Category Archives: Uncategorized

23-0423 E’yo Neza Patimoniri

‘Ba Mungu Ma E’yo Lepi Tu Leletu ‘Diyi,

Eri onyirutu emi alu alu omvezu ‘Ba E’yo Munguniri Lepi Tu ‘diki ngoni ya. Afa azi yo capi Eri ma pari ‘dupi ra ri. Ovuzu drileba be idri amani o’du alu alusi risi ama Opi ni erizu, e’yo nzeria amani trai tile ‘ba a’dani si, azini luzuria amani Eri a’di-i azini AMA A’di-ki yari. Pari azi yo, o’duko azi yo, kanisa azi yo, azini ‘ba azi yo ecopi amani afa ‘diki lupi ko’bo O’DUKO MUNGUNIRI leri.

Eri ‘yo andra amani avavuza E’yoni ri ni tepu pi ma dria. Afa dria ci amani ‘yeri eri Avizuri Ekpazu ani Orindi Alatararuri ni di rumu nde efi ani ri i. Ama ‘ba o’dukoti ojipiri ni andra idri, azini diza esu engazu lonyi bakule kuluri vu. Eri ovu andra ima talaba be suzaru aa ‘daa.

Eri ma Idri ni acidria Orindi Alatararuri si. Eri ma talaba (idri) enga ovu suzaru Kristo alia. Talaba ‘davusi eri idri Kristovu mgbari ese, azini eri vusi, diza fezu ama, Amuroru ri dri.

‘Daa Eri di lu amani Eri ma ‘ba o’dukoti ojipi amboruri ma talaba lu aa ‘da a’dule ku, te ama dria ese engazu adi alu alu ri vu. Ama ovu dria suzaru bakule alu aluri ma aa. Ama drazaru ama ngulupi pivu azini ama idri ki zizaru Kristo be Mungu alia, a’buzaru aa Orindi Alatararuri si.

Agu azi econi ama ece Eri ma dria risi amve ku. Ama idri ovukuni olazaru ani ku. Idri ovupi nezarura ri ni veria azini diria ama aa, diza fezu azini edata Orindi Alatararuri niri. Ama idri aaleru, nelekuri ni zizaru Mungu ma aa azini nyazu E’yo Opiniri vusi. Ama ovuki E’yo Eceza Yesu Kristo ni o’du amani aa ri be.

Geri E’yoni ama idrini nyaka fezu ri. Afazi yo ko’bo Eri le. Geri Erini geri fezu ani Amuroni, engazu wudrikurusi ara, ecozu ani ruetrazu tualu O’duko Munguniri erizu sawa aluri ma aa ri. ‘Ba e’yo onzopi azini egata pie nduri ka ki tro ‘yo ngoni yari ti, Mungu e’de geri azi ra azini eri ajinguru azi drinza ‘dileni Eri dri. Eri ‘yo nga lu amani kini Eri mu ama eji dria tualu o’du nazuri ma teda si. Diza!!

Ama ma emuki dria tualu Sabatu ‘disi sawa azia etusi, Jeffersonvili saa si (7Pm Ugandaa), O’duko Munguniri erizu E’yo Eceza E’yoniri ejizu amani amani: E’yo Neza Patimoniri 60-1204E eriria.

Okoria, le ama ma FIKI NGA ORINDI AA raka amani muria eriria;

O’duko andra E’yo Erini ekupi Amvu Edenini aa azini ‘Be Sinaini driari, o’duko vini andra erizaru diza onyiru ‘Be Ojatani ri ma driari vuri ma aa ri, andra paale alu dika kuria, ani sawa ‘di ma aa kanisa aziri ri pini e’yo eceza driaru azini asizu Yesu Kristoniri be.

Adri. Joseph Branham i

E’yo siza lazaru ru oturia O’dukoti nde eriria riki.

Mi egara buku Ayi Kanisa Aziriri Niri lazu azini erizu.

Isaya 28:8-12 
Danieli 7:8-14 
Zekaria 4:1-6 
Malaki 4:1-2, 4:5 
E’yo Ba Matayoni 11:28-29, 17:1-2

E’yo Aziza Ayi Kanisani Otizaruni Ri

Muzu drile O’dukoti Ayi Kanisani amani mu eri Sabatu alu alusi Kanisa Tepuni ama Akua ‘daleri pi aa ria, aleki ta vini emi ai caputa otizaru eri be ri lazu buku emini Ayi Kanisaniri alia wiki si zu. Adripi Branham ni esele laza fe O’dukoti oko O’dukoti otizaru ‘di ma aa rile ‘yozu, “’Ba E’yo Ondriza nabiru di lapi azini eripiri tusucozaru.” E’yo oniza aliru E’yo ma dria ‘dileri si, eri sawa dria ma azako eri lazu sawa maniri ‘duzu, pa soria e’yo egazu azini Munguni zizu e’yo nzeza alu alu ndurukuluru Adripi Branham ni nze buku Ayi Kanisaniri alia riki si.

Te ti, mi eco o’duko Buku Ayi Kanisaniri erira, mupi ovupi ‘bazaru Lifelinea o’du alu alu wiki nde vuri si. Caputa alu alu ma o’duko ni mu ovu ‘bazaru Sawa 9am O’du Alusi, 12pm O’du Irisi, 3pm O’du Nasi, 6Pm O’du Susi, azini 9pm O’du Towisi, fezu erini ovuzu ewakoko mini eri erizu sawa mini ‘yekeri alia.

Zita o’diru wereruri Caputa alu alusi ri ki nga ovu ‘bazaru geriti intaneti ni Young Foundation ni ria, yuthu yi ma ru sipi YF ma aa ra ri pini. E’dozu Mba Towi si, Zita wereru Tepu Sabatuni ri ki nga ovu Zita iri Mba ni emini drio esuri pi ma paria. Eri sawa muke ni emini ovuzu emi omvita pie enyia Zita ma ogbo pini nga ovuzu ezuzaru pale irisi risi, te yi ma alu alu ni nga ovu pointi be 10 lu!

Ama zi e’yo oniza aliru Ayi Kanisani Otizaru ‘diki nga ovu tusucozaru mi dri azini aku eminiri pini dria.

Adripi Joseph i.

23-0416 Eceta Yesu Kristoni Ri

Pati Amuroru Leleturi,

Yubili Pati Amuroruri ni ovuzu eribe ri ngo’i ya. Ama asiki idriki pie veria ama aa ko’bo nga drio ri le ku. Eri aciria azini e’yo nzeria amani, Ima E’yo eceria. E’yoki yi ‘ye mbelembele ama ecokinini ruoti Eri be ku.

Ama E’yo Munguni alaru ovupi e’dazaru Pati Nabiru kililiru, E’yo Nabiru kililiruri vusi, pati ifi Nabiru kililiruri ofupi trai E’yo Munguni kililiruri vusi ri eriria.

Afa dria andra anzuzaru azini nyazaru ‘ba su o’dukoti drani ojipi andra Pati nde dipi ri pi vusiri, sawa ‘disi ovu di ogozaru ro dika ‘ba su o’dukoti ojipi idrini ri pivusi. Ovuni ‘ba o’dukoti ojipi TOWI ri ki ku, ovuni ‘ba o’dukoti ojipi geri towiri pivusi ri ki ku, ovuni ongulumu azini ni ku; ‘ba o’dukoti ojipi SU ri ogoki Pati Amuroruri vule ni.

Engazu sawa ma e’doza si, Mungu enga te o’du azini ewu ‘di ni ecazu i paria ani eco ani Ima Pati-ifi ne beni, saa I nia, ewu nabivu risi. Ama Pati-ifi ‘da i. Ewu ni ri ‘di i. Saa ori lozuri eca’bo.

Wiki ma deta Engatani ‘di andra nga ko’bo O’du Engatani ‘ba cini ni drio etumu ‘bo ri le ku. Acani nga mu ovu alurile dika ku. Indikindi Opini azi tu ‘dileni. Ma andra te ria ‘Duta Oruri ni pari ‘duzu lu sekondi cini si.

Bibila aa, Daudi nze andra E’yo ‘diki: Yi soki ma driki pa pie. Ma eco lu ma fala driari pini ra: yi ma ndra azini ne.

