Category Archives: Uncategorized

23-0326 Okwegatta Kw’Omugole Wa Kristo Okutalabika

Obubaka: 65-1125 Okwegatta Kw’Omugole Wa Kristo Okutalabika

BranhamTabernacle.org

Omukyala Omulonde omwagalwa,

Kiki kye wandiwaddeyo Mukama waffe Yesu ayingire mu maka go ku Ssande eno, atuule mu ntebe yo, akutunuulire mu maaso ayogere naawe butereevu?
Tewandisobodde kwogera. Tewandiyagadde kwogera. Kye wandyagadde okukola kwe kumutunuulira n’okaaba. Wanditidde n’okwasamya akamwa ko. Kiki kyewandyogedde? Mu birowoozo byo wandibadde olowooza, Mukama, sisaanidde yadde n’akatono Ggwe okubeera wano mu maka gange. Nze asembayo wansi mu ba wansi. Nkulemeredde emirundi mingi nnyo Mukama, naye Mukama, nkwagala nnyo.

Olwo wanditegedde mu mutima gwo, Amanyi kennyini kye ndowooza, tewali kintu kyonna kikwekeddwa okuva gy’Ali. Amanyi ebyama byennyini eby’omutima gwange.

Nga bw’oMutunuulira mu Maaso Ge ag’omuwendo, wandirabye okwagala n’okusaasira okungi ennyo. Yandibadde ayogera naawe awatali na kwasamya kamwa ke. Wandibadde olowooza, Mu butuufu Ali wano, mu maka gange, nange.

Omutima gwo gwanditandise okukukuba n’okusingawo, nga bw’omulaba ng’anaatera okubaako ky’akugamba. Omulundi gumu, Eddoboozi erisinga obuwoomu lyewali owulidde lyandigambye nti, “ .
Swiitimutima wange omwagalwa, teweeraliikirira, erinnya lyo liri mu kitabo ky’Obulamu kyange Eky’Omwana Gw’Endiga. Si ekitabo ekikadde eky’okugattibwa kwo okw’obutonde, wabula Ekitabo kyange ekipya eky’Omugole. Y’ebbaluwa yo ey’obufumbo nange.

Asingira mu Baagalwa, tosonyiyibbwa bibi byo byonna n’okulemererwa kwo byokka, wabula ewange, TOLINA MUSANGO. Mu Maaso Gange, tokolangako kibi kyonna.

Ggwe mwana wange ow’omuwendo, ow’empisa ennungi, atalina kibi. Oyimirira nga oli mulongoofu; Omugole wange atagattiddwamu birala anaaziddwa n’Amazzi g’Omusaayi Gwange Nze Mwene.

Nga tewannabaawo wadde omwezi, emmunyeenye oba akatoofaali k’obutonde akasingayo obutono, wali mutabani Wange era muwala wange. Ggwe kwolesebwa okukwatikako mu mubiri okw’ebikula ebyali mu Nze ku lubereberye.

Ensengekera yo ey’omwoyo yali mu Nze kubanga oli kwolesebwa kwa mpisa zange, ebirowoozo byange. N’okuba wali mu Nze nga ensi tennatondebwawo.

Ggwe Mugole Wange ow’omwoyo abadde agalamidde mu Maaso g’Omwana, nga oyengera, ng’owuliriza Ekigambo kyange. Kati otandise okuba n’okudda obuggya, ng’okomawo n’otereera n’Ekigambo kyange. Oli Mugole Wange Omulonde.

Kati olina obumu obw’omwoyo nange. Omubiri gwo gufuuka Kigambo, n’Ekigambo kifuuka omubiri; ekyoleseddwa ne kikakasibwa. Kye nnakugamba kyennyini nti kijja kubaawo mu lunaku luno, kigenda mu maaso, buli lunaku. Ekigambo nga kifuuka Ekigambo.

Olina Okubikkulirwa okwa nnamaddala okw’olunaku luno olusembayo: okukuŋŋaana kw’Omugole Wange awamu olw’Obubaka Buno. Tewali mulembe mulala gwonna gwe nnakisuubiza. Nakikusuubiza, mu mulembe guno: Malaki 4, Lukka 17:30, Omutukuvu Yokaana 14:12, Yoweri 2:38.

Tugenda kuba n’ekijjulo ky’okwebaza Katonda ku Ssande eno lwe ŋŋenda okubabuulira ebisingawo. Nja kumala essaawa naawe, nga tussa ekimu n’okulya ekijjulo ky’Ekigambo kyange. Nja kubakakasa nate nti nga musigala n’Ekigambo kyange, nnabbi Wange, Eddoboozi lyange, nga Munyiga Zannya, muli mu Kwagala Kwange okutuukiridde.

Nabagamba mu Kigambo kyange, nnyimiridde ku mulyango, era nkonkona. Omuntu yenna bw’awulira EDDOBOOZI lyange, n’aggulawo oluggi, ndiyingira gy’ali, ne ndya wamu naye, naye naye wamu nange. Bangi tebajja kuwuliriza baggulewo oluggi lwabwe, naye olw’Okubikkulirwa, ogguddewo oluggi lwo n’onnyaniriza munda.

Tebakkiriziganya na kuzannya Ddoboozi lyange mu masinzizo gaabwe. Singa baleka bulesi Omwoyo Omutukuvu okukebera ebirowoozo byabwe n’Ekigambo, bandikkirizagannyiza nakyo. Leka Kristo, Ekigambo ekyafukibwako amafuta, akebere omuntu wo ow’omunda. Muleke ayingire mu ggwe, olabe oba nga Ekyo kituufu oba nedda. Nnakugamba nti tekijja kuba kibiina ekinaabagatta awamu, tebasobola na kukkiriziganya ku Kigambo kimu oba bibiri mu Baibuli. Nnakugambako nti kijja kuba kibinja kya basajja? Nedda! Nnakugamba nti Bubaka bwa Musajja OMU; era n’owuliriza n’ogonda.

Olw’okuba tebaagala kuwuliriza na kukkiriza nteekateeka yange nnakabala okuva ku lubereberye, nnabaweereza ababuulizi, abasomesa, abatume, abasumba ne bannabbi. Naye baasindikibwa okusonga abantu OKUDDA ku nteekateeka yange nnakabala era etuukiridde, Malayika wange ow’amaanyi. Kubanga lye Ddoboozi lya Katonda gye muli.

Bafukiddwako amafuta, naye nze nnina OMUBAKA NABBI OMU yekka OKUBAKULEMBERA. OMWOYO OMUTUKUVU YE NABBI. Sikugambye emirundi mingi, EKIGAMBO KYANGE EKYAYOGERWA OKUYITA MU YE TEKYETAAGISA KUVVUUNULWA, TOYOGERAKO OBA TOTOOLAKO KINTU KYONNA KU KYAYOGEDDE, YOGERA BWOGEZI KYEYAYOGERA KU NTAMBI EZO? Oyo ye nnabbi, Omwoyo Omutukuvu nga Abakulembera.

Y’oyo gwe nnatuma okukuyita obeere Omugole Wange. Y’oyo agenda okukwanjula gyeNdi. Y’oyo gwe nnayimirira naye nga mmulaga ekifaananyi nga bw’olifaanana, Omugole Wange. Nnakubuulira byonna ebimukwatako mu Kitabo ky’Okubikkulirwa bweNnagamba nti, Nze Yesu ntumye MALAYIKA WANGE okubategeeza ebintu bino MU MAKANISA MUNDA. Ye NZE, omubiri gwe n’eddoboozi lye nkozesa bikozese okwogera naawe.”

Nga lunaku lwa kitalo nnyo lwe tulimu awamu naye. Tetubangako basanyufu kusingawo oba abamativu okusingawo mu bulamu bwaffe. Kino kye KYO. Kino kye tubadde tulinze obulamu bwaffe bwonna.

Tewali kisiikirize kya kubuusabuusa mu mitima gyaffe oba mu birowoozo byaffe. Kubanga na buli Bubaka bwe tuwulira, Atugamba nti tuli mu Kwagala Kwe okutuukiridde. Waliwo Eddoboozi limu lyokka erijja okubagatta, okubatuukiriza, n’okubaleeta awamu…Nze, NZE NGA NJOGERA NGA MPITA MU NABBI WANGE. SSI BIGAMBO BYE, EBIGAMBO BYANGE. LY’EKKUBO LYANGE LYENTADDEWO.

Emmeeza etegekeddwa bwanjulukufu. Ejjudde emboga, enva endiirwa eza buli langi n’ekikula…KIGAMBO KU KIGAMBO, KU KIGAMBO. Tugenda kuba n’ekijjulo ky’okwebaza Katonda nga bwe kitabangawo. Wagenda kubaawo jubileewo okwetoloola ensi yonna ng’Omugole akuŋŋaana okwetooloola Emmeeza zaabwe okuwuliriza Eddoboozi lya Katonda nga lyogera nabo. Amaka gaffe n’amakanisa gaffe gajja kujjula okubeerawo Kwe. Ebigambo bijja kutubula okuggyako zi Kitiibwa kya Mukama zaffe, zi Aleluuya, ne zi Erinnya Lya Mukama lyebazibwe.

Jjangu obeere ekitundu ku Lukungaana lw’Okwebaza Amaka g’Omugole, nga bw’atuliisa. Tolwawo, kuba tugenda kutandika okugabula ku Ssande, ku ssaawa 6:00 (mukaaga) ez’omuttuntu, mu budde bwe Jeffersonville. (Y’essaawa 1:00 (emu) ey’akawungeezi e Uganda). Ajja kubeerawo, kubanga yaŋŋambye nti ajja kubaawo.

NJIJA era nja kuba mbabuulira byonna ebikwata ku Okwegatta Kw’Omugole Wa Kristo Okutalabika 65-1125.

Tujja kulabagana wali ku Mmeeza.

Owol. Joseph Branham

(Oba Oyinza Okumuyita): Mukyala We Omulonde

23-0319 Okweroboza Omugole

Obubaka: 65-0429E Okweroboza Omugole

BranhamTabernacle.org

Omu Mu Kakadde Omwagalwa,

Nkulindiridde ebbanga ddene nnyo. Ye ggwe swiitimutima wange omwagalwa, era nkwagala nnyo. Nga bwe nakusuubiza, mbadde nkukolera Amaka amaggya mwe tunaabeerera awamu obutaggwawo bwonna. Nkoze buli kimu mu ngeri ddala nga bw’okyagala.

Kati nsobola okukutunuulira ne ndaba, nga ggwe kifaananyi kyaNge kyennyini. Olina empisa zange zennyini, Ennyama yange, Amagumba gange, Omwoyo gwange gwe gumu, Byonna ebyange bye bimu, ddala. Ofuuse omu nange.

Natuma malayika wange ow’amaanyi ku nsi okukuyitayo okuva mu Lusuku Adeni olwa Sitaani. Namutuma asobole okulaga ebirowoozo byange, ebikula byange, n’okubabuulira ku bintu ebigenda okujja. Nakozesa akamwa ke n’eddoboozi lye okubyogera. Oluvannyuma lw’okubyogera, nabileetera okutuukawo, kubanga Eggulu n’ensi biriggwaawo, naye Ekigambo kyange gy’oli tekiriremwa.

Nakimanya nti bw’onoompulira nga Njogera, nga Nkozesa eddoboozi lya malayika Wange, ojja kutegeera munda mu mutima gwo, nti oyo teyali ye, yali Nze nga njogera naawe. Yali Nze nga nkuweereza akabaluwa k’omukwano, nga nkugamba nti, Nkulonze okubeera Omugole wange swiitimutima.

Mu maaso gange, tewali alinga ggwe. Mpaawo asobola kutwala kifo kyo. Osigadde nga oli wa mazima era omwesigwa gyendi. Bwe nkutunuulira, Omutima gwange guyakaayakana olw’essanyu.

Bwennakugamba, nti wegendereze nnyo swiitimutima, by’owuliriza, walibaawo abaafukibwako amafuta bangi abakozesa Ebigambo byange, naye ba bulimba. Wategeera okulabula kwange olw’Okubikkulirwa era n’osigala nga oli wa mazima era owesigwa eri Eddoboozi lyange.

Nakwenyumirizaamu nnyo bwe wasaba n’obunyiikivu okumanya kkanisa ki gy’okuŋŋaana nayo. Nakugamba okukola okusalawo okutuufu, era ne nkuwa ebyokulabirako eby’ekkanisa etuukiridde bw’eba. Wajjukira bwe nnagamba nti gonna gaba n’emyoyo egigatambulirako, era n’olonda ekkanisa etuukiridde.

Natuuka n’okukugamba nti weegendereze nnyo omusumba wo y’ani. Kale oyinza okuteebereza engeri omutima gwange gye gwabugaana essanyu bwe nnalaba ng’osigadde n’omusumba gwe nnatuma okukuleeta gyendi. Wamanya nti Mwoyo Wange Omutukuvu ye yasiisira mu nnabbi Wange okukukulembera okukuleeta gyendi.

Nzijukira olunaku lwe wali omusanyufu ennyo, era omucamufu ennyo, bwe nnayita malayika wange ne mwambusa mu kifo ekigulumivu nsobole okumulaga ka jjalibu nga bw’olifaanana. Twali tuyimiridde awo nga tukutunuulira nga bw’otambulira ku mudigido gw’oluyimba lwa Abalwanyi Ba Yesu Mwesibe Enkoba mu maaso gaffe.

Yayagala nnyo engeri mwenna gyemwali mwambaziddwa mu ngoye zammwe ez’eggwanga gye muva; nga Switzerland, Bugirimaani, n’okuva mu nsi yonna. Buli omu mu nviiri zammwe empanvu ezaali zitereezeddwa bulungi bitya. Sikaati zammwe zaali zituuka wansi buyonjo ddala. Nakyenyumirizaamu nnyo era nnali musanyufu nnyo okubalagayo mwenna gy’ali, asobole okuddayo abazzeemu amaanyi era abagambe nti yabalabayo Eyo.

Buli liiso lyali lyekaliriza Ffe. Obuwala obumu, emabega mu layini, bwe bwatandika okulobera ku bifo ebyetoolodde, yaleekaana nti, “Tokola otyo! Tokyamya nkumba ya bigere byo!”

Bwe nnakugamba nti nnali ntereka emmere gy’onoolyangako, wamanya kyennyini kyennali njogerako. Wayagala okubeera Omugole Embeerera Kigambo-Kirongoofu Wange. Sikukwatangako ng’opepeya n’omuntu omulala yenna. Bulijjo abaddenga Nze, Ekigambo kyange. Ekyo kyansanyusa nnyo.

Nkulonze, GGWE, okubeera Omugole Wange. Nze nkwagala nnyo, era nga naawe bw’onjagala. Toggwaamu maanyi, ddamu amaanyi, beera musanyufu, sanyuka, olunaku lusembera mangu lwenjijirako okukucima. Nga kinaaba kiseera kya kitalo kye Tunaaba nakyo.

Eri mmwe abasigadde, MWENENYE, ensi eri mu kubejjagala. Olunaku lumu Los Angeles ejja kuba egalamidde wansi mu ssemayanja, ddala nga bwe Nnabagamba nti bwe kiriba. Obusungu bwange bubejjagalira wansi waayo wennyini. Sijja kweyongerayo bbanga ggwanvu nga nkwatiridde ettundutundu ly’omusenyu gw’oku lubalama eryo kw’atudde. Ojja kuseerera obbire mu ssemayanja mu buziba bwa mayiro emu, kyabugazi nga bw’oli ppaka mu ssemayanja Salton. Kijja kuyitirira obubi n’okusinga ku kyaliwo ku jjuuzi wano mu Pompeii.

Ngenda kulongoosa ensi eno n’omuliro mu bbanga ttono. Nja kutta buli kimu ekigiriko n’ekiri wansi waayo. Olaba ebigenda mu maaso okwetoloola ensi yonna, ddala nga bwe Nnakugamba. Olaba Omugole Wange nga yeegattira wamu ku Kigambo kyange, ddala nga bwe Nnakugamba.

Kaakano kye kiseera. Zino z’entuuko. Weetegeke!

Essaawa y’obusungu bwe ku nsi eno ebaze. Dduka nga obudde bw’okuddukiramu bukyaliwo, era ojje mu Kristo.

____________________________________

Muyitibwa okujja okutwegattako, ekitundu ky’Omugole We, nga bwe twetegekera Okujja kwe, okuyita mu kuwulira Eddoboozi lya Katonda nga lyogera naffe era nga lituleetera Obubaka: Okweroboza Omugole 65-0429E Ssande eno ku ssaawa 6:00 (mukaaga) ez’omuttuntu, mu budde bwe Jeffersonville. (Y’essaawa 1:00 (emu) ey’akawungeezi e Uganda).

Owol. Joseph Branham

Olubereberye 24:12-14
Isaaya 53:2
Okubikkulirwa 21:9

23-0312 Amaka Agajja Ag’Omugole Omusajja Ow’Omu Ggulu N’Omugole Omukazi Ow’Oku Nsi

Obubaka: 64-0802 Amaka Agajja Ag’Omugole Omusajja Ow’Omu Ggulu N’Omugole Omukazi Ow’Oku Nsi

PDF

BranhamTabernacle.org

Omugole Omukazi ow’okunsi Omwagalwa,

Malaki 4 Kigambo kya Katonda, era Kizadde ebikifaanana, FFE, Omugole we. Ye Mwoyo Omutukuvu, Omuntu Yesu Kristo, mu bikolwa, nga Anywezeddwa mu mitima gyaffe. Tuzuukizibbwa eri BULI Kigambo kye yayogera, kubanga “Endiga zange ziwulira Eddoboozi lyange; omugenyi tezimugoberera.”

Nga emyezi gino egisembyeyo gibadde gya kitalo, nga tugoberera nnabbi mu Jeffersonville. Katonda abadde ayogera ng’ayita mu malayika we ow’amaanyi era ng’atuliisa Emmere ye gye yatereka okuva mu TTEREKERERO LYE ETTONO ERIMU bweriti mu ggwanga lyonna. Ye Maanu Enkusike, ya Mugole We yekka.

Na buli Bubaka bwe tuwulira, tussa kimu era ne tusanyuka ne bannaffe; “Nkimanyi nti Obubaka buno mbuwulidde emirundi mingi nnyo emabegako, naye SIBUWULIRANGAKO nga kati”. Mazima ddala nsulo ya Mazzi Amalamu ebululira munda mu ffe. Kumpi tetusobola kwefuga. Kye kyokka kye twagala okwogerako. Tetubangako bakakafu okusingawo mu bulamu bwaffe, ku kiki kye tuli na wa gye tulaga.

Tewakyali kwebuuza nti:
“Simanyi na kumanya. Nkoze ebintu bingi nnyo eby’ettabbu mu bulamu bwange. Mukama muremeredde emirundi mingi nnyo. Kirabika bu kiseera nvuya.”

Tewakyali kusuubira:
“Nsuubira ddala nti ndi mwana wa Katonda. NJAGALA okubeera. Nsaba mbe nga ndi.”

Ennaku ezo ZONNA ziweddeko. Kati TUMANYI. Ekitiibwa kya Katonda!!

Tumanya tutya? Katonda abadde ayogera naffe butereevu n’Eddoboozi lye ku ntambi, ng’atugamba emirundi n’emirundi nti, “Ndi mu mmwe, muli mu Nze. Tuli muntu omu. Nabalonda nga ensi tennatandikibwawo. Muli nnyama ya Nnyama Yange, eggumba ly’Eggumba lyange”.

Nga Bubaka butuukirivu nnyo Katonda bwe yatuwadde ku Ssande okutubuulira byonna ku ngeri ensi eno gye tulimu gy’etali yaffe, lusuku Adeni olwa Setaani. Engeri gye yalimbalimba Kaawa ku lubereberye okussa obubuuza n’okubuusabuusa EKIGAMBO KIMU kyokka. Yeeyambulako olutimbe lwa Katonda olutukuvu, n’ayambala olutimbe lw’okumanya, olwo amaaso ge ne gazibuka n’amanya nti yali bukunya.

Sitaani yakyamya Ekigambo nnakabala, era kati amuzibye amaaso okutuusa nti akyali bukunya so takimanyi. Afuuse nnaabakyala wa Sitaani era ensi eno bwe bwakabaka Adeni bwe.

Ssande, Omugole omusajja waffe ow’omu Ggulu ayagala okujjukiza Omugole omukazi we ow’oku nsi Amaka gaffe agajja gye gali ne bwe bwegalifaanana. “Swiitimutima omwagalwa, kati nga bwe nkubuulidde byonna ebikwata ku nsi eno n’engeri gyeri Olusuku Adeni olwa Sitaani, njagala okukubuulira OMULUNDI GUMU NATE ku Maka GO Agajja wamu nange.

Njagala nkubuulire mu bulambulukufu ennyo. Nkimanyi nti ompulidde nga nkikubuulirako emirundi mingi, naye lindako, ku mulundi guno kigenda kuba nga atampulirangako nga nkubuulira.

Njagala nkigende mu buziba. Njagala nkubikkulire nti oli mu Kwagala kwange okutuukiridde nga osigala n’Ekigambo kyange ne nnabbi Wange. Njagala nkuwe eky’okulabirako eky’ekyo ky’oli mu kukola leero nga eky’okulabirako ekituukiridde eky’Ekibuga ekiggya ky’ogenda okubeeramu.

Ddala tugenda kubaako kyetuyingiramu. Nja kubaako ne kyembasuulirayo ekitonotono; Nkimanyi nti mujja Kukikwata. Mujja kubeeranga mu Kibuga ekyo nange. Nabbi wange ajja kubabeeranga awo ku muliraano. Ajja kuba muliraanwa wammwe. Mujja kutambulira mu nguudo ezo eza zaabu munywe ne ku Nsulo Yange. Mulitambulanga okuyingira ensuku za Katonda, nga Bamalayika babawambatidde waggulu nga bayimba ennyimba ez’okutendereza.

Mmwe mujja okuba amayinja ag’omuwendo mu ngule ya nnabbi Wange. Mulitangaalijja okukira buli kimu mu nsi, ku lunaku olwo. Nnina bingi nnyo bye njagala okubabikkulira ku Ssande. Nga lunaaba lunaku lwa kitalo nnyo lwe tunaabeeramu nga tuli wamu”.

Alina bingi nnyo by’atutegekedde mu sabbiiti ezijja entonotono, bw’atajje kutujjawo nga tetunnatuukayo. Sabbiiti ku sabbiiti, nga Atubuulira, ki kye tuli, wa gye tugenda, na ngeri ki gyewanaafaananamu ebusukka eyo. Ajja kuba atukulembera okutuuka mu sabbiiti ya Paasika esinga okuba ey’ekitiibwa gye twali tubadde nayo, ng’ejjudde si kirala kirala kyonna wabula okumutendereza n’okumusinza.

Nga kiseera kya ssanyu. Tulaba obunnabbi nga butuukirira mu maaso gaffe. Tulaba Ekigambo nga kyolesebwa MU FFE. Okujja kwe kwandibaawo akaseera konna. Tuyimiridde ku mulyango nga n’ekimuli kituli mu ngalo. Embalaasi tuziwulira nga zitolontoka emisinde n’omusenyu nga gwekulukuunyiza wansi w’empanka.

Ekigaali ki magulu ana kiri ekikadde ekivugibwa embalaasi kigenda kuyimirizibwa mu bbanga mpaawo kaaga. Tugenda kubuuka tufulumire mu mulyango gw’omubiri guno omukadde tubuukire mu bbanga tugwe mu mikono gye. Ajja kututunuulira Agambe nti, “Byonna biwedde kati, mubissi gwanjuki wange, ka nkutwale kati mu Maka go Amajja.”

Oyanirizibwa okubeera ekitundu ku nnaku ezisinga obukulu ensi zeyali erabye. Obuwungu obuto bugenda kukuŋŋaana okuva mu nsi yonna okuwulira Eddoboozi lya Katonda nga Lyogera n’Omugole We okumubuulira byonna ebikwata ku: Amaka Agajja Ag’Omugole Omusajja Ow’Omu Gggulu N’Omugole Omukazi Ow’okunsi 64-0802, ku ssaawa 6:00 (mukaaga) ez’omuttuntu, mu budde bwe Jeffersonville. (Y’essaawa 1:00 (emu) ey’akawungeezi e Uganda).

Owol. Joseph Branham

Jjukira kino: Temwerabira nti Obudde bw’emisana mu Amerika bwesazeeko essaawa emu.

