Okop’ba Leleturi,

Mungu azi ndra Ima Amuro dricepi azi ma ti epezu o’du asizu ‘diyi ma alia ani Eri ecota Ima ngulupi ece ruatisi beni, kile lu Erini ndra emuzu nyakua Ima Mvi Yesu ma aliari le. Eri lu ndra amani Ima E’yo ma alia kini I ta nga nabi Eliya, ta mupi ovupi Mvi ‘Bani i Ima ngulupi eceria ruati aliari’i ri ma ti epe; a’disikuni Eri ovu nga kiri afa kakau be ‘yozaru azini embazaru amani.

Eri muni e’yo nze ima ngulupini ni ku; te afa ci erini nga eri ri, eri nga nze i: azini eri nga emi dri afa mupi emupi riki e’da. Eri nga ‘ba ma ma ovᴜ dizarᴜ, erini ngale afa mani ma azi e’dule olᴜle emi tiarisi.

Eri epe ndra William Marrion Branham ma ti E’yo Iniri ni pari ‘duzu azini ama sizu alu alu Sita Yesu Kristoniri ru; agu azi kilili ta ecopi ari’bo dria ndepi, azini ta ovupi okpo’ba Orindi Alatararuri ni oazu eri ma aliari ruri’i.

Mungu eceni nga drioku sawa driasi Ima ‘bapini dricepi azi ma ti epezu. Te ovuzu Eri ma Amuroru, le mi ma ai dricepi ‘da ra. Le mi ma a’i eri ra. Le mi ma mu geri erini ‘yo mi mu ani risi kanisiku mi emu efu avizaru. Ama tro a’du ega yari ti, afa e’dapi amasiri a’duni yari ti, kaniku afa e’dapi azazaru a’duni yari ti, ama ovuni ‘ba ‘da awapiri ki ku, dricepini ‘ba a’duleri’i.

Mi ‘yo, Adripi Joseph, ‘da Orindi Alatararuri’i ma dricepiri, ovuni Adripi Branham’i ku. E’yo ndra erini nzeri Orindi Alatararuri I te ovuni Adripi Branham’i ku; te eri ‘ba Munguni pe Orindi Alatararuri acezu aleniari, azini ovuzu dricepi nyakuari’i.

Dika sawa ‘disi Mungu enga drio Ima dricepi pi ma ti epe, Eri enga drio ovu dricepi azi be ku ‘dinini yo, ayi dria pi alia. Mungu enga sawa dria ovu ‘ba azi pasopi Eri ma paria nyaku ‘di ma driani be ci, ayi dria pi alia.

Le ama ma vaki dricepi nyakua pasopi Eri ma paria nyaku dria ‘da a’di’i yari ci; e’yo ada E’yo Eceza Erini E’yoniri ‘bazaru ‘daa’da.

Anikira Orindi Alatararurini Dricepi Amboru Atani ti epe Ima Amuro ma dricezuri, te ‘dia Mungu ‘yo Eri sawa dria agu azi ma ti epe ovuzu dricepi azi ru pasozu Ima ngulupi ma paria azini Ima Amuro ma dricezu.

Ama Dricepi lu ndra amani kini Kurunalio ni ndra agu azi inzitaru kanisa ki sipi ‘dileni. Eri fe ndra sende azakoma azini zi ndra Mungu o’du dria. Te sawa Orindi Alatararuri ni emuzurisi, eri le ndra Dricepi azi ni.

Mungu epe ndra erni Orindi Alatararuri ma ti. Eri epe Eri ma ti Petero ma oata ma alia, “Peteroni nga e’yo ‘diri ‘yoria, Orindi Alatararᴜ esi va eri ma dria.” Mungu ayu ndra Dricepi trai Petero vusi. Eri ayu ndra Eri’i, a’dikisuni Eri ce ndra Kurunalio ma dri geri ‘yekeria.

Peteroni nga e’yo nzeria, Orindi Alatararuri ede yi dria. Petero ‘yo,

“A’di eco yi ogazᴜ baputizi fezᴜ ‘ba ‘diyi drini ya?” Enera, kiri Dricepi’i e’yo nzeria, Petero’i ku.

