Obubaka: 65-0221E MERUKIZEDDEEKI ONO Y’ANI
Omugole Wa Kristo Omwagalwa, leka tujje wamu Sande ku Ssande ku ssaawa 6:00 (mukaaga) ez’omuttuntu, mu budde bw’ e Jeffersonville (y’essaawa emu ey’omu kawungeezi e Uganda, okuwulira 65-0221E – “Merukizeddeeki Ono Y’Ani?”
Owol. Joseph Branham
Obubaka: 65-0221M Okufumbiriganwa n’Okwawukana
Omugole w’Ekigambo Omulongoofu Atatabikiddwamu Birala Omwagalwa,
Yeffe Mukyala We omutono omwagalwa; atatabikiddwamu birala, atakwatibwako kibiina kya muntu yenna ekitegeke, endowooza yonna ekoleddwa omuntu. Ffe Mugole w’Ekigambo, atatabikiddwamu birala bulongoofu ddala! Ffe muwala wa Katonda ali olubuto.
Yeffe baana ab’Ekigambo kye Ekyogere, ekyo nga kye Kigambo kye nnakabala! Temuli kibi mu Katonda, bwe kityo temuli kibi muffe, nga bwe tuli ekifaananyi kye Ye Mwennyini. Tuyinza tutya okugwa? Tekisoboka….TEKISOBOKA! Tuli kitundu ku Ye, EKIGAMBO kye NNAKABALA.
Kino tuyinza tutya okukimanya awatali kubuusabuusa kwonna? OKUBIKKULIRWA. Baibuli yonna, Obubaka buno, Ekigambo kya Katonda, kyonna Kubikkulirwa. Bwetutyo bwetumanyi amazima wakati w’Eddoboozi lino n’amaloboozi amalala gonna, kubanga kuba Kubikkulirwa. Era Okubikkulirwa kwaffe kukwataganira ddala n’Ekigambo, so tekukontana na Kigambo.
Era ku lwazi luno” (okubikkulirwa okw’omwoyo okw’Ekigambo kye lwekuli) “Ndizimba Ekkanisa Yange; n’emiryango gy’emagombe tegiriginyeenya kugisuula wansi.” Omukyala we tajja kukemebwa na basajja balala. “Ndizimba Ekkanisa Yange, n’emiryango gy’emagombe tegiriyinza kuginyeenya.”
Tujja kuba ba mazima era abeesigwa eri Ekigambo kye n’Eddoboozi lye, lyokka. Tetulyonoonebwako musajja mulala kukola bwenzi. Tujja kusigala nga Tuli Mugole w’Ekigambo kye Embeerera. Tetujja kutunula, kuwuliriza newankubadde okupepeya n’ekigambo ekirala kyonna.
Kiri wansi mu mitima gyaffe. Tetuliyinza yadde okuba n’omwami omulala, wabula OMWAMI waffe OMU, Yesu Kristo, Omusajja omu, Katonda, Imanueri. Omukyala we aliba enkumi emirundi enkumi z’enkumi. Ekyo kiraga nti Omugole ateekeddwa kuva mu Kigambo. “Mukama waffe Yesu omu, n’Omugole we bangi, nnamunigina.”
Tulina okujjukira n’okutegeera kino si kya buli muntu, kya kibinja kya nnabbi KYOKKA. Abagoberezi be ababe nga ye. Obubaka buno buli eri bo bokka, ekisibo ekitono Omwoyo Omutukuvu kye yamuwa okulabirira.
Katonda Alimubalirako obuvunaanyizibwa bw’ebyo by’atugamba, era Katonda Alitubalirako, abaakyusibwa ye okuva mu nsi yonna, b’akulembedde eri Kristo, Alitubalirako obuvunaanyizibwa bw’okukkiriza buli Kigambo mu kyo n’obutekkiriranya.
Nga kya kitalo nnyo gye tuli okutuula ne tuMuwuliriza ng’Atubuulira nga bwe tuli abalonde be. Nga Omugole We eyasooka, n’Omugole we ow’okubiri, gye yaMulemererwa; naye ffe, Omugole We ow’ekitalo ow’ekiseera eky’enkomerero TETULI MULEMERERWA. Tujja kusigala nga tuli Mugole we ow’Ekigambo embeerera, omwesigwa, ow’amazima, okutuusa ku nkomerero.
Okukkiriza kwaffe mu kigambo kye kweyongera buli lunaku. Tuli mu kwetegeka nga tuwuliriza era nga tugondera buli Kigambo Kye, nga tuwulira Eddoboozi lye nga lyogera naffe, nga tusoma Bayibuli zaffe, nga tuMusaba era nga tuMusinza olunaku lwonna.
Tukimanyi nti Ajja mangu nnyo. Eddakiika yonna kati. Okufaananako ne Nuuwa, twali tusuubira nti yali ajja jjo; mpozzi enkya ku makya, mu ttuntu, akawungeezi, naye tukimanyi nti Ajja. Nabbi wa Katonda n’Ekigambo kye tebakola nsobi, AJJA. Tuwulira nga luno lwe lunaku lw’omusanvu, era tulaba ebire nga bitkwata n’amatondo g’enkuba amanene ennyo nga gagwa; ekiseera kituuse.
Tuli butebenkevu era tuli ntende mu Lyato, nga tulindirira n’okusuubira okungi. Jjangu twegatteko nga tuwulira Eddoboozi lya Katonda nga Litubudaabuda Ssande eno ku ssaawa 6:00 (mukaaga) ez’omuttuntu, mu budde bw’ e Jeffersonville (y’essaawa emu ey’omu kawungeezi e Uganda), nga bwetuwulira: Okufumbiriganwa N’Okwawukana 65-0221M .
Owol. Joseph Branham
Ebyawandiikibwa by’olina okusoma nga tonnawulira Bubaka:
Omut. Matayo 5:31-32 / 16:18 / 19:1-8 / 28:19
Ebikolwa 2:38
Abaruumi 9:14-23
1 Timoseewo 2:9-15
1 Abakkolinso 7:10-15 / 14:34
Abebbulaniya 11:4
Okubikkulirwa 10:7
Olubereberye essuula 3 yonna
Eby’Abaleevi 21:7
Yobu 14:1-2
Isaaya 53 yonna
Ezeekyeri 44:22
Obubaka: 65-0220 Ekifo Kya Katonda Kye Yeeroboza Eky’Okumusinzizaamu
Mukyala Yesu Kristo Omwagalwa,
Singa twebuuza ekibuuzo ku kintu kyonna mu bulamu bwaffe, wateekwa okuba nga waliwo eky’okuddamu ekituufu. Wayinza okubaawo ekintu ekikifaananye, naye wateekwa okubaawo eky’okuddamu ekituufu, ekitereevu eri buli kibuuzo. N’olwekyo, buli kibuuzo ekijja mu bulamu bwaffe, wateekwa okubaawo eky’okuddamu ekituufu, ekigolokofu.
Bwetuba nga tulina ekibuuzo eky’omu Baibuli, wateekwa okubaawo eky’okuddamu eky’omu Baibuli. Tetukyagala kuba nga kiva mu kibinja ky’abasajja ekimu, okuva mu kuŋŋaaniro ly’abantu erimu, oba okuva mu musomesa omu, oba okuva mu kibiina ky’eddiini ekimu. Twagala kive butereevu mu Byawandiikibwa. Tuteekwa okumanya: ekifo kya Katonda ekituufu era ekigolokofu okumusinzizaamu kye kiruwa?
Katonda yasalawo okusisinkana omuntu; tekyali mu kkanisa, si mu kibiina kya ddiini, si mu nzikiriza, wabula munda mu Kristo. Ekyo kye kifo kyokka Katonda w’Anaasisinkaniranga omuntu, naye n’asobola okusinza Katonda, ye munda mu Kristo. Ekyo kye kifo kyokka. Si nsonga oba oli Mumethodist, Mubaputisiti, Mukatoliki, Mupulotesitante, kyonna ky’oyinza okuba, waliwo ekifo kimu kyokka ky’osobola okusinzizaamu Katonda mu butuufu, ekyo ye munda mu Kristo.
Ekifo kya Katonda kyokka ekigolokofu, era kyeYalonda okuMusinzizaamu ye munda mu Yesu Kristo; eryo ly’Ekkubo Lye lyokka lye Yateekawo.