‘Ba nde engaki andra siza ‘da la eli turu turu, te Yesu ni andra ovuzu izaru ‘daa yi ma drilea pati alaza sia ria, Amuro ne andra ‘do Eri ra ani ama di ra kini, O’du ‘Disi, E’yo Siza ‘Di Eca Ima Paria ‘Bo mile amani gbari pi drilea ‘di.

Afa andra di ‘do yini ama yini amazura kini yi di neria, mile yini kisi, E’yo Siza ‘dani pari ‘duria, azini yi andra esele E’yo ovupi sizaru vaa ‘davuri i.

‘Da di ama i SAWA ‘DISI. Ama oaria o’du E’yo Siza asizuri pini dria pari ‘duzu ama miletia mgbari pi alia ria; azini ama esele E’yo Siza ‘davu ri i.

Eri aciria kpi ama eselea. Eri o’du nazuru ma asiza ni. E’da’bo azini e’da amani Ima eceta engatani ri ‘bo. Eri alurile aje, andru azini ‘dani ‘dani. Ama efikaza idriru Eri ma Indikindi ni ri ki. Eri enga ovu e’dazaru azini eri e’daria amani dria, Eri ma Kanisa i.

ERI ERI ‘YE NGONI RU?

Nabi ovu ‘duzaru engazu nyaku ‘di ma aasi ‘bo, te Orindi Alatararuri ni tepu pi ma dria, azini muria suru pi aliasi azini wudrikurusi ara. ERI AZINGAZA IDRIBE OPI YESU KRISTO VU RI. Eri Ima Amuro eji tualu afa lu alu ecopi ra azini capi ecopi ra risi: Eri ma E’yo i. Eri ma O’duko ni. AVIZURI EKPARIA!

O’du ‘Disi E’yo Siza ‘Di Ece I Ma Paria ‘Bo.

Eri Pati Izioru engazu Amvu Edenia ri i. Te Pati Izioruri Aroni kokoru, cani efi ka ku; le Eri ma ovu Pati Amuroru ri be. ‘Da MI i. Mi andra osizaru afa afasizu alu aluri be. E’yo ovu ‘bazaru zabe MI aa ‘bo. Idri alu alu Izio ma aa ri ni sawa ‘disi MI aa.

Amuro ni tre: Haleluya, Amena, Diza!!

Afa Erini ovuzu amani eribe ero aa ‘di ma vutia ri a’duni?

Asisile sawa nduru ‘divuri ta amani ecozu…Asi mania Orindi Alatararuri ‘ba bile ndu liza asi ejizani ri, ‘yozu, “Kanisa o’du ‘di ma aa ma ovu O’dukoti ‘di pie ci.” A’disikuni, Ma a’ira kini eri O’dukoti pasopi ndu ndeni Bibilia ri, a’disikuni eri Kristoni ece Eri ma Kanisa aa sawa ‘di ma aa.

Ani, Amuro ni mu ovu etrazaru Sabatu ‘disi Sawa azia etusi, Jeffersonvili saa si (Sawa Alu ondresi Ugandaa), amani: Eceta Yesu Kristoni Ri 60-1204M eriria.

Ma le ta emi oru erizu, kaniku lazu, wiki alu alu vusi engazu Buku Ayi Kanisaniri niri alia, caputa amani eri’bo Sabatu alu alusi ri i. Ama nga mu o’duko Mundutisi ri ‘ba Lifelinea- Voice Radioa o’du alu alusi saa ndundu alia, te mi ama mi drilegbo be eri lazu, erizu azini lazu vazabe wiki si zu sawa ciria.

Ama ma zuki ayiko azini ovuki ayiko si. Esiku mile eminiri wudrikuru ‘di ma dria, ezata pie azini ocoko ama ageyia ara ri pi dria ku. Ama ma zuki ayiko afa dria Erini ‘ye amani o’du alu alusi ri ki si.

O’du Musani pi aa, Ma ndi ndi ‘ba droki Musani zi si,

“Ama angu ‘di ku sawa ngosi? Ama mu fu ‘dia risi sawa ngosi?”

Ma eco di ra Musani eriria ‘baki ambiria ani ‘yozu:

“Sawa Munguni ovuzu ngonde risi. Te sawa ‘disi ria, emi etumuki ayikosi afa dria Erini ‘ye EMI niri ki”.

Emi ovuki odrukodru pie jo emini pi aa ci? YO.

Emi ovuki ombi pie emi ori amvua riki nyaria ci? YO

Emi ovuki yi ariru ribe mvuzaru ci?  YO. Emi yi o’diru efupi a’di e’bipi e’bi e’biri vuri mvu. Eriki lu vule ani ayiko esuzi afa dria Eri ni ye azini ece emi ri kisi.

Eri dra ni, anzuta ki azini e’yo lizani yini. Te emini ria, o’du ‘diyiki amboru ndeni nyaku ma dria ri ki. Emi ovu ayiko be, asianzu pie azini ovuzu ayikoruri be. Emi inziki lu Opini afa dria Erini ‘ye rikisi, azini luki drile afa Erini mu ‘yeri pi vu. 

Adri. Joseph Branham i

23-0406 Omu Opini

Pati Amuroru Ovupi Ogozaru Ro ‘Bo Leleturi,

Eli si zu, ma enga angu ne drile wiki ma deta amani ecozu wudrikuru a’buzu dria amve, foni mani riki anyuzu dria te, izizu o’du si zu, Eri ma O’duko erizu e’yo ‘yozu asi mani ni, ovuzu Omu Opini be Eri be, azini idri mani ri owizu dria dria o’diru Eri ma Azini ri vu. Le o’du dria ma ovu o’du Engatani ri i ama ni, te wiki ma deta ‘di ni omu azi ndu azini alaru ‘dile ni; saa azi ‘baa kalaa Amuroni emuzu tualu ani Inzita ‘yezu ‘dile ni. Ma AYIKOSI AMBAMBA ani ma agyipi la.  Ma eco mgbaria te ku ovuzu opizaru Mungu be angu azi zizaruni alia, ‘daa Orindi alia, Andreti Erini ri nezu; ecizaru Amuro Kristoni wudrikurusi ara ri be, rizaru angu ‘Bualeruri pi alia. Opi ma Ru ma ovu inzizaru! Le ma ovu adaru wiki ma deta engapi ovupi asi ‘bazaru azini alaru idri amanipi alia ri i.

Kaka, ama ma soki nga pa minati alu ‘dia. “Angu ‘Bualeru ri pi alia.” Sawa ‘disi, ovuni lu angu ci nia ku, te angu ‘Bualeru ri pi alia. Ama ovuki etrazaru “‘Bualeru,” eri ma efi kini pari ‘ba a’ipiri vuri i. Ani, ma ka izi angiri ra, mi ka izi angiri ra, kaniku kanisa ka izi angiri ra, azini ama di gonde O’dukotini, azini ama etraki di ama ngulupi tualu ‘ba alatararu, ovupu omvezaru amve ‘bo, baptizi Orindi Alatararu niri isu pi ‘bo, efizaru tusu coza Munguni risi, omvezaru, pezaru, rizaru sawa ‘disi angu ‘Bualeru pi alia ‘diyi pi ru, ama di ‘Bua idri amani pi alia. Orindi amani ri ejiki ama oli ‘Buniria ri ma aa ‘bo. Kiri kiri, adripi! Mi di be ‘da, oli ‘Buni ri i! Ka, a’du eco ta i ‘ye ondre ‘disi ni, a’du eco ta i ‘ye ondre ‘disi ni akaki ta ovu rizaru oli ‘Bualeruri alia, azini Orindi Alatararuri ni aciria ama asi alu alu ovupi ‘bazaru o’diru’bo ani di ecazu di o’baza o’dini Kristo Yesu alia ri si ria? Ezata driaki Ari ma palaa, inzita kililiruri alia, dri amaniri pie engazaru azini asi amani pie engazaru, riria angu ‘Bualeruri pi alia Kristo Yesu ma alia, inzita ‘yezu tualu angu ‘Bualeruri pi alia.

Eri drio aluni alia ‘bo? Kiri kiri, ma enga erizu’bo kpere ma di wu ayiko e’yosi ani ‘yozu, “Mungu, mi fe ma ma ku angu ‘di ku.” Lu angu ‘Bualeruri i Krsito Yesu alia!