Agu azi ceni ama drini ku; Orindi Alatararu, E’YO NZEPI AGU MUNGU PE OVUZU DRICEPI NYAKUARI RURI ni ama driceni.

Orindi Alatararuri e’yo nzepi Ima dricepi malaikaruri vusiri ni nga sawa driasi E’yo nze. Eri ‘yo amani, “Ma ovu afa kakau pie luzaru emi dri. Emi econi ku Eri vazu sawa ‘disi, te Eri ka emu ‘bo, Eri nga emi drice Eri vu.”

Yohana ma dri ndra cezaru sawa erini E’yo Eceza sizurisi. Dricepini ndra eri ma driceni. Eri ndra vini dricezaru Dricepi vusi ‘yozu, “‘Ba nga ci E’yo alu ‘dupi engazu Erivusi ri, kaniku e’yo alu o’bapi Eri drinia, alu aluri nira ovu ‘duzaru, esele eriniri, engazu Buku Idriniri aliasi.”

Orindi Alatararuri ce vini ndra Adripi Branham ma dri ‘yozu le ama ‘yoki lu afa ‘yozaru tepu pi ma driari’i; o’bazu drinia kani ‘duzu erivusi ku. Dika Eri fe geri azi amani ecozu ko’bo afa erini azi le ama ma ‘yeki ri niri ra, Avizuri Ekpazu.

Sawa ‘disi, mi eco di mu afa azi nduni oja E’yo Munguniri ma paria, ani kiri ‘yo Orindi Alatararurini mi dri ceni ngoniru.

Ama dri ni ovu cezaru Orindi Alatararu amani E’yo Eceza Eri a’di’i, ‘ba Erini ti epe ovuzu Ima dricepiru nyakua Ima Amuro omvezu amveri vusi, ani di sawa ‘disi onidri: E’yo Eceza ama a’diki yari niri. Eri pure e’yo ‘bani pivusi eri ecezu.

Emi ne nga afa Erini ‘ye amaniri, lu wiki asizu were ‘diyi ma alia. Eri emba ndra amani geri ari’bo dria emupi ama drileari ndezuri ra; geri Sei ama A’ITA niri esezu ani eri gbazu kai ri. Ama ovuki afa azi be orizaru ku. Afa azi eco paso ama drilea ku.

Geri Erini Nyaka tamabazu Eri ma Amuro ma nya beniri. Ata Eri ma ojio ka oa re, ama ovuki kiri Dricepi azi wudrikuruni e’yo aluni nizu drinia ku ni be; te Eri ma Amuro dri, Eri Nyaka Orindisi Sawa ‘Yekeri Alia ri, Mana Zizaru amani nya o’du driani.

Eri si ama sita agu kililiruri niri piru ani Eri eco oa azini aa ama alu alupi alia beni. Eri epe amani Eri ma Orindi Alatararuri ma ti azini ece Ima ngulupi ruati alia, kile Erini ‘ye eli 2000 vule ‘dale rile, ovuzu ama Dricepini, oazu azini e’yo nzezu Eri ma dricepi nyakuari vusi.

Ma emi alu alu ai emuzu Eri ma “Honk-honk, honk-honk!” erizu angu Amuro ni muzu emuzu kpi O’duko ‘da vu. Eri nga, Honk-honk, honk-honk!” ani ayiko zuza wudrikuru ara ‘dileni nga ovu ni. A’dusi? Amuro niki yi ma Dricepi ma O’duko ci.

Mi ka le amviku, mi emu ama Dricepini erizu Erini e’yo nzeria Ima dricepi Eri pe nyakuari vusi Sabatu ‘disi sawa 12:00 etusi, Jeffersonvili saa si.

Adri. Joseph Branham i

O’dukoti:
62-1014E — Dricepi Azi

E’yo Sizaki:
E’yo Ba Marako 16:15-18
E’yo Ba Yohanani 1:1 / 16:7-15
‘Yeta 2:38
Efeso 4:11-13 / 4:30
Ebrania 4:12
2 Petero 1:21
Efuza 13:21