Ko kabalilo nki akalwiimiko uswe tukuya nako. Uswe tuli pasi pa buguulilo ubukulumba kila ndungu bo uswe tukoongana palikimo ukusyungutila i Lisyu-lya-pakanwa Lyake. Ilinogonelo lyitu lyamwambepo lyo mosa lyelusigwe. Uswe TUMENYE katikati Uyu Umwene ali. Uswe TUMENYE katikati iki Umwene ali. Uswe TUMENYE katikati ywani uswe tuli; kikolo kimokyene ikimywamu NU MWENE!
“Umwene alimpele u nyambala ukuya kyala gwakumanyilila.” Panongwa yakuti Umwene yo Tata Kyala, kangi Umwene aapelile u mundu kyala gwakumanyilila, popapo Umwene akaya gwakuyako-pamwene kangi mma, Umwene aliko ni kikolo Kyake. Elah, Elah, Elohim. Lilino, lilino Umwene yo Yehova, kikusanusya, “Yumo Yuyo aliko ni kikolo Kyake.”
Kyake ikikolo Kyansingiligwa kyo kikupelelesigwe ni Lisyu-lya-pakanwa lya Yehova Mwene. Umwene atumanyisye uswe akalwilo ukulwana nu ndugu aligwesa uyu ikusiganila uswe; mumo uswe tubagile ukuponjola nu kutola umwene ni Lisyu, pakuti i Lisyu Lyake lyumi kangi likwitugala nkati mwa uswe. Umwene ikusisimikisya uswe, “USWE Y’USWE LISYU LILA”. Kokuti kalikosa uswe tukusuma mu Ngamu Yake, uswe tubagile ukuyanakyo ikyene linga uswe tukwitika…KANGI USWE TUKWITIKA!
Umwene ayobile kangi asetwile kwa uswe akayile mabupime ga banyambala na bakikulu abapelelesye ukuti uswe tubagile ukuya buyo bwakutugala kuko Umwene mumi. Umwene ahohogwile kangi Umwene ahohogwile ukoongana u Nsingiligwa Gwake unganigwa palikimo ukuleka uswe tumanye Umwene yo Kalongolela gwitu, kangi Umwene atuloongosyaga nu kulongolela uswe ukwisila mu Gwake ugwapakisu kalongolela gwandumi, William Marrion Branham.
Lilino Umwene alinakyo ikingi ikimanyisyo kyapasima Umwene ikunyonywa ukumanyisya nu kusetula kwa uswe. Umwene ikulonda ukufumusya ukuti uswe yo uswe Bake abana abafwikigwe. Ingamu yitu yo yifwene itolo ni Ngamu Yake. Uswe tusookile panja ukufuma Kenani, panja pa kisu, kangi twe LILINO twiitugesye palikimo mu mabuyo Gamwanya, tukulya ikilundikigwe, a Manna amafisigwe.
Lilino Umwene ikuyaga pakutubula uswe iki uswe tukufimbilisigwa ukubomba ukuya biitendekesye kuli Yake i Ndumi yakukonga kangi iki kyabagile ukuboneka pabuyo linga uswe tukubomba.
Uswe tukufimbilisigwa ukuya biipuutano losa kangi biitendekesye kuli i Ndumi yila; Ukwibungania twibene palikimo ngati biikemo ukupilika i Lisyu-lya-pakanwa Lyake, Toosigwe na Mbepo Mwikemo, twisusigwe ni sayo sya Kyala; Nasimo inyinogono imbiibi; Nakimo ukulwana yumo nu nnine; Tukuyoba mu lugano nu lwitikano; Ukuya mbufwane bumobwene, mu buyo bumobwene palikimo mmabuyo Gamwanya pasi pa busyungutilo Bwakumwanya; Syosa imbiibi syitu pasi pa Lilopa, mu bwiputi ubupelelesye; Ifiboko fyitu ni ndumbula syitu fifyuusigwe mmwanya kwa Kyala, ukwiputa palikimo mu mabuyo Gwamwanya.
Linga uswe tukubomba ifindu ifi, iki kyo iki kisa kubombigwa pa buyo Pandungu ugu:
Indumbula yiliyosa yisa kwisusigwa na Mbepo. Polelo mbimbibi pisa kwisa ukufuma Kumwanya akoogo ngati ugwakubopabopa umbelo ugwamaka kangi Umwene isa kusaya uswe na syosa isayo syamwambepo.
Ikyo kyo iki kikuyaga pakuboneka pabuyo Pandungu ugu pa 12:00 PAMUSI, akabalilo ka Jeffersonville, kuko Kyala apele ubuyo bwapasima kuko u Nsingiligwa abagile ukubungana palikimo ukupilika i Lisyu-lya-pakanwa Lyake mu lwitikano lumolwene, mu buyo bumobwene, ni fiboko fyitu ni ndumbula fifyuusigwe mmwanya kwa Kyala, tukwiputa palikimo mu busyungutilo Bwamwanya.
Nkundwe Yosefu Branham
Ndumi: Bufwikigwe #1 60-0515E
Lisimbo Yoeli 2:28 Baefesi 1:1-5 I Bakoronti 12:13 I Peteri 1:20 Busetuli 17:8 Busetuli 13
Kyala aafiingile ukutuma u kalongolela ku Nsingiligwa Gwake mu masiku gabumalikisyo aga ukuti Umwene aabagile ukwisetula Mwene mu nyofu, itolo bomumo Umwene aaboombile akabalilo kako Umwene aaliisile ku kisu mu Mwanundumiana Gwake, Yeso. Umwene aatubuulile uswe mu Lisyu Lyake ukuti Umwene ikutumaga u Eliya u nsololi, uyu aabagile ukuya Mwanundumiana gwa Muundu ikwisetula Mwene mu nyofu gwabundu; kabuno Umwene alinafyo ifindu fingi fiyo tasi ifyakuyoba nu kumanyisya uswe.