Baibuli Yatusuubiza Empungu mu Malaki 4; Empagi y’Omuliro gye tulina okugoberera. Ajja kulaga ekkanisa ebadde ewabye nti Ye Abebbulaniya 13:8, Yesu Kristo aba obumu jjo, leero, n’emirembe gyonna. Era twasuubizibwa mu Lukka 17:30 nti Omwana w’omuntu oli (Empungu) ajja kuba Yeebikkula eri Omugole we.
Mu Okubikkulirwa 4:7, kitugamba nti waaliwo Ebiramu bina, ng’ekyasooka yali mpologoma. Ekiramu ekyaddako yali nnyana. Awo, ekyaddako okujja yali muntu; omuntu oyo be baali abaddaabuluzi, obuyigirize bw’omuntu, amasomo g’eby’okusoma Katonda, n’ebirala.
Naye Baibuli yagamba nti mu budde obw’akawungeezi, Ekiramu ekyasembayo ekyali kigenda okujja yali Empungu ebuuka. Katonda yali wa kuwa Omugole We ow’ekiseera eky’enkomerero Empungu; Omwana w’omuntu yennyini, nga Yeebikkulira mu mubiri okukulembera Omugole we.
Baibuli era egamba nti ebintu byonna eby’edda, ebiri mu ndagaano enkadde, byali bisiikirize by’ebintu ebyali bigenda okujja. Ekisiikirize ekyo nga bwe kigenda kisemberera, ekisiikirize ky’ekifaananyi kigenda kimiribwa okufuuka ekifaananyi kiri kyennyini. Ebyaliwo mu kiseera ekyo kisiikirize ky’ebyo ebyali eby’okubeerawo leero.
Mu I Samwiri 8, endagaano enkadde etugamba nti Katonda yali awaddeyo Samwiri nnabbi okukulembera abantu. Abantu ne bamutuukirira ne bamugamba nti baagala kabaka. Samwiri n’agwamu ekikangabwa eky’amaanyi ennyo olw’akabi ke yali alabye omutima gwe katono gumutyemuke.
Katonda ebbanga lyonna yali Akulembedde abantu be ng’Ayita mu nnabbi ono eyawongebwayo mu butukuvu, eyakakasibwa mu Byawandiikibwa obutaleekaawo kabuuza era yawulira nti yali agaanibbwa. Yakuŋŋaanya abantu n’abeegayirira baleme kuva ku Katonda eyabasitula ng’abaana, n’abaaza n’abawa omukisa. Naye ne bawalaaza empaka.
Ne bagamba Samwiri nti, “Tobangako mukyamu mu bukulembeze bwo. Tobangako atali mwesimbu mu nkwata yo ey’eby’ensimbi. Okoze kyonna ekisoboka okutukuuma nga tukwatagana n’Ekigambo kya Mukama. Tusiima ebyamagero, amagezi, enteekateeka n’obukuumi bwa Katonda. Tukkiririzaamu. Tukyagala nnyo. Era n’ekirala tetwagala kubaawo nga tetukirina. Ensonga eri bubeezi nti twagala kabaka atukulembera mu lutalo.
Kati kirabikirawo nti buli bwe tufuluma okulwana kikyali kigendererwa kyaffe okuba nga bakabona batusooka mu maaso nga Yuda abagoberera, era tujja kufuuwa amakondeere tuleekaane era tuyimbe. Tetugenderera kukomya kintu kyonna n’ekimu ku ebyo. NAYE TWAGALA KABAKA NGA MUNTU AVA MUFFE ATUKULEMBERE .”
Bano si be baali abantu b’ebibiina by’amadiini ab’olunaku olwo. Bano n’okuba mu bukakafu, be bantu abaali bagamba nti ddala YE NABBI wa Katonda Katonda gwe Yalonda okubakulembera.
“Weewaawo, oli nnabbi. Tukkiriza Obubaka. Katonda Akubikkulira Ekigambo kye, era tukyagala nnyo Ekyo, era tetwagala kubeerawo weKitali, naye twagala omuntu omu ng’oggyeko GGWE atukulembere; o’w’omu bantu baffe. Tukyagenderera okugamba nti tukkiriza Obubaka bwewatuleetera. Kye Kigambo. Ggwe nnabbi, naye si ggwe Eddoboozi lyokka oba erisinga obukulu.”
Waliwo abantu abatalina buzibu mu nsi leero, amakanisa amalungi. Naye waliwo Mukyala Yesu Kristo omu, era ffe Ye, Abo b’Ali mu kujjja okucima; Omugole Ekigambo We embeerera omulongoofu anaasigala n’EDDOBOZI LYA Katonda LYOKKA ERYAKAKASIBWA OBUTALEKAAWO KABUUZA ERA ERYALAGIBWA NTI LIRI BW’ATYO BW’AYOGERA MUKAMA.
Bw’oba oyagala okutwegattako Ssande eno ku ssaawa 6:00 (mukaaga) ez’omuttuntu, mu budde bw’ e Jeffersonville (y’essaawa emu ey’omu kawungeezi e Uganda), tujja kuba tukyali ku mukutu ogw’oku mpewo ku ssimu okwetoloola ensi yonna nga tuwuliriza. Kino kye kigenda okubaawo.
Tambulira ku baganda bange, bannyinaze, mikwano gyange, wano mu kifo kino ekiro kino n’ebweru eyo ku ssimu. Amasaza ag’enjawulo agawerako nga gawuliriza, okuva ku lubalama lw’ebuvanjuba okutuuka mu bugwajuba. Nsaba, Katonda Omwagalwa, ewala emmanga okuyita mu ddungu eyo mu Tucson, okugendera ddala okutuuka mu California, engulu mu Nevada ne Idaho, ewala nnyo mu Buvanjuba n’okwetooloola, emmanga mu Texas; nga okuyitibwa kuno kuweebwa, abantu nga bayingira — mu masinzizo amatono, mu masundiro g’amafuta, mu maka, nga bawuliriza okuva eno. Ayi Katonda, leka omusajja oyo eyabula oba omukazi, omulenzi oba omuwala, mu ssaawa eno, ajje gy’Oli. Leka kibe kati kati. Tukisaba mu Linnya lya Yesu, nti banaafuna ekifo kino eky’obutebenkevu ng’ekiseera kikyali kino.
Kaakano Mukama, okusoomoozebwa kuno kusisinkaniddwa, nti Sitaani, ekiguumaaza ekinene, talina ddembe kusigaza mwana wa Katonda yenna. Ye kitonde ekiwanguddwa. Yesu Kristo, ekifo kyokka eky’okusinzizaamu, Erinnya lyokka ettuufu, Yamuwangula e Kalvario. Era tukoowoola Omusaayi gwe mu kiseera kino, nti Yawangula buli bulwadde, buli ndwadde.
Era ndagira sitaani okuva mu kibiina kino. Mu Linya lya Yesu Kristo, va mu bantu bano, era bafuulibwe ba ddembe.
Buli muntu akkiriza okuwonyezebwa kwe ku musingi gw’Ekigambo ekyawandiikibwa, kola obujulizi bwo ng’oyimirira ku bigere byo era ogambe nti, “Kaakano nzikiriza okuwonyezebwa kwange mu Linnya lya Yesu Kristo.” Situka ku bigere byo.
Katonda Atenderezebwe! Weerabireko n’agago. Weetegereze wano, ku balema n’ab’ebirala nga bagolokoka. Katonda Atenderezebwe! Ekyo bwe kiri . Kkiriza kyokka. Ali wano.
Owol. Joseph Branham
Ekifo Kya Katonda Kye Yeeroboza Eky’okusinzizaamu 65-0220
Ebyawandiikibwa by’olina okusoma nga tonnawulira Bubaka:
Ekyamateeka 16:1-3
Okuva 12:3-6
Malaki Essuula 3 & 4
Luk 17:30
Abaruumi 8:1
Okubikkulirwa 4:7
Obubaka: 65-0219 Leero Ekyawandiikibwa Kino Kituukiridde
Omugole Ensigo Ennangira Ey’Omwoyo Okukirawo Abaagalwa,
Tewakyali kulinda, tewakyali kwebuuza, TUTUUSE! YEFFE Mugole Ensigo Ennangira Ey’Omwoyo Okukirawo. Ezzadde ery’Omwoyo eryajja eri Omulangira w’Obwakabaka eyasuubiza. Si kibinja ekimu ekiribaawo mu biseera eby’omu maaso; si omulembe ogugenda okujja; tuli mu lunaku olusembayo, ffe mulembe ogugenda okulaba Yesu Kristo ng’Akomawo ku nsi.