Ebyawandiikibwa by’olina okusoma nga tonnawulira Bubaka:
Omut. Matayo 19:28
Omut. Yokaana 14: 1-3
Abeefeso 1:10
2 Peetero 2:5-6 / Essuula eyokusatu
Okubikkulirwa 2:7 / 6:14 / 21:1-14
Eby’Abaleevi 23:36
Isaaya Essuula ey’okuna / 28:10 / 65:17-25
Malaki 3:6

23-0305 Olusuku Adeni Olwa Ssitaani

Obubaka: 65-0829 Olusuku Adeni Olwa Ssitaani

PDF

BranhamTabernacle.org

Abaana Bange Abaagalwa,

Muli kikula kyange, Nze Kitammwe ow’omu Ggulu. Mwali mu Nze okuva ku lubereberye. Temukijjukira kati, naye mwaliyo eyo nange. Kale nnayaayaananga okubamanya kuba nali njagala okubakwatako, Njogere nammwe, Mbaagale, era mbasikeko mu mikono.

Nga omwana wange, oli kitundu ku nze, ekyafuuka omubiri, nga nange bwe nnafuuka omubiri, bwe tutyo tusobole okuba n’okussa ekimu ekimu buli omu ne munne nga ab’enju ya Katonda ku nsi. Ekyo kye kyali ekigendererwa kyange era kye nnali njagala okuva ku lubereberye.

Nakukolera Olusuku Adeni tusobole okussa ekimu, naye omulabe Wange n’asensera n’obulimba, ne yeddiza ensi eno okuyita mu kukuvvuunulira obubi pulogulaamu Yange.

Ekiseera ky’olimu kiseera kya kuliirwamu olukwe, naye era kye kiseera ekisinga okuba eky’ekitiibwa mu mirembe gyonna, kubanga kati oyolekedde Emyaka Olukumi emikulu nate; ozzeemu okwolekera Adeni.

Omwoyo wange si kintu ekikusomesebwa okukuyingiramu. Kye kintu kye nnategekerawo okukuyingiramu olw’okumnya kwange okwasooka olw’Omukono gwange ogw’amaanyi. Kati okuyita kwange okusembayo kugenda mu maaso okukwata Omugole Wange; “Mubafulumemu, mweyawule”.

Leero tebagezaako kunyweza Kigambo kyange mu mitima gy’abantu, bagezaako kwenywezaayo. Amakanisa gagezaako kusimba njigiriza zaago mu mutima gw’omuntu. Buli omu mbu, “Nze nnakola kino. Nze, nze, ebyange, eddiini yange, nze, kino.” Be bali mu kwessaawo so si Kigambo kyange ekyayogerwa okuyita mu nnabbi wange.

Tekikwetaagisa kutegeera buli kye njogera, olina bubeezi kukikkiriza kubanga kyekyo kye nnayogera, era ekyo kimala eggobe mu kibya lubeerera.

Omwoyo wange Omutukuvu ali mu kukolera mu ggwe. Bulamu obuli mu ggwe, so si nneewulira; si kika kya bujulizi obw’omubiri obw’engeri emu, naye Ye Muntu, NZE, Yesu Kristo, Ekigambo kya Katonda, nga kinywezeddwa mu mutima gwo, era kireetera buli Kigambo eky’omulembe guno okuba ekiramu. Y’Omwoyo Wange Omutukuvu nga Akolera mu ggwe okusinziira ku Kigambo.

Omugole wange eyasooka yalemererwa olw’okuba yawuliriza okuteesa kwa Sitaani, naye nkwenunulidde nze Mwene, nga kye Kigambo ekyafuuka omubiri. TOJJA KUNJIWA. Ggwe Mugole Kigambo Wange embeerera atajja kuwuliriza kuteesa kwa Sitaani. Ojja kusigala n’Ekigambo kyange.

Emyaka Olukumi nga giweddeko, walibaawo Adeni nate; Obwakabaka bwange obunene bujja kuzzibwawo. Nalwanyisa Sitaani mu lusuku Gesusemane, ne mpangula ne nneddiza Adeni, olusuku lwange. Kati ŋŋenze okubateekerateekera Adeni yammwe Empya mu Ggulu. Nja kuba mbacima mu bbanga ttono nnyo, n’olwekyo emitima gyammwe tegyeraliikiriranga.

Nga tewakyali nnyanja; nga eggulu erisooka n’ensi eyasooka
biweddewo. Nja kugiddaabiriza n’okubatiza kw’Omuliro okujja okutta buli buwuka, buli bulwadde, buli ndwadde, obucaafu bwonna obwali bubadde ku nsi.

Eritutunukayo, eveeyo nga Nsi Mpya. Eggulu lino eryasooka, n’ensi eno eyasooka, bijja kuba bivuddewo. Wajja kubaawo Yerusaalemi Empya ekka okuva mu Nze okuva mu Ggulu. Omwo mwendibeera nammwe, enkula zange entuufu, Batabani bange ne bawala bange. Tulissiza kimu mu butukuvu, nga amaaso
gammwe gazibiddwa obutalaba kibi kyonna.

Nkomyewo nate gye muli nga bwe nnabasuubiza nti bwendikola. Nkuumye Ekigambo kyange gyemuli. Nsiimye Ekigambo kyange okukwatibwa ku ntambi za magineeti bwekityo waleme kubaawo butategeeragana, mpaawo kubuusabuusa, wabula Ekigambo kyange ekirongoofu kulwammwe; kubanga Kiri Bw’atyo Bw’Ayogera Mukama.

Mukuume emitima gyammwe nga mirongoofu. Mukuume emitima gyammwe nga gibikkiddwako. Amaaso gammwe mugakuume nga gabikkiddwako obutalaba bintu by’ensi okufuuka omuntu ow’ettutumu.

Temwerabira, nja kukyukira ebugwanjuba nziremu nkomewo, olumu ku nnaku zino. Okutuusa mu kaseera ako, Twalanga Erinnya lyange; Lijja kukuwa essanyu era likugumye, Litwalenga, wonna w’olaga, ng’onyiga zannya.

Tewekkiriranya na Kigambo kimu. Ekigambo kyange ku lutambi tekyetaaga kuvvuunula. Oli kitundu ku Nze, enkula Yange. Ensi eno lusuku Adeni olwa Sitaani, naye nkukoledde Adeni Empya mwe tunaamala obutaggwawo nga tuli wamu. Okutuusa mu kaseera ako, mwekuŋŋaanyize ku Kigambo kyange. Mwagalanenga.

Mujja mubeegatteko ku Branham Tabanako Ssande eno ku ssaawa 6:00 (mukaaga) ez’omuttuntu, mu budde bwe Jeffersonville. (Z’essaawa 2:00 (bbiri) ez’ekiro e Uganda), era muMpulire nga njogera nga mpita mu nnabbi Wange omulonde era mbikkule Ekigambo kyange nga bwe muwulira; Olusuku Adeni olwa Sitaani 65-0829.

Ku lulwE,
Owol. Joseph Branham

Ebyawandiikibwa by’olina okusoma:
2 Timoseewo 3:1-9
Okubikkulirwa 3:14
2 Abasessaloniika 2:1-4
Isaaya 14:12-14
Matayo 24:24

23-0226 Akasengejja K’omuntu Alowooza

Obubaka: 65-0822E Akasengejja K’omuntu Alowooza

BranhamTabernacle.org

Ekibiina ky’Ow’oluganda Branham Abaagalwa,

Nnandyagadde okwaniriza ensi okutwegattako ku mukutu Ssande eno ku ssaawa 6:00 (mukaaga) ez’akawungeezi, mu budde bwe Jeffersonville. (Z’essaawa 2:00 (bbiri) ez’ekiro e Uganda), nga ffe Empungu tukuŋŋaanira awamu mu emu ku kkanisa za nnabbi buli square mayiro ebikumi bibiri. Tujja kuwulira Katonda ng’Ayogera ng’Ayita mu mubaka malayika We ow’omusanvu era atubuulire nti:

Obubaka buno, n’Obubaka obulala bwonna bwe njogerako, busindikibwa eri ekibiina kyange. Si bwa kibiina kyo okuggyako nga baagala okubufuna. Naye busindikibwa eri abantu bano wano.

Ayogera naffe, EKITIIBWA, ekibiina kye. Si mmwe abagamba nti, “Ow’oluganda Branham ye nnabbi, naye si ye musumba wange. Omusumba waffe agamba nti okuzannya entambi mu kkanisa tekikwatagana na Kigambo kya leero.” “Omusumba waffe atugamba nti tulina kuwuliriza ye. Okusinziira ku Kigambo, atukulembera nga akozesa Omwoyo Omutukuvu kati.”

Nabbi yakugamba, ggwe n’omusumba wo.

Eri abaweereza bonna mu kifo kyonna, essaawa yonna, kino tekyogerwa obutassaamu kitiibwa njigiriza zammwe, kino n’okuba tekitunuuliziddwa eri ndiga zammwe.

Tetwagala kubateganya ab’oluganda ne bannyinaze. Tukitegeera, Tekitunuuliziddwa eri mmwe, wabula eri ffe, abakkiriza nti Omwoyo Omutukuvu ataddewo omubaka malayika we ow’omusanvu okubeera omusumba waffe n’okutukulembera, ffe ekkanisa Ye. Tukkiriza nti okuzannya entambi LY’EKKUBO LYOKKA ETTUUFU. Oli mutuufu mu kukola ekyo nnabbi wo yakugamba GGWE okukola:

Era bulijjo mbajuliza, bwe baba nga ba mmemba b’ekkanisa emu, nti “Laba omusumba wo.”

Olina okukola nga omusumba wo bw’agamba.

Olwo nnabbi n’agamba omusumba wo omulundi omulala, okukakasiza ddala nti akitegeera.

Kati, omusumba, njagala okimanye nti, nti, kino kiri eri kibiina kyange kyokka kye ŋŋamba ebintu bino. Era nnina eddembe okukola ekyo, kubanga nateekebwawo Omwoyo Omutukuvu okukuuma endiga zino.

Atumiddwa okutukuuma, endiga ze; abo Katonda b’Atadde mu BULABIRIZI BWE. Omwoyo Omutukuvu ye musumba waffe nga bw’Ayogera naffe era nga atukulembera buli lunaku n’Eddoboozi lye eryakakasibwa.

Kino Mukama ky’atukulembera okukola. Tetukuwakanya ggwe oba omusumba wo, oba engeri gy’owulira ng’okulembeddwamu Mukama okukola. Buli muntu alina okukola nga bw’awulira nti Mukama bw’Amukulembera okukola okusinziira ku Kigambo.

Tulina akasengejja kamu, OBUBAKA BUNO. Buli kye tuwulira kirina okuyita mu kasengejja ako. Eddoboozi lye tuwulira ku ntambi lye ddoboozi lyokka lye tulina obwesige kikumi ku kikumi okubeera Bwatyo Bw’Ayogera Mukama.

Okkiriza nti okufukibwako amafuta okwo okuli ku bantu abo kitegeeza nti kwe kufukibwako amafuta kw’Omwoyo Omutukuvu?” Yee, ssebo, Omwoyo Omutukuvu wa Katonda owa nnamaddala ku muntu, kyokka ate nga omuntu oyo wa bulimba.

Enkomekkerero yaffe ey’olubeerera esinziira ku bye YAYOGERA KU LUTAMBI, so si omusajja omulala yenna oba ekibinja ky’abasajja kye boogera. Bwe tutyo, tetusobola, era tetujja kuwulira mulala yenna. Omuntu yenna ayinza atya okukizannyiramu zzaala?

Mujje mwekuŋŋaanyize wamu naffe n’okusingawo ennyo nga bwe mulaba olunaku nga lusembera.

Abantu basobola okutuula ntende mu maka gaabwe oba mu…ne bakuŋŋaanira mu bifo byabwe, mu makanisa gaabwe, n’ebirala, ne bawulira ssaaviisi.

Ekyo, bannange, okusinziira ku nnabbi wa Katonda, si okusinziira ku kuvvuunula kwa muntu omu ku Baibuli by’eyogera, kwe kwekuŋŋaanyiza awamu ku Kigambo n’okusingawo ennyo nga bwe tulaba olunaku nga lusembera.

Essanduuko omutali Katonda eba egasa ki? Kiba kisanduuko busanduuko eky’embaawo, emmeeza bbiri ez’amayinja.

Jjangu okuŋŋaane naffe nga bwetuwuliriza akasengejja Katonda ke yatuwa, nga bw’Atuleetera Obubaka: Akasengejja K’Omuntu Alowooza 65-0822E.

Owol. Joseph Branham

Kebera ky’olwanirira. Kebera ekikubeezezza wano. Kebera ekikutwala mu kkanisa. Ekikufuula…Kirungi okugenda mu kkanisa, naye togenda bugenzi ku kkanisa kyokka; ekyo tekijja kukulokola.

23-0219 Kristo Abikkuliddwa Mu Kigambo Kye Ye.

Obubaka: 65-0822M Kristo Abikkuliddwa Mu Kigambo Kye Ye.

BranhamTabernacle.org

Ekisibo kyange Ekitono,

Mbalamusaako mmwe nammwe abali ku mukutu guno ogw’amasimu, omulungi ennyo ddala. Nneebaza nnyo Mukama nti musobola okutuula ntende mu maka gammwe, ne mukuŋŋaanira mu bifo byammwe, mu makanisa gammwe, ne muwulira ssaaviisi. Yonna eyo eddoboozi lyange gyeliri mu kubatuukako, akabinja ako akatono kaweebwe omukisa.

Leero, njagala okubawandiikira akabaluwa k’omukwano akatono okuva ku mutima gwange okubazzaamu amaanyi. Yemmwe Katonda be yalonda okubeera Omugole we nga ensi tennatandikibwawo; mmwe abali mu kuwuliriza entambi zino. Mbagambye emirundi mingi nnyo, entambi zino zammwe mwekka, mmwe kibiina kyange. Sivunaanyizibwa ku Katonda bye yawa abaweereza abalala okusumba; Nze nvunaanyizibwa ku Mmere kika ki gye mbaliisa, ekyo kyokka. Entambi zino zammwe, weema yange yokka, Katonda b’Ampadde okusumba. Ye Mmaanu eyakwekebwa, omulala tasobola KuGilya.

Kati, abantu abamu bwe baba baagala okutabika-tabika emmere n’ebintu ebweru eyo, okubikkulirwa bakufune kuva eri Katonda era bakole Katonda ky’abagamba okukola, balye ku mmere yonna gye baagala. Nja kukola ekintu kye kimu. Naye Obubaka buno bwammwe mwekka.

Nfuba nga bwe nsobola okusigala butuufu n’Ekigambo, ku lwammwe abateekeddwa mu mikono gyange okuva eri Katonda, ’kubanga endiga zaagala mmere ya ndiga. “Endiga zange ziwulira Eddoboozi lyange.” Era ekyo ky’ekitubeezawo, buli Kigambo ekifuluma. Si Kigambo kimu leero ne luli, wabula buli Kigambo ekiva mu kamwa ka Katonda. Ekyo ky’ekibakuuma mmwe abatukuvu nga muli balamu.

Buli muntu alina okuba n’ekintu kyeyeenywerezaako. Ekintu ekimu kirina okuba nga ye nkondo, mu njogera endala, ekisukkulumu mu byonna. Era buli muntu alina okuba n’ekisukkulumu mu byonna oba abusoluuti. Eri nze, n’eri abo be nsuubira nti nkulembera eri Kristo, era ku bwa Kristo, Baibuli ky’ekisukkulumu kyaffe mu byonna.

Kati, tukizuula nti Katonda yatutumira bannabbi be. Eyo y’engeri gy’alina ey’okuleetamu Ekigambo kye eri abantu, ng’ayita mu mimwa gya nnabbi we. Kati mu nnaku zino ez’oluvannyuma, Asuubizza okweyolesa mu bujjuvu nate, obw’omubiri gwe, mu Mwoyo. Ye Katonda Mwene mu ngeri y’ennukuta, mu ngeri ya nnabbi, nga Ayoleseddwa mu mubiri.

Nteekwa okubeera ntakera mu Maaso g’Omuwandiisi nga ne bbayiro yange ngitegese ekiseera kyonna okukoloboza wansi kyonna ky’ayogera. Ebirowoozo byange biteze (ng’omuntu bw’atega leediyo), biteze birowoozo bye; si omuntu ky’alowooza, omulembe kye gulowooza, ekkanisa ky’elowooza, obwakabaka kye bulowooza. Birowoozo bya Katonda byokka! Kyenkola kyokka kwe kutegeeza ebirowoozo bya Katonda mu ngeri y’Ebigambo.

Katonda bw’Ambikkulira ebirowoozo Bye, mbibategeeza mu ngeri y’Ebigambo byempisa ku lutambi, nti “BW’ATI BW’AYOGERA MUKAMA!” Tekiri, “Bwenti bwe Njogera.” Kiri, “BW’ATI BW’AYOGERA MUKAMA!” Nsobola kuKivvuunula nga Omuwandiisi bw’Aba Aŋŋanyizza okuKibavvuunulira; kubanga Kye Kigambo kya Katonda eky’obwa nnantakola nsobi.

Waliwo n’abalala bangi abagezaako okwefuula nze, nga bakabona, n’abalala. Era bakola ki? Babivuya buvuyi, kye kyokka. Tewali ngeri gyebakisobolamu yadde. Katonda yantuma, nze nnabbi We, okukulembera Omugole We; si musajja mulala, oba si kibinja ky’abasajja.

Ebigambo bye njogera, n’engeri gye nneeyisaamu, bijja kuziba abalala amaaso, naye bizibule amaaso g’abalala. Yannyambaza ekyambalo kye nnali ow’okwambalanga, obutonde bwange, ekigendererwa kyange, buli kimu nga kiri nga ddala bwennina okuba. Yannonda butuukirivu ddala kulwammwe. Abalala baalinga baakuyimirira batunule bagambenga nti, “Kale, sisobola. Waliwo…nze—sisobola kulaba.” Baazibibwa amaaso.

Ajja kubikkulira oyo gw’anaakibikkulira. Yeewunda bw’ati, nti Asobola okwekweka mu Byawandiikibwa, okuva eri abaasomerera ebya Katonda abasinga obugezi betulina. Asobola okwekweka obwekwesi, n’atuula awo wennyini mu Kyawandiikibwa, era basobola okutunula olunaku lwonna ne batakiraba yadde; ne bakinoonyeza obulamu bwabwe bwonna, ne batakiraba yadde. Asobola okwekwekako ka bwekwesi, ng’Atudde awo.

Ensonga enkulu kati eri nti abo abafuna Obubaka mu mitima gyabwe, bateekwa okugalamira mu Maaso g’Omwana, okwengezebwa. Munyige Zannya olwo muleke Omwana Abamamirire omusana gubamalemu bu ka kiragala, abafuule Abakristaayo abengevu.

Bwe yajja omulundi ogwasooka, yali musajja. Bw’ajja omulundi ogw’okubiri; ng’alina omugabo ogw’emirundi ebiri, yali musajja. Bwe yajja mu ngeri ya Yokaana Omubatiza, yali musajja. Yasuubiza okujja mu lunaku luno Atambulirenga era Yeebikulirenga mu musajja omu omulundi omulala; Omwana w’omuntu oli nga abeera mu mubiri gw’omuntu ow’okunsi.

Kati tuli mu mulembe gw’Eriiso, ogw’obunnabbi, ogwa Malaki 4. Tewali kirala kikyasigaddeyo kyo okujja okuggyako Ye yennyini okukka n’Ayingira mu ekyo, ’kubanga ekyo kye kintu ekisembayo ekiriwo.

Muwulirize, obuliga bwange obuto, mmwe Katonda b’Ampadde okusumba. Essaawa ya kikeerezi. Ajja mangu ku lwammwe, Omugole we. Musigale n’entambi ezo, tekyetaaga kuvvuunula.

Mbaaniriza mmwe obuwungu obuto mujje munneegatteko nga twegatta n’ekintu kyokka ekigenda okugatta Omugole We Ssande eno ku ssaawa 6:00 (mukaaga) ez’akawungeezi, mu budde bwe Jeffersonville. (Z’essaawa 2:00 (bbiri) ez’ekiro e Uganda). Ojja kuwulira Bwatyo Bw’ayogera Mukama nga Katonda ayogera okuyita mu nze nga Abikkula: Kristo Abikkuliddwa Mu Kigambo Kye Ye 65-0822M.

Jjukira, SIGALA N’OBUWEEREZA BW’OLUTAMBI. NYIGA ZANNYA BULI LUNAKU.

Ow’oluganda Branham

Ebyawandiikibwa by’olina okusoma nga tonnawulira Bubaka:

Okuva 4:10-12
Isaaya 53:1-5
Yeremiya 1:4-9
Malaki 4:5
Omut. Lukka 17:30
Omut. Yokaana 1:1 / 1:14 / 7:1-3 / 14:12 / 15:24 / 16:13
Abaggalatiya 1:8
2 Timoseewo 3:16-17
Abebbulaniya 1:1-3 / 4:12 / 13:8
2 Peetero 1:20-21
Okubikkulirwa 1:1-3 / 10:1-7 / 22:18-19

23-0212 So Tokimanyi

Obubaka: 65-0815 So Tokimanyi

BranhamTabernacle.org

Omugole Alindirira Omwagalwa,

Era nkimanyi nti, nga mmaze okugenda nga nvudde mu nsi eno, entambi ezo n’ebitabo ebyo bijja kuwangaala bisigalewo, era bangi kummwe abaana abato mulikizuula, mu nnaku ezirijja, nti gano ge Mazima gennyini, kubanga nkyogera mu Linnya lya Mukama.

Mujje mutwegatteko Empungu, Ssande eno ku ssaawa 6:00 (mukaaga) ez’akawungeezi, mu budde bwe Jeffersonville. (Z’essaawa 2:00 (bbiri) ez’ekiro e Uganda), nga bwetuwulira 65-0815 – So Tokimanyi.

Owol. Joseph Branham

23-0205 Ebyokubaawo Ngabitangazibwa Obunnabbi

Obubaka: 65-0801E Ebyokubaawo Ngabitangazibwa Obunnabbi

BranhamTabernacle.org

Abantu b’Ekiseera kino Abaagalwa,

Kitaffe, tuKwagala nnyo. Tuyinza tutya okutandika okulaga ebyo bye tuwulira? Watulonda, Watwawula edda, n’ofuuka Omuntu omulamu okuwaayo Obulamu Bwo ku lwaffe.

Watuwandiikira ebirowoozo byo byennyini nga Oyita mu bannabbi bo, tusobole okuba n’Ekigambo Kyo. Olwo, nga bwewasuubiza, n’Ojja omulundi omulala, nga weebikkula mu mubiri gw’omuntu nga okozesa ebyatuukawo nga obunnabbi bwabilambulula, okuvvuunula n’okubikkula Ekigambo Kyo.

Olw’okulonda Kwo Ggwe, Walonda William Marrion Branham okubeera omusajja w’ekiseera kino. Ggwe wamulonda okutukwatako tusseeyo omwoyo ku by’agamba. Watambuzanga emikono gye. Watambuzanga amaaso ge mu kwolesebwa. Teyasobolanga kubaako ky’ayogera okuggyako ebyo bye Wali omulaze.
Teyasobolanga kwogeranga kintu kirala okuggyako ebyo bye Wateeka mu kamwa ke. Walina obuyinza obujjuvu ku lulimi lwe, engalo ze, na buli kitundu ky’omubiri gwe. Yali abulidde ddala mu ggwe.

Olwo, olw’okulonda Kwo ggwe era nate, Watulonda tubeere abantu ab’ekiseera kino. Akabinja ko akatono akakuŋŋaanyizibbwa olw’okuluŋŋamizibwa kw’Ekigambo Kyo, nga kaddamu okufulumya, Obulamu bwa Yesu Kristo. Ffe Kigambo Kyo nga twegatta ku Kigambo. Tetulina kirala kye tusobola kukola.

Kitaffe, twagala okubeera mu Kwagala Kwo ekutuukiridde; tewali kirala kikulu gye tuli. Tetwagala ndowooza yaffe, ebirowoozo byaffe, oba omusajja omulala yenna by’ayogera, okwagala Kwo kwokka.

Tugenze mu Kigambo Kyo okulaba byeWagamba nti tulina okukola okusobola okubeera Omugole Wo. Wagamba nti Ogenda kusalira ensi omusango olunaku lumu olw’Ekigambo Kyo. Watugamba nti Ekigambo Kyo kijja eri bannabbi bo BOKKA, abaamanyibwa edda era ne bayawulibwa Ggwe.

