Ibimenyeshejwe Ibimenyeshejwe ku bijanye n’ugusobanura mu zindi ndimi bikorerwa muri Branham Tabernacle
Mukunzi Jambo Ryihaye umubiri,
Haleluya! Isi ibibwe y’umutima wacu yarateguwe n’ukwumviriza Ijambo kandi Ryaduhishuriye, ko TURI Umugeni wa Kristo w’ingeso nziza; Umwana w’Imana w’agaciro, atagira icaha, w’ingeso nziza, ahagaze hamwe n’Umugeni Jambo ryiza, ata gasembwa, Yogejwe n’Amazi y’Amaraso YiWe Bwite.
Twacitse Ijambo Ryagaragaye Ryihaye umubiri, kugira ngo Yesu Ashobore kudutwara, abo yari Yatoranije imbere y’uko isi iremwa, mu gikiriza ca Data.
Isi irashobora kubona ukugaragara k’Ukwizera kwacu mu buryo twigenza, no kugaragaza ko twaronse Uguhishurirwa kw’ukuri kuva ku Mana kw’Ijambo RyaYo Ryemejwe, kandi ko tutagira ubwoba. Ntitwitaho ivyo isi yose ivuga canke yizera…NTA BWOBA DUFISE. Gufyonda tukavuza ni inzira Imana Yatanze ku Mugeni wa Yesu Kristo.
Hari benshi bavuga ko bizera ubu Butumwa bw’igihe c’iherezo, bizera ko Imana Yarungitse umuvugishwa, bizera ko William Marrion Branham yari intumwa mumarayika w’indwi, bizera ko yavuze Uko Niko Uhoraho Agize, ariko NTIBIZERA ko Ijwi ari ryo jwi rihambaye kuruta ayandi yose utegerezwa kwumviriza. Ntibizera ko yavuze Amajambo y’ukutihenda. Ntibizera ivyo kuvuza ama bande mu mashengero yabo.
None ivyo bisigura iki? BISIGURA KO BITABAHISHURIWE!
Ni uguhishurirwa. Yabibahishuriye ku bw’ubuntu bwiwe. Nta na kimwe wakoze. Ntiwakoze ubwawe kugira ngo ushike mu kwizera. Namba warigeze kugira ukwizera, waguhawe n’ubuntu bw’Imana. Kandi Imana Yarabiguhishuriye, rero ukwizera ni uguhishurirwa. Kandi Ishengero Ry’Imana Ryose Ryubatswe ku guhishurirwa.
Kubera UKWIZERA twahishuriwe ko ubu Butumwa ari Ijwi ry’Imana Ryafashwe amajwi ku ma bande, kandi Ryabitswe, kugira ngo Rigaburire kandi Rishitse ku gutungana Umugeni wa Yesu Kristo.
Ni UKWIZERA kw’inkomoko, kutavanze muvyo Imana Yavuze ko ari Ukuri. Kandi Kwashinzwe mu mutima wacu no mu bugingo bwacu kandi nta na kimwe kizoKunyiganyiza. Kuzoguma aho nyene gushika umuvugishwa waYo atwerekanye k’Umwami Wacu.
Ntidushobora kwifasha. Yaduteguriye kwakira no kwizera Ivyo imbere y’ukuremwa kw’isi. Yari azi ko twokwakiriye Ijwi RyaYo muri iki gihe. Yaratumenye imbere y’igihe kandi Yatugeneye kuvyakira.
Hanyuma, ibikorwa Mpwemu Yera Ariko Arakora uno munsi, biciye muri ayo mayerekwa atigera yihenda, amasezerano atigera yihenda, ibimenyetso vyose vy’intumwa vyasezeranywe muri Bibiliya, vya Malaki 4, kandi, na, yooo, Ivyahishuriwe Yohana 10:7, ivyo vyose biriko birashika: kandi vyemejwe n’ubumenyi, mu bundi buryo bwose. Kandi iyo ntababwira Ukuri, ivyo bintu ntivyobaye. Ariko nimba nababwiye Ukuri, birashinga intahe ko nababwiye Ukuri. Aracari Wawundi, ejo, uno munsi, n’ibihe bidashira, kandi ukugaragara kwa Mpwemu WaYo kuriko kunyakura Umugeni. Reka ukwo kwizera, uguhishurirwa kugwe mu mutima wawe, ko, “Iki ari co gihe.”
Iki ni co gihe. Ubu ni bwo Butumwa. Iri ni Ijwi ry’Imana rihamagara Umugeni Wa Yesu Kristo. Yooo, Shengero, ese Umwami Yotegura isi ibibwe y’umutima wawe kugira ngo ugire Ukwizera kandi Aguhishurire ko kwumviriza iri Jwi, ku ma bande, ari vyo bizotunganya kandi bihuze Umugeni wa Yesu Kristo.
Ndasubiye kubatumira kuza kwifatanya natwe ku munsi w’iyinga isaha zitandatu ku mutaga kw’isaha ya Jeffersonville (isaha icumi na zibiri ku mugoroba kw’isaha yo mu Burundi), kugira ngo utware UKWIZERA kwawe mu mbuga zo hejuru, kandi wicarane natwe ahantu ho mw’ijuru mu gihe twumviriza Ijwi ry’Imana Ridutegurira ukuza kwiWe kwa vuba.
MweneData Joseph Branham.
Turabasavye mudusengere kubw’iyinga riza mu gihe tuzotangura ikambi yacu ya mbere ya Still Waters.
Ubutumwa : Ibikorwa Ni Ukwizera Kugaragajwe 65-1126
Ivyo bitugira akaremangingo kiWe gatoyi kari karatoranijwe. Turi Ijambo kw’Ijambo, kw’Ijambo, kw’Ijambo, kw’Ijambo, kandi turiko dushika mu gihagararo cuzuye ca Kristo kugira ngo Aze kuturondera ngo tube Umugeni WiWe.