Umwene atisa kuyoba isya mwene mma, loli kilikyosa umwene isa kupilika, kila umwene isa kuyoba: kangi umwene isa kunaangisya ifindu ifya kwiisa. Kabuno, umwene isa kwimika une: kabuno umwene isa kwambilila ukufuma kwa une, nu kunaangisya ikyene kwa umwe.
Umwene aatumile William Branham ukufwanikisya i Lisyu Lyake nu kutuyenga uswe ngati yumo-pa-yumo ukuya Bupime bwa Yeso Kristi; u nyambala umpelelesye uyu aabagile ukuponjola u ndugu aligwesa, kangi angali ikuya nyumba-ya-maka kuli u Mbepo Mwikemo ukwiituugasyamo.
Kyala akatoligwamo siku bwila ukutuma u kalongolela ku bandu Bake. Loli ukuya Nsingiligwa Gwake, ugwe kufimbilisigwa ukwitikisya u kalongolela yula. Ugwe kufimbilisigwa ukwiitika ikyene. Ugwe kufimbilisigwa ukubuka injila umwene ikuyoba kisita-ikyo ugwe kuyaga kwisa ngapo njoonge. Kali uswe tukwinogona fiki, kyofiki kikuboneka kyaminogono, pamo kyofiki kikuboneka kisekesye, uswe tukaya biilaambike ukuyabania ikyo, u kalongolela yo mwene ntiga.
Umwe mukuyoba, Nkundwe Yosefu, uyo yo Mbepo Mwikemo ukulondolela uswe, komma Nkundwe Branham. A Masyu umwene aayobile YO Mbepo Mwikemo kangi komma Nkundwe Branham; loli umwene yo yumo aasuunguligwe na Kyala ukusetulamo u Mbepo Mwikemo, nu kuya kalongolela gwapakisu.
Kangi lilino Kyala bwila atumile abakalongolela Bake, Umwene yo bwila nasiku ukuya kisita u kalongolela yumo, mosa ukukindamo mu ngulilo. Kyala yo bwila alinagwe umunduyumo uyu ukummwimilila Umwene pa kisu iki, mu ngulilo syosa.
Uswe tukufimbilisigwa ukwagania ywani yula u kalongolela gwapakisu ali uyu ikwiimilila Umwene apa pa kisu; pala pikulambalala u Busetuli bwabwanaloli pa Lisyu Lyake.
Uswe tumenye u Mbepo Mwikemo yo Kalongolela Nkulumba uyu Tata aatumile ukulongolela u Nsingiligwa Gwake, loli apa Kyala aayobile ukuti Umwene bwila ikutuma u nyambala ukuya kalongolela ukwiiyimilila Mwene nu kulongolela u Nsingiligwa Gwake.
U Kalongolela gwitu aatubuulile uswe ukuti Korneli aali nkulumba kangi nnyambala ugwalugindiko. Umwene ahombaga ifyabupi kangi umwene iipuutaga ilisiku lililyosa. Loli akabalilo kako Mbepo Mwikemo ikwisa, umwene aafuumbwaga u Kalongolela.
Kyala aalintuumile umwene Mbepo Mwikemo. Umwene aatumile Ikyene mu mundu gwa Peteri, “Kabuno bo Peteri aakali ikuyoba a Masyu aga, u Mbepo Mwikemo alinkugwa pa mwene.” Kyala aaboombile u Kalongolela ukwisila mwa Peteri. Umwene aaboombile Ikyene, panongwa yakuti Umwene aaloongolile Korneli ku njila indalusye.
Bo Peteri akaali ikuyoba, u Mbepo Mwikemo aagwile pa bene. Peteri alinkuyoba,
“Ngimba u mundu abagile ukukanisya amisi, ukuti aba balingoosigwaga? Muketile, akaali u Kalongolela ikuyoba, komma Peteri.
Uswe tutikuloongosigwa nu mundum ma, uswe tukuloongosigwa na Mbepo Mwikemo, UYU IKUYOBA UKWISILA MU NYAMBALA KYALA AASUUNGWILE UKUYA KALONGOLELA GWAPAKISU.
U Mbepo Mwikemo bo ikuyoba ukwisila mwa gwandumi kaloongolela Gwake yo bwila isa kuyoba i Lisyu. Umwene aatubuulile uswe, “Une ndinafyo ifindu fingi fiyo ukubabuula umwe. Umwe mukabagila ukupilikisya Ikyene lilino, loli akabalilo kako Umwene ikwisa, Umwene isa kuloongolela umwe ku Kyene.”
Yohani aaloongosigwe akabalilo kako umwene aasiimbile Busetuli. Umwene aaloongosigwe na Kalongolela ukuyoba, “Yuyo siku isa kwegako i Lisyu limolyene ukufuma ku Lyene, pamo ukoongelelako i lisyu limolyene ku Lyene, kilakila kisa kweegigwa, ikiyabo kyake, ukufuma kwa Buku gwa Bumi.”
U Mbepo Mwikemo kangi aaloongwisye Nkundwe Branham ukuyoba uswe tukufimbilisigwa ukuyoba iki kili pa matepi; komma ukoongelelako pamo ukwegako. Kangi Umwene apeele i njila yimo uswe tubagile ukubomba iki umwene aalagiile uswe tukufimbilisigwa ukubomba, Binda Kina.
Lilino, ngimba kuyaga bulebule pa kwingisyapo ikindukimo kuli i Lisyu lya Kyala, kangi pope yoba ugwe kuloongosigwa na Mbepo Mwikemo.
Keta iki Umwene aaboombile kuli uswe, itolo mu milungu minandi igi gyamalikaga igi. Umwene aatumanyisye uswe akaponjolelo ka ndugu aligwesa uyu ikwisa pankyeni pa uswe; akakwaabilo ka Lubo lwitu lwa LWITIKO nu kundigita umwene ku bufwe. Uswe tukayanakyo nakimo ukutila. Nakimo kibagile ukwima pankyeni pa uswe.
Muno Umwene aasoondile i Kyakulya kuli u Nsingiligwa Gwake ukulya. Na kabalilo kako untumigwa Gwake ali kubutali asokilepo, uswe pope tulinagwe u Kalongolela i kisu-kya-pasi kimenyepo nakimo; loli ku Nsingiligwa Gwake, Ikyene kyo Kyakulya Kwamwambepo Mu Kabalilo Kaake, a Manna Amafisigwe uswe tukulyapo bwila.
Umwene atuyengile uswe ukwisa mu mabupime ga banyambala abapelelesye ukuti Umwene abagile ukwitugala nu kusyala mwa kila yumo gwa uswe. Umwene aatumile uswe u Mbepo Mwikemo nu kwiisetula Mwene mu nyofu, bomumo Umwene aaboombile ifyinja 2000 ifi fikiindile, ukuya Kalongolela gwitu, ikwitugala nu kuyoba ukwisila mu Gwake u kalongolela gwapakisa.
Une ngubilikila kila yumo gwa umwe ukwisa nu kupilika, “Hoo-hoo, hoo-hoo!” kuko u Nsingiligwa isa kwisa mbutalule ku Hoo yula. Umwene isa “Hoo-hoo, hoo-hoo!” kangi pala pisa kuyapo u luseko-lwa-jubilii lumo ukusyungutila i kisu-kya-pasi. Fiki? U Nsingiligwa ikumanya i Lisyu-lya-pakanwa lya Kalongolela gwabo.
Linga utikulonda ukuya njonge, isaga pilikisya u Kalongolela gwitu bo Umwene ikuyoba ukwisila mwa kalongolela gwapakisu unsunguligwe Pandungu ugu pa 12:00 PAMUSI, akabalilo ka Jeffersonville. Nkundwe Yosefu Branham
Uswe tukuya Kitembe ikyabumi kya Kyāla gwãbùmi. Ikyēne yo Kyāla ikwitugala mwa uswe, ukutupela uswe ukuya bo y’Umwēne, ukundalika u Bundu Bwãke mwa uswe.
Uswe tukwega ubuyo bwa Kristi, ukukindilisya u butumigwe Bwãke. Umwēne ikwitugala mu bugelelo bwa mūndu bo Umwēne ikwindalika Mwēne mwa uswe. Uswe lilino tuli nu bwiputi ubupekelesye nu Mwēne! Ikyēne yo Kyāla ikwibonesya-pabwelu mwa uswe, ukuya Kitembe Kyãke.
Ngimba lo lwalo lwitu nki ulusitakusemesigwa ikwitika ifindu ifi? LWĪTÌKO. Kãngi ulwitiko lwītu lutikufumbwa kalikosa mma; kabuno u lwītìko lukwītìka i Lisyu lya Kyāla. Kabuno u lwītìko lukwisa ukwisila mu kupilika, kangi ukupilika i Lisyu lya Kyāla, kangi i Lisyu lya Kyāla likwisa kwene ku nsololi, kangi tubagile ntiga UKUPILIKA u nsololi ukwisila mwa BINDA KINA…LIGITI!
Ukwisila mu kupilikisya ku Lisyu-lya-pakanwa Lyãke, uswe tukuya bengelusigwe na Maka Gake kangi tuli bafwe ku bwinogonelo bwitu twībène. U lwītìko lwītu lwisile ukuya lwītìko ulwanaloli, kangi u Būmi Bwãke bwengelukile mwa uswe. Uswe tuyīle fipeligwa fyabumi fya Kyāla, u buyo bwakwītúgalàmo mūmo Mbepo Mwīkèmo abagile ukutuma isayo Syãke isi sikufūka ukusuluka ukwisilamo.
Ngimba i Lisyu-lya-pakanwa lila pa matepi likubomba fiki?
Kristi ãlindúmìle une ukuyenga kilayumo ku bupime bwa Yeso Kristi, ukuti abēne babagile ukuya nyumba-ya-maka kangi ubuyo bwakwitūgásyàmo bwa Mbepo yula, ukwisila mu Lisyu Lyãke. Ukwisila mu Lisyu Lyãke, muketile, ukunjenga kilayumo ku buyo bula.
Ukwisila mu kupilika i Lisyu-lya-pakanwa Lyãke, nu kwitika nu kukõnga i Lisyu Lyãke, ilyẽne liyengile uswe ukwisa ukuya mabupime ga Yeso Kristi; ubuyo bwakwitūgásyàmo kuli u Mbepo Gwãke. Uswe y’uswe bwīfímbilìsyo bwãbùmi, bumanyi bwãbùmi, ubufindang’oma bwãbùmi, ubunyakyala bwãbùmi, a Maka gãbùmi, fikwisa ukufuma kwa Kyāla gwãbùmi, iki kikupela uswe u mūndu gwãbùmi, i kifwani kyãbùmi, mu bupime bwa Kyāla.
Lõli u Mbili gumo Ugwe undendekile Une,” u Mbili gumo ugu Kyāla abagile ukwītúgasyàmo, Kyāla abagile ukwendelamo, Kyāla abagile ukuketelamo, Kyāla abagile ukuyobelamo, Kyāla abagile ukubombelamo. Ameni! Ikibómbèlo kyãbùmi kya Kyāla, Kyāla ikwenda pa filundi fibili, mwa ugwe. Lwīmìko! “Amakato ga bagolofu gikulagililigwa na Kyāla,” Kyāla ikwenda mwa ugwe. “Kabuno umwe mwe bakalata abasimbigwe, ababaligwe na bandu bosa.”
