Category Archives: Uncategorized

Uncategorized

26-0215 Zitaki Azini Omvitaki #4

BranhamTabernacle.org

Ori’ba Opiru Leletu ‘Diyi,

Pari ecezarurari lu efi ALU mini ecozu muzu Opini erizu e’yo nzezu Ima malaika vusiri ani luzu mini, “Emi ega sawa driasi ra, emi Mungu ma anziki, Ori’ba Opiru Ari Opiruri pie riki. Ari azi wudrikurua cika aga emivurira ni yo. Emi ama anzi ki, erezaru wudrikurusi ara, mani tile Kristo ‘diyi.”
Ama Mungu ma Ori’ba Opiruriki Ari Opiruri be onzuria ama isuasi. Anzi ovupi tizaru Kristo dri O’duko Munguni e’yo nzepi Ima nabi amboruri vusi risi. Eri econi eca cika aga ‘da ra ku ma agyipi la.

Adripi Branham, le Amuro ni nga muzu Jeffersonvilia kani Arizonaa ovuzu ani ‘Duta Ururi alia beni?

“‘Baki nga ovu iri gbolo alu dria; Ma nga aluni ‘du ani aziri ku; azini ‘ba iri nga ovu amvua, ani Ma nga aluni ‘du ani aziri ku.” Enera? Ani yi eco ‘do…Wudrikurusi ara, yi mukini ovu trazaru tualuku pari aluri alia afaki ‘yezu alurile. Te ongulumu yini were wereni ki nga ovu erezaru nyaku dria dria.

Ani mgbamgbariru, amuni ovu pari alu alia sawa aluri alia ku. Te diza Mungu vu, Eri ovu ndra ata otita azi agara ni be Ima Amuroni ejizu tualu.

Ama e’yo zi kanisa dria pini ongolumu ovupi etrazaru jeleko wereruri ma a—a—ageia amve ‘dale, suru ndesi ara ri pie, cazu kpere Miri ti Kala Etu ni ‘deriari vu, kpere uru ‘be Arizonaniri pi ma dria, ele angu sere Texasiniri pi alia, kpere Miri ti Kala Etu ni efuriari vu, suru nde si dulu, Opi, angu yini ovuzu trazaruria. Esele coza saani kakau, amani ovuzu sawa aliari, Opi, ama ondre ‘disi rua aluru, a’i’baki, Emuta Mesianiri teria.

Andru, ovuni lu Eri ma Amuro ni ovu etrazaru engazu suru ‘disi a’dule ku, te Eri AMA etra engazu angu kulu 7 wudrikuruni ‘diyi ma alia. Engazu Afrikaa cazu Antartikaa. Amerika Uruleruria azini Amerika Andreleruria, Asia, Australia azini Eyuropia. Eri Ima Amuroni etra azini aci RUA ALURU O’duko Munguniri erizu.

Eri ‘yo andra amani muzu kanisaa; ata vini angu yini E’yo embazu agavusiri ma alia, KPERE amani ecozu kanisa E’YO BE PI isuzu. Inzita ma ovu Mungu vu Amuro isu di pari nda ‘bo, O’duko Munguni Tepu ma driari ni E’YO PIRI’i.

Mi ka tro ovu mi kanisa Tepuni Akuari alia, mi kani aku kakauri pini ovuzu etrazaruria, kani boroko azi alia jere Amazoni kani Afrikaaniria ti, anguci mini ecozu Avizuri Ekpazura O’duko Munguniri erizu e’yo nzezu mini tivu bivura ria, mi nga ovu KANISA E’YO PIRI beri alia.

Ama esuki kanisa E’yo piribe ‘da ‘bo ani ama emi ai emuzu ruecizu amabe Sabatu ‘disi sawa azia etusi (12pm) Jeffersonvili saa si (8pm Ugandaa), amani ‘di eriria: Zitaki Azini Omvitaki #4 64-0830E.

Adri. Joseph Branham i

Uncategorized

26-0208 Zitaki Azini Omvitaki #3

BranhamTabernacle.org

‘Ba Tile Kristoni Leleturi,

‘Ba azi eco ale azini ayiko ovupi ama asia E’yo Eceza adaru Eri ma E’yo o’du amanirini nizurisi ri ‘ba e’yo ‘ba drapirari nisi ngoni ru? Egazu, ama ovuni ndra afa azi ‘yezaruni be ku, te ERI, MA INDI Amboruri, Ima ngulupi ma petasi, ‘ba ndra AMA okoru ovuzu afa amboru ndeni Eri ni ta eco fe amanira ri be, E’YO ECEZA ERI MA E’YO O’DU AMANIRINI RI’I.

Eri te ndra, pere sawa ma treri ni ecaria, ava idriniri vuzu ama alia, ani ama ecokita Eri eri e’yo nzeria amani ani ‘yi ‘dini beni:

Sawa ‘disi, ma o’bi ma ngulupisi ndeniri ‘bo lu—lu—luzu emini azini emi dri cezu kile atani ta ima anzi pi ma driceri le. Emi ama anzi ki; Ma ti emi Kristo dri trai E’yo ba mani olu ‘disi. Enera? Azini Ma—Ma—Ma le emi ozo anzi mbapi teketeke’bo ‘dileri piru, kani—kaniku anzinyiri ru. Ani ma le emi fe Kristo dri o’du ‘dasi, kile Pauloni ndra ‘yori le, “Aliria ezapikuri.” Afa azi yo E’yo ‘da ma alia te ama asini ngazu tini apezu “amena” si ri.

Mungu’i, e’yo nzeria Ima malaika amboruri vusi, ni ama, Amuro Yesu Kristo vuri, ma tijiria azini driceria. Ama Eri ma azi mbapi teketeke, aliria ezazarukuri ki. Azini Eri ma ayiki osutarurisi, ama E’yo dria amani eriri ma ti ape AMENA si! Eri e’yo efi eceza kililiru E’yo ovupi eceta geri Mungunisi beri’i.

• O’duko amani eri tepu ma driari ka ovu: e’yo efi eceza kililiru E’yoniri i, afa ndu Amuro Yesu Kristoniri ni leri a’duni?…AFAZI YO!

Eri pe AMA ‘bo, Eri ma ongulumu wereru oyaoyariki, ovuzu E’yo Eceza adaru Eri ma E’yo o’du amaniri niri pie ri. Ama ‘ba Erini ndra pe ovuzu nyakua, ruati mgbari ma alia, angunyaza Eli Alifuri ama aliari ki.

Ma agyipi, ama ma oaki ngalu ‘da ma dria minati aluru.

Ama nga ovu ruati dizaru pie nyaku dria ‘dia. Ama nga ovu nyaria, mvuria, jo siria, oaria lu kile amani ‘ye sawa ‘disirile eli alifu alu. Eri nga ovu ama ovuza anyu-aari angu drozi Amuro (AMANI) Izio (Opi Yesu Kristo) be ecazu ALURI.

Ama sawa dizaru ‘da ma orule ga azini te minati dria o’du driarini risi. Eri enyia tu eri e’da kile ama ecoki mbgaria eri elo ra. Ma aira, asi mani driari si, ‘di afa ru ‘yepi ama be andruri’i:

O, ruecita orindisi Kristoni Ima Kanisa beri sawa ‘disi, sawa ruatini ecaria E’yoni ria, azini E’yoni ecaria ruatini ria, e’dazaru, ecezaru. Lu afa Bibiliani ndra ‘yo eri ta ru ‘ye o’du ‘disi rari, eri ru ‘yeria, o’du vusi o’du vusi. A’dusi, eri tiria mbelembele amve ‘daa, nyamuko ‘dapi ma alia, azini afa pari ‘dupirikisi, mani ecozu ata yi ma vuti obizu ku ‘diyi. Ama emuria Emuta Yesuniri vu, ovuzu ecizaru Eri ma Kanisa be, angu E’yoni ecazu E’yoniri’i.

O’dukoti alu alu amani eririsi, Eri amadri E’yo Eceza fe drile drile. Eri ezuria mbelembele tu ama ecoki vutini be ruotizu Eribe ewasi. Ama neria E’yoni ecaria E’yo’i kile nga driori le ku. Endrilendri azi abaza aluninni ni yo: E’yo Eceza, ANIKI koboru ama a’diki yari ra,

Eri Ima Amuro eciria lu kile Erini ndra ‘yo I ta ‘yeri le, azini ama Eri ma esele ni. Ama Eri neria pari ‘duria ama ngulupi ma milekisi. ‘Ba azi ‘diyi ecoki ‘do Eri ne kaniku Eri vaaku ra. Eri ovuni yini ku, ERI AMA, ERI MA AZI TILERI PINI.

Amuro ovu ndra zita pie zizaru nabi ma tia.

Eri ca ra ya O’duko Munguni tepu ma driari LU erizu’i? Mungu omvi ndra azini ‘yo: EE!!

Ama anzi ecoki vini afa dria yini lezu ovuzu Amuro Kristoniri isu lu tepuki erizurisi ra ya: EE!!

Ani, afa dria Amuroni le ri ni TEPU PI MA DRIA.

Aniki vini ra Mungu fe vini geri azi kakau nduniki ra Ima anzi pini.

“Cota Erinisi ama isu ndra aitani.” Sawa ‘disi, okoria E’yo ‘yo ‘dinile ni, ani le ‘da ma ca ‘di ra, te mi k a’i E’yo ma alea ku, ‘daa feta Kanisaari ki di, kile agupi ovupi avavuza be nizu ‘da embazuri pile, ani eri ma ovu ‘bazaru nditiri emidri, ani, ovuzu a’ita be a’izu.

Ama awa’difosi tu Munguni agupi ovupi avavuzasi ni pi atita azini E’yo Erini embapi eri ‘bazu nditiriru ki fezurisi, te Eri ma Amuro le Eri ma GERI FELE CAPIRA KILILIRURI I. Eri afa dria AMANI LERI’I.

Ma le ta emi ai emuzu ruecizu Branham Tabanakulu be Sabatu ‘disi sawa azia etusi Jeffersonvili (8Pm Ugandaa), amani ‘di eriria: Zitaki Azini Omvitaki #3 64-0830M

Eri onyirutu ovuzu E’yo Eceza Eri ma e’yoniri be azini nizura ama E’yo ‘bazaru ruatiru riki ngole ya.

Adri. Joseph Branham i

Uncategorized

26-0201 Zitaki Azini Omvitaki #2

BranhamTabernacle.org

Ajinyiri Leletu ‘Diyi

Angu Za o’dirurini ovuria, ‘daa Amuro ni nga ovu etrazaru tualu. Ani amaniria, pari kililiruri lu efi alu amani ecozu Mana za o’diruri nyazuri: avizuri ekpazu azini O’duko Munguni tepu pi ma driari erizurisi.

Mi ma nze e’yo Mana O’DIRU dria, ama ecoki ata e’do ega ama ovuki ama drianzi pi ma aa a’dube yari ra? O’duko Munguni mgbari e’yo nzeria Ima Amuro leleturi dri tepu ma dria, pari ‘bani e’yo abazuku, osuzuku, e’yo zizu kani ku abazani ovuzuku kini afa amani eri ri Mungu i, o’duko ‘ba adaniri ayuria, ‘Dini Opi ‘Yoni ‘yozu I ma Amuro driri i ri.

E’yo Ecezasi, ama a’ikira Eri pari LU amani ecozu muzu azini ava liza fezu ama idri pi dri kini E’yo amani eri ‘diyi ovuni agu azi ma e’yokiku, vini eri ma e’yo efi ecezani ku kani egata o’bale Eri vuri i ku, te Eri E’yo adaru Munguni e’yo nzepi ama aji werearuri pivu, Ima E’yo eceriari i ri.

Ama ticita ‘ye E’yo ma ageyia ara. Ama Eri ma E’yo la ama Bibilia pi alia. Ama vini agu Munguni ‘ba azini omveni gazaru tre Eri ma Orindi Alatararurisi ‘diyi eri, o’dukoti elese ela azini E’yo Munguniri olu, te o’du amani alia, Mungu fe pari azi ra amani ecozu Ero ma E’YO ‘YOZARU KILILIRURI erivuri, avizuri ekpazu risi.

Ata fe vini Ima Amuroni drileba ra zita ndra ovupi ama asiariki zizu ani ama ecokita ovu omvita kililiruri be beni:

  • Sitani eco feta andreni kani e’yo ondrizani ‘ba azi ovupi Orindi Alatararuri beri niri ayu ra?
  • E’yo Yesu ni ndra ‘yo Matayo 12, vasi 32 ma efi ngoni?
  • Kirikiri mi eci Koronito Okori 13:8-12 ni.
  • Oku ovuki aizaru azi ngazu offisi o’biniri pi alia ra ya yi ka ovu agupi azini anzi ruaalabe pie ria?
  • Eri onzi oku ni i ma dribi ombezu?

Mungu efe geri treki Ima Amuroni asindriza azini okpo fezu, te pari lu efi alu Erini fe Ima Amuroni ecozu ovuzu 100% asimba be kini eyi ERI MA E’YO KILILIRU eririari. Yi A’di Idriru alu Ajinyiri pini ecozu muzu vunia angu ecota ondi azi cini vuri ni ovuzu ku ria.  MI EKPA AVIZURI.

Ma emi ai emuzu mvuzu engazu A’di ‘davu Sabatu ‘disi sawa azia etusi Jeffersonvili (8Pm Ugandaa), amani muzu ‘di erizuri 64-0823E “Zitaki Azini Omvitaki #2.”

Adri. Joseph Branham i

Uncategorized

26-0111 Aku Drozi IZio ‘Buari Pini Amuro Nyakuari Beri

Mesegi (O’dukoti): 64-0802 ku Drozi IZio ‘Buari Pini Amuro Nyakuari Beri

BranhamTabernacle.org

Asialuza Mani Leleturi,

Ale mi tu. Emi za Za manirini ri i, fala Fala manirini ri i. Ata de nga Ma o’bani ‘bi’bio ki, mba, Ma wudrikuru nduluri kuria, Ma ne ndra mi ra azini Ma le ndra mi engazu ‘dasi. Ma ni dra ra mi ndra esele Maniri’i, Ma asialuza lu alu azini a’duleri’i. Mi ndra ma be ALU.

O’du mani enga te azini te engazu sawa ndra mani mi nezurisiri eca’di asizu ‘bo. Sawa ‘disi Ma mi omve azini eci tualu engazu etu ni efuria azini etu ni ‘deria, uruleru azini andraleru, O’duko Mani risi. Mi Ma egataki, M E’yoni, Ma Amurua, ovupi e’dazaruri.

Ma enga ovu avataza be mi dri afa Ma asiari luzu, ani Ma si ndra Eri Ma nabi pivusi azini Ma enga Eri ma ta mba mini eli alifu alifu. ‘Ba kakau laki Eri ra, azini a’iki Eri ra eli turu alipi’bo ‘diyi ma aleasi, te Ma mba afa karakara pi ma ta zizaru kpere EMINI ECA. Emi ‘BA Mani ngazu luzu riki.

Yi taki ndra avani afa dria onyiru Mani ndra ‘ba zizaru ‘diyiki nizu azini erizu, te Mani ndra azi emini rile, Ma enga te azini yi ma ta mba zizaru kpere sawa ‘disi, lu EMINI, MANI ALU AZINI A’DULERI’I.

Ma azi ndra emini ra Ma ta nga emu azini Ma ngulupi ece paleko alu dika ruati ‘bani alia, ani Ma ecota emi dri afa ‘diki lu azini ece dria beni. Ma le ndra emi ma eri O’DUKO MANI e’yo nzeria kpi emi dri.

Ma osu odu ‘ba azi kakauni pi ma dria ra Ma Orindi Alatararuri si emi dri ale Maniri aluzu, te kile mani adri sawa dria ‘yelerile, azini Ma econi ojaaku, Ma pe ndra agu aluni: Ma malaika, Ma nabi i, ovuzu O’duko Maniru ani Ma ecota ‘Di Opi ‘Yoniri ‘yo emini beni.

Ma le ndra lu emi dri, emi ndra pazaru o’du azi ‘dile ‘dilenisi ku. Emi ndra sawa driasi pazaru. Ma emu lu vule emi onzezu. Emi ndra pazaru engazu okokelesi a’disikuni emi ovu ndra Idri ‘Dani’daniri be e’dozu ria. Ani, mile Mania, ezata emini driari ecoki ata ku ovuzu nezaru Mani, afa lu alu Mani eriri o’duko eminiri. Ma lu afa emi pariari ne i.

Geri Mani ovuzu avabe emini afa kakauki luzuri. Ma asini egbu dika dika ayikosi. Geri Mani ovuzu avabe ama Ondre ta Oku bizanirini, ama eli alifu ali tualu angu nyaza eli alifu aliari siri. E’yo luzu emi dri aliru ama Aku Drozi tualuri ama dria; Geri Mani afa dria otuzu mini, afa dria be mini lelerileri.

Ma asialuza la, mi ka ega eri onyiru tu sawa ‘disi O’duko maniri erizu e’yo nzeria midri ria, mi te lu nga, ‘di nga lu endrilendri afa mupi ovupi sawa amani nga aazu tualu Aku ambo ‘da ma aliari niri’i. Nabi miniri ni nga ovu jo ejeleni mi be; eri nga ovu mi jo ejeleni.

Ama nga aci nzila meleru ‘da pi driasi azini mvu engazu a’divu tualu. Ama nga mu paradisi Munguniri alia Malaika pie ongaria nyaku dria, ongo karini ngoria….O’du ‘dani nga ovu ngole ya!

Ma nira geri nde e’da yengerekeru, azini aziria eri eca kongolokoru tu emi dri, te eri nga ovu wereru tu, werea tu, sawa nga Amani ovuzu ama alu alu be risi.

Sawa ‘disiria, Ma mu pale alu dika emi etra azini e’yo nze emini Sabatu ‘disi Sawa azia etusi (12pm), Jeffersonvili saa si, (8pm Ugandaa), ani e’yo luzu emini “Aku Drozi IZio ‘Buari Pini Amuro Nyakuari Beri” ma dria. Ma econi tezuku ovuzu ecizaru tualu emi ‘dasi.

Emi egara, azini avi aluniku, Ale mi tu.

Eri ma paria,

Adri. Joseph Branham i

E’yo Sizaki:
E’yo Ba Matayoni 19:28
E’yo Ba Yohanani 14: 1-3
Efeso 1:10
2 Petero 2:5-6 / Chapta 3 zuri
E’yo Eceza 2:7 / 6:14 / 21:1-14
‘Ba Levini 23:36
Isaya Chapta 4 zuri / 28:10 / 65:17-25
Malaki 3:6

Uncategorized

25-1221 Muzu Angu Hema Asozuri Ma Drileari

Mesegi (O’dukoti): 64-0719E Muzu Angu Hema Asozuri Ma Drileari

BranhamTabernacle.org

Leletu Leleturiri,

Mungu ojaniru ku. Eri ma E’yo ojaniru ku. Eri ma otita ojaniru ku. Ani Eri ma Amuro ojaniru ku, ama nga oa E’yo be. Eri idri ma drilea amaniria; Eri a’di Yi Idriniri niri’i.

Afa lu alu amani ovuzu azizaru ‘yezaruri lu E’yo, ovupi O’duko Munguni ecezaru ovupi o’duko ‘duzaru azini ‘bazaru tepupi ma driari erizuri. Afa lu a’dule amani ne ri ovuni a’izaniku, ovuni ongulumu agupi piniki ku, ane afa azi nduniku te lu Yesu’i, azini Eri E’yo ovupi ‘bazaru ruati alia o’du amani aliari’i.

Mungu ni Angurutrazu amaniri alia azini ama geri amania muria Dizaa dricezaru Aci Pirirurisi, ovuni Mungu ma Ngulupi’i e’yo nzeria trai ima nabi Malaki 4 vurisi ri’i. Ama Mana zizaru ‘da nyaria, Yi Idriru Amuro lu eco nyani ‘da’i.

Mungu ojani geri Iniriki ku, azini sitani ojani vini iniriku indi. Afa ndra erini ‘ye eli 2000 vule ‘dari, eri afa aluri ‘yeria andru, pelu di erivuri eca’di onduabe agara.

Sawa ‘disi, eli turu su vutia, Mungu aci ndra kpi yi ma eselea o’du alu. E’yo sizasiria, le ndra Eri ma ofu ruatiru azini ma oa yi ma eselea. “Eri ma Ru nga ovu ‘Ba E’yo amapi i, Opi mva Asianzuniri, Mungu Okpoe’i i, Ata ‘Dani’daniri.” Ani sawa Erini ndra emuzu ‘ba pi ma eseleri si, yi ‘yo ndra, “Acani nga fe Agu ‘dini opi nyazu ama dria ku!…”

E’yo Sizasiria, Mvi ‘Bani ni ta nga omu palaa alu dika ani Ima ngulupi ecezu ruati alia, ani Eri ‘ye ra, ani ‘baki afa aluri ‘yo. Adaru, yi O’dukoti olu azini eseleni ela, te yi ngani fe agu ‘dani yi ma drice ku.

‘Di lu ko’bo afa ru’yepiri’i.

Ani kile erini nda ovuzu ‘dale, eri vini ‘dinile sawa ‘disi! Bibilia ‘yo kanisa Lodokianiri ni ta nga Eri ‘ba amveleru ‘dini, azini Eri ndra kporia, o’biria efiria aa. Afa azi onzini ci angu azia. Sawa ‘disi, a’dusi? Yi ovu ndra pari yini ru trazu yisini be.

Agu azi eco ‘yo ra, “Ma nira azini a’ira Adripi Branhamni ndra nabini. Eri ndra malaika azirizuri. Eri ndra Eliya i. Ama a’iki O’dukoti ‘di ra. Ani di rutrata azi fe, tro eri a’duni yari ti, ani O’duko Munguni LU ovupi e’dazaru a’duleri avizuku kanisa yini pi alia…Afa azi onzini ci angu azia. Sawa ‘disi, a’dusi? Yi ovu ndra pari yini ru trazu yisini be.

Ma afa ‘diki ‘yo ovuni kanisa awazuku, E’yo Mungunini ‘da ‘yeni. Ale ama ma ecikiru tualu, ovuki AFA ALUNI ama alu alu be azini Eri be, te geri lu alu ‘da ‘yezu: ara O’duko Munguni tepu pi ma driari ma agayia. ‘Da Mungu ma ‘DI OPI ‘YONI LU ALURI’I.