Amani tusu coza fe a’dusi? Atita alarisi, nita-okorurisi, e’yo ecezasi, e’yo niza ki si, okpo pie, andre ndu ndu pie, efini eceza ki pie, ondua pie, nita pie, tusu coza ‘Bualeru riki dria, azini ayiko ndale ndanda kuri pie azini Diza tre ri be, asi alu alu efizaru Orindisi, aciria tualu, riria tualu pari ‘Bualeruri pi alia, egata azi ondiru ama eselea aluni koko, taba aluni seza koko, bongo aliaru aluni koko, ‘di i, ‘da i kanisiku azi ‘da i aluni yo, egata azi ondiru aluni yo, ‘ba azi ovupi afa azi be aziri ma rua aluni yo, ‘ba dria e’yo nzeria ale alia azini tiecita alia, ‘ba dria omi alu alia pari alu alia, “‘daa di ru’gbu o’duko azi emu di engazu ‘Bua ko’bo oli okporu nopi nono rile. ” Mi di be ‘da, “Fe amani tusu coza tusu coza orindisi dria ri ki ‘bo.”

Opi Yesu mi ai ama inzita Mini ri wiki ma deta Engatani ‘disi. Ama ma fiki pari ‘Bualeruri pi alia Kristo Yesu alia; ama ma nyoki ama Angu Alatararurini Alatararu ria. Egata azi ondiru aluni yo, afa azi ‘ba drile atripi aluni yo, te lu omi alu alia, Pari alu aa; ani di o’duko engazu ‘Bua ‘da ma emu di ko’bo oli okporu nopi nonori le ama alu alu pi ma akua. “Mi emu Opi Yesu”, ama ngonde Mi ne zu andreti andreti.

A’disikuni Amuro ovu ogozaru vule ‘bo trai O’dukoti Diza ondresi o’du amaniri niri si; O’dukoti Malaki 4 vuri vusi. Ama mini awa’difo fe Opi eceta Kristoni treru Kanisa Erini aa risi, ovuni kanisa azi sile drisini niku, te eceta treru Kristoniri ovupi e’dazaru agu azi ma aa ri i, Mi nabi i, eceta azini osuta amboruri kisi, ani ece di E’yo Munguni ma driari dika ‘bo. Ani sawa ‘disi Eri di oaria Mi Amuro ma aa wudrikurusi ara. Awa’difo Mini fezu amani oazu idriru Diza amboru ondreni, e’yo ondrizasi ‘di nezura risi.

Ani Diza ondresiri emu a’du ‘yezu? Diza ondresiri ni a’du ‘yezu? Ogozu vule. Hwee! Mi va ra? [Ongolumu ‘yoki, “Amena.”—Ed.] Diza ondreniri eri asisile alu alu andra Diza o’bitisiri ni risi, afa andra ovupi lizaru vaa Roma vusi, Ayi Iniciciri pi alia ri ogozu vule. Munguni mu ogo vule, Diza andreniri azazuri si(a’duni?), E’yo Munguni driari ogozu vule, eceta treru Kristoni Kanisa Erini alia ri i. Afa dria andra Erini ‘ye, lu ko’bo geri Erini andra ‘yezuri siri, eri nga mu ovu dika Diza ondreni ria. Mi ne afa mani ‘yori ma efi ra? Kiri kiri, ovuni onyiru ambamba ku? [“Amena.”] Azini nizu ra kini ama di oaria kpi ‘dia Eri nezu sawa ‘disi, Diza ondreni ri i, lu ko’bo e’yo ondriza si.

Amuro adaruri awini ‘Bazaru Alarurisi ku, tro Erini nizu ra kini Ima ezataki ekile ‘yeni nga ki drioku rile ra ti; awini Ojizaru alarurisi ku, Erini tro ovuzu ojizaru azini ‘bazaru kalaa ayuzaru ra ti; awini Pentekotia ku, tro Erini baptizi Orindi Alatararurini ri esuzura ti; Te Eri mu kpere E’YO O’DU AMANI RI NIA: Malaki 4 i, E’yo ma ngulupi i ‘bazaru ruati alia dika ‘ba ada azi ma aa. “Ma nga ogo ro ra Opi ‘yoni” nde, ngapi mupi Aita ‘Duta Orurini ri fepi Amuro dri ri i. Ani E’yo ovupi ecezaru ra ‘da eco LU emu Tepu ki erizu risi, Ru Erini onyiruri ma ovu inzizaru.

Yi ma aluni, Martin Luther i, e’do andra Diza azi egbi ra. Diza azi andra wereruni indi, lu okpo azi werea, ‘bazaru alaruri ni ri.

Wesley emu di ra, were okpo be ndeni, ojizu alaruri i.

Wesley ma vutia, okpo be ndeni aga eri ra ni emu ra, Pentekoti i, baptizi Orindi Alatararuri ni ri i, nabi azi amboruni ma aa. Enera?

Te o’du asizu ‘diyipi aa, Malaki 4 vuri ki, Elia ni ta emu ra E’yo nde mgbari be. “E’yo Opiniri emu andra nabi vu.” Diza ondreniri kisi, eri mu emu ra, dri ni ogozu azini ejizu vule. A’duni? “Asi anzi pini ri ki oja vule A’ita Mungu vuri vu.” Diza Suzuri!

Emi emu rutrazu E’yo ma ageyia, wiki ma deta Engatani risi ani ama ma Inziki Opi i. Emi anyuki foni emini ki te pelu e’daki o’duzu, Esele Aziza O’duniri erizu, azini tepu ki avizu engazu apu Tableni ri ma dria, Lifeline apua, kaniku geri ti intaneti ni o’duko ‘duza enjezuri ekpazu.

Ma le ta ama ma eciki ama otita andraleru ‘di pini:

O’DU SU

Eri andra O’du Su ma ini si Opi Yesuni andra ovuzu Ondreta Asizu Eri ma ‘ba imbale ‘diyi pie ri, Agaza ‘ba drilesi dere anzi Isiraelini efuki nga kuri ma e’yo egazu. Drileba amani ovuzu eri be ri ngo’i ya ovuzu mesa tia Opi be aku amani pi alia, dere ama wiki ma deta kililiruri ecani nga ku ri, azini Eri zizu ama truzu ezata amani kisi, azini amani afa dria amani le aci amaniri niri ki fezu.

Mungu, mi o’bi asi amaniriki sawa ‘disi. Ari nde ‘daa ci ya, Opi? Eri ka ovu yo, ama zi kini—kini Mi ‘ba eri sawa ‘disi, ezata amani ki ‘duzu te ani ki a’buzu ci, ani ki nga ovu edazaru engazu amavusi, Opi, ezata wudrikuru ‘divu riki, ani amani ecozu ovuzu alatararu azini drifuzura fezaru ama Ata vu sawa ‘disi amani emuria ruati vu azini Ari ama Kabilomva, Mungu ma Mvi, ‘ba ama papiri ni adazaru’bo ri vu.

Ama e’doki dria saa mudrini iri ondresi (6PM) sawa mivu akua ‘dale risi, ani Omi Opini 57-0418 ni eri zu.

O’dukoti nde ma vuti biria, ama nga ama tra aku amaniri pie aku amania ani Ondreta Opini ri ‘duzu beni.

Ama nga mu geri ti tepu nde ki enjezu inzita Kummunyoniri be intanetiasi ri fe ra, kaniku, eri nga mu ovu esuzaru Voice Radio-a.

O’DU TOWI

Amuki ziza alia aku amani pie sawa Na o’butisi (9AM), azini dika sawa azia etusi (12PM), Opi ni aizu tezu ama be azini ama aku ki efizu Orindi Alatararurisi amani ama ngulupiki owiria Eri dri.

Ama omi ma muki vule o’du Kalivarivu, eli 2000 ma drilia ‘davu fo, ani ama ‘Ba-papi i ni nezu ‘izaru pati alaza sia, ani di ama ngulupiki vini owizu sawa dria afa Ata ni ayiko fepiri ‘yezu:

Sawa ‘disi ama esu kini ‘da e’da andra Eri ma indrilenri ko’bo. ‘Ba Oni lipi afapiruri sawa ‘disi ovu di andra E’yo be i’bizaru Afasile Onduasi, omvele Eri ma Mvi, Mungu, Emmanueli ri ma aa dika. Mi ega ngalu, ‘Ba ‘da’i owizaru tu kpere Mungu e’da Ima ngulupi ania ‘daa, ruati ‘da alia, azini Eri eca di, Eri i azini Mungu i ecaki di Alu. “Ma i azini Ma Ata i ama Alu. Ma Atani oa Ma aa. Ma sawa dria afa Atani ayiko fepiri ki ‘ye.”

