Lahat na post ni admin5

21-1121 Pagkauhaw

Mensahe:65-0919 Pagkauhaw

PDF

BranhamTabernacle.org

Minamahal na Binibining Hirang,

Ang huling dakilang pag-iisa ay magaganap sa Pag-agaw. Tinitipon ng Espiritu Santo ang Kanyang Nobya mula sa iba’t ibang sulok ng bansa; mula sa Kanlurang Baybayin hanggang sa Silangang Baybayin, mula sa Norte hanggang sa Timog, mula sa apat na sulok ng mundo.

Kanyang tinitipon tayo sa ating mga simbahan at sa ating mga tahanan sa pamamagitan ng mas mainam na wave. Mas mainam pa nga sa pagsasahimpapawid. Ito’y hook-up ng telepono. Naglalagay tayo ng receiver o mikropono, o anuman ito, sa silid, at ito’y katulad mismo na naroon ka sa loob ng silid kasama ang Kanyang propeta. Ito’y inilaang daan ng Diyos para sa panahon na ito para paglakipin at dalhin ang Kanyang Nobya na magsama-sama sa, “Ganito Ang Sabi Ng Panginoon”.

Limampu’t anim na taon ang nakararaan, sinimulan ng Diyos ang Kanyang programa para tipunin ang Kanyang Nobya para makapakinig sila sa Kanya na nangungusap sa pamamagitan ng Kanyang malakas na anghel nang sabay. Ibinunsod Niya ang Kanyang five-fold ministry na huminto muna sa pagmi-ministeryo at tipunin ang kanilang mga miyembro na magsama-sama, at i-setup ang hookup sa kanilang mga simbahan, dahil nais Niya na ang Kanyang Nobya’y makapakinig sa Kanyang Tinig nang sabay. Ang Kanyang dakilang plano’y nagsimula. Hindi ’yun naging posible sa nakaraang kasaysayan ng mundo. Alam ’yun ng Kanyang propeta at ikinatuwa ’yun nang lubos. Ngayon ang Diyos ay  direktang nakakapangusap na sa lahat na Kanyang Nobya nang sabay din. Lahat sila’y makapapakinig sa sarili nila, sa Diyos na nakakapangusap nang direkta sa kanila, at di na ’yun mangangailangan pa ng pagpapaliwanag.

Ngayon, ang mundo ay namamangha. Bakit ang mga tao mula sa buong palibot ng mundo, sa iba’t ibang time zone; 12:00 P.M., 2:00 P.M., 8:00 P.M., hatinggabi, ay nagtitipon nang sabay-sabay para makapakinig ng Mensahe na maaari naman nilang pakinggan anumang oras. Ano kaya ang hatak na humihila sa kanila?

Nahayag sa kanila na ito ang programa ng Diyos, ang inilaang daan ng Diyos para paglakipin sila sa espirituwal. Ito’y paghahanda mismo ng Diyos para makapangusap sa lahat na Kanyang Nobya nang sabay-sabay.

WALANG IBA kundi Tinig ng Diyos, Kanyang Salita, ang Mensahe na ito, na binigkas ng Kanyang propeta ang makagagawa nito. Walang sinuman, walang anumang ibang bagay, na ang lahat ng Nobya’y makasasang-ayon.

May magsasabi marahil, “Nakikinig naman ako sa aking pastor habang sinisipi niya at ipinapangaral ang Salita gaya ng sinabi ni Kapatid na Branham na gawin.” Purihin ang Panginoon. Napakainam n’yan at kayo’y pinagpala na magkaroon ng isang pastor na nananatili sa Salita. Siya ay tinawag para panatