Angu Za o’dirurini ovuria, ‘daa Amuro ni nga ovu etrazaru tualu. Ani amaniria, pari kililiruri lu efi alu amani ecozu Mana za o’diruri nyazuri: avizuri ekpazu azini O’duko Munguni tepu pi ma driari erizurisi.
Mi ma nze e’yo Mana O’DIRU dria, ama ecoki ata e’do ega ama ovuki ama drianzi pi ma aa a’dube yari ra? O’duko Munguni mgbari e’yo nzeria Ima Amuro leleturi dri tepu ma dria, pari ‘bani e’yo abazuku, osuzuku, e’yo zizu kani ku abazani ovuzuku kini afa amani eri ri Mungu i, o’duko ‘ba adaniri ayuria, ‘Dini Opi ‘Yoni ‘yozu I ma Amuro driri i ri.
E’yo Ecezasi, ama a’ikira Eri pari LU amani ecozu muzu azini ava liza fezu ama idri pi dri kini E’yo amani eri ‘diyi ovuni agu azi ma e’yokiku, vini eri ma e’yo efi ecezani ku kani egata o’bale Eri vuri i ku, te Eri E’yo adaru Munguni e’yo nzepi ama aji werearuri pivu, Ima E’yo eceriari i ri.
Ama ticita ‘ye E’yo ma ageyia ara. Ama Eri ma E’yo la ama Bibilia pi alia. Ama vini agu Munguni ‘ba azini omveni gazaru tre Eri ma Orindi Alatararurisi ‘diyi eri, o’dukoti elese ela azini E’yo Munguniri olu, te o’du amani alia, Mungu fe pari azi ra amani ecozu Ero ma E’YO ‘YOZARU KILILIRURI erivuri, avizuri ekpazu risi.
Ata fe vini Ima Amuroni drileba ra zita ndra ovupi ama asiariki zizu ani ama ecokita ovu omvita kililiruri be beni:
Sitani eco feta andreni kani e’yo ondrizani ‘ba azi ovupi Orindi Alatararuri beri niri ayu ra?
E’yo Yesu ni ndra ‘yo Matayo 12, vasi 32 ma efi ngoni?
Kirikiri mi eci Koronito Okori 13:8-12 ni.
Oku ovuki aizaru azi ngazu offisi o’biniri pi alia ra ya yi ka ovu agupi azini anzi ruaalabe pie ria?
Eri onzi oku ni i ma dribi ombezu?
Mungu efe geri treki Ima Amuroni asindriza azini okpo fezu, te pari lu efi alu Erini fe Ima Amuroni ecozu ovuzu 100% asimba be kini eyi ERI MA E’YO KILILIRU eririari. Yi A’di Idriru alu Ajinyiri pini ecozu muzu vunia angu ecota ondi azi cini vuri ni ovuzu ku ria. MI EKPA AVIZURI.
Ma emi ai emuzu mvuzu engazu A’di ‘davu Sabatu ‘disi sawa azia etusi Jeffersonvili (8Pm Ugandaa), amani muzu ‘di erizuri 64-0823E “Zitaki Azini Omvitaki #2.”
Ale mi tu. Emi za Za manirini ri i, fala Fala manirini ri i. Ata de nga Ma o’bani ‘bi’bio ki, mba, Ma wudrikuru nduluri kuria, Ma ne ndra mi ra azini Ma le ndra mi engazu ‘dasi. Ma ni dra ra mi ndra esele Maniri’i, Ma asialuza lu alu azini a’duleri’i. Mi ndra ma be ALU.
O’du mani enga te azini te engazu sawa ndra mani mi nezurisiri eca’di asizu ‘bo. Sawa ‘disi Ma mi omve azini eci tualu engazu etu ni efuria azini etu ni ‘deria, uruleru azini andraleru, O’duko Mani risi. Mi Ma egataki, M E’yoni, Ma Amurua, ovupi e’dazaruri.
Ma enga ovu avataza be mi dri afa Ma asiari luzu, ani Ma si ndra Eri Ma nabi pivusi azini Ma enga Eri ma ta mba mini eli alifu alifu. ‘Ba kakau laki Eri ra, azini a’iki Eri ra eli turu alipi’bo ‘diyi ma aleasi, te Ma mba afa karakara pi ma ta zizaru kpere EMINI ECA. Emi ‘BA Mani ngazu luzu riki.
