All posts by admin5

26-0125 MITUNA MPE BIYANO # 1

Nsango: 64-0823M MITUNA MPE BIYANO # 1

BranhamTabernacle.org

Balingami Eyánganelo Ya Branham,

Mbote mingi na Mwasi ya libála ya Yesu Klisto longwá na mokili mobimba, baoyo bandimaka ete Eyánganelo ya Branham, Mongóngó ya Nzambe, nde losámbo na bango moko epai wapi bazali koléisama kati ya molímo na Máná mabómbámí maye mabómbámákí mpe mabátélámákí mpo ya Mwasi ya libála ya Klisto.

Oyo nde mboka na ngai; oyo nde esiká na ngai ya mosálá; awa nde tofándaka. Sikawa, bóbatela yango kati ya makanisi atá nini ésálema. Sikawa soko bozali na bwányá, bokosimba likambo moko. Atá nini ésálema, awa nde esíká na bisó ya mosálá, awa mpenzá!

Bandimi mingi ntango nyoso basósólákí mabé to batiaki likanisi ya bango moko to ndimbola ya bango moko na oyo elobákí mosakoli awa, kasi azali koyebisa Mwasi ya libála alimá polélé: “Soko bozali na bwányá, bokosímba eloko moko, oyo nde esíká na bisó ya mosálá, awa mpenza!”

Alingákí koloba nini na yango?

Ntango Ndeko Branham azalaki awa, mingi basósólákí ye mabé mpe bakanisaki ete esengelákí na Mwasi ya libála kokende na Arizona mpe kolanda ye Kúná, mpo ya kozala kati ya Konétolama. Ndeko Branham ayanólákí bango polélé: BÓTIKALA AWA, AWA NDE ESÍKÁ YANGO.

Ebólo mobimba na bango balongwákí kokende epai Kúná, mpe balingaki kokende epai oyo mpe kosála bongo, nsima ya ngai koyébisa bango bátíkala Kúná. Bótikala Kúná, bótíkala awa mpenza; awa nde esiká yango.

Bato bazuakí nzelá útá na bisiká nyoso na Ameríka kokende na Arizona, kasi ayebisaki bango polélé: Bótikala awa mpenza, awa nde esíká yango!

Kotíkala kati ya Jeffersonville? Yango nde alobákí!

Emóniseli ya ngai ezali, ezalákí Nzambe, koloba na nzela ya mosakoli na Ye mpe koyebisa bato: “BÓTÍKALA NA BA BANDE.” YANGO nde ESÍKÁ YANGO!

Ayókaki mpenza mpási na motéma mpe alobákí asengélákí kosála eloko moko na bato yango. Asengeli kosála nini? Alingákí kotinda bango na lingómbá nini? Basengelakí bákende wapi? Ndeko Branham alobaki asengéli kosála nini?

Na bongo sikawa, Nasengeli názóngisa bana yango awa mpo ya eloko moko ya kolia. Bazali na nsé Kúná kati ya lisóbé kokúfa na nzala.

Alobákí te ete bakosengela kokende na lingómbá ya mboka moko mpe kozua mwa biléi ya kolia. Alobaki asengeli KOZÓNGISA BANGO AWA mpo ya eloko moko ya kolia, soko boye te BAKOKÚFA NA NZALA.

EMÓNISELI YA NGAI, BANINGÁ.

Sikawa, ezali te mbala moko lisúsu kosósola ye mabé, to koloba eloko moko elobákí ye te, na bolobáká: “Ndeko Branham alingákí mondimi nyoso akende na Jeffersonville mpo ya kozala Mwasi ya libála.” Ndeko Branham ayébákí bato yango nyoso, mpe mondimi NYOSO útá na mokili mobimba, akokaki te kolongwa koya mpe kofanda kati na Jeffersonville. Elingaki kokoka te. Na bongo alingaki koloba nini? Azalaki KOSANGISA mwasi ya libala ya Klisto zingázingá ya ba BANDE oyo itiámákí na masíni mpe ibómbámákí mpo ya Mwasi ya libála komiléisa na yango.

Etíndá oyo, Mongóngó moye, nde Liloba ya Nzambe lilobámí mpo ya lelo mpe Likosangisa mpe kobongisa be Mwasi na libála ya Yesu Klisto.

Nzóto oyo ebomámí nde ba ba mpongo baliaka. Sikawa, mpongo ayebání kati na Biblia, lokola mosakoli. Mosakoli azali mpóngo. Nzambe—Nzambe amíbiángaka Mpóngo, mpe bisó nde ba “mpóngo miké” nde, ba—bandimi. Bomóní? Mpe nzóto oyo ebomámí bakolíaka nde nini? Nde Liloba. Esiká sé esiká Liloba lizali, loléngé malamu ya ndeke ekoyébana yango moko.

Wapi nde, Yango Elobí Yawe Liloba mpo ya lelo, péto, oyo endimísámí, esósólámí mabé te, ezali? Ezali kaka na esíká moko, Ba Bande.

Nakokaki kokóba lisúsu na lisúsu, eténi ya Liloba moko nsima ya mosúsu, kasi Etíndá oyo mpe oyo elobákí Ndeko Branham esengeli na Emóniseli koúta na Nzambe. Esengeli tótánga kati ya milongó na nzela ya Emóniseli, kasi koloba oyo elobákí ye. Zambí Ezali LILOBA PÉTO.

Mitúná mpe Biyano mpo ya lelo mpe oyo NANDIMAKA.

Lelo, batéi mingi bazali koloba na bato ete na bozaláká na Losámbo ya Bánde na Ndako tozali libándá ya Liloba mpe oyo Ndeko Branham alobákí toósála. Bazali komíyóka ete esengeli na bisó kokende na oyo babiángí mpe bamóní ete yango nde losámbo.

Ezali sóló mpenza na biténi ya maloba mingi-mingi epai wapi Ndeko Branham alobí oyo polélé.

Sikawa, kendé na yo na lingómbá moko ya malamu ya Nsango Malamu Mobimba mpe mízuélá ya yo lingómba mpo na yo moko.

Mpe Nandimí yango na motéma na ngai mobimba, mpo ete alobákí bongo, Kasi Nandimí ete tozali kosála yango na nzela ya BOZALÁKÁ NA LOSÁMBO YA BÁNDE NA NDAKO. Bisíká tozuámí nde eloko ya motúya te epai ya Nkoló. Ezali bobélé litongi. Kasi lotómo na bisó epai na Nkoló ezali Kotíkala na Liloba na Ye, ESÍKÁ MOKO BOYE TE TO LITONGI. Esiká ya kosambelela ekobikisa to kobongisa be Mwasi ya libála te, LILOBA NDE LISÁLAKA YANGO.

Soko nakei na litongi ya losámbo moko, kasi babósání ELÓKO YA LITÓMBÁ: koyóka Mongóngó ya Nzambe na Bo Fináká Play, mpe na esiká na yango bazali BOBÉLÉ koyóka batéi kotéya Etindá, yango mpenza nde ekosepelisa mobimba mpe koléisa bomoto na yo? Ekokí kosepelisa bomoto na yo, ndeko na ngai mobali mpe mwasi, kasi ekosepelisa Mwasi ya libála te.

Bótika Náloba elóko awa mpe koloba ezali na nkóto ya ba nkóto ya bato baoyo bazali na losámbo te oyo etongámí ya kokende na yango. Babúngí nde kobúnga? Soko bazali na mobateli te to lingómba, elingí nde koloba ete bakokí kozala Mwasi ya libála te? Soko Ozali kobíka na ntáká ya ba kolométele 160 na litongi ya losámbo, osengélí nde kokende na losámbo wana? Kasi soko nafándaka mosiká koleka wana, nasengélí kokende te? Nasengelí náyóka motéi moko na nzela ya bikanganeli ya singa, kasi náyoka ba bande te? Litongi ya komónana nde eloko ya litómbá koleka oyo mosakoli azali koloba ete ezali eloko ya litómbá koleka tosengeli kokende na yango?

Mosakoli alingákí nde komema Mwasi ya libála wapi?

Soko okoki koya awa na Eyánganelo te, zua losámbo moko esiká moko boye; kendé na yango.

