UJUMBE: 65-0822M Kristo Amefunuliwa Katika Neno Lake Mwenyewe

PDF

• 24-0908 Kristo Amefunuliwa Katika Neno Lake Mwenyewe
• 23-0219 Kristo Amefunuliwa Katika Neno Lake Mwenyewe
• 21-1024 Kristo Amefunuliwa Katika Neno Lake Mwenyewe
• 21-0530 Kristo Amefunuliwa Katika Neno Lake Mwenyewe
• TAI WANAKUSANYIKA PAMOJA
• 19-1013 Kristo Amefunuliwa Katika Neno Lake Mwenyewe – Preliminari
• 17-1112 Kristo Amefunuliwa Katika Neno Lake Mwenyewe

BranhamTabernacle.org

Mpendwa Maskani ya Branham,

Jinsi gani macho yetu yalivyobarikiwa; maana yanaona. Jinsi gani masikio yetu yalivyobarikiwa; maana yanasikia. Manabii na watu wenye haki walitamani kuona na kusikia yale tuliyoyaona na kuyasikia, lakini hawakuyaona. Sisi vyote viwili TUMEONA NA KUISIKIA SAUTI YA MUNGU.

Mungu Mwenyewe alichagua kuiandika Biblia Yake kupitia manabii Wake. Mungu Mwenyewe pia alichagua kufunua siri Zake zote katika wakati huu wa mwisho kwa Bibi-arusi Wake kupitia nabii Wake. Ni sifa Zake, Neno Lake lililodhihirishwa, likifanya jambo hilo lote kuwa sehemu Yake.

Pindi wakati wetu ulipowadia, Yeye alimwasilisha nabii Wake akawasili wakati uo huo. Alimvuvia na kunena kupitia yeye. Ilikuwa ndiyo njia Yake iliyokusudiwa tangu zamani na iliyoandaliwa ya kufanya jambo hilo. Kama vile Biblia, Ni Neno la Mungu, na si neno la mwanadamu.

Ni lazima tuwe na Yakini, mkataa; Neno la mwisho. Baadhi ya watu husema Biblia ndio Yakini yao, si yale yanayosemwa kwenye kanda; kana kwamba zinasema kitu tofauti. Ni ajabu sana jinsi Mungu ameuficha Ufunuo wa kweli wa Neno Lake kwa wengi sana, lakini ameufunua na kuuweka wazi sana kwa Bibi-arusi Wake. Wengine hawawezi kujizuia, wamepofushwa na hawana Ufunuo kamili wa Neno la Mungu lililofunuliwa.

Mungu alisema katika Neno Lake (Biblia) kupitia nabii Wake na kutuambia, “Mungu, ambaye alisema zamani na baba zetu katika manabii kwa sehemu nyingi na kwa njia nyingi”. Hivyo, manabii wa Mungu waliiandika Biblia. Haikuwa wao, bali Mungu akinena kupitia wao.

Alisema katika siku yetu Yeye angemtuma Roho wake wa kweli ili atuongoze katika kweli zote. Yeye hatanena kwa shauri lake mwenyewe; lakini yote atakayoyasikia atayanena, na mambo yajayo atatuonyesha.

Ujumbe uliyo kwenye kanda ndio kweli za Mungu zilizofunuliwa. Haihitaji fasiri yoyote. Ni Mungu akilifasiri Neno Lake Mwenyewe wakati anapolinena kwenye kanda.

Hakuna mwendeleo katika yale watu wengine wanachozungumza, Ila tu kile Mungu anenacho. Kile kinachosemwa kwenye kanda ndio Sauti pekee ambayo HAITABADILIKA KAMWE. Watu hubadilika, mawazo hubadilika, fasiri hubadilika; Neno la Mungu halibadiliki kamwe. Ndio Yakini ya Bibi-arusi.

Nabii anatupa mfano wa rifarii kuwa ndio yakini katika mchezo wa mpira. Neno lake ndilo la mwisho. Huwezi kulihoji. Kile anachosema, ndivyo hivyo, Mwisho wa maneno. Sasa rifarii ana kitabu cha sheria ambacho lazima akipitie. Kinamwambia mahali yalipo maeneo ya mpira kawaida au goli, ni wakati gani salama kwako na wakati gani uko nje; sheria ni zipi kwa mchezo wa mpira.

Anasoma na kukisoma kitabu hicho ili anaponena, na kufanya uamuzi wake, hiyo ndiyo sheria, hilo ndilo neno la mwisho. Hamna budi kudumu na kile anachosema, hakuna swali, hakuna mabishano, chochote anachosema, hivyo ndivyo kinavyopaswa kuwa nacho hakiwezi kubadilishwa. Utukufu.

Ndugu Branham hakusema hupaswi kuhubiri, au kufundisha; kinyume chake, yeye alisema muhubiri, na kuwasikiliza wachungaji wenu, lakini Sauti ya Mungu iliyo kwenye kanda haina budi kuwa Yakini yenu.

Kunapaswa kuwe na nguzo ya kushikilia; kwa maneno mengine, mkataa. Kila mtu hana budi kuwa na mkataa huo. Ni neno la mwisho. Mungu ametoa mahali pamoja tu pa kulipata hilo, Sauti ya Mungu kwenye kanda. Ndio fasiri ya kiungu ya Neno la Mungu. NDILO NENO LA MWISHO, ILE AMINA, ILE BWANA ASEMA HIVI.

Yesu Mwenyewe alisema tunawaita “miungu,” walionena Neno Lake; nao walikuwa miungu. Alisema wakati manabii walipotiwa mafuta na Roho wa Mungu, walilileta Neno la Mungu sawasawa. Ilikuwa ni Neno la Mungu likinena kupitia kwao.

Hiyo ndiyo sababu nabii wetu alikuwa jasiri sana. Aliongozwa na Roho Mtakatifu kunena Neno la Mungu lisilokosea. Mungu alikuwa amemchagua kwa ajili ya wakati wetu. Akauchagua Ujumbe ambao angeunena, hata tabia ya nabii wetu na kile kingetukia katika wakati wetu.

Maneno aliyonena, vile alivyotenda, imewapofusha wengine, lakini imeyafungua macho yetu. Yeye hata alimvalisha kwa namna ya mavazi aliyovaa; tabia yake, shauku yake, kila kitu jinsi tu ilivyompasa kuwa, alichaguliwa tu kikamilifu kwa ajili yetu sisi, Bibi-arusi wa Mungu.

Ndiyo maana, wakati TUNAPOKUSANYIKA PAMOJA, Ni Sauti ndio tunayotaka kuiweka KUWA YA KWANZA kuisikia. Tunaamini kwamba tunalisikia Neno Safi lililonenwa kutoka kwa mjumbe mteule na aliyechaguliwa wa Mungu.

Tunajua wengine hawawezi kuliona au kulielewa hilo, lakini yeye alisema alikuwa akilizungumzia kusanyiko lake peke yake. Yeye hakuwajibika na wale ambao Mungu aliowapa wengine kuwachunga; yeye aliwajibika tu na aina ya Chakula anachotulisha sisi.

Ndiyo maana tunasema sisi ni Maskani ya Branham, kwa sababu yeye alisema Ujumbe ulikuwa kwa ajili ya watu wake tu katika Maskani, lile kundi dogo lililotaka kuzipata na kuzisikiliza kanda. Alikuwa anawazungumzia wale Mungu aliyompa kuwaongoza.

Yeye alisema, “kama watu wanataka kutengeneza chakula cha kisasa na kadhalika huko nje, wewe pata ufunuo kutoka kwa Mungu kisha ufanye yale ambayo Mungu anakwambia ufanye. Nitafanya jambo lilo hilo. Bali Jumbe hizi, kwenye kanda, ni kwa ajili ya kanisa hili peke yake.”

Jinsi gani alivyolifanya Hilo rahisi kweli kweli kwa Bibi-arusi Wake kuliona na kuisikia Sauti ya Mungu na kufuata maagizo Yake.