Yi taki ndra avani afa dria onyiru Mani ndra ‘ba zizaru ‘diyiki nizu azini erizu, te Mani ndra azi emini rile, Ma enga te azini yi ma ta mba zizaru kpere sawa ‘disi, lu EMINI, MANI ALU AZINI A’DULERI’I.
Ma azi ndra emini ra Ma ta nga emu azini Ma ngulupi ece paleko alu dika ruati ‘bani alia, ani Ma ecota emi dri afa ‘diki lu azini ece dria beni. Ma le ndra emi ma eri O’DUKO MANI e’yo nzeria kpi emi dri.
Ma osu odu ‘ba azi kakauni pi ma dria ra Ma Orindi Alatararuri si emi dri ale Maniri aluzu, te kile mani adri sawa dria ‘yelerile, azini Ma econi ojaaku, Ma pe ndra agu aluni: Ma malaika, Ma nabi i, ovuzu O’duko Maniru ani Ma ecota ‘Di Opi ‘Yoniri ‘yo emini beni.
Ma le ndra lu emi dri, emi ndra pazaru o’du azi ‘dile ‘dilenisi ku. Emi ndra sawa driasi pazaru. Ma emu lu vule emi onzezu. Emi ndra pazaru engazu okokelesi a’disikuni emi ovu ndra Idri ‘Dani’daniri be e’dozu ria. Ani, mile Mania, ezata emini driari ecoki ata ku ovuzu nezaru Mani, afa lu alu Mani eriri o’duko eminiri. Ma lu afa emi pariari ne i.
Geri Mani ovuzu avabe emini afa kakauki luzuri. Ma asini egbu dika dika ayikosi. Geri Mani ovuzu avabe ama Ondre ta Oku bizanirini, ama eli alifu ali tualu angu nyaza eli alifu aliari siri. E’yo luzu emi dri aliru ama Aku Drozi tualuri ama dria; Geri Mani afa dria otuzu mini, afa dria be mini lelerileri.
Ma asialuza la, mi ka ega eri onyiru tu sawa ‘disi O’duko maniri erizu e’yo nzeria midri ria, mi te lu nga, ‘di nga lu endrilendri afa mupi ovupi sawa amani nga aazu tualu Aku ambo ‘da ma aliari niri’i. Nabi miniri ni nga ovu jo ejeleni mi be; eri nga ovu mi jo ejeleni.
Ama nga aci nzila meleru ‘da pi driasi azini mvu engazu a’divu tualu. Ama nga mu paradisi Munguniri alia Malaika pie ongaria nyaku dria, ongo karini ngoria….O’du ‘dani nga ovu ngole ya!
Ma nira geri nde e’da yengerekeru, azini aziria eri eca kongolokoru tu emi dri, te eri nga ovu wereru tu, werea tu, sawa nga Amani ovuzu ama alu alu be risi.
Sawa ‘disiria, Ma mu pale alu dika emi etra azini e’yo nze emini Sabatu ‘disi Sawa azia etusi (12pm), Jeffersonvili saa si, (8pm Ugandaa), ani e’yo luzu emini “Aku Drozi IZio ‘Buari Pini Amuro Nyakuari Beri” ma dria. Ma econi tezuku ovuzu ecizaru tualu emi ‘dasi.
Emi egara, azini avi aluniku, Ale mi tu.
Eri ma paria,
Adri. Joseph Branham i
E’yo Sizaki: E’yo Ba Matayoni 19:28 E’yo Ba Yohanani 14: 1-3 Efeso 1:10 2 Petero 2:5-6 / Chapta 3 zuri E’yo Eceza 2:7 / 6:14 / 21:1-14 ‘Ba Levini 23:36 Isaya Chapta 4 zuri / 28:10 / 65:17-25 Malaki 3:6
Mungu ojaniru ku. Eri ma E’yo ojaniru ku. Eri ma otita ojaniru ku. Ani Eri ma Amuro ojaniru ku, ama nga oa E’yo be. Eri idri ma drilea amaniria; Eri a’di Yi Idriniri niri’i.