Lwīmìko…!! Polelo uswe tutikupãsya kali uswe tukwitúgàla mu kihema pamo nkatembe, buumi pamo tukufwa, tukuyubikigwa pamo tukumilwa. Iki Kyo kindu kyene uswe twīkyélilèmo, INDUMI IYI, I LISYU-LYA-PAKANWA ILI, I LISYU LYA KYĀLA. Ilyẽne lyo Kitangalala kya Kyāla. Ilyẽne lyo njila ya Kyāla imbīgwe kuli umwīsyùgu. Ilyẽne likuyenga U Bupime Bwa Nyãmbàla Umpelelesye, yūyo USWE TULI!
Unko uswe twīse palikimo nu kwiyēnesya imyoyo gyitu bo uswe tukupilika u Fundi gwītu ikutufunda uswe iki uswe tubagile ukubõmba, na mūmo uswe tubagile ukwitugala, ukuya banabalumiana na banabalindwana B-A-P-E-L-E-L-E-S-Y-E ba Kyāla.
Uswe twīsa kufinga kwa Ntwa ukuti ukwisila mu butuli Bwãke na ipyana Lyãke, uswe twīsa kwīpùta nu kulondesya Umwēne ilisiku lililyosa kisita kuleka, mpaka uswe tukwipilika filifyosa ifyakulonda Fyãke fikusululukila mu bupime bwitu. Uswe twīsa kusyala pala mpaka uswe tubagile ukuya bubonekele-pabwelu bwa Kristi gwãbùmi.
Undungu guligosa u lusekelo kangi ubugūlìlo bwa iki u Ntwa ikuyaga pakubomba nu kusetula kwa uswe kyo ukukinda amasyu ukulingania. Mūmo une ngulonda i kīsu-kya-pãsi ukulungisania na uswe kabuno kikayapo nakimo ikikulumbapo, pamo ikipelelesyepo ukukinda ukwītúgàsya mu kuyapo kwa Lisyu-lya-pakanwa lya Kyāla nu kwisa kuya U Bupime Ubupekelesye Bwa U Nsīngilìgwa Gwãke Gwa Lisyu Umpelelesye.
Nkundwe Yõsèfu Branham.
Ndumi: U Bupime Bwa Mūndu Umpelelesye 62-1014M
Kabalilo: 12:00 PAMUSI, akabalilo ka Jeffersonville, IN
Sokapo ukufuma kwa une.” Ligiti! Ugwe kukeka umwene ni Lisyu. Kali ikyēne kiyege lisyētàno, kali ikyēne kiyege ndugu, kali ikyēne kiyege bubine, kali ikyēne kiyege mbūngo, kilikyõsa ikyēne kili, ega i Lisyu kangi kwaba Ikyēne nu Lūbo. Kangi linga kuligita ikyēne akabalilo ka kwanda, ikyēne kukuboneka ngati ikyēne kitikusema, ligita ikyēne kangi, kangi ligita ikyēne kangi, kangi ligita ikyēne kangi.
Uswe itolo tukwitikisya i Lisyu pa lwalo, “Kyāla ãyóbìle lulo,” kangi kila kikubika ubusululuke pakati pa uswe na Umwēne. U nkolofwa guligosa gwīsìle ukuya mwīguke pakati pa uswe. Uswe tukuyoba, “Une ngamanya mo ndili une nisa kukyaga ikyēne, lõli une nisa kukyaga ikyēne. KYĀLA ÃYÓBÌLE LULO. Ukwīlàmwa kilikyõsa KUKINDILE…uswe tukwīlàmwa ni nyīlàmwe syītu.”
Uswe tukukanikana nu mõhèsi kangi tukwega i Lisyu lya Kyāla. Linga une ngwīpilika ulunyenyemusyo lumo, pamo ulunyenyemusyo nalumo, kali kyo fiki kukuboneka, Kyāla ãyóbìle lulo. Ikyo kikumasya ikyēne.
Konga indagilo isi, nsikali, ku sopelo. Andisya a Masyu aga akabalilo kako undugu ikusiganila. Agēne gakaya Masyu gako mma, agēne go MASYU GÃKE, KANGI AMASYU GÃKE GAKABAGILA UKUTOLIGWA. Umwēne atupel’amaka uswe ukubombela i Lisyu Lyãke ukwisila mu kutupela uswe Lisyu Lyãke. Akabalilo kako Sétàno ikusiganila, mbalila umwēne indagilo syako.
INDAGILO SYA NKULUMBA-GWA-BWITE GWITU.
Apa kilipo katikati iki Une ngulonda ugwe ukubõmba.
Andisya ulufingo ulu kangi itika i Lisyu lililyosa kuli ububangi ubumalisye.
Sétàno, sokapo! Une ngusoka pãnja pa apa. Une ndikulambalala apa, kangi mma. Une ndikwitugasya apa kangi mma. Une ngaya pa ugu umfu gwa mõhèsi gwaiyolo kangi mma. Une ngufyolotoka injila yangu pãnja, ulubunju ulu. Une ne ngwãsi yumo.” Amen! Hallelujah!
Polelo une ngulonda umwe ukubõmba iki:
Ukupufula ikyēne na, “ISI SYO IKUTI U NTWA. ISI SYO IKUTI U NTWA. ISI SYO IKUTI U NTWA.”
Igula lõsa ilinogonelo lyako, yoba, “Lyako i Lisyu lyo lyabwanaloli.”
Ntwa, une ndikuyaga kukutega ulutego lulilõsa lwa muno une ngwīpilikila, iki aligwēsa, nimwene ikuyoba. Une ngwima lõsa, une ngupufulania panja gyosa gya misebwe gyangu, gõsa amabusulumanie, ni nyīlàmwe, ni sitalwitiko isi njilemo nasyo siku. Ulwipiliko lulilõsa une njilemo nalo siku, bosa ububine une njilemo nabi siku, ikindu kilikyõsa ikingi une njilemo nakyo siku, une ngupufulania ifyene fyosa pãnja. Une ngukisania fyõsa fila. Une ngwisa kulakula kitalule ku Mbepo gwangu.