Iwapo ungependa kuungana nasi kuisikia Sauti hiyo, tutakuwa tukisikiliza sote kwa wakati mmoja Jumapili hii saa 6:00 SITA MCHANA, saa za Jeffersonville,(Ni saa 1:00 MOJA JIONI masaa ya Afrika mashariki): 65-0822M – “Kristo Amefunuliwa Katika Neno Lake Mwenyewe”.

Ikiwa huwezi kuungana nasi, nakuhimiza usikilize Ujumbe huu wakati wowote uwezapo.

Ndugu. Joseph Branham

Maandiko ya kusoma kabla ya kusikiliza Ujumbe:

Kutoka 4:10-12
Isaya 53:1-5
Yeremia 1:4-9
Malaki 4:5
Luka Mt. 17:30
Yohana Mt.1:1 / 1:14 / 7:1-3 / 14:12 / 15:24 / 16:13
Wagalatia 1:8
2 Timotheo 3:16-17
Waebrania 1:1-3 / 4:12 / 13:8
2 Petro 1:20-21
Ufunuo 1:1-3 / 10:1-7 / 22:18-19

UJUMBE: 65-0815 Nawe Hujui

PDF

• 24-0901 Nawe Hujui
• 23-0212 Nawe Hujui
• 21-1017 Nawe Hujui

BranhamTabernacle.org

Ndugu na Dada Wapendwa,

Kaeni karibu na Kristo. Hebu niwaonye sasa, kama mhudumu wa Injili, juu ya jambo hili. Msichukue upumbavu wo wote. Msiwazie cho chote. Kaeni moja kwa moja pale mpaka huu wa ndani wa ndani umetiwa nanga kwenye Neno, mpaka uwe ndani ya Kristo kabisa, kwa maana hicho ndicho kitu pekee ambacho kitaninino…Kwa maana, tuko katika wakati wa udanganyifu sana tuliopata kuishi ndani yake. “Utawapoteza walio Wateule kama yamkini,” kwa maana wana upako, wanaweza kufanya cho chote kama wengine wao.

Baba, Ulituonya kwamba tunaishi katika wakati wa udanganyifu zaidi ya nyakati zote. Roho hizo mbili ulimwenguni zingefanana sana, ingewadanganya walio wateule, kama yamkini. Lakini Bwana asifiwe, isingewezekana kutudanganya sisi, Bibi-arusi Wako; tutakaa na Neno Lako.

Sisi ni Uumbaji Wako Mpya, nasi hatuwezi kudanganywa. Tutakaa na Sauti Yako. Tutaitikia na kushikilia kila Neno, bila kujali mtu yeyote anasema nini. Hakuna njia nyingine isipokuwa Njia Yako iliyoandaliwa; Bwana Asema Hivi kwenye kanda. 

Wakati nabii Wako alipokuwa hapa duniani, yeye alijua jinsi gani ilivyokuwa muhimu kwa Bibi-arusi kusikia kila Neno lililonenwa, kwa sababu hiyo yeye alimuunganisha Bibi-arusi Wako kwa mawasiliano ya simu. Alituunganisha pamoja kwenye Sauti Yako iliyothibitishwa ya Neno Lililonenwa.

Yeye alijua hapakuwepo na upako mkuu kuliko Sauti Yako. 

Huko nje kwenye mawimbi ya simu hii, naomba Roho Mtakatifu aliye mkuu aingie katika kila kusanyiko. Jalia Nuru ile ile Takatifu tunayoiangalia papa hapa kanisani, jalia imwangukie kila mmoja, na kila mtu.

Kila kitu ambacho Bibi-rusi Wako anachohitaji kwa ajili ya kule Kuja Kwako kilinenwa, kikahifadhiwa na kufunuliwa kwa Bibi-arusi Wako na malaika Wako; hilo ni Neno Lako. Ulituambia ikiwa tuna maswali yoyote, twende kwenye kanda. Ulituambia William Marrion Branham alikuwa ndiye Sauti Yako kwetu. Kunawezaje kuwa na swali niani mwa Bibi-arusi Wako jinsi gani ilivyo muhimu kuiweka Sauti Yako kama Sauti iliyo muhimu zaidi Anayoweza kuisikia? Hakuna swali Bwana, kwa Bibi-arusi Wako.

Nabii wako alituambia juu ya ndoto ambapo alisema, “Nitapanda farasi kupitia njia hii tena.” Hatujui hilo linamaanisha nini, lakini kwa hakika Bwana, Sauti Yako imepanda farasi kwa njia ya mawimbi ya hewa leo tena, ikinena, na kumwita Bibi-arusi Wako atoke kutoka kote ulimwenguni.

Unaalikwa uje uungane nasi, Maskani ya Branham, Jumapili saa 6:00 SITA MCHANA, saa za Jeffersonville,(Ni saa 1:00 MOJA JIONI ya Afrika mashariki) tunaposikiliza Sauti ya Mungu kupitia mawimbi ya hewa ikituletea Ujumbe: 65-0815 – “Nawe Hujui”.

Ndugu. Joseph Branham

  Maandiko ya kusoma:

Ufunuo 3:14-19
Wakolosai 1:9-20

UJUMBE: 65-0801E Matukio Yakidhihirishwa Na Unabii

PDF

• 24-0825 Matukio Yakidhihirishwa Na Unabii
• 23-0205 Matukio Yakidhihirishwa Na Unabii
• 21-1010 Matukio Yakidhihirishwa Na Unabii
• NUKUU YA LEO KWA KISWAHILI
• 20-0223 Matukio Yakidhihirishwa Na Unabii
• 18-1104 Matukio Yakidhihirishwa Na Unabii – Preliminari
• 17-0129 Matukio Yakidhihirishwa Na Unabii

BranhamTabernacle.org

Tai Wapendwa,

Palipo na Mzoga, tai wanakusanyika. Ni wakati wa jioni, na unabii umetimizwa mbele ya macho yetu. Mioyo yetu inawaka ndani yetu tunapomwalika katika makanisa yetu, nyumba zetu, na vibanda vyetu vya udongo huko msituni. Atazungumza nasi na kulifunua Neno Lake. Tunaona njaa na kiu ya Mungu zaidi.

Yeye amechagua njia ile Neno lake lingetujia; ni kwa nabii Wake, ambaye Yeye alimchagua tangu zamani na kumtenga tangu zamani. Alimchagua William Marrion Branham kuwa mtu wa wakati huu kuwashika wateule Wake wa wakati huu, SISI, Bibi-arusi Wake.

Hakuna mtu mwingine anayeweza kupachukua mahali pake. Tunapenda jinsi anavyojieleza; ii, siho, iyo, pepa, dafuta, ni Mungu akizungumza masikioni mwetu. Mungu, akinena kupitia midomo ya mwanadamu, akifanya yale hasa Yeye aliyosema angefanya. Hilo latosha!

Mungu aliongoza mikono na macho yake katika maono. Yeye hakuweza kusema kitu chochote ila kile alichokuwa akikiangalia. Mungu alitawala kabisa ulimi wake, kidole, hata kila kiungo cha mwili wake kilikuwa katika utawala mkamilifu wa Mungu. Alikuwa ndiye kinywa chenyewe cha Mungu.

Mungu alijua kimbele katika wakati huu kanisa lingeingia kwenye mchafuko. Kwa hiyo, Yeye alikuwa na nabii Wake tayari kwa ajili ya wakati wetu, kumwita na kumwongoza Bibi-arusi Wake aliyechaguliwa kwa Neno Lake lililothibitishwa.

Katika mpango Wake mkuu, Yeye pia alijua angempeleka nabii Wake Nyumbani kabla ya Kuja Kwake, kwa hiyo Alihakikisha ameirekodi Sauti Yake na kuihifadhi, ili Bibi-arusi Wake mteule daima wangeweza kuwa na Bwana Asema Hivi kiganjani. Basi wasingekuwa na swali kamwe. Hakukuwa na fasiri iliyohitajiwa, Neno safi na bikira tu waliloweza kulisikia wakati wote.

Alijua kungekuwa na sauti nyingi na machafuko mengi katika siku za mwisho.
Wiki tatu zilizopita amezungumza nasi na kuweka saa tunayoishi. Alituambia kuhusu manabii wa uongo ambao wangetokea na kuwadanganya wateule, kama yamkini.