Te di nga ruati Kristiani pini andruri ka ta ovu e’yo eti nzeza be ‘dale ria? Mi ta ovu afa sile kililiruri i vaa Yumaa ‘dia, nzila ma dria. Mi ka ovu oku bongo ojipi bafu ma vutia ‘daa ri i ya ni, mi ovu kiri afa sile kililiruri i Mungu dri, mi ni ecozu ‘yozu ra, “Ma sawa dria afa Mungu dri ayiko fepi riki ‘ye,” risi, azini wudrikuru ndulu ka eco azi Yesu Kristo vuri ne i e’biria mi aasi ra ria.

‘Daa di sawa Azia alibe (12:30Pm), ama ma eciki ama tualu aku amani pi alia, Alatara Nde 57-0419 ni erizu.

Ama ma etraki ‘daa ama tualu ziza alia sawa Oromi etu alasi (3Pm) ama Opi ma dita pati ruari ni inzita fezu azini e’yoni egazu.

O’DU AZIA

Ama ma eciki ama tualu paale alu dika ziza alia sawa Na obutisi (9AM), azini Sawa azia etusi (12PM), ani ama asi ki otuzu afa amboru Erini mu ‘ye ama esekelea ri ni.

Opi! Kirikiri, Opi la! Kirikiri, Ma eco ongo ngo ambamba ra. Ma eco e’yo olu ambamba ra. Ma eco otre ambamba ra. Ma eco owu ambamba ra. Te ma cani nga izi ambamba ‘dini ku. Mungu la, mi onda ma azini mi o’bi ma.

Ma ta lu e’yo nze, sawa azi alipi were ‘bo ni ma vutia, yi tiza aliruri pi ma dria, geri yi ni ‘bi’bio ma endreki e’dazu ‘daa i; Mi ‘ba Orindi Mi ni aliru ma aa, Opi, ko’bo kile nabi Daudi ni ‘yo ndra ri le, Mi ce ma dri yi tiliri pi ageyi si,” ovuni yi erezaruri ma ageyiasi ku. Yi tili ri ki, Mi ce ma dri ‘daa, Opi. Mi fe ma ma ovu ciri.

‘Daa di sawa Azia alibe (12:30Pm), ama nga emu tualu E’YO: Sata 57-0420 ni eri zu.

O’DU AMBORU NUKUTA EKASI nga pi mupi ovupi Eri ma Amuroni wudrikurusi ara ri ni nga mu ovu ngo’i ya.

Ama ma etraki ‘daa ama tualu ziza alia sawa Oromi etu alasi (3Pm) ama Opi ma dita pati ruari ni inzita fezu azini e’yoni egazu.

SABATU

O’du onyiru Pati Amuroruri Ni Ogozu Rori ni erizu azini awazuri ngo’i. Ama ma egaki drio drio ko’bo Adripi Branham ni andra ‘ye o’buti eri ma agyi wereru, robini, ni andra eri engazu sawa Mudrini Alu angu sarasi (5AM) rile. Ama ma feki lu Opi ni awa’difo Yesu ni engazu engazu drata ma aa risi:

Sawa Mudrini Alu o’biti ‘disi, ma agyi wereru agati be ekaruri engata derisa mania ani enga di ma o’duarisi. E’data ko’bo eri ma asi wereruri ni mu ahwete ri le, ‘yoria “Enga ‘bo.”

Sawa Na O’bitisi (9AM) ama eciki ama paale alu dika ruecita zizani ria, e’yo zizu amani ama eselia azini ama ngulupi ki oturia O’duko Munguniri erizu.

Sawa Azia alibe (12:30PM) ama nga emu tualu O’dukoti Engataniri erizu: Pati Amuroruri Ni Ogozu Rori 62-0422.

Inzita ‘di ma vutia, ama eciki ama dika ziza alia, awa’difo fezu Eri dri WIKI MA DETA ONYIRU ERI NI FE AMANI ERI BE AZINI ERI MA AMURO WUDRIKURUSI ARA RI BE RI SI.

Ma adripika azini amvupika miri ma kalaa ‘daleruri pini, ko’bo eli ajerisi rile, Ma le emi ai ruecizu ama be e’yo pari ‘dupi ‘diki si Jeffersonvili saa si, otita zizani ri pini dria ko’bo otile’bo rile azini tepu avita Sabatu ma etu alasiri ni. Te ma amara, kini tepu ki avizu O’du Susi, Towisi azini Azia ma etu alasi Jeffersonvili saa si ri ni mu ovu ewaru emi azi ‘diyi pini, ani kirikiri mi ama mi drilegbo be O’dukoti ‘daki avizu saa ci o’duni mini ‘yekeri ma aa. Ma leta, te, amani dria ruecizu tualu Sabatusi sawa azia alibe (12:30pm), Jeffersonvili saa si, O’dukoti amani Sabatusi ri erizu tualu.

Ma leta vini mi ai azini anzi emini pie ovuzu esele e’yo ‘yeza karatasi dria azini embata Creations vuri ru, azini zita wereru YF ni ri pie, aku eminiri ni ta eco ale ayikosi dria ra ‘dile ri i. Amani egasi emi mu yi le ra yi ni ovuzu engazu dria E’YO amani mu eri wiki di ma detasi ri ki si risi.

Otita wiki ma detani rini, e’yo onizaru otuta inzita Omuopiniri niri pie, afa ovupi lezaru azi ngaza Creations niri pie, Zita wereru Engata ma driari pie, azini afa azi onizaru ri pie, mi ma ne geri ti intanetini eleleru ‘di i.

Eri inzita azi amboru ‘dileni emi aizu aku emini pie emuzu tualu Amuro wudrikurusi ara ri be wiki ma deta tre INZITA SI, RU EKUTA PIE AZINI ATITA PIE ri vu. Ma a’ira eri adaru wiki deza ngapi mupi idri miniri ojapi drilealuru ri i.

Adripi Joseph Branham i

Inzita O’dukosiri                                                 

E’yo Oluza wiki ma deta Engatani ri ki andreleru ‘di’i.

Inzita O’du Susi Omu Opini/Pa Ojizaniri ni ri ni vini mu ovu enjezaru geri intaneti ni si ri pi alia indi.

O’DU SU – 6:00 PM (Sawa akua mivu ‘dale risi)

(ESELE TEPUNI RI) + Omu Opini 57-0418

O’DU TOWISI – 12:30 PM (Sawa akua mivu ‘dale risi)

Alatara Nde 57-0419

O’DU AZIASI – 12:30 PM (Sawa akua mivu ‘dale risi)

Sata 57-0420

SABATU – 12:30 PM (Jeffersonvilli Saa si – Saa Alu ondresi Ugandaa)

Pati Amuroruri Ni Ogozu Rori 62-0422

23-0402 Duta Oruri

E’yo ‘Bazaru E’yo Dria Leleturi,

Kanisa kakau ki osuzaru, abazaru, e’yo nilekuni alia, e’yo ewa ewa vazaruri alia, akiri koko, abaza alia azini ata vini kuzaru nyamuko aa egata yini pi aa a’duni pari ‘du “‘Ba Tepuni” engazu wudrikurusi ara Sabatu alu aluvisu ‘di pieni yari.

Eri Ruecita Amuro Kristovu Rini Neleku ri i, rizaru indikindi Mvi ni ri alia, nizu, ama ngulupi ‘bazu ngonde ri i. Ama Izio ‘Buari enga amani e’yo nze ama Aku Drozi Eribe ri ma dria.

Lu nga wiki azi alipi were’boni pi alia Eri ‘yo andra amani: “wudrikuru ‘di ovuni Aku amani ri i ku, eri Edeni Sitanini ri i, azini Ma nga eri anzu aci si. Emi Ma asialuza leletu, Mani pe ovuzu ma Amuroru denga wudrikuru ma vuti ovuni ‘bazaru ku ri ki. Sawa ‘disi, Sabatu ‘disi Ma mu e’yo dria nze emini Ma ‘Duta Oru emupi mbeleru ‘di ma dria.”

Ama asi ‘baza azi amboru ‘dileni alia. Ama ecoki eri ama ra oli alia. Afaki pari ‘duria mbele mbele ambamba.