Mungu ece Ima geri kililiruri amani ‘bo. Eri dizaru tu te ewakokoru. O’dukoti alualu ama Eri eri luria amani, amani asimba fezu, amani ava fezu, kini AMA ERI MA AMURO’I. Ama Eri ma ale kililiruri alia. A’baki ama ngulupi ngonde ‘bo ERI ERIZURISI.

O’dukoti ‘dini saa dria aga gazeti drusiri vuri ra. Ama e’yo ondriza pari ‘dupi riki. Ama E’yo ovupi e’dazaruri ki. Munguni e’da amani O’dukoti alu alu amani eririsi kini o’du ‘disi, E’yo Siza ‘dini eceria ima paria.

Azi ‘diyi ecoki ‘do ovu indi suru ‘di alesi, wudukurusi ara, tepu ‘dini muzu drifuzu eyi be aku yini aa kaniku kanisa yinia riki. Ama ta zi Opi, kini inzitani muria drile, pari-pari…kaniku tepu ni ovuzu avizuria, kaniku ama tro pari ngoleri alia to, kaniku-kaniku oaza ngoleria ti, Mungu amboru ‘Buniri ma ru asikai ama asi piniri o’buti ‘disi fo, azini ‘ba azakoma lepiriki atizu, mi fe yi afa ci yini ava ta ri fo.

Mi te nga were…O’duko Munguniri ondri azini ‘yo nga lu ngoni?…‘baki ta nga tepu ki avi yi ma akua kaniku kanisa pi alia.

Te ama onzozaru azini trezaru ‘yozu ama ECOKINIKU ovuzu Kanisa Tepuni Akuari pie risi? Adripi Branham awini ndra ‘yo tepu ki avizu emi KANISA pi alia kurisi?

DIZA MUNGU VU, MI ERI ERI, MI LA ERI, ERI ‘DI OPI ‘YONI. Ani ERI ‘yo lu eri a’dule ku, te eri tepuki avizu aku azini kanisa eminiari si, Mungu amboru ‘Buniri ni nga ruta fe asi adaru eminiri pi dri azini ‘ba avataza alia ‘diyi ati azini ama dri AFACI AMANI OVUZU AVABERIKI fe!!

Esele alu ‘dini ECE ‘baki yi ma ocepi ki eri ani OVUKINI E’YO ERIRIA KU, kaniku yi ta aguti oti yi be azini ece yi dri E’YO vusi ama ERI MA ALE KILILIRURI alia, azini eri Eri ma ALE KILILIRURI ALIA TEPUKI AVIZU YI MA KANISA PI ALIA.

Ovuni ma E’yo ‘ba pari onzia kani la onzi kile ‘ba kakau pini ‘yo ma ‘yerile ku. Mi eri Eri azini la Eri mima ngulupini.

Eri ewakokoru azini kililiru tu, mi EKPA AVIZURI ani mi eri O’duko Munguniri e’yo nzeria mi ni. “Amena” ‘yozu E’yo dria mini eriri ni. Leni mini Eri vazuvavaku, mi ma a’ilu Eri i.

“Ma le mu amveleru engazu angu okuta vurisi. Ajeni tro ovu mani a’duni yari ti, ma nga pati alaza maniri mati ta o’du dria. Ma nga mu pari ruokuzuri ma drilea. Tro ‘ba ‘yoki ma dria ngoni yari ti, ma le Eri ma vuti be amve pari ruokuzuriasi. Ma ngonde muzu.”

Mi emu ani muzu pure a’buta yikiyiniria si fizu E’yo Munguni alea amabe Sabatu ‘disi sawa 12pm, Jeffersonvili saa si. Eri asizakokoru afa Mungu eco azini nga ‘ye agu azi ovupi ngonde muzu pure angu okutani agupipini riasiri be.

Adri. Joseph Branham i

O’dukoti: 64-0719E Muzu Pure Angu Rutrazuri Ma Drilea.

E’yo Sizaki: Ebrania 13:10-14/ Matayo 17:4-8