Jinsi gani huyu mungu wa kizazi hiki alivyoipofusha mioyo ya watu. Na jinsi ambavyo Mungu Mwenyewe alisema kupitia kwa nabii Zake ya kwamba mambo haya yangetukia katika Wakati huu wa Laodikia. Alituambia hakuna kitu ambacho kimeachwa bila kutimia.

Amejitambulisha Mwenyewe mbele zetu kwa mambo yale yaliyotabiriwa kumhusu Yeye kuyafanya katika siku hii. Matendo yake yenyewe yametuthibitishia Yeye ni yeye yule jana, leo, na hata milele. Ni Sauti ya Mungu, ikizungumza na, na kuishi ndani ya, Bibi-arusi Wake.

Je! unaamini Ujumbe huu ni Waebrania 13:8? Kuwa ni Neno lililo hai? Kuwa ni Mwana wa Adamu akijifunua Mwenyewe katika mwili? Basi unabii utatendeka Jumapili hii ikiwa utaamini na kutii.

Kitu fulani kitakuwa kikitendeka ulimwenguni kote ambacho hakijawahi kutokea katika historia ya dunia. Mungu atakuwa akinena kupitia midomo ya mwanadamu, akizungumza na Bibi-arusi Wake kila mahali ulimwengu mzima wote kwa wakati mmoja. Atatufanya tuwekeane mikono na kuombeana mmoja kwa mwingine wakati yeye anapotuombea sisi wote.

Ninyi mlio huko nje kwenye simu, kama mmekwisha amini kwa moyo wenu wote, wahudumu wakiwa wanawawekea mikono, na wapendwa wenu wakiwawekea mikono, kama mnaamini kwa moyo wenu wote ya kwamba imekwisha, imekwisha.

Chochote tunachohitaji, Mungu atatupa ikiwa tu tutaamini… NASI TUNAAMINI. SISI NDIO BIBI-ARUSI WAKE MWAMINIFU. Itatendeka. Nguzo ya Moto itakuwa popote tutakapokusanyika na kumpa kila mmoja wetu chochote tunachohitaji, ni BWANA ASEMA HIVI.

Jalia Nuru ile ile Takatifu tunayoiangalia papa hapa kanisani, jalia imwangukie kila mmoja, na kila mtu, na jalia waponywe wakati huu. Tunamkemea adui, Ibilisi, katika Uwepo wa Kristo; tunamwambia huyo adui, ya kwamba ameshindwa na—na mateso yaliyompata badala yetu, yale mauti ya Bwana Yesu na ushindi wa ufufuo katika siku ya tatu; na ushuhuda Wake uliothibitishwa ya kwamba Yeye yuko hapa kati yetu usiku wa leo, akiwa hai, baada ya miaka elfu moja mia tisa. Jalia Roho wa Mungu aliye hai aujaze kila moyo kwa imani na nguvu, na nguvu za kuponya kutokana na kufufuka kwa Yesu Kristo, Ambaye ametambulikana sasa kwa Nuru hii kuu inayolizunguka kanisa, katika Uwepo Wake. Katika Jina la Yesu Kristo, tujalie kwa ajili ya utukufu wa Mungu.

Wewe ni Bibi-arusi Wake. Hakuna kinachoweza kuliondoa hilo kutoka kwako, HAKUNA CHOCHOTE. Shetani ameshindwa. Unaweza kuhisi una kijiko tu kilichojaa Yeye, hicho ndicho tu unachohitaji, NI HALISI. NI YEYE. WEWE NI WAKE. NENO LAKE HALIWEZI KUSHINDWA.

Liamini, likubali, lishikilie, haliwezi kushindwa. Huna nguvu lakini una mamlaka yake. Sema, “Nimeichukua Bwana, ni yangu, Wewe umenipa hiyo nami sitamwacha Shetani aichukue.”

Tutakuwa na wakati ulioje. Hakuna mahali pengine ningependa kuwa. Roho Mtakatifu atatuzunguka sote. Tumepewa Ufunuo zaidi. Mioyo iliyovunjika. Kila mtu aliponywa. Hatuwezije kusema, “Je! Mioyo yetu haikuwaka ndani yetu, nayo haiwaki sasa, kujua kwamba sasa tuko katika uwepo wa Yesu Kristo aliyefufuka, utukufu na sifa vina yeye milele.

Ndugu. Joseph Branham.

Tunaalika ulimwengu wote uje kuungana nasi:

Muda: saa 06:00 SITA MCHANA masaa ya Jeffersonville(ni saa 1:00 MOJA JIONI masaa ya Afrika mashariki)
Ujumbe: 65-0801E Matukio Yakidhihirishwa Na Unabii

Maandiko ya kusoma kabla ya kusikiliza Ujumbe:

Mwanzo: 22:17-18
Zaburi: 16:10 / Sura ya 22 / 35:11 / 41:9
Zekaria 11:12 / 13:7
Isaya: 9:6 / 40: 3-5 / 50:6 / 53:7-12
Malaki: 3:1 / sura ya 4
Yohana 15:26
Luka Mt: 17:30 / 24:12-35
Warumi: 8:5-13
Waebrania: 1:1 / 13:8
Ufunuo: 1:1-3 / Sura ya 10

UJUMBE: 65-0801M Mungu Wa Wakati Huu Mwovu

PDF

• 24-0818 Mungu Wa Wakati Huu Mwovu
• 23-0129 Mungu Wa Wakati Huu Mwovu
• 21-1003 Mungu Wa Wakati Huu Mwovu
• 20-0216 Mungu Wa Wakati Huu Mwovu

BranhamTabernacle.org

Wapendwa Wakamilifu,

Sauti tunayosikia kwenye kanda ndio Sauti ile ile iliyolitangaza Neno Lake katika Bustani ya Edeni, juu ya Mlima Sinai, na kwenye Mlima wa Kugeuzwa Sura. Inasikika leo kwa Ufunuo kamili na wa mwisho wa Yesu Kristo. Inamwita Bibi-arusi Wake atoke, ikimtayarisha kwa ajili ya Kunyakuliwa. Bibi-arusi analisikia, analikubali, analiishi, naye amejiweka mwenyewe tayari kwa kuliamini.

Hakuna mtu anayeweza kuliondoa Hilo kutoka kwetu. Maisha yetu hayawezi kuchezewa. Roho wake anawaka na kuangaza ndani yetu. Yeye ametupa Uzima Wake, Roho Wake, naye Anaudhihirisha Uzima Wake ndani yetu. Tumefichwa ndani ya Mungu nasi Tunalishwa kwa Neno lake. Shetani hawezi kutugusa. Sisi hatuwezi kuondoshwa. Hakuna kinachoweza kutubadilisha. Kwa Ufunuo, sisi tumekuwa BIBI-ARUSI NENO.

Wakati Shetani anapojaribu kutuangusha, tunamkumbusha tu jinsi Mungu anavyotuona. Anapotutazama, anachokiona tu ni dhahabu SAFI. Haki yetu ni haki YAKE. Sifa zetu ni sifa ZAKE mwenyewe zenye utukufu. Utambulisho wetu unapatikana katika Yeye. Kile alicho Yeye, sasa tunakionyesha. Kile alicho nacho Yeye, TUNAKIDHIHIRISHA SASA.

Jinsi gani Yeye anavyopenda kumwambia Shetani, “Sioni dosari yoyote ndani Yake; Yeye ni MKAMILIFU. Kwangu mimi, Yeye ni Bibi-arusi Wangu, amejaa utukufu ndani na nje. Tangu mwanzo hata mwisho, Yeye ni Kazi Yangu, na Kazi Zangu zote ni kamilifu. Kwa kweli, ndani Yake kumejumlishwa na kudhihirishwa hekima na kusudi Langu la milele”.

“Nimemwona Bibi-arusi Wangu anayependeza anastahili. Kama vile dhahabu inavyofulika, Yeye amestahimili mateso kwa ajili Yangu. Yeye hajapatana, kukunjwa, au kuvunjwa, bali amefanywa kitu chenye uzuri. Majaribu na majaribio yake ya maisha haya yamemfanya Yeye kuwa Bibi-arusi wangu kipenzi”.