Mbala moko lisúsu, wapi nde kopona na ye ya libosó epai ya kotinda bato? Na Eyánganelo ya Branham, Liloba, ba bánde. Yango nde Nzambe apésákí Mwasi na Ye ya libála ásála na ntángo oyo ya nsúka, mpe tozali kosála yango mokolo nyoso MPE Lomíngo nyoso.

Boye Nasósólámí mabé te. NAZALI TE KOLOBA osengélí koyóka ba bánde elongó na Eyánganelo ya Branham na mbala moko mpo ózala Mwasi ya libála. Nazali TE KOLOBA ete osengélákí te kokende na losámbo. Nazali TE KOLOBA okokí te koyóka batéi. Soko ondimí yango, ozali libándá ya Liloba. NAzali koloba ete koyoka Mongóngó ya Nzambe likoló ya ba bande nde Mongóngó ya litómbá koleka OSENGELÍ KOYOKA, mpe Nandimí ete mobateli nyoso asengélákí koyókisa Mongóngó wana, ba bánde kati ya masámbo ya bango. Kasi bamísálélí ekímelo ya ndéngé nyoso ya KOZÁNGA KOYÓKISA BA BANDE. Soko yango nde losámbo na yo, ozali komíléisa na Liloba te.

Oyo nde polélé mpenza yango alingákí te ékóma mpe yango nde bato bazalaki kosala.

Mpe kendé na losámbo; Kotíkala na ndako te, kendé kolóba te, mpe bokila te, mpe eloko moko lokola bongo te mokolo mwa Lomíngo.

Tozali te. Tozali kosangana zingázingá ya eloko sé moko ekosangisa Mwasi ya libála, Etindá oyo, Mongóngó oyo.

Mbala moko lisúsu, Nandimaka kokende na losámbo. Ezali na masámbo mingi kati ya mokili mobimba baoyo bazali kotía ba bánde libosó kati na bitéyelo na bango, masánzoli na Nkoló. Nandimaka nde ete osengélí Kotíkala na ndako soko bongo te ozali Mwasi ya libála te? TE, TE, TE…Natíkálá kokanisa yango soko moké te, soko kútu Kondima yango soko moké te. Nalingí kaka ó FINA PLAY ózala wapi to ézala okendeke na lingómbá nini.

Soko ozali te na Emóniseli ya oyo ezali ye koloba, na bongo okokákí koloba polélé: “Nasengélí te koyóka Ndeko Branham to kútu kosengela KOYÓKANA na nyoso ezali ye koloba. Alobákí kútu bongo, ezali na ebelé mosúsu ya bato babiángámí na Nzambe.”

Kendé libosó. Tomóní awa, alobí: “Tosengéláki nde kokende na losámbo mosúsu oyo bazangí koyókana na yo?” Bongo mpenza, Nazali te na…Ezali kaka ngai te nde libángá moké moko na libóngo, boyebí. Ezali na—ezali na yango bobélé na bato malámu basúsu bipai nyoso; nalikíí Nazali moko na bango.

Mongóngó ya Nzambe likoló ya ba bánde nde LIBÁNGÁ MOKÉ YA NGAI, LIBÁNGÁ NA NGAI. Nde Mongóngó Nalingaka koyóka mpe Nalingaka Eyánganelo ya Branham báyóka.

Soko bokolinga komíbakisa na bisó, bómíyóka na boyéi bolámu koleka, bandeko na ngai mibáli mpe basi. Bómíbakisa na bísó mokolo mwa Lomíngo na 12:00 nsima ya nzángá, ntango ya Jeffersonville, lokola tozali koyóka Mongóngó ya Nzambe koloba mpe koyanola mitúná ebelé okokí kozala na yango na motéma na yo. Mpe ómíyókela soko makambo Nalobákí kati na mokandá oyo ezali libándá ya Liloba mpe Nasósólákí mabé oyo Nzambe azali koloba na Mwasi na Ye ya libála.

Oyo elobí ye likoló ya ba bánde ezali Yango Elobí Nkoló. Ezali te oyo elobí ngai ete azali koloba, to oyo endimi ngai ete azali koloba, mpe Nzambe KÁKA nde akokí kopésa yo Emóniseli ya solo.

Ndeko Joseph Branham

Mokolo bande etéyámákí: 64-0823M Mitúna Mpe Biyano # 1

26-0111 Ezalelo Ekoya Ya Mobali Ya Libala Ya Likoló Mpe Mwasi Ya Libala Ya Mabelé

Nsango: 64-0802 EZALELO EKOYA YA MOBALI YA LIBALA YA LOLA MPE MWASI YA LIBALA YA MOKILI

BranhamTabernacle.org

Molingami na Ngai Ya Motéma Koleka,

Nalingí yo mingi koleka. Ozali mosuni ya mosuni ya Ngai, mpe mokuwa ya mokuwa ya Ngai. Kútu libosó Názalisa minzóto, sánzá, molongo ya Ngai mobimba, Namónákí yo mpe Nalingákí yo ndèle. Nayebaki ozalákí eténi na Ngai, oyo ya Ngai MOKO kaka wa motéma. Yo na Ngai tozalákí MOKO.

Mokolo Natálélákí mpe Nazilákí útá Namónákí yo ndéle nsúka nsúka yango oyo ekómí. Sikawa Nazali kobiánga yo mpe kosangisa yo longwá na ebimelo ya ntango mpe elimwelo ya ntango, likoló mpe ngelé, na nzelá ya Mongóngó ya Ngai. Ozali makanisi ma Ngai, Liloba ya Ngai, Mwasi na Ngai ya libála, oyo amónísámí.

Nazilákí mingi koyebisa yo makambo manso mazali kati na motéma na Ngai, na bongo Nakomákí yango na nzelá ya basakoli na Ngai mpe Nasénzélákí Yango ebátélámákí mpo na yo mpo ya bilánga nkóto na nkóto. Mingi batángákí Yango mpe bandimákí yango kati na bilánga nkámá na nkámá, kasi Nabátélákí makambo mingi mabómbámákí kino EKÓMÍ BINO. Epai na BINO bobélé nde Nakoyebisa.

Batálélákí koyeba mpe koyóka makambo nyoso oyo ya bikamwa Nabátélákí ya kobómbama, kasi lokola elakákí Ngai yo, Nazilákí mpe Nabátélákí yango ya kobómbama kino sikawa, kaka mpo ya YO, OYO YA NGAI MOKO MPE MOKO KAKA.

Nalakákí yo ete Nakoya mpe Nakomímónisa mbala moko lisúsu kati na mosuni ya moto, ete Nákoka koyébisa yo, mpe komónisa yo makamb’oyo nyoso. Nalingakí ete óyóka MONGÓNGÓ NA NGAI koloba mbala moko alimá na yo.

Napakólákí ebelé mosúsu na Molimó na Ngai Mosanto koyebisa yo mpo ya bolingo na Ngai, kasi lokola Nasálákí ntango nyoso, mpe Nakokí kobóngwana soko moké te, Naponákí moto moko: mwanje na Ngai, mosakoli na Ngai, kozala Mongóngó na Ngai ete Nákoka koloba Yango Elobí Nkoló epai na yo.

Nalingákí koyébisa yo, obikisamákí te na mokolo sóngóló. Ozalákí na yo ya kobikisama ntango nyoso. Nayei kaka nde kosíkola yo ózónga. Obikisamáki longwá na ebandeli zambí mpo ya kobanda ozalákí na Bomoi ya Sékó. Ntina wana, na míso na Ngai, masúmu ma yo manso makokí kútu te komónama na Ngai, eloko sé moko Nayókaka ezalí mongóngó na yo. Namónaka na Ngai kaka etáliseli na yo.

Bóní Naúmeli kozila koyebisa yo makambo mingi mpenza. Motéma na Ngai mozali kopunjwapunjwa na kosepela. Boni Nazilákí mpo ya Lipati na bisó ya Makwéla, mbúla nkóto na bisó ya bo nkóto elongó. Koyebisa yo kati ya bozindó nyoso na ntina ya Ezalelo ya Bisó Ekoya elongó; Bóni Naléngélakí eloko moko na moko mpo na yo, na elóko nyoso kokokana na pósá na yo.