Ni igiki kiriko kiraba UBU?
Ni Ubumwe Butaboneka Bw’Umugeni Wa Kristo Bukoranira hamwe kw’Ijambo, Buva kw’isi yose.
Ivyo bica mu gihugu cose. I New York, ubu ni isaha zitanu n’iminota mirongo ibiri n’itanu. Hariya hejuru i Filadelufiya na hirya no hino biciye hariya, abo bera bakundwa bicaye hariya bumviriza, ubu nyene, mu mashengero hirya no hino. Hariya hejuru, hepfo hirya no hino muri Mexique, hariya hejuru hirya no hino muri Canada no hirya no hino yose, hakurya. Ibirometero amajana atatu, aho ari ho hose mu mugabane wa Amerika y’Uburaruko hano, hafi, abantu bari kuri vyo, bariko barumviriza ubu nyene. Ibihumbi n’ibihumbagiza, bumviriza.
Kandi ubwo ni Ubutumwa bwanje kuri mwebwe, Shengero, mwebwe mugize ubumwe, ubumwe bwa mpwemu biciye mw’Ijambo.
Yavuze ko bwari ubumwe bwo muri mpwemu bwa Kristo n’Ishengero Ryiwe, kandi buriko buraba UBU NYENE. Umubiri uriko urahinduka Ijambo, kandi Ijambo ririko Rirahinduka umubiri. Turagaragazwa, kandi turatsindwa; ivyo nyene Bibiliya Yavuze ko vyoshika muri iki gihe, kandi Biriko biraba ubu, umunsi ku munsi muri umwe wese muri twebwe.
Kandi ubwo ni Ubutumwa bwanje kuri mwebwe, Shengero, mwebwe mugize ubumwe, ubumwe bwa mpwemu biciye mw’Ijambo.
Imana igiye kugira Ishengero ry’ingeso nziza. Umugeni Jambo Wiwe w’ukuri, w’umwizigirwa. TURI UMUPFASONI YATORANIJWE w’Umwami wacu Yesu Kristo.
Ni Igihe ki, ga Mugenzi?
Twararonse uguhishurirwa muri iyi misi ya nyuma, kw’Ubutumwa bw’Umwami Imana bwo gukoraniriza hamwe Umugeni WiWe. Nta kindi gihe vyari vyarasezeraniwe. Vyasezeranywe muri iki gihe: Malaki 4, Luka 17:30, Uwera Yohana 14:12, Yoweli 2:38. Ayo masezerano ni nk’uko nyene Yohana Umubatizi yimenyekanishije mu Vyanditswe.
Mbega igihe c’ubwiza Umugeni ariko aragira. Ikoraniro ryose rigenda rirushiriza kuba rininiya kandi rirushiriza kuryoha. Nta gihe nk’iki cari bwigere kibaho. Ugukekeranya kwose kwarazimanganye.
Nimuze mwifatanye natwe mu gihe twumviriza Ijambo ry’isezerano ry’igihe cacu Rivuga, kandi Ritubwira abo turi bo n’ibiriko biraba mu gihe cacu. Ubumwe Butaboneka bw’Umugeni Wa Kristo 65-1125.
Igihe Isirayeli yava muri Egiputa ija mu gihugu c’isezerano, mu Kuvayo 13:21, Imana Yari Izi ko batigeze bagenda muri iyo nzira mbere. Hari ibirometero mirongo itandatu na bitanu gusa, ariko naho vyari ukwo bari bakeneye ikintu co kujana na bo. Botaye inzira yabo. Ni co gituma Yo Imana Yabarungikiye Umurongozi. Kuvayo 13:21, ikintu nk’iki, “Ndarungitse Umumarayika Wanje imbere yanyu, Inkingi y’Umuriro, kugira ngo Ibazigame mu nzira,” kugira ngo Abayobore muri iki gihugu c’isezerano. Kandi abana b’Isirayeli bakurikiye uwo Murongozi, Inkingi y’Umuriro (ijoro), Igicu ku murango. Igihe Yahagarara, na bo barahagarara. Igihe Yagenda, na bo baragenda. Kandi amaze kubashikana hafi y’igihugu, kandi batari babereye kujabuka, Yongeye kubasubiza mu bugaragwa.
Yavuze ko ari ryo shengero ry’uyu musi. Twari kuba twamaze kugenda iyo twikosora gusa tukaja mu rutonde, ariko Yategerejwe kutuyobora hirya no hino no hirya no hino.
Igihe Mose yakurwa ku rubuga, Yosuwa yashinzwe kurongora abantu mu kuzigama Amajambo Mose yavuze imbere yabo. Yababwiye kwizera no kugumana n’Ijambo Ryose umurongozi w’Imana avuga.
Yosuwa yama asoma ivyo Mose yanditse Ijambo ku Rindi mu mizingo. Yashize Ijambo imbere yabo iminsi yose. Ijambo ry’iki gihe cacu Ntiryanditswe, ariko Ryafashwe mw’ijwi kugira Mpwemu Yera Ashobore gutuma Umugeni WiWe Yumva Ijambo kw’Ijambo ivyo Yavuze, mu Guyonda Akavuza.
Imana Ntiyigera Ihindura gahunda yaYo. Ni Yo Murongozi wacu. Ijwi RyaYo ni Ryo Ririko Rirarongora kandi Rihuza Umugeni WiWe uno munsi. Turashaka gusa kwumviriza Ijwi ry’Umurongozi wacu mu gihe Riturongora n’Inkingi y’Umuriro. Ni ubumwe butaboneka bw’Umugeni wa Kristo. Turazi Ijwi RyiWe.
Iyo umurongozi wacu ashitse kuri alutari, afatwa na Mpwemu Yera kandi ntaba akiri we, ahubwo ni Umurongozi wacu. Arangamiza umutwe hejuru mu kirere, asemerera ati: «Uko ni ko Uhoraho Agize, Uko ni ko Uhoraho Agize, Uko ni ko Uhoraho Agize !» Kandi uwugize Umugeni wa Kristo wese kw’isi yose aza kuri we nyene. Kubera iki? TURAZI UMURONGOZI WACU NEZA UKO AVUGA.
Umurongozi wacu = Ijambo Ijambo = Riza ku muvugishwa. Umuvugishwa = Umusobanuzi w’Imana wenyene; Umurongozi waYo wo kw’isi.
Namba udashaka kuzimira, n’uze wumvirize Umurongozi wacu mugihe Avuga biciye ku murongozi wiwe yashinzwe wo kw’isi kuri uwu w’iyinga isaha zitandatu ku mutaga kw’isaha ya Jeffersonville (isaha icumi na zibiri ku mugoroba mu Burundi).
Ibimenyeshejwe Ibimenyeshejwe ku bijanye n’ugusobanura mu zindi ndimi bikorerwa muri Branham Tabernacle
Bakunzi b’Ivyibutso Bizima,
Ijwi turiko turumviriza ku ma bande ni Urimu Tumimu y’Imana ku Mugeni WaYo. Ubu rero Ryashize hamwe neza Umugeni WaYo bahuje umutima n’inama kugira ngo Abe ishengero ry’ukuri ryuzuye Mpwemu, ryuzuye ububasha bw’Imana, ryicaye hamwe ahantu ho mw’Ijuru, ritanga ibimazi vya mpwemu, amashimwe ku Mana, hamwe na Mpwemu Yera Agendagenda hagati yacu.
Kristo Yaturungikiye Mpwemu Yera kugira ngo Avuge biciye ku mumarayika wiWe w’indwi kugira ngo adutunganye nk’abantu ku giti cabo mu gihagararo ca Yesu Kristo, kugira ngo tube inzu y’ububasha n’aho Mpwemu Yera Aba, biciye kw’Ijambo RyiWe.
Turi abaragwa ba vyose. Ni umutungo wacu bwite, ni UWACU. Ni ingabire y’Imana kuri twebwe, kandi nta n’umwe ashobora kuyidukurako. NI IVYACU.
“Ico muzosaba Data mw’Izina Ryanje, nzogikora.” Ni nde ashobora guhakana ikintu cose ng’aho? “Ni ukuri, ni ukuri Ndababwire, ni mwabwira uyu musozi muti: ‘Shinguka,’ ntimukekeranye mu mutima wanyu, ariko mukizera ko ivyo mwavuze bizoshika, ivyo mwavuze vyose muzoshobora kubironka.” Mbega amasezerano! Ntibigarukira ku gukira gusa, ariko n’ico ari co cose.
Imana Ishimwe…ICO DUSABA COSE!
Kuva kera na rindi, ivyaremwe vyose vy’Imana vyamye biniha kandi birindiriye umunsi abana b’Imana bazogaragara bimwe bishitse. Uwo munsi warashitse. Uyu ni wo munsi. Iki ni co gihe. TURI abo bahungu n’abakobwa b’Imana bagaragajwe.
TURI ibikoresho bizima vy’Imana Igendagenderamwo, Yitegererezamwo, Ivugiramwo, Ikoreramwo. Ni Imana, Igendera ku birenge bibiri, MURI TWEBWE.
Gupfukama ubwacu imbere y’Imana Nzima, ubuntu buzima, ubwenge buzima, ukwihangana kuzima, ukwubaha Imana kuzima, Ububasha buzima buva ku Mana Nzima, bituma umuntu muzima aba ishusho nzima mu gihagararo c’Imana.
Ni Kristo, mu buryo bwa Mpwemu Yera Ari kuri twebwe, n’umubatizo w’ukuri wa Mpwemu Yera WiWe, hamwe n’ivyizerwa vyiWe vyose vyadomweko ikimenyetso muri twebwe. Imana, Iba muri twebwe mw’Ihema ryitwa Inyubako. Ihema Rizima, ry’ahantu Imana Nzima Igerereye; Ishengero Ritunganye, kugira ngo Ibuye ry’Ukunengesera Ritunganye Ridupfuke.
Imana Yarungitse umuvugishwa guhamagara no kurongora Umugeni WaYo. Yari Adamu waYo wa mbere Yashumbushijwe mu buryo bushitse, igihagararo c’umuntu atunganye mu gihe cacu, kugira ngo ahishurire Ijambo RyaYo Umugeni WaYo.
Sinshobora kuva kuri ivyo. Nta na kimwe gishobora kunyiganyiza. Sinitayeho ico uwo ari we wese avuga ; ntikinyiganyiza na gatoya. Nzoguma ng’aho nyene.
Ndamusezeraniye, muri iki gitondo, n’umutima wanje wose, ko, hamwe n’imfashanyo yiWe n’ubuntu bwiWe, nzosenga kandi nzorondera ku munsi ku munsi, ntahagarika, gushika numvise kimwe cose muri ibi bisabwa gitemba muri iki gihagararo canje gitoyi ca kera, gushika aho nshobora kuba ukugaragara kwa Kristo Muzima.
KURI JEWE, kwumviriza Ijwi ry’Imana ku ma bande ni integuro y’Imana y’iki gihe. Ni Ijambo Rizima Rya Yesu Kristo. Ni icishimikizo canje ntanyiganyizwa bijanye n’Ijambo ry’Imana. Ni inzira Imana Yatanze y’iki gihe.
Rero, ndipfuza kubatumira ngo mwifatanye nanje ku munsi w’iyinga isaha zitandatu ku mutaga kw’isaha ya Jeffersonville, (isaha icumi na zibiri ku mugoroba mu Burundi) mu gihe numviriza William Marrion Branham, uwo nizera ko ari Ijwi ry’Imana ry’igihe cacu, yigisha Umugeni wa Kristo ingene Yocika: Igihagararo C’Umuntu Atunganye 62-1014M.
Ni muze mwifatanye n’Umugeni WaNje mu gihe Ndabicarika hamwe ahantu ho mw’Ijuru kuri uyu w’iyinga isaha zitandatu ku mutaga kw’isaha ya Jeffersonville (isana icumi na zibiri ku mugoroba mu Burundi), maze muNyumvirize ndabashira mu kibanza canyu n’Ijambo RyaNje. 60-0522E Ukugirwa Abana b’Imana #4.
Ibimenyeshejwe Ibimenyeshejwe ku bijanye n’ugusobanura mu zindi ndimi bikorerwa muri Branham Tabernacle
Mukunzi Nkumi Itunganye,
Iyo Dufyonda Tuvuza, ni ubuki mu gitandara, ni umunezero utavugwa, ni ivyizigiro bihezagiye, ni inanga y’ubugingo bwacu, ni ivyizigiro vyacu hamwe n’ugushigikirwa kwacu, ni Igitandara c’Ibihe, ni ikintu cose ciza, ni Inzira Imana Itanga y’iki gihe.
Kubera ko Dufyonda Tukavuza, Ijwi ry’Imana Ryaratureheje; Ryaturehereje kuri Kristo, nk’Inkumi Itunganye kw’Ijambo RyaYo. Turafise ariko Umurezi umwe, Ijwi Rimwe, umuvugishwa umwe, ariko araturongora na Mpwemu Yera.
Ariko iri ni ishengero, ndiko ndabigisha. Ivyo bija ku ma bande. Ndashaka ko abantu bumviriza ama bande bibuka ko ivyo ari ivy’ishengero ryanje.
Mbega ukuntu ari icemezo kuri twebwe ko turi mu Bugombe BwaYo Butunganye. Ama bande ni ay’ishengero ryiwe. Ariko aratwigisha. Ariko aratubwira ngo, ni mwumvirize ama bande.
Yatanguye uru Rukurikirane rw’Ukugirwa Abana b’Imana mu kutubwira ivyabaye iminsi mikeyi gusa imbere y’aho. Hanyuma, ku Butumwa bwose, avuga ivy’igihe yari yajanywe. Ese ukuntu bitegerezwa kuba bihambaye ko Umugeni Yumva ivyabaye n’ivyo Umugeni Yamubwiye.
Umuvugishwa wacu azocirwa urubanza n’Ijambo yigishije kandi yasize ku ma bande. Umugeni wo hariya Yamubwiye ko azokwemerwa n’Umwami Wacu. Hanyuma azoMutwereka nk’ikamba y’igikorwa c’ibango ryiwe, hanyuma tuzosubira kw’isi kugira ngo tubeho ibihe bidashira.
Ijambo Ryose twumva ni utuvunji tw’inzahabu. Tuguma gusa tuRisukura kandi tuRisukura uko ahishura vyinshi mu gihe dusoma hagati y’imirongo.
Ese ukuntu dukunda kuRisangira na beneData na bashikibacu tuti, “Ibi mwavyumvise?”
«Mbega ntiyaduhisemwo muri We imbere y’uko isi ibabaho»? Iryo ni iragi ryacu. Imana Yaraduhisemwo, kandi Irareka Yesu Araza maze Ariha ikiguzi. Ivyo ni ibiki? Ugusesa kwiWe kw’Amaraso YiWe, kugira ngo ntihagire icaha coharurwa kuri twebwe. Ntana kimwe muvyo mukora.
Hanyuma, neza inyuma y’ivyo, warumvise ibi?
« Uwera, Uwera, Uwera ni We Uhoraho. » Muhanze amaso kuri Kaluvari, kandi nta na kimwe kizobahagarika! Ukuntu mwigenza mu buzima bwanyu nyene, mugendera mu Nzira Nkuru y’Umwami, musizwe Amavuta y’agaciro y’ugusigwa, mugendera Ahera h’Ahera. Fiuuu! Amen.
Twari nk’inkoni ya Aroni, inkoni y’umusaza yumye yari yaragendanye imyaka mirongo ine mu bugaragwa. Ariko ubu, kuko twagumye aho Hantu Hera twumviriza Ijwi ry’Imana Rivugana natwe ku ma bande, turatutuje kandi twashuritse, twuzuye Mpwemu Yera WaYo, kandi turi Umugeni WaYo Asemerera n’impwemu zacu zose ziri mu mahaha yacu tuti :
Uwera, Uwera, Uwera, Uwera, ni We Uhoraho, ama bande ni yo yambere mu mitima yacu.
Uwera, Uwera, Uwera, Uwera, ni We Uhoraho, Yaduhisemwo isi itararemwa.
Uwera, Uwera, Uwera, Uwera, ni We Uhoraho, turi Umugeni wa Yesu Kristo.
Uwera, Uwera, Uwera, Uwera, ni We Uhoraho, ivyo abantu bavuga, ntaco bihindura, ntituriko turakura ama bande ku rubuga, turiko turayavuza birushirije.
Uwera, Uwera, Uwera, Uwera, ni We Uhoraho, duhanze amaso yacu Kaluvariyo, kandi nta nakimwe kigiye kuduhagarika.
Ndanezerewe cane no gufatanya imitima na benshi hano bazi ko Iri Ari Ijambo ry’Imana Ritihenda. Hanyuma Ni—Ni Ukuri, Ijambo Ryose ni Ukuri, Iryungane ryose, akanyuguti kose. Kandi hamwe n’ubuntu bw’Imana, twaragiriwe ibakwe ryo kubona Igihugu tuzojamwo umunsi umwe.
Nimuze mwifatanye natwe ku munsi w’iyinga isaha zitandatu ku mutaga kw’isaha ya Jeffersonville (isaha icumi na zibiri ku mugoroba mu Burundi), mu gihe umuvugishwa afata Ijambo Ryose akaguma gusa arisukura, kandi AzoRijana mw’Itanguriro maze Arisukure, Arishire mu Kuvayo yongere Arisukure, mbere no mu Vyahishuriwe Yohana; kandi vyose Ni Yesu!
MweneData Joseph Branham
Ubutumwa: Kugirwa Abana b’Imana igice ca 3 #3 60-0522M Bwavuzwe kw’igenekerezo rya 22 ukwezi kwa gatanu mu gitondo umwaka wa 1960
Nizera ko, umwe muri iyi minsi y’ubwiza, igihe iri shirahamwe mpuzamashengero rizoja hamwe, maze papa mushasha agakurwa muri Leta Zunze Ubumwe za Amerika kandi agashirwa ngaho bijanye n’ubuvugishwa, ico gihe bazogira igishushanyo ca ca gikoko.
Ijwi ry’umugishwa w’Imana ryarabivuze kw’igenekerezo rya 19 ukwezi kwa cumi na kabiri 1954, maze haciye amezi 9, Robert Prevost, ubu azwi nka Papa Léon XIV, yaravutse. Ubu ni we papa mushasha w’i Roma. « Uko ni ko Uhoraho Agize » Yarashitse.
Igenekerezo rya 7 ukwezi kwa gatanu, 1946, IMANA Yashize umuvugishwa waYo muri Green’s Mill, Indiana, kugira ngo Imuhe igikorwa caYo no gutangariza isi Iti : iyi ni intumwa mumarayika waNje w’indwi ikomeye, Ijwi RyaNje kw’isi. Ni mumwumvirize.
Igihe Umumarayika w’Uhoraho Yahura nanje hanze ng’aho i Green’s Mill, Indiana, haraheze imyaka umunani, amaze kuba ankurikira kuva nkiri umwana, nkanerekwa, igihe nagenda kuri We, Yavuze Ati: “Ni waba imvugakuri, ugatuma abantu bakwizera, nta kintu na kimwe kizohagarara imbere y’isengesho.”
William Marrion Branham ni Ijwi ry’Imana Ryatowe kw’isi. Umuvugishwa w’inkomezi uwo Ijambo ry’Imana Rizako. Bijanye n’Ijambo, ni we WENYENE musobanuzi w’Ijambo ry’Imana ava ku Mana.
Yaragaragajwe n’Imana ubwaYo, n’Inkingi y’Umuriro. Igenekerezo rya 7 ukwezi kwa gatanu 2025, SATANI yashize Inama yiwe y’abakaridinali mu rusengero rwitwa Sixtine i Roma kugira ngo batore Icariho ca Kristo, kugira ngo bashitse Uko Niko Uhoraho Agize.
Ni nk’aho twoba turiko turabona Ikiyaga Gitukura cugurutse imbere y’amaso yacu. Manu nshasha igwa ivuye mw’ijuru. Amamiliyoni y’inkware zigaburira Umugeni. Amazi ava mu Rutare. Umuriro umanuka utongora ikimazi hamwe na Eliya.
Ubugishwa buriko burashika ku munsi ku munsi. Ijambo Ry’Imana Ry’isezerano Ririko Riragaragara mu buzima bwacu. Ibintu biriko biraba hirya no hino yacu. Umugeni Yariteguye mu kwumviriza no kwizera Ijambo. Turi Ijambo Ryihaye umubiri.
Vy’ukuri, twashitse. Igihe kiri hafi. Umugeni Ariko Aranezerwa kandi Ariko Afataniriza hamwe kw’isi yose nk’uko bitigeze biba mbere. Umuvugishwa ariko arahumuriza Umugeni mu kutubwira ko turi ubuherezi bw’ubwami bw’Imana, ihanga ryera, abantu badasanzwe bahamagawe, batoranijwe, batowe, bashizwe ku ruhande.
UBU TURI Abahungu n’Abakobwa b’Imana, barongowe na Mpwemu w’Imana; atari umuntu, ariko na Mpwemu. Turazi, ata gukekeranya na kumwe, ko TURI UMUGENI WAYO. UKWIZERA kwacu kuriko kurashika ku rundi rwego rushasha ku munsi ku munsi. Nta kiduhagarika canke kidutevya, Imana Yarabihishuye kandi Yarabiteye mu mutima wacu no mu bugingo bwacu.
Umugeni Yaramenye neza abo turi bo. Turi mu Gihugu cacu c’isezerano ca mpwemu, dufise vyose. Turafise amahoro yo mw’Ijuru, imihezagiro yo mw’Ijuru, Mpwemu wo mw’Ijuru. VYOSE NI IVYACU. Turiko turitegurira gusa ivyo Itubikiye.
Inzamba y’Umwami izovuga, abapfiriye muri Kristo bazobanza kuzuka. Iyi mibiri yo mw’Ijuru izomanuka maze yambare imibiri yo kw’isi, y’ubwiza kandi izohindurwa mu kanya nk’ako gukubita urugohe. Tuzozamurirwa hamwe na bo, gusanganira Umwami mu kirere.
Mbega umunsi. Mbega igihe. Nta buryo nshobora kuvuga mu majambo y’abantu ivyo twese turiko turumva mu bugingo bwacu. Imitima yacu iriko iratera. Ntituriko turatuma biba, Mpwemu Yera Ameze nk’iriba rya arutwaze Ribiragira imbere muri twebwe. Umugeni Yararindiriye uyu mwanya kuva mu minsi ya Adamu…KANDI UBU TURI NG’AHO.
Turabahaye ikaze. Turabatumiye. Turabinginze. Ngw’ino mwifatanye natwe mu gihe c’igitangaza isi yigeze kumenya, mu gihe twumviriza Ijwi ry’Imana Riduhishurira Ijambo RyaYo kuri uwu w’iyinga isaha zitandatu ku mutaga kw’isaha ya Jeffersonville, (isaha icumi na zibiri ku mugoroba mu Burundi) mu gihe twumviriza: 60-0518 Ukugirwa Abana b’Imana 2,
Ibimenyeshejwe Ibimenyeshejwe ku bijanye n’ugusobanura mu zindi ndimi bikorerwa muri Branham Tabernacle
Bakunzi Mwagizwe Abana b’Imana,
Ubu dufungura ibintu bikomeye vy’Imana kandi dufise ugutahura gutomoye kw’Ijambo RyaYo. Imana Yaduhaye Uguhishurirwa kw’ukuri kw’Ijambo. Ivyiyumviro vyacu vyose vya mpwemu nta ruzazane na rutoya bifise.
TURAZI neza na neza Uwo ari We. TURAZI neza na neza ico Ari co. TURAZI neza na neza aho turiko turaja. TURAZI neza na neza abo turi bo. TURAZI Uwo twizeye kandi turazi neza ko Ashobora kuzigama ivyo twiyemeje kuri gushika uwo munsi.
Yaravuze kandi Yarahishuye amabanga yose yari yaranyegejwe kuva ku kuremwa kw’isi. Yaratubwiye ingene abandi bama banse inzira yiWe Yatanze kandi bipfuza uburongozi butandukanye, ariko ko Yogira umugwi mutoyi uzoguma ari umwizigirwa kw’Ijambo RyaYo.
Kw’isi yose, ntibazokoranira ahantu hamwe kugira ngo bagire ibintu bahuriyeko. Ariko utugwi dutoduto two muri bo tuzosanzara kw’isi yose.
Imana Ishimwe, dusanzaye kw’isi yose, ariko twunze Ubumwe nk’umuntu umwe mu Gufyonda Tukavuza no kwumviriza Ijwi ry’Imana Rivugana natwe.
Reka gusa dushike ku rwego rwo hejuru maze tubone imbere y’igihe ivyo Izoba Iriko Iratubwira biciye ku mumarayika waYo w’inkomezi ku munsi w’iyinga.
Bakunzi batowe nanje, ubu mwicaye hamwe ahantu ho mw’Ijuru. Si hanze gusa aho ari ho hose, ariko ahantu ho “ mw’Ijuru”; ni ikibanza cawe nk’uwizera. Warasenze kandi witeguriye Ubutumwa. Mwakoraniye hamwe nk’abera, mwabatijwe muri Mpwemu Yera, mwuzuye imihezagiro y’Imana. Mwarahamagawe, mwaratoranijwe, impwemu yanyu yinjira mu kirere co mw’Ijuru.
Ivyoshobora kuba, Mpwemu Wanje Yera Azoba Ariko Aragendagenda hejuru y’umutima wose. Mwaravutse bushasha kandi mwabaye ikiremwa gishasha muri Kristo Yesu. Ivyaha vyanyu vyose biri munsi y’Amaraso. Muri mu gusenga gutunganye, amaboko n’imitima yanyu bidugijwe kuri Jewe, munsengera hamwe ahantu ho mw’Ijuru.
Mwaratoranijwe, mwarahiswemwo mu Kumenya Kwanje Imbere y’igihe. Abatowe, Abejejwe, Abatsindanishirijwe kubw’ugutoranywa. Ntibishoboka ko muhendwa. Narabashizeho imbere y’itanguriro ry’isi. Muri Imana ntoya, Mwaradomweko ikimenyetso ca Mpwemu Yera w’isezerano; si abavukiye mu muryango gusa, abagizwe Abahungu n’Abakobwa banje.
Umutima wose uzokwuzura Mpwemu waNje. Muzoba mugendana, mwicaranye, ahantu ho mw’Ijuru. Nta ciyumviro kibi na kimwe muri mwebwe, nta n’itabi na rimwe ritumuwe, nta n’impuzu ngufi, nta n’iki, kirya canke ikindi, nta ciyumviro kibi na kimwe, ata n’umwe afise ikirwanya uwundi, bose baganira mu rukundo no mu guhuza, bose bafise umutima umwe ahantu hamwe.
Abandi boshobora Kuvyanka, canke ntibabitahure, ariko kuri mwebwe, Ni Umwambaro w’Iteka wanyu. Nk’uko Dawidi yabwiye umugore wiwe ati, “Mwibaza ko iki cari ikintu, rindira ejo, tuzoba turiko twumviriza n’ayandi ma bande, dutazira Umwami, twuzuye Mpwemu waYo; kuko tuba muri Kanani, turi mu nzira ija mu gihugu c’isezerano.”
Ico gihe Nzoraba hasi ndi mw’Ijuru maze Ndababwire nti: “Uri Umugeni uhuje n’umutima Wanje.”
Iyi mihezagiro irashobora kuba iyawe nawe. Ngw’ino, wifatanye natwe kuri uwu w’iyinga isaha zitandatu ku mutaga, kw’isaha ya Jeffersonville, (isaha icumi na zibiri ku mugoroba mu Burundi) maze ubone ukuhaba kw’Uhoraho nk’uko bitigeze bibaho mbere mu gihe twumviriza Ijwi ry’Imana ry’iki gihe Ritubwira kandi Rituzanire Ubutumwa: Kugirwa Abana b’Imana #1, 60-0515E
Mwibuke, ibi ni ivy’ishengero, si ivy’umuntu wo hanze. Ni ibanga mu mvugo ifobetse kuri we, ntashobora kubitahura, bimuca hejuru y’umutwe, biramusiga ntaco abiziko. Ariko, kw’Ishengero, ni ubuki buri mu rutare, ni umunezero utavugwa, ni ivyizigiro bihezagiye, ni inanga y’umutima, ni ivyizigiro vyacu hamwe n’imfashanyo yacu, ni Igitandara c’Ibihe, yooo, ni vyose vyiza. Kuko ijuru n’isi bizovaho, ariko Ijambo ry’Imana Ntirizokwigera Rivaho.
Ese ukuntu ari iteka kuba muri iki gihe no kuba igice c’Ivyanditswe biriko birashika. Amajambo apfa yoshobora gute guserura ibiri mu mutima wacu vyose? Nk’uko umuvugishwa yabivuze, si jewe, hariho nyene Ikintu Kinaka kiri imbere cane, Kinsunika kandi Kibiragira muri jewe; iriba rya arutwaze rya Mpwemu Yera. Ni Umugeni Yitegurira Umukwe.
Ese ukuntu umugeni Agira umunezero imbere neza y’ubugeni bwiwe. Umutima wiwe utangura gutera ningoga cane uko amasegonda make ya nyuma agenda ararenga….arazi ko amaherezo igihe cashitse. “Nariteguye, araza kubwanje. Ubu tuzoba UMWE.”
Mu vy’ukuri turi mu bihe vya nyuma vy’iherezo ry’ibihe. Umugeni Azozamurwa vuba Ahamagarwe mu Mazimano yacu yo mu nkinga. Ariko Aratujana mu bibanza vyo hejuru bishasha. Nta kibazo kindi kiriho; nta kundi kwibaza; TURI UMUGENI.
Kandi ntavyo Arakora. Aracashaka guhezagira no kuremesha Umugeni WiWe Mukundwa Yahisemwo. Ese ukuntu Akunda kuMuremesha no kuMubwira ingene AMukunda. Ese ukuntu AMwishimira.
Arafise n’ukundi Guhishurirwa kudasanzwe cane Azomuha. Igihe hari amajwi menshi cane kw’isi yanka kuvuza amabande, Arashaka ubugira kandi kuremesha Umugeni ko bari mu Bugombe BwiWe butunganye no mu Nzira YiWe Yatanze.
Integuro yiWe yama yanswe. Umugeni WiWe yama Ahamwa. Abantu bama bashaka ivyiyumviro vyabo, ibintu uko babibona. Bashaka umurongozi atandukanye wo kubarongora. Ariko Imana Yarungitse umurongozi UMWE kurongora Umugeni WaYo, Yo ubwaYo, Mpwemu Yera, kandi Mpwemu Yera w’iki gihe, nko mu BINDI BIHE VYOSE, NI UMUVUGISHWA W’IMANA.
Bama bashaka ko abantu babarongora. Mu gihe ca Samweli, Imana Yavuze ko bariko barayanka mu kudashaka ko Samweli abarongora. Bisa n’ibitangaje mu gihe Samweli nawe yari umuntu, ariko itandukaniro ryari ko Samweli yari umuntu Imana Yahisemwo ngo abarongore. Ntiyari Samweli, Ni Imana Yakoresha Samweli. Yari IJWI HAMWE N’UMUNTU Imana Yabahisemwo KUBARONGORA, ariko bo bari bashaka ayandi majwi.
Sauli yari azi ko abantu batinya Samweli, ni co gituma yategerezwa gutangaza ati: “Sauli NA Samweli”. Yategerezwa gutera ubwoba abantu kugira ngo bamukurikire. Vy’ukuri, yari yarahamagawe. Vy’ukuri, yari yararobanujwe amavuta na Samweli ngo abe umwami wabo, ariko Imana YARI IGIFISE Inzira Yatanze, n’umuvugishwanu Yahisemwo kubarongora, mbere no kurongora Sauli. Imana Yavuganye n’umuvugishwa waYo, Ibwira Sauli ico ategerezwa gukora. Igihe Sauli yafata ingingo y’uko nawe yari yararobanujwe amavuta, kandi ko Atari agishaka kwumviriza umuvugishwa gusa, Imana Yaramwatse ubwami bwiwe.
Umunsi umwe Sauli ahagarika umutima cane. Ntiyashobora kuronka inyishu iva ku Mana. Ntiyashobora kuronka ihumure. Yashaka inyishu. Yari azi aho ategerezwa kuja kugira aronke inyishu yashaka; hari ahantu hamwe gusa, UMUVUGISHWA W’IMANA, SAMWELI. Yari yarapfuye, ariko yari akiri IJWI RY’IMANA, NO MURI PARADIZO.
Data Yashaka ko Umugeni WiWe amenya uwo Yahisemwo kurongora Umugeni WiWe muri iki igihe ca nyuma, ni co gituma yatwaye umumarayika wiWe w’inkomezi hirya y’igihuzu c’igihe kugira ngo asubire atubwire, aduhumurize, kandi aturemeshe ko turi mu Bugombe BwiWe Butunganye kandi Bwatanzwe.