Watugamba Tekijja eri munnaddiini oba ekibinja ky’abasajja abamu, wabula okuyita mu nnabbi Wo. Y’ajja kuba Omuvvuunuzi Wo ow’Ekigambo ow’obwakatonda yekka. Si birowoozo bye, ebirowoozo bye, okuvvuunula kwe, wabula Ggwe nga Oyogera okuyita mu ye, ng’Ovvuunula Ekigambo Kyo.

Mu buli mulembe, abantu baleka abasajja okuteeka enzivuunula yaabwe ku Kigambo Kyo, era kibaleetera okuzibwa amaaso. Kikola ekintu kye kimu kye yakola ku Bafalisaayo n’Abasaddukaayo. Eyo y’ensonga lwaki abantu balemererwa okuKifuna leero. Bawuliriza omuntu omulala by’ayogera ku Kyo, mu kifo ky’okuwuliriza Ekigambo nga nnabbi Wo bwe yabagamba okukola.

Wagamba nti, nsooka kusindika Kigambo kyange, olwo abantu bwe batajja kukkiriza Kigambo kyange, olwo ne mbaweereza obuweereza. Era wagamba nti mu buli mulembe obuweereza bubula; si bonna, wabula abasinga obungi, ne bakulembera abantu nga babazza eri bo bennyini. Twagala kubeera mu Nteekateeka Yo nnakabala.

Kibuzaabuza nnyo, abaweereza tebasobola kukkiriziganya bokka na bokka. Ow’oluganda M tayinza kukkiriziganya na Waaluganda Y; Ow’oluganda Y takkiriziganya na Waaluganda Z. Tebasobola kukkiriziganya na bannaabwe. Balabika nga abakkiriziganyiza ku kintu kimu kyokka, tetulina kuzannya ntambi mu kkanisa.
Ye Babulooni omulundi omulala nate, nga kitabula nnyo. Tukkiriza nti waliwo Enkola y’omuddiriŋŋanwa egoberekeka emu yokka era tulina okwebajja tuje mu nkola y’omuddiriŋŋanwa egoberekeka eyo, so si kugezaako kubajja Nkola eyo okutujaamu.

Wabaddewo obuweereza bungi nnyo obusituse n’ebirowoozo byabwo, okuvvuunula kwabwo n’enjigiriza zaabwo. Bwonna bugudde butaka. Wabaddewo abaweereza abaayawulibwa abakulu abasitusenga nga bagamba mbu babuulira era mbu bajuliza Obubaka bw’ekiseera, era obuweereza bwabwe lye Kkubo Katonda lyeYateekawo leero, so si ntambi.

Balina abantu abeesimbu abagenda mu masinzizo gaabwe, ababawulirizza okumala emyaka. Balina abaweereza bangi ababakyalira, enkuŋŋaana, okudda obuggya, okubuulira, nga bagamba nti bye boogera lye Kkubo Lyo lye Watuteerawo, so si ntambi. Awo oluusi ne bagamba mbu, Obubaka si ge mazima.

Baali tebakebera by’ayogera n’entambi? Baali batwala butwazi kye yagamba nti kye Kigambo, lye Kkubo Katonda lye Yateekawo leero? Singa yali azannye buzannya ntambi, Eddoboozi Lyo eryakakasibwa olw’abantu, mu kifo ky’okwessaawo ng’eddoboozi erisinga obukulu, bandibadde bamanya nti kye baali bawulira kwali kuyigiriza kw’eyafukibwako amafuta ow’obulimba mu kiseera eky’enkomerero.

Ekyo tekitegeeza nti teweetaaga musumba. Tekitegeeza nti abasumba bonna baafukibwako amafuta ba bulimba. Tekitegeeza nti waliwo bangi ababuulira ekyo kyennyini Ow’oluganda Branham kye yayogera. Kitegeeza nti ekintu ekisinga obukulu ky’olina okuwulira bwe Bubaka obuli ku ntambi; Obwo bwe BW’ATI BW’AYOGERA MUKAMA BWOKKA.

Obwo Ye ndagiriro. Obwo Ye Abusoluuti. Kye Kigambo eky’enkomeredde. Kye Kigambo kyokka ekituukiridde. Okujjako nga omusumba wo, omukulembeze wo ow’omwoyo, nga awuliriza Ekigambo ekyo ekirongoofu n’abantu be, wajja kubangawo ekikyama.

Lwaki obuweereza tebujja kuzannya Eddoboozi Lyo eryakakasibbwa mu masinzizo gaabwe? Bayinza batya okugamba nti kikyamu ate nga bagamba nti bakkiriza Kye Kigambo? Lwaki bakola eby’okwekwasa ebya buli ngeri ne bagamba nti obuweereza bwabwe lye Kkubo Lyo ly’owadde leero, so si Eddoboozi lyo eryakakasibwa ku lutambi?

Lwaki batiisa abantu nga bagamba nti kubanga tugamba nti “NYIGA ZANNYA” okuwulira Eddoboozi Lyo, tusinza musajja so si Ggwe Ayogera ng’Oyita mu musajja oyo?

Tusinza GGWE WEKKA KITAFFE. Tukikebera n’Ekigambo Kyo emirundi n’emirundi. Otubuulira ng’Oyita mu nnabbi wo mu buli Bubaka bwe tuwulira ku ntambi nti: Ye Kkubo lyo lyokka lye Wateekawo olwaleero.

Walala wa Omugole Wo w’ayinza okugenda okuggyako butereevu eri Ekigambo Kyo. Ffe Mugole Kigambo Wo Embeerera. Tulina okusigala n’Empagi Yo ey’Omuliro. Kye kifo kyokka we tusobola okumatira n’okugamba amiina eri buli Kigambo kye tuwulira.

Kitaffe, tuKulaba wabweru w’ekkanisa Yo ng’Ogezaako okuyingira, era kitumenya omutima. Ekinyolo kiri munda era tukugguliddewo oluggi Oyingire. Tetulina kirala kye tumanyi. Tetwagala kintu kirala kyonna. Tetusobola kutwala kintu kirala kyonna. Tulina olubuto lw’Ekigambo Kyo.

Tweyanzizza Kitaffe olw’Okubikkulirwa kw’Ekigambo kyo. Tetuwakanya muntu yenna, tuli bubeezi ba Kigambo Kyo obunnabbi bweKyalambulula. Tujja kuyimirira mu maaso go olunaku lumu mu musango. N’emitima gyaffe gyonna twagala okugamba nti, “Kitaffe, tusigadde n’Ekigambo Kyo.”

Kubiriza omusumba wo, omukulembeze wo ow’omwoyo, Okunyiga Zanya ku Ssande eno owulire Eddoboozi lya Katonda. Ojja kusalirwa omusango olunaku lumu okusinziira ku ekyo Ekigambo kya Katonda kye kyogera ku ntambi. Oyinza otya okukozesa omukisa gwo ku kintu ekirala kyonna?

Oyanirizibwa okujja okutwegattako Ssande eno ku ssaawa 6:00 (mukaaga) ez’akawungeezi, mu budde bwe Jeffersonville. (Z’essaawa 2:00 (bbiri) ez’ekiro e Uganda), era owulire: Ebigenda Mu Maaso Nga Obunnabbi Bwabirambulula 65-0801e, nga Katonda ayogera ng’Ayita mu mimwa gy’omusajja gwe Yeelondera. Oyo gwe yawa eri ekibiina kye, ekirabo kye. Yamuwa obutonde bwe, sitayiro ye, ne kyonna kye kiri, engeri gy’ayogeramu, ne kyonna ky’akola. Yafuula William Marrion Branham omusajja w’ekiseera kino okufunayo abantu b’ekiseera kino, era ffe BANTU B’EKISEERA KINO.

Owol. Joseph Branham

Ebyawandiikibwa:
Olubereberye: 22:17-18
Zabbuli: 16:10 / Essuula 22 / 35:11 / 41:9
Zekkaliya 11:12 / 13:7
Isaaya: 9:6 / 40: 3-5 / 50:6 / 53:7-12
Malaki: 3:1 / Essuula ey’okuna yonna
Omut. Yokaana 15:26
Omut. Lukka 17:30 / 24:12-35
Abaruumi: 8:5-13
Abebbulaniya: 1:1 / 13:8
Okubikkulirwa: 1:1-3 / Essuula 10 yonna

23-0129 Katonda W’Omulembe Guno Omubi

Obubaka: 65-0801M Katonda W’Omulembe Guno Omubi

BranhamTabernacle.org

Embeerera za Kristo Entono, Ekigambo, Ekisibo Abaagalwa,

Tetusobola kuba kintu kirala kyonna. Tetusobola kuwulira kintu kirala kyonna. Tetulina kirala kye tumanyi. Tetwagala kintu kirala kyonna. Awali Ennyama ensu, NYIGA ZANNYA, ekyo nga kye Kigambo ky’entuuko zino, awo empungu wezinaakuŋŋaaniranga. Ekigambo nga kifuuka Obulamu muffe.