U LWĪTÌKO lwãko lwisa kwanda ukufyuka mmwanyapo kangi mmwanyapo. Polelo yoba ku Mwēne, O Ntwa, isa suluka. Ugwe gwãyobìle Ugwe gwalimbelile une untuli gwakayilo umwabuke.”
“Ugwe y’ugwe mwanundumiana Gwangu.”
Umma ndaga, une ngwīgula lõsa indumbula yangu ni linogonelo lyangu.
“Isaga nkati, Ntwa Yeso.”
Kamata u Lwītìko, u Lūbo lula lwa Mbepo, ISI SYO IKUTI U NTWA.
Ywega, “Hallelujah!” Ameni.
Polelo kekela pãsi undugu aligwēsa mu nkyeni mwa ugwe. Ameni. Pala ikyēne kili. Keka undugu aligwēsa. Linga i–i yaiyolo imbepo yamisyuka yikukupela ugwe ukwipilika mõsa…Keka ikindu kila ukusõkàpo, ni Lisyu lya Ntwa.
INDAGILO SYAKO ISYABUMALIKISYO NSIKALI. MBULA U NDUGU:
Sokapo ukufuma kwa une.” Kwa!
Ugwe nkeka umwēne ni Lisyu. Kali ikyēne kiyege lisyētàno, kali ikyēne kiyege ndugu, kali ikyēne kiyege bubine, kali ikyēne kiyege mbūngo, kilikyõsa ikyēne kili, ega i Lisyu lila kãngi kwaba Ikyēne nu Lūbo. Kãngi linga ugwe kuligita ikyēne akabalilo kakwanda, ikyēne kikuboneka ngati ikyēne kitikusema, ligita ikyēne kangi, kangi ligita ikyēne kangi, kãngi ligita ikyēne kãngi. Kãngi ligita ikyēne mpaka ugwe utobwile ikibwina ukukisania, ngati akakuku akanini kakulīngulila kēne pãnja, pamo akangwasi, iki ugwe guli. Lingulila gwimmwene mulamula nkyeni ukukisania kila ikikalang’asa ikyaiyolo ikya bubine. Keka injila yako pãnja, kangi yoba, “Hallelujah!” Kili kugu kila ikikonge?” Ameni. Ubo bo bwite. Uyo yo nsikali. Uyo yo nsikali gwa kipīngika. Ena, nkulumba. Kung’unda undugu aligwēsa pãnja. Fiki?Fiki?
Uswe, a bamanyiligwe-ngãni, i Mbeyu iyabunyafyale ya Abraham.
Ilisiku lifikile, u Nsīngilìgwa ikwitika i Lisyu lililyõsa kangi ikubombapo pa Lyēne. Uswe twīténdìke Twībène bīténdekèsye ukwisila mu kupilika nu kwitika i Lisyu Lyãke.
Linga ugwe uli nu bufumbwe bwa kandu kalikosa, linga ugwe kulonda ukwisusigwa na Mbepo Mwīkèmo, linga ugwe kulonda ukubumbulusigwa, linga ugwe kulonda u mõhèsi aligwēsa ukusatisigwa pãnja, linga ugwe kulonda ukuya Nsīngilìgwa gwa Kristi, lilino ko kabalilo kala, ukupilika nu kwitika i Lisyu-lya-pakanwa Lyãke bo buyo bula.
Linga ugwe kunyonywa ifindu ifi kãngi kulonda ukuya mu buyepo bwa Ntwa, kifukiko ukukinda mūmo ugwe uyīlèmo siku, isaga ilūngisya na uswe Pandungu pa 12:00 PAMUSI, akabalilo ka Jeffersonville, bo ugwītu u Nkulumba-gwa-bwite ugwa ndondwa-ina ikulagila u Gwãke ugwamaka u Nsīngilìgwa gwa Mikaya akaponjolelo ka mõhèsi aligwēsa, undugu aligwēsa, ukuya mbikigwe mwabuke, nu kwisusigwa na Mbepo Mwīkèmo, kangi ukuya mwīténdekèsye kuli Ukwisa Kwake kwakibili.
Nkundwe Yõsèfu Branham
Ndumi: U Bwīte Ubukulumba Ukukinda-gõsa Ubu Bulwīgwèmo Siku. 62-0311
Umwe yumwe Lisyu lya Kyāla ilibonekele ili lyãfingiligwe kuli ilisiku ili. Umwe bwīla mwãli. Umwe mutisa kuya, lõli lilino umwe yumwe banabalumiana na banabalindwana ba Kyāla; kabuno Kyāla, unkabi mu kisa, ãli na umwe mu bwinogonelo Bwãke ku bwãndilo kulakula.
Bo akãli Umwēne ukuya kindu apa pa kīsu-kya-pãsi; bo kukãli ukuyako kalikosa, ugwe gwãli kimo mwa Fibagilili Fyãke. Umwēne ãmènye iki ingamu yãko yabagile ukuya. Umwēne ãmènye ilangi i nywili syãko ãngàli yikuya. Umwēne ãmènye kyõsa ikya ugwe.
Polelo, akabalilo kako ugwe gwãpilìke i Lisyu-lya-pakanwa Lyãke likusaata pankyeni pa ugwe, kyãlipo ikindukimo mwa ugwe iki kyaywēgìle pãnja; ugwe umenye kūko ugwe kufumilako kangi ugwe gwīsìle ku Kyēne. Ugwe gwãmènye bula bwãli Bwãnalòli. Ugwe gwãmènye yila yãli njila imbīgwe na Kyāla kuli umwīsyùgu panongwa yakuti u Luyungu lula lwãli mwa ugwe.