Je! hivyo si kama tu Bwana? Anajua jinsi ya kututia moyo. Anatuambia, “Msivunjike moyo kamwe, bali jipeni moyo”. Anaona kazi zetu za upendo Kwake. Anaona kile kinachotulazimu kupitia. Anaona vita vya kila siku tunavyovivumilia. Kwa vile anavyotupenda sisi kupitia kila moja ya hayo.

Machoni pake sisi ni wakamilifu. Ametungojea sisi tangu mwanzo wa wakati. Hataruhusu lolote litutokee isipokuwa ni kwa manufaa yetu. Anajua tutashinda kila kizuizi ambacho Shetani anachoweka mbele yetu. Anapenda kumthibitishia kwamba sisi ni Bibi-arusi Wake. Hatuwezi kuondoshwa. Sisi ndio Wale ambao amekuwa akingojea tangu mwanzo. Hakuna kinachoweza kututenganisha Naye na Neno Lake.

Alitutumia malaika-mjumbe wake mwenye nguvu ili aweze kusema nasi mdomo kwa sikio. Aliirekodi ili kusiwe na maswali yale aliyosema. Alikuwa ameihifadhi ili Bibi-arusi Wake awe na kitu cha kula mpaka Yeye ajapo kumchukua.

Haijalishi ikiwa wengine wanatuelewa vibaya na wanatutesa kwa kusema sisi ni “Watu wa Kanda”, tunafurahi, kwa kuwa hili ndilo Yeye alilotufunulia sisi tufanye. Wengine hawana budi kufanya kama wanavyohisi kuongozwa kufanya, lakini kwetu sisi, hatuna budi kuungana pamoja chini ya Sauti moja, Sauti ya Mungu iliyothibitishwa kwenye kanda.

Hatuwezi kufahamu kitu kingine chochote. Hatuwezi kuelewa kitu kingine chochote. Hatuwezi kufanya kitu kingine chochote. Hatuwezi KUKUBALI kitu kingine chochote. Sisi hatupingani na kile waamini wengine wanachohisi wanaongozwa na Bwana kufanya, lakini hiki ndicho Mungu AMETUONGOZA SISI KUFANYA, nasi ni lazima TUDUMU hapa.

Tumeridhika. Tunalishwa na Sauti ya Mungu. Tunaweza kusema “amina” kwa KILA NENO tunalosikia. Hii ndiyo Njia Mungu aliyotuandalia. Hatuwezi kufanya kitu kingine chochote.

Ninapenda tu kuwaalika kila mmoja kuja kuungana nasi. Tunazifanya ibada jinsi vile tu Ndugu Branham alivyozifanya wakati yeye alipokuwa hapa duniani. Ingawa yeye hayuko hapa katika mwili, jambo kuu ni kile Mungu alichomwambia Bibi-arusi Wake kwenye kanda.

Yeye aliualika ulimwengu kuwa sehemu ya MAWASILIANO ya simu, lakini tu ikiwa wao WALITAKA KUFANYA HIVYO. Aliwafanya wakusanyike popote walipoweza kuisikia Sauti ya Mungu ikizungumza nao wote kwa wakati mmoja. Hivyo ndivyo nabii wa Mungu alivyofanya wakati huo, kwa hiyo mimi ninajaribu tu kufanya yale yeye aliyofanya kama mfano wangu.

Hivyo, unaalikwa kuja kuungana nasi Jumapili saa 6:00 SITA MCHANA, saa za Jeffersonville, (ni Saa 1:00 MOJA JIONI ya Afrika Mashariki) tunapomsikiliza mjumbe wa Mungu akituletea Ujumbe: Mungu Wa Wakati Huu Mwovu 65-0801M.

Ndugu. Joseph Branham

Maandiko ya kusoma kabla ya kusikiliza Ujumbe:

Mathayo Mt. sura ya 24/27:15-23
Mtakatifu Luka 17:30
Yohana Mtakatifu 1:1 / 14:12
Matendo 10:47-48
1 Wakorintho 4:1-5 / sura ya 14
2 Wakorintho 4:1-6
Wagalatia 1:1-4
Waefeso 2:1-2 / 4:30
2 Wathesalonike 2:2-4 / 2:11
Waebrania sura ya 7
1 Yohana Sura ya 1 / 3:10 / 4:4-5
Ufunuo 3:14 / 13:4 / Sura ya 6-8 na 11-12 / 18:1-5
Mithali 3:5
Isaya 14:12-14

UJUMBE: 65-0725E Nini Kinachovutia Kule Mlimani?

PDF

• 24-0811 Nini Kinachovutia Kule Mlimani?
• 23-0122 Nini Kinachovutia Kule Mlimani?
• 21-0926 Nini Kinachovutia Kule Mlimani?
• 20-0419 Nini Kinachovutia Kule Mlimani?
• 18-1028 Nini Kinachovutia Kule Mlimani? -Preliminari
• 17-0122 Nini Kinachovutia Kule Mlimani?

BranhamTabernacle.org

Wapendwa Jamii Moja,

Tuko chini ya matarajio na matazamio makubwa. Twaweza kulihisi jambo hilo, jambo fulani linaenda kutukia. Tunataka kuungana pamoja ili kuisikia Sauti Yako; kupata cho chote na kila kitu unachosema. Tunalitaka. Tunataka kuwa sehemu Yake. Tunaamini kila Neno.

Nini kinatendeka? Mungu anafanya historia. Mungu anatimiza unabii. Hiyo Daima husababisha kuvutia macho. Huwakusanya wapinzani wote, wale nderi wa Ujumbe tuliousikia Jumapili iliyopita, lakini pia linawakusanya Tai Wake pamoja. Kwa maana palipo Mzoga, hapo Tai watakusanyika.

Ni jibu la unabii wa nabii, angalieni, nitawapelekea Eliya nabii. Mungu anamthibitisha nabii Wake. Ni Mungu akitimiza unabii. Mungu akifanya historia, akilitimiza Neno Lake. Ni ule Mvuto wa Tatu ukitimia.

Najua yaonekana kama yote Nifanyayo tu ni kutokukubaliana na viongozi wote wa makanisa, naonekana kulaumu chochote wanachofanya, lakini ninaamini sisi ndio lile kundi fulani la watu ambao wamechaguliwa tangu asili Kubonyeza Play na kuusikia Ujumbe huo, Sauti hiyo, na kuufuata.

Sisi hatujali umati wa watu. Hatujali lawama za asiyeamini. Hatubishani nao. Tuna wajibu mmoja, huo ni kuamini na kupata kila sehemu Yake tuwezayo; tuiingize ndani kama Mariamu aliyeketi miguuni pa Yesu.

Hatuvutiwi na kitu kingine chochote. Hatuhitaji kitu kingine chochote. Tunaamini kwamba kila kitu tunachohitaji kusikia kiko kwenye kanda. Neno la Mungu halihitaji fasiri yoyote.

Ile ahadi imetimizwa. Ni wakati gani, bwana, na mvuto huu ni wa nini? Mungu akitimiza Neno Lake! Ni yeye yule jana, leo, na hata milele.

Ni mvuto gani? Mungu, kwa mara nyingine tena, akilitimiza Neno Lake, akiwakusanya watu Wake pamoja makanisani, vituo vya mafuta, majumbani, wamekusanyika kuzunguka vipaza sauti vidogo kutoka kote nchini, kote kote hata kwenye Pwani ya Magharibi, kule juu kwenye milima ya Arizona, chini kwenye mabonde ya Texas, mbali sana hata Pwani ya Mashariki; kote nchini na ulimwenguni kote.

Tuko umbali wa masaa mengi katika wakati, lakini Bwana, tuko pamoja kama jamii moja, waamini, tukingojea Kuja kwa Masihi. Ninajaribu kufuata na kufanya vile tu nabii Wako alivyofanya ili kumuunganisha Bibi-arusi Wako wakati yeye alipokuwa hapa. Kile yeye alichokifanya ndio mfano wangu.

