Category Archives: Uncategorized

23-0406 Ekijjulo

Obubaka: 57-0418 Ekijjulo

BranhamTabernacle.org

Omuti gw’omugole oguzziddwawo Abaagalwa,

Okuyita mu mwaka gwonna, nneesunga wiikendi lwe nsobola okusibira ddala ensi yonna wabweru, ne  njijako ebyuma byange byonna, ne  nsaba olunaku lwonna, ne  mpulira Eddoboozi lye nga lyogera n’omutima gwange, ne mba n’Okussa ekimu naye, era ne mpongayo obulamu bwange  mu bulamba bupya eri Obuweereza bwe. BULI LUNAKU lulina okuba lunaku lwa Paasika gye tuli, wabula wiikendi eno kikujjuko kya njawulo nnyo, ekitukuvu; ekiseera ekizziddwa ku bbali Omugole mw’ajjira awamu Okusinza. KINCAMUSIZZA NNYO bannange. Siyinza kulinda kweggalira munda ne Katonda mu kifo eky’ekyama, eyo mu Mwoyo, nga ndaba Obwenyi bwe; nga  neeggasse ku Omugole wa Kristo okwetoloola ensi yonna, nga tutudde mu bifo eby’omu Ggulu. Erinnya lya Mukama  waffe Lyebazibwe! Mazima ddala erina okubeera wiikendi esinga okwesungibwa era entukuvu mu bulamu bwaffe.

Oh, ka tukomeko wano nate, eddakiika endala emu yokka. “Mu bifo eby’omu Ggulu.” Kati, si kubeera bubeezi awantu wonna ebweru, wabula mu bifo eby’omu Ggulu. Tukuŋŋaanyiziddwa mu “by’omu Ggulu,” kitegeeza nti ekifo ky’omukkiriza. Nti, bwe mba nsabye ne necca, ggwe n’osaba ne wecca, oba ekkanisa n’saba ne yecca, era twetegekedde Obubaka, era nga tukuŋŋaanyidde wamu ng’abatukuvu, abaayitibwayo, ababatiziddwa n’Omwoyo Omutukuvu, nga tujjudde emikisa gya Katonda, nga twayitibwa, twalondebwa, nga tutudde wamu mu bifo eby’omu Ggulu kati, tuli bitonde  bya mu Ggulu mu myoyo gyaffe. Emyoyo gyaffe gituyingizza mu mbeera ey’omu Ggulu. Oh, ow’oluganda! Kikyo  awo, embeera ey’omu Ggulu! Oh, kiki ekiyinza okubaawo ekiro kya leero, kiki ekiyinza okubaawo ekiro kya leero singa tubeera tutudde wano mu mbeera ey’omu Ggulu, n’Omwoyo Omutukuvu ng’atambulira ku buli mutima oguzziddwa obuggya ne gufuulibwa ekitonde ekiggya mu Kristo Yesu? Ebibi byonna nga biri wansi w’Omusaayi, mu kusinza okutuukiridde, nga emikono gyaffe tugiwanise eri Katonda n’emitima gyaffe nga giyimusiddwa, nga tutudde mu bifo eby’omu Ggulu mu Kristo Yesu, nga tusinziza wamu mu bifo eby’omu Ggulu.

Wali otuddeko eyo? Oh, ntuddeko eyo okutuusa lwe nkaaba olw’essanyu ne ŋŋamba nti, “Katonda, tondeka kuva wano.” Ebifo eby’omu Ggulu mu Kristo Yesu, kyokka!

Nga Atuwa mikisa ki? Okuwonyezebwa okw’obwakatonda, okumanya ebintu nga tebinnatuukawo, okubikkulirwa, okwolesebwa, amaanyi, ennimi, okutaputa, amagezi, okumanya, emikisa gyonna egy’omu Ggulu, n’essanyu eritoogerekeka erijjudde Ekitiibwa, buli mutima nga gujjudde Omwoyo, nga tutambulira wamu, nga tutudde wamu mu bifo eby’omu Ggulu, mpaawo  kirowoozo na kimu eikibi mu ffe, mpaawo sigala n’omu akommonteddwa, mpaawo  lugoye lumu olumpi, mpaawo kino na kimu, kiri oba ekirala, mpaawo kirowoozo kimu ekibi, mpaawo alina nsonga ku munne, buli omu ng’ayogerera mu kwagala n’okukwatagana, buli muntu ng’alina endowooza emu mu kifo kimu , “olwo Amangu ago okuwuuma ne kuba mu ggulu ng’empewo ewuuma n’amaanyi.” Kikyo awo, “eyatuwa buli mukisa gwonna ogw’Omwoyo.”

Mukama waffe Yesu kkiriza okusinza kwaffe kwetunaakuwa ku wiikendi eno eya Paasika. Leka tuyingire mu bifo eby’omu Ggulu mu Kristo Yesu; tuwaguze tuyingire Awatukuvu w’Awatukuvu. Awatali kirowoozo kibi na kimu, awatali kituwugulaza na kimu, wabula mu ndowooza emu, mu Kifo kimu; olwo leka wabeerewo eddoboozi okuva mu Ggulu lijje ng’empewo ey’amaanyi efuuwa ng’eyingira mu buli maka gaffe. “Jjangu Mukama Yesu”, tuli beetegefu okukulaba maaso ku maaso.

Kubanga Omugole akomezeddwawo okuyita mu Bubaka bw’Ekitangaala eky’akawungeezi obw’omulembe gwaffe; okuyita mu Bubaka bwa Malaki 4. Tukwebaza Mukama olw’okwolesebwa kwa Kristo mu bujjuvu mu Kkanisa ye, si ekkanisa eyazimbibwa n’emikono, wabula okwolesebwa kwa Kristo mu bujjuvu nga kwolesebwa mu muntu, nnabbi wo, okuyita mu bubonero obunene n’ebyewuunyo, era azzeemu okubikkula Ekigambo kya Katonda kyonna. Era kati Kibeera mu Mugole Wo okwetoloola ensi yonna. Mwebale olw’okutuleka ne tuba abalamu okulaba Ekitangaala kino ekinene eky’akawungeezi, okusinziira ku bunnabbi.

Era Ekitangaala eky’ akawungeezi kiviirayo ki? Ekitangaala eky’akawungeezi kya ki? Kya kuzzaawo. Whew! Okifuna? [Ekibiina kigamba nti, “Amiina.”—Ed.] Ekitangaala eky’akawungeezi kirina ekigendererwa kye kimu nga Ekitangaala eky’oku makya kye kyalina, okuzzaawo ebyo ebyasalibwako Emirembe egy’Ekizikiza, okuyita mu Rooma. Katonda agenda kuzzaawo, ng’Ayasa Ekitangaala eky’akawungeezi (kiki?), okuzzaawo Ekigambo kya Katonda kyonna nate, okwolesebwa kwa Kristo mu bujjuvu mu Kkanisa ye. Buli kintu kye yakola, mu ngeri yennyini ddala bwe yakola, kiriba kityo nate mu Kitangaala eky’akawungeezi. Mulaba kye ntegeeza? Oh, ekyo si kya kitalo? [“Amiina.”] Era okumanya tubeera wano wennyini okukiraba kati, Ekitangaala eky’akawungeezi, ddala okusinziira ku bunnabbi.