Lu afa Bibiliani ‘yo eri ta mu pari ‘du o’du ‘disi ri, eri i ‘yeria, o’duvusi o’duvusi. A’dusi, eri garia tre mbelembele amve ‘daa, angu nyamukoru ‘da pi alia, azini afaki pari ‘du, ata mani ecozu ru otizu eyi pieku ‘dileni ki. Ama enyia Emuta Yesu vu, ovuzu ecizaru Eri ma Kanisa be, angu E’yoni ecazu E’yo i ri vu.   

‘Di ni dria pari ‘du amani, Eri ma Oku Ovupi Pezaru’bo, Amuro o’du ‘dini ri dri. Ama lu ‘ba afa ‘diki nepi ovuria ru ‘yeria ri ki.

O’ba andra ama okoru ayi ‘dini azini ‘ba azi cani pari amaniri ‘du ku. Ama sawa ‘disi agupianzi azini ezopi ovupi e’dazaru ‘bo ani ama ecoki tecita ‘ye Eri be beni riki; ‘da afa Erini le ri i.

AMA E’yo ‘bazaru E’yo dria ri ki, ori idrini ‘bazaru ori idrini dria ri ki, Idri ‘bazaru Idri dria ri ki, azini Amuro Opi Yesu Kristoni ruati isipi dria ‘bo ri i.

Mi ka ovu ava taza be, mi nze Eri. Mi E’yo ‘Bazaru E’yo dria ri i. Mi neni angu candiru wudrikuru alia ama ageyia ‘di pivu ku; azoki, rua ala ako pie, o’dita pie, ocoko pie, aza ‘ba pini ani di nizu yi ‘di agupi ni ya kani oku ni yari ku ri pie. AMA AMURO I, ‘bazaru andra okoru, ‘bazaru alaru’bo, Amuro Opi Yesu Kristovu ovupi e’dazaru’bo ri i.

Mi ‘ye orisi AFA AZISI KU. Mi ovu ayikosi azini mi zu ayiko. Sawa ‘di enyia ogogo. Ama ‘ye jo o’buni ‘di ku, DIZA!!!

Mi emu ecazu ngonde ama be ‘Duta Oruri ni, Sabatusi sawa azia etusi, Jeffersonvili saa si (Sawa Alu ondresi Ugandaa). Mi cani nga ovu alurile ‘dika ku.

Adri. Joseph Branham i.

Zaburi 27:1-5

23-0326 Ruecita Amuro Kristoni Ri Vu Nelekuri

Oku Ovupi Pezaru’bo Leleturi,

Mi ta ovu a’du be fezaru Opi Yesu dri ani emuzu aku minia Sabatu ‘disi, rizu vaa mi kome vonoberi dria, mi nezu mile mini pi alia ani e’yo nzezu kpi mi dri beni? 

Mi ecota e’yo nze ku. Mi ecota le e’yo nzezu ku. Afa lu ci mini ta le ‘yeri lu angu nezu Erivu azini owuzu ri i. Mi ta ata ovu orisi mi ti nzizu. Mi ecota a’du ‘yo? Omi miniri alia mi ta di lu ega, Opi, ma fudriku ambamba Mini ovuzu aku maniri alia ‘dia. Ma ‘ba ele ndeni ‘ba eleri pi eselia ri i. Ma enga Mi e’de paale kakau ‘bo Opi, te Opi, Ale Mi ambamba.

Mi ta di ‘daa ama asi mini aa ra kini, Ni mgbaria afa mani egari ra, afa azi ovupi zizaru engazu Erivusi ni yo. Eri ni e’yo siriru adaru asi mani aa riki ra.

Mi ni di angu nezu Eri ma Mile onyiruri pi aa ria, Mi ta di ale azini asindriza azi tu ni ne. Eri ta e’yo ‘yoo mi be ata dere nzini tile Eriniri ku. Mi ta di ovu e’yo egaria, Eri ada adaru ‘dia mabe, aku mani aa.

Mi asi ni ta e’do i gba drile drile, mini neria ra Eri ‘ye e’yo azi ‘yo mini ria. Dria dria ria, O’duko aluzaru ndeni mini ta oku dria eri ri ni ta ‘yo, “Ma asialuza leleturi, mi ora ku, mi ru Ma Kabilomva ma Buku Idrini ria. Ovuni buku okuru ecita nyakuari vuri niri i ku, te Ma Buku o’diru Amuroni ri i.  Eri mi karatasi ajeni mabe ri i.

Mani leleturi la, mi ovu lu truzaru ezata mivu rikisi azini nzota kisi dria ‘dini ku, te Mani ria, mi ovu ‘BAZARU ALARU ‘bo. Mile Maniri pi lia, mi ‘yeni nga drio afa azi onzi ni ku.

Emi Ma mvi azini izi onyiru, adriza alaru, ezatakoko riki. Emi paturia kililiru; Ma Amuro ondikoko ovupi ojizaru Yi Ma Ngulupi ma Arisi vurisi ri i.

De nga ata adra emba, ‘bi’bio, kaniku o’baza wereria ndeniri pini ovuzu yoria, emi andra Ma mvi azini izi ki. Emi arakala ovupi e’dazaru adaru ra andra ovupi Ma aa e’dozu okokelesi ri ki.

Mi ori efi orindisi ri andra Ma aa a’disikuni emi eceta Ma arakala ni riki, Ma egataki. Emi andra vini Ma aa denga wudrikuru ma vuti ovuni ‘bazaru ku.

Mi Ma Amuro orindisi engapi ovupi lazaru Indikindi Mvini aa, nizu, E’yo erizuri si ri i. Sawa ‘disi emi e’dodi ovu ava engaza be ‘bo, dri egozu vule ani emi ngulupi otizu E’yo Mani be risi. Emi ma Amuro Okuru ovupi Pezaru’bo ri i.

Emi di sawa ‘disi ovuria ecita orindisi ri be mabe.  Za eminiri ni di ecaria E’yo i, azini E’yoni di ecaria za ru; e’dazaru azini ecezaru. Lu afa andra Mani ‘yo mini mupi yi ‘yepi o’du ‘di aari ki, eri i ‘yeria, o’du vusi o’du vusi. E’yo ni ecaria E’yo i.

Emi ovu E’yo Eceza adaru o’du asizu ‘dini ri be: etrata Amuro Mani rini tualu O’dukoti ‘disi ri i. Ayi azi Mani Eri azizuni yo. Ma azi andra Eri emi dri ayi ‘di alia: Malaki 4 i, Luka 17:30 i, E’yo Ba Yohanani 14:12 i, Yoeli 2:38 i.

Ama nga mu ovu Omunyaza Awa’difo fezaniri be Sabatu ‘disi Mani nga muzu e’yo nzezu drinia mini angiri ri. Ma nga mu sawa ki oa pipi emi pie, ticita ‘yeria azini omunyaria E’yo Mani dria. Ma nga mini ece ndindi dika kini oazu E’yo Mani be, Nabi Mani be, O’duko Mani be, Avizuri Ekpazu risi, emi ma Ale kililiruri ma alia.

Ma ‘yo andra yini E’yo Mani alia, Ma pa soria katia, ani kati kporia. ‘Ba azini ka O’duko mani eri, ka jotile zi, ma nga fi eri vᴜ, ama nga nyaka nya eri be, azini eri’i ma be. ‘Ba kakau mukini eri ku ani jotile yini nzizu, te E’yo Ecezasi, enziki jotile emini riki ‘bo azini aiki Ma aa ‘bo. 

Yi aikiniku O’duko Maniri avizu kanisa yini pi aa ri be. Yi kaki ta lu fe Orindi Alatararuri ma nda omi yiniriki E’yo si ‘dini, yi ta ai ra. Kristo, E’yo odu osuza be ri, ma onda omi ama ngulupi ni riki. Mi fe ma efi mi aa, mi ne kani ‘Da adaru ya kani yo yari.

Ma ‘yo andra mini kini mu ovu dini azini ni ku emi ejizu tualu, ata yi aikini E’yo azi alu kani iri ‘dile Bibilia aani ma dria ku. Drio Ma lu mini kini eri mu ovu ongulumu azi agupi pini ni ‘dileri ra? Yo! Ma yo andra mini kini Eri andra lu Agu ALUNI Ma O’dukoti; ani mi eri azini ru andra ra.