Hatuna nafasi ya kumketisha kila mmoja hapa kwenye Maskani ya Branham, kwa hivyo inatulazimu tu kuwatumia Neno kwa njia ya simu, kama vile yeye alivyofanya wakati huo. Tumekusanyika hapa, Jeffersonville, katika makanisa yetu ya nyumbani, tukingojea Kuja kwa Bwana.

Umetoka kutuambia kutakuwa na wengi katika siku hizi za mwisho ambao watajaribu kukufanyia wewe kazi bila ya kuwa mapenzi Yako makamilifu. Kutakuwa na wengi ambao watatiwa mafuta na Roho Mtakatifu wa kweli, lakini watakuwa waalimu wa uongo. Bwana, njia pekee tunayojua KUWA NA HAKIKA ni kudumu na Neno, kudumu na mafundisho ya kanda, kudumu na Sauti Yako iliyothibitishwa.

Tunaamini sisi ndio Uzao Wako uliochaguliwa tangu asili ambao hatuwezi kutenda chochote bali kulifuata; ni zaidi ya maisha kwetu. Twaa maisha yetu, bali usichukue Hilo.

Nini kitatendeka Jumapili hii? Mungu atakuwa akitimiza Neno lake. Kote nchini, kwa njia ya simu, mamia ya watu watawekeleana mikono wao kwa wao kote taifani, pwani kwa pwani, kutoka Kaskazini hata Kusini, Mashariki hata Magharibi.

Hata kutoka nchi za ng’ambo ulimwenguni kote, sote tutawekeana mikono . Ulituambia, “hatuhitaji kadi ya maombi, si lazima kupitia kwenye mstari, tunahitaji tu IMANI.”

Tutainua mikono yetu na kusema, “Mimi ni mwamini.” Yapi yatatendeka?

Shetani, umeshindwa. Wewe u muongo. Na, kama mtumishi wa Mungu, na kama watumishi, tunakuamuru ya kwamba katika Jina la Yesu Kristo, ya kwamba utii Neno la Mungu na utoke ndani ya watu, kwa maana imeandikwa, “Katika Jina Langu watatoa pepo.”

Mungu mpendwa. Wewe ndiye Mungu wa Mbinguni uliyeshinda, siku hiyo kwa mvuto juu ya Mlima Kalvari, magonjwa yote na maradhi na kazi zote za Ibilisi. Wewe ni Mungu! Na watu wameponywa kwa mapigo Yako. Wao ni huru. Katika Jina la Yesu Kristo. Amina.

Mungu ATATIMIZA Neno Lake!

Ningependa kukualika uje kusikiliza pamoja nasi, sehemu ya Bibi-arusi Wake, tunapousikia Ujumbe: 65-0725E Nini Kinachovutia Kule Mlimani? Tutakusanyika Jumapili saa 06:00 SITA MCHANA, saa za Jeffersonville.(Ni Saa 1:00 MOJA JIONI ya Afrika Mashariki).

Wengine wanaweza kuhisi sisi tu madhehebu kwa kukusanyika pamoja, kusikiliza Ujumbe uleule kwa wakati mmoja, lakini naamini kama Ndugu Branham angekuwepo hapa, angekuwa anafanya kile hasa tutakachokifanya, kumkusanya Bibi-arusi pamoja, kutoka ulimwenguni kote, kusikiliza kwa wakati mmoja KUMSIKIA YEYE.

Ndugu. Joseph Branham

Maandiko:

Mathayo 21:1-4
Zekaria 9:9 / 14:4-9
Isaya 29:6
Ufunuo 16:9
Malaki 3:1 / Sura ya 4
Yohana Mt 14:12 / 15:1-8
Luka Mt 17:22-30

UJUMBE: 65-0725M Watiwa Mafuta Katika Wakati Wa Mwisho

PDF

• 24-0804 Watiwa Mafuta Katika Wakati Wa Mwisho
• 23-0115 Watiwa Mafuta Katika Wakati Wa Mwisho
• 21-0919 Watiwa Mafuta Katika Wakati Wa Mwisho
• NUKUU YA LEO KWA KISWAHILI
• 20-0405 Watiwa Mafuta Katika Wakati Wa Mwisho
• 18-1021 Watiwa Mafuta Katika Wakati Wa Mwisho
• 17-0115 Watiwa Mafuta Katika Wakati Wa Mwisho – Preliminari

BranhamTabernacle.org

Wapendwa Walaji wa Mana Iliyofichwa,

Mungu alimtuma malaika-mjumbe wake wa saba amwongoze Bibi-arusi Wake; si mtu mwingine, si kundi la watu, bali MTU MMOJA, kwa maana Ujumbe na mjumbe Wake ni kitu kile kile. Neno la Mungu halihitaji kufasiriwa. Alilinena kwa Bibi-arusi Wake kupitia midomo ya mwanadamu nasi tunaliamini Hilo jinsi vile tu Yeye alivyolisema.

Ni lazima tuwe waangalifu sana leo ni sauti gani inayotuongoza, na inatuambia nini. Kikomo chetu cha milele kinategemea uamuzi huo hasa; kwa hiyo ni lazima tuamue ni sauti gani ndio sauti iliyo muhimu zaidi ambayo tunayopaswa kuisikia. Ni Sauti gani ambayo imethibitishwa na Mungu?  Ni Sauti gani iliyo na Bwana Asema Hivi? Haiwezi kuwa sauti yangu, maneno yangu, fundisho langu, lakini lazima liwe Neno, kwa hiyo ni lazima tuende kwenye Neno kuona kile Linachotuambia.

Je! linatuambia kwamba Yeye atainua huduma tano ituongoze mwishoni?  Tunaweza kuona waziwazi katika Neno wao wana mahali pao; mahali muhimu sana, lakini Je, Neno linasema MAHALI POPOTE kuwa wao ndio watakaokuwa na sauti zilizo muhimu zaidi TUNAZOPASWA kuzisikia ili kuwa Bibi-arusi? 

Nabii alituambia kutainuka watu wengi katika siku za mwisho watakaojaribu kumtendea Mungu kazi bila ya kuwa Mapenzi Yake. Ataibariki huduma yao, lakini sio njia Yake kamilifu ya kumwongoza Bibi-arusi Wake. Alisema Mapenzi yake makamilifu ni, na daima yamekuwa, ni kuisikia na kuiamini Sauti ya nabii wake aliyethibitishwa; kwa maana ni Hiyo, na hiyo peke yake ndio iliyo na Bwana Asema Hivi. Ndioamana alimtuma malaika Wake. Ndiomaana alimchagua yeye. ndiomaana Yeye aliirekodi. Ni Chakula Cha Kiroho Kwa Wakati Wake, Mana Iliyofichwa, kwa Bibi-arusi Wake.

Kwa kuwa saba kati ya nyakati saba, sijaona kitu ila watu wakiliheshimu neno lao wenyewe kuliko Langu. Kwa hiyo mwishoni mwa wakati huu ninawatapika mtoke katika kinywa Changu. Yote yamekwisha. Nitazungumza basi. Naam, niko hapa katikati ya Kanisa. Amina wa Mungu, aliye mwaminifu na wa kweli atajifunua Mwenyewe na itakuwa KWA NJIA YA NABII WANGU.” Loo! ndiyo, hivyo ndivyo ilivyo.

Saba kati ya nyakati saba watu wanaliheshimu neno lao wenyewe kuliko Langu. Unatakiwa kujiuliza mwenyewe, Je, jambo hili halifanyiki kati yetu hivi sasa? “Usicheze kanda kanisani, bali lazima umsikie mchungaji wako, zicheze tu kanda nyumbani kwako”.  Wao hawaiweki Sauti Yake iliyo kwenye kanda kuwa ndio Sauti iliyo muhimu zaidi, bali sauti yao.

Wanawaelekeza watu kwao wenyewe, na umuhimu wa huduma YAO; Wito WAO kulileta Neno, kumwongoza Bibi-arusi; Lakini Bibi-arusi hawezi kulivumilia hilo. Hawatalikubali. Hawatalifanya jambo hilo. Hawatapatana kuhusu Hilo; ni Sauti ya Mungu na si kitu kingine.
Hivyo ndivyo Neno linavyosema.

