudaaya Emitwalo Ekkumi N’Ena Mu Enkumi Nnya.

Owol. Joseph Branham

Uncategorized

26-0830 Omulembe Gw’Ekkanisa y’e Firaderufiya

Obubaka: 60-1210 Omulembe Gw’Ekkanisa y’e Firaderufiya

BranhamTabernacle.org

Omugole Wa Kristo Omwagalwa, leka tujje wamu ku Sande ku ssaawa 6:00 (Mukaaga) ez’omu ttuntu, mu budde bw’e Jeffersonville (y’essawa 1(emu) ey’omu kawungeezi e Uganda), okuwulira 60-1210 Omulembe Gw’Ekkanisa Ogwa Firaderufiya.

Owol. Joseph Branham