Wa Ngai wa motéma, soko okanísí ezali bikámwá sikawa koyóka Mongóngó na Ngai koloba na yo, zilá bobélé kozila, oyo ezali kaka nde elílíngí ya boúlani ya oyo ekozala ntango tokobika kati na Mboka yango elongó. Mosakoli na yo akobika kútu na ekuke oyo elandí ya yo: akozala mozalani na yo.

Tokotámbola na ba bala-bála wana ya wólo mpe komela longwá na Etóko elongó. Tokotámbola kati na ba paladíso ya Nzambe elongó na banje kolembetela mabelé, koyémba ba njémbo…Mokolo nini oyo ekozala!

Nayebí nzelá emónání mabakú, mpe ntango mosúsu ekómaka makási mingi mpo na yo, kasi ekozala moké koleka, moké koleka, ntango tozali elongó moko na mosúsu.

Mpo ya sikawa, Nakoyánganisa bino mbala moko lisúsu mpe koloba na bino Lomíngo loye na 12:00 nsima ya nzángá, ntango ya Jeffersonville, mpe koyebisa bino na ntina ya “Ezalelo Ekoyá Ya Mobali ya libala ya Lóla Mpe Mwasi Ya libala Ya Mabelé”. Nakokí kozila te kino ekosangisama Ngai na bino na ntango wana.

Bókanisa mpe bóbósana soko moké te, Nalingí bino mingi mpenzá.

Na mpo na Ye,

Ndeko Joseph Branham

Makomi:
St. Matái 19:28
St. Yoane 14: 1-3
Baefese 1: 10
2 Petelo 2:5-6 / Mokapo ya 3
Emóniseli 2:7 / 6:14 / 21:1-14
Lewitiko 23:36
Yisaya Mokapo ya 4 / 28:10 / 65:17-25
Malaki 3:6

26-0104 Mabulu Matobwani

Litéya: 64-0726E Mabulu Matobwani

PDF

BranhamTabernacle.org

Balingami Bameli Útá na Etóko,

Noéle mpe Mbúla Ya Sika ya motindo nini oyo tozalákí na yango. Toyambákí mpe tofungólákí makabo ya Nzambe oyo Atíndélákí Mwasi na Ye ya libála. Likabo na bisó ya libosó ezalaki Noéle ya Monéne koleka oyo ezíngámá ndéle. Nzambe Ye Moko amízíngákí kati ya mosuni ya moto mpe azóngisákí libóké yango na mokili. Ezalákí Likabo na Ye monéne ya libosó koleka kozóngisa Mwasi na Ye ya libala.

Nsima Nzambe atindaki libóké monéne mosúsu epai ya Mwasi na Ye ya libala. Alingákí bisó mingi koleka na motindo ete Ayákí Mpe Amímónisákí kati ya mosuni mbala moko lisúsu ete Ákoka koloba na bisó mbebu na litói. Alingákí Ye moko mpe Mwasi na Ye ya libála kozala Moko.

Mpe sikawa, baníngá, bósósola ngai mabe te. Tika ete Náloba oyo na limemíá kati na motéma na ngai, na boyébáká ete Nazali moto akangámí na Bomoi ya Séko oyo nakotélema libosó ya esámbiselo mokolo moko: Nkóto na nkóto ya bato bazali kozánga likabo na bango. Bomóní? Bakokí te kosósola Yango. Mpe bazali kotála, mpe koloba: “ Oo, azali na ye kaka moto.” Ezali solo. Ezalákí Nzambe to Mose nde akangólákí bato? Ezalákí Nzambe kati na Mose. Bomóní? Balelákí mpo ya mosikoli. Mpe ntango Nzambe atíndélákí bango mosikoli, bazángáki komóna yango, zambí ezalákí na nzelá ya moto, nzokandé ezalakí moto te, ezalákí Nzambe kati ya moto.

Lelo, mbala moko lisúsu, nkóto na nkóto ya bato bazali kozánga likabo na bango mpe koloba: “bosengeli te koyóka ba bande, ezali sikawa na bato basúsu bapakólámí,” Oyo ezali solo, kasi bazángí koyéba ete ezali Mongóngó BOBÉLÉ MOKO mondimisamákí na Nzambe, koloba na nzela ya Yango Elobí Nkoló na nzela ya moto yango. Mongóngó yango nde Ulími Tumími ya Nzambe, Etémelo na Ye mpo ya lelo.

Ntango tozali koyóka Mongóngó na Ye likoló ya ba bande tozali mpenza solo komela longwá na Etóko ya Nzambe, oyo esengeli te na kotóka na ebéndeli, kobénda, komíbakisa na, komílongola na; tozali sé Kondima mpe Kopéma likoló na Liloba moko na moko Lilobámí.

Na boyókáká Mongóngó wana likoló ya ba bande, kokokana na Yesu Ye moko, tozali na bondimisami ya solo ya Molimó Mosanto kati na mokolo ya bisó.

Na bongo ezali na bondimisami ya solo mpenza ya Molimó Mosanto! Atikálá naino soki moké te koyebisa ngai likambo ata nini ya lokutá. Yango nde: “Ezali elembo ya Molimó Mosanto, nde ye oyo akokí kondima Liloba.” Bokokí koyamba Yango.

Nzambe apésí bisó Liziba tokoki komela útá na yango monúti moko na moko ya mokolo moko na moko. Ezali na yango ntango nyoso ya mpío. Ezali te eloko moko boye ya kozánga kotíola, Ezali Liziba na Ye lizángí kokaoka, Liziba limíkokí; osengelí bobele Kofina Play.

Kosolola na ntina na LIKABO longwá na Nzambe, bokokí nde kobánza boni Likabo oyo lizali penza solo MONÉNE KOLEKA? Na Bofináká bobélé Play mpe boyókáká Mongóngó na Ye likoló ya ba bande, nde bobélé…MONGÓNGÓ BOBELE MOKO kati na mokili mobimba osengelí na ekongoleli te, kokómba na epúpwelo te, to likambo nini mosúsu. Osengelí bobélé na koyóka, Kondima, mpe koloba amen na Liloba moko na moko.

Nzambe Ye moko apésákí nzela oyo, NZELA NA YE BOBÉLÉ MOKO, kozua bomoi ya séko, mpe mingi na koleka, KOZALA MWASI NA YE YA LIBÁLA. Tokoki bobélé kolála likoló na tólo na Ye mpe konúnga makási ma bisó longwá na boyókáká Liziba na Ye, Mongóngó na Ye, El Shaddai koloba na Mwasi na Ye ya libála.

Tiká ete mbúla oyo ézala mbúla Akoyá mpo na bisó, Mwasi na Ye ya libála molingami. Tozali kosénzela mpe kozila na bozili na etíngíá monéne. Mokolo sé mokolo sikawa tokotála baoyo toúmelá kozila bámónana. Tokokáta ntina, kati na mwa ntango ya kobwéta líso, toko bima awa, kobiangama na Lipati na bisó ya Libála.

Nkoló, lokola tozali komóna mesa yango monéne kotandama Kúná mpo ya lipati wana, molaí ya ba nkóto ya ba kilométele, kotálana ngámbo ya mesa moto na moninga na ye, babuni ya kala batóndí na bilembo ya mpótá, mpisoli ya esengo kotanga na matáma na bisó…Mokonzi abimí kati na bonzéngá na Ye, boyéngebene, kotambola na molaí ya mesa mpe kosímba na matándú ya Ye moko mpe kopangusa mpisoli longwá na míso ma bisó, koloba: “bólela lisúsu te, nyoso esílí. Bókóta kati na bisengo ya Nkoló.” Minyókó ya nzelá mikomónana lokola eloko moko te ndéle, Tata, wana ekokóma bisó na nsúka ya nzela.

Yaka mpe melá, mpe melá, mpe melá longwá na Liziba lipesámí na Nzambe mpo ya lelo elongó na bisó Lomíngo loye na 12:00 nsima ya nzángá, ntango ya Jeffersonville. Ezali esiká BOBÉLÉ MOKO okokí komíbósana mobimba omítandí mpe koloba AMEN na Liloba moko na moko Ozali koyóka. Ezali Etóko na Ye epésámí mpo ya Mwasi na Ye ya libála komela útá na yango.