Swali lililo niani mwa watu siku hizi ni: Ni nani ambaye Mungu alimchagua kumuongoza Bibi-arusi Wake, Je, ni kanda au ni huduma tano? Je, wahudumu watamkamilisha Bibi-arusi? Je, wahudumu watamwongoza Bibi-arusi? Kulingana na Neno la Mungu, hiyo haijawahi kamwe kuwa Njia Yake.

Kuna watu wengi sana leo wanaosema wameufuata na kuuamini Ujumbe huu kwa miaka na miaka, lakini sasa wanaiweka huduma YAO kuwa ndio sauti iliyo muhimu zaidi unayopaswa kuisikia.

Utaifuata huduma ipi basi? Utaweka kikomo chako cha Milele kwenye huduma ipi? Wote wanasema wameitwa na Mungu kuhubiri Ujumbe. Sikatai ama kulihoji hilo, lakini baadhi ya wahudumu wenye ushawishi mkubwa katika vyeo vya huduma tano wanasema, “Hiyo siyo Sauti ya Mungu, ni sauti ya William Branham tu”. Wengine wanasema, “siku za Ujumbe wa mtu mmoja zimepita”. “Ujumbe huu sio Yakini”. Je, Huyo ndiye anayekuongoza?

Wanaume ambao wamehubiri katika mamia ya makusanyiko yao, viongozi wakubwa wa huduma tano, SASA wanaukana Ujumbe na KUSEMA “Ujumbe huu ni wa uongo”.

Nyingi kati ya huduma zote husema, “Hampaswi kusikiliza Sauti ya malaika wa Mungu kanisani, isipokuwa tu majumbani mwenu.” “Ndugu Branham hakusema kamwe kuzicheza kanda kanisani.”

Hilo halisadikiki. Siamini ndugu ama dada wanaosema wanaamini Ujumbe huu; kwamba Ndugu Branham ndiye malaika-mjumbe wa saba wa Mungu, ni Mwana wa Adamu anayezungumza, angeangukia kwenye kauli ya udanganyifu kama hiyo. Hilo lingepaswa kukuchefua tumbo. Ikiwa wewe ni Bibi-arusi, LITAKUCHEFUA.

Mungu hajawahi kamwe kubadilisha Nia Yake kuhusu Neno Lake. Daima Yeye amemchagua mtu mmoja kuwaongoza watu wake. Wengine wana mahali pao, lakini wao wanapaswa kuwaongoza watu kwa yule mmoja ambaye YEYE amemchagua kuwaongoza watu. Amkeni, enyi watu. Hebu jaribuni kusikiliza kile hawa wahudumu wanachowaambia, Nukuu hizo wanazotumia kuiweka huduma yao mbele ya ile ya nabii. Inawezaje huduma ya mtu ye yote kuwa ndio muhimu zaidi kuisikia kuliko Sauti ya Mungu iliyothibitishwa ambayo Yeye ameihakikisha na kuithibitisha kuwa Bwana Asema Hivi?

Yeye ametuambia, na kutuambia, kunaweza kuwa na watu waliotiwa mafuta kweli, na Roho Mtakatifu wa kweli juu yao, ambao ni wa uongo. Kuna NJIA MOJA tu ya kuwa na hakika, KUKAA NA NENO LA ASILI, kwa maana Ujumbe huu na mjumbe ni kitu kile kile. Kuna Sauti moja tu ambayo Mungu aliichagua kuwa Bwana Asema Hivi…MOJA.

Huduma ya kweli itakuambia kwamba HAKUNA KITU kilicho muhimu zaidi kuliko kulisikia Neno la Mungu kutoka kwenye Sauti ya Mungu iliyo kwenye kanda. Wao wanaweza kuhubiri, kufundisha, au chochote walichoitiwa kufanya, LAKINI LAZIMA WAIWEKE SAUTI YA MUNGU KUWA NAFASI YA KWANZA; LAKINI WAO HAWAFANYI HIVYO, BALI WANAIWEKA HUDUMA YAO KUWA NDIO NAFASI YA KWANZA. Matendo yao yenyewe yanathibitisha kile wanachoamini.

Wanakwepa kujibu swali kuhusu kuiweka Sauti ya Mungu kwenye mimbara zao kwa kusema, “Ndugu Joseph haamini katika wahudumu. Haamini katika kwenda kanisani. Wao wanamwabudu mtu. Wanafuata fundisho hilo la Joseph. Yeye anatengeneza dhehebu kwa kucheza na kusikiliza wote kanda ileile.” Wakiwakengeusha tu watu kutoka kwenye swali kuu hasa, lakini matendo yao yanathibitisha kile wanachoamini kwa kile wanachowafundisha watu wao: HUDUMA YAO NDIO NAFASI YA KWANZA.

Wanasema, kuwafanya watu wasikilize wote kanda ile ile kwa wakati mmoja ni dhehebu. Je! Hivyo sivyo hasa alivyofanya Ndugu Branham Wakati yeye alipokuwa hapa; kuwaunganisha watu kwa simu ili wasikie Ujumbe wote kwa wakati mmoja?

Wewe jiulize, kama Ndugu Branham angekuwepo hapa leo katika mwili, Je! hangewafanya Bibi-arusi wote KUJIUNGANISHA KWA SIMU ili wamsikie yeye wote kwa wakati mmoja? Je! asingejaribu kuwakusanya Bibi-arusi pamoja katika HUDUMA YAKE kama vile yeye alivyofanya kabla Mungu hajampeleka nyumbani?

Hebu niingize kitu fulani hapa. Wakosoaji watasema, unaona, anafanya yale yale, kumsifia huyo mtu sana; wao wanamfuata mtu, William Marrion Branham!!  Hebu tu tuone kile Neno linachosema kuhusu hilo pia:

Katika siku za mjumbe wa saba, katika siku za wakati wa Laodikia, mjumbe wake atafunua siri za Mungu kama zilivyofunuliwa kwa Paulo. Yeye atanena, na hao watakaompokea nabii huyo katika jina lake mwenyewe watapokea matokeo mema ya huduma ya nabii huyo.

Hili litamkasirisha shetani zaidi ya chochote kile naye atanishambulia hata na zaidi, lakini enyi watu, afadhali mlichunguze hili kwa Neno. Si kwa sababu mimi nimelisema, hapana, basi ningekuwa kama mtu yeyote yule; bali ifungueni mioyo yenu na nia zenu na mlichunguze hilo kwa Neno. Si kile mtu mwingine ye yote anachosema au anachowafasiria, bali kile nabii wa Mungu alichosema.

Baada ya barua hii wao watawapa nukuu baada ya nukuu baada ya nukuu, nami nasema AMINA kwa kila nukuu, LAKINI VIPI KUHUSU JAMBO LILILO KUU? Je! wanazitumia nukuu kuwaambia kuwa kumsikia nabii ndilo jambo mnalopaswa kufanya, au HUDUMA YAO?  Wakisema Ujumbe, nabii, basi waambieni waiweke hiyo Sauti KUWA NAFASI YA KWANZA katika kanisa lenu.

Juu ya msingi wa tabia za wanadamu peke yake, mtu ye yote anajua ya kwamba palipo na watu wengi kuna hata na maoni yasiyopatana juu ya mambo madogo-madogo ya fundisho muhimu ambalo wote wanashikilia pamoja.

Hilo hapo. Hii nukuu moja tu inawaambia haiwezi na HAITAKUWA kundi la watu. Si wahudumu watakaowaunganisha watu kwa sababu ya tabia za wanadamu peke yake; wamegawanyika juu ya maoni ya mambo madogo-madogo ya mafundisho muhimu. Wote hawawezi kukubaliana, kwa hivyo mnapaswa kurudi kwenye NENO LA ASILI.

Ni nani basi atakayekuwa na mamlaka ya kutokosea ambayo itarudishwa katika wakati huu wa mwisho, kwa kuwa wakati huu wa mwisho utarudi kwenye kumdhihirisha Bibi-arusi wa Neno Halisi?