Olunaku luno, Ekyawandiikibwa Kino Kituukiridde!
Enjiri y’emu, Amaanyi ge gamu, Omwana w’omuntu Y’OMU eyaliwo jjo, w’Ali leero, era Ajja kubeerawo emirembe gyonna.
Leero, Ekyawandiikibwa Kino Kituukiridde!
Mikwano gyaffe abaagalwa mu Arizona, California, Texas, wonna okwetoloola Amerika n’OKWETOOLOOLA ENSI YONNA nga muwuliriza olutambi luno okuyita ku mukutu ogw’oku mpewo; Omwana wa Katonda y’omu eyajja mu buvanjuba ne Yeekakasa okubatalekaawo kabuuza nga Katonda Ayolesebbwa mu mubiri, ye Mwana wa Katonda y’omu mu kitundu-tundu ky’ensi eky’omu bugwanjuba wano, Ali mu kwemanyisa ky’Ali mu masekkati g’ekkanisa ekiro kino, aba obumu jjo, leero, n’emirembe gyonna. Ekitangaala ky’Omwana eky’omu kawungeezi kizze.
Leero, Ekyawandiikibwa Kino Kituukiridde!
Eddoboozi lya Masiya, eryali Liyimiridde nga Lyogererera ku kadaala mu Lunaku Lwe, nga Lyemanyisa n’Ekigambo ky’ekisuubizo eky’omulembe ogwo, lye Ddoboozi lye limu erya Masiya, nga lyogera n’Omugole we leero okwetoloola ensi yonna ku ntambi, nga Litugamba: Mba bumu jjo, leero n’emirembe gyonna. NZE Eddoboozi lya Katonda gyemuli. MMWE MUGOLE WANGE ENSIGO ENNANGIRA EY’OMWOYO asigadde n’Ekigambo kyange.
Leero, Ekyawandiikibwa Kino Kituukiridde!
Waliwo akajagalalo kangi nnyo mu bantu ennaku zino ne kiba nga balemererwa okulaba Amazima ga Katonda. Kiva ku kuba nti waliwo enzivuunula z’Ekigambo kya Katonda ezikoleddwa abantu nnyingi nnyo. Katonda teyeetaaga muntu yenna kuvvuunula Kigambo kye. Ye muvvuunuzi We Yennyini. Yatumira Omugole We nnabbi We Malayika ow’ennaku z’Eddoboozi owa Okubikkulirwa 10:7 okuvvuunula Ekigambo kye. KIRI BW’ATYO BW’AYOGERA MUKAMA.
Leero, Ekyawandiikibwa Kino Kituukiridde!
Ogamba nti, “Ssinga nnaliwo nga Yesu ali ku nsi, nnandikoze kino na kino.” Munaaye, ogwo tegwali mulembe gwo. Wabula, guno gwe mulembe gwo, kino kye kiseera kyo. Ddobozi ki ly’ogamba nti lye Ddoboozi lya Katonda? Ddoboozi ki erisinga obukulu gy’oli?
Leero, Ekyawandiikibwa Kino Kituukiridde!
Sitaani alawuna wonna nga bwe kitabangawo nga alumba Omugole we. Ayinza okukuleetera okulowooza nti olina obulwadde oba ekika ky’obulwadde, oba okulumba ab’omu maka go. Oluusi Katonda aleka ebintu okukwata ekizikiza ekikwafu ddala okutuusa nga tosobola kulaba biri waggulu bikwetoolodde, oba awantu awalala wonna. Olwo n’Ajja n’Akukolera ekkubo okubiyitamu, osobole okugamba nti, “Siri zzadde lya Kaggali, siri zzadde lya Saala, n’okuba siri zzadde lya Maliyamu, ndi Nsigo Ya Katonda Ennangira Ey’Omwoyo Okukirawo Eya Ibulayimu. Ntwala Ekigambo kya Katonda ekyasuubizibwa ku lwange, kiri Bw’atyo Bw’Ayogera Mukama. Sirisigulwa. Si nsonga kifaanana kitya, kiki sitaani ky’ayogera. Kyonna kye nneetaaga, nja kutwala Katonda nga Ekigambo kye bweKiri.
Leero, Ekyawandiikibwa Kino Kituukiridde!
Eddoboozi lya Katonda Lyogedde. Nterese Emmere yonna ey’Omwoyo gye mwetaaga. Mwogere KYOKKA ekiri ku ntambi ezo. Nze Eddoboozi lya Katonda gye muli. Ekigambo kyange tekyetaaga kuvvuunula. Temuyomba wadde okulwana, mwagalane, NAYE musigale n’EKIGAMBO KYANGE.
Leero, Ekyawandiikibwa Kino Kituukiridde!
Tokeŋŋentererwa. Tonyigirizibwa kuggwamu maanyi. Toleka sitaani kukunyagululako SSANYU lyo. Jjukira kiki ky’oli, wa gy’ogenda, butya bwe kigenda okuba ku Ekyeggulo ekyo mawuuno eky’Embaga Ey’Obugole. Okubeera mu Kibuga ekyo ekirabika obulungi Ye Ky’Azimbye lwansonga emu ggwe. Eyo gy’ogenda okuwangaalira mu Butaggwawo bwonna naye wamu na bano bonna abatusooseeyo.
Nga tewakyali bulwadde. Nga tewakyali nnaku. Nga tewakyali kufa. Nga tewakyali ntalo. Obulamu obutaggwaawo naye. Olwo tujja kugamba nti:
Leero, Ekyawandiikibwa Kino Kituukiridde!
Leka tuleme kubuutikirwa nnaku okugamba nti, “Mpulira ekifo kino kindwaza nnyo, njagala kuva wano. Leka tukyogere bwetuti: Ajja eddakiika yonna kati, NG’AJJIRA NZE…EKITIIBWA! Siyinza kulinda. Ngenda kulaba abaagalwa bange bonna. Bagenda kulabikira awo ddala mu maaso gange, olwo nja kumanya nti, KIWEDDE, TUTUUSE.
Olwo, nga tewannayita kaseera ka kutemya kwa liiso, ffenna tujja kubeera wamu ku ludda luli olulala.
Leka tusanyuke era tujaganye, kubanga Obugole bw’Omwana gw’Endiga busembedde, era Omugole We… Omugole We Yeetegese .
Bw’oba nga wandyagadde okujaganya, n’okubeera ku Bugole bw’Omwana gw’Endiga wamu naffe, jjangu weetegeke Ssande eno ku ssaawa 6:00 (mukaaga) ez’omuttuntu, mu budde bw’ e Jeffersonville (y’essaawa emu ey’omu kawungeezi e Uganda), nga bwe tuwulira:
Leero, Ekyawandiikibwa Kino Kituukiridde 65-0219
Owol. Joseph Branham
Ebyawandiikibwa by’olina okusoma:
Omut. Yokaana Essuula ey’ekkumi n’omukaaga yonna
Isaaya 61:1-2
Omut. Lukka 4:16
Obubaka: 65-0218 Ensigo Tesikira Wamu Na Kisusunku
Ezzadde Lya Ibulayimu Eddangira Abaagalwa,
Nsindika okulamusa okwetoloola ensi yonna, eri Abo abakuŋŋaanye awamu, nga bawuliriza nga bakozesa engeri y’omukutu ogw’oku mpewo, nga baliisa emmeeme zaabwe ku Maanu ensu empya egwa okuva mu Ggulu. Ye mmwe abaagulibwa Omusaayi gwa Yesu Kristo yennyini.
Mukama waffe Yesu, nsaba Ofuke amafuta ku bigambo ekiro kyaleero okuwulirwa buli kutu okuli wansi w’eddoboozi lino ery’Obwakatonda. Era bwe wabaawo abamu abali wano, oba abateze omukutu nga bawuliriza, ebweru okwetoloola eggwanga.
Katonda afuka amafuta mu matu ga buli omu ku ffe, nga bwe tuteze omukutu nga tuwuliriza okuva mu nsi yonna era nga tuwulira okuleekaana okw’Obwakatonda okw’Eddoboozi lya Katonda nga lyogera naffe, Bw’Atyo bw’Ayogera Mukama.
Yeffe Ekkanisa ya Katonda eya nnamaddala, eyazaalibwa omulundi ogw’okubiri ekkiriza BULI Kigambo kya Katonda mu maaso g’ekintu kyonna, si nsonga kiki kyekiri, kubanga lye Ddoboozi lya Katonda erya nnamaddala eritatabikiddwamu birala nga Lyogera.
Katonda ali mu kweyolekera mu ffe, Ekkanisa Omugole we. Si ffe abasitula Ensigo, FFE TULI ENSIGO ENNANGIRA. Obulamu bwe bwonna obwali mu Ye buzzeemu okwefulumya mu FFE, Ekkanisa Omugole entuufu, eya nnamaddala, ng’Ereeta Ekigambo kya Katonda kyonna mu bujjuvu bwakyo ne mu maanyi gaakyo.
Tewayinza kubaawo mirembe gya kkanisa mirala oluvannyuma lwa guno. Tuli ku nkomerero, ab’oluganda ne bannyinaze. Tuli wano. Tutuuse. Katonda yeebazibwe!
Tuli ku nkomerero. Tutuuse. Omugole AMAZE Okutegeera kyetuli. Kino ky’ekiseera ky’Omugole Ensigo. Ebisusunku bifudde. Ebisusunku bikaze ne biggwawo. Yeffe Kigambo kya Katonda ekyazaalibwa embeerera nga kyolesebbwa, Yesu Kristo Aba obumu jjo, leero, n’emirembe gyonna.
Tetujja kukwatibwako. Tewajja kubaawo kutukwatibwa bubi kwa ngeri yonna mu FFE. FFE TULI Okuzaalibwa embeerera okw’Omugole. Twalagirwa Katonda okusigala nga tuli beesigwa eri Ekigambo embeerera ekirongoofu. Ensigo eteekeddwa okutuula mu Maaso g’Omwana, Omwoyo Omutukuvu, Eddoboozi ly’Omwana w’Omuntu Oli, esobole okwengera. Era eri ffe, waliwo ENGERI EMU YOKKA: NYIGA ZANNYA OWULIRE EDDOBOOZI LY’OMWANA W’OMUNTU LYENNYINI.
Era ŋŋamba nti waliwo Ekkanisa Ennonde awantu awamu mu nsi eno, eri mu kufulumayo era nga yeebalama ebintu ebyo, era okwolesebwa kwa Katonda kugisikirizza n’essaayo omwoyo. Tuli mu nnaku ezisembayo .
Tuli Empungu za Katonda. Temuli kwekkiriranya mu ffe. Tusobola kulya Maanu nsu yokka. Tulinga ennyana mu kiraalo. Emmere Eyaterekebwa Yokka Etuweereddwa gyetulya yokka.
Tulaba Empungu Za Katonda okwetoloola ensi yonna nga baagala Emmaanu eyo ensu. Zijja kweyongerayo nga zinoonya okutuusa lwe zinaaGizuula. Zijja kubuuka zeeyongerenga okutumbiira mu bbanga. Bwemuba temuli kantu mu kiwonvu kino, zijja kweyongera okutumbiiramu kko waggulu. Zaagala Ekigambo kya Katonda ekyava obuvi mu Ddoboozi lya Katonda. Ekifo kyazo gyezinaakomekkerera mu butaggwawo kyesigamiziddwa kw’ekyo. Awaba ennyama ensu wonna, awo empungu wezinakuŋŋaaniranga.
Omwoyo we azze ku ffe okukola ebintu bye bimu bye Yakola. Kwe kwekubisaamu kw’obutonde okukomyawo Empeke yennyini eyafa. Yeffe Ezzadde lya Ibulayimu Eddangira ery’Okukkiriza abatwala buli kimu ekikontana n’Ekigambo kya Katonda ne tukiyita nga ekitaliiwo. Tetusobola kubuusabuusa oba okubuzaabuza Kigambo kya Katonda n’ekimu, kubanga tukkiriza nti kiri BW’ATYO BW’AYOGERA MUKAMA. Yesu Kristo aba obumu jjo, leero, n’emirembe gyonna.
Katonda omwagalwa, tuyambe tuleme kuKikuba mugongo, nga tukyefuulira olw’obusirusiru ob’engeri emu obw’ensi, naye ekiro kyaleero leka tuMusembeze Oyo n’omutima gwaffe gwonna. Mukama, ntondaamu omwoyo omulungi, Omwoyo w’Obulamu, nsobole okukkiriza Ebigambo Byo byonna, era nkkirize Yesu Ekigambo, oyo aba obumu jjo, leero, n’emirembe gyonna, era nzikirize leero ŋŋendere ku ttu ly’Ekigambo Eryasibwa ne Literekebwa olw’omulembe guno. Kituwe Mukama. Nkisaba mu Linya lya Yesu .
Nnandyagadde okubayita mujje muwulire Eddoboozi lya Katonda eryakakasibwa obutalekaawo kabuuza olw’ekiseera eky’enkomerero nga bw’Atuwa Emmere y’Empungu; ekisuubizo kya Katonda. Kyetaagisa okukkiriza okutamanyi musajja mu Kigambo kya Katonda kino okubeera Omugole we.
Owol. Joseph Branham
Obudde: Essaawa 6:00 (mukaaga) ez’omuttuntu, mu budde bw’ e Jeffersonville (y’essaawa emu ey’omu kawungeezi e Uganda),
Obubaka: Ensigo Tesikira Wamu Na Kisusunku 65-0218
Ebyawandiikibwa:
Omut. Matayo 24:24
Omut. Lukka 17:30
Omut. Yokaana 5:24 / 14:12
Abaruumi 8:1
Abaggalatiya 4: 27-31
Abebbulaniya 13:8
1 Yokaana 5:7
Okubikkulirwa 10
Malaki 4.
Naye bw’otuuka ku kugamba nti, “Nze ne Kitange tuli Omu,” n’ebintu bino ebirala, olwo ekisusunku kyesika ne kiGiviira. Naye Ekkanisa Omugole entuufu, eya nnamaddala ejja kufulumya Ekigambo kya Katonda kyonna, mu bujjuvu bwaKyo ne mu maanyi gaaKyo, kubanga Ye y’omu jjo, leero, n’emirembe gyonna.
65-0218 – “Ensigo Tesikira Wamu Na Kisusunku”.
Yesu Kristo aba obumu jjo, leero, n’emirembe gyonna, Omwoyo akka ku Mugole okukola ebintu bye bimu bye Ye Yakola. Okiraba? Kwe kwekubisaamu kw’obutonde okukomyawo Empeke yennyini eyafa.
65-0218 – “Ensigo Tesikira Wamu Na Kisusunku”.
Owek. mu Katonda William Marrion Branham
Obubaka: 65-0217 Omussajja Ng’adduka Okuva Mu Maaso Ga Mukama
Abasaabaze b’e Nineeve Abaagalwa,
Kitaffe, Ennyama Yo Ensu w’ebeera, Empungu zo we zikuŋŋaanira wamu. Oli mu kutuliisa ku Maanu Yo ey’Obwakatonda. Emmeeme zaffe Ziwe ekyo kye zeetaagira ddala. Tulumwa ennyonta Yo, Kitange. Tuli mu Mikono Gyo.
Tugalamidde mu maaso Go, nga twengera, okuyita mu kuwulira Eddoboozi Lyo. Omugole Ateekeddwa okukola okusalawo era bakyolekeze obwenyi. Kiba kituufu oba kikyamu. Okuwulira Eddoboozi Lyo erikakasiddwa obutalekaawo kabuuza kye kintu ekisinga obukulu Omugole Wo ky’alina okukola oba nedda? Bwe kiba kituufu, katukikole. Toddamu kulinda bbanga lisukka wano, zuula kati Amazima ge galuwa n’ekituufu ky’ekiruwa, era osigale nakyo. Tukimanyi nti Kituufu, tukimanyi nti Lye Kkubo Lyo ly’Otaddewo ku lw’olwaleero.