Ndeko Joseph Branham
Liteya: 64-0726E Mabúlú Matobwání
Makomi ya kotánga libosó ya boyóki Litéya:
Njembo 36:9
Yilimia 2:12-14
St. Yoane 3:16
Emóniseli Mokapo ya 13

25-1228 Koyeba Mokolo Na Bino Pe Nsango Na Yango

Litéya: 64-0726M Koyeba Mokolo Na Bino Pe Nsango Na Yango

PDF

BranhamTabernacle.org

Balingami Mwasi ya Libala Oyo Apapámí,

Lelo, lingómba babósání mosakoli na bango. Balingi lisúsu ye atá ndambo te kotéya kati na masámbo ya bango. Bazali kobéta tólo ete bazali na babateli na bango baoyo bakotéyaka bango mpe bazongelaka biteni ya maloba ya Liloba mpe balimbolaka Liloba. Kotéya ezali na litómbá monéne koleka koyóka Mongóngó ya Nzambe likoló ya ba bande kati ya masámbo na bango.

Kasi Nzambe ayébákí asengélákí kozala na mosakoli na Ye; nde bongo ntango nyoso Abiangáki Mwasi na Ye ya libala kobima mpe Akambákí ye. Apapákí bisó longwá na mabóta masúsu manso na nzela ya Mopánga mwa Ye Mopelí bipai nyoso mibalé, Molimó na Ye Mosanto, Mongóngó mwa Ye molobamákí na nzela ya mosakoli na Ye.

Apapákí bisó na nzela ya Mongóngó wana. Nde ntina Asálákí ete ézuama na masíni mpe ébómbama likoló ya bande. Na nzela ya Emóniseli tomóní boni Makomí mabongí be! Mwasi ya libala akokí kotela te longólá sé Mwana átelisa yango.

Ótéya boní, ósála ata nini, ekotelisama te, ekomónisama te, ekondimisama te; bobelé na nzela na Ye Oyo alobaki: “Nazali Pole ya mokili,” Liloba.

Liloba liyebisaki bisó ete Molimó Mosanto Ye moko akoyá mpe kotelisa bisó, kondimisa, komítálisa mpe komímónisa. Pole ya mpókwa eyéi. Nzambe komímónisa Ye moko kati ya mosuni kobianga Mwasi na Ye ya libála kobima.

Ye nde Oyo abiángákí YO kobima na nzela ya Molimó Mosanto na Ye, Liloba na Ye, Mongóngó na Ye. Ye nde aponákí YO. Ye nde alakisaka YO. Ye nde azali kokamba YO. Na nini? Molimó Mosanto na Ye, Mongóngó na Ye koloba NA YO MBALA MOKO ALIMÁ.

Kasi ezali likambo lileká ngala mingi epai na bango lelo oyo. Baleká esiká ya koyóka ba bande kati na masámbo na bango. Bayebí Yango te. Nde ntina bazali kati na lolengé bazali na yango. Kasi epai na yo, emónísámákí kozala nzela ya Nzambe oyo epésamákí, EZALI YANGO ELOBÍ NKOLÓ EPAI NA YO.

Boye esengelí ézala na—na—na Nguya moko éya, Molimó Mosanto Ye moko, kotelisa, to kondimisa, to kotálisa, to kosála émónisama ete elobákí Ye libosó ekokóma lelo oyo. Pole ya ntango ya pókwa ezali kobóta yango. Ntango nini!

Tozali Mwasi Liloba ya Nzambe tobongí be mosakoli na Ye amónákí kati ya emónoneli. Bisó nde baoyo Atindákí mosakoli na Ye kobianga kobima na nzela ya Liloba na Ye, mpe tozali sikawa na KOLAMUKISA, zambí toyebí sikawa tozali ba nani.

Kolamukisa, kuna, ezali liloba yango moko lisálemélí esiká mosúsu nyoso, Naútakí kaka kotála yango, elingí koloba: “kolamukisa.” “ Akolamukisa bisó nsima ya mikolo mibalé.” Ekozala: “Kati na mokolo ya misáto Akolamukisa bisó lisúsu, nsima na Ye kopalanganisa bisó, mpe kobéta bisó na kufa míso, mpe kopasola bisó.”

Tata atindákí mosakoli na Ye kosénzela Mwasi na Ye ya libála na ntina ete tólongwa te na nzela. Bómíkundwela, ezalaki emónoneli!

Mwasi ya libala alekákí na esiká yango moko ezalaki Ye wana ezalákí Ye na ebandeli. Kasi Nazalaki kotála Ye kobima na molongó, mpe nazalaki komeka kobénda kozóngisa Ye na molongó.

Kasi “a” kokákí nde kobénda ye ázónga lelo boní? “Ye”, moto, azali awa te na mabelé. NA NZELA YA LILOBA! Liloba SÉ MOKO lindimísámí mpo ya lelo nde nini? Mongóngó ya Nzambe likoló ya ba bande.

Batéi babiángámí kotéya Liloba na bozóngéláká mpenza kaka yango elobákí mosakoli. Kokokana na mosakoli ye moko, basengeli báloba eloko mosúsu koleka te.

Ya solo, babiángámí kolakisa mpe kotéya Liloba yango. Kasi ezali na MONGÓNGÓ SÉ MOKO MONDIMÍSÁMÍ NA NZAMBE YE MOKO KOZALA YANGO ELOBÍ NKOLÓ.

Bongo mpe elobí Ngai, kati na Nkombo ya Yesu Klisto: Bakísá eloko moko te, longólá te, tíyá te likanisi na yo moko kati na Yango, Lobá bobelé oyo elobámí likoló ya ba bande wana, sálá bobelé mpenzá oyo Nkoló Nzambe apésí motindo kosála; bakísá na Yangó te!

Soko olobí “amen” na liloba moko na moko mobateli to motéi na yo alobí, obúngí. KASI SOKO OLOBÍ “AMEN” NA LILOBA MOKO NA MOKO NZAMBE ALOBÁKÍ NA NZELA YA MOSAKOLI NA YE LIKOLÓ YA BA BANDE, OZALI MWASI YA LIBALA MPE OKOZUA BOMOI YA SEKÓ.

Mosakoli ya Nzambe azalaki moto Nzambe aponákí koloba na nzelá na ye. Ezalaki na nzela ya BOPONI YA NZAMBE kosálela ye koloba Liloba na Ye mpe kotia Yango likoló ya ba bande na ntina ete Mwasi ya libála álinga NTANGO NYOSO KOSENGELA KOZALA NA YANGO ELOBÍ NKOLÓ KOYÓKA.

Alingí te ete Mwasi na Ye ya libala átálela oyo bato basúsu balobí, to ndimbola ya bango ya Liloba na Ye. Alingi Mwasi na Ye ya libala koyóka longwá na mbebu na Ye kino matói ma bango. Alingí te Mwasi na Ye ya libala átálela moto ata nani mosúsu kasi Ye moko.

Ntango tolamúkí na ntóngó, tolingaka Ye koyebisa bisó: “Mbote baningá. Nakoloba na bino lelo mpe koyebisa bino boni Nalingí bino mpe boni bino na Ngai tozali MOKO. NAzali na mingi baoyo Nakopesa Bomoi ya Sekó, kasi bobele BINO nde Mwasi ya libala Namíponeli Ngai moko. Kaka epai na BINO nde epésakí Ngai Emóniseli libosó ya bozalisi ya mokili.

Ebelé mosúsu balingaka koyóka Ngai, kasi Naponáki bino kozala Mwasi na Ngai ya libala. Mpo boyebí Ngai mpe botikali na Liloba na Ngai. Bokakólí te, bozalakí te kofinela soko nini líso, kasi botíkálí sembo na Liloba na Ngai.

Ntango ebélémí. NAzali koya mpo na bino noki mpenza. Ya libosó, bokomóna baoyo bazali elongó na Ngai sikawa. Oo, bóní bazali na mitéma lúku-lúku bámóna bino mpe bázala elongó na bino. Bótungisama te bana miké, nyoso ezali mpenza na ntango, bókóba bobele kopúsa.”

Lokola mosali ya Nsango Malamu, Nakoki komóna te eloko moko etikali kasi bobelé kokende ya Mwasi ya libála.