Agbari yi ni andra ta ma otita e’doriari erizu azini aizu ku risi, Ma epe andra yini olu’ba pi ma ti, emba’ba pie, ‘ba ti opeleri pie, ocepi pie azini nabia pie. Te yi ma to ovu andra epezaru ‘bapi ma ti pezu VULE ma otita andra oko azini kililiruri vu. Ma malaika amboruri vu, . A’disikuni Eri O’duko Munguniri emi dri.

Yi ovu odu osuza be ci, te Ma ovulu ‘BA O’DUKOTI OJIPI NABIRURI BE ALU EMI DRI CEZU. ORINDI ALATARARURI NABI I. Ma ‘yo nga mini paale karakara kuye ya, MA E’YO NZEZARU ERIVUSI RI LENI E’YO EFE ECEZA KU, LE MI O’BA DRINIA KANIKU MI ‘DU AFA AZI CI ERINI ‘YONI ENGAZU ERIVUSI, MI OVU LU AFA OVUPI ‘YOZARU TEPU NDE PI MA DRIARI BE RI? ‘Da nabi nde i, Orindi Alatararu mi dri cepi ri i.

Eri ‘ba andra mani ti epe mi omvezu ovuzu Ma Amuroru ri i. Eri ‘ba emupi mi e’dapi Mani ri i. Eri ‘ba andra mani pasozu eri be Mani andra mi, Ma Amuro i e’da ngole yari e’dazuri. Ma nze andra mini e’yo dria eri ma driari E’yo Eceza ma aa Mani andra ‘yozu, Ma Yesu i ma pe MA MALAIKA ma ti e’yo eti nzeza fezu emi dri afa ‘di pi ma dria KANISA PI ALIA risi.  Eri MA’i, Ma lu eri ma ruati azini eri ma o’duko ayu e’yo nzezu mini.”

O’du azi onyiruni ngo i ya amani nga muzu ovuzu atruni tualuri i. Ama engaki nga ovu ayikosi ndeni kaniku apita pei ndeni idri amani pi alia drio ku. ERI ‘di be ‘di. ‘Di afa amani enga te idri amani pi alia dria ri i.

Indrilendri azi abazani asi amani pi aa kani omi amani pi aa ni yo. A’disikuni O’dukoti ci amani eri ri si, Eri lu amani ama Eri ma Ale kililiruri alia. O’duko nga pi emi ecipi tualu, emi ‘bazu kililiru, azini emi ejizu tualuri lu alu…Ma-i, MA-I E’YO NZERIA MA NABI VUSI RI I. OVUNI E’YO ERINI RI KI KU, MA E’YO KI. ERI MA GERI FE RI I.

Mesa ovu di otuzatu ‘bo. Ovu gazaru tre kabeji si, tibe ini tanipu ru pie, azini radisi ruri pie…E’YO ‘BAZARU E’YO DRIA, ‘BAZARU E’YO DRIA. Ama nga mu ovu Omunyaza Awa’difo fezaniri be ko’bo nga driori le ku. Yubili ni nga ovu ci wudrikurusi ara Amuroni nga muria yi traria Mesa yiniri mi ma tia ara O’duko Munguni ri eriria e’yo nzezu yini. Ama akuki kanisa pie nga ovu efizaru Eri ma indikindi si. Ama nga mu ovu afa azi nzezaru ni be ku pelu ama Dizaki, Haleluya pie, Opi ma ru ma ovu inzizaruri pie.

Mi emu ovuzu eseleTrata Awa’difo-fezani Aku Amuroni ri vuri i, Eri ni amani nyaka fe ria. Mi ma ovu vule ku, amani muria omunyaria Sabatu, sawa azia etusi ‘dere, Jeffersonvili saa si (Sawa alu ondresi Ugandaa). Eri mu ovu ‘daa ci, a’disikuni Eri ‘yo andra mani I mu ‘ye ra ‘dini.

MA EMURIA azini Ma nga mu e’yo nze mini Ruecita Amuro Kristoni Ri Vu Nelekuri 65-1125 ma dria.

Ma nga mi ne Mesa tia ‘daa.

Adri. Joseph Branham i

Vini Omvele: Oku Ovupi Pezaru’bo Ri’i.

23-0319 Amuro Azi Pezuri’i

Mesegi (O’dukoti): 65-0429e Amuro Azi Pezuri’i

BranhamTabernacle.org

‘Ba Efi Alu Engazu Milioni Alu Alia Leleturi,

Ma enga te sawa ezuru tu. Mi ma aluzaru leleturi, azini Ale mi ambamba.  Mani andra azi mini ri le, Ma enga mini Aku azi o’diru amani ngazu muzu oazu tualu ‘Dani ‘danisi dria ni ede.  Ma ede afa dria lu ko’bo mini lelerile ‘bo.

Sawa ‘disi ma ecodi mi nera ani nezu kini, mi e’data Ma ni mgbari i. Mi ovu Ma obi mgbari be, Ma za be, Ma fala be, Ma Orindi alu ri be, Ma afa dria alu ri be, lu ko’bo.  Mi eca di alu Ma be ‘bo.

Ma pe andra Ma malaika amboruri ma ti nyakua mi omvezu amve engazu Edeni Sitanini riasi. Ma pe andra eri ma ti ani eco ani Ma egataki ece, Ma arakala pie, azini e’yo luzu mini afa emupi nga emu emuri pi ma dria. Ma ayu andra eri ma ti azini eri ma o’dukoni yi ecezu ani. Erini yi ‘yozu ‘bori ma vutia, Ma fe andra ma ‘duki pari yiniri ra, a’disikuni ‘Bu ki nyaku be nga ali ra, te E’yo Mani miniri cani nga ede ku.

Ani andra ra mini Ma eriria e’yo nzeria, Ma malaika ma o’duko vusi, mi ta nira aliru asi mini aa, kini ‘da eri i ku, ‘da Ma’i e’yo nzepi mini ri i. Eri andra Ma i mini waraga aleni ri idripi ri i, luzu mi dri, A pe mi ‘bo ovuzu Ma Amuro leletu aluzaruri ru.

Mile mani pi alia, ‘ba azi mi leni yo. ‘Ba azi econi pari mini ri ‘du ku. Mi enga ovu a’daru azini a’itasi Ma vu. Ma ka mi ne ‘dini, Ma asini gu ayiko be.

Mani andra luria midri, mi ovu milesi leleturi la, afa mini eri ri si, ‘ba nga ovupi odu osuza be E’yo Maniri ayupiri ki nga ovu kakau, te yi enzoru ri ria. Mi va andra Ma bile ndu liza ra E’yo Ecezasi ani oadi adaru azini a’itasi O’duko Mani ri vu.

Ma andra afusi tu mini e’yo ziria asi driasi kanisa mini ti ecita ‘yezuri ma dria. Ma ‘yo andra mini peta ‘yekeri pezu, azini Ma fe andra midri eceta kanisa kililiruri vuri ngole yari ra.  Mi ega andra ra Mani ‘yoria yi ovuki dria orindi yini pie ri, ani mi pe andra di kanisa kililiruri i.

Ma ‘yo vini mini ra ovuzu milesi mi ocepi i a’di’i yari si. Ani mi eco di geri Ma asi ni mbuzu ayikosi Mani andra mi neria awiria ocepi andra mani ti pe mi egizu mavu ri be ria. Mi ni andra ra kini eri Ma Orindi Alatararuri i Ma nabi ma aa mi dri ecezu Mavu.

Ma ega odu andra mini ovuzu ayikosi tu, azini ayikobe tre, Mani andra Ma malaikani omvezu angu azi oruni ma aa ani Mani ecozu erini e’dazu mi e’da ngole yari beni risi. Aso di andra pa ‘daa mi neria mini pa ‘doria ama drilea ongo Asikari Kristayoniri Muria Drile ‘dasi ria.

Le andra geri emini emi suzu bongo emi kari emini engazu rikisi ria; ko’bo engazu Switizalandia, Girimania, azini engazu wudrikurusi ara. Emi alu alu andra dribi emi ezururi pie edezaru onyiru. Emi sikati ki andra pere ele onyiru. Ma andra afusi ambamba azini ayikosi emi e’dazu erini, ani eco ani drigo vule emi asini okpo fezu beni ani ‘yozu i ne emi ‘Daa ra ri.