Nteekwa okulangirira nti, “Empologoma ewulugumye, ani ataatye? Katonda ayogedde, ani ayinza obutalagula?” Tukiraba mu Kigambo. Wakisuubiza. Ani ayinza okwefuga n’asigala nga asirise?
Tetwagala kirowoozo kya bantu bangi. Twagala Amazima. Era tetukola, (twagala) tetwagala —tetwagala kwolekagana na kintu kyonna wabula Katonda ky’Agambye nti ge Mazima .
Ekiseera kituuse ng’olina okusalawo emmeeri ki gy’oliko. Oli mu kulya ku Kigambo ekyayogerwa obutereevu okuva mu Mwana w’Omuntu oli, oba ekintu ekirala? Waliwo akugamba nti olina okuwulira amaloboozi amalala okubeera Omugole we? Okuzannya entambi mu maka gammwe oba mu masinzizo gammwe si kye kintu ekisinga obukulu Omugole ky’ayinza okukola?
Owuliriza eddoboozi lya ani? Eddoboozi eryo likugamba ki? Ddoboozi ki ly’otaddeko enkomekkerero yo, n’ey’amaka go, etaggwaawo?
Si nze, teyali malayika ow’omusanvu, oh, nedda; kwali kwolesebwa kw’Omwana w’omuntu. Teyali malayika, obubaka bwe; kyali kyama Katonda kye yabikkula. Si musajja; wabula Katonda. Malayika oyo si ye yali Omwana w’omuntu oli; wabula ye yali omubaka okuva eri Omwana w’omuntu. Omwana w’omuntu ye Kristo; Ye Oyo gw’oli mu kulyako. Toli mu kulya mubiri gwa muntu omu; omuntu, ebigambo bye bijja kulemererwa. Wabula olya ku Mubiri-Ekigambo ekitalemererwa eky’Omwana w’omuntu.
Towuliriza ddoboozi lyonna eritateeka Eddoboozi eryo, Omubiri-Ekigambo ekitalemererwa eky’Omwana w’omuntu, mu maaso go nga EKY’OKU MWANJO. Bayinza okubuulira, okuyigiriza, oba okukola byonna Katonda by’Abayise okukola, naye bo SI lye ddoboozi erisinga obukulu ly’OLINA OKUWULIRA.
Singa ekyo baali bakkiririza, olwo bandizannye Eddoboozi eryo nga mukuŋŋaanye awamu ne bakugamba nti, “Eddoboozi lino, ku ntambi, lye ddoboozi erisinga obukulu okuwulira. Lyo, era LYO lyokka ly’eliri BW’ATYO BW’AYOGERA MUKAMA.”
Oli mu mukwano na Ddoboozi ki? Lwaki kyaMwetaagisa okulaba nga Eddoboozi lye Likwatibwa ku lutambi ne Literekebwa? Katonda Yalonda Eddoboozi ly’ani okwogera Ekigambo kye olw’omulembe gwaffe?
Nga Akozesa nnabbi we gwe Yatuwa, oyo gwe Yayawula okukkirira eyo ayiteyo obubaka obwo, kati, yalabika ng’Ayinza okutumamu nnabbi omulala, naye yayawula Yona, era ne Eriya yandibadde tajaawo, Yeremiya yandibadde tajaawo, Musa yandibadde tajaawo, Yona ye yalina okugenda e Nineeve. Ekyo kyokka kye kyali kimala eggobe mu kibya. Yamulagira n’Amugamba agende. Era bw’Agamba nti, “Genda eyo, Yona, genda e Nineeve,” mpaawo mulala ayinza kugenda kukola ekyo okuleka Yona
Katonda Yatuteekateekerawo okutambulira mu bulamu buno. Eddoboozi lino Lyogera gye tuli Ebigambo by’Obulamu obutaggwaawo. Eri ffe, lino lye Kkubo Katonda lye yatuwa. Eno y’Emmeeri yaffe. Bw’oba oli ku mmeeri egenda e Talusiisi, gy’amuke ng’obudde tebunnakeerewa.
Bw’oba obadde weebuuza, oba nga olina ebibuuzo byonna ku mutima gwo kkkubo ki ly’olina okuyitamu oba kiki ky’olina okukola, jjangu otwegatteko. Saabaala ku mmeeri eno wamu naffe. Tugenda e Nineeve, okukilangirira. Tuleka emmeeri eyo ey’e Talusiisi okuserengeta eyo bwe baba baagala. Tulina omulimu mu maaso ga Katonda, obwo bwe Bubaka bwetuvunaanyizibwako.
Sigamba nti bw’ogenda mu kkanisa etazannya ntambi eba mmeeri egenda e Talusiisi, naye OMUNTU YENNA bw’aba tateeka Ddoboozi lya Katonda ku ntambi ng’eddoboozi erisinga obukulu ly’olina okuwulira, kirungi n’okebera okulaba ani mugoba w’emmeeri yo na wa emmeeri yo gy’eraga.
Nkuyita okutwegattako ku Ssande ku ssaawa 6:00 (mukaaga) ez’omuttuntu, mu budde bw’ e Jeffersonville (y’essaawa emu ey’omu kawungeezi e Uganda), nga Omugoba w’Emmeeri yaffe ng’ayogera era ng’atuleetera Obubaka : Omusajja Ng’Adduka Okuva Mu Maaso Ga Mukama 65-0217 .
Katutandike bulungi okudda obuggya kuno. Kituufu! Okyalinze ki? Tukkiriza nti Okujja kwa Mukama kuli kumpi, era agenda kuba n’Omugole, era Kwetegese. Era tetwagala mmeeri za ngeri yonna zigenda Talusiisi w’engeri yonna. Tugenda e Nineeve. Huh! Tugenda mu Kitiibwa. Amiina. Ekyo kituufu. Tugenda Katonda gy’Agenda okuwa omukisa, era ekyo kye twagala okukola.
Owol. Joseph Branham
Ebyawandiikibwa by’olina okusoma:
Yona 1:1-3
Malaki 4
Omut. Yokaana 14:12
Lukka 17:30
Obubaka: 64-0830E Ebibuuzo N’eby’okuddamu #4
Ab’Enju Y’Olutambi Abaagalwa,
Ntegeeza mmwe, ab’enju yange, n’ab’enju abali ebweru mu nsi gye tuge…entambi zaffe gye zigenda.
Abo ye ffe, ab’Enju y’Olutambi eya nabbi ; abaana be abasaasaanidde mu nsi, be yazaalira Kristo. Abo Kitaffe b’Awadde Okubikkulirwa kwe mu nnaku zino ez’oluvannyuma.
Njagala okubakuŋŋaanya bonna awamu olumu ku nnaku zino, olaba, Kitaffe Ajja kukikola, n’oluvannyuma tujja —tujja kuba n’Amaka gye tutaliddamu kubungeeta.
NJAGALA OKUBAKUŊAANYA BONNA AWAMU . Kigenda mu maaso mu kiseera kino. Obubaka buno, Ekigambo kye, Entambi zino ziri mu kukola ekyo kyennyini: ziri mu kuleeta Omugole ffenna awamu, nga zitutugattira awamu nga EKITOLE KIMU okuva mu nsi yonna. Mpaawo kirala okuggyako Eddoboozi lye; Eddoboozi lya Katonda ku ntambi, ekiyinza okugatta Omugole we.
Era ggwe, bw’ojjula Omwoyo, kano ke kamu ku bubonero obusinga obulungi bwe mmanyi: ogwa mu mukwano nnyo bw’otyo ne Kristo era n’okkiriza buli Kigambo ky’Agamba nti Mazima. Okiraba? Obwo bwe bujulizi obulaga nti olina Omwoyo Omutukuvu. Era obulamu bwo buba bujjudde essanyu, era — era oh owange, buli kimu kiba kya njawulo (laba?) okwawukanako ku bwe byaberanga. Oyo ye Mwoyo Omutukuvu.