Ndeko Joseph Branham

Liteya: 64-0726M “Koyéba Mokolo na Bino Mpe Etíndá Na Yango”
Ntango: 12:00 nsima ya nzángá, ntango ya Jeffersonville
Makomi ya kotanga libosó ya boyóki Litéya:
Osea: Mokapo ya 6
Ejekiele: Mokapo ya 37
Malakí 3:1 / 4:5-6
II Timote: 3:1-9
Emóniseli: Mokapo ya 11

25-1221 Kobima Na Moláko

Nsango: 64-0719E Kobima Na Moláko

BranhamTabernacle.org

Balingami Baoyo balingámí,

Nzambe abóngwanaka te. Liloba na Ye liyebí kobóngwana te. Manáka ma Ye mayebí kobóngwana te. Mpe Mwasi na Ye ya libála ayebí kobóngwana te, tokotíkala na Liloba. Ezali koleka bomoi epai na bisó; Ezali Etóko ya Mái ya Bomoi.

Eloko bobele moko topésámí lotómo kosala ezali koyóka Liloba, oyo ezali Mongóngó ya Nzambe mondimísámí motiámákí likoló ya ba bande mpe mobómbámákí. Eloko sé moko tozali komóna ezali endimeli te, ebólo ya bato te, tomónaka eloko mosúsu te kasi Yesu, mpe Azali Liloba likómí mosuni na mokolo ya bisó.

Nzambe azali kati ya Molako ya bisó mpe tozali na na nzela na Nkembo wana tokambámí na Likonzí ya Móto, oyo ezali Nzambe Ye moko koloba na nzela ya mosakoli na Ye oyo andimísamaki ya Malaki 4. Tozali kolia Mana wana mabómbamákí, Mái ma Bomoi oyo Bobele Mwasi ya libála nde akokí kolia.

Nzambe abóngolaka nzela na Ye te, mpe soki te zábolo abóngolaka ya ye. Oyo esalákí ye esili koleka mbúla 2000, azali kosala eloko yango moko lelo, longólá sé alekísí lisúsu mayéle mabe.

Sikawa, nsima ya mbúla nkámá minei, Nzambe akendékí alimá kati na bango mokolo moko. Éngébéné na Makomi, Asengelakí kokóma mosuniNi, mpe koúmela kati na bango. “Nkombo na Ye ekobiangama Mosungi, Mokonzi ya Kímia, Nzambe na Nguya, Tata na Séko.” Mpe wana eyaki Ye kati na bato, balobakí: “Tokozala te na Moto oyo kokonza bisó!…”

Kokokana na Makomí, Mwana ya Moto alingaki koya mbala moko lisúsu mpe kobika mpe komímónisa Ye moko kati na mosuni ya moto, mpe Asálákí yango, mpe bazali koloba eloko yango moko. Ya solo bazali kozóngela mpe kotéya Etíndá, kasi bakolinga te ete moto yango ákonza bango.

Oyo nde ezali mpenza kokóma:

Mpe lokola ezalaki ndéle, ezali mpe bongo sikawa! Biblia elobákí ete Lingómbá ya Laodikia likobimisa Ye libándá, mpe Azalaki kobeta, komeka kokóta. Ezali na likambo moko lilóngóbáni te esiká moko boye. Sikawa mpo ya nini? Basáláki moláko ya bango moko.

Moto akoki koloba: “Nayebí mpe Nandimí Ndeko Branham azalaki mosakoli. Azalaki mwanje ya nsambo. Azalaki Eliya. TONDIMÍ Etíndá oyo. Nsima komísálela ekimelo moko boye, ézala ata ya motindo nini, kozanga koyókisa bato Mongóngó mwa Nzambe BOBELE MOKO mondimísámákí kati na lingómbá na bango…Ezali na mbébá moko esiká moko boye. Sikawa, mpo ya nini? Basalákí moláko ya bango moko.

Nazali koloba makambo oyo te mpo ya kokabola lingombá, Liloba ya Nzambe esálaka yango. Nalingí ete tósangana elongó, kozala LISANGÁ MOKO moto na moningá na ye mpe elongó na Ye, kasi ezali na nzela kaka moko ya kosála yango: zingázingá ya Mongóngó mwa Nzambe likoló ya ba bande. Nde BOBELE YANGO ELOBÍ NKOLÓ ya Nzambe.

Nzambe amónisí nzela na Ye ebongí be epai na bisó. Ezali mpenza na nkembo nzokande na petee mingi. Litéya moko na moko tozali koyóka Ye koyebisa bisó, kondimisa bisó, koyikisa bisó mpiko ete, TOZALI MWASI NA YE YA LIBALA. Tozali kati na Mokáno mwa Ye mobongí be. Tomíléngélí na BOYÓKÁKÁ KOYÓKA YE.

Etindá oyo ezali mpenza ya beébeé koleka zoloná ya lobí lokoya. Tozali lisakoli kokokisama. Tozali Liloba limónisámí. Nzambe azali kotálisa bisó na Litéya moko na moko tozali koyóka ete lelo oyo, Likomí liye lizali kokokisama.

Ekokí kozala na bókó libandá kuna na bikólo, zingázingá na mokili mobimba, wapi kútu bande oyo ekokúta bango kati na ba ndako to mangómbá na bango. Tolingi kobondela, Nkoló, ete wana losámbo lozali kokóba, na—na…to wana bande ezali koyókisama, to ézala na etémelo ata nini tokoki kozala kati na yango, to—to loléngé, tika ete Nzambe ya Lóla oyo alekí monéne ámemia bosémbo oyo ya mitéma mia bisó na ntóngó oyo, mpe ábikisa baoyo ya boséngá, kopesa bango oyo basengeli na yango.

Bózila bobelé monúti moko…Nini nde Mongóngó ya Nzambe epai ya mokili moúti kosakola mpe koloba?…bato bakozala koyóka ba bande kati na ba ndako to masámbo na bango.

Kasi tozali kolobamela mabe mpe kopámelama na bolobáká ete TOKOKÍ soko moké te kozala na Losámbo ya Bande na Ndako? Ndeko Branham atikálá soko moké te koloba ete bóyókisa ba bande kati ya MASÁMBO ya bino?

NKEMBO NA NZAMBE, BÓYÓKA YANGO, BÓTÁNGA YANGO, EZALI YANGO ELOBÍ NKOLÓ. Mpe Ezali kaka te ete Alobaki yango, kasi na boyókáká ba bande kati ya ba ndako Mpe masámbo ya binó, Nzambe monéne koleka ya Lóla akomemia bosémbo ya mitéma ya bisó mpe akobíkisa baoyo ya boséngá mpe kopesa bisó ELOKO ATA NINI TOZALI NA YANGO BOSENGÁ!!

Eténi oyo moko ya Liloba ETÁLÍSÍ ete bato bazali koyóka babáteli na bangó mpe BAZALI KOYÓKA LILOBA TE, to balingákí bábéta bangó móndengé mpe kotálisa bangó na nzela ya LILOBA ete tozali kati YA MOKÁNO MWA YE MOBONGÍ BE mpe Ezali kati ya MOKÁNO MWA YE MOBONGÍ BE KOYÓKA BA BANDE KATI YA MASÁMBO YA BANGO.

Nazali te kotia Liloba na esiká mosúsu to kozóngela yango mabe lokola mingi mpenza bazali koloba ete Nazali kosala yango. Míyókelá mpe mítángélá yo moko.

Ezali mpenza petee mpe ebongí be, FINÁ bobelé PLAY mpe yóká Mongóngó ya Nzambe koloba na yo. Lobá “Amen” na Liloba nyoso Ozali koyóka. Osengelí kútu te kosósola Yango, osengeli bobele Kondima Yango.

“Nalingí kobima na moláko. Ézala ata ekosenga ngai nini, Nakozua ekulúsu ya Ngai mpe komema Yango mokolo nyoso. Nakokende libándá na moláko. Etali ngai te oyo bato bakoloba na ntina na ngai, Nalingí kolanda Ye libándá ya moláko. Nabelémí kokende.”

Yáká mpe kendé koleka epekiseli ya lokito kino kati ya Liloba ya Nzambe elongó na bisó Lomíngo loye na 12:00 nsima ya nzángá, ntango ya Jeffersonville. Ezangi nsúka oyo Nzambe akoki kosála mpe akosala na moto oyo abelémí kokende koleka moláko ya moto.

