Azi-Ngale-Onyirutu Leleturi

Ma eco emi dri waraga si andru emi egazu afa andra ama ocepi ni ‘yo ama alu aluni Sabatu ajerisi ku ngoni ngoni?

Te nizu kini angu ci mani ecozu muzuria….Ma ovu nga ongulumu azi be nyaku dria, mani e’yo nizu drinia ra, pa sopi mabe ko’bo ongulumu ‘dileni be ku.   Mungu ma fe ama ma ovuki awazaruku abamba, kpere, Suru nga emupi ‘da ma aa, ama ma ovuki tualu fo; eri ziza mani ri i.

Ongulumu azi yo nyaku ma dria ebipi Mungu ma nabi be, azini O’dukoti Munguni nze tepu dria ri be amaleni yo. Ani agbari amani ‘ye ra risi, acakini nga ovu awazaruku eri be azini ama Opi Yesu Kristo be Suru o’diru emupi ‘da ma aa. Eri cani eca cika aga ‘da ra ku!

‘Di o’du amboru tu idri amanipi alia riki. Ama ovuki dria dria apizarura ovuzu ‘ba azazaki Kristoni azini Eri ma Odukoti sawa asizani rini. Ovuzu omvezaru nati ni agbari amani E’yo dria tepu ma driari a’izura risi azini ‘yozu, MI EKPA PLAY risi.

Ama Kanisa alu azini lu cia rini. Ama efiki Eri alia andra efi efiku, ama ovu andra osizaru alenia. Wiki alu aluvusi ama emu tualu engazu wudukurusi ara ani ale fezu Kristoni ani ‘yozu, “Kirikiri, Yesu alemitu doni ya!”

Mi eco ‘do ovu nati ni wudukuru ni ra, te Ata fe amani E’yo Eceza Ima ngulupini ri o’du amani ma alia ‘bo, Mungu i inyiriko be rua, azini Eri ese di ama, Eri ma Amuro i, Erivu ‘bo.

Aleki lu tu Eri ‘bazaru ele ngole yari, te sawa aluri alia, Eri vini aliru tu ngole yari. Te le ama ma ovuki E’yo Eceza be Eri nezu, ani AMA OVU ‘DA BE CI.

Mungu zi andra Ima ngulupi a’buza ‘ba adani aa, Eri ma Kanisa aa, Ima ngulupi ecezu a’ita minisi azini a’ita mani si, tualu, emuria tualu, esele Munguni ri sizu. Ma cani afa azi ‘ye ku mikokoru; mi cani afa azi ‘ye ku makokoru; vini afa azi ‘ye ku Mungu kokoru. Ani, tualu eri esele ‘da e’de dria, ecita ‘da’i. Mungu epe andra ma ti e’yosi; mi ka eri a’ira; ani ‘daa eri di i ye. Eri lu ‘da, enera, ovu airazu kililiru ‘bo.

Ama ko’bo agupi andra mupi geri yinia engazu Emau o’du ‘dasi rile. Ama Eri eri e’yo nze amabe etuzu. Ani ama ‘di ‘daa Eri ai aku amani pi alia ani ama ti ni ovu opizaru Eri be a’dule beni. Ani ‘daa Eri di afa azi Erini lu eco ‘yeni ri ‘ye, ‘da Mukati Idri ‘dani ‘daniri niri anyozu ri. Ama Eri ama lu coti. Ani ‘di ama ‘di ‘yo, ama asi vekita kuye ya Erini ta e’yo nzeria amabe gerikoa ria.

Wiki alu alu vusi ama ama tra asi’baza angiri ni pie, osuria, “Eri mu amani wiki ‘disi a’du lu azini eceya” siri si. Ama esele elazaki ale ama eselia azini e’yo nze drinia wikisi zuu. “Mi eri andra Eri raya Erini ‘yozu”:

‘Du andra mani eli alifu su Ma Azi-Ngale-Onyiruturi edezu; te sawa ‘disi ma engadi ogogo eli alifu iri ma aa Azi-Ngale-Onyiruturi ma azi ede, Mi’i, Ma Amuro’i. Ma ‘ye Eri ‘bo geri Erini iojapiku rivurisi, geri alu alu Mani andra Ma Azi-Ngale-Onyirutu okori edezurisi, E’yo Mani risi.  ‘Da geri Mani Ma Azi-Ngale-Onyiruturi edezu ri’i, a’disikuni mi ecolu ovu Azi-Ngale-Onyirutu kililiruri Eri ka ovu E’yo kililiru ri’i ria.”

Ma adripi mi ma egani onzi ‘disi ku, te mi ega nga e’yo minati azi wereni si. Eri ka andra Erivu o’baza adaruri ‘du, Amuro edezu Eri dri, awini andra o’baza azi nduni e’deku. Eri ‘du andra esele o’baza andra okokele niri niri’i. Ani Eri ka andra ovu E’yo’i, le di Amuro ma ovu a’duni? Le ma ovu E’yo andra oko adaru ‘da’i, Mungu idriru E’yo alia ri’i.

Mi ka e’yo nze yubilee nyaka abi tre ri ma dria yaani.  Ama esele o’baza adaru okokele ‘davu ri’i. Ama esele E’yo adaru okokele ‘davu ri’i. Munguni oaria ama aa. Ama Eri ma Azi-Ngale-Onyiruturiki. Ama ongolumu ruebipi Eri ma nabi be riki.  Ama awazaruku Eri ma nabi be azini ama Opi Yesu Kristo be. Ama ALU Eri be.

Mika le mi asi ma vee mi ma aa ko’bo eri ni ‘ye ama aa rile, mi emu ruecizu amabe Sabatu ‘disi sawa azia etusi (12PM), Jeffersonvili sawa si (Sawa alu ondersi Ugandaa) esele azi Amuroniri ni emuria tualu azini Eri aizu aku yini pi alia, azini kanisa yi pi alia, amani eriria Munguni e’yo nzeria azini E’yo Idri ‘dani ‘daniri niri ki eceria ama dri, Erini amani O’dukoti: Azi-Ngale-Onyiruturi 64-0705 ni ejiria.  

Adri. Joseph Branham i

E’yo siza lazaru inzita ma drilia riki:

Isaya 53:1-12

Malaki 3:6

E’yo Ba Matayoni 24:24

E’yo Ba Marakoni 9:7

E’yo Ba Yohanani 12:24 / 14:19