Afa lu alu amani ovuzu azizaru ‘yezaruri lu E’yo, ovupi O’duko Munguni ecezaru ovupi o’duko ‘duzaru azini ‘bazaru tepupi ma driari erizuri. Afa lu a’dule amani ne ri ovuni a’izaniku, ovuni ongulumu agupi piniki ku, ane afa azi nduniku te lu Yesu’i, azini Eri E’yo ovupi ‘bazaru ruati alia o’du amani aliari’i.
Mungu ni Angurutrazu amaniri alia azini ama geri amania muria Dizaa dricezaru Aci Pirirurisi, ovuni Mungu ma Ngulupi’i e’yo nzeria trai ima nabi Malaki 4 vurisi ri’i. Ama Mana zizaru ‘da nyaria, Yi Idriru Amuro lu eco nyani ‘da’i.
Mungu ojani geri Iniriki ku, azini sitani ojani vini iniriku indi. Afa ndra erini ‘ye eli 2000 vule ‘dari, eri afa aluri ‘yeria andru, pelu di erivuri eca’di onduabe agara.
Sawa ‘disi, eli turu su vutia, Mungu aci ndra kpi yi ma eselea o’du alu. E’yo sizasiria, le ndra Eri ma ofu ruatiru azini ma oa yi ma eselea. “Eri ma Ru nga ovu ‘Ba E’yo amapi i, Opi mva Asianzuniri, Mungu Okpoe’i i, Ata ‘Dani’daniri.” Ani sawa Erini ndra emuzu ‘ba pi ma eseleri si, yi ‘yo ndra, “Acani nga fe Agu ‘dini opi nyazu ama dria ku!…”
E’yo Sizasiria, Mvi ‘Bani ni ta nga omu palaa alu dika ani Ima ngulupi ecezu ruati alia, ani Eri ‘ye ra, ani ‘baki afa aluri ‘yo. Adaru, yi O’dukoti olu azini eseleni ela, te yi ngani fe agu ‘dani yi ma drice ku.
‘Di lu ko’bo afa ru’yepiri’i.
Ani kile erini nda ovuzu ‘dale, eri vini ‘dinile sawa ‘disi! Bibilia ‘yo kanisa Lodokianiri ni ta nga Eri ‘ba amveleru ‘dini, azini Eri ndra kporia, o’biria efiria aa. Afa azi onzini ci angu azia. Sawa ‘disi, a’dusi? Yi ovu ndra pari yini ru trazu yisini be.
Agu azi eco ‘yo ra, “Ma nira azini a’ira Adripi Branhamni ndra nabini. Eri ndra malaika azirizuri. Eri ndra Eliya i. Ama a’iki O’dukoti ‘di ra. Ani di rutrata azi fe, tro eri a’duni yari ti, ani O’duko Munguni LU ovupi e’dazaru a’duleri avizuku kanisa yini pi alia…Afa azi onzini ci angu azia. Sawa ‘disi, a’dusi? Yi ovu ndra pari yini ru trazu yisini be.
Ma afa ‘diki ‘yo ovuni kanisa awazuku, E’yo Mungunini ‘da ‘yeni. Ale ama ma ecikiru tualu, ovuki AFA ALUNI ama alu alu be azini Eri be, te geri lu alu ‘da ‘yezu: ara O’duko Munguni tepu pi ma driari ma agayia. ‘Da Mungu ma ‘DI OPI ‘YONI LU ALURI’I.
Mungu ece Ima geri kililiruri amani ‘bo. Eri dizaru tu te ewakokoru. O’dukoti alualu ama Eri eri luria amani, amani asimba fezu, amani ava fezu, kini AMA ERI MA AMURO’I. Ama Eri ma ale kililiruri alia. A’baki ama ngulupi ngonde ‘bo ERI ERIZURISI.
O’dukoti ‘dini saa dria aga gazeti drusiri vuri ra. Ama e’yo ondriza pari ‘dupi riki. Ama E’yo ovupi e’dazaruri ki. Munguni e’da amani O’dukoti alu alu amani eririsi kini o’du ‘disi, E’yo Siza ‘dini eceria ima paria.