Omugole omutuufu takoma ku Kujjibwako musango, newankubadde nga akimanyi nti ebibi bye biri nga by’atakolanga nako; Takoma ku Kutukuzibwa, newankubadde nga Alongooseddwa n’ateekebwa ku bbali okuweereza; Takoma ku Pentekooti, wadde nga Afunye okubatizibwa kw’Omwoyo Omutukuvu; naye Agendera ddala okutuuka ku KIGAMBO KY’OLUNNAKU LWAFFE: Malaki 4, Ekigambo kyennyini nga kifuuse omubiri nate mu muntu. Ekyo, “Nja kuzzaawo bw’ayogera Mukama,” ekijja okuleetera Omugole Okukkiriza Okw’Okukwakkulibwa. Era Ekigambo ekyo ekyoleseddwa, engeri yokka gyekijjamu,  kisobola okujja nga tuwulira Entambi, Erinnya lye ery’ekitalo lyebazibwe.

Omu ku bo, Martin Luther, atandika okumulisa Ekitangaala. Waaliwo Ekitangaala ekitono, amaanyi matono nnyo gokka, ag’okujjibwako omusango.

Awo ne wajja Wesley, n’amaanyi agasingako, okutukuzibwa.

Oluvannyuma lwa Wesley, ne wajja amusinga amaanyi, Pentekooti, okubatizibwa kw’Omwoyo Omutukuvu, mu nnabbi omulala omukulu. Mukiraba?

Naye mu nnaku ez’enkomerero, eza Malaki 4, Eriya wa kujja n’Ekigambo kyennyini. “Ekigambo kya Mukama kyajja eri nnabbi.” Mu Byaka eby’akawungeezi, wa kuvaayo, okuzzaawo n’okukomyawo. Kiki? “Okukyusa emitima gy’abaana eri Okukkiriza kwa Katonda.” Ekitangaala eky’okuna!

Mujje mukuŋŋaane okwetooloola Ekigambo, mu maka gammwe, mu wiikendi ya Paasika eno era leka tusinze Mukama. Mujjeeko amasimu gammwe okuggyako okukuba ebifaananyi, okuwulira Okunokola Kw’olunaku, n’okuzannya entambi okuva mu apu ya Table, apu ya Lifeline, oba omukutu gw’okuwanulayo olutambi.

Njagala ffenna twegatte kulw’enteekateeka eno wammanga:

OLUNAKU OLW’OKUNA

Lwali Lwakuna ekiro Mukama waffe Yesu n’alya ekyeggulo ekyasembayo n’abayigirizwa be, ng’ajjukira embaga ey’Okuyitako nga okuva kw’abaana ba Isirayiri tekunnatandika. Nga mukisa gwe tulina okussa ekimu ne Mukama mu maka gaffe, nga wiikendi yaffe entukuvu tennabaawo, era tumusabe atusonyiwe ebibi byaffe, era atuwe byonna bye twetaaga mu lugendo lwaffe.

Katonda, kebera emitima gyaffe kati. Omusaayi kweguli, Mukama? Bwe kiba nga si bwe kiri, tusaba ekyo — nti Ojja kuguteekako kati kati, nga okuggyawo ebibi byaffe n’obibikka, era bijja kwawukanyizibwa naffe, Mukama, ebibi by’ensi eno, tusobole okuba abatukuvu era abayanjulika eri Kitaffe kati nga bwe tujja okutwala — omubiri n’Omusaayi ogwayiika ogw’Omwana gw’endiga gwaffe, Omwana wa Katonda, Omulokozi waffe.

Ffenna tutandike ku ssaawa 12:00 (kkumi na bbiri) mu budde  bw’omu kitundu kyammwe, era tuwulire Okussa Ekimu 57-0418.

Ekinadda ku Bubaka, tujja kukuŋŋaana n’ab’enju zaffe mu maka gaffe tulye ekyeggulo kya Mukama.

Mu bbanga ttono tujja kuba n’akayungiro k’okuwanula olutambi n’olukuŋŋaana lw’Okussa Ekimu byombi, oba, bijja kubeera ku Voice Radio.

OLUNAKU OLW’OKUTAANO

Leka tugende mu kusaba n’amaka gaffe ku ssaawa 3:00 (ssatu) ez’oku makya, n’oluvannyuma nate ku ssaawa 6:00 (mukaaga) ez’omu ttuntu, nga tuyita Mukama abeere naffe era ajjuze amaka gaffe n’Omwoyo Omutukuvu nga bwe twewaayo gy’ali.

Leka ebirowoozo byaffe biddeyo ku lunaku olwo e Kalvario, emyaka egisukka mu 2000 egiyise, tulabe Omulokozi waffe ng’alengejjera ku musaalaba, era olwo tweweeyo naffe mu ngeri y’emu okukola bulijjo ekyo ekisanyusa Kitaffe:

Kati tukizuula nti kyamwoleka bulungi. Omubumbi kati yalina Ekigambo nga kyoyoleseddwa mu Mulimu gwe ogw’ekikugu nate, ogwayitibwa Omwana we, Katonda, Emmanuel. Lowooza bulowooza, nti Omuntu ne yeewaayo nnyo okutuusa Katonda lwe yeeragira munda mu ye, mu mubiri ogwo, n’afuuka, Ye ne Katonda ne bafuuka Omu. “Nze ne Kitange tuli Omu. Kitange abeera mu Nze. Nkola ekyo ekisanyusa Kitange bulijjo.”

Watya singa Omukristaayo leero asobola okuba n’obujulizi obw’engeri eyo? Wandibadde mulimu gwa kikugu wano wennyini mu Yuma, ku luguudo. Bw’oba oli mukyala mwozi wa ngoye ebweru eyo emabega  w’eyo gyebooleza engoye, osigala oli mulimu ogw’ekikugu eri Katonda, ng’ate osobola okugamba nti, “Nkola ekyo bulijjo ekisanyusa Katonda,” era ensi yonna esobola okulaba —omulimu gwa Yesu Kristo nga gwolesebwa mu ggwe.

Olwo ku ssaawa 6:30 (mukaaga kitundu) ez’omu ttuntu, leka twegatte wamu mu maka gaffe okuwulira,  Okutuukirizibwa 57-0419.

Olwo tuddemu twegattire wamu mu kusaba ku ssaawa 9:00 (mwenda) ez’ekawungeezi nga tujjukira okukomererwa kwa Mukama waffe.

OLUNAKU OL’WOMUKAAGA

Tuddemu ffenna twegatte mu kusaba ku ssaawa 3:00 (ssatu) ez’oku makya, ne 6:00 (mukaaga) ez’omu ttuntu, era tutegeke emitima gyaffe olw’ebikulu by’anaatukolera wakati mu ffe,

Mbadde njogera akabanga katono akayise ku ngeri ebidiba ebinene gye biloopaamu emmunyeenye.

Olwo ku ssaawa 6:30 (mukaaga kitundu) ez’akawungeezi, ffenna tujja kukwatagana okuwulira EKIGAMBO: Okuziika 57-0420.

Nga luno lugenda kuba lunaku lwa bbaluwa Myufu eri Omugole We okwetoloola ensi yonna.

Olwo tuddemu twegattire wamu mu kusaba ku ssaawa 9:00 (mwenda) ez’akawungeezi nga tujjukira okukomererwa kwa Mukama waffe.

SANDE

Nga lunaku olutuukiridde olw’okuwuliriramu n’okulya ku Kuzzibwawo Kw’Omuti Gw’Omugole. Ka tusooke tuzuukuke nga bukyali nga Ow’oluganda Branham bwe yakola ku makya mukwano gwe omuto, kaamukuukulu bwe yamuzuukusa ku ssaawa 11:00 (kkumi n’emu) ez’oku makya. Ka twebaze Mukama olw’okuzuukiza Yesu mu bafu:

Ssaawa kkumi n’emu enkya ya leero, mukwano gwange omuto alina ekifuba emmyuufu yabuuse n’agwa waggulu ku ddirisa n’anzuukusa. Kyalabise ng’omutima gwe omutono ogwagala okwabika, nga gugamba nti, “Azuukidde.”

