Litéya: 65-0718M Komeka Kosalela Nzambe Mosala Libanda Ya Mokano Na Nzambe

PDF

• 26-0426 Komeka Kosalela Nzambe Mosala Libanda Ya Mokano Na Nzambe
• 24-0721 Komeka Kosalela Nzambe Mosala Libanda Ya Mokano Na Nzambe
• 23-0101 Komeka Kosalela Nzambe Mosala Libanda Ya Mokano Na Nzambe
• 21-0905 Komeka Kosalela Nzambe Mosala Libanda Ya Mokano Na Nzambe
• BA-MPONGO BAZALI KOSANGANA

BranhamTabernacle.org

Molingami Mwasi Ya Libála Oyo Alingámí Koleka,

Ngonga elekí. Ntango ebélémí. Mokáno esengeli kozuama. Nzambe azali kokébisa bana na Ye. Nkolo Nzambe na bisó asolólí mpe andimisí epai na bisó oyo Sóló na Ye na nzela ya Liloba na Ye, mpe na Molimó na Ye. Na nguya te, na makási te, kasi na Molimó na Ngai, mpe Liloba na Yo nde Sóló.

Andimísí polélé-polélé epai ya Mwasi ya libála lelo ete Yesu Klisto azali lolengé moko lobí, lelo, mpe libela. Atalisí mpe Amónísí epai na bisó Etíndá mpe motindami ya ngonga oyo bazali eloko yango moko. Amónísí bisó mabómbami ma Ye manso mazipámákí kati ya Liloba. Alakísí Yango epai na bisó na nzela ya Molimó na Ye Mosanto. Ezali na ntembe ata moké te kati na makanisi, mitéma to milímó na bisó. Mongóngó na Ye likoló ya ba bánde ezali YANGO ELOBÍ NKOLÓ EPAI YA MWASI NA YE YA LIBÁLA.

Nzambe alingísákí ntango nyoso nzelá mingi ya koya epai na Ye. Asálaka mokáno na Ye elingísámí kati ya Mokáno na Ye Ebongí be. Apésákí mpe ntango nyoso MOKÁNO EBONGÍ BE MPE NZELA EBONGÍ BE MPO YA BANA NA YE. Mingi bamekí koyá nzelá ekeséní na bosáléláká Nzambe mosálá nzókandé libándá na Mokáno na Ye ebongí be. Ekokí komónana mpe koyókama lokóla nde mokáno na Ye ebongí be, kasi ezali te éngébéné na Liloba na Ye.

Ata moto monéne, aútí kopakolama, koúta na Bozali mpenza ya Nzambe, azuí emóniseli kosála eloko moko mpo ya Nzambe, mpe alingákí kosála yango mpo ya Nzambe; kasi emóniseli azuaki elongóbánáki te.

Moko na moko na bisó asengeli ázua nzela na Ye ebongí be epésámí. Tokoyéba ko boni soko tozali kati ya Mokáno na Ye ebongí be soko moto moko oyo apakólámí mpenza, oyo aúti kolongwa na bozali Sóló ya Nzambe, na emóniseli, azali te kati ya mokáno ya Nzambe ebongí be?

Ezali na nzela BOBÉLÉ MOKO YA KOYÉBA NA BO SÓLÓ, mpe Nzambe Apésí nzela yango mpo ya Mwasi na Ye ya libála.

Mongóngó ya Nzambe Ye moko eyébisakí lingómbá oyo, mpe bino bato nyoso likoló ya ba bánde, mpe bato baoyo bozali na bikanganelo ya singa na bisíká mosúsu ya mokili, ndéle mpe SIKAWA. Ayebisaki bisó tóyókamela yango ezalaki ye koloba na bokéngi mpenza, mpe mpo na bisó TÓZÁNGA TE KOYÓKA.

Boye elobí Ngai, kati na Nkombo na Yesu Klisto: Bakísá eloko moko te, longólá te, tiá makanisi na yo moko te kati na Yango, Lobá bobélé oyo elobámí likoló ya ba bánde wana, sála na yo káka oyo mpenza Nkoló Nzambe apésákí motíndo kosála; bakísá na Yango te!

Alobákí te, mpe elingí koloba te, ete batéi bakokí te kotéya Liloba, balakisi bakokí te kolakisa Liloba, to babáteli to basakoli kosála oyo tobiangamáki kosála; basengelí kosala yango. Nasengélí kosala yango. Tobiangámáki mpe tobongisamáki kosála yango. Esengeli tótálisa mpe tozóngela maloba ya Etindá mpe motindami oyo epai na bato, zambí Ezali Liloba mpo ya mokolo na bisó.

Kasi Ayébísí bisó polélé-polélé tokoki banso kopakolama, na kopakolama ya solo, kotóndisama na Molimó na Ye Mosanto, na emóniseli longwá na Ye, mpe kozala libándá na mokáno na Ye. Na mokolo ya bisó, Apésí NZELÁ EBONGÍ BE koyeba na bosóló ozali koyóka Mongóngó ya Nzambe, koúta na Nzambe Ye moko. Nde nzela BOBELE MOKO ebongí be.