Mile dria andra Ama dria. Ezuanzi azi were, laini ma aa vule ‘daleru kaki andra mu e’do angu one ra pari azi ‘diyipi alia ‘bo, eri tre andra ra, “Emi ‘yeki ‘da ku! Emi fuki pa’duza ndrondrori aliasi ku!”

Mani andra ‘yoria mini Ma mu nyaka tamba ero aa mini nyazaru ria, mi ni andra ko’bo ra Ma e’yo nze a’du ma dria yari. Mi le andra ovu Ma Amuro E’yoru Aliriaru ondikokori i. Ma awini mi bi agoyisiria ‘ba azi nduni be ku ye. Eri andra lu sawa dria Ma i, Ma E’yo i. ‘Da fe andra Mani ovuzu ayikosi tu.

Ma pe mi ‘bo, MI I, ovuzu Ma Amuro ru. Ma aliru ale alia mi be, ko’bo mini ovuzu ale alia Ma be rile. Mi ese avaako ku, mi ovu ava be, mi ovu ayikosi, mi zu ayiko, o’du Mani ngazu emuzu mini ri ni ecaria mbeleru. Sawa onyiru amani nga ovuzu eri be ‘da ngo’i.

Emi asi asipi ‘diyini, EMI OJA ASI, nyakuni ‘duria. Odu alu, Los Angeles ni nga ovu lazaru miri ma vutia, lu ko’bo mani andra lu emidri eri nga ovu rile. Ma andra ni ‘duria kpi engazu eri ma vutia. Ma cani nga cinya amboru yini edroni ‘da bi sawa ezuru di ku. Emi nga nzo miri alia mailo alu aliru, kpi Miri Salton niria vule ‘dale. Eri nag ovu onzitu aga o’du asizu Pompeiini ri ra.

Ma mu nyaku ‘di oji acisi mbeleru. Ma afa dria eri ma dria azini eri ma vutia ‘diyi o’di dria. Mi ne afa pari ‘dupi wudrikurisi ara ‘diyi ra, lu mani andra ‘yo emini ‘bo rile. Emi ne Amuro Maniri ni i traria E’yo mani ageyia ara ri ra, lu mani andra ‘yo emini ‘bo rile.

Sawa ni di sawa ‘disi. Ewu ni di sawa ‘disi. Emi otuki emi ngulupi!

Sawa Eri ma adra vuri eca nyaku ma dria ‘bo. Emi apaki esu sawa nga ci apazu, ani emi emu Kristo alia.

________________________________________________________________

Emi ovu aizaru emuzu ruecizu ama, esele Eri ma Amuroru be, amani ama ‘baria ngonde Eri ma Emutani, O’duko Munguniri erizu e’yo nzeria amani azini O’dukoti: Amuro Azi Pezuri 65-0429E Sabatu ‘disi sawa azia etusi, Jeffersonvili saa si risi (Sawa Alu ondresi Ugandaa).
    

Adri. Joseph Branham i

E’doza 24:12-14

Isaya 53:2

E’yo Eceza 21:9

23-0312 Aku Drozi IZio ‘Buari Pini Amuro Nyakuari Beri

BranhamTabernacle.org

Amuro Nyakua Leleturi,

Malaki 4 ni Mungu ma E’yoni, azini Eri ofu ima wura vusiri ‘bo, AMA’I, Eri ma Amuro i. Eri Orindi Alatararuri i, Oaza Yesu Kristoni, azi ngapiri i, sizaru asi amanipi alia. Ama ‘bazaru idriru E’YO DRIA Erini andra nzeri pivu, a’disikuni “Kabilo Maniki O’duko Mani eri; ani’bo ma vuti cakini nga bi ku.” amani Avizuri Ekpazu ria.

Mba asizu ‘diyi engaki ovu onyirutu ngole ya, nabi ma vuti biria engazu Jeffersonvilia.  Mungu enga e’yo ‘yoo Eri ma malaika amboruri vusi ani amani nyaka fezu Erima Nyaka engazu Eri ma EROJO WERERU ALU suru ma alia ndulu ri vusi risi. Eri Mana zizaruri i, lu Erima Amuro dri.

O’dukoti alu alu amani eririsi, ama tieci azini ayiko zu ama eselia; “Ani ra Ma eri O’dukoti ‘diki paale kakaub’o, te DRIO ma eri nga ki KU ko’bo sawa ‘disi ri le”. Eri a’daru yi a’di Yi Idrirurini e’bupi engazu ama ma aasi ni. Ama ecoki mgbaria ama ‘ba okunazaru ku. Eri afa dria amani lezu e’yo nzezu drinia ri i. Ama engaki ovu ndindiru ndeni idri amani pi alia, ama a’di-ki azini ama muria ngoa ya risi.

Osuta azi di dika yo:

“Ani lu ku. Ma ‘ye afa drifupikuni ki kakau ‘bo idri mani alia. Ma e’de Opi i paale kakau. Eri e’da ekile MA SADRIA e’yo eza ri le.”

Asi’baza dika ya:

“Ma adaru asi ‘ba kini ma mva Munguni ni. A LE ovuzu. Ma zi Ma ‘dale.”

O’du ‘da deki yi DRIA ‘BO. Sawa ‘disi ANIKI RA. Diza Munguvu!!

Aniki ngoni ru? Mungu ibi e’yo nze kpi amani Eri ma O’duko tepupi ma driarisi, luria amani dika azini dika, “Ma emi aa, emi Ma aa. Ama ALU. A pe andra EMI denga wudrikuru ma vuti ovuni ‘bazaru ku. Emi za Za manirini ri i, fala Fala manirini ri i.

O’dukoti onyiru Munguni andra nze amani Sabatusi luzu amani wudrikuru amani oazi aania ‘di ovuni amani ku, eri Sitani ma Edeni ri ‘da andra ngo i ya. Geri andra eri ni Eva ni olezu okokelesi lu E’YO ALU zizu zitasi azini abazu ‘da i. Eri tru andra Mungu ma A’buta Alatararururi te, ani su di a’buta onitaniri i, ani eri ma mile ki di andra nzizaru azini ni di andra ra kini i pililiru.

Sitani pi andra E’yo okori wiyoru, ani sawa ‘disi a’budi eri ma mile ci ani kiri eri pililiru te niniku. Eri eca’di Sitani ma opi okururi i azini nyaku di ni eri ma suru Edenini ri i.

Sabatusi, ama Izio ‘Buari le Eri ma Amuro nyakuari ega ama Aku Droziri ngoa azini Eri nga ovu ngole ya risi. “Aluzaru leleturi, sawa ‘disi mani di mini e’yo nzezu wudrikuru di ma dria dria’bo azini geri erini ovuzu Sitani ma Edeni ni ‘bo risi, Ma le lu emini PAALE ALU DIKA EMI Aku Drozi Ma be ri ma dria.

A le lu emini aliru tu. Anira emi eri ki ma Eri luria emi dri paale kakau ‘bo, te ite ngalu, saa ‘disi eri mu ovu kile emi eriki nga drio ma luria emi dri ku ri le.

A le fe eri be aliru tu. A le ece emi dri emi ma Ale kililiruri alia Oazu E’yo mani azini nabi mani be risi. A le emi dri eceta azi emi andrusi a’du ‘ye yari ma dria eceta kililiru Aku ambo o’diru emini nga oazu alenia ri ma dria.

Ama adaru feria afa azi alia. Ma nga mu emi ni afa azi wereruni e’be; Anira emi nga Eri vaa ra. Emi nga oa Aku ambo ‘da aa Mabe. Nabi Maniri ni nga ovu jo ejeleni mi be. Eri nga ovu mi jo ejeleni. Emi nga aci nzila meleru ‘da pi driasi azini mvu engazu Ma A’divu. Emi nga aci paradisi Munguniri aasi, Malaika pie ongaria azini ongo karini ngoria.

Emi nga oa nyoro Ma nabi ma oku ma driari ki. Emi nga di aga afa dria wudrikuru ma aari ra, o’du ‘dasi. Afa kakau Mani le ece emidri Sabatusi riki. O’du azi onyiruni ngo i ya amani nga muzu ovuzu atruni tualuri i”.