Tetuli beebamu n’abantu abalala bonna! Muli bantu abaayawulibwa, abatukuvu eri Mukama, abeewaddeyo eri Ekigambo n’Omwoyo wa Katonda, okubala ebibala by’ekisuubizo kye olw’olunaku luno. Bulijjo tukula era nga twengera nga tuwulira Eddoboozi lya Katonda.

Nabbi yatugamba tuddengayo tujulize entambi zino. Bw’oba olina ekyuma ekizannya entambi, kuŋŋaanyaayo ekibinja ky’abantu oluzannye, era muwulirize bulungi. Wuliriza Eddoboozi lye, by’Atugamba. Ekigambo kya Katonda tekyetaaga kuvvuunula; Akola okuvvuunula kwe Ye. “Nze Ddoboozi lya Katonda gyemuli.”

Era kye kino, Baibuli, si kigambo kimu okugattibwa ku Yo oba okuggyibwamu. Sigala busigazi butuufu n’Eddoboozi eryo. “Omulala tezirimugoberera,”

Omuntu yenna ayinza atya obutalaba Kkubo lya Katonda ly’Attaddewo ku lw’olwaleero? Naye ekitiibwa kibe eri Katonda, tusobola okuKiraba, kubanga twalondebwa okuKiraba. Tetujja, era tetusobola kulimbibwa, kubanga tuli Kigambo kye ekyolesebbwa.

Ab’oluganda ne bannyize, ekyo leka kitunnyikiremukko akadakiika kamu kokka, FFE EKIGAMBO EKYOLESEDDWA!! Katonda Mwene, ng’Ayogera ng’Ayita mu mimwa gy’omuntu ow’okunsi, atugamba nti FFE KIGAMBO. Tetulina yadde n’akatono kye tutya. Buli kye twetaaga kyaffe.

Buli wiiki tubeera wansi w’okusuubira okw’amaanyi Mukama okutukyalira. Tetulina kifo wano kutuuza buli muntu, era buli muntu tasobola kujja mu Jeffersonville, kale tuba tulina kubaweereza buweereza Kigambo nga tuyita mu yintaneeti.

Tuli mu maka gaffe, mu masinzizo gaffe, mu mmotoka zaffe, nga tukuŋŋaanidde ku buzindaalo bwaffe obutono okuva mu nsi yonna, nga tulindirira Okujja kwa Mukama.

Bakuŋŋaanye wamu naffe mu Afrika, nga balindirira Okujja kwa Mukama. Bakuŋŋaanye wamu naffe mu Mexico, nga balindirira Okujja kwa Mukama. Mu Bulaaya, Scandinavia, Australia, mu buvanjuba obw’amasekkati, South America, okuva ku nsonda ennya ez’ensi, nga balindirira Okujja kwa Mukama.

Era tukuŋŋaanidde wano mu kkanisa y’awaka, ku tabanako, nga tulindirira Okujja kwa Mukama. Twawukana essaawa nnyingi mu budde, naye tuli wamu nga EKITOLE KIMU, abakkiriza, nga tuwuliriza Eddoboozi lya Katonda, nga tulindirira Okujja kwa Masiya.

FFE bantu ba Katonda abaayitibwa era abaalondebwa okuva mu mulembe guno omubi olw’Erinnya lye. Tugezesebwa era ne tukakasibwa eri Sitaani nti ffe Kigambo. Tuli kitundu ku Muti ogwo ogwo Nnakabala ogw’Omugole. Tulaba obulamu bwaffe nga bwolesebwa Ekigambo ekyo.

Kyangu buli muntu okukkiriza nti Yesu ye yali eky’okuddamu obutereevu eri buli bunnabbi obwali bugenda okutuukirira mu ye, kubanga batunula emabega okubulaba nga butuukirira. Naye mu mulembe guno omubi ogw’akaseera kano, bakola ekintu kye kimu kye baakola mu kiseera ekyo, nga baKitaputa mu ngeri endala, era baleetedde abantu okugenda mu kukyamya okukola, bakkirize eby’obulimba. Singa basobola okutegeera nti Kye Kigambo kye kimu eky’omulembe guno ekiri mu kwolesebwa.

Waliwo ekintu kimu kyokka ekiyinza okugatta Omugole, Obubaka buno. Waliwo ekintu kimu kyokka ffenna kye tuyinza okukkiriziganyaako, Obubaka buno. Waliwo Eddoboozi limu lyokka erikakasiddwa okuba Bw’ati Bw’agamba Mukama, Eddoboozi lya Katonda ku lutambi.

Kati, amakanisa ag’ekibuguumirize obubuguumirize, ag’enneeyisa ey’ekikungu, agannyogoga n’ebirala, ag’eby’eddiini ebikoleddwa abantu, ekyo tekyandibadde; Abalonde ekyo tebayinza kukiteekako mwoyo n’akatono. Naye kiri eyo waggulu kumpi nga kiringa kiri ekituufu. Okulekayo Ekigambo kimu kyokka ky’olina okukola. Kyasuubizibwa ku mulembe guno; ekiseera kikulu nnyo! Abakristaayo, buli wamu, mufeeyo ku ssaawa gye tulimu! Baako w’owandiika oba w’olamba, era osome, era owuliririze kumpi.

Katonda w’omulembe guno omubi akola kyonna ky’asobola okulimba abantu okuyita mu kukugira Eddoboozi Lya Katonda eryakakasibwa okubatuukako. Agezaako okubaleetera obutakkiriza Kigambo kimu kyokka, nga bwe yakola Kaawa mu lubereberye.

Naye Omugole-Kigambo owa Kristo ajja eri Omutwe. Tuli mu kugattibwa nate n’Omwagalwa waffe eyo gye twatandikira. Ekiseera ky’okuva kisembedde. Katonda ajja okucima Omugole we asigadde n’Ekigambo Kye.

Omwoyo Omutukuvu Ali wano nga Ayita Omugole ku lwa Kristo. Akikola okuyita mu kukakasa Ekigambo kye eky’ekisuubizo gy’ali, olw’omulembe guno, ng’alaga nti Ye Kristo.

Tewali kisinga bukulu ku kubeera obumu n’Omugole okwetoloola ensi yonna, ng’owuliriza Eddoboozi lya Katonda nga lyogera butereevu naawe. Mpaawo bya kusuubira, kwewuunya oba wadde okusaba nti oba by’owulira mazima. Kubanga LYE DDOBOOZI BW’ATI BW’AYOGERA MUKAMA LYOKKA, ERYAKAKASIBWA.

Jjangu twegatteko owulirize:

Oluvannyuma lw’ebyo ne ndaba malayika omulala ng’akka okuva mu ggulu, ng’alina obuyinza bungi; n’ensi n’emulisibwa ekitiibwa kye.

ku ssaawa 6:00 (Mukaaga) ez’omu ttuntu mu budde bwa Jeffersonville (z’essaawa bbiri ez’ekiro e Uganda), nga bwe tuwulira: Katonda W’Omulembe Guno Omubi 65-0801M.

Owol. Joseph Branham

Ebyawandiikibwa by’olina okusoma nga tonnawulira Bubaka:

Omut. Matayo essuula 24 yonna / 27:15-23
Omut. Lukka 17:30
Omut. Yokaana 1:1 / 14:12
Ebikolwa 10:47-48
1 Abakkolinso 4:1-5 / 14 yonna
2 Abakkolinso 4:1-6
Abaggalatiya 1:1-4
Abeefeso 2:1-2 / 4:30
2 Abasessaloniika 2:2-4 / 2:11
Abebbulaniya essuula ey’omusanvu
1 Yokaana Essuula 1 / 3:10 / 4:4-5
Okubikkulirwa 3:14 / 13:4 / Essuula 6-8 ne 11-12 / 18:1-5
Engero 3:5
Isaaya 14:12-14