Emitima gyaffe, ebirowoozo n’emmeeme zaffe bijjudde nnyo essanyu, okwagala n’Okubikkulirwa, kumpi tetusobola kwefuga. Buli bubaka bwe tuwulira buleeta Okubikkulirwa okusingawo. Tulaba kye tuli ffe ne kye tuli mu kukola okubeera mu Kwagala Kwe okutuukiridde. Tewali kintu kyonna kiyinza kutuggya ku ekyo Katonda ky’Atadde mu mitima gyaffe. Okunyiga Zannya ly’ Ekkubo Katonda ly’Ataddewo leero. Tewali kuteebereza, tewali kusuubira, tewali kubuuza Mwoyo Mutukuvu nti, “Kye nnaakawulira kye Kigambo ekituufu?” “Nneetaaga okukikebera n’Ekigambo?”
Si ffe. Kye tuwulira ku ntambi KYE KIGAMBO. Ekigambo ekyo kye tuwulira ku ntambi kye KIGAMBO KYOKKA ekikakasiddwa Omwoyo Omutukuvu yennyini, Empagi y’Omuliro, okubeera Bw’Atyo Bw’Ayogera Mukama eri Omugole.
Singa omuntu atugamba nti, “Eriyo bingi nnyo ebyogerwa ku ntambi nga byali Ow’oluganda Branham ng’omuntu nga y’ayogera, so si Kigambo ekyafukibwako amafuta. Oyo yali muntu buntu. Omwoyo Omutukuvu Yatukulembera okutuuka eri ekyali Kigambo na kiruwa nga yali bubeezi Ow’oluganda Branham ng’ayogera.”
Si eri ffe. Mu ngeri ennyangungu tukkiriza bukkiriza ekyo nnabbi kye yatugamba obuteerabiranga.
Njagala muleme kwerabiranga Kigambo ekyo . Musa bye yayogera, Katonda yabissaamu ekitiibwa, kubanga Ekigambo kya Katonda kyali mu Musa.
Teturyerabira nabbi kye yayogera, era tukikkiriza; kubanga Kyooleddwa n’ekkalaamu ey’ekyuma ku mitima gyaffe. Bye yayogera ku ntambi, Katonda yaBissaamu ekitiibwa, era tuBikkiriza.
Tewali kitiibwa kisinga ku kutuula n’owulira Eddoboozi lya Katonda nga Lyogera naffe. Agenda kuba Ayogera n’Omugole We ku Ssande eno ku ssaawa 6:00 (mukaaga) ez’omuttuntu, mu budde bwa Jeffersonville (y’essaawa emu ey’omu kawungeezi e Uganda), era ng’Addamu ebibuuzo: 64-0830E Ebibuuzo N’Okwanukulwa #4. Nnandyagadde okubayita okwegattira awamu naffe. Kwe kusalawo kw’otaryejjusa.
Owol. Joseph Branham
Obubaka: 64-0830M Ebibuuzo N’Eby’Okuddamu #3
Omugole Omuwala Omulongoofu Omwagalwa,
Nga njagala nnyo okubazzaamu amaanyi buli wiiki okunyiga Zannya n’okuwulira Eddoboozi lya Katonda ery’olunaku lwaffe. Kubanga nkimanyi nti Y’ Enteekateeka ya Katonda etuukiridde eri olunaku lwaffe.
Si ekyo Joseph Branham ky’ayogera oba ky’akkiriza. Wabula ekyo Eddoboozi lya Katonda eryakakasibwa kye Litugambye:
Nze Eddoboozi lya Katonda gye muli.
Bw’oba olina okubikkulirwa okw’Obubaka buno waakiri okutono, okunokola okwo okutono kuba kulina okuba nga kukumala n’okukirawo okubuulira buli gw’osisinkana; buli mukkiriza, okubuulira amakanisa go, nti Eddoboozi eryo lye Ddobozi erisinga obukulu LYEMUTEEKEDDWA OKUWULIRA.
Okulowooza ku kino nti, Ebigambo byennyini bye tuwulira nga tunyiga Zannya lye ddoboozi lya Katonda nga Lyogerera butereevu naffe. Kitaffe Yasiima Likwatibwe ku lutambi era Literekebwe tusobole okunyiga Zannya buli katikitiki ka buli lunaku; bwetutyo tusobole okuMuwulira ng’Atuzzaamu amaanyi, ng’Atuwa omukisa, ng’Atufukako amafuta, era ng’Agobera ebweru okutya kwaffe kwonna n’okubuusabuusa kwaffe, byonna nga bibaawo okuyita mu Kunyiga bunyizi Zannya.
Kyonna kye twetaaga mu kiseera ekyo, Nyiga Zannya, era okiweebwe awo. W’Ali okutujjukiza nti FFE EKIGAMBO. Ali naffe, atwetoolodde, ALI MU FFE. Sitaani kiguumaaza. Awanguddwa. Tewali kiyinza kutuggyako Kigambo ekyo. Katonda yaKituwa olw’okumanyirawo Kwe, ng’Akimanyi nti tuli Mugole we. Twali naye okuva ku lubereberye.
Eddoboozi ki lye twandiwulidde eryandibadde eddene okusinga Eddoboozi lyokka eryakakasibwa Empagi y’Omuliro obutalekaawo kabuuza okuba Eddoboozi lya Katonda?
Tewali Ddobozi eddala.
Eddoboozi eryo Lyatugamba ki sabbiiti ewedde?
Bulijjo mbabanja, era nkubanja nga muganda wange ne mwannyinaze. Mwe muli baana bange; Nze—nze kitammwe mu Njiri , si faaza nga bwe kyandibadde okuba kabona, ndi—nze kitammwe mu Njiri nga Pawulo bwe yagamba eyo. Nze nkuzadde eri Kristo, era kaakano, nze—mbafumbiza eri Kristo; ekyo kwe kugamba nti mbafumbiza eri Kristo nga omuwala omulongoofu. Temunjiwa! Temunjiwa! Musigale nga muli omuwala omulongoofu .
Tuteekwa okusigala nga tuli omuwala omulongoofu eri Ekigambo, eri Eddoboozi eryo. Eri ffe, waliwo ENGERI EMU yokka ey’okubaamu omukakafu nti ekyo tukikola: NYIGA ZANNYA.
Bw’oba onzikiriza nti ndi ekyo ky’oyogera, omuweereza wa Katonda, nnabbi, wuliriza bye nkugamba. Okiraba? Oyinza obutasobola kukitegeera, era bw’oba tosobola, olwo kola bukozi kye nkugamba.
Weewaawo, waliwo abasajja abalala ab’Omwoyo Omutukuvu abaafukibwako amafuta, era olw’ekisa kya Katonda n’okusaasira kwe, nsaba mbe nga ndi omu ku basajja abo. Nzikiriza nti mpitiddwa Ye okukuuma Ekigambo kye mu maaso gammwe n’okubalaga Obubaka buno, Ekigambo kya Katonda, Eddoboozi eryo.
Nga Peetero bwe yagamba, Kyennaavanga njagala ennaku zonna okubajjukiza ebyo, nti waliwo EDDOBOZI LIMU LYOKKA Katonda lye Yayita okubikkula ekigambo kye eri eryo. Eddoboozi limu Katonda lye Yakakasa obutalekaawo kabuuza. Eddoboozi limu Katonda lye yagamba nti, “Mumuwulire.” Eddoboozi limu Katonda lye yagamba nti, “Nze Eddoboozi lya Katonda gyemuli.”
Kino kijjukire n’omutima gwo gwonna: Sigala n’Ekigambo ekyo! Tolekanga Ekigambo ekyo! Ekintu kyonna ekikontana naKyo, kireke kyokka, ne bwe kiba ki. Olwo omanye nga nti Ekigambo ekyo Kituufu.
Mazima ddala nkitegeera lwaki ntegeerebwa bubi era nti abamu bawulira nti mpakanya abaweereza bonna; mbu nzikiriza nti tewali muntu yenna alina kubuulira. Bagamba nti “Bw’owuliriza omuweereza atali Ow’oluganda Branham, toli Mugole .” Nga bwe njogedde emirundi mingi, ekyo sikyogerangako newankubadde okukkiriza ekyo.
Nabbi yakinnyonnyola bulungi sabbiiti ewedde butuukirivu ddala nga bwe mpulira ne kye nzikiriza.
Waaliwo amakanisa amalala ag’Obubaka waakiri asatu mu kitundu kya Jeffersonville mu kiseera Ow’oluganda Branham we yabeerera wano. Mu lukuŋŋaana olwabaddewo ku Ssande ewedde, yategeezezza nti abasumba b’omu kitundu tebaaliwo mu kusaba okw’omu kawungeezi. Baalinayo okusaba kwabwe okw’omu kawungeezi. Bwe batyo, tebaakiwulira mu bo okujja okuwuliriza Ow’oluganda Branham mu kusaba okw’omu kawungeezi, wabula okuba n’okusaba mu kkanisa zaabwe. Okwo kwe kwali okusalawo kwabwe era kye baali bawulira nti baluŋŋamiziddwa okukola, era Ow’oluganda Branham n’akkiriziganya.
Leero wakyaliwo amasinzizo agawerako mu kitundu kya Jeffersonville. Nabo balina okukola nga bwe bawulira nga bakulembeddwa Mukama okukola. Bwe baba tebakiwulira muli eky’okuzannya entambi, Mukama Atenderezebwe, bali mu kukola kye bawulira nga bakulembeddwa okukola, era ekyo kye balina okukola. Bakyali baganda baffe ne bannyinaffe era baagala Obubaka buno. Naye tulina okukola kye tuwulira nti tukulembeddwa okukola: Nyiga Zannya. Twagala kuwulira nnabbi.
Nga Ow’oluganda Branham bwe yakola mu Mwezi Gw’omunaana nga ennaku z’omwezi 30, 1964, mbaaniriza okujja okutwegattako ku ssaawa 6:00 (mukaaga) ez’omuttuntu, mu budde bwa Jeffersonville (y’essaawa emu ey’omu kawungeezi e Uganda), nga bwe tuddamu okuwulira nnabbi ng’atuleetera Obubaka: 64-0830M Ebibuuzo N’Okwanukulwa #3 .
Owol. Joseph Branham
Obubaka: 64-0823E Ebibuuzo N’eby’okuddamu #2
Omugole w’Ekigambo Ekituukiridde Omwagalwa,
Tulindiridde bulindirizi kujja kwa Mukama waffe. Nga tukuuma ettabaaza zaffe nga zirongooseddwa, nga zijjuziddwa ne zijjula Amafuta, nga tuwulira Ekigambo ekibikkuliddwa emisana n’ekiro. Nga byonna tubimalira mu kusaba, buli ssaawa; si buli lunaku, buli ssaawa. Tuli mu kwekuuma nga twetegese nga twekuumira mu BULI KIGAMBO, era nga tukkiriza, BULI KIGAMBO.
Tutunula nga tulindiridde, buli kaseera, abo abeebase mu nfuufu y’ensi okusooka okuzuukira. Mu kaseera katono, tujja kubalaba; ba taata baffe, bamaama baffe, abaami baffe, abakyala baffe, baganda baffe ne bannyinaffe. Baabo awo, nga bayimiridde ddala mu maaso gaffe. Tujja kumanya mu kaseera ako, nti tutuuse, ekiseera kituuse. Okukkiriza okw’okukwakkulibwa kujja kujjuza emmeeme zaffe, ebirowoozo n’emibiri gyaffe. Olwo emibiri gino egivunda gijja kwambala obutavunda mu kisa kya Mukama waffe eky’okukwakkulibwa.
Era awo tujja kutandika okukwatagana. Ffe abalamu era abasigaddewo tujja kukyusibwa. Emibiri gino egifa tegijja kulaba ku kufa. Mu mbeera ey’ekibwatukira, wajja kubaawo okuwuuma okunaatuyitamu… tujja kukyusibwa. Abadde omusajja omukadde afuuke omuvubuka, abadde omukazi omukadde afuuke omuwala omuvubuka.
Oluvannyuma lw’akaseera, tujja kuba tutambulira wamu ng’ekirowoozo n’abo abazuukidde edda. AWO…EKITIIBWA…tujja kusitulwa wamu nabo tusisinkane Mukama waffe mu bbanga.
Nga kiseera nnyo ekyo ekitusemberedde. Omulabe AGEZAAKO okutukuuma nga tukubiddwa ne tugwa butaka, nga tuli bayongobevu olw’ebirowoozo-lowoozo, era nga tuweddemu amaanyi, naye ekitiibwa kibe eri Katonda, tasobola. Tulina Okubikkulirwa KULI okw’Oyo ky’Ali; ani gwe Yatuma okutuyitayo; kye tuli, so si kye tugenda okuba, wabula KYETULI. KATI Kusudde ennanga mu MMEEME zaffe, MU BIROWOOZO NE MYOYO GYAFFE, era tewali kiyinza kukutuggyamu okwo. Tumanya tutya? Katonda bw’atyo bweYagamba!
Eno si maka gaffe, yonna yiyo, Sitaani, osobola okugyetwalira. Tetwagala kitundu kyonna ku yo era tetukyagyetaaga. Tulina Amaka Agajja agatuzimbiddwa. Ate nno ng’okyali awo, sitaani, tufunye okutegeezebwa, EWEDDE EMIRIMU. Okuzimba kuwedde. Okuyooyootebwa kwonna kumaze okutonebwamu. Era nkufuniddeyo n’amawulire amalala ag’okukugamba, MANGU DDALA, Ajja okutucima bwetutyo tusobole okuba n’emyaka 1000 egya Hanemuunu nnantataataganyizibwa wamu naYe, era toyitiddwa, era tojja kubeerayo.
Nga bintu bya kitiibwa Obubaka buno bye butubikkulira buli lwe Tunyiga Zannya. Katonda Mwene yakka, n’Ayogera ng’Ayita mu mimwa gy’omuntu ow’oku nsi Asobole okutubuulira ebintu bino byonna. Yatulonda era n’Atuwa Okubikkulirwa okutuufu era okujjuvu ku Ye ky’Ali.
Ye yali Ekigambo ekyafuuka omubiri, si Ekigambo ky’olunaku lwa Musa, Musa ye yali olunaku olwo, Ekigambo; si Ekigambo ky’omu nnaku za Nuuwa, Nuuwa ye yali Ekigambo ky’olunaku olwo; si olunaku…Ekigambo ky’olunaku lwa Eriya, Eriya ye yali Ekigambo ekyo eky’olunaku olwo; naye Ye yali Kigambo ekiriko mu kiseera ekyo kyennyini, ate nga bo bali bawangaalira mu by’emabega.
Oli mwetegefu?….Kiikino wano kijja. Gwe mugemera-wala ogw’emidumu ebiri ate omuzito, era tuGwagala nnyo!!
Ekintu kye kimu kiddiŋŋana! Obwo bwe bukakafu bwetulabirako Omwoyo Omutukuvu, Katonda bw’Akubikkulira n’okiraba, BW’ATYO BW’AYOGERA MUKAMA era n’okikkiriza. Si ky’oli, kye wali, newankubadde ekintu kyonna ku ekikwata ky’ekyo, wabula Katonda ky’Akukoledde kati. Bwebwo awo obukakafu bwetulabirako.
Aleluuya, Omusumaali Agukubye ennyondo n’Aguyingizaamu. KATI katuwulire nga Agunywerezaamu.
Atuwa obukakafu bwetulabirako Omwoyo Omutukuvu, Yokaana 14. Yagamba nti, “Nnina bingi bye njagala okubagamba. Sifunye budde kukikola, naye Omwoyo Omutukuvu bw’Alijja, Ajja kubabuulira, Ajja kubajjukiza ebintu bye nnabagambako, era Ajja kubalaga n’ebintu ebigenda okujja.” Temukiraba? Bwebwo awo obukakafu bwetulabirako. Ekyo kirangirira era ne kiba nga… okuba n’Okuvvuunula okw’Obwakatonda okw’Ekigambo ekiwandiikiddwa. Kati, obwo si bwe bukakafu bwetulabirako nnabbi?
Omwoyo Omutukuvu ye nnabbi wa buli mulembe. Ye nnabbi ow’omulembe gwaffe. Ekigambo kijja eri nnabbi oyo YEKKA. Ye Katonda nga Ayogera era nga Yeebikkula ng’Ayita mu nnabbi We. Ye Kigambo eky’olunaku luno. Obubaka buno, KU LUTAMBI, kwe kuvvuunula okutuukiridde okw’Ekigambo, nga kulina okukakasibwa okumalawo buli kabuuza okw’Obwakatonda.