Azi ‘diyi ecoki ‘do ovu indi suru ‘di alesi, wudukurusi ara, tepu ‘dini muzu drifuzu eyi be aku yini aa kaniku kanisa yinia riki. Ama ta zi Opi, kini inzitani muria drile, pari-pari…kaniku tepu ni ovuzu avizuria, kaniku ama tro pari ngoleri alia to, kaniku-kaniku oaza ngoleria ti, Mungu amboru ‘Buniri ma ru asikai ama asi piniri o’buti ‘disi fo, azini ‘ba azakoma lepiriki atizu, mi fe yi afa ci yini ava ta ri fo.
Mi te nga were…O’duko Munguniri ondri azini ‘yo nga lu ngoni?…‘baki ta nga tepu ki avi yi ma akua kaniku kanisa pi alia.
Te ama onzozaru azini trezaru ‘yozu ama ECOKINIKU ovuzu Kanisa Tepuni Akuari pie risi? Adripi Branham awini ndra ‘yo tepu ki avizu emi KANISA pi alia kurisi?
DIZA MUNGU VU, MI ERI ERI, MI LA ERI, ERI ‘DI OPI ‘YONI. Ani ERI ‘yo lu eri a’dule ku, te eri tepuki avizu aku azini kanisa eminiari si, Mungu amboru ‘Buniri ni nga ruta fe asi adaru eminiri pi dri azini ‘ba avataza alia ‘diyi ati azini ama dri AFACI AMANI OVUZU AVABERIKI fe!!
Esele alu ‘dini ECE ‘baki yi ma ocepi ki eri ani OVUKINI E’YO ERIRIA KU, kaniku yi ta aguti oti yi be azini ece yi dri E’YO vusi ama ERI MA ALE KILILIRURI alia, azini eri Eri ma ALE KILILIRURI ALIA TEPUKI AVIZU YI MA KANISA PI ALIA.
Ovuni ma E’yo ‘ba pari onzia kani la onzi kile ‘ba kakau pini ‘yo ma ‘yerile ku. Mi eri Eri azini la Eri mima ngulupini.
Eri ewakokoru azini kililiru tu, mi EKPA AVIZURI ani mi eri O’duko Munguniri e’yo nzeria mi ni. “Amena” ‘yozu E’yo dria mini eriri ni. Leni mini Eri vazuvavaku, mi ma a’ilu Eri i.
“Ma le mu amveleru engazu angu okuta vurisi. Ajeni tro ovu mani a’duni yari ti, ma nga pati alaza maniri mati ta o’du dria. Ma nga mu pari ruokuzuri ma drilea. Tro ‘ba ‘yoki ma dria ngoni yari ti, ma le Eri ma vuti be amve pari ruokuzuriasi. Ma ngonde muzu.”
Mi emu ani muzu pure a’buta yikiyiniria si fizu E’yo Munguni alea amabe Sabatu ‘disi sawa 12pm, Jeffersonvili saa si. Eri asizakokoru afa Mungu eco azini nga ‘ye agu azi ovupi ngonde muzu pure angu okutani agupipini riasiri be.
Adri. Joseph Branham i
O’dukoti: 64-0719E Muzu Pure Angu Rutrazuri Ma Drilea.
‘Di ovuni lu afaazi ‘baa’bani ku, agyipi. ‘Di ‘DI OPI YONI NI, E’yo Sizani.
Kristiani dria le ovuzu Amuroni, te anikira Eri ma Amuro bi nga ovu ‘ba azi wereru pezaru niki. Anikira Eri ovu ale titatari be, te le Eri ma Amuro ma ovu Eri ma ale kililiruri alea. Ani, le ama ma ndruki Munguni E’yo Erini alia, azini di E’yo Ecezasi, ama nga Eri ma ale kililiru geri ecazu Eri ma Amuroruri niri ni ra.
Le ama ma onda E’yo Siza, a’disiku anikira Mungu ojani Ima omi Ima E’yo ma dria TUAKU. Mungu ojani otita Iniri tuaku. Eri ojani AFA AZI cini ku. Geri Erini eri ‘yezu paale okori ni kililiru. Afa Erini ‘ye ajeri Eri nga ‘ye alurile andru.
Geri Erini ndra ‘ba pazu okokeleri, le Eri ma pa ‘ba azi andrusi geri alurisi. Geri Erini agu okori atizuri, le Eri ma ‘ye andrusi geri alurisi. Geri Munguni ndra pe Ima Amuro omvezu azini dricezuri, Eri nga eri ‘ye geri alurisi andru; a’disiku Eri Mungu i azini cani ruoja ku. E’yoni luria amani kini Yesu Kristo ALURILE aje, andru azini ‘dani ‘dani.
Ani, amani Eri ma E’yo laria, ama ecoki nditiriru nera Eri Ima Amuroni omve azini drice ayi alu alusi ngoni yari. Eri pe ndra AGIPU ALUNI. Eri ‘yo kini yi ndra E’yoni o’du yiniri pini. Nabi lu ndra amani Eri ovuni ndra ongulumu azi agupini ni be TUAKU; yi ovuki geri ndundu pie, egata ndundu pie, azini orodriru ndeni, Eri ‘yo ndra MUNGU MA E’YO LENI E’YO EFI ECEZA KU.
Ani, afa nabi alu aluni ‘yo ayi alu alusiri cani ovuzu o’bazaru drinia kaniku ‘duzaru engazu eri vusi ku. Le ma ovu E’yo vusi E’yo vusi afa ERINI NDRA ‘YORI I. Ewakokoru tu mi ka ma zi Mungu ma geri feri a’duni yari….MI OA NABI BE.
Sawa ‘disi, aniki lu ko’boru Mungu ma geri fe ndra engazu okokelesiri a’duni yari a’dule ku, te Opi nga vini e’yo nze trai Ima malaika vusi ani afa Ini mu ‘ye drile ‘dileri lu amani, lu ecezu pale ku dika, MUNGU OJANI OTITA INIRI KU.
Eri ma Amuro (ama) ni nyaku ‘di kuzu’bo azini omvezaru Ondre Ta Oku bizaniri ma vutia, Munguni mu Yahudi opezaru 144,000 riki omve ngoni ru? Ongulumu azi agupi pini ni?
Sawa ‘disi, coti coti Kanisa (Amuro) ‘di ka ovu esezaru tualu ‘bo, Eri nga ovu ‘duzaru uru; ani e’yo zizaru A’buza Azirizu rini ‘da, troni A’buza Aziriri, e’yo nileku muzuri niri. Azini Yahudi ki ovu omvezaru e’yo nileku Guka Azirizuri nirisi, ovupi nabi iri riki ri, Eliya ki Musa be, ani yi emu vule.
Coti coti Amuro ka ovu esezaru tualu ‘bo, ama nga ovu ‘duzaru uru. Anikira afa ecopi Amuroni esepi tualuri lu alu, Orindi Alatararuri’i, azini Orindi Alatararuri ni E’yo Eriniri, azini Eri ma E’yo andruniri ni O’duko Munguniri, azini O’duko Munguniri ni…
Ma ka mi asi eza ‘da ‘yozu risi yani, mi tru ma ra, te ma amata kini ‘da ni ta mu ovu gazarusi, te Ma O’duko Munguniri’i emi dri. Enera? Ma ‘da ‘yo dika, ‘da ta avavuza ma alia, enera.
Ma ma efi nda lu kpi ‘dia ani ‘yozu, lu ESELE ‘YOZA ALU engazu Mungu ma ‘ba o’dukoti ojipi e’dazarurari vu ‘di le ma cara fezu ‘ba dria yi omvepi a’i’ba O’dukoti sawa asizani alia ‘diniri ma aliari pini ‘yozu ocepi yiniri pini AVIZURI EKPAZU kanisa yini pi alia kanisiku rusezu kala ani yi eco ocepi ovupi E’YO ECEZA ADARU ENGAZU MUNGU VURI be ci ri pezu.
Ani, Guka nde wu ra ani nabi nde iriri ki di emu Erini ecozu ovuzu Ima malaika azirizuri be azini Ima Amuro be nyakua ‘dia sawa alluri alia yini emuzurisi ku risi. Ani Eri Yahudi ki omve ngoniru? Geri alu alu Erini Ima Amuro Jurururi omvezuri si.
Azini Yahudi ki ovu omvezaru e’yo zizaru Guka Azirizurini risi, ovupi nabi iriri kiri…
Le Amuro ma se i geriasi te, muzu uru sawa ‘disi; ani ati’boo iri riki, ati’boo iri Munguni, E’yo Eceza alia, nabi iri ri, ecoki ovu e’dazaru angu dria beni, Guka Azirizuri vuzu yi dri, fezu Kristoni nizu yi dri.
Nditiri tu, Mungu ojani otita Iniri ku. Eri epe Ima nabi pi ma tini. Ani, Eri ma Amuro ni nga oa Eri ma geri feleri be, Eri ma nabi malaikaruri’i, O’duko Munguni tepu pi ma driari’i.
Ani di eri ‘bazu nditiriru agara, Munguni pale alu dika e’yo ‘yo azini luria Ima Amuro dri: Mi enga oa a’itasi Mavu azini Ma geri feleri vu, ani Ma geri fele o’du miniri niri ni nga ‘yo mi dri:
Ani orodrirutu ri O’DUKO ‘DA’I; O’DUKO MUNGUNI e’yo nzepi trai Ima malaika azirizuri vusi tepu pi dria ri’i. Mungu ni mu O’DUKO ‘DA ayu, O’DUKO ERI MA MALAIKA AZIRIZURI VURI. OVUNI ONGULUMU AZINIKU…MA’I KU…MI OCEPI’I KU…O’DUKO ERI MA ‘BA O’DUKOTI OJIPI MALAIKA AZIRIZURI ni mu ama e’da Eri, ama Opi Yesu Kristo ma ngulupini ni.
Ani, ANIKIRA:
• AMA ERI MA AMURO’I. • AMA ERI MA ALE KILILIRURI ALEA. • AMA ERI MA OTITA ANDRUNIRI MA VUTI BI AVIZURI EKPAZU RISI.
Esele azi Eri ma Amuroni ni nga ovu etrazaru Sabatu ‘disi sawa 12pm Jeffersonvili saa si (8pm Ugandaa) eriria ocepi amani, Mungu ma ‘ba o’dukoti ojipi malaikaru, William Marrion Branham vu, azini Eri nga mu e’yo nze azini ece amani kini kanisa azi nduni yo, ongulumu azi ‘bani nduni ‘yo engazu sawa wudrikuru ma vutini ndra ovuzu o’bazaru risi, ndra drio ovupi drileba amani ovuzuri be ovuzu ecizaru tualu Mungu ni eriria e’yo nzeria kpi yi vu ri.
Ama ‘ba asindrizaru niki ngole ya. Ama ayikosi tu. Ama awa’difosi tu. Amuro ni ecaria ALU Izio be.
Idri adaru dria ndra ovupi patia, fua azini jorovuari, ni di sawa ‘disi rutraria ama, Mungu ma Oriefi Opiru, Eri Ma Afa-Si-Ondoasi ‘diyi ma aa, azini yi di ovu ‘bazaru ngonde engatani, ngonde ovuzu okuzaru. Alfa eca di Omega i ‘bo. Okori eca’di asizuri i, azini asizuri eca di sawa ‘disi okori’i. Ama aga e’yo azi ma aliasi ‘bo azini ama eca di Eri ma Afa-Si-Ondoasiriki, esele kutu azi e’gbale engazu Eri vu niki.
Amurua ki Iziobe Alu!
Mungu e’da ndra Eri ma nabini ama alu alu, Eri ma Afa-Si-Ondoasi ‘diyi, ma e’data okoruri ra, e’yo neza azi alia. Erini ndra pasoria ‘daa Opi be neria Amuruani aliria eri ma drilearia,
Eri ne ndra ama alu alu ra. Ama DRIA ovuki ndra mile amaniri be ‘bazaru KPI ERI VU. Eri ‘yo ndra ama ‘ba e’dapi-aluzaru ndeni ini drio ne idri inia riki. Oli azi lu ndra ama dria ci. Ama e’daki ndra drinzaru erini.