NI NANI atakayetuongoza? SAUTI MOJA, iliyo na mamlaka ya kutokosea ndio itamwongoza Bibi-arusi.

Hiyo inamaanisha tutakuwa na Neno tena kama lilivyotolewa kikamilifu, na kueleweka kikamilifu katika siku za Paulo.

Utukufu… Limetolewa kikamilifu na kueleweka kikamilifu. Halihitaji fasiri, kwa vile lilivyotolewa kikamilifu, na sisi, Bibi-arusi, tunalielewa kikamilifu na kuamini kila Neno.

Tunaliona hilo. Tunaliamini hilo. Tunalitegemea jambo HILO.

Umealikwa kuja kuungana nasi wakati tunapokisikia kinywa cha Mungu, Sauti ile itakayo muunganisha Bibi-arusi wa Yesu Kristo, Nabii wake aliyethibitishwa, anapotupa ukweli halisi, saa 06:00 SITA MCHANA, saa za Jeffersonville,(Ni saa 1:00 MOJA JIONI ya Afrika Mashariki)

Ndugu. Joseph Branham

65-0725M Watiwa Mafuta Katika Wakati Wa Mwisho

UJUMBE: 65-0718E Chakula Cha Kiroho Kwa Wakati Wake

PDF

• 24-0728 Chakula Cha Kiroho Kwa Wakati Wake
• 23-0108 Chakula Cha Kiroho Kwa Wakati Wake
• 21-0912 Chakula cha Kiroho kwa Wakati Wake
• NUKUU YA LEO KWA KISWAHILI
• 20-0329 Chakula Cha Kiroho Kwa Wakati Wake
• 18-1014 Chakula Cha Kiroho Kwa Wakati Wake – Preliminari
• 16-1221 Chakula Cha Kiroho Kwa Wakati Wake

BranhamTabernacle.org

Mpendwa Bibi-arusi wa Kristo, hebu na tukusanyike pamoja Jumapili saa 06:00 SITA MCHANA, saa za Jeffersonville,(Ni Saa 1 MOJA JIONI ya Afrika Mashariki) ili kusikia 65-0718E Chakula cha Kiroho Kwa Wakati Wake.

Ndugu. Joseph Branham

UJUMBE: 65-0718M Kumtendea Mungu Kazi Bila Mapenzi Yake

PDF

• 24-0721 Kumtendea Mungu Kazi Bila Mapenzi Yake
• 23-0101 Kumtendea Mungu Kazi Bila Mapenzi Yake
• 21-0905 Kumtendea Mungu Kazi Bila Mapenzi Yake
• NUKUU YA LEO KWA KISWAHILI
• 18-1007 Kumtendea Mungu Kazi Bila Mapenzi Yake – Preliminari

BranhamTabernacle.org

Mpendwa Bibi-arusi wa Kristo, hebu tukusanyike pamoja Jumapili saa 6:00 SITA MCHANA saa za Jeffersonville,(Ni Saa 1 MOJA JIONI ya Afrika Mashariki), kusikia
65-0718M – Kujaribu Kumtendea Mungu Kazi Bila ya Kuwa Mapenzi ya Mungu.

Ndugu. Joseph Branham

UJUMBE: 65-0711 Kuonea Haya

PDF

• 24-0714 Kuonea Haya
• 22-1225 Kuonea Haya
• 21-0829 Kuonea Haya

BranhamTabernacle.org

Mpendwa Bibi-arusi Asiyeonea Haya, 

Hakujawahi kuwa na wakati au watu kama leo hii. Sisi tumo ndani yake, warithi wa yote aliyotununulia. Anashiriki utakatifu wake pamoja nasi, mpaka ndani yake, tumekuwa haki halisi ya Mungu. 

Yeye alitujua tangu zamani kwa amri ya Kiungu, ya kwamba tungekuwa Bibi-arusi Wake. Alituchagua sisi, hatukumchagua Yeye kamwe. Hatukuja wenyewe, ilikuwa ni chaguo Lake. Sasa ameweka ndani ya mioyo yetu na nafsi zetu Ufunuo mkamilifu wa Neno Lake.

Siku baada ya siku, Yeye anatufunulia Neno Lake, akimimina Roho Wake juu yetu, akiyadhihirisha maisha Yake mwenyewe ndani yetu. Kamwe Bibi-arusi Wake hakuwahi kutia nanga zaidi mioyoni mwao wakijua wako katika mapenzi Yake makamilifu, na katika mpango Wake, kwa kukaa na Neno Lake, kuisikia Sauti Yake.

Upendo wa Mungu na Ujumbe huu umejaa mioyoni mwetu mpaka unabubujika tu. Hakuna kitu kingine sisi tunachotaka kusikia, kuzungumzia, kufanyia ushirika, au kushiriki tu nukuu ambayo tumesikia na kumsifu Bwana.

Sisi ni kama vile Musa upande wa nyuma ya jangwa. Tumetembea uso kwa uso na Mwenyezi Mungu, nasi tunaiona hiyo Sauti ikisema nasi; imeambatana kabisa na Neno na ahadi ya wakati huu. Imetufanyia kitu fulani. Hatuionei haya. Tunapenda kuitangaza kwa ulimwengu. Tunaamini Bwana Yesu ndiye Ujumbe wa saa hii na sisi NDIO BIBI-ARUSI WAKE.

Ametuimarisha kwa Neno Lake. Hakuna shaka hata kidogo, hii ndiyo njia iliyoandaliwa na Mungu. Mungu kamwe habadilishi nia Yake kuhusu Neno Lake. Yeye alimchagua malaika Wake wa saba kumwita Bibi-arusi Wake atoke, na kisha kumweka Yeye kwenye mstari sawa na Neno Lake.

Hakuna kitu katika maisha haya ila Yeye na Neno Lake. Hatuwezi kupata ya kutosha ya jambo hilo. Ni zaidi ya uhai kwetu sisi. Injili na Nguvu za Mwenyezi Mungu zimeenea ulimwenguni kote kuliko hapo awali. Neno sasa liko mikononi na masikioni mwa Bibi-arusi. Wakati wa kutengana unatukia sasa, wakati Mungu anamwita Bibi-arusi, naye shetani analiita kanisa.

Tunakupenda Wewe na Neno Lako, Bwana. Hatuwezi kupata ya kutosha. Tumeketi katika uwepo wa Neno lako kila siku, tukiivishwa, tukijitayarisha kwa ajili ya Kuja Kwako hivi karibuni. Baba, litakuwa limekaribia sana. Tunaweza kulihisi, Bwana. Tunasubiri kwa hamu kubwa. 

Baba, jalia tuwe waaminifu vya kutosha na tuzifanye upya nadhiri zetu tena. Tunajua Imani yetu katika Neno lako inawaka mioyoni mwetu. Umeondoa mashaka yote. Hakuna kitu hapo ila Neno Lako. Tuna hakika, nasi hatuoni haya kuuambia ulimwengu, sisi ni Bibi-arusi Wako wa Kanda.  

Ninataka kuualika ulimwengu kuja kusikiliza pamoja nasi Jumapili hii saa 06:00 SITA MCHANA, saa za Jeffersonville,(ni saa 1:00 MOJA JIONI ya Afrika Mashariki) tunaposikia Ujumbe:  Kuonea Haya 65-0711.

Ndugu. Joseph Branham 

Maandiko ya kusoma kabla ya Kusikiliza Kanda:

Marko 8:34-38

UJUMBE: 65-0418E Je! Mungu Habadilisha Nia Yake Kuhusu Neno Lake?

PDF

• 24-0707 Je! Mungu Habadilisha Nia Yake Kuhusu Neno Lake?
• 22-1218 Je! Mungu Hubadilisha Nia Yake Kuhusu Neno Lake?