Ku ssaawa 3:00 (ssatu) ez’oku makya tuddemu okwegattira ku lujegere lwaffe olw’okusaba, nga tusabiragana n’okwetegekera okuwulira Eddoboozi lya Katonda.

Ku ssaawa 6:30 (mukaaga kitundu) ez’akawungeezi tujja kujja wamu okuwulira Obubaka bwaffe obwa Paasika: Okuddizibwawo kw’Omuti Gw’omugole 62-0422.

Oluvannyuma lw’olukuŋŋaana luno, leka tuddemu okwegatta mu kusaba, nga tumwebaza olwa WIIKENDI EY’ENJAWULO GY’ATUWADDE OKUBEERA NAYE WAMU N’OMUGOLE WE MU NSI YONNA.

Eri baganda bange ne bannyinaze emitala w’amayanja, ng’omwaka oguwedde, nnandyagadde okubayita okwegatta naffe ku mikolo gino mu budde bw’e Jeffersonville, olw’ebiseera byonna eby’okusabiramu ku nnyanjulabudde eno n’olw’olutambi olw’okuzannyibwa ku Ssande ku makya. Wabula nkitegeera nti okuzannya Entambi ku Lwokuna, Olwokutaano, n’Olwomukaaga akawungeezi mu budde bw’e Jeffersonville kiyinza okubabeerera ekizibu nnyo abasinga obungi ku mmwe, kale nsaba mubeere ba ddembe okuzannya Obubaka obwo mu kiseera kyonna eky’olunaku ekibanyumira. Wabula, ate, nandyagadde ffenna twegattire wamu ku Ssande ku ssaawa 6:30 (mukaaga kitundu) ez’omu ttuntu, mu budde bw’e Jeffersonville, okuwulira Obubaka bwaffe obwa Ssande nga tuli wamu.

Era njagala okubayita n’abaana bammwe okubeera ekitundu ku mpapula z’okukola eza Creations n’okusomesebwa, n’ebibuuzo bya YF, amaka go gonna bye gasobola okunyumirwa awamu. Tulowooza nti mujja kubyagala anti byonna byesigamiziddwa ku KIGAMBO kye tugenda okuwulira wiikendi eno.

Ku lw’ennyanjulabudde ya wiikendi, okutegeezebwa ku ngeri y’okutegekamu olukuŋŋaana lw’Okussa Ekimu, ebintu ebigenda okwetaagibwa mu pulojekiti za Creations, Ebibuuzo bya Paasika (Quizzes), n’amawulire amalala, laba emikutu wammanga.

Kiba kitiibwa nnyo gyendi okukuyita ggwe n’ab’omu maka go okujja awamu n’Omugole okwetoloola ensi yonna ku wiikendi ejjudde OKUSINZA, OKUTENDEREZA N’OKUWONYEZEBWA. Nzikiriza nti ddala enaaba wiikendi ejja okukyusa obulamu bwo emirembe gyonna.

Ow’oluganda Joseph Branham

Empeereza Audio

Wansi waliwo okubuulira kwa wiikendi ya Paasika. Empeereza y’Ekijjulo/Okwoza Ebigere ku Lwokuna y’emu ku nkola y’okuwanula.

LWAUNA– 6:00 PM (obudde bw’ekitundu)

(EKITUNDU KYA TAPE) + Ekijjulo 57-0418

LWAKUTAANO – 12:30 PM (obudde bw’ekitundu)

Obutuukirivu 57-0419

LWAMUKAA– 12:30 PM (essaawa y’omu kitundu)

Okuziika 57-0420

SSANDE– 12:30 PM (obudde bwa Jeffersonville)

Okuzzaawo Omuti Gw’omugole 62-0422

23-0402 Okukwakkulibwa

Obubaka: 65-1204 Okukwakkulibwa

BranhamTabernacle.org

Ba Kigambo Waggulu Ku Kigambo Abaagalwa,

Amakanisa mangi gasobeddwa, gasoberwa, gatabuddwatabuddwa, gasoberwa olw’okufiirwa, gasobeddwa awatali kumanya kya kukola, gavuyizza era gazzeemu obuvuyo nga beewuunya kiki ekigenda mu maaso ne bano mbu “Abantu b’Entambi” okuva mu nsi yonna buli Ssande.

Kwe Kwegatta Kw’omugole Wa Kristo Okutalabika, nga Atudde mu maaso g’Omwana, nga Ayengera, nga Yeetegeka. Omugole waffe ow’omu Ggulu abadde atubuulira byonna ebikwata ku maka gaffe ag’omu maaso naye.

Wiiki ntono zokka emabega Yatugamba nti: “Ensi eno si Maka go, lusuku Adeni olwa Sitaani, era nja kugizikiriza n’omuliro. Ggwe swiitimutima Wange, gwe nnalonda nga ensi tennatondebwa okubeera Omugole wange. Kati, ku Ssande eno ng’enda kukubuulira byonna ebikwata ku Kukwakkulibwa kwange okubindabinda.”

Tuli wansi w’okusuubira okunene kutya. Tusobola okukuwulira mu bbanga. Ebintu biri mu kutuukawo mangu nnyo.

Ekyo kyennyini Baibuli kye yagamba nti kiribaawo mu lunaku luno, kigenda mu maaso, buli lunaku. Lwaki, kikuŋŋaanyiza ku bwangu obw’ekitalo ennyo ebweru eyo, mu ddungu eryo, n’ebintu ebigenda mu maaso, okutuusa nga sisobola na kwekuumira ku bwangu bwakyo. Tuli kumpi n’Okujja kwa Yesu, okwegatta n’Ekkanisa Ye, Ekigambo we kifuuka Ekigambo.   

Bino byonna bigenda mu maaso ku lwaffe, Omukyala We Omulonde, Omugole w’olunaku luno. Ffe ffekka abalaba ebintu bino nga byebikkula bwanjulukufu.

Atutegese okubeerawo ku mulembe guno era tewali mulala asobola kutwala kifo kyaffe. Kati tuli batabani na bawala Be abayoleseddwa tusobole okussa ekimu naye; ekyo ky’Ayagala.

FFE Kigambo Waggulu ku Kigambo, nsigo ya bulamu ku nsigo ya bulamu, Obulamu waggulu ku Bulamu, era ekigera ekijjuvu eky’Omugole wa Mukama waffe Yesu Kristo.

Bw’oba olina obwetaavu, Bwogere. Ggwe Kigambo waggulu ku Kigambo. Totunuulira buwolongofu butwetoolodde wonna mu nsi; obulwadde, endwadde, ettemu, okuggwaamu essuubi, okugwa eddalu okw’abantu abatamanyi oba basajja oba bakazi. FFE MUGOLE, omugole wa Mukama waffe Yesu Kristo eyategekebwa edda, eyaweebwa obutuukirivu, eyayolesebwa.

Tobaako KY’OTYA. Musanyuke era mujaguze. Ebiseera bisembedde. Twetegeka okuva mu nnyumba eno ey’ebiwuka, KITIIBWA!!!

Jjangu weetegekere Okuwakkulibwa, wamu naffe Ssande ku ssaawa 6:00 (mukaaga) ez’omuttuntu, mu budde bwe Jeffersonville. (Y’essaawa 1:00 (emu) ey’akawungeezi e Uganda). Toliddamu kuba kyekimu.

Owol. Joseph Branham

Zabbuli 27:1-5

23-0326 Okwegatta Kw’Omugole Wa Kristo Okutalabika

Obubaka: 65-1125 Okwegatta Kw’Omugole Wa Kristo Okutalabika

BranhamTabernacle.org

Omukyala Omulonde omwagalwa,

Kiki kye wandiwaddeyo Mukama waffe Yesu ayingire mu maka go ku Ssande eno, atuule mu ntebe yo, akutunuulire mu maaso ayogere naawe butereevu?
Tewandisobodde kwogera. Tewandiyagadde kwogera. Kye wandyagadde okukola kwe kumutunuulira n’okaaba. Wanditidde n’okwasamya akamwa ko. Kiki kyewandyogedde? Mu birowoozo byo wandibadde olowooza, Mukama, sisaanidde yadde n’akatono Ggwe okubeera wano mu maka gange. Nze asembayo wansi mu ba wansi. Nkulemeredde emirundi mingi nnyo Mukama, naye Mukama, nkwagala nnyo.

Olwo wanditegedde mu mutima gwo, Amanyi kennyini kye ndowooza, tewali kintu kyonna kikwekeddwa okuva gy’Ali. Amanyi ebyama byennyini eby’omutima gwange.

Nga bw’oMutunuulira mu Maaso Ge ag’omuwendo, wandirabye okwagala n’okusaasira okungi ennyo. Yandibadde ayogera naawe awatali na kwasamya kamwa ke. Wandibadde olowooza, Mu butuufu Ali wano, mu maka gange, nange.

Omutima gwo gwanditandise okukukuba n’okusingawo, nga bw’omulaba ng’anaatera okubaako ky’akugamba. Omulundi gumu, Eddoboozi erisinga obuwoomu lyewali owulidde lyandigambye nti, “ .
Swiitimutima wange omwagalwa, teweeraliikirira, erinnya lyo liri mu kitabo ky’Obulamu kyange Eky’Omwana Gw’Endiga. Si ekitabo ekikadde eky’okugattibwa kwo okw’obutonde, wabula Ekitabo kyange ekipya eky’Omugole. Y’ebbaluwa yo ey’obufumbo nange.

Asingira mu Baagalwa, tosonyiyibbwa bibi byo byonna n’okulemererwa kwo byokka, wabula ewange, TOLINA MUSANGO. Mu Maaso Gange, tokolangako kibi kyonna.

Ggwe mwana wange ow’omuwendo, ow’empisa ennungi, atalina kibi. Oyimirira nga oli mulongoofu; Omugole wange atagattiddwamu birala anaaziddwa n’Amazzi g’Omusaayi Gwange Nze Mwene.

Nga tewannabaawo wadde omwezi, emmunyeenye oba akatoofaali k’obutonde akasingayo obutono, wali mutabani Wange era muwala wange. Ggwe kwolesebwa okukwatikako mu mubiri okw’ebikula ebyali mu Nze ku lubereberye.

Ensengekera yo ey’omwoyo yali mu Nze kubanga oli kwolesebwa kwa mpisa zange, ebirowoozo byange. N’okuba wali mu Nze nga ensi tennatondebwawo.

Ggwe Mugole Wange ow’omwoyo abadde agalamidde mu Maaso g’Omwana, nga oyengera, ng’owuliriza Ekigambo kyange. Kati otandise okuba n’okudda obuggya, ng’okomawo n’otereera n’Ekigambo kyange. Oli Mugole Wange Omulonde.

Kati olina obumu obw’omwoyo nange. Omubiri gwo gufuuka Kigambo, n’Ekigambo kifuuka omubiri; ekyoleseddwa ne kikakasibwa. Kye nnakugamba kyennyini nti kijja kubaawo mu lunaku luno, kigenda mu maaso, buli lunaku. Ekigambo nga kifuuka Ekigambo.

Olina Okubikkulirwa okwa nnamaddala okw’olunaku luno olusembayo: okukuŋŋaana kw’Omugole Wange awamu olw’Obubaka Buno. Tewali mulembe mulala gwonna gwe nnakisuubiza. Nakikusuubiza, mu mulembe guno: Malaki 4, Lukka 17:30, Omutukuvu Yokaana 14:12, Yoweri 2:38.

Tugenda kuba n’ekijjulo ky’okwebaza Katonda ku Ssande eno lwe ŋŋenda okubabuulira ebisingawo. Nja kumala essaawa naawe, nga tussa ekimu n’okulya ekijjulo ky’Ekigambo kyange. Nja kubakakasa nate nti nga musigala n’Ekigambo kyange, nnabbi Wange, Eddoboozi lyange, nga Munyiga Zannya, muli mu Kwagala Kwange okutuukiridde.

Nabagamba mu Kigambo kyange, nnyimiridde ku mulyango, era nkonkona. Omuntu yenna bw’awulira EDDOBOOZI lyange, n’aggulawo oluggi, ndiyingira gy’ali, ne ndya wamu naye, naye naye wamu nange. Bangi tebajja kuwuliriza baggulewo oluggi lwabwe, naye olw’Okubikkulirwa, ogguddewo oluggi lwo n’onnyaniriza munda.

Tebakkiriziganya na kuzannya Ddoboozi lyange mu masinzizo gaabwe. Singa baleka bulesi Omwoyo Omutukuvu okukebera ebirowoozo byabwe n’Ekigambo, bandikkirizagannyiza nakyo. Leka Kristo, Ekigambo ekyafukibwako amafuta, akebere omuntu wo ow’omunda. Muleke ayingire mu ggwe, olabe oba nga Ekyo kituufu oba nedda. Nnakugamba nti tekijja kuba kibiina ekinaabagatta awamu, tebasobola na kukkiriziganya ku Kigambo kimu oba bibiri mu Baibuli. Nnakugambako nti kijja kuba kibinja kya basajja? Nedda! Nnakugamba nti Bubaka bwa Musajja OMU; era n’owuliriza n’ogonda.

Olw’okuba tebaagala kuwuliriza na kukkiriza nteekateeka yange nnakabala okuva ku lubereberye, nnabaweereza ababuulizi, abasomesa, abatume, abasumba ne bannabbi. Naye baasindikibwa okusonga abantu OKUDDA ku nteekateeka yange nnakabala era etuukiridde, Malayika wange ow’amaanyi. Kubanga lye Ddoboozi lya Katonda gye muli.

Bafukiddwako amafuta, naye nze nnina OMUBAKA NABBI OMU yekka OKUBAKULEMBERA. OMWOYO OMUTUKUVU YE NABBI. Sikugambye emirundi mingi, EKIGAMBO KYANGE EKYAYOGERWA OKUYITA MU YE TEKYETAAGISA KUVVUUNULWA, TOYOGERAKO OBA TOTOOLAKO KINTU KYONNA KU KYAYOGEDDE, YOGERA BWOGEZI KYEYAYOGERA KU NTAMBI EZO? Oyo ye nnabbi, Omwoyo Omutukuvu nga Abakulembera.

Y’oyo gwe nnatuma okukuyita obeere Omugole Wange. Y’oyo agenda okukwanjula gyeNdi. Y’oyo gwe nnayimirira naye nga mmulaga ekifaananyi nga bw’olifaanana, Omugole Wange. Nnakubuulira byonna ebimukwatako mu Kitabo ky’Okubikkulirwa bweNnagamba nti, Nze Yesu ntumye MALAYIKA WANGE okubategeeza ebintu bino MU MAKANISA MUNDA. Ye NZE, omubiri gwe n’eddoboozi lye nkozesa bikozese okwogera naawe.”

Nga lunaku lwa kitalo nnyo lwe tulimu awamu naye. Tetubangako basanyufu kusingawo oba abamativu okusingawo mu bulamu bwaffe. Kino kye KYO. Kino kye tubadde tulinze obulamu bwaffe bwonna.

Tewali kisiikirize kya kubuusabuusa mu mitima gyaffe oba mu birowoozo byaffe. Kubanga na buli Bubaka bwe tuwulira, Atugamba nti tuli mu Kwagala Kwe okutuukiridde. Waliwo Eddoboozi limu lyokka erijja okubagatta, okubatuukiriza, n’okubaleeta awamu…Nze, NZE NGA NJOGERA NGA MPITA MU NABBI WANGE. SSI BIGAMBO BYE, EBIGAMBO BYANGE. LY’EKKUBO LYANGE LYENTADDEWO.

Emmeeza etegekeddwa bwanjulukufu. Ejjudde emboga, enva endiirwa eza buli langi n’ekikula…KIGAMBO KU KIGAMBO, KU KIGAMBO. Tugenda kuba n’ekijjulo ky’okwebaza Katonda nga bwe kitabangawo. Wagenda kubaawo jubileewo okwetoloola ensi yonna ng’Omugole akuŋŋaana okwetooloola Emmeeza zaabwe okuwuliriza Eddoboozi lya Katonda nga lyogera nabo. Amaka gaffe n’amakanisa gaffe gajja kujjula okubeerawo Kwe. Ebigambo bijja kutubula okuggyako zi Kitiibwa kya Mukama zaffe, zi Aleluuya, ne zi Erinnya Lya Mukama lyebazibwe.

Jjangu obeere ekitundu ku Lukungaana lw’Okwebaza Amaka g’Omugole, nga bw’atuliisa. Tolwawo, kuba tugenda kutandika okugabula ku Ssande, ku ssaawa 6:00 (mukaaga) ez’omuttuntu, mu budde bwe Jeffersonville. (Y’essaawa 1:00 (emu) ey’akawungeezi e Uganda). Ajja kubeerawo, kubanga yaŋŋambye nti ajja kubaawo.

NJIJA era nja kuba mbabuulira byonna ebikwata ku Okwegatta Kw’Omugole Wa Kristo Okutalabika 65-1125.

Tujja kulabagana wali ku Mmeeza.

Owol. Joseph Branham

(Oba Oyinza Okumuyita): Mukyala We Omulonde

23-0319 Okweroboza Omugole

Obubaka: 65-0429E Okweroboza Omugole

BranhamTabernacle.org

Omu Mu Kakadde Omwagalwa,

Nkulindiridde ebbanga ddene nnyo. Ye ggwe swiitimutima wange omwagalwa, era nkwagala nnyo. Nga bwe nakusuubiza, mbadde nkukolera Amaka amaggya mwe tunaabeerera awamu obutaggwawo bwonna. Nkoze buli kimu mu ngeri ddala nga bw’okyagala.

Kati nsobola okukutunuulira ne ndaba, nga ggwe kifaananyi kyaNge kyennyini. Olina empisa zange zennyini, Ennyama yange, Amagumba gange, Omwoyo gwange gwe gumu, Byonna ebyange bye bimu, ddala. Ofuuse omu nange.

Natuma malayika wange ow’amaanyi ku nsi okukuyitayo okuva mu Lusuku Adeni olwa Sitaani. Namutuma asobole okulaga ebirowoozo byange, ebikula byange, n’okubabuulira ku bintu ebigenda okujja. Nakozesa akamwa ke n’eddoboozi lye okubyogera. Oluvannyuma lw’okubyogera, nabileetera okutuukawo, kubanga Eggulu n’ensi biriggwaawo, naye Ekigambo kyange gy’oli tekiriremwa.

Nakimanya nti bw’onoompulira nga Njogera, nga Nkozesa eddoboozi lya malayika Wange, ojja kutegeera munda mu mutima gwo, nti oyo teyali ye, yali Nze nga njogera naawe. Yali Nze nga nkuweereza akabaluwa k’omukwano, nga nkugamba nti, Nkulonze okubeera Omugole wange swiitimutima.

Mu maaso gange, tewali alinga ggwe. Mpaawo asobola kutwala kifo kyo. Osigadde nga oli wa mazima era omwesigwa gyendi. Bwe nkutunuulira, Omutima gwange guyakaayakana olw’essanyu.

Bwennakugamba, nti wegendereze nnyo swiitimutima, by’owuliriza, walibaawo abaafukibwako amafuta bangi abakozesa Ebigambo byange, naye ba bulimba. Wategeera okulabula kwange olw’Okubikkulirwa era n’osigala nga oli wa mazima era owesigwa eri Eddoboozi lyange.

Nakwenyumirizaamu nnyo bwe wasaba n’obunyiikivu okumanya kkanisa ki gy’okuŋŋaana nayo. Nakugamba okukola okusalawo okutuufu, era ne nkuwa ebyokulabirako eby’ekkanisa etuukiridde bw’eba. Wajjukira bwe nnagamba nti gonna gaba n’emyoyo egigatambulirako, era n’olonda ekkanisa etuukiridde.

Natuuka n’okukugamba nti weegendereze nnyo omusumba wo y’ani. Kale oyinza okuteebereza engeri omutima gwange gye gwabugaana essanyu bwe nnalaba ng’osigadde n’omusumba gwe nnatuma okukuleeta gyendi. Wamanya nti Mwoyo Wange Omutukuvu ye yasiisira mu nnabbi Wange okukukulembera okukuleeta gyendi.

Nzijukira olunaku lwe wali omusanyufu ennyo, era omucamufu ennyo, bwe nnayita malayika wange ne mwambusa mu kifo ekigulumivu nsobole okumulaga ka jjalibu nga bw’olifaanana. Twali tuyimiridde awo nga tukutunuulira nga bw’otambulira ku mudigido gw’oluyimba lwa Abalwanyi Ba Yesu Mwesibe Enkoba mu maaso gaffe.

Yayagala nnyo engeri mwenna gyemwali mwambaziddwa mu ngoye zammwe ez’eggwanga gye muva; nga Switzerland, Bugirimaani, n’okuva mu nsi yonna. Buli omu mu nviiri zammwe empanvu ezaali zitereezeddwa bulungi bitya. Sikaati zammwe zaali zituuka wansi buyonjo ddala. Nakyenyumirizaamu nnyo era nnali musanyufu nnyo okubalagayo mwenna gy’ali, asobole okuddayo abazzeemu amaanyi era abagambe nti yabalabayo Eyo.

Buli liiso lyali lyekaliriza Ffe. Obuwala obumu, emabega mu layini, bwe bwatandika okulobera ku bifo ebyetoolodde, yaleekaana nti, “Tokola otyo! Tokyamya nkumba ya bigere byo!”

Bwe nnakugamba nti nnali ntereka emmere gy’onoolyangako, wamanya kyennyini kyennali njogerako. Wayagala okubeera Omugole Embeerera Kigambo-Kirongoofu Wange. Sikukwatangako ng’opepeya n’omuntu omulala yenna. Bulijjo abaddenga Nze, Ekigambo kyange. Ekyo kyansanyusa nnyo.

Nkulonze, GGWE, okubeera Omugole Wange. Nze nkwagala nnyo, era nga naawe bw’onjagala. Toggwaamu maanyi, ddamu amaanyi, beera musanyufu, sanyuka, olunaku lusembera mangu lwenjijirako okukucima. Nga kinaaba kiseera kya kitalo kye Tunaaba nakyo.

Eri mmwe abasigadde, MWENENYE, ensi eri mu kubejjagala. Olunaku lumu Los Angeles ejja kuba egalamidde wansi mu ssemayanja, ddala nga bwe Nnabagamba nti bwe kiriba. Obusungu bwange bubejjagalira wansi waayo wennyini. Sijja kweyongerayo bbanga ggwanvu nga nkwatiridde ettundutundu ly’omusenyu gw’oku lubalama eryo kw’atudde. Ojja kuseerera obbire mu ssemayanja mu buziba bwa mayiro emu, kyabugazi nga bw’oli ppaka mu ssemayanja Salton. Kijja kuyitirira obubi n’okusinga ku kyaliwo ku jjuuzi wano mu Pompeii.

Ngenda kulongoosa ensi eno n’omuliro mu bbanga ttono. Nja kutta buli kimu ekigiriko n’ekiri wansi waayo. Olaba ebigenda mu maaso okwetoloola ensi yonna, ddala nga bwe Nnakugamba. Olaba Omugole Wange nga yeegattira wamu ku Kigambo kyange, ddala nga bwe Nnakugamba.

Kaakano kye kiseera. Zino z’entuuko. Weetegeke!

Essaawa y’obusungu bwe ku nsi eno ebaze. Dduka nga obudde bw’okuddukiramu bukyaliwo, era ojje mu Kristo.

____________________________________

Muyitibwa okujja okutwegattako, ekitundu ky’Omugole We, nga bwe twetegekera Okujja kwe, okuyita mu kuwulira Eddoboozi lya Katonda nga lyogera naffe era nga lituleetera Obubaka: Okweroboza Omugole 65-0429E Ssande eno ku ssaawa 6:00 (mukaaga) ez’omuttuntu, mu budde bwe Jeffersonville. (Y’essaawa 1:00 (emu) ey’akawungeezi e Uganda).

Owol. Joseph Branham

Olubereberye 24:12-14
Isaaya 53:2
Okubikkulirwa 21:9

23-0312 Amaka Agajja Ag’Omugole Omusajja Ow’Omu Ggulu N’Omugole Omukazi Ow’Oku Nsi

Obubaka: 64-0802 Amaka Agajja Ag’Omugole Omusajja Ow’Omu Ggulu N’Omugole Omukazi Ow’Oku Nsi

PDF

BranhamTabernacle.org

Omugole Omukazi ow’okunsi Omwagalwa,

Malaki 4 Kigambo kya Katonda, era Kizadde ebikifaanana, FFE, Omugole we. Ye Mwoyo Omutukuvu, Omuntu Yesu Kristo, mu bikolwa, nga Anywezeddwa mu mitima gyaffe. Tuzuukizibbwa eri BULI Kigambo kye yayogera, kubanga “Endiga zange ziwulira Eddoboozi lyange; omugenyi tezimugoberera.”

Nga emyezi gino egisembyeyo gibadde gya kitalo, nga tugoberera nnabbi mu Jeffersonville. Katonda abadde ayogera ng’ayita mu malayika we ow’amaanyi era ng’atuliisa Emmere ye gye yatereka okuva mu TTEREKERERO LYE ETTONO ERIMU bweriti mu ggwanga lyonna. Ye Maanu Enkusike, ya Mugole We yekka.

Na buli Bubaka bwe tuwulira, tussa kimu era ne tusanyuka ne bannaffe; “Nkimanyi nti Obubaka buno mbuwulidde emirundi mingi nnyo emabegako, naye SIBUWULIRANGAKO nga kati”. Mazima ddala nsulo ya Mazzi Amalamu ebululira munda mu ffe. Kumpi tetusobola kwefuga. Kye kyokka kye twagala okwogerako. Tetubangako bakakafu okusingawo mu bulamu bwaffe, ku kiki kye tuli na wa gye tulaga.

Tewakyali kwebuuza nti:
“Simanyi na kumanya. Nkoze ebintu bingi nnyo eby’ettabbu mu bulamu bwange. Mukama muremeredde emirundi mingi nnyo. Kirabika bu kiseera nvuya.”

Tewakyali kusuubira:
“Nsuubira ddala nti ndi mwana wa Katonda. NJAGALA okubeera. Nsaba mbe nga ndi.”

Ennaku ezo ZONNA ziweddeko. Kati TUMANYI. Ekitiibwa kya Katonda!!

Tumanya tutya? Katonda abadde ayogera naffe butereevu n’Eddoboozi lye ku ntambi, ng’atugamba emirundi n’emirundi nti, “Ndi mu mmwe, muli mu Nze. Tuli muntu omu. Nabalonda nga ensi tennatandikibwawo. Muli nnyama ya Nnyama Yange, eggumba ly’Eggumba lyange”.

Nga Bubaka butuukirivu nnyo Katonda bwe yatuwadde ku Ssande okutubuulira byonna ku ngeri ensi eno gye tulimu gy’etali yaffe, lusuku Adeni olwa Setaani. Engeri gye yalimbalimba Kaawa ku lubereberye okussa obubuuza n’okubuusabuusa EKIGAMBO KIMU kyokka. Yeeyambulako olutimbe lwa Katonda olutukuvu, n’ayambala olutimbe lw’okumanya, olwo amaaso ge ne gazibuka n’amanya nti yali bukunya.

Sitaani yakyamya Ekigambo nnakabala, era kati amuzibye amaaso okutuusa nti akyali bukunya so takimanyi. Afuuse nnaabakyala wa Sitaani era ensi eno bwe bwakabaka Adeni bwe.

Ssande, Omugole omusajja waffe ow’omu Ggulu ayagala okujjukiza Omugole omukazi we ow’oku nsi Amaka gaffe agajja gye gali ne bwe bwegalifaanana. “Swiitimutima omwagalwa, kati nga bwe nkubuulidde byonna ebikwata ku nsi eno n’engeri gyeri Olusuku Adeni olwa Sitaani, njagala okukubuulira OMULUNDI GUMU NATE ku Maka GO Agajja wamu nange.

Njagala nkubuulire mu bulambulukufu ennyo. Nkimanyi nti ompulidde nga nkikubuulirako emirundi mingi, naye lindako, ku mulundi guno kigenda kuba nga atampulirangako nga nkubuulira.

Njagala nkigende mu buziba. Njagala nkubikkulire nti oli mu Kwagala kwange okutuukiridde nga osigala n’Ekigambo kyange ne nnabbi Wange. Njagala nkuwe eky’okulabirako eky’ekyo ky’oli mu kukola leero nga eky’okulabirako ekituukiridde eky’Ekibuga ekiggya ky’ogenda okubeeramu.

Ddala tugenda kubaako kyetuyingiramu. Nja kubaako ne kyembasuulirayo ekitonotono; Nkimanyi nti mujja Kukikwata. Mujja kubeeranga mu Kibuga ekyo nange. Nabbi wange ajja kubabeeranga awo ku muliraano. Ajja kuba muliraanwa wammwe. Mujja kutambulira mu nguudo ezo eza zaabu munywe ne ku Nsulo Yange. Mulitambulanga okuyingira ensuku za Katonda, nga Bamalayika babawambatidde waggulu nga bayimba ennyimba ez’okutendereza.

Mmwe mujja okuba amayinja ag’omuwendo mu ngule ya nnabbi Wange. Mulitangaalijja okukira buli kimu mu nsi, ku lunaku olwo. Nnina bingi nnyo bye njagala okubabikkulira ku Ssande. Nga lunaaba lunaku lwa kitalo nnyo lwe tunaabeeramu nga tuli wamu”.