Ndeko Joseph Branham

Litéya: 64-0719E Kobima Na Moláko

Makomi: Baebele 13:10-14 / Matái 17:4-8

25-1214 LIPATI YA MINDULE

Nsango: 64-0719M LIPATI YA MINDULE

BranhamTabernacle.org

Molingami Mwasi Ya Libala Oyo Abongí Be,

Oyo ezali kaka te moto kobongisa, baninga. Oyo nde YANGO ELOBÍ NKOLÓ, Likomí.

Moklisto nyoso alingí kozala Mwasi ya libala, nzokande toyebí Mwasi na Ye ya libála akozala bobele mwa ndambo ya baponami. Toyebí Azali na mokáno molingísámí, kasi Mwasi na Ye ya libála asengeli kozala kati ya Mokáno mua Ye Mobongí Be. Na bongo, tosengeli koluka Nzambe kati ya Liloba na Ye, na yango na nzela ya Emóniseli, tokoyeba Mokáno mua Ye mobongí be loléngé nini ya kokóma Mwasi na Ye ya libala.

Tosengeli Koluka-luka kati ya Makomí, mpambate toyebí ete Nzambe abóngolaka SOKI MOKÉ TE likanisi na Ye likoló ya Liloba na Ye. Nzambe abóngolaka manáka ya Ye soki te. Abóngolaka soki moké te ELOKO ATA NINI. Lolengé Asalakí yango mbala ya libosó ebongí be. Oyo Asalákí lobí Akosala eloko yango moko lelo.

Lolengé Abikisákí moto longwá na ebandeli, Akosengela Ábíkisa moto lelo motindo yango moko. Lolengé Abíkisákí mokoni ya libosó, Asengélí kosala yango motindo moko lelo. Lolengé Nzambe Aponákí kobianga mpe kokamba Mwasi na Ye ya libála, Akosala yango motindo yango moko lelo; zambí Azali Nzambe mpe Abóngwanaka te. Liloba liyébísí bisó ete Yesu Klisto azali LOLENGÉ MOKO lobi, lelo mpe libela.

Na bongo, ntango totángí Liloba na Ye, tokokí polélé-polélé komóna LOLÉNGÉ NINI nde Aponákí kobianga mpe kokamba Mwasi na Ye ya libála mpo ya eleko moko na moko. Aponákí MOTO MOKO. Alobaki ete bazalaki Liloba mpo ya mokolo ya bango. Mosakoli ayebisaki bisó Atikálá SOKI MOKÉ TE kozala na ebólo ya bato; bazalaka na nzelá ndengé na ndéngé ikeseni, makanisi makeseni, mpe ya motúya koleka, Alobaki, LILOBA YA NZAMBE LISENGELI NA NDIMBOLA TE.

Ntina wana, oyo mosakoli moko na moko alobaki na eleko moko na moko ekoki kobakisamela eloko te to kolongwamela eloko te. Esengeli ézala Liloba nsima ya Liloba oyo ELOBÁKÍ YE. Pete mpenza soko otúní ngai nzela epesámí ya Nzambe nde nini….TIKÁLÁ NA MOSAKOLI.

Sikawa, bobele te eyébí bisó mpenza nzela epésámí ya Nzambe longwá na ebandeli ezalaki nini, Nkoló akoloba kútu na nzela ya mwanje na Ye mpe koyebisa bisó yango ekosála Ye na mikolo mikoya, bobele kotálisa polélé mbala moko lisúsu, NZAMBE ABÓNGOLAKA MANÁKA NA YE TE.

Nsima ya Mwasi na Ye ya libála (bisó) kolongwa na mabelé oyo mpe tobiangámí na Lipati ya Libála, Nzambe akobiánga ko nde Bayúda baponami 144.000 motindo nini? Ebólo ya bato?

Sikawa, ntango kaka Lingómbá oyo (Mwasi ya libála) abéndámí elongó, Azuámí na likoló; mpe libómbami wana ya Elembo ya Nsambo, to Elembo ya Nsambo, libómbami ya bokei. Mpe Bayúda babiángámí na libómbami ya Nkáké ya Nsambo, oyo ezali basakoli mibalé, Elia na Mose, mpe bazóngí.

Na bongo ntango kaka Mwasi ya libála abéndámí elongó, Tokozuama na likoló. Toyebí ezali na eloko sé moko ekokí kobenda Mwasi ya libala elongó, Molimó Mosanto, mpe Molimó Mosanto nde Liloba na Ye, mpe Liloba na Ye mpo ya lelo nde Mongóngó ya Nzambe, mpe Mongóngó ya Nzambe nde…

Soko nabétísí yo libakú na bolobáká bongo, limbisa ngai, kasi, Nayókákí lokóla ete ebóyamákí, kasi, Nazali Mongóngó ya Nzambe epai na bino. Bomóní? Nalobí yango lisúsu, mbala wana ezalákí na nsé ya pémélá, bomóní.

Tíká ete Nakóta mpenza awa mpe Náloba, bobele ETÉNI YA LILOBA oyo moko útá na mwanje ya Nzambe motindami oyo andmísamákí esengelakí ékáta likambo mpo ya baoyo bamíbiángí bayamboli bandimi ya Etíndá oyo ya ntango ya nsúka kosenga mobáteli na bango KOFINA PLAY kati ya masámbo na bango to ákita kolongwa na etéyelo na ntina ete bákoka kopona mobateli oyo azali na EMÓNISELI YA SOLO KOÚTA NA NZAMBE.

Na bongo, Keleló eyúlákí mpe basakoli bábalé bamónání lokola Akoki te kozala na mwanje na Ye ya nsambo mpe Mwasi na Ye ya libala awa na mabelé na ntango yango moko eyéí bango. Bongo, Azali kobianga Bayúda na lolengé nini? Lolengé yango moko Abiángákí Mwasi na Ye ya libala ya mabóta.

Mpe Bayúda babiangámí na nzela ya libómbami ya Nkáké ya Nsambo, oyo ezali basakoli mibalé…

Mwasi ya libala asengeli kolongwa na nzela, komata sikawa; ete basáli mibalé, basali mibalé ya Nzambe, kati na Emóniseli, basakoli mibalé, bákoka komónana na mosálá, koyúlela bango Keleló ya Nsambo, koyébisa bango Klisto.

Polélé mpenza, Nzambe abóngolaka manáka ma Ye te. Atíndákí basakoli na Ye. Na bongo, Mwasi na Ye ya libála akotíkala na nzela na Ye epésámí, mwanje na Ye mosakoli, Mongóngó ya Nzambe likoló ya ba bande.

Na bongo kokómisa yango polele saa, Nzambe mbala moko lisúsu alobí mpe ayebisi Mwasi na Ye ya libala: botíkálí sembo epai na Ngai mpe nzela na Ngai epesámí, boye nzela na Ngai epesámí mpo ya mokolo na bino akoyébisa bino:

Mwanje ya Nsambo, motindami, alobí: “Tála Mwana Mpate ya Nzambe molongoli ya lisúmu ya mokili!”

MONGÓNGÓ YANGO ezali na litómbá koleka; MONGÓNGÓ YA NZAMBE koloba na nzela ya mwanje na Ye ya Nsambo likoló ya ba bande. Nzambe akosálela MONGÓNGÓ WANA, MONGÓNGÓ YA MWANJE NA YE YA NSAMBO. EBÓLO YA BATO TE…NGAI TE…MOBATELI NA YO TE…MONGÓNGÓ YA MWANJE NA YE YA NSAMBO MOTINDAMI kotálisa bisó epai na Ye moko, Nkóto na bisó Yesu Klisto.

Na boye, toyébí:

● TOZALI MWASI NA YE YA LIBALA
● TOZALI KATI YA MOKÁNO MWA YE MOBONGÍ BE
● TOZALI KOLANDA MANÁKA MA YE MPO YA LELO NA BOFINÁKÁ PLAY.

Eténi moko ya Mwasi na Ye ya libala bakozala koyangana Lomíngo loye na 12:00 nsima ya nzángá, ntango ya Jeffersonville, koyóka mobateli na bisó, mwanje ya Nzambe motindami, William Marrion Branham, mpe Akozala koloba mpe komónisa epai na bisó ete ezali na Lingómbá mosúsu te, ebólo mosúsu ya bato te útá na ebandeli ya mokili, oyo batíkálá ndéle kozala na libakú malamu tozali na yango kosangisama elongó koyóka Nzambe koloba na bango mbala moko alimá.