Emi egara, ‘di ndra E’YO NEZA azi Amuruani ni i; Eri ndra ta e’da ngole yari, azini luria ama dri eri mgbaria a’du ‘ye yari. Emi eri enyia tiri.
Eri nga emu engazu suru dria pi aliasi, eri ndra Amuruani si. Eyi ma alu alu ovu ndra dribi ezu pie, azini rangi pie andretia ku, azini ezoanzi ndriza ‘dileni ki. Ani eyi ndra ama ne. ‘Da ece ndra Amurua emupi engazu suru dria aliasi ‘diyi. Enera? Oku nde, eyi ma alu aluri ece ndra suru azi ni, yini aciria kililiru layini alia E’yo be.
Amurua i, ma ‘yo nga ‘da dika, AMURUA I, engazu suru dria aliasi ovuki ndra mile yiniri pie yi ma ocepi ma dria, ongulumu azi agupi pinini ma dria…, YO, ‘da ovuni afa ndra erini ‘yori i ku. Yi ovuki ndra mile yiniri pie NABI MA DRIA, eri neria.
Okpori yi ‘baki lu ndra mile yiniri nabi ma dria, yi ndra aciria kililiru. Te ‘daa eri li ama bilendu ra, afa azi ‘du ndra pari ra. ‘Ba azi ‘diyi jaki mile engazu erivusi ra ani e’doki afa azi ndu mupi a’baza ma aliani ne i.
Ani, ‘di, le ma ga Oku nde orule ra. Eri nga pa ndu amve E’yo ‘da be ra ma ka oruleni ga kuria, sawa Oku ndeni alizurisi, Eri ka aliria. E’damani eri nga ovu sawa maniri, sawa mani rudezu’bo risi, enera, mani okoria’bo, kani tro a’duni yari ti risi.
Le eri ma ga Oku nde orule ra, kaniku Oku nde ni nga pa ‘du amve Erini aliria. Te ‘yo kini eco nga ovu sawa maniri’i, mani rudezu ‘boria, mani ovuria ‘dia kuria, Eyi eco nga pa ‘du kalasira Yini Yi ma mile ‘bazu eri ma dria kurisi.
Eri ndra bile ndu liza fe AMURUA dri, Le Emi ma ‘ba mile Emini riki O’duko Munguni tapu ma driari ma dria. ‘Da Mungu ma geri fe andruni ri’i. ‘Da O’duko mupi Amuruani etrapi azini ‘bapi kililiruri. Mi ka mile Mini riki ‘du bi pie kalaa O’duko ‘davusi te, Mi nga fu layiniasi amve ani fi abaza alia.
O’dukoti alu aluri ni ecaria ndititiru azini nditiriru aga ra. Eri Mungu okpoberi’i ovupi e’dazaru ama drileari’i, Mana zizaru amani lu eco nya i ri feria Ima Amurua dri Eri ma nyaka esele oru tu ‘ba azi ‘diyini, te Eri Nyaka Zizaruri’i Amurua dri.
Awa’difo feza Amurua ni ovuzu eriberi ngo’i, nyaria engazu E’yo vu, ecaria Eri ma Amurua E’yoru Afa-Si-Ondoasiri ru ri.
Pasoria a’dule, kile Iziole, “gazarusi agupi pivusi, mazaru fo azini gazaru kanisa pivusi.” Amurua ni paso geri ‘dasi. Eri a’duni? Eri Eri ma Afa-Si-Ondoasiri, enera, eri E’yo Erini ecozu azingazu trai vuniasiri’i ‘ba e’dazaru. Garia!
Mi emu ruecizu amabe Sabatusi 12pm Jeffersonvilli saasi, Munguni e’yo nzeria trai Ima malaika ambori vusi, azini ama liria azini gbaria ecazu Afa-Si-Ondoasi Munguniniri ru.
Adri. Joseph Branham i
O’dukoti: 64-0705 Afa Si-Ondoasiri
E’yo Siza lazaru inzita e’dokuriki: Isaya 53:1-12 Malaki 3:6 E’yo Ba Matayoni 24:24 E’yo Ba Marakoni 9:7 E’yo Yohanani 12:24/14:19