Alina bingi nnyo by’atutegekedde mu sabbiiti ezijja entonotono, bw’atajje kutujjawo nga tetunnatuukayo. Sabbiiti ku sabbiiti, nga Atubuulira, ki kye tuli, wa gye tugenda, na ngeri ki gyewanaafaananamu ebusukka eyo. Ajja kuba atukulembera okutuuka mu sabbiiti ya Paasika esinga okuba ey’ekitiibwa gye twali tubadde nayo, ng’ejjudde si kirala kirala kyonna wabula okumutendereza n’okumusinza.

Nga kiseera kya ssanyu. Tulaba obunnabbi nga butuukirira mu maaso gaffe. Tulaba Ekigambo nga kyolesebwa MU FFE. Okujja kwe kwandibaawo akaseera konna. Tuyimiridde ku mulyango nga n’ekimuli kituli mu ngalo. Embalaasi tuziwulira nga zitolontoka emisinde n’omusenyu nga gwekulukuunyiza wansi w’empanka.

Ekigaali ki magulu ana kiri ekikadde ekivugibwa embalaasi kigenda kuyimirizibwa mu bbanga mpaawo kaaga. Tugenda kubuuka tufulumire mu mulyango gw’omubiri guno omukadde tubuukire mu bbanga tugwe mu mikono gye. Ajja kututunuulira Agambe nti, “Byonna biwedde kati, mubissi gwanjuki wange, ka nkutwale kati mu Maka go Amajja.”

Oyanirizibwa okubeera ekitundu ku nnaku ezisinga obukulu ensi zeyali erabye. Obuwungu obuto bugenda kukuŋŋaana okuva mu nsi yonna okuwulira Eddoboozi lya Katonda nga Lyogera n’Omugole We okumubuulira byonna ebikwata ku: Amaka Agajja Ag’Omugole Omusajja Ow’Omu Gggulu N’Omugole Omukazi Ow’okunsi 64-0802, ku ssaawa 6:00 (mukaaga) ez’omuttuntu, mu budde bwe Jeffersonville. (Y’essaawa 1:00 (emu) ey’akawungeezi e Uganda).

Owol. Joseph Branham

Jjukira kino: Temwerabira nti Obudde bw’emisana mu Amerika bwesazeeko essaawa emu.

Ebyawandiikibwa by’olina okusoma nga tonnawulira Bubaka:
Omut. Matayo 19:28
Omut. Yokaana 14: 1-3
Abeefeso 1:10
2 Peetero 2:5-6 / Essuula eyokusatu
Okubikkulirwa 2:7 / 6:14 / 21:1-14
Eby’Abaleevi 23:36
Isaaya Essuula ey’okuna / 28:10 / 65:17-25
Malaki 3:6

23-0305 Edeni Ya Setaani

Obubaka: 65-0829 Edeni Ya Setaani

BranhamTabernacle.org

Abaana Bange Abaagalwa,

Muli kikula kyange, Nze Kitammwe ow’omu Ggulu. Mwali mu Nze okuva ku lubereberye. Temukijjukira kati, naye mwaliyo eyo nange. Kale nnayaayaananga okubamanya kuba nali njagala okubakwatako, Njogere nammwe, Mbaagale, era mbasikeko mu mikono.

Nga omwana wange, oli kitundu ku nze, ekyafuuka omubiri, nga nange bwe nnafuuka omubiri, bwe tutyo tusobole okuba n’okussa ekimu ekimu buli omu ne munne nga ab’enju ya Katonda ku nsi. Ekyo kye kyali ekigendererwa kyange era kye nnali njagala okuva ku lubereberye.

Nakukolera Olusuku Adeni tusobole okussa ekimu, naye omulabe Wange n’asensera n’obulimba, ne yeddiza ensi eno okuyita mu kukuvvuunulira obubi pulogulaamu Yange.

Ekiseera ky’olimu kiseera kya kuliirwamu olukwe, naye era kye kiseera ekisinga okuba eky’ekitiibwa mu mirembe gyonna, kubanga kati oyolekedde Emyaka Olukumi emikulu nate; ozzeemu okwolekera Adeni.

Omwoyo wange si kintu ekikusomesebwa okukuyingiramu. Kye kintu kye nnategekerawo okukuyingiramu olw’okumnya kwange okwasooka olw’Omukono gwange ogw’amaanyi. Kati okuyita kwange okusembayo kugenda mu maaso okukwata Omugole Wange; “Mubafulumemu, mweyawule”.

Leero tebagezaako kunyweza Kigambo kyange mu mitima gy’abantu, bagezaako kwenywezaayo. Amakanisa gagezaako kusimba njigiriza zaago mu mutima gw’omuntu. Buli omu mbu, “Nze nnakola kino. Nze, nze, ebyange, eddiini yange, nze, kino.” Be bali mu kwessaawo so si Kigambo kyange ekyayogerwa okuyita mu nnabbi wange.

Tekikwetaagisa kutegeera buli kye njogera, olina bubeezi kukikkiriza kubanga kyekyo kye nnayogera, era ekyo kimala eggobe mu kibya lubeerera.

Omwoyo wange Omutukuvu ali mu kukolera mu ggwe. Bulamu obuli mu ggwe, so si nneewulira; si kika kya bujulizi obw’omubiri obw’engeri emu, naye Ye Muntu, NZE, Yesu Kristo, Ekigambo kya Katonda, nga kinywezeddwa mu mutima gwo, era kireetera buli Kigambo eky’omulembe guno okuba ekiramu. Y’Omwoyo Wange Omutukuvu nga Akolera mu ggwe okusinziira ku Kigambo.

Omugole wange eyasooka yalemererwa olw’okuba yawuliriza okuteesa kwa Sitaani, naye nkwenunulidde nze Mwene, nga kye Kigambo ekyafuuka omubiri. TOJJA KUNJIWA. Ggwe Mugole Kigambo Wange embeerera atajja kuwuliriza kuteesa kwa Sitaani. Ojja kusigala n’Ekigambo kyange.

Emyaka Olukumi nga giweddeko, walibaawo Adeni nate; Obwakabaka bwange obunene bujja kuzzibwawo. Nalwanyisa Sitaani mu lusuku Gesusemane, ne mpangula ne nneddiza Adeni, olusuku lwange. Kati ŋŋenze okubateekerateekera Adeni yammwe Empya mu Ggulu. Nja kuba mbacima mu bbanga ttono nnyo, n’olwekyo emitima gyammwe tegyeraliikiriranga.

Nga tewakyali nnyanja; nga eggulu erisooka n’ensi eyasooka
biweddewo. Nja kugiddaabiriza n’okubatiza kw’Omuliro okujja okutta buli buwuka, buli bulwadde, buli ndwadde, obucaafu bwonna obwali bubadde ku nsi.

Eritutunukayo, eveeyo nga Nsi Mpya. Eggulu lino eryasooka, n’ensi eno eyasooka, bijja kuba bivuddewo. Wajja kubaawo Yerusaalemi Empya ekka okuva mu Nze okuva mu Ggulu. Omwo mwendibeera nammwe, enkula zange entuufu, Batabani bange ne bawala bange. Tulissiza kimu mu butukuvu, nga amaaso
gammwe gazibiddwa obutalaba kibi kyonna.

Nkomyewo nate gye muli nga bwe nnabasuubiza nti bwendikola. Nkuumye Ekigambo kyange gyemuli. Nsiimye Ekigambo kyange okukwatibwa ku ntambi za magineeti bwekityo waleme kubaawo butategeeragana, mpaawo kubuusabuusa, wabula Ekigambo kyange ekirongoofu kulwammwe; kubanga Kiri Bw’atyo Bw’Ayogera Mukama.