Bato bapámbólámí nini oyo tozali. Totóndí na esengo. Totóndí na matóndí. Mwasi ya libala azali kokóma MOKO na Mobali ya libala.

Ndeko Joseph Branham

Lipati Ya Mindúle 64-0719M.

Makomi ya kotánga libosó ya boyóki Litéya:
Lewitiko 16
Lewitiko 23:23-27
Yisaya 18: 1-3
Yisaya 27:12-13
Emoniseli 10:1-7
Emoniseli 9:13-14
Emoniseli 17:8

25-1207 Na Sima Yesu Ayaki Pe Abengaki

Litéya: 64-0213 Na Sima Yesu Ayaki Pe Abengaki

PDF

BranhamTabernacle.org

Balingami Mwasi Liloba,

Tozali kobika kati ya ngonga ya molílí koleka nyoso, kasi tozali na NSÓMO TE, Motéi ayéi. Ayéi kokokisa Liloba na Ye kati ya mokolo ya nsúka. Oyo ezalaki Ye ndèle, Azali lelo. Oyo komímónisa mpe komíyebisa na Ye ezalákí ndèle, ezali bongo lelo. Azali naino Liloba ya Nzambe, komímónisa kati na mosuni ya moto kati na mwanje na Ye ya nsambo ya nguya mpe amónísí bisó, tozali Mwasi Liloba na Ye ya bomoi.

Tozali na ntango te ya kobéndana na maloba to kosuana; tosílí tolekí mokolo yango; tozali kokende libosó, tosengeli kokóma Kúná. Molimó Mosanto ayéi kati na bisó. Nkoló Yesu na lolengé ya Molimó Amizipí mpe Amímónisí na nzela ya mosakoli na Ye ete Azali Mongóngó ya Nzambe epai ya Mwasi na Ye ya libala.

Alobákí Akoya. Alobaki Akosala oyo. Alobakí Akomónana na mosala na mikolo ya nsúka mpe kosala makambo oyo lokola esalákí Ye ntango Ayaki kati na mosuni mbala ya libosó, mpe Ye oyo awa Azali kosala yango. Ozali kobánga nini? ELOKO MOKO TE!!!

Tozali na nzela na bisó na Nkembo! Eloko moko te ekotémisa bisó. Nzambe akondimisa Liloba na Ye. Etáli Ngai te atá nini ésálema. Ntango eyéi mpo ya ekela. Ntango eyéi mpo ya kondima to kondima te. Molongó yango ya kokabola oyo eyélaka mobali to mwasi nyoso ekómí.

Obótámákí na ntina. Ntango Pole ebétákí yo, elongólákí molili nyoso na yo. Ntango oyókákí Mongóngó na Ye koloba na yo likoló ya ba bande, eloko moko ekómákí. Elobákí na bomoto na yo. Elobákí: “Motéi Ayéi mpe azali kobianga yo. Tungísámá te, bángá te, Nabiángí Yo. Ozali Mwasi na Ngai ya Libala”.

Oo bato, bóndimisama! Bózua kaka te libakú ya ndambo ata nini likoló na yango. Nzambe azali na manáka: Liloba na Ye Abómbákí likoló ya ba bande. Motéi ayéi mpe azali kobianga yo. Yaka nzela epesámí na Nzambe.

Motéi mbala moko lisúsu akosangisa Mwasi na Ye ya libala zingázingá na mokili mobimba na Mongóngó na Ye. Akoyíkisa bisó mpiko, kondimisa bisó, kobikisa bisó, komema bisó na Bozali na Ye ya nguya mpe koyebisa bisó:

Motéi ayéi mpe Azali kobianga yo.
Oo, mosumuki, oo, moto ya maláli, Ozali nde te komóna Motéi komónisama kati ya bikelámo bato, kati ya bandimi? Ayéi kobianga bana na Ye baoyo bandimí na bokolóngonó ya nzóto. Ayéi kobianga mosumúki na mbóngwáná ya motéma. Mozóngi nsima, moí lingomba, Motéi ayéi mpe azali kobianga yo.

Kosopama nini oyo ya Molimó Mosanto Mwasi ya libala akozala na yango Lomíngo loye lokola Nzambe azali koyanganisa bana na Ye elongó mbala moko lisúsu mpe kokóta kati na ba ndako ya bisó, masámbo ya bisó, biyánganelo ya bisó, mpe kobianga bisó kobima mpe koloba: “Motéi ayéi mpe azali kobianga. Nyos’oyo ozali na yango bosenga, ezali ya yo.”

Tiká ete maloba yango mázinda na bozindó ya mitéma ya binó bandeko mibali mpe basi. NYOS’OY OZALI NA YANGO BOSENGÁ, MOTÉI AYÉI MPE AZALI KOPESA YO YANGO.

Tata na Likoló, E Nkoló, Tiká ete ékóma lisúsu.
Makambo nyoso oyo Nalobaki: “ Yesu ayéi mpe azali kobianga yo.” Asalaka nini ntango Ayáka? Abiángaka. Mpe tika ete ékóma lisúsu, Nkoló. Tika ete Molimó Mosanto na Yo áya kati ya bato na mpókwa oyo, Nkoló Yesu kati na lolengé ya—ya Molimó. Tíká ete Áya na mpókwa oyo mpe Ámímónisa, na nsima Amízipola.

Ndeko Joseph Branham

Litéya: 64-0213 Na Nsima Yesu Ayákí Mpe Abiangákí.
Ntango: 12:00 nsima ya nzángá, ntango ya Jeffersonville
Makomi: St. Yoane 11:18-28

25-1130 MOSALA MOBONGI

Nsango: 64-0705 MOSALA MOBONGI

BranhamTabernacle.org

Balingami Mosala Mobongí mua Nzambe,

Bomoi ya solo nyoso ezalaki kati ya mobímbí, nkásá, mpe ezipelo, ezali sikawa koyángana kati na bisó, Mombóto ya Bokonzi ya Nzambe, Misálá mia Ye mibongí, mpe mizali komíbongisa mpo ya lisekwa, kobongama mpo ya bobúki mbuma. Alifa akómí Omega. Ya libosó akómí ya nsúka, mpe ya nsúka azali sikawa ya libosó. Toúti na elekelo mpe tokómí Misálá mia Ye mibongi, eténi oyo ebétémí koúta na Ye.

Mwasi ya libala mpe Mobali ya libala bazali Moko!

Nzambe atálisákí mosakoli na Ye galasísí ya moko na moko na bisó, Misálá mia Ye mobongí, kati ya emónoneli. Lokola atélemaki wana elongó na Nkoló na bolembétéláká Mwasi ya libala koleka libosó na ye,
Amónákí moko na moko na bisó. Bisó NYOSO tozalákí na míso ma bisó matálákí ALIMÁ EPAI NA YE. Alobaki ete tozalaki bato ya bobóto kotála atíkálá ndèle komóna na bomoi na ye. Ezalaki kaka na lolengé moko ya malámu zingázingá na bisó. Tomónánákí kitóko mingi epai na ye.

Bókanisa, oyo ezalákí EMÓNONELI ya Mwasi ya libala; Oyo akokaki koúlana na yango, mpe azalaki koyebisa bisó mpenza yango ezalaki ye kosala. Koyóka na bokéngi.

Akoyá koúta na bikólo nyoso, nde ekosála Mwasi ya libala. Moko na moko azalaki na nsúki milaí, mpe bipakólá-pakola te, mpe bilengé basi mpenza kitóko. Mpe bazalaki kolembetela ngai. Etálisaki Mwasi ya libala kobima na bikólo nyoso. Bomóní? Ye, Moko moko azalaki etaliseli ya ekólo moko, lokola batámbolaki alimá na molongó ya Liloba.

Mwasi ya libala, bótika Naloba yango lisúsu, MWASI YA LIBÁLA, koúta na ekólo moko na moko bazalaki na miso ma bango likoló ya mobateli ya bango, likoló ya ebólo ya bato….TE, yango te nde alobaki. Bazalaki na míso ma bango LIKOLÓ YA MOSAKOLI, kolembetela ye.