Umwēne ikutupīmba uswe ukusõkàpo pa mapiko ga ngwãsi. I Lisyu likutubula uswe Umwēne bwila ikufwanikisya abasololi Bake ku ngwãsi. William Marrion Branham yo ntumigwa ngwãsi unsisimikisigwe kuli ilisiku ili. Ago go mapiko ga ngwãsi uswe tukuyaga bakupimbigwapo ku Kīsu ikifingigwe, panongwa yakuti umwēne, nsololi ngwãsi gwa Kyāla, ikupimba i ndumi ya Kyāla, ikubilikila pãnja nu kuyoba i Lisyu Lyãke, ukupelelesya u Nsīngilìgwa Gwãke.
Uswe tukukonga Kyāla bo uswe tukukonga William Marrion Branham ni ndumi Yãke ya bubàngi. Kangi i Bãngèli lyãyobìle ukuti, “…abēne bãpyútìgwe komma na bala bãbo bakãlítìke.” Panongwa yakuti Kyāla ãli nkabi mu kisa ku bēne; panongwa yakuti abēne bakõngàga ingomolesyo.
Kyāla ikulonda uswe ukukonga ingomolesyo Syãke, kangi ingomolesyo Syãke syãyobìle, Une ne Lisyu-lya-pakanwa lya Kyāla kwa ugwe. Yoba KYENE iki kili pa matepi gala. I Lisyu-lya-pakanwa Lyãngu lyo lyēne Lisyu-lya-pakanwa likuyoba a Masyu ga busitakutoligwa. Ilyẽne nubupelelesye liyobigwe kangi ugwe nubupelelesye ambilila agēne ukufuma ku Lisyu-lya-pakanwa Lyãngu. Kokuti, i Lisyu-lya-pakanwa lya Kyāla pa matepi lyo kyõsa ugwe kufumbwa, panongwa yakuti Une, Kyāla nkabi mu kisa, mbele Ikyēne kuli ugwe. Iyēne yo Njila imbīgwe na Kyāla kuli ilisiku ili.
Kyāla nkabi mu kisa ãsúngwìle kangi ãmanyìle-ngãni ugwe ukuya nu Busetuli bula ukupilika i Lisyu-lya-pakanwa lila. Kyāla unkabi mu kisa ãmènye mu kabalilo kabumaliksyo aka, akabalilo kako kwisa kuyako ukusita-kupilikisya kwingi fiyo, mingi fiyo amasyu-ga-pakanwa ni ndinganio ku Ndumi yila, mpaka uswe twafūmbwaga i Lisyu-lya-pakanwa Ilipelelesye, kangi i Njila Imbelelesye iyakubukako ukuti uswe tubagile ukupilika kuli twībène. Lisyu pa Lisyu pa Lisyu, katikati iki Umwēne ãlóndàga ukuyoba ku Nsīngilìgwa Gwãke.
Kangi akabalilo kako u nyãmbàla pamo u nkikulu, une ndikupasya mo nkayilo nki ugwe ulimo, ugwe uli nu bulagilili bwa Kyāla, ukwisila mu lufingo lumo, pakuti Umwēne yo nkabi kangi isakubomba mbukindilisi mbwingi. “Linga ugwe kuyoba ku kyamba iki, ‘yaga nsemesigwe,’ kangi utikwīlàmwa mu ndumbula yãko, lõli kwitika ukuti iki ugwe gwãyobìle kisa kwisa kukuboneka, ugwe ubagile ukuya na iki ugwe gwãyobìle.” Ugwe ulinago a maka nagamo, lõli ugwe ulinabo ubulagili.
U Nsīngilìgwa abagile itolo ukupelelesigwa nu kõnganisigwa ukwisila mu kupilika i Lyãke ilipelelesye i Lisyu lipīgwe kuli ilisiku ili: Lisyu-lya-pakanwa Lyãke. Ilyẽne lyo lyēne i Lisyu-lya-pakanwa ili libagile ukõngàna nu kupelelesya u Nsīngilìgwa. Ilyẽne lyo lyēne i Lisyu-lya-pakanwa ili Kyāla ãtubúlìle uswe tukufimbilisigwa ukupilika nu KUKÕNGA. Ngati Mõse, Nkundwe Branham ãmènye ukuti umwēne ãli yo yūyo ãsúngulìgwe ukutupīmba uswe bãna ukukilania ukwingila mu Kīsu ikifingigwe panongwa yakuti u lufingo lwapīgwe ku mwene. Kangi umwēne ikufimbilisigwa ukupīmba uswe ku Kīsu ikifingigwe.
Ugwītu u ngwasi nsololi àtumanyisye uswe mu fīmilili. U Lwitikano Ulukulu lwãli nsyungulu gwa Lwitikano Ulupya. Umwēne àtumanyisye mūmo uswe tubagile ukuya twandege kangi kyofiki ukulondesya mu kabalilo kabumaliksyo aka. Umwēne ãtusókìle uswe isya mbepo ya Korah, kangi iya Datani, ni kibugutila kyabo kya bandu basita-kwitika, bo abēne bãgelìle ukwegelela. Abēne bãgelìle ukwingisyamo ikindukimo mu lubatiko lwa Kyāla.
Bakundwe na bakalumbu, une ndikugela ukupagulania ifipanga mma ukwisila mu kuyoba nu kwandisya ifindu ifi, u Mbepo Mwīkèmo yo ikutendeka ulupagulanio. Pilikisya i Ndumi iyi uswe tuli kifuki ukupilikisya. U nsololi yo yūyo uyu ikusoka u Nsīngilìgwa iki Kyo kyakulondesyako. Umwēne ikutubula uswe iki imbepo yila yãbómbìle akabalilo kala, kangi yisa kubomba kãngi mu lisiku lyitu.
Mbwanaloli, une ndikugela ukubūngania abandu ukusyungutila ubutumigwe ubupeteke-kahano, abene mbupepe bakabagila ukõngàna u Nsīngilìgwa. Une ngugela ukõngàna abēne ukusyungutila ilyeluke, ilisitakubwapuligwa i Lisyu lya Kyāla, lyēne i Lisyu-lya-pakanwa ili libagile ukõngàna u Nsīngilìgwa.
Uswe tukupilika ifindu filafila umwīsyùgu, Nkundwe Branham akaya you mwene ntiga uyu abagile ukulūmbilìla i Ndumi, uswe tubilikigwe ukulūmbilìla i Ndumi. Mbwanaloli abēne bali, lõli lelo, abēne bikutoligwa ubupala bwa kupilika i Lisyu-lya-pakanwa lila nu kwitika Iyēne yo Ndumi ya nyãmbàla-yumoywene, ukwisila mu kupela indeyelo KISITA Kukina i Lisyu-lya-pakanwa lya Kyāla mu fipãnga fyabo, nu kubuka ubutumigwe bwabo ukuya bupala fiyopo.
Kangi i Bãngèli lyãyobìle, “Kangi abēne babúkìle mu njila ya Balaamu, kangi balinkupyútìgwa mu mahelu ga Korah.” Balinkupyútìgwa mu mahelu! Ngimba a mahelu ga Korah gãli fiki? “Fiki, ugwe kwinogona ugwe gwe mwene ntiga nyambala umwikemo? Fiki, Kyāla yo…Twesa ba uswe yuswe bīkèmo. I kipanga kyõsa kili kanunu. Aligwēsa…Twesa ba uswe tukufika palikimo, ikyo kyo uswe tukulondigwa ukubõmba.” Apo po pãpo abēne bãpyútìgwe, kila. Kangi mbwanaloli uswe twafwene ikyēne. Uswe tukufwana ukuya ikyo.
Iyi i Ndumi, i Lisyu-lya-pakanwa Lyãke, lyo lyēne ntiga Lisyu-lya-pakanwa ili liyobigwe nubwelusigwe kangi lyo nubwelusigwe likwambililigwa nu Nsīngilìgwa. Ubutumigwe ubusuubiligwa bo bwakukasya abandu ukusyala ni Lisyu-lya-pakanwa lila ukwisila mu kulūmbilìla nu kwandisya i Ndumi. Lõli komma itolo ukulūmbilìla i Lyēne, lõli bikufimbilisigwa ukukina Ilyẽne mu fipãnga fyabo, nu ukubabula abandu bãbo Ilyẽne lyo LISYU-LYA-PAKANWA ILIPALA UKUKINDA-GOSA, ukuti u Nsīngilìgwa abagile ukupilika i Lisyu-lya-pakanwa lya Kyāla, ukufuma kwa Kyāla mwene.
Kikayako nakimo ikikulumbapo ukukinda ukupilika i Lisyu-lya-pakanwa lya Kyāla. Bukayapo nabumo ubupakigwe ubukulumbapo ukukinda ubupakigwe pa matepi. Yikayapo injila nayimo iyingi ukõngàna u Nsīngilìgwa lõli i Lisyu-lya-pakanwa lya Kyāla pa matepi. Yikayako nayimo iyingi INJILA IMBELELESYE ukupagulako ukwisila mu UKUBINDA UKUKINA NU KWITIKA I LISYU LILILYOSA ILI UGWE KUPILIKA. Ikyēne Kyo mbwanaloli Kyāla, nkabi mu kisa Kyãke ku Nsīngilìgwa Gwãke. Iyēne yo Yãke imbīgwe injila IMBELELESYE kuli umwīsyùgu.
Une ngukubilikila ugwe ukwisa nu kuyoba mongànie pãsi pa bupakigwe ubukulumba-ubukīnde bwa lisiku lyitu Pandungu ugu pa 12:00 PAMUSI, akabalilo ka Jeffersonville, bo uswe tukupilika Kyāla ikuyoba nu kumanyisya abana Bãke i Lisyu ilipelelesye ukwisila mu kutwala i Ndumi: U Kyāla Uyu Yo Nkabi Mu Kisa 65-0119
Li: Ngimba ugwe gwe yumo gwa bala “Binda Kina” bandu ba tepi aba bikwitika Kyala aatumile William Marrion Branham ukubilikila panja u Nsingiligwa gwa Kyala?
Ly: Ena, une ne Yumo Gwa Bala.
Li: Umwe mukwitika i Lisyu lililyosa ili lyaayobigwe pa gala Amatepi?
Ly: Ntufy’Untwa, une ndi Yumo Gwa Bala.
Li: Polelo ugwe ubagisenie kangi ukwitika ugwe ubagile u Kubinda Kukina nu kupilika i Lyake Lisyu-lya-pakanwa ukuya Nsingiligwa gwa Kristi?
Ly: Lwimiko, ikyo kyo Katikati uyu une ndi, ikyo kyo une ku kikongoti…Une ne Yumo Gwa Bene.
Ly: Aleluya, ugwe utalwisye ikyene, uyo you ne 110%, UNE YUNE Yumo Gwa Bene.
Ukufwana na Yeso Mwene uswe yuswe busanusyo bwa Lisyu Lyake. A bana ba Kitangalala. U bunekelo-pabwelu bwa Mbepo Mwikemo. U Luyungu lwa Kitangalala lwa ngulilo iyi.
Gala Amaka galagala aga gãyobìle i kisu-kya-pãsi mu kuyako gali mu bandu bala bãbo bali na Mbepo Mwīkèmo. Uko ko kutalusya. Banyambala na bakíkùlu, akene ko kabalilo uswe twãsyágènie ywani umwe muli. U mõhèsi ikugela ukubafisa umwe kunyuma, ukubabula umwe ukuti umwe yumo kanini kõga-pãsi kandukamo. Umwe mukuya mma.Umwe yumwe banabalumiana na banabalindwana ba Kyāla.
U Bukyala bukaya ku Mwanya mma, Ubwene buli mwa umwe. Aleluya!
Ly: Bukyala bukaya ku Mwanya mma, ubwēne būmi kangi bukwītúgàla mwa kila yumo gwa uswe.
Na kila lisiku ilipya, na kila mūyi uswe tukutūya, u Busetuli Umwēne apele kwa uswe ubwa ywani uswe tuli bukwisa ukuya bunywamupo kangi bunywamupo. Uswe yuswe Lisyu lyabumi likwitúgàla mu nyofu.
Uswe tumenye iki panongwa yakuti Umwēne atupele uswe u Busetuli ywani Umwēne átumìle mu lisiku lyitu; yuyo Kyāla Mwēne ãyobe Umwēne ãngàli ikutuma ukulūmbilìla nu kumanyisya i Lisyu Lyãke mu Busetuli 22.
Une Yeso ndumile ugwangu gwãndùmi ukubikil’ubuketi kwa umwe ifindu ifi mu fipãnga.
Umwēne átumìle u gwãndùmi Gwãke: William Marrion Branham, ukuyoba mu FIPÃNGA FYÃKE…Ikyo mwinangu kikusanusya KINA A MATEPI MU FIPÃNGA FYĪNU. Ikyo kitikwega mma nu busetuli bumo, ugwe itolo ubagile ukubala.
Ukufwana ni Lisyu, aka ko kabalilo akasyobekesi fīyo mu syambulu sya kīsu-kya-pãsi. Imbepo ya bwanaloli nu butungulu sisa kuya kifuki fiyo ikyēne kisa kusyoba balabala abasaligwa linga ikyēne kyãli kyakubómbìgwa.
Kyāla átumìle u GWÃNDÙMI GWÃKE ku fipãnga. Uswe tuli ni Lisyu-lya-pakanwa Lyãke ku sulo-sya-nyobe syitu. Uswe tubagile ukupilika Lisyu kuli Lisyo iki Umwēne ãyóbìle. Ikyēne kikufumbwa nabumo ubwelusye pamo ubulinganio, kyõsa u Nsīngilìgwa abagile ukubõmba Kyo BINDA KINA kangi ITIKA.
Umwēne ãtusókìle uswe, komma ukwandula akasimbo kamokene pamo ubung’wãlilo bumobwene pa matepi. Komma ukuguta ubupilikisyo bwako pamo ifundo syako, pilikisya itolo i Lyãngu i Lisyu-lya-pakanwa kangi itika. Mpaka ilisiku ili, kila kifumile pakuya kisita kyakubómbìgwa; lõli umwīsyùgu ikyēne Kyo nongwa yakuti Iyēne yo njila imbīgwe na Kyāla kuli ilisiku ili.
Uswe tufumile itolo pakupilika i Ngulilo Ihano-na-ibiki sya Kipãnga kangi mūmo fikuti ukukindamo-mõsa kila ngulilo, mula mulinkutupuka imbepo sila ukwega abandu ukufuma ku Lisyu ilyanaloli. Mūmo fikuti mu kila ngulilo, ukufuma pãpo u ntumigwa ãsíkilèpo, iki abēne bãbómbîle ukwega abãndu ku kamanyisyo kamo pamo ulwīhi; ku bène ni fundo sya mūndu.
Umwīsyùgu abēne bikugela ukugoga uluhaho lwītu nu kuyoba, “O, abēne bikwitika a matepi lyo Lisyu-lya-pakanwa ilipala fiyo ugwe kufimbilisigwa ukupilika. Ugwe kufimbilisigwa ukukina a matepi mu kipãnga kyãko…ubo butoyofu. Nkundwe Branham akãyóbìle kina a matepi mu kipãnga. Lilino ilyẽne lyo lisyu-lya-pakanwa lya butumigwe ugwe kufimbilisigwa ukupilika.”
Kwa une, ulo ko luyungu lwa bufufyano! UGWE KUFIMBILISIGWA UKUBINDA KINA kãngi pilikisya i Lisyu-lya-pakanwa lya Kyāla mu fipãnga fyīnu buno Ilyẽne lyo LYĒNE Lisyu-lya-pakanwa ili lisisimikisigwe na Kyāla Mwēne. Ugwe kufimbilisigwa ukupilikila i Lisyu lililyosa Kyāla ãyóbìle.
Une Yeso ndumile ugwangu gwãndùmi ukubikil’ubuketi kwa umwe ifindu ifi mu fipãnga.
Yula u gwãndùmi unsisimikisigwe ikuyoba mu kipãnga lyitu, polelo une une ngukubilikila ugwe ukwisa ukulungisania na uswe ukupilikisya i Lisyu-lya-pakanwa Lila nu Nsīngilìgwa Gwãke ukufuma mbusyungutilo bwa kīsu-kya-pãsi pa bulungisanio-mõsa pa 12:00 PAMUSI, akabalilo ka Jeffersonville, nu kupilika: 65-0118- U Luyungu Lwa Busofanio”.
Gwempala Nsīngilìgwa gwa Kristi, unko uswe twīse palikimo Pandungu pa 12:00 PAMUSI, akabalilo ka Jeffersonville, ukupilikisya 60-1211E I Ngulilo Ya Kipãnga Ya Laoadikiya.
Gwempala Nsīngilìgwa gwa Kristi, unko uswe twīse palikimo Pandungu pa 12:00 PAMUSI, akabalilo ka Jeffersonville, ukupilikisya 60-1210 I Ngulilo Ya Kipãnga Ya Filadelfia.
Gwempala Nsīngilìgwa gwa Kristi, unko uswe twise palikimo Pandungu pa 12:00 PAMUSI, akabalilo ka Jeffersonville, ukupilika 60-1209 I Ngulilo Ya Kipanga Ya Sardisi.