Mukuume emitima gyammwe nga mirongoofu. Mukuume emitima gyammwe nga gibikkiddwako. Amaaso gammwe mugakuume nga gabikkiddwako obutalaba bintu by’ensi okufuuka omuntu ow’ettutumu.

Temwerabira, nja kukyukira ebugwanjuba nziremu nkomewo, olumu ku nnaku zino. Okutuusa mu kaseera ako, Twalanga Erinnya lyange; Lijja kukuwa essanyu era likugumye, Litwalenga, wonna w’olaga, ng’onyiga zannya.

Tewekkiriranya na Kigambo kimu. Ekigambo kyange ku lutambi tekyetaaga kuvvuunula. Oli kitundu ku Nze, enkula Yange. Ensi eno lusuku Adeni olwa Sitaani, naye nkukoledde Adeni Empya mwe tunaamala obutaggwawo nga tuli wamu. Okutuusa mu kaseera ako, mwekuŋŋaanyize ku Kigambo kyange. Mwagalanenga.

Mujja mubeegatteko ku Branham Tabanako Ssande eno ku ssaawa 6:00 (mukaaga) ez’omuttuntu, mu budde bwe Jeffersonville. (Z’essaawa 2:00 (bbiri) ez’ekiro e Uganda), era muMpulire nga njogera nga mpita mu nnabbi Wange omulonde era mbikkule Ekigambo kyange nga bwe muwulira; Olusuku Adeni olwa Sitaani 65-0829.

Ku lulwE,
Owol. Joseph Branham

Ebyawandiikibwa by’olina okusoma:
2 Timoseewo 3:1-9
Okubikkulirwa 3:14
2 Abasessaloniika 2:1-4
Isaaya 14:12-14
Matayo 24:24

23-0226 Akasengejja K’omuntu Alowooza

Obubaka: 65-0822E Akasengejja K’omuntu Alowooza

BranhamTabernacle.org

Ekibiina ky’Ow’oluganda Branham Abaagalwa,

Nnandyagadde okwaniriza ensi okutwegattako ku mukutu Ssande eno ku ssaawa 6:00 (mukaaga) ez’akawungeezi, mu budde bwe Jeffersonville. (Z’essaawa 2:00 (bbiri) ez’ekiro e Uganda), nga ffe Empungu tukuŋŋaanira awamu mu emu ku kkanisa za nnabbi buli square mayiro ebikumi bibiri. Tujja kuwulira Katonda ng’Ayogera ng’Ayita mu mubaka malayika We ow’omusanvu era atubuulire nti:

Obubaka buno, n’Obubaka obulala bwonna bwe njogerako, busindikibwa eri ekibiina kyange. Si bwa kibiina kyo okuggyako nga baagala okubufuna. Naye busindikibwa eri abantu bano wano.

Ayogera naffe, EKITIIBWA, ekibiina kye. Si mmwe abagamba nti, “Ow’oluganda Branham ye nnabbi, naye si ye musumba wange. Omusumba waffe agamba nti okuzannya entambi mu kkanisa tekikwatagana na Kigambo kya leero.” “Omusumba waffe atugamba nti tulina kuwuliriza ye. Okusinziira ku Kigambo, atukulembera nga akozesa Omwoyo Omutukuvu kati.”

Nabbi yakugamba, ggwe n’omusumba wo.

Eri abaweereza bonna mu kifo kyonna, essaawa yonna, kino tekyogerwa obutassaamu kitiibwa njigiriza zammwe, kino n’okuba tekitunuuliziddwa eri ndiga zammwe.

Tetwagala kubateganya ab’oluganda ne bannyinaze. Tukitegeera, Tekitunuuliziddwa eri mmwe, wabula eri ffe, abakkiriza nti Omwoyo Omutukuvu ataddewo omubaka malayika we ow’omusanvu okubeera omusumba waffe n’okutukulembera, ffe ekkanisa Ye. Tukkiriza nti okuzannya entambi LY’EKKUBO LYOKKA ETTUUFU. Oli mutuufu mu kukola ekyo nnabbi wo yakugamba GGWE okukola:

Era bulijjo mbajuliza, bwe baba nga ba mmemba b’ekkanisa emu, nti “Laba omusumba wo.”

Olina okukola nga omusumba wo bw’agamba.

Olwo nnabbi n’agamba omusumba wo omulundi omulala, okukakasiza ddala nti akitegeera.

Kati, omusumba, njagala okimanye nti, nti, kino kiri eri kibiina kyange kyokka kye ŋŋamba ebintu bino. Era nnina eddembe okukola ekyo, kubanga nateekebwawo Omwoyo Omutukuvu okukuuma endiga zino.

Atumiddwa okutukuuma, endiga ze; abo Katonda b’Atadde mu BULABIRIZI BWE. Omwoyo Omutukuvu ye musumba waffe nga bw’Ayogera naffe era nga atukulembera buli lunaku n’Eddoboozi lye eryakakasibwa.

Kino Mukama ky’atukulembera okukola. Tetukuwakanya ggwe oba omusumba wo, oba engeri gy’owulira ng’okulembeddwamu Mukama okukola. Buli muntu alina okukola nga bw’awulira nti Mukama bw’Amukulembera okukola okusinziira ku Kigambo.

Tulina akasengejja kamu, OBUBAKA BUNO. Buli kye tuwulira kirina okuyita mu kasengejja ako. Eddoboozi lye tuwulira ku ntambi lye ddoboozi lyokka lye tulina obwesige kikumi ku kikumi okubeera Bwatyo Bw’Ayogera Mukama.

Okkiriza nti okufukibwako amafuta okwo okuli ku bantu abo kitegeeza nti kwe kufukibwako amafuta kw’Omwoyo Omutukuvu?” Yee, ssebo, Omwoyo Omutukuvu wa Katonda owa nnamaddala ku muntu, kyokka ate nga omuntu oyo wa bulimba.

Enkomekkerero yaffe ey’olubeerera esinziira ku bye YAYOGERA KU LUTAMBI, so si omusajja omulala yenna oba ekibinja ky’abasajja kye boogera. Bwe tutyo, tetusobola, era tetujja kuwulira mulala yenna. Omuntu yenna ayinza atya okukizannyiramu zzaala?

Mujje mwekuŋŋaanyize wamu naffe n’okusingawo ennyo nga bwe mulaba olunaku nga lusembera.

Abantu basobola okutuula ntende mu maka gaabwe oba mu…ne bakuŋŋaanira mu bifo byabwe, mu makanisa gaabwe, n’ebirala, ne bawulira ssaaviisi.

Ekyo, bannange, okusinziira ku nnabbi wa Katonda, si okusinziira ku kuvvuunula kwa muntu omu ku Baibuli by’eyogera, kwe kwekuŋŋaanyiza awamu ku Kigambo n’okusingawo ennyo nga bwe tulaba olunaku nga lusembera.

Essanduuko omutali Katonda eba egasa ki? Kiba kisanduuko busanduuko eky’embaawo, emmeeza bbiri ez’amayinja.

Jjangu okuŋŋaane naffe nga bwetuwuliriza akasengejja Katonda ke yatuwa, nga bw’Atuleetera Obubaka: Akasengejja K’Omuntu Alowooza 65-0822E.

Owol. Joseph Branham

Kebera ky’olwanirira. Kebera ekikubeezezza wano. Kebera ekikutwala mu kkanisa. Ekikufuula…Kirungi okugenda mu kkanisa, naye togenda bugenzi ku kkanisa kyokka; ekyo tekijja kukulokola.