Batéi basengeli káka te kozóngela maloba mpe kotéya Etindá oyo, tosengeli koyókisa bato Mongóngó ya Nzambe likoló ya ba bánde. Ezali te na KOPAKOLAMA MONÉNE KOLEKA oyo elekí koyóka Mongóngó ya Nzambe. Ezali na nzela mosúsu te ya koyeba na elílíngí ya ntembe ata ndambo te soko oyo tozali koyóka ezali MPENZA oyo Nzambe alobákí.

Lelo oyo, lokola mokolo mosúsu te kati na lisoló ya mokili, Nzambe apésá nzela oyo esálí ete ékoka te kozánga Yango, Soko ozali Mwasi na Ye ya libála oyo obongísámákí libosó. Endimisamákí mpe emónísamákí na nzela ya Likonzí ya Móto Ye Moko kozala Mongóngó ya Nzambe Ye moko koloba mbala moko alimá na Lingómbá na Ye.

Kati na ba nkóto ya mbúla, bana na Nzambe baúmelá kotálela mpe banyókwámá na nzala ya koyóka Mongóngó ya Nzambe bango moko. Boni bakokákí kosepela bázala wana mokolo wana ntango Yesu atéyákí nkóto na nkóto likoló ya ngómbá. Koyóka boni Alobákí Liloba na Ye na bolingo mpe koyókela mawa. Koyóka boní Atiákí kobéta nsété likoló ya Liloba moko na moko. Boni ekokaki koloba mpe koyikisa mitéma na bango mpiko. Tozali na bomoi sikawa mpe kati na Bozali ya Nzambe koyóka Mongóngó ya Nzambe.

Mokolo moko nokí mpenza tokozónga lisúsu te na motíndo ya bómoi oyo. Tokozónga lokola ekelámu ya kozánga kúfa. Lisúmu ekolímwa nde kolímwa. Satana akokangama mpo na mbúla nkóto mpe tokobíka likoló na mabelé oyo Nkoló Nzambe na bisó Apésí bisó.

Tozali tokokí mobimba 100%. Totíkálá kosepela soko moké te boye libosó to ntembe ata ndámbo te kati na bomoi na bisó. Tozali Moko elongó na Ye mpe Liloba na Ye. TOZALI Liloba na Ye. TOZALI KATI YA MOKÁNO NA YE EBONGÍ BE NA BOTIKÁLÁKÁ NA MONGÓNGÓ NA YE, LILOBA NA YE. Akozala kozónga mokolo sé mokolo sikawa kolongola bisó awa elongó na Ye.

Matóndí Nkoló Yesu!

Nkoló Nzambe na bino Ayebisí bino oyo ezali Sóló. Nkoló Nzambe na binó Andimiseli bino oyo ezali Sóló, na nzela ya Liloba na Ye mpe Molimó na Ye. “Na nguya te, na makási te, kasi na Molimó na Ngai.” Mpe, Molimó, “Nzambe azali koluka baoyo bakosámbela Ye kati ya Molimó mpe kati ya Sóló.” “Liloba na Yo ezali Sóló.” Mpe Andimisí polélé-polélé ete Yesu Klisto azali lolengé moko lobi, lelo, mpe libela. Atálísí Mimbóto ya ntango ya pókwa epai na bino. Amónísí bino Yango, kati ya Liloba. Alakísí Yango epai ya bino, na nzela ya Molimó na Ye.

Na motéma na ngai mobimba Nabiángí moko na moko na bino koya komíbakisa na eténi ya Mwasi na Ye ya libála lokóla tozali kosangana longwá na mokili mobimba na 12:00 nsima ya nzángá, ntango ya Jeffersonville, koyóka Mongóngó na Ye koloba na nzela ya motindami na Ye mwanje ya nsambo mpe komemela bisó Litéya: Komeka Kosálela Nzambe Mosálá Nzókandé Libándá Na Mokáno Ya Nzambe 65-0718M.

Ndeko Joseph Branham

Makomi ya kotánga libosó ya boyóki Litéya:

Dutelonome 4:1-4 / 4:25-26
1 Ntango 13
1Ntango 15:15
Njembo 22
St. Malako 7:7
Malaki 3
St. Matái 11:1-15
1 Bakolinti 13:1

Litéya: 65-0429E Kopona Mwasi Na Libala

PDF

• 26-0419 Kopona Mwasi Na Libala
• 23-0319 Kopona Mwasi Na Libala
• 21-0822 Kopona Mwasi Na Libala

BranhamTabernacle.org

Molingami Mwasi Ya Libála Moponami,

Lokola tozali koyóka Litéya oyo, Kopona Mwasi Ya Libála, bókó bakanisí mosakoli azali kaka koloba mpe kopesa bisó malako likoló ya ezaleli mpe litongi mobali asengélákí kozua lokola mobóko ntango azali kopona mwasi oyo alingí ázala mobálani na ye. Ezali solo, yango nde azali kosala, kasi ezali na likambo mpenza mpenza libómbámí, mokandá ya bolingo kati ya Maloba ma Ye. Oyo Azali komónisa Mwasi na Ye ya libála eleki na bozíndó. Nzambe azali koloba na Ye mbala moko alimá, koyebisa Ye nini nde Azalaki koluka kati na Ye mpe mpo ya nini Aponákí Ye longwá na ebandeli. Alingákí Áyéba ete Aponákí Ye kozala MOLINGAMI NA YE MWASI YA LIBÁLA WA MOTÉMA, oyo Alingákí kokabola Sékó na Sékó ya Ye elongó na Ye.

Na ebandeli, Nzambe azalákí koluka-luka Mwasi ya libála oyo akozala na ezaleli yango moko ya Ye. Molimó yango moko na Ye mokomónana kati na Ye Mwasi. Alingákí Mwasi ya libála oyo amítékáki mobimba epai na Ye, mpe Liloba na Ye lilakámí, kino Likanisi mpenza lizalákí kati na Ye likozala kati na Ye Mwasi ya libála. Asengeli áyemama boó ezali Ye.

Alingákí Ye ázala mosuni yango moko na Ye, mikúwa yango moko ya Ye, Molimó yango moko ya Ye, makambo nyoso yango moko, káka mpenza lokola Ye. Bango mibalé bákóma MOKO.

Mwasi yango alingákí te kozala na etaleli ya kanza na líso na ye. Alingákí te koleka-leka na mongóngó mosúsu ata nini. Alingákí kozala solo mpe na motéma mobimba epai na Ye, ézala nani áloba nini. Alingákí kozua Ye na Liloba na Ye. Ézala nini elobí Ye, YE MWASI ALINGÁKÍ KONDIMA LILOBA MOKO NA MOKO, atá ézua ntango molaí boni mpo ékokisama, alingâkí Kondima Yango. Alingákí Kotíkala na Liloba na Ye.

Akolinga Ye, mpe Ye káka. Asengélákí te kopesa ye bozui mingi, Así azuákí Mayaka ya motúya monéne, Emóniseli ya solo ya Ye. Ayébí ete bazalákí MOKO mpe eloko yango moko. Molimó na Ye Mobali akofánda kati na Ye Mwasi. Ézala atá nini Ye Mwasi asengélákí na yango, Akopésa Yango na Ye; nyoso asengélákí kosala ezalaki kosénga mpe kondima, mpe Ye Mobali Akosala yango.

Ayébákí ete Akozala Akeí mpo ya ntango molaí kotongela Ye ndako oyo ekozala na biloko nyoso kokokana na mpósá mpe boúlani na Ye. Azalaki kotonga yango bobele na motindo molingí Ye. Ayébákí ete mokolo moko Akozónga mpo na Ye, lokóla elakákí Ye, na bongo bakozala na Lipati monéne ya Makwéla mpo na mbúla nkóto. Nde, bakokende elongó na Ezalelo kitóko etongákí Ye mpo na Ye kolekisa Sékó na Seko.

Eloko mosúsu te etálí Ye. Alingí na Ye eloko mosúsu te. Akosepela mingi mpe kotia motéma kozala na Emóniseli koyeba Azali nani, mpe Ye Mwasi Azali nani. Ayébí ete Mobali akobátela Liloba na Ye. AKOKOKISAMA, KOYEBA ETE YE NDE APONÁKÍ YE KOZALA MWASI NA YE YA LIBÁLA.

Bandeko na ngai mibáli mpe basi, Nzambe ya ngúyá nyoso ya Lóla mpe ya mabelé atalákí kati na Sékó na Sékó mpe APONÁKÍ YO…YO KOZALA MWASI NA YE YA LIBALA WA MOTÉMA MOPONAMI.

Nabiángí yo koya komíbakisa na ngai mpe eténi ya Mwasi na Ye ya libála Lomíngo loye, lokola Azali koloba kati ya mwanje na Ye ya nguya mpe koyebisa bisó tozali Mwasi ya libála na Ye Moponami.

Ndeko Joseph Branham

Litéya: 65-0429E / Kopona Mwasi Ya Libála
Ntango: 12:00 nsima ya nzángá ntango ya Jeffersonville

Makomi:
Genese 24: 12-14
Yisaya 53 :2
Emóniseli 21:9

Litéya: 65-0418E Nzambe Abongolaka Nde Makanisi Na Ye Na Ntina Na Liloba Na Ye?

PDF

• 26-0412 Nzambe Abongolaka Nde Makanisi Na Ye Na Ntina Na Liloba Na Ye?
• 24-0707 NZAMBE ABONGOLAKA NDELE LIKANISI NA YE LIKOLO NA LILOBA NA YE?
• 22-1218 NZAMBE ABONGOLAKA NDELE LIKANISI NA YE LIKOLO NA LILOBA NA YE?

BranhamTabernacle.org

Balingami Baoyo Bayéisámí Na Bomoi,

 Boni mitéma mia bisó mimatákí lokóla ba Mpongo na Nsúka ya póso oyo ya Pásika. Mokolo na mokolo, epakweli ya Ye ekómákí monéne koleka mpe monéne koleka. Elámbo, Bokundami, Bobongi be, nambísa tómbwá monéne koleka Aléngélákí bisó mpo na yango: Ezali Kobima Ya Mói…NKÉMBO, ASÉKWÍ mpe Azali na bomoi kati ya moko na moko na bisó. Azalaki komónisa Liloba na Ye epai na moko na moko na bisó lokola totíkálá koyóka libosó naino soko moké te. Kopakolama etóndisaki mitéma mia bisó, bozali na Ye etóndákí na mopepe; emónánákí lokola ete Konétolama ezalaki pene.

Ayebisákí bisó oyo esálemákí esili koleka mbúla 2000, na nsima oyo ezalaki sikawa kosálema na 2026. Yesu azalaki Mombóto ya Lisángó ya Nzambe ya libosó oyo esékwisamákí longwá na bakúfi. Asékwísámákí na Nguya ya Nzambe oyo ekopésaka bomoi. Nzambe Apésákí nguya na bomoi na Ye, Asekwisaki Ye longwá na bakúfi, mpe Azalaki mbuma ya libosó ya baoyo balálákí. Azaláki ya libosó kotela, Mbuma ya libosó ya Nzambe oyo eningisamákí lokóla ekaniseli ya bopési matóndí epai ya Nzambe, Kondima ete bíso baoyo totíkálí tozali koya. Ezalákí elembo.

NSIMA AMÓNÍSÍ BISÓ OYO ESÁLÉMÍ LELÓ. Pelamókó Aningánísámákí na Mokolo ya Pentekoste wana lokito loyákí koúta na Likoló lokóla lokito ya mopepe ya koninganisa, ya makási mpenza, mopepákí likoló ya bato. Ezalákí koninganisama lisúsu libosó ya bato lokola Alakákí kati ya Luka 17:30 mpe Malaki 4, ntango M-w-a-n-a ya moto akomónisama mpe koninganisama lisúsu likoló ya bato.

Sikawa, Mwana ya moto nde nani? “Na ebandeli Liloba azalaki, mpe Liloba azalaki mboka na Nzambe, mpe Liloba azalaki Nzambe. Mpe Liloba akómákí mosuni mpe afándákí kati na bisó.” Mpe soko malakisi nyoso tozali na yango, mpe endimiseli ya Liloba ya Nzambe; na nzela ya Liloba na Nzambe, na nzela ya bilembo, na nzela ya bikámwiseli, tozali komóna lelo, yango kati na Búku ya—ya Luka awa, yango lokola toúti bobele kozua útá na bozóngeli eténi ya Liloba, to Lu—Luka mokapo ya 17 mpe molongó ya 30; mpe Malakí 4, mpe Makomi ndéngé na ndéngé tomesani na yango, Liloba yango yango  lisúsu lininganisámí likoló ya bato, ete bibembe ya mimeseno ya bato mikúfí, mpe Mwana ya Nzambe azali na bomoi lisúsu na libatisa ya Molimó Mosanto alimá kati na bisó, mpe Azali kopesa bisó Bomoi.

Molimó Mosanto akóbákí bobélé koninganisa mpe koninganisa lisúsu likoló na bisó, kokómisa mpe komónisa Liloba na Ye…Dinamíki, mekaníki, Nguyá ya kopesa bomoi…

Na bongo, ntango emónanákí lokola ete ekozala monéne koleka te, Ayebisaki bisó:

“Atíkákí ngai kotála na ngambo ya ezipelo, Mpe Namónákí bino nyoso Kúná…Nyoso oyo olingá ndéle, mpe nyoso alingá yo, bapesameli yo.” Bomóní? Namónákí bango nyoso Kúná lokola bongo. Ezalákí nini? Nguya ya kopésa bomoi.

AMÓNÁKÍ BISÓ KÚNÁ!! Ngámbo ya ezipelo ya ntángo…tozalaki KÚNÁ elongó na ye; balingami na bisó nyoso baoyo bakendékí libosó na bisó…ba tatá, ba mamá, bána. Tozalákí Kúná elongó na bango mpe basúsu nyos’oyo totíkála kokútana na bango soko moké te: Mose, Elia, Petelo, Paulo…tozalaki banso kúná elongó.

Nde, káka lokola Molimó Mosanto molingami Azali, Alingákí te kobósana bisó baoyo tozali kobéla, tozindí kati na mawa mpe tobétámí, boye amíninganísí lisúsu likoló na bisó ete moko na moko ákoka kobika na nyoso tosengelákí na yango.

Bato oyo, baoyo bazali bana mboka ya Bokonzi, mozui ya Nguya ya koyéisa na bomoi, yéisá Yango bomoi epai ya bango, Nkoló, sikawa mpenza. Mpe ézala ete Molimó ákende longwá na mpongo kino mpongo, longwá na Liloba kino Liloba, kino litondi na Yesu Klisto limónana kati na moko na moko ya ba nzóto, mpo ya boséngá ya nzóto, ya molimó, to boséngá nyoso basengeli na bango, lokola tozali kotianela mabóko. Kati na Nkombo na Yesu Klisto.