“Ebituukirivu bwe birijja, eby’ekitundu birivaawo.” Kale ebintu bino byonna ebitonotono eby’okubuuka waggulu ne wansi ng’omwana omuto, okugezaako okwogera mu nnimi, n’ebintu bino byonna ebirala, ebyo ebituukirivu… Era ddala tulina leero, olw’obuyambi bwa Katonda, okuvvuunula okutuukiridde okw’Ekigambo nga kuliko okukakasibwa Okw’Obwakatonda okumalawo buli kabuuza! Kale n’olw’ekyo eby’ekitundu bivuddewo. “Bwe nnali omuto, nnayogeranga ng’omuto, nnategeeranga ng’omuto; naye bwe nnafuuka omusajja, ne ndeka eby’obuto.” Amiina!
Ebituukirivu bizze; okuvvuunula okutuukirivu okw’Ekigambo. NYIGA ZANNYA. Ekyo kye kyokka Omugole We kyeYeetaaga, era kyokka ky’Ayagala.
Jjangu onyige Zannya wamu naffe Ssande eno ku ssaawa 6:00 (mukaaga) ez’omuttuntu, mu budde bwa Jeffersonville (y’essaawa emu ey’omu kawungeezi e Uganda), owulire EKIGAMBO EKITUUKIRIVU, N’OKUVVUUNULA OKUTUUKIRIVU, N’OKUKAKASIBWA OKW’OBWAKATOKA OKUMALAWO BULI KABUUZA nga bwe tuwulira :
Ebibuuzo N’Okwanukulwa #2 – 64-0823E Owol. Joseph Branham
Obubaka: 64-0823M Ebibuuzo N’eby’okuddamu
Abawuliriza b’Entambi Abaagalwa,
Siyinza buyinza kukyogera kimala, TEWALI KINTU kikulu okusinga okuwulira Eddoboozi lya Katonda nga lyogera naffe okuyita mu mubaka we malayika eyakasibwa okusukka buli kibuuzo kulw’olunaku lwaffe. Okubikkulirwa ku Kubikkulirwa Mukama kw’Ali mu kutubikkulira. TeKiriiko kkomo. Buli Bubaka bulinga bwe tutawulirangako. Kye Kigambo Ekiramu, Emmaanu Eyakagwa, Emmere ya Katonda Eterekeddwa Omugole We, era kye tulina okukola kyokka kwe KUNYIGA ZANNYA.
Tuwulira byonna ebikwata ku Kukwakkulibwa KWAFFE okugenda okujja mu bbanga ttono. Tugenda…EKITIIBWA, TUGENDA ku Kyeggulo ky’Embaga ey’Obugole. Yatuteekateerawo FFE okubeera Eyo olw’okumanyirawo Kwe, era tewali kigenda kukiziyiza. Ekigambo wano kyegatta n’omuntu, era bombi ne bafuuka Omu. Kyoleka Omwana w’omuntu. Ekigambo n’Ekkanisa bifuuka Omu. Kyonna Omwana w’omuntu kye Yakola, Ye yali Kigambo, Ekkanisa ekola ekintu kye kimu.
Nga sinnagenda mu maaso, oyinza okwagala okuddamu okusoma ekyo!! Tuyinza tutya okuleka sitaani okutukkakkanya wansi? Wuliriza bye twesunga. Wuliriza kye tuli. Wuliriza ebigenda mu maaso KATI.
Tugenda wa? Ku kijjulo KYAFFE eky’Embaga ey’Obugole kyetwategekerwa olw’okumanyirawo Kwe, eyo FFE, Ekigambo kye n’Ekkanisa ye, gye tufuuka OMU NAYE, era kyonna Omwana w’Omuntu kye yakola, TUKOLA KYE KIMU!!
Awo ne tuwulira byonna ebikwata ku maka gaffe Agajja. Omukubi w’Ebifaananyi ow’Obwakatonda akoze pulaani y’Ekibuga KYAFFE Ekiggya, gy’Agenda okubeera naffe, Omugole We. Akizimbye era n’Ateekamu buli kantu okusinziirira ddala ku bitunyumira FFE; byokka ebyo byetwandyagadde FFE. Eyo etaryetaagisa kitangaala, kubanga Omwana gw’Endiga y’Aliba Ekitangaala kyaffe. Eyo nabbi gy’anaaba nga awangaalira ku muliraano gwaffe; ajja kuba muliraanwa waffe. Tulirya ku miti egyo, tujja kutambulira mu nguudo ezo eza zaabu okutuuka ku nsulo eyo tunyweko. Tuliba tutambulira mu nsuku za Katonda, nga Bamalayika bamaamidde ku nsi, nga bayimba ennyimba. Ekitiibwa! Aleluuya!
Okukakasa Ekigambo kye gye tuli; Ye, Empagi y’omuliro, Yasiima ekifaananyi kye ne kikubibwa wamu n’omubaka we malayika okukakasa n’okugamba ensi nti, “Mumuwulire.” Tuteekwa obutabuusabuusa Kigambo na kimu, kubanga Si kigambo kya nnabbi, Kigambo kya Katonda ekyayogerwa eri Omugole we. Awo n’Atugamba nti, tulina okukiikirirwa okuva mu kuteekateekerwa, ng’Atukakasa. Tatulaba, awulira buwulizi ddoboozi lyaffe okuyita mu Musaayi gwa Yesu. Tutuukiridde mu maaso ge.
Obuziba bukoowoola obuziba nga bwe kitabangawo, era Kitaffe Ali mu kutujjuza Ekigambo kye ekyabikkulirwa. Byonna bye twetaaga okumanya bikwatiddwa ku lutambi ne bituweebwa FFE. Mu ngeri ennyangungu tebuliiko kkomo Obubaka buno obw’Ekigambo Ekiramu. Tewali kisinga kumanya nti FFE tuli Mugole we. Obukakafu obuli mu kumanya nti okuwulira Eddoboozi eryo, Okunyiga Zannya, kwe Kwagala kwa Mukama waffe okutuukiridde; Enteekateeka ye gy’Atuteereddewo.
Waliwo bingi nnyo ebikyajja! Kye Kigambo ky’Amazzi Amalamu nnantakazibwa eri Omugole we. Tetubangako bayonta kusukka wano mu bulamu bwaffe bwonna, naye tetuweeweezebwangako mu lugendo lwaffe nga tuti, nga tunywa ne tunywa byonna bye twagala.
Buli Ssande, Omugole afuna essanyu lingi nnyo okukuŋŋaanyizibwa n’ekitundu ku Mugole okuva mu nsi yonna, okuwulira by’Agenda okuddako okubikkula. Yatugamba nti bwe tuba tetusobola kujja wano ku Tabanako, funayo ekkanisa emu awantu awamu; genda mu eyo.
Ffenna tetusobola kukuŋŋaanyizibwa wamu mu maka ga nnabbi; ekitebe kye we yazimba, naye tusobola okufuula amakanisa gaffe, oba Amaka gaffe amakanisa, eyo gye tumuteekera ku kituuti. Eyo gye tusobola okuliisibwa EKIGAMBO EKITUUKIRIVU DDALA NGA BWE KYABIKKULIBWA.
Tewali kukuŋŋaana kw’abantu kukulu okukirawo, mpaawo kufukibwako mafuta kukirawo, mpaawo kifo kikulu nnyo okubeeramu okusinga okubeera nga tutudde wamu mu bifo eby’omu Ggulu, nga tuwuliriza Eddoboozi lya Katonda.
Nkwaniriza okujja okuwulira Eddoboozi lya Katonda eryakakasibwa wamu naffe Ssande eno ku ssaawa 6:00 (mukaaga) ez’omuttuntu, mu budde bwa Jeffersonville (y’essaawa emu ey’omu kawungeezi e Uganda), nga bw’Ayogera naffe omulundi omulala ng’Ayita mu mubaka we malayika, era ng’Addamu ebibuuzo byonna bye tulina ku mitima gyaffe, era n’Atukakasa nti ffe Mugole We.
Owol. Joseph Branham Obubaka bwa Ssande: Ebibuuzo N’Okwanukulwa #1 64-0823M