Ubu, sinshaka ko ibi mubisubiramwo. Ibi ni ivy’ishengero ryanje, canke intama zanje mbereye umwungere.
Imbere y’uko atubwira ikintu cose, abanza gushaka ko tumenya ko ivyo ari IVYACU GUSA, ISHENGERO RYIWE, INTAMA ZIWE, IZO ABEREYE UMWUNGERE. Rero, nimba udashobora kuvuga ngo, “MweneData Branham ni umwungere WANJE,” narabivuze mbere, ariko gusa ntaco bimaze kubandanya usoma, ivyo si ivyawe, yongeyeko ko atagomvye ko mbere tubisubiriramwo umuntu n’umwe kiretse abizera kandi bakavuga bati, “MweneData Branham ni umwungere wanje”.
Aho nyene ni ho hari inyishu yacu ku kibazo tunegurwako cane kubera tuvuga ngo: “MweneData Branham ni umwungere wacu.” (Ivyo, ni abo bantu bavuza amabande.) Bavuga ukuri, ni we, natwe turi abiwe.
Ndagusavye ntunshavurire, ivyo sindiko ndabivuga kugira ngo nshavuze n’umwe, ivyo vyoba ari bibi, ariko ni ivyo Ariko Arabwira Umugeni. Sindiko ndashirako insobanuro yanje, arabivuga neza…Ijambo ry’Imana nta nsobanuro Rikeneye.
Rero atubwira ko ibi bitari bimeze nk’iyerekwa ryose yigeze kugira. Yagiye ahantu atari bwigere aja. Mbere ryari RIHAMBAYE kuruta iyerekwa ryose yigeze kubona. Ntiyariko ararota, yabonye umubiri wiwe ku buriri; YARI HARIYA.
Mugeni wa Yesu Kristo, ivyo vyinjire neza cane. Yari Umugeni wa Yesu Kristo wo hakurya, mu gihe c’ubu, Baje Biruka kuri we, Basemerera, Baramvura amaboko kandi Baramuhobera, bamubwira bati: «Yoo, mweneData w’agaciro!»
Yari hariya; yashobora kuvyumva; yashobora kubumva. Bariko bavugana nawe. Yarahagaze maze araraba, yari akiri muto. Yasubiye kuraba umubiri wiwe wa kera wari uryamye hariya amaboko yiwe ari ku mutwe wiwe.
Ubu twaremeje ko YARI HARIYA, kandi ko Yari Umugeni wa Yesu Kristo yariko arabona. None rero reka twumve ivyo ijwi rivuye hejuru ryariko riramubwira.
Kandi rero iryo Jwi Ryariko Riravugira hejuru yanje, Ryavuze riti: “Urazi, vyanditswe muri Bibiliya ko abavugishwa bari kumwe n’abantu babo.”
Imana Ntiyariko Irerekana no kuremesha umuvugishwa waYo gusa, ariko hari n’ibindi vyinshi vyari muri ivyo. Yari kugaruka maze akatubwira atari gusa aho turiko turaja honyene n’uko bizoba bimeze, ariko akanatubwira ko turi mu Bugombe BwiWe butunganye mu Gufyonda Tukavuza kandi ko uko ariko ushikira ahari Umugeni.
MweneData Branham yavuze ko yipfuza kubona Yesu bikomeye cane. Ariko bamubwiye bati:
“Ubu, Ari hejuru gatoya gusa, neza hejuru gutya.” Bavuze bati: “Umunsi umwe Azoza kuri wewe.”
Tuzocirwa urubanza n’Ijambo YATWIGISHIJE. Gutyo, urubanza ruva ku vyo Ijwi ry’Imana Ryavuze ku mabande. Ni gute umuntu avuga Ijwi riri ku mabande atari IJWI RIHAMBAYE KURUTA AYANDI ushobora kwumviriza?
“Kandi rero niwemerwa muri ico gihe, ivyo uzoba,”
Mbega muriteguye. Ivyo bizohadikiriza ku biri Ubugombe butunganye b’Umwami kubw’Umugeni wa Yesu Kristo. Umugeni Ariko Arabwira umuvugishwa ivyo AZOKORA. Nta wundi. Si umugwi. Si uwundi mwungere, umuvugishwa w’Imana, WILLIAM MARRION BRANHAM.
Ni nde ategerezwa kuturongora tuja iWe? Ni nde ariko ararongora Umugeni? Umugeni Ariko Aramubwira Ko AZOJANA UMUGENI KURI WE, hanyuma tuzosubira kw’isi tubeho ibihe bidashira.
Nimba hariho Uguhishurirwa UKO ARI KWO KWOSE muri wewe na gutoya. Namba wemanga ko wizera Ubu Butumwa, ndasenga ngo Imana Iguhishurire ko UTEGEREZWA gushiramwo Ijwi RyaYo, ama bande, MU KIBANZA CA MBERE.
Bungere, musubize umuvugishwa kuri alutari zanyu. Amabande ni Ijwi Rihambaye kuruta ayandi utegerezwa kwumviriza mu gihe mugiye gucirwa urubanza n’IRYO JWI.
Bijanye n’Ijambo, turi mu Bugombe BwiWe butunganye kandi Bwatanzwe mu gihe cacu mu kwumviriza Ijwi ry’Imana ku mabande.
Nimba Imana Yaruguruye amaso yawe ku Guhishurirwa kw’ukuri kw’Ijambo RyaYo, ndagutumiye ngo wifatanye natwe ku munsi w’iyinga isaha zitandatu ku mutaga kw’isaha ya Jeffersonville (isaha icumi na zibiri ku mugoroba mu Burundi), mu gihe tuzokwumviriza 60-0515M Umwami Yanswe.