 Liloba yango. Mongóngó yango. NYOSO oyo tozali na yango bosengá ezali likoló ya ba bánde, Mwasi ya libála. Nzambe Abóngolaka Likanisi na Ye te na ntina na Liloba na Ye. Litónó moko te, to motó ya likambo moko te ekokí kobóngolama, na bongo Abongísákí nzela ete Mwasi na Ye ya libála bákoka koyoka na matói ya bango moko MPEZA KÁKA oyo Alingákí koyébisa bango.

Nzambe alobí na Mwasi na Ye ya libala mpe Amónisaki MAKAMBO NYOSO. Etiamáki na masíni. Mwasi ya libála asengeli áya epai ya Mobali ya libála; nde NZELA na Ye ebongí be epésámí oyo esálémákí mpo ya lelo. Ezali YANGO ELOBÍ NKOLÓ.

Nzambe Abóngolaka nde Likanisi na Ye na ntina ya Liloba na Ye? TE. Azali na MOKÁNO MOBONGÍ BE MPE MOKÁNO MOLINGISÁMÍ. Mwasi ya libála asengeli kozala kati ya MOKÁNO MWA YE MOBONGÍ BE.

Ezali na Mokáno mobongí be te, to esiká ebongí be te, koleka koyóka Mongóngó ya Nzambe mbala moko alimá koúta na Nzambe Ye moko.

Mbélá na ngai epai ya moko na moko na bino ezali komíbakisa na bisó mokolo mwa Lomíngo na 12:00 nsima ya nzángá, ntango ya Jeffersonville, koyóka Mongóngó ya Nzambe komemela bisó Liloba Peto. Esengelami na komítúna-tuna te, kaka komísémbola nsima mpe koloba AMEN NA LILOBA MOKO NA MOKO…ezali na esiká mosúsu te oyo yango ekokí kosálema, bobélé na nzela ya KOFINA PLAY.

Ndeko Joseph Branham.

Litéya: 65-0418E—Nzambe Abóngolaka Nde Likanisi Na Ye Na Ntina Ya Liloba Na Ye?

Tokobanda na molongó ya 61.

Makomí ya kotánga libosó ya koyóka Litéya:

Esode Mokapo ya 19
Mitúya 22:31
St. Matái 28:19
Luka 17:30
Emóniseli Mokapo ya 17

Balingami Bandeko Bana mboka Ya Bokonzi,

Pasika oyo ezali kolaka ete ekozala Pásika monéne koleka oyo Mwasi ya libála azuá ndèle. Tozalaki kofanda kati ya Bozali ya Mwana, kotela, koyeba baoyo Ezali bisó. Litóndí ya Yesu Klisto ezali komónisama kati ya moko na moko na bisó lokola Liloba na Ye, Mongóngó na Ye ezali kogánga, longwá na Mpongo kino mpongo, kobiánga bisó kobima tókende na Lipati ya bisó ya Libála.

Mbúla na mbúla na ntango oyo Mwasi ya libála azalaka kati na kozila na etíngiá monéne ya boyéi ya nsúka ya póso ya Pásika. Ntango moko oyo Akosangisa bisó longwá na mokili mobimba mpo ya mikolo minei ya bokóbi, kokúmisa Ye, kotóndo Ye, kosánzola Ye; zambí Asékwí mpe Azali kobíka kati ya moko na moko na bisó. Mobali ya libála mpe Mwasi ya libála bazali kokóma MOKO.

Azali kopesa bisó ntango Godi oyo kokanga mpenza makambo nyoso ya mokili zingázingá na bisó mpe káka kolekisa ntango elongó na Ye. Makambo ya mokili oyo te kobénda bokébi na bisó, lokola tozali kokela mokili mwa bisó moko elongó na Ye. Kokanga bikuke ya bisó, kokanga bisáleli ya bisó nyoso ya nsinga mpe ya mipepe mpe eloko mosúsu ata nini ekobéndaka bokébi na bisó mosiká na Ye.

Pósá monéne koleka moko na moko na bisó azali na yango ezali kobélema na Ye na koleka. Tolingi kobíka bomoi bobónzameli Ye koleka; kozala ntango nyoso kati ya Mokáno mwa Ye mobongí be. Komíléngele mpo ya koya na Ye. Ezali na eloko moko te kati ya mokili oyo, to kati na bomoi na bisó, ézala na litómbá koleka oyo.

Apési bisó libakú malamu godi oyo kolekisa káka ntango elongó na Ye, koloba mpe kobánza likoló na Ye. Kokóta kati ya bozali na Ye mpe kofungwela Ye mitéma mia bisó. EKOZALA NDE YA KOBÓNGOLA BOMOI MPO YA MWASI NA YE YA LIBÁLA!

Ayebi ete ekokí kozala kpókósó mpo ya bókó na bino na bana, libota, mpe mikúmbá misúsu tozali na yango, kasi soko tokosálela Sékónde moko na moko ya nsómí tozali na yango koloba na Ye, kobéndama pene na ye koleka,  kofungola mitéma mia bisó epai na Ye, Ekozala nde na mbóngwáná moko ya ndenge wana kati ya kotámbola ya bisó elongó na Ye, kino tokozala lisúsu lolengé moko te.

Lokola esáláki Ye na mikolo ya Mose wana eyéisáki Ye bana na Ye kati na ba ndako ya bango, Makilá mapakólamákí mpe bazalakí komíléngele mpo ya kobima ya bango; bongo mpe nde nsúka ya póso oyo ya Pásika godi ebongisi Ye ekozala mpo ya moko na moko na bisó.

MOKOLO MWA MINEI

Ezalaki mokolo mwa Minei na mpókwa nde Nkoló Yesu azuákí Elámbo ya nsúka elongó na bayekoli na Ye, kati ya ekaniseli ya Elekeli libosó ya kobima ya bana ya Yisalaele. Libakú malamu nini oyo tozali na yango kosangana elongó na Nkoló kati ya ba ndako na bisó, libosó ya nsúka ya póso ya bisó mosanto, mpe kosenga Ye álimbisa bisó na masúmu ma bisó, mpe ápesa bisó nyoso tosengeli na yango kati ya mobembo na bisó.

Tata na Likoló, tozali na matóndí mpo na oyo, ntango mosúsu koyanganisama elongó, ngámbo oyo ya Sekó na Sékó. Mpe tozali koluka na ntóngó oyo nguya ya sika koúta epai na Yo, kopesa bisó mpiko mpo ya mobembo mozali libosó. Toyangani pelamókó bana ya Baebele basalákí na ntá ntóngó nyoso, kolokota máná mapesámélaki bango kati ya butú, kobatela bango kati ya mokolo mozalaki koya. Toyángani mpo ya Máná ya molimó, na ntóngó oyo, kopesa bisó makasi mpo ya mobembo.

Tika ete banso tóbanda na 6:00 nsima ya nzángá na ntango ya mboka ya bino koyóka Elámbo 62-0204, na nsima mosakoli akomema bisó kati ya molúlú ya bisó godi ya Elámbo mpe Kosukwama Makolo na nsúka ya bánde, oyo ekozala koleka na app Lifeline (na Angelé), to okoki komízuela losámbo na Angelé to na nkótá mosúsu na bonyatáká ekanganeli na nsé awa.

MOKOLO MWA MITÁNO

Tika ete tókende na mabóndeli elongó na mabóta ma bisó na 9:00 na ntóngó, na nsima na 12:00 nsima ya nzángá, kobiánga Nkoló ázala elongó na bisó mpe átóndisa ba ndako na bisó na Molimó Mosanto lokola tozali komíbónzela epai na Ye.

Tika ete mitéma mia bisó mízónga na mokolo wana na Kalvari, elekí pene na mbúla 2000, mpe tómóna Mobikisi na bisó akakémí likoló na ekulúsu. Tika ete tókanisa motúya monéne Afútaki mpo ya bisó. Azalaki Mwana ya Nzambe na lisúmu te, kasi Asengélákí konyókwama lokola moto moko te anyókwámá, zambí masúmu ma bisó matiámákí likoló na Ye.

Asengélákí kotinda Ye na ewélo akwéísámí (Bomóní?), zambí azuaki masúmu ma bisó. Mpe Klisto akúfákí, te lokola moyengebene; Klisto akúfakí mosumúki. Bomóní? Klisto atíkálâ kosúmuka Ye moko te, kasi Azuakí masúmu ma bisó likoló na Ye.

 Nsima na 12:30 nsima ya nzángá, tika ete tókangana elongó kati na ba ndako ya bisó koyóka: 57-0419 Bobongi be

Nsima tika ete tókangana elongó kati na libondeli mbala moko alimá nsima ya losámbo, kati na ekaniseli ya bobákami na ekulúsu ya Nkoló na bisó.

MOKOLO MWA PÓSO

Tika ete mbala moko lisúsu banso tósangana kati na libóndeli na 9:00 na ntóngó mpe na 12:00 nsima ya nzángá, mpe tóbongisa mitéma na bisó mpo ya makambo minéne Akosala mpo ya bisó kati na bisó.

Nakoki koyóka Ye koloba, “Satána, yaka awa!” Azali Mokonzi sikawa. Asémbóli lobóko, Asímbí lifungóla wana ya kúfa mpe ya ewélo longwá na pembeni ya lokéto na ye, Atingámísí yango pembeni na Oyo ya Ye moko lokéto. “Nalingí éyebana epai na yo. Osálá bipale ntango molaí mingi. Nazali Mwana Nzambe ya bomoi oyo abótámí na bongondo. Makila ma Ngai mazali naino kotanga na ekulúsu, mpe nyongo efútámí mobimba! Ozali lisúsu na makoki te. Obótólámí nyoso. Pésá Ngai Mafungóla wana!”

Nambísa na 12:30 nsima ya nzángá, tokoya bisó nyoso elongó koyóka LILOBA: 57-0420 Bokundami.

MOKOLO NINI YA KÁFÚ-KAFU oyo ekozala mpo ya Mwasi na Ye ya libála kati ya mokili mobimba.

Nambísa tiká ete tóya elongó kati na libóndeli mbala moko alimá nsima ya losámbo.

MOKOLO MWA LOMÍNGO

 Tiká ete ya libosó tólamuka na ntá ntóngó lokola esáláki Ndeko Branham na ntóngó wana eyákí moníngá na ye moké, mwa ndeke ya tólo motáné, kolamusa ye na 5:00 na ntá ntóngó. Tiká bobélé ete totóndo Nkoló mpo na kosékwisa Yesu longwá na bakúfi:

Na ngonga ya mitáno na ntóngó oyo, moningá na ngai moké na tólo motáné apombwák na lininísa mpe alamúsákí ngai. Eyokanákí lokola nde mwa motéma na ye molingaki kopasuka, na bolobáká, “Asékwí.”

Na 9:00 na ntóngó, tiká tóya elongó mbala moko lisúsu kati na monyolólo na bisó ya mabondeli, kobondela moto mpo na moninga na ye mpe komíbongisa koyóka Mongóngó ya Nzambe.

Na 9:30 na ntóngó, tokoya elongó koyóka Litéya ya bisó ya Pásika: 65-0418M Ezali Kobima Ya Mói.

Na 12:00 nsima ya nzángá, tokotómbola mingóngó na bisó epai na Ye kotóndo Ye mpo ya nguya ekopesaka bomoi.

Na 3:00 nsima ya nzángá, tiká ete mbala moko lisúsu tósangana kati na libóndeli kotóndo Ye mpo na NSÚKA YA PÓSO MALAMU APÉSÍ BISÓ ELONGÓ NA YE MPE ELONGÓ NA MWASI NA YE YA LIBÁLA LONGWÁ NA MOKILI MOBIMBA.

Epai ya bandeko na ngai mibali mpe basi na ngámbo ya bibale minéne, lokola mbúla eleki, Nalingí kobiánga bino bósangana elongó na bisó na ntango ya Jeffersonville, mpo ya ntango nyoso ya mabóndeli likoló ya manáka oyo. Nayebí nde ata ko bongo, ete koyóka bánde mokolo mwa Minei, mwa Mitáno, mpe mwa póso nsima ya nzángá na ntango ya Jeffersonville ekozala kpókósó makasi mpo ya mingi na bino, na bongo bolimbisi bómíyóka nsómí koyóka Matéya wana na ntango ekokí mpo na bino. Nzokande, Nakolinga atako bongo, mpo ya bisó nyoso tókangana elongó mokolo mwa Lomíngo  na 9:30 na ntóngó, ntango ya Jeffersonville, koyóka Litéya ya bisó ya Lomíngo elongó.

Nalingaki mpe kobiánga bino mpe bana na bino ete bózala eténi ya Misálá ya Creations, journaling, mpe biloko ya bobongisi biléi oyo libóta na yo mobimba bokosepela kosála elongó. Tokanisi ete bokolinga yango lokola nyoso ezuí mobóko likoló ya LILOBA tokozala koyóka na nsúka ya póso oyo.

Mpo ya manáka ma nsúka ya póso, nsango likoló ya komíbongisa mpo ya molúlú ya Elámbo, bisáleli bikosengelama na yango mpo ya misálá ya Creations mpe nsango mosúsu, bómóna bikanganelo awa na nsé.

Tiká tókanga ba telefóne ya bisó mpo na nsúka ya póso ya Pásika, longólá sé kozua bilílí, koyóka Eténi Ya Liloba Útá Na Litéya Ya Mokolo, mpe koyóka ba bánde longwá na Table app, Lifeline app, to bikanganelo bikokí kozuama.

Ezali lokúmu ya lolengé wana mpo na ngai kobianga yo mpe libota na yo koya elongó moko na Mwasi ya libála longwá na mokili mobimba mpo na nsúka ya póso etóndí na LOKÚMU, MASÁNZOLI, MPE LOBÍKO YA NZÓTO. Nandimí ezali sóló mpenza nsúka ya póso oyo ekobóngola bomoi na yo mpo ya libélá.

Ndeko Joseph Branham.

Nsango: 65-0221E MELIKISEDEKE OYO AZALI NANI?

• 26-0329 MELIKISEDEKE OYO AZALI NANI?
• 24-0630 MELIKISEDEKE OYO AZALI NANI?
• 22-1204 MELIKISEDEKE OYO AZALI NANI?
• 19-0707 MELIKISEDEKE OYO AZALI NANI?
• 17-1105 MELIKISEDEKE OYO AZALI NANI?

BranhamTabernacle.org

Molingami Mwasi Ya libála Bomoi Ya Sekó,

Nani nde Mongóngó wana mozali koloba na bisó likoló ya ba bánde?

Tokokí bobélé koyéba eyano na motúna wana na nzela ya Emóniseli koúta na Nzambe. Bobélé Mwasi na Ye ya libála oyo abongísamákí libosó nde akokí kozala na Emóniseli wana. Ntina wana, tosengeli koluka-luka na Liloba na Ye kosósola nani nde Alobaki azalaki moto yango: Molimboli sé moko ya Liloba na Ye. Nani nde alingákí kobúka mpe kofungola Bilembo yango Nsambo? Nani nde alingákí kofungola sekelé nyoso ibómbamáki ya Biblia? Nani nde akobiánga kobima mpe kokamba Mwasi na Ye ya libála? Nani nde akozala na Mongóngó mozángí kokwéa?