Ntango nyoso babátelí miso ma bango likoló ya mosakoli, bazalaki kotámbola na bobongi be. Kasi na nsima akébísí bisó, eloko moko ekómákí. Basúsu balongolaki míso ma bango likoló na ye mpe babandákí kolembetela eloko mosúsu oyo eútákí kaka kokende kati na libébí.

Na, nsima, Nasengelákí kokéngela Ye. Akolongwa na litámbé na Liloba wana soko Nakéngélí te, wana ezali Ye koleka, soko alekí. Ntango mosúsu ekozala ntango na ngai, ntango Nakómí na ngambo, bomóní, ntango Nasúkisi, to ézala ata nini.

Asengeli kokéngela Ye, to akolongwa na litámbe lokola Azali koleka. Kasi nsima alobí ntango mosúsu ekokí kozala ntango na ngai ntango Nasúkisi, ntango Nazali awa te, Bakokí kolongwa na nzela na bozángáká kobatela míso ma bango likoló na ye.

Azalaki polélé polélé kopesa ekébiseli epai ya MWASI YA LIBALA, Bosengeli kobatela míso ma bino likoló ya Mongóngó ya Nzambe likoló ya ba bande. Nde nzelá epésámí na Nzambe mpo ya lelo.
Nde Mongóngó ekosangisa mpe ekobongisa be Mwasi ya libala. Soko bolongólí míso mpe matói ya bino na Mongóngó, bokolongwa na molongó mpe kokende na libébí.

Liteya moko na moko ezali kokóma polélé mpe polélé koleka. Ezali Nzambe na nguya komízipola libosó na bisó, koléisa Mwasi na Ye ya libala na Máná ebómbámákí oyo kaka tosengeli kolia. Elekí na yango kaka vitamine mpo ya bamosúsu nyoso, kasi ezali Biléi bibómbámákí mpo ya Mwasi ya libala.

Eyenga nini oyo ya Matóndó Mwasi ya libala azali na yango, kosala lipati likoló ya Liloba, kokóma Mwasi Liloba na Ye Mosala mobongí.

Atelémí ye moko, lokola Mobali ya libala, “abóyámí na bato, atiólámí mpe abóyámí na mangómbá.”
Mwasi ya libala atélémí lolengé wana. Ezali nini? Ezali Mosala mua Ye mobongí, bomóní, ezali Liloba oyo Akokí kosala kati na yango, komónisa. Kobóya!

Yaká komíbakisa na bisó mokolo mwa Lomíngo na 12:00 nsima ya nzángá, ntango ya Jeffersonville, lokola Nzambe azali koloba na nzela ya mwanje na Ye ya nguya, mpe kokáta mpe kopétola bisó kokóma Mosala mobongí ya Nzambe.

Ndeko Joseph Branham

Liteya: 64-0705 Mosala mobongí
Makomí ya kotanga libosó ya losámbo:
Yisaya 53: 1-12
Malakí 3:6
St. Matái 24:24
St. Malako 9:7
St. Yoane 12:24 / 14: 19

25-1123 Nzambe Na Nguya Azipolami Liboso Na Biso

Litéya: 64-0629 Nzambe Na Nguya Azipolami Liboso Na Biso

PDF

BranhamTabernacle.org

Balingami Eyánganelo Ya Branham,

Ntango nini ya bikámwa oyo tozali na yango. Liloba mpe Mwasi ya libala bazali Moko mpe Eloko yango moko. Tozali kobika nsima ya ezipelo kati na bozali ya Nkembo ya Shekina. Tomóní Nzambe komíbómba Ye Moko nsima ya mposo kati na mwanje na Ye ya nsambo motindami. Nzambe, mbala moko lisúsu, komíbómba nsima ya mposo ya moto kati ya moko na moko na bisó. Motúná mozali lisúsu te. Ntembe ezali lisúsu te. TOZALI baponami na Ye, babongisami na Ye libosó, Liloba likómí mosuni, Mwasi Liloba oyo abongí be.

Lokola tozali kosangana elongó útá na mokili mobimba, tozali koyóka Mongóngó na Ye koloba mpe komónisa litóndí ya Liloba na Ye epai ya bisó Emóniseli mobimba ete Yesu Klisto azali lolengé moko lobi, lelo mpe libela. Komónisama ya Liloba, Elohim, Nzambe kati ya nzóto koloba na Mwasi na Ye ya libala. Nzambe kati ya mosuni kobika mpe kofanda kati ya moko na moko na bisó. Manáka ma nsúka ma Nzambe mazali sikawa komónisama mobimba mpe polélé kati ya moko na moko ya bisó.

Totóndí na esengo mpe na matondi epai ya Nkoló kobiangama bato ndéngé mpe biléma mpe bibendé bikokótaka kati na bikangeli na etáleli ya motíndo mosúsu. Kasi toyebi tokangámí kati ya Nani, mpe tozali ba nani: Mwasi ya libala ya Nzambe ya Bande oyo Akangámí kati na Ye; mpe Ezali kobénda bisó epai na Ye moko, kokangama makasi mpe makasi lisúsu lokola tozali kokóma MOKO ELONGÓ NA YE, Yesu Klisto lolengé moko lobi, lelo mpe libela.

Todusólí kati ya ezipelo mpe tokei kati ya Likonzí ya móto mpe tobimí na mapamboli ma Nzambe! Bato bakokí komóna Yango te. Bakoki kosósola Yango te. Kasi epai ya bisó, Ezali polélé na míso, zambí tozali kati na molimó yango moko lokola Mobongisi mpe Mokambi na bisó ya nzémbo. Ezali Mongóngó ya Nzambe likoló ya ba Bande kokamba Mwasi na Ye ya libala.

Tozali kobika likoló ya Lípa libúlísámí, Mána maye mapésámí bobele mpo ya bato baoyo bakabwaní. Nde Eloko moko kaka tokokí kolia. Nde Eloko sé moko tolingísámí kolia. Mpe Ezali bobele mpo ya bato baoyo balingisámí, babongisámákí libosó mpe bayebí Ezali nini.

Nalingaka na ngai kaka koyóka Ye koyebisa bisó TOZALI BANANI:

Ye Moko oyo akitákí na Mokolo ya Pentekoste, nde Molimó Mosanto oyo amónisámí lelo, longwá na Nkembo kino Nkembo, na Nkembo. Mpe Ezóngí na Mombóto na Yango ya ebandeli, na libatisa ya Molimó Mosanto; na bilembo yango moko, bikamwa yango moko, libatisa yango moko; lolengé ya bato yango moko, kobika motindo moko, na nguya yango moko, na eyókeli yango moko. Ezali longwá na Nkembo moko kino Nkembo mosúsu.

Tozóngí na Mombóto ya ebandeli na libatisa ya Molimó Mosanto. Bilembo yango moko, bikámwiseli yango moko, libatisa yango moko, motindo ya bato yango moko, kobika motindo yango moko, na nguya yango moko, eyókeli yango moko.

TOZALI MWASI LILOBA NA YE YA BANDE, OYO ABONGÍ BE, AZÓNGISÁMÍ NA LITÓNDÍ NYOSO!

Tozali kolónga. Kotíkala. Kotélema. Kozala likoló ya Liloba na Ye peto libómbamákí mpo ya Mwasi na Ye ya libala. Ezali kobongisa bisó be mokolo na mokolo. KONDIMA YA BISÓ ematí na misándá mia sika na boyebáká BAOYO TOZALI, mpe ezali yango:

Ewánganámí te, ekakólámí te mpe na koleka nyoso, ezali NA MOBEKO MOKO TE.

Olingi kozala na esengo koleka ndéngé ozalá ndèle? Olingi kozala na kosepela 1000% ete oyo ozali koyóka ezali Yango Elobí Nkoló Yawe? Olingi kobongisama be na Liloba ya Nzambe?

Na boye Nabiangí yo koya komíbakisa na bisó, Eyanganelo Ya Branham, Lomíngo loye na 12:00 nsima ya nzángá, ntango ya Jeffersonville, lokola tozali koyóka Mongóngó ya Nzambe koloba na bisó Maloba ya Bomoi ya Séko:Nzambe Na Nguya Nyoso Azipólámí Libosó Na Bisó 64-0629.

Ndeko Joseph Branham