All posts by admin5

25-1026 Tunula Eri Yesu

Obubaka: 63-1229E Tunula Eri Yesu

BranhamTabernacle.org

Abawuliriza b’Olutambi Abaagalwa,

Ekiseera kituuse buli omu mw’ateekwa okwebuuza: “Bwe mpuliriza entambi, Eddoboozi ki lye mba mpulira? Liba bubeezi ddoboozi lya William Marrion Branham, oba mba mpulira Eddoboozi lya Katonda ery’olunaku lwaffe? Kigambo kya muntu, oba mba mpulira Bw’Atyo Bw’Ayogera Mukama? Nneetaaga omuntu okuvvuunula bye mpulira, oba Ekigambo kya Katonda tekyetaaga kuvvuunula?”

Eky’okuddamu kyaffe kiri nti: Tuli mu kuwulira Ekigambo Ekyogere nga kifuuse omubiri. Tuli mu kuwulira Alufa era Omega. Tuli mu kuwulira Ye, Empagi y’Omuliro, ng’Ayogera ng’Ayita mu mimwa gy’omuntu ow’oku nsi nga bwe Yagamba nti bw’Alikola mu lunaku lwaffe.

Tetuwulira musajja, tuwulira Katonda, aba obumu jjo, leero, n’emirembe gyonna. Eddoboozi lya Katonda eddamu, era ekkozi, era erisala okusinga buli kitala kyonna eky’obwogi obubiri, nga liyitamu n’okwawula ne lyawulamu eggumba, era lyangu okwawula okulowooza n’okufumiitiriza okw’omu mutima.

Kitubikkuliddwa nti kye Yali bwe Yatambulanga mu Ggaliraaya kye kimu ky’Ali ekiro kino e Jeffersonville; ekintu kye kimu ky’Ali ku Branham Tabanako. Kye Kigambo kya Katonda ekyoleseddwa. Kye yali mu kiseera ekyo, ky’Ali ekiro kino, era ky’Aliba lubeerera. Kye Yagamba nti Ajja kukola, Akikoze.

Omusajja nga ye si ye Katonda, wabula Katonda akyali mulamu era Ali mu kwogera n’Omugole wE ng’Ayita mu musajja oyo. Tetuyinza kweteeka mu ntata ya kusinza musajja, wabula tusinza Katonda oyo ali mu musajja oyo; kubanga ye musajja Katonda gwe Yalonda okubeera EDDOBOOZI LYE n’okukulembera Omugole wE mu nnaku zino ez’oluvannyuma.

Olw’okuba nga Atuwadde Okubikkulirwa kuno okw’ekiseera ekikulu eky’enkomerero, kati tusobola okutegeera KYE TULI, Ekigambo ekifuuse omubiri mu kiseera kyaffe. Sitaani takyasobola kutuguumaaza, kubanga tukimanyi nti tuli Mugole wE ow’Ekigambo embeerera azziddwawo mu bujjuvu.

Eddoboozi eryo lyatugamba nti: Byonna bye twetaaga byatuweebwa DDA. Tekyetaagisa kulinda. Kyogeddwa, KYAFFE, TUKIRINAKO OBWA-NNANNYINI. Sitaani tatulinaako buyinza; awanguddwa.

Weewaawo, Sitaani asobola okutukasukira obulwadde, okwennyamira, n’okulumwa omutima, naye Kitaffe Yatuwa dda obusobozi okumugobera EBWERU…TWOGERA BWOGERZI KIGAMBO, era aba alina okuvaawo….si lwakuba nga ffe tukyogedde, wabula lwakuba nga KATONDA YAKYOGERA.

Katonda y’omu eyatonda bu kaamuje, awataali na bukaamuje bwonna. Oyo eyawa Mwannyinaffe Hattie okuyaayaana kw’omutima gwe: batabani be ababiri. Oyo eyawonya Mwannyinaffe Branham ekizimba ng’omukono gw’omusawo tegunnamukwatako. Ye KATONDA Y’OMU atali bubeezi naffe kyokka, WABULA AWANGAALIRA ERA ATUULA MU FFE. YE FFE KIGAMBO EKIFUUSE OMUBIRI.

Bwetutunula era ne tuwuliriza Eddoboozi eriri ku ntambi, tulaba era tuwulira Katonda nga Yeebikkula ng’Ayita mu mubiri gw’omuntu ow’oku nsi. Tulaba era ne tuwulira Katonda gwe Yatuma okutukulembera okututwala mu Nsi Ensuubize. Tukitegeera nti Omugole yekka y’ajja okuba n’Okubikkulirwa okwo, bwe tutyo tufuuse abatatya. Tekyetaagisa kubeera ku bunkenke, kunakuwala, kwetamwa, kwebuuza oba kweraliikirira…FFE MUGOLE.

Wuliriza era obeere mulamu ow’oluganda, obeere mulamu!
Wuliriza Yesu kati era obeere mulamu;
Kubanga Lyakwatibwa ku ntambi, aleruuya!
Kiri ekintu kimu kyokka ffe okuwuliriza bwetutyo tube balamu.

Oh, Omugole wa Yesu Kristo, nga lunaku lukulu nnyo lwe tubeeramu. Kye tuli mu kwesunga, ddakiika ku ddakiika. Olunaku lwonna kati tugenda kulaba abaagalwa baffe, olwo, mu kaseera katono ak’okutemya kw’ekikoowe, tujja kuba tuvudde wano era nga tuli nabo ku ludda olulala. Kisembedde nnyo tulinga abasobola okukiwulira kati…EKITIIBWA!

Jjangu Omugole, ka tuddemu okwegatta okwetoloola Eddoboozi lya Katonda Ssande eno ku ssaawa 6:00 (mukaaga) ez’omuttuntu, mu budde bw’ e Jeffersonville (y’essaawa emu ey’omu kawungeezi e Uganda), nga bwe tuMuwulira ng’Ayogera naffe Ekigambo ky’Obulamu Obutaggwaawo.

Owol. Joseph Branham

Obubaka: 63-1229E Jja Amaaso ku Birala, Tunuulira Yesu

Ebyawandiikibwa:
Okubala 21:5-19
Isaaya 45:22
Zekkaliya 12:10
Omut. Yokaana 14:12

25-1019 Waliwo Omusajja Wano Asobola Okuteekako Ekitangaala

Obubaka: 63-1229M Waliwo Omusajja Wano Asobola Okuteekako Ekitangaala

BranhamTabernacle.org

Omugole wa Kristo Omwagalwa,
leka tujje wamu Ssande ku ssaawa 6:00 (Mukaaga) ez’omu ttuntu mu budde bw’e Jeffersonville (y’essaawa emu ey’omu kawungeezi e Uganda), tuwulire 63-1229M Waliwo Omusajja Wano Asobola Okuteekako Ekitangaala.

Owol. Joseph Branham.

25-1012 Okumalirira Mu Mutima

Obubaka: 63-0901E Okumalirira Mu Mutima

PDF

BranhamTabernacle.org

Omugole w’Olutambi Omwagalwa,

Kati mmwe abantu abali mu ntambi.

Mukama, tuyinza tutya okutandika okutegeeza mu bigambo amakulu obugambo omukaaga buno ge bulina gye tuli, ffe Omugole wa Yesu Kristo? Kwe Kubikkulirwa kw’Obubaka bw’ekiseera gye tuli. Ye Katonda ng’Ayogera ng’Ayita mu mubaka wE malayika ng’Agamba Omugole wE nti, “Nkimanyi nti ojja kusigala n’Eddoboozi lyaNge. Nkimanyi kiki Ekigambo kyaNge ku ntambi zino kye kinaategeeza gy’oli. Nkimanyi nti ojja kuba n’Okubikkulirwa nti Obubaka buno bwe njogedde ku ntambi ke Kabonero kaNge leero.”

“Ntadde Eddoboozi lyaNge ku ntambi zino eza magineeti; kubanga Obubaka buno bulina okukomaga Ekigambo kyonna. Wajja kubaawo enkumi emirundi enkumi ezijja okuwulira Eddoboozi lyaNge ku ntambi era zijja kuba n’Okubikkulirwa nti buno bwe buweereza bwaNge. Ye Mwoyo Omutukuvu ow’olunaku luno. Bwe Bubaka bwaNge Akabonero”

“Ntumye abaweereza bangi abeesigwa mu nsi yonna okulangirira obuweereza bwaNge. Bwe baakomawo, baŊŋamba nti, ‘Tugondedde ebiragiro byO nga tuzannya entambi zO. Tusanzeeyo abantu abakkiriza buli Kigambo. Bafudde ennyumba yaabwe ekkanisa okufuna Obubaka Bwo. Twabagamba nti, bonna abanajja wansi w’Akabonero Ko, Obubaka obw’ekiseera, balirokoka.’”

Kye kiseera buli musajja w’alina okwekebejja n’okwebuuza nti, ekkubo lya Katonda erituukiridde lye liruwa leero? Ekigambo kya nnabbi tekiremereddwako yadde mulundi ogumu. Kikakasibwa nti ge mazima GOKKA, ekintu KYOKKA ekigenda okugatta Omugole wE.

Buli kye yayogera kibaddewo mu ngeri yennyini gye yakyogeramu. Empagi y’omuliro ekyali wano naffe. Eddoboozi lya Katonda Likyayogera naffe ku ntambi. Nabbi atugambye nti Katonda ajja kutuyitako nga alabye Akabonero. Kiseera kya kabyangatano eri bonna okuyingira wansi w’Obubaka obwo obw’Akabonero.

Tulabye Omukono gwa Katonda omunene mu kiseera kino eky’enkomerero. Atuwadde Okubikkulirwa okw’amazima okw’Ekigambo kye era kuzze wansi w’akabonero k’Evumbo. Kati, nga tuli wansi w’akabonero k’Evumbo eyo, ka tusembere tube n’Okkussa Ekimu nga tuli mu kubyangatana; kubanga tukimanyi nti Katonda ateekateeka okukuba ensi n’omusango.

Nnandyagadde okuyita buli omu ku mmwe okuwulira n’okuba n’okusaba kw’Okussa Ekimu n’Okunaaza Ebigere ku Ssande eno, nga bwe tuwulira Obubaka: Okubyangatana 63-0901E.

Obubaka n’Olukuŋŋaana lw’Okussa Ekimu bigenda kubeera ku Voyisi Leediyo okutandika ku ssaawa 11:00 (kkumi n’emu) ez’omu kawungeezi mu budde bw’e Jeffersonville. Nsaba mubeere ba ddembe okubeera n’olukuŋŋaana lwammwe ku ssaawa 11:00 (kkumi n’emu) ez’omu kawungeezi mu budde obw’omu kitundu kye mulimu bwe muba mwagadde, anti mmanyi nga kijja kukaluubiriza bangi ku bakkiriza baffe ab’emitala w’amayanja okutandika olukuŋŋaana lwammwe mu kiseera ekyo. Wajja kubaawo akayungiro akakutuusa ku lutmabi oluwanulibwayo olw’olukuŋŋaana.

Owol. Joseph Branham

Ebyawandiikibwa by’olina okusoma nga olukuŋŋaana terunnatandika:
Okuva 12:11
Yeremiya 29:10-14
Omut. Lukka 16:16
Omut. Yokaana 14:23
Abaggalatiya 5:6
Omut. Yakobo 5:16

25-1005 Akabonero

Obubaka: 63-0901M Akabonero

PDF

BranhamTabernacle.org

Omugole w’Akabonero Omwagalwa,

Bwe tukuŋŋaana, tetwogera bwogezi ku ku Bubaka kyokka, kukuŋŋaana okusiigako Omusaayi, okusiigako Akabonero; era Akabonero bwe Bubaka bw’ekiseera! Obwo bwe Bubaka bw’olunaku luno! Obwo bwe Bubaka bw’ekiseera kino.

Akabonero ako tukeesiizeko, tukasiize ku maka gaffe, ne ku b’enju zaffe. Tetukwatibwa nsonyi. Tetufaayo ani akimanyi. Twagala buli muntu akimanye, buli ayitawo alabe era amanye: Tuli bantu ba Lutambi . Tuli Maka ga Lutambi. Ttuli Mugole wa Katondaow’Olutambi.

Omwoyo Omutukuvu = [yenkankana ne] Akabonero = Obubaka. Byonna bye bimu. Tosobola kubyawula. Kitaffe, Omwana, Omwoyo Omutukuvu = Mukama waffe Yesu Kristo. Tosobola kubyawula. Obubaka = Omubaka. Abakolokosi ne bwe boogera batya, NABBI YAGAMBA, tosobola kubyawula.

Katonda lye ssanyu lyo. Katonda ge maanyi go. Okumanya Obubaka buno, okumanya nti ge Mazima gokka, okumanya nti Ke Kabonero, ekyo kwe kumatira kwaffe. Abamu bayinza okugamba nti, “Mbukkiriza. Mbukkiriza. Mbukiriza nti ge Mazima. Mbusembeza nga Amazima.” Ebyo byonna birungi, naye ate Bulina okusiigibwako.

Nabbi yagamba nti Obubaka buno ke Kabonero ka leero. Obubaka buno ye Mwoyo Omutukuvu. Bw’oba olina Okubikkulirwa kwonna okw’Obubaka buno osobola okulaba obulungi essaawa gye tulimu. Kale bangi bali mu kugamba nti, “Nkikkiriza. Katonda yatuma nnabbi. Bwe Bubaka bw’ekiseera,” naye ne beewaana nga bagamba nti tebazannya, era tebajja kukikola, okuzannya Eddoboozi lyennyini ery’Akabonero mu makanisa gaabwe.

Katonda teYayogerako ng’Ayita mu malayika wE ow’amaanyi n’Abaako ekintu kyonna ky’Ayogera okuggyako nga kirina amakulu. Yatugamba nti yatusomesa nga akozesa eby’okulabirako ebiramu n’ebisiikirize. Mu ssomo lino, nabbi agenda mu buziba nnyo okutubuulira kiki Lakabu n’ab’omu maka ge kye baakola okusobola OKULOKOKA, okufuuka Omugole. Yali mulambulukufu ku kikwata ku mukyala oyo kyeyakola.

Abalenzi b’olutambi bwe baazannya [leeero kye tuyita – Muvvuunuzi]“OLUTAMBI”…Lindako katono, omubaka oyo yakola ki? Yazannya Olutambi. Olwo omukyala oyo kiki kye yakola? Yafuula amaka ge EKKANISA Y’OLUTAMBI. Teyakwatibwa nsonyi kugamba nti, “Mulaba akagoye ako akamyufu, ako kategeeza nti ndi KANISA YA LUTAMBI”.

Olowooza singa omukyala oyo yali agambye nti, “Weewawo, nzikiriza omubaka n’Obubaka, wabula tetuzannya Ntambi  mu kkanisa yaffe. Nnina omusumba agamba nti NEDDA, w’ali okubuulira obubuulizi n’okunokola entambi kye zoogera.” Olowooza yandirokose …???

Yasiigako akabonero, ennyumba ye n’erokoka, ekitali ekyo yali azikiriridde emmanga eyo gye yali.

Muwulidde abaweereza bangi nga beekwasa obusonga-songa ku kuzannya entambi, naye abasinga bonna bagamba nti: “Nnabbi teyagambako kuzannya ntambi mu kkanisa.”

Nabbi yagamba nti Lakabu yafuula amaka ge ekkanisa, era ekkanisa ye n’ezannya Entambi. Era olw’okuba nga yazannya Entambi mu kkanisa ye, ye ng’omukyala, n’Ekkanisa ye yonna ey’OLUTAMBI, baali wansi w’Akabonero ne balokoka. Buli kkanisa endala yazikirizibwa.

Ab’oluganda ne bannyinaze, bambi, sigamba nti omusumba tasobola kubuulira Bubaka buno, oba nti kikyamu bw’aba abubuulira. Mu ngeri yange, mbuulira kati nga mpita mu bbaluwa eno, wabula ggulawo omutima gwo owulirize nnabbi by’ayogera ne by’akulabulako. Bw’aba nga omusumba tali mu, oba tajja, kuzannya ntambi mu kkanisa yo ng’ayita mu kw’ekwasa akasonga ak’engeri yonna; kyonna kye kiyinza okuba, okusinziira ku Kigambo, ne bw’ayogera atya nti Nzikiriza Obubaka bw’ekiseera, okusinziira ku nze kye nzikiriza nti Ekigambo kye kyogera, Akabonero, Obubaka bw’ekiseera, buba tebuli mu kusiigibwako.

Ssande eno, nkuyita okujja okuwuliriza wamu ne Branham Tabanako ku ssaawa 6:00 (mukaaga) ez’omuttuntu, mu budde bw’ e Jeffersonville (y’essaawa emu ey’omu kawungeezi e Uganda), Obubaka: Akabonero 63-0901M . Bw’oba tosobola kutwegattako, zzannya Olutambi lwonna Olw’Akabonero, era okasiigeko.

Owol. Joseph Branham

Ebyawandiikibwa by’olina okusoma nga tonnawulira Bubaka:

Olubereberye 4:10
Okuva essuula ey’ekkumi n’ebbiri
Yoswa essuula ey’ekkumi n’ebbiri
Ebikolwa 16:31 / 19:1-7
Abaruumi 8:1
1 Abakkolinso 12:13
Abeefeso 2:12 / 4:30
Abebbulaniya 6:4 / 9:11-14 / 10:26-29 / 11:37 / 12:24 / 13:8, 10-20
Yokaana Omutukuvu 14:12

25-0928 Ekiseera Ky’Okwegatta n’Akabonero Kaakyo

Obubaka: 63-0818 Ekiseera Ky’Okwegatta n’Akabonero Kaakyo

PDF

BranhamTabernacle.org

Omugole Agatiddwa Awamu omwagalwa,

Nsanyuse nnyo, era ndi wansi w’okusuubira okunene nnyo kuti, okubeera ekitundu ku byonna Katonda by’Akola mu kiseera kyaffe. Ebirowoozo bya Katonda byeYalina ku lubereberye kati bituukirizibwa mu maaso gaffe, era tuli kitundu ku byo.

Mu Baibuli yonna, bannabbi baalagula era ne boogera ebyali bigenda okubaawo. Oluusi obunnabbi obwo tebwatuukirira okumala ebikumi n’ebikumi by’emyaka, naye okutuukirira kw’ebiro bwe kwatuuka, byatuukiriranga; kubanga ekirowoozo kya Katonda ekyogeddwa okuyita mu nnabbi wE KIBA KIRINA okutuukirira.

Nabbi Isaaya yagamba nti, “embeerera eriba olubuto”. Buli nju y’Abaebbulaniya yateekateeka muwala waabwe omuto okuzaala omwana ono. Baamuguliranga engatto ezikoma ku kisinziiro n’ezituuka ku ntumbye, ne bu nnappi, ne beetegekera omwana okujja. Emirembe gyayitawo, naye ku nkomerero Ekigambo kya Katonda kyatuukirira.

Bwe nnali omulenzi omuto nga nkula nneebuuzanga bulijjo, Mukama, ndaba mu Kigambo Kyo nti bulijjo ogassenga abantu bo awamu okutuukiriza Ekigambo kyO. Wagatta abaana Bo Abebbulaniya awamu nga okozesa omusajja omu, Musa, eyabakulembera n’empagi ey’omuliro okutuuka mu nsi ensuubize.

Bwewafuuka omubiri n’obeera wano ku nsi, wagatta abayigirizwa bo. Wabayawula ku buli kintu na buli muntu okubabikkulira Ekigambo kyo. Ku lunaku lwa Pentekooti, Waddamu n’Okukuŋŋaanya Ekkanisa Yo mu kifo kimu, mu ndowooza emu era mu mutima gumu nga tonnajja obawe Omwoyo Wo Omutukuvu.

Nalowoozanga nti, ekyo kiyinza kitya okusoboka leero Mukama? Omugole wO asaasaanidde wonna mu nsi yonna. Omugole yenna anajja e Jeffersonville? Ekyo sisobola kukiteebereza nga kigenda mu maaso Mukama. Naye Mukama, Tokyusa nteekateeka Yo. Ge Mateeka Go, tewali ngeri yonna gyegayinza kuyimirizibwa. Onaakikola otya?

EKITIIBWA…LEERO, tusobola okulaba n’amaaso gaffe, n’ekisinga obukulu, NGA TULI KITUNDU KU KYO: Ekigambo kya Katonda ekitaggwawo nga kituukirira. Tetuli mu kifo kimu mu mubiri, tusaasaanidde mu nsi yonna, wabula Omwoyo Omutukuvu KAAKANO AGASSE OMUGOLE WE AWAMU NGA AYITA MU DDOBOOZI LYA KATONDA. EKIGAMBO KYE EKYAYOGERWA ERA NE KIKWATIBWA KU NTAMBI, Abusoluuti wa Katonda ow’olwaleero, ali mu kukuŋŋaanya N’OKUGATTA MUGOLE WE… ERA TEWALI KIYINZA KUKIYIMIRIZA.

Katonda ali mu kugatta Omugole wE. Ali mu kujja wamu, okuva mu Buvanjuba n’ebugwanjuba, n’obukiikakkono n’obukiikaddyo. Eriyo ekiseera eky’okwegatta, era ekyo kye kiriwo mu kiseera kino. Ali mu kwegattira ki? Okukwakkulibwa. Amiina!

Ekiseera eky’okwegatta kigenda mu maaso KATI!!! Kiki ekiri mu kutugatta? Omwoyo Omutukuvu nga Akozesa Ekigambo kyE, Eddoboozi lyE. Kiki kye twegattira? OKUKWAKKULIBWA!!! Era ffenna tugenda era tetuleka muntu N’OMU mabega.

Katonda ali mu kumuteekateeka omukyala oyo. Yee ssebo, okwegatta awamu! Omukyala oyo ali mu kwegatta na ki? Na Kigambo!

Ekigambo ky’olunaku lwaffe kye kiruwa? OBUBAKA buno, EDDOBOOZI LYE, Eddoboozi lya Katonda eri Omugole wE. Si musajja omu. Si abasajja abamu. Si kibiina. EDDOBOOZI, eryakakasibwa Empagi y’Omuliro obutalekaawo kabuuza, erya Katonda ku ntambi.

“Kubanga waggulu ewabeera eby’omu bbanga yonna, awamu n’ensi biriggwaawo, naye Ekigambo kyange tekijja kuggwaawo.” Ali mu kwegatta awamu ne BW’ATYO BW’AYOGERA MUKAMA nga tafuddeeyo ku kiki eddiini yonna oba omuntu omulala yenna ky’ayogera.

Nga tetufuddeeyo ku MUNTU YENNA ky’ayogera, tuli mu kwegatta n’eddoboozi eryakakasibwa, eryakakasibwa obutaleekawo kabuuza, eriri Bw’Atyo bw’Ayogera Mukama ery’olunaku lwaffe. Si okuvvuunula kwa muntu; nga lwaki tukola ekyo? Okwo kukyuka na buli musajja, naye Eddoboozi lya Katonda ku ntambi TERIKYUKA era Lirangiriddwa Empagi y’Omuliro yennyini okuba Ekigambo kya Katonda era Eddoboozi lya Katonda.

Obuzibu obukirimu buli nti, ekitonde omuntu, tekimanyi mukulembeze waakyo. Weewaawo, ssebo. Bajja kukuŋŋaana okwetoloola eddiini, bajja kukuŋŋaana okwetooloola omulabirizi oba omusajja yenna, wabula tebajja kukungaana kwetoloola Omukulembeze oyo, Omwoyo Omutukuvu mu Kigambo. Okiraba? Bagamba nti, “Oo, kale, nneerariikiridde okucamuukirira ennyo nkole ebintu nga ssibirowoozezzaako; nneerariikiridde ekissa ekigere awantu awakyamu.” Ohhhh, kiikyo awo!

Wano ababanoonyamu ensobi we basonga ebibiina byabwe ne bagamba nti, “Olaba, bali mu kugulumiza muntu, Ow’oluganda Branham. Bakkiririza mu bulamba bwa Katonda obukyamu era bali mu kumwekuŋŋaanyirizaako, omuntu, so si Omwoyo Omutukuvu.”

Butaliimu, tuli mu kwegattira awamu ku DDOBOOZI LYA KATONDA ERYAKAKASIBWA OBUTALEKAAWO KABUUZA ERYAYOGERWA OKUYITA MU MUSSAJJA OYO. Jjukira nti oyo ye musajja Katonda gwe yalonda okubeera Eddoboozi lye okukoowoolayo n’okukulembera Omugole wE mu lunaku luno. Eyo lye ddoboozi LYOKKA eryakakasibwa Katonda yennyini obutalekaawo kabuuza.

Naye okwawukana ku ekyo, BO BALI MU kwegatta okwetoloola ABANTU. TEBAJJA kuzannya Ddoboozi lya Katonda ku ntambi mu masinzizo gaabwe. Ekyo osobola okukiteebereza??? Omuweereza nga agamba nti akkiririza Obubaka buno okuba Obubaka bw’ekiseera, Bw’Atyo Bw’Ayogera Mukama, naye n’afunayo eky’okwekwasa eky’engeri emu OBUTAZANNYA Ddoboozi eryo mu masinzizo gaabwe, wabula n’aweereza abantu nti BATEEKEDDWA okumuwuliriza wamu n’abaweereza abalala nga babuulira Ekigambo… olwo ne bagamba nti ffe tugoberera omusajja !!!

Twaakawulira Ssande ewedde Katonda kyeyabakola abasajja abo!!

Tuli mu kwetegekera Embaga. Tuli mu kufuuka Omu naye. Ekigambo kifuuka ggwe, naawe n’ofuuka Ekigambo. Yesu yagamba nti, “Ku lunaku olwo mulikimanya. Byonna Kitange by’Ali, mbiri; ne byonna nze bye Ndi, mu-biri; na byonna byemuli, mbiri. Ku lunaku olwo mulimanya nti ndi mu Kitange, Kitange mu Nze, nze mu mmwe, nammwe mu Nze.”

Webale Mukama olw’okubikkulirwa okw’ekyo ky’Oli, naffe kye tuli, mu kiseera kyaffe. Omugole Wo ali mu kwetegeka nga Akozesa Ekigambo Kyo Ekyayogerwa. Tukimanyi nti tuli mu Kwagala Kwo okutuukiridde nga tusigala n’Ekigambo Kyo ekyakwatibwa ku lutambi.

Mpita ensi okuwuliriza Eddoboozi lya Katonda eryakakasibwa obutalekaawo kabuuza lyokka olw’olunaku lwaffe Ssande eno. Oyanirizibwa okutwegattako Ssande ku ssaawa 6:00 (mukaaga) ez’omuttuntu, mu budde bw’ e Jeffersonville (y’essaawa emu ey’omu kawungeezi e Uganda), nga bwe tuwulira: 63-0818, Ekiseera Eky’Okwegatta N’Akabonero Kaakyo. Bw’oba tosobola kweyunga ku mukutu oguweereza eddoboozi mu buliwo n’owuliriza naffe, londa olutambi, OLUTAMBI LWONNA; zonna ziri Bw’Ati Bw’Ayogera Mukama, era owulirize Ekigambo kya Katonda nga kikutuukiriza era n’okukuteekateekera okujja kwE okw’amangu.

Owol. Joseph Branham

Zabbuli 86:1-11
Omut. Matayo 16:1-3

Ali mu kwegatta awamu. Ali mu kwetegeka. Lwaki? Ye Mugole. Ekyo kituufu. Era ali mu kwegatta awamu n’Omugole We omusajja, laba, era Omugole omusajja ye Kigambo. “Ku lubereberye waaliwo Kigambo, Kigambo n’aba awali Katonda, Kigambo n’aba Katonda, Kigambo n’afuuka omubiri, n’abeerako gye tuli.”

25-0921 Okuvunaana

Obubaka: 63-0707M Okuvunaana

Ekkooti B’Eggyeeko Omusango Ogubalumirizibwa Abaagalwa,

Kati, awo, “bo,” so si mwonoonyi. “Bo,” kwe kugamba, ekkanisa y’olunaku olwo, baasanga ensobi ku Musajja Eyali Kigambo. Ekyo kituufu? Baasanga ensobi ku Musajja Eyali Kigambo. Kaakano basanga ensobi mu Kigambo ekiri mu kukola emirimu nga kiyita mu musajja .

Okuva ku lubereberye ensi yaMumma amazzi, yaMugaana, yajeema okusigala n’Ekigambo kyE nga ekuuma obulombolombo bwayo, ebikwate byabwe, ebirowoozo byabwe. Bulijjo balemereddwanga okuteeba enteekateeka ya Katonda w’eri awatuufu; Katonda, nga Omuntu ow’oku nsi, oyo alina Ekigambo, era nga Ekigambo ekyo kaakano kikolera emirimu gyakyo mu musajja oyo.

Naye mu lunaku lwaffe Yagamba nti, “Nja kuba n’akabinja akatono, abatono abalonde. Baali mu Nze okuva ku lubereberye. Bajja kuNsembeza era bakkirize Ekigambo kyaNge n’omusajja gwe nnonze okubikkula Ekigambo kyaNge. Y’ajja okuba Eddoboozi lyaNge gye bali.”

“Tebajja kukwatibwa nsonyi kulangirira Eddoboozi lyaNge. Tebajja kukwatibwa nsonyi kutegeeza nsi nti Nzize nate era Nneeyolesezza nga mpita mu mubiri gw’omuntu ow’oku nsi nga bwe nnagamba nti ndikola. Ku mulundi guno tebajja kusinza musajja, wabula bajja kusinza Nze, Ekigambo, ekigenda okwogera nga kiyita mu musajja oyo. Bajja kunjagala era baNnangirire na buli kaayi akali mu mubiri gwabwe.”

“Bwentyo, mbawadde byonna bye beetaaga okufuuka Omugole waNge. Mbeetoolozza ekigo nga ky’Ekigambo kyaNge, kubanga BE KIGAMBO KYANGE ekifuuse omubiri. Bwe baba beetaaga okuwonyezebwa, bajja kwogera Kigambo kyaNge. Bwe baba n’omusanvu gwonna ogubaziyiza, boogera Ekigambo kyange. Bwe baba n’omwana aseseetuddwa amayengo g’ensi ne gaMubaawulako, boogera Ekigambo kyaNge. Kyonna kye beetaaga, boogera Ekigambo kyaNge, kubanga be Kigambo kyaNge ekifuuse omubiri mu bo.”

“Bamanyi kye bali, kubanga Mbeebikkulidde. Basigadde nga ba mazima era nga beesigwa eri Ekigambo kyange era bali mu kwegatta awamu okwetooloola Eddoboozi lyaNge. Kubanga bamanyi Eddoboozi lyaNge, Ekigambo kyaNge, Omwoyo gwaNge Omutukuvu. Bamanyi, awali Ekigambo awo Empungu wezikuŋŋaanira.”

Nnabbi wE nga bw’ayogera Ekigambo kyE era ng’alumiriza omulembe guno okukomerera Yesu Kristo omulundi ogw’okubiri era n’abalangirira nti ebyabwe bibi (kaaweddemu dda), Omugole ajja kuba musanyufu. Kubanga tukimanyi nti YEFFE Mugole wE asembezza era ayanirizza Ekigambo kyE. Tuleekaana okuva ku ntobo y’omutima gwaffe ne tugamba nti:

Nze ndi Wuwo Mukama. Nneyala ku kyoto kino, nga nneewaddeyo ddala eri omulimu gwo nga bwe mmanyi okukikola. Njijaamu ensi Mukama. Ebintu ebivunda kaseera buseera binzijeeko; mpa ebitavunda, Ekigambo kya Katonda. Leka nsobole okutambulira mu bulamu bw’Ekigambo ekyo nga nsembereganye nabwo nnyo, okutuusa Ekigambo lwe kinaaba mu nze, nange mu Kigambo. Kimpe Mukama. Nnemenga okukyuka okuKivaako.

Eriyo obulamu, eriyo n’okufa. Eriyo ekkubo ettuufu, eriyo n’ekkubo ekkyamu. Eriyo amazima, eriyo n’obulimba. Obubaka buno, Eddoboozi lino, lye kkubo lya Katonda erituukiridde lye Yateekawo kulw’olwaleero. Jjangu weegatte ku kitundu ky’Omugole wa Katonda ow’amaanyi nga bwe tukuŋŋaana okwetooloola Ekigambo kye ekyabikkulirwa n’okuwulira Obubaka: Okulumirizibwa Omusango 63-0707M. 

Owol. Joseph Branham

25-0914 Obulamu Bwo Busaanidde Enjiri?

Obubaka: 63-0630E Obulamu Bwo Busaanidde Enjiri?

BranhamTabernacle.org

Ab’oluganda & Bannyinaze Abaagalwa,

Njagala nnyo Mukama, Ekigambo kya Katonda, Obubaka buno, Eddoboozi lyE, nnabbi wE, Omugole wE, okusinga obulamu bwennyini. Byonna biri EKINTU KIMU GYENDI. Saagala kwekkiriranya wadde ku nnukuta emu, akatonnyeze akamu, oba EKIGAMBO KIMU Katonda kye Yawandiika mu Kigambo kyE oba kye Yayogera ng’Ayita mu nnabbi wE. Eri nze, Byonna biri Bw’ati Bw’Ayogera Mukama.

Katonda yaKirowooza, oluvannyuma n’AKigamba bannabbi bE, ne bawandiika Ekigambo kyE. Olwo n’Atuma malayika wE ow’amaanyi, William Marrion Branham, ku nsi mu lunaku lwaffe asobole okwebikkula nga ali mu mubiri gw’omuntu ow’oku nsi omulundi omulala, nga bwe yakola ne Ibulayimu. Awo n’Ayogera ng’Ayita mu nnabbi wE abeere Eddoboozi lya Katonda eri ensi, okubikkula n’okuvvuunula ebyama byonna ebibadde bikwekeddwa okuva ku kutondebwa kw’ensi eri Omugole wE eyategekerwawo.

Kaakano, Omugole wE, GGWE, ali mu kufuuka Ekigambo ekifuuse omubiri; nga ali Omu nayE, Omugole-Kigambo wE azziddwawo mu bujjuvu.

Nkimanyi nti ntegeerebwa bubi mu bye njogera ne bye mpandiika. Ka njogere mu bwetoowaze nga nnabbi waffe bwe yagamba nti, siri muyigirize era nkimanyi nti sisobola kuwandiika wadde okwogera mu ngeri entuufu bye mpulira mu mutima gwange. Ddala nkikkiriza nti oluusi kirabika nga mpandiika n’obukambwe obuyitiridde oluusi. Bwe nkola bwentyo, tekigendererwa kulaga butassaamu kitiibwa, oba okuba n’enneewulira enkyamu oba okusalira omuntu omusango, wabula kyeŋŋenderera kikontana n’ebyo. Nkikola lwa kwagala mu mutima gwange eri Ekigambo kya Katonda.

Njagala buli muntu asembeze era akkirize Obubaka buno Katonda bwe Yatuma okuyitayo Omugole wE. Siwulirangako mu mutima oba mu birowoozo byange nti abaweereza tebalina kuddamu kubuulira; ekyo kyandibadde kiwakanya Ekigambo kya Katonda. Nnina bubeezi mugugu ku lw’Eddoboozi lya Katonda ku ntambi. Nzikiriza nti lye ddoboozi erisinga obukulu OBUWEEREZA BWONNA lye buteekwa okuteeka KU MWANJO mu maaso g’abantu. Kino tekitegeeza nti tebasobola kubuulira, njagala bwagazi kubakubiriza kuzannya ntambi mu masinzizo gaabwe ng’abantu bakuŋŋaanye wansi w’okufukibwako amafuta okwo.

Weewawo, nandyagadde nnyo okuba n’ensi yonna ng’ewuliriza Obubaka bwe bumu mu kiseera kye kimu okwetoloola ensi yonna. Si lwakuba nti “nze” njogedde, oba lwakuba nti “nze” nnonze olutambi olw’okuwuliriza, wabula mpulira nga mazima ddala Omugole yandirabye engeri Katonda gy’Akoze ekkubo kino okubaawo mu lunaku lwaffe.

Singa tubadde tulina entambi z’amaloboozi ga Yesu ng’Ayogera leero ku lutambi, so si obuwandiike bwa Matayo, Makko, Lukka oba Yokaana obw’ebyo Yesu bye Yayogera (kubanga bonna baabyogera nga byawukanamu akatono), naye singa tusobola okuwulira Eddoboozi lya Yesu, Ye nga omuntu, bu heeyinti bwe, bu ttooti, ne bu feechi bwE nga tubuwulira n’amatu gaffe, obuweereza leero bwandigambye ekkanisa yaabwe nti, “Tetugenda kuzannya ntambi za maloboozi ga Yesu mu kkanisa yaffe. Nze nnayitibwa era nafukibwako amafuta okuKibuulira, n’OkuKinokola. Mumale gaziwuliriza nga muzzeeyo eka.” Abantu ekyo bandikiwagidde? Kyannaku okukyogera, naye ekyo kyennyini kye bakola leero. TEWALI NJAWULO, ne bwe bagezaako batya okukisiigako langi kibulireyo.

Eri nze, Ow’oluganda Branham yatuwa eky’okulabirako. Yayagala nnyo ng’amakanisa gonna, amaka, oba wonna we baali, okubeeranga ku mukutu ogw’oku ssimu basobole okuwulira Obubaka bonna mu kiseera kye kimu. Yali akimanyi nti basobola, era bajja kukikola, okufuna entambi ne baziwulira oluvannyuma, wabula yali ayagala beegatte wamu bawulire Obubaka bonna mu kiseera kye kimu….ERI NZE OYO YALI KATONDA NGA ALAGA OMUGOLE WE EKYALI KIGENDA OKUBAAWO MU LUNAKU LWAFFE N’EKY’OKUKOLA.

Buli muweereza omutuufu akkiriza Obubaka ajja kukkirizaganya nti tewali kintu kikulu kusinga ku kutuula wansi w’okufukibwako amafuta kw’Eddoboozi lya Katonda, eryakwatibwa ne liteekebwa ku ntambi. Omugole ajja kukkiriza, era abeere n’Okubikkulirwa, nti Obubaka buno kye Kigambo kya Katonda eky’olunaku lwaleero. Okulamula nsobola kasita mba nga nkozesa Kigambo, naye omuntu yenna atali mwetegefu kugamba nti Obubaka buno bwe Abusoluuti waabwe talina Kubikkulirwa kwa Kigambo eky’olwaleero, na bwe gutyo, bayinza batya okuba Omugole wE?

Okukinokola, okukibuulira oba okukiyigiriza kwokka tekumala, wabula okukiwulira nga kiva ku ntambi kye KIFO KYOKKA Omugole w’ayinza okugamba nti nzikiriza buli Kigambo. Obubaka Buno buli Bw’Atyo Bw’Ayogera Mukama. Kye mbuulira oba kye njigiriza tekiri Bw’Atyo bw’Ayogera Mukama, wabula ekyo Eddoboozi lya Katonda kye lyogera ku ntambi KIRI…ly’Eddoboozi LYOKKA eryakakasibwa Empagi y’Omuliro obutalekaawo kabuuza.

Nkimanyi waliwo ab’oluganda ne bannyinaffe abagamba, era nga bawulira muli nti, “Bwe mutawuliriza Bubaka Branham Tabanako bw’etimba ku mutimbagano gwayo, ne musoma ebbaluwa z’Empungu Zikuŋŋaanira Awamu, ne muwuliriza mu maka gammwe mu kiseera kye kimu temuli Mugole,” oba, “Kikyamu okugenda mu kkanisa, mulina okusigala mu maka gammwe.” EKYO KIKYAMU BYA NSUSSO. Ekyo sikirowoozaNGAKO, sikyogerangako, yadde okukkirizangako. Ekyo kivuddeko n’okwawukana okusingawo, okukyawagana mu busungu, n’okukomya okussa ekimu mu Mugole era omulabe ali mu kukozesa ekyo okwawula abantu.

Saagalangako kwawulamu Mugole, njagala okugatta Omugole ng’Ekigambo bwe kyagamba nti TUTEEKWA OKWEGATTA NGA OMUNTU OMU. Tetusaana kuba nga tulumaŋŋana ku busonga-songa buli omu ku munne, wabula mu ngeri ennyangungu tewali kirala kiyinza kutugatta okuggyako Eddoboozi lya Katonda ku ntambi.

Tetulina kuba nga tuwakana n’okugamba abantu bye BATEEKWA OKUKOLA ekitali ekyo tebali mugole, kola bukozi nga MUKAMA BW’AKUKULEMBEDDE. Bakyali baganda baffe ne bannyinaffe. Tulina okwagalana n’okussa ekitiibwa mu bannaffe.

Kati, temuyomba. Olaba? Obusungu buzaala obusungu. Ob’okyali awo ogenda okulaba nga, munyiizizza Omwoyo Omutukuvu n’ava wemuli, ojja kuba oyomba nga omuddamu. Olwo Omwoyo Omutukuvu ne Yeebuukira n’Agenda. Obusungu buzaala obusungu.

Nga nnina nnabbi kye yayogera wano, saagala nako kunakuwaza Mwoyo Mutukuvu. Saagala wadde omulundi ogumu okulumaŋŋana ku busonga-songa. Tusobola okukubaganya ebirowoozo nga tuli wamu mu kwagala, naye si mu kuwakana n’obusungu. Bwemba nga njogedde ekintu kyonna ekinyiizizza omuntu yenna mu bye mpandiise oba bye njogedde, nsaba onsonyiwe, ssi ky’ekibadde ekigendererwa kyange.

Nga bwe nkyogedde emabegako, mpulira okuyitibwa ku bulamu bwange okuva eri Mukama okusonga abantu eri Eddoboozi lya Katonda ery’olwaleero. Abaweereza abalala balina okuyitibwa okulala era mpozzi balaba ebintu mu ngeri ey’enjawulo, Mukama atenderezebwe, bakola BO kye bawulira nga bakulembeddwa Omwoyo Omutukuvu okukola. Obuweereza bwange kwe kugamba obugambi Omugole nti, “NYIGA ZANNYA” era nti “Eddoboozi lya Katonda ku ntambi lye ddoboozi erisinga obukulu ly’osobola okuwulira.” “Nzikiriza nti obuweereza busaanye okuzannya Eddoboozi lya Katonda ku ntambi mu masinzizo gaabwe.”

Ebbaluwa ze mpandiika buli wiiki za kitundu ku Mugole ekiwulira nti bali kitundu ku Branham Tabanako. Nkimanyi abalala bangi bazisoma, naye nze nvunaanyizibwa okukola nga bwe mpulira nga nkulembeddwa okukola ku lw’ekkanisa yaffe yokka. Buli kkanisa yeemalirira; balina okukola nga bwe bawulira nga bakulembeddwa Mukama okukola, ekyo 100% Kigambo. Sibawakanya, ensonga eri bubeezi nti tetukkaanya. Nze ne Branham Tabanako, twagala kuwulira Eddoboozi lya Katonda ku ntambi.
Ddala mpita ensi okutwegattako buli wiiki. Mbakubiriza bwe baba tebasobola kutwegattako, okulonda olutambi, olutambi lwonna, era banyige zannya. Bajja kufukibwako amafuta nga bwe kitabangawo. Bwentyo, mbayita wiiki eno okutwegattako ku Ssande ku ssaawa 6:00 (mukaaga) ez’omuttuntu, mu budde bw’ e Jeffersonville (y’essaawa emu ey’omu kawungeezi e Uganda), nga bwe twegatta wamu tuwulire, 63-0630E Obulamu Bwo Busaanidde Enjiri?

Ow’oluganda Joseph Branham

25-0824 Okusssa ekimu

Obubaka: 65-1212 OKUSSSA EKIMU

BranhamTabernacle.org

Omugole Akakasiddwa Obutalekaawo Kabuuza Ow’Ekigambo Kyokka Omwagalwa,

Nga twebaza nnyo Omwoyo Omutukuvu olw’Okubikkulirwa okwa nnamaddala okw’Ekigambo kyE ekyakasibwa obutalekaawo kabuuza kulw’olwaleero. Bangi baatula nti bakkiriza nti Ow’oluganda Branham ye nnabbi wa Katonda atuukiriza Ebyawandiikibwa ebyamusuubizibwako, naye Okubikkulirwa kw’Ekigambo okwa nnamaddala n’enteekateeka ya Katonda bikwekeddwa okuva gyebali.

Nali buli Bubaka obujjira mu bbaluwa ey’omukwano Omugole bw’awulira, Katonda atukakasa nti tuli mu Kwagala kwE okutuukiridde nga tuwuliriza Ekkubo lyE lye Yatuteerawo kulw’olwaleero, Eddoboozi lya Katonda ku Ntambi.

Era tuteekwa okuMugoberera, y’engeri yokka ey’okuba n’Obulamu Obutaggwaawo. Kale obukulembeze bwa Katonda bwe buno: goberera Ekigambo eky’ekiseera ekyakakasibwa Omwoyo Omutukuvu obutalekaawo kabuuza .

Ekkubo LYOKKA erikutuusa mu bulamu obutaggwaawo ye: Omwoyo Omutukuvu nga Akukulembera okugoberera Ekigambo ekyakakasibwa obutalekaawo kabuuza. Ani alina Ekigambo ekyakakasibwa obutalekaawo kabuuza eky’olwaleero? Katonda Yalonda ani okuvvuunula Ekigambo kyE? Katonda Yagamba ani nti ye Ddoboozi lyE ery’olunaku lwa leero? Katonda yennyini yagamba ani nti ye mukulembeze eyakakasibwa obutalekaawo kabuuza okukulembera Omugole wE leero? Obuweereza?

Nga bwe nnagambye, akawungu akato bwe kaawulira Eddoboozi ly’anaawasa Omugole, kaagenda gyeLiri, Ekigambo kya Katonda ekyafukibwako amafuta, ekyakakasibwa obutalekaawo kabuuza kulw’olunaku olw’oluvannyuma.
Nuuwa ye yali Ekigambo ekyakakasibwa obutalekaawo kabuuza mu kiseera kye.
Musa ye yali Kigambo ekyakakasibwa obutalekaawo kabuuza mu kiseera kye.
Yokaana ye yali Kigambo ekyakakasibwa obutalekaawo kabuuza

Bayinza okuteeka okunyoola oba okuvvuunula okw’engeri yonna kwe baagala ku Kyo, naye:

WILLIAM MARRION BRANHAM YE KIGAMBO KYA KATONDA EKYAKAKASIBWA OBUTALEKAAWO KABUUZA EKY’OLWALEERO!!

Kale obukulembeze bwa Katonda bwe buno: goberera Ekigambo eky’ekiseera ekyakakasibwa Omwoyo Omutukuvu obutalekaawo kabuuza.

Era okuzannya Eddoboozi lya Katonda eryakakasibwa obutalekaawo kabuuza mu kkanisa yo si kye kintu ekisinga obukulu Omugole ky’ayinza okukola? Kikulu nnyo okuwulira eddoboozi eddala?

Kibinja ky’abasajja n’obuweereza bwabwe ky’ekijja okugatta n’okukulembera Omugole? Omugole anaagattibwa obumu okuyita mu ebyo obuweereza bye bwogera? Bonna boogera byanjawulo, kale tusaanidde kugoberera ani?

Enzivuunula yaabwe ey’Obubaka buno y’erisinzirwako okutusalira omusango? Balina Empagi y’Omuliro ng’egenda ekakasa obuweereza bwabwe obutalekaawo kabuuza? Oba okuvvunuula kwabwe okw’Ekigambo ye Abusoluuti wo?

Nabbi yagamba nti Omugole aligattibwa BUMU. Weebuuze, kiki ekinaaleeta obunnabbi buno okutuukirira Mukama alyoke ajje atwale Omugole wE?

Era awo, abantu ba Katonda bwe batandika okuokukuŋŋaana awamu, wabaawo obumu, wabaawo amaanyi. Okiraba? Era buli abantu ba Katonda lwebakuŋŋaanira awamu ddala , nzikiriza nti okuzuukira kujja kubaawo mu kaseera ako. Wajja kubaawo ekiseera eky’okukwakkulibwa Omwoyo Omutukuvu bw’Anaatandika okukakuŋŋaanya awamu. Ba —kajja kuba kabinja akali mu batono, ddala kitegeerekekerawo, wabula wajja kubaawo okukuŋŋaana okw’ekitalo.

Wanaabaawo okukuŋŋaana okw’ekitalo okwetooloola obuweereza bw’omuntu omu, atali nnabbi wa Katonda eyakakasibwa obutalekaawo kabuuza? Kinaaba KIBINJA kya baweereza kubanga abamu ku baweereza ab’omu buweereza obw’emirundi etaano bagamba nti TOSAANIDDE KUKIKOLANGA WADDE OMULUNDI OGUMU okuzannya Eddoboozi lya Katonda mu kkanisa yo, kikyamu. Olwo banaakulembera Omugole?

MBASABA MUNNYAMBE! MUWEEREZA KI GWEMBA NGOBERERA, ANTI NJAGALA NNEEYUNGE MU KUKUŊŊAANA OKWO OKW’EKITALO.

Abamu bagamba nti abaweereza ab’emirundi etaano ab’Ebibwatuka Omusanvu be bajja okutuukiriza Omugole. Abaweereza abamu ab’omu buweereza obw’emirundi etaano bagamba nti ennaku z’obuweereza bw’Omuntu Omu zaggwako. Abaweereza abamu ab’omu buweereza obw’emirundi etaano bagamba nti tulina okuddayo ku Pentekooti. Abamu bagamba nti Obubaka SSI ye Abusoluuti. Abamu bagamba nti bw’ozannya entambi oba okkiririza mu by’obwakatonda obulala. Bonna boogera ekintu kyanjawulo, era BONNA balina enzivuunula ez’enjawulo, ebirowoozo byanjawulo, naye buli omu agamba nti akulemberwa Omwoyo Omutukuvu.

MUWEEREZA KI OW’OMU BUWEEREZA OBW’EMIRUNDI ETAANO GWE NNINA OKUGOBERERA? Kasita mba nga ngoberera omusumba “WANGE” ow’emirundi etaano, nja kuba Omugole? Waliwo “Ebibinja” bingi nnyo eby’enjawulo eby’abaweereza ab’emirundi etaano. Abaweereza bano 20 bakwatagana ne baba n’enkuŋŋaana zaabwe, wabula nga tebakkiriziganya yadde n’akatono n’abaweereza abalala 20 abalina enkuŋŋaana endala…nkuŋŋaana ki ze mba ŋŋendamu nsobole okutuukirizibwa n’okugattibwa awamu…ezimu ku zo…zonna nzigendemu?

Era abantu bakkiriza nti AKAVUYO KANO ke kagenda OKUGATTA AWAMU N’OKUTUUKIRIZA OMUGOLE? Bonna bagamba nti be BAWEEREZA AB’EMIRUNDI ETAANO ABATUUFU ABAAYITWA KATONDA. Naye tebali mu kubakulembera nga babatwala eri OBUKULEMBEZE OBUTUUFU OBW’OMWOYO OMUTUKUVU, BALI MU KUBAKULEMBERA NGA BABATWALA ERI BO BENNYINI N’ERI OBUWEEREZA BWABWE.

Mu kulaba okwange, teweetaaga na kubikkulirwa okumanya nti tekiyinzika kubaawo ebyo OKUGATTA AWAMU oba OKUKULEMBERA Omugole mu bulamba bwE yenna. EKIGAMBO KYOKKA kye kijja okugatta Omugole, nga kiyita mu DDOBOOZI LYA KATONDA MWENE ERIRI KU NTAMBI.

Ab’oluganda ne bannyinaze, wandizuukuka bw’oba ogoberera omusumba ali mu kubuulira obubuulizi n’okujuliza Ekigambo, era ng’ebyo nga bya ttendo era nga by’ebyo BYENNYINI by’asaanye okuba ng’akola, wabula nga tali mu kukugamba, n’ekisinga obukulu, NGA TALI MU KUKIKOLA, ng’ayita mu kuzannya EDDOBOOZI LYA KATONDA KU NTAMBI MU KKANISA YO.

Ow’oluganda Branham yatugamba nti:

Kati, tulina ebiragiro bisatu byokka eby’Obwakatonda eby’omubiri: ekimu ku byo kiri — kwe kussa ekimu, okunaaza ebigere, okubatizibwa mu mazzi. Ebyo bye bintu ebisatu byokka. Okwo kwe kutuukirizibwa, okw’ebisatu, olaba.

Nnandyagadde tubeere n’okusaba kw’Okussa Ekimu n’okunaaza ebigere ku Ssande eno, Mukama ng’Ayagadde. Nga bwetukozenga emabega, mbakubiriza okutandika ku ssaawa 11:00 (kkumi n’emu ez’omu kawungeezi) mu budde obw’omu kitundu ky’olimu. Newankubadde Ow’oluganda Branham yagamba nti abatume buli lwe baakuŋŋaananga baabanga n’Okussa Ekimu, ye yasinga kwagala kukukola mu budde obw’akawungeezi, era n’akuyita Ekyeggulo kya Mukama waffe.

Obubaka n’olukuŋŋaana olw’Okussa Ekimu bijja kubeera ku Voyisi leediyo, era wagenda kubaawo n’akayungiro k’osobola okukozesa okuwanulayo olutambi olwo ku mutimbagano, kulw’abo abatasobola kweyunga ku Voyisi Leediyo ku Ssande akawungeezi.


Ow’oluganda Joseph Branham