Eri ovu angiri ni pie ci ero aa amani wiki wereru emupi ‘diyi alia, Eri ka emu ani ama ‘duzu oko kuria. Wiki vutia wiki vutia, luria ama dri, ama a’diki yari, ama mu ngoa yari, Eri nga ovu ngole ya kala ‘Da ma dria.  Eri nga mu ama dri ce wiki Engatani onyiru ndeni amani drio ovuzu rari vu, efizaru afa azisiku pelu Eri inzizu azini ecuzu ri i.

Saa ndrinzaruni ngo i yani. Ama neria e’yo ondrizani pari ‘duria ama miletia. Ama nedria E’yoni ovuria e’dazaru AMA AA. Eri ma emuta eco ovu sawa ci ri aa ra. Ama di pa soria jotilea mawa be ama dria. Ama ecoki eri ra akanya pi ma pa pini yi gbaria azini cinyakini i liria gari pa pi ma rua.

Gari okururi ni nga ovu atrizaru mbele ru. Ama nga mbu amve jotile ruati okuru ‘divuri ma aasi ani ngazu Eri ma dria. Eri nga ama ne ani ‘yo, “dedi i dria ‘bo sawa ‘disi, anyu la, Ma di mi ji sawa ‘disi Aku ni Droziri ma aa.”

Mi ovu aizaru ovuzu esele o’du amborutu wudrikuru ni drio ne ra ri pi ru. Aji nyiri yi nga ru tra engazu wudrikurusi ara O’duko Munguniri erizu e’yo nzeria Eri ma Amuro dri ani e’yo luzu eri dri: Aku Drozi IZio ‘Buari Pini Amuro Nyakuari Beri 64-0820 ma dria, sawa azia etusi (12Pm), Jeffersonvili saa si saa si.

Adri. Joseph Branham i

E’yo egazaruri: Emi aviki e’yo Sawa Daylight Savingsniri ma dria ku.

E’yo siza lazaru O’dukoti nde ma drilia riki:

E’yo Ba Matayoni 19:28
E’yo Ba Yohanani 14: 1-3
Efeso 1:10
2 Petero 2:5-6 / Chapta 3 zuri
E’yo Eceza 2:7 / 6:14 / 21:1-14
‘Ba Levini 23:36
Isaya Chapta 4 zuri / 28:10 / 65:17-25
Malaki 3:6

23-0226 Agupi E’yo Egapirari Ma Afa Afandripi Ri I

Adripi Branham ma Ongulumu Leleturi,

A leta wudrikuruni ai ruecizu amabe afa e’i simusi ‘di ma aasi Sabatu ‘disi sawa azia etusi (12PM), Jeffersonvili saa si (Sawa Iri inisi Uganda), ama Aji pini rutraria tualu angu milo turu iri paale turu iri alu alunisi nabi ma kanisa aluni ma aa ri ma aariaa. Ama nga mu Munguni eri e’yo nzeria Ima ‘ba o’dukoti ojipiri malaikaru azirizuri visu ani luzu amani: 

O’dukoti ‘di’i, azini O’dukoti azi dria mani e’yo nzezu yi ma dria ‘bo riki, yi ki ongulumu maniri pini. Eri ongulumu mini rini ku pelu yi kaki le Eri ai ni ria ka. Te Eri ovu ‘yozaru ‘ba ‘dia ‘di pivuleru.

Eri e’yo ‘yoria amani, DIZA, eri ma ongulumu i. Ovuni emi ‘yopi kini, “Adripi Branhamni nabi i, te ovuni ma ocepi’i ku.  Ama ocepi ni ‘yo kini tepu ma avita kanisaari ovuni E’yo andruriniri ni lelerile kuri” pini ku. “Ama ocepi ‘yo amani le ama ma eriki i’i. E’yoni lelerile risiria, eri ama dri ceria sawa ‘disi Orindi Alatararuri vusi.”

Nabi ovu omvitabe mini azini mi ocepini ci.

Olu’ba cini ni pari ciri alia, saa ciri aa, ‘di ovuni ‘yozaru embata emini riki mazu fu ‘dini ku, ‘di ovuni vini ‘yozaru kabilo mini ri pini ku indi.

Alekini ku e’yo alezu emi adripika azini amvipika pie. Avaki ra, Eri ovuni ‘yozaru emini ku, te ama, a’ipi ra kini Orindi Alatararuri ‘ba Eri ma ‘ba o’dukoti ojipi malaika azirizuru ovuzu ama ocepiru azini ama, Eri ma kanisa ma dricezu ri pini.  Ama a’iki kini tepuki avizuri ni GERI LU ‘YEKE ri i.  Mi ‘yeke azini mi afa nabini andra ‘yo MI ma ‘yeri ‘ye:

Azini ma sawa dria eceta fe yisi, yi kaki ovu esele kanisa azinini riki yaani, “Mi ne mi ocepi i.”

Le mi ma ‘ye mi ocepini ‘yo mi ‘yeri le.

Ani dika nabi ‘yo di mi ocepi ni pale alu dika, lu fezu erini vazu muke muke.

Sawa ‘disi, ocepi, a le mi ma ni ‘da ra, kini, ‘di lu ongulumu maniri pini mani e’yo ‘diki nzezuri. Azini ma ovu drilembo be ci ‘da ‘yezu, a’disiku Ma ovu ‘bazaru Orindi Alatararuri vusi kabilo ‘di pima orule gazu.

Eri ma ti ovu epezaru ama, eri ma kabilo pima orule gazu; ‘ba Munguni ‘baa ERI MA TAMBAZA ma aa ‘diki. Orindi Alatararuri ni ama ocepi i Erini e’yo nzezu amani azini ama dricezu o’dudria Eri ma O’duko ovupi e’dazaru ra risi risi.

‘Di afa Opi ni amadri cezu ‘yezu ri i. Ama ovuni mi rua kaniku mi ocepi ma rua, kaniku geri mini ama Opi ni mi dri ce ‘yezu ‘daleri ma rua onzi ‘dini ni ku. ‘Ba alu alu ma ‘ye yini amazu eri driceza Opi ni yini ‘yezu ‘dale E’yoni lelerisi ri’i.

Ama ovuki afa afandrapi alu ni be, O’DUKOTI ‘DI’I. Le afa dria amani eri ri ma ali afa afadranpi ‘da ma alesi. O’duko amani eri tepu pima dria ri ni O’duko lu alu ci amani ovuzu asimbaza 100% ribe ovuzu ‘Di Opi ‘Yoni niri i.

Mi a’i ‘da ra kini odu osuza ‘ba ‘da pima dria ri ma efi kini eri odu osuza Orindi Alatararuri ni ri i ri ra? Ee, culu, Orindi Alatararu Munguni ada ri i ‘ba azi ma dria, te yi enzoru.

Ama asiza ‘dani ‘daniri su pa afa ERI NI ‘YO TEPU MA DRIA RI ma dria, ovuni afa agu azi kaniku ongulumu agupi pini cini ni ‘yori pi ma dria ku. Ani, acakini ku, azini caki vini nga ku azi ndu cini ni erizu.  ‘Ba azi eco di o’bi ‘da ‘yezu dere ni eri muke ya kani onzi yari ku ngoni ru?

Mi emu rutrazu amabe ndenini nezu ra kini o’du nde ni di ecaria risi.

‘Ba ecoki ri kpi engazu aku yini pi alia kaniku yi ma…trazaru pari yini pi alia, kanisa pi alia, azini afa azi ‘diyi pie, ani inzita nde erizu beni.

‘Da, ma agyipi la, nabi Munguni ri ni ‘yorisi ria, ovuni agu azi ma e’yo efi eceza Bibilia ni a’du ‘yo yari ma driari vu ri i ku, eri amani ama ngulupi trazu tualu E’yo ma ageyia ara ndeni ni amani nezu ra o’du nde ni di eca eca risi ri i.

Orodri sanduku vuri di a’duni Mungu kokoru? Eri lu sanduku mbawusi ri i, oni ‘bani afa azi sizu drinia ci ri pie.  

Mi emu rutrazu amabe amani Mungu ma afa fe afandrazuri eri ria, Erini amani O’dukoti: Agupi E’yo Egapirari Ma Afa Afandripi Ri I 65-0822E ni ejiria.

Adri. Joseph Branham i

Mi andri afa amani afu fuzu ani ri i. Mi andri ama ‘dia a’duni yari. Mi andri mi mu kanisa a’du e’yosi yari. A’duni fe mini…Eri muke muzu kanisaa, te mi ma mu lu kanisaa a’dule ku; ‘da cani mi pa ku.