BranhamTabernacle.org

Mpendwa Bibi-arusi Wa Mapenzi Makamilifu,

Siku imeenda sana na Kuja kwa Bwana kumekaribia. Mlango unajifunga na wakati unaisha, ikiwa bado haujaisha. Muda umeenda sana kushangaa-shangaa; wa kuwa kama unyasi unaotikiswa na upepo; wa kuwa na masikio ya utafiti. Ni wakati wa kufanya maamuzi dhahiri. Yanilazimu nifanye nini ili kuwa Bibi-arusi Wake?

Je! Mungu hubadilisha Nia Yake kuhusu Neno Lake? KAMWE. Basi tunapaswa kujitahidi kila siku, kwa moyo na roho zetu zote kuwa katika MAPENZI YAKE MAKAMILIFU. Inatupasa kujikabidhi wenyewe kwenye mapenzi Yake na Neno Lake. Usilihoji kamwe, liamini tu na ulikubali. Usijaribu kutafuta njia ya kuliepa. Lichukue tu jinsi lilivyo.

Nabii anatuambia katika Ujumbe huu ya kwamba kusudi lake lote ni kutuonyesha ya kwamba Mungu hana budi kutimiza Neno Lake kusudi adumu kuwa Mungu, lakini watu wengi wanataka kuliepa, na kupitia njia nyingine. Wanapofanya jambo hilo, wanajikuta wakipiga hatua, na Mungu akiwabariki, bali wanafanya kazi katika mapenzi Yake ya kuruhusia na wala si katika mapenzi Yake makamilifu, ya Kiungu.

Nabii anaturudisha kwenye Neno na kutupa mifano ya kutazama, kujifunza, na kutukumbusha, Mungu HABADILISHI Nia Yake wala njia Yake, Yeye ni Mungu wala HABADILIKI.

Sasa, tunaona ya kwamba wote hawa wawili walikuwa watu wa kiroho, wote wawili walikuwa manabii, wote wawili walikuwa wameitwa. Naye Musa, akiwa moja kwa moja kazini, akiwa na Nguzo ya Moto mpya mbele yake kila siku, Roho wa Mungu akiwa juu yake, akiwa kazini. Huyu hapa mtumishi mwingine wa Mungu anakuja, aliyeitwa na Mungu, aliyechaguliwa na Mungu, nabii ambaye anajiliwa na Neno la Mungu. Hapa ndipo penye hatari. Hakuna mtu angaliweza kukataa mtu huyo kuwa ni wa Mungu—wa Mungu, kwa maana Biblia ilisema Roho wa Mungu alinena naye, naye alikuwa nabii.

Bwana, jinsi gani hilo linavyofanana sana? Ninawezaje kujua, wakati WOTE wawili walikuwa manabii? Wote wawili ni watu waliojazwa na Roho walioitwa na Mungu, waliochaguliwa na Mungu; manabii wa Mungu ambao Neno la Mungu huwajia. Wote wawili wakisema Roho Mtakatifu anawaongoza.

Hebu tusome na tujifunze nukuu chache kwa makini sana kuhusu kile ambacho malaika-mjumbe wa saba wa Mungu asemacho. Tunataka kile yeye anachosema; si kile kanisa linachosema, kile ambacho Daktari Jones asemacho, ama kile mtu mwingine yeyote asemacho. Sisi Tunataka kile BWANA ASEMA HIVI asemacho kupitia nabii Wake.

Musa, akiwa nabii aliyechaguliwa na Neno la Bwana, alithibitishwa ya kwamba alikuwa amechaguliwa kuwa kiongozi wao kwa ajili ya majira hayo, na ya kwamba Ibrahimu alikuwa ameahidi mambo haya yote,…

Hakuna mtu angaliweza kupachukua mahali pa Musa. Haidhuru ni Kora wangapi walioinuka, na ni Dathani wangapi; ilikuwa ni Musa, Mungu alikuwa amemwita, kwa vyo vyote.

Musa ndiye ambaye Mungu alikuwa amemchagua kuwaongoza watu. Wanaume wengine waliinuka na kusema wamepakwa mafuta, watu waliojazwa na Roho Mtakatifu pia. Mungu alikuwa amewaita waongoze pia. Lakini Musa alikuwa ndiye kiongozi wa Mapenzi Makamilifu ya ya Mungu ya asili wa kuwaongoza.

Lakini, na iwapo watu hawatatembea katika mapenzi Yake makamilifu, Yeye ana mapenzi ya kuruhusia atakayokufanya uende kwayo. Angalia, Yeye hurusu jambo hilo, kweli, bali atalifanya litende kazi kwa utukufu Wake, katika mapenzi Yake makamilifu. Sasa kama mngetaka…

Hakuna anayetaka kuwa katika mapenzi ya Mungu yakuruhusia. Bibi-arusi wa kweli anataka kuwa katika mapenzi Yake makamilifu, wakati wote, haijalishi gharama.

Kuna kutokubaliana kwingi, mawazo mengi, mkanganyiko mwingi, maoni mengi, juu ya umuhimu wa kucheza kanda.

Sote tunajua hili ndilo suala lenyewe ambalo limewatenganisha waaminio wa Ujumbe leo. Tunajua Bibi-arusi LAZIMA, NA ATA-ungana pamoja; hilo ni Neno.

Kuna watu waliojazwa na Roho, walioitwa na Mungu katika Kanisa leo. Wao ni watu waliotiwa mafuta na Mungu walioitwa kuhubiri Ujumbe huu. Lakini hakuna hata mmoja wao ambaye tunaweza sote kukubaliana kwake.

Wanawezaje wao kuwa ndio wa kumuunganisha Bibi-arusi? Je, twaweza kuungana kwenye huduma yao? Kwa kweli wao wameitwa kuliongoza kundi lao, lakini kuwarudisha hao kwenye MPANGO WA ASILI wa Mungu. kwa KIONGOZI WAKE. Kwa NABII WAKE. Sio kwenye huduma yao.

Kama wao hawakufundishi kwamba ile Sauti iliyo kwenye kanda hiyo ndio UNAPASWA uifuate, na lazima uamini kuwa ndiyo Sauti iliyo muhimu zaidi unayopaswa kuisikia, wako tu katika mapenzi Yake ya kuruhusia.

Iwapo wanakuambia kuwa Ndio Sauti iliyo muhimu zaidi, nao wanaamini kweli hivyo, basi inakuwaje hawabonyezi play kila wakati mnapokutana?

Ikiwa unataka kuwa na hakika, NA HAKIKA, kwamba uko katika mapenzi Yake makamilifu, kuna NJIA moja tu ya HAKIKA. Ni kusikia Sauti ya Mungu iliyothibitishwa kwenye kanda.

Muda si muda, kanda inaangukia nyumbani mwao. Imelenga penyewe, basi. Kama yeye ni kondoo, anakuja moja kwa moja Nalo. Kama yeye ni mbuzi, anapiga hiyo kanda teke.

Lazima niwe na HAKIKA. Siwezi, na sita-bahatisha hata kidogo kwa kikomo changu cha Milele. NAJUA Sauti iliyo kwenye kanda ni Sauti ya Mungu kwa Bibi-arusi. NAJUA Hiyo haikosei. NAJUA Ilithibitishwa na Nguzo ya Moto. NAJUA Ndiye ambaye Mungu alimchagua kumwongoza Bibi-arusi Wake. NAJUA ya kwamba Sauti hiyo ndiyo Sauti pekee inayoweza na itakayo muunganisha Bibi-arusi. NAJUA itakuwa ni Sauti hiyo nitakayoisikia ikisema “Tazama, Mwana-Kondoo wa Mungu”.

LAZIMA NIBONYEZE PLAY niisikie hiyo Sauti. Unaalikwa kuja kuungana nasi Jumapili hii saa 06:00 SITA MCHANA, saa za Jeffersonville,(Ni Saa 1:00 MOJA JIONI ya Afrika Mashariki) tunaposikia: 65-0418E Je! Mungu Hubadilisha Nia Yake Kuhusu Neno Lake?

Ndugu. Joseph Branham

Tutauanza Ujumbe huu kwenye aya ya 61.

Maandiko ya kusoma kabla ya Kusikiliza Ujumbe:

Kutoka sura ya 19
Hesabu 22:31
Mathayo Mt. 28:19
Luka 17:30
Ufunuo sura ya 17