Kokokana na Liloba, ezali moto mosúsu te longólá sé Melikisedeke Ye moko. Moto na tatá te soko na mamá te, Oyo azalaki na ebandeli to nsúka ya mikolo te. Nzambe, oyo akómákí mosuni mpe aliákí mosuni mpe lípa ya masángó, amelákí míliki ya mwá ngai, mpe Alobákí na Abalayama. Azalaki moto na bomoto, kobíka kati ya mosuni ya moto.

Liloba yango moko elobákí ete Melikisedèke yango, Moto yango, bomoto yango, akobika mpe komímónisa lisúsu kati na mosuni ya moto bobélé lokola esáláki Ye na Abalayama, nambísa mbala moko lisúsu kati na Yesu Klisto; kasi lelo, kati ya mwanje na Ye ya nsambo motíndami ya Emóniseli 10:7.

Molimó na Ye mokozíkisa héma wana ya mabelé na ntina ete Ákoka koloba mpe komímónisa epai ya Mwasi na Ye ya libála. Nzambe Ye moko kobika mpe koloba kati ya mosuni ya moto. Mombóto na Ye ya libosó ezóngisámí ekómí na kokémba mobimba. Etandelo mobimba ya Nzambe esí ekómákí; Nzambe na moto bazalaki Moko. Nzambe azalaki koloba mbebu na litói na Mwasi na Ye ya libala lokola esálákí Ye na Abalayama.

Ayaki na kati mpe abíkáki kati na yango, kati na Moto ya Melikisedeke, na nsima toyókáki lisúsu na ntina ya Melikisedeke te pámba te Akómákí Yesu Klisto, Melikisedeke, azalakí Nganga kasi akómákí Yesu Klisto, sikawa, olekákí mosiká na yango, zambí kati na lolengé wana Ayébákí maksambo nyoso, nde otikálá koyeba yango naino soko moké te.

NAINO TE…!! Nde tozali ba nani?

Míso ma bisó, litongi na bisó, eloko sé eloko ezalákí bisó, tozalaki kati ya makanisi ma Ye na ebandeli. Libosó ndèle Mwanje, monzóto, Kelúba, to elóko ata nini ézala. Akanísákí yango, Alobákí yango, mpe bisó oyo awa.

Yango nde kozánga nsúka. Tokoki kosósola yango te kati na makanisi ma bisó, kasi ezali Nzambe, Nzambe, kozánga nsúka!

Nzambi tozalaki kati na Ye na ebandeli, nini nde ezali kokómela bisó nsima ya bomoi oyo ya kufa awa na mabelé kokóma na nsúka?

Ntango mokóto oyo ya mosuni mokwéi, ezali na nzóto ya mokili, nzóto ya molimó, nzóto oyo esálémí na mabóko te, sokí te ete ebótámí na mwasi, oyo tozali kokende na yango. Nsima nzoto yango ezóngí mpe ememí nzóto ya nkémbo.

Makambo nini ya bikámwa mazali kati ya ebómbelo mpo ya Mwasi na Ye ya libala. Bótala oyo ezali kosálema sikawa mpenza wana ezali Ye komónisa Liloba na Ye epai ya bisó lokola libosó naino soko moké te. Bétá lisoló ya mokandá ya bolingo epai ya Mwasi na Ye ya libála! Mokolo nini oyo tozali kobíka kati na yango.

Tozali na Emóniseli mpe toyebi ezali Melikisedeke, Mongóngó ya Nzambe, koloba na bisó likoló ya ba bánde. Tozali na Emóniseli ezali Mokáno mwa Nzambe mopesámí mpe mobongí be mpo ya lelo.
Na bongo, toYEBÍ BAOYO EZALI BISÓ MPE TOZALI MWASI NA YE YA LIBÁLA.

Emoniseli yango ezali koyá monéne koleka mpe koleka lisúsu mokolo na mokolo. Mokolo moko na moko mozali koleka mozali komemela bisó esengo mingi koleka, Emóniseli mingi koleka. Mwasi ya libála azali komíléngele na bofándáká kati na bozali ya Mongóngó na Ye, lokola Azali koyebisa Bisó Tozali ba nani, boni Alingí Bisó, boni Akoki kozila te kino ekosila Ye kozala elongó na Bisó!!!

Yaka, ómíléngele na 12:00 nsima ya nzángá, ntango ya Jeffersonville, mpo na oyo ebélémí kosálema, lokola tozali koyóka Mongóngó ya Melikisedeke.

Ndeko Joseph Branham

Litéya: 65-0221E “Melikisedeke Oyo Azali Nani?”

Makomi ya kotánga:
Genese Mokapo ya 18
Esode 33:12-23
St. Yoane 1:1
Baloma 8:1
2 Bakolinti 5:1
1 Batesaloniki 4: 13-18
Timote ya libosó 3:16 / 6:15
Baebele 7:1-3 / 13:8
Emóniseli 10:1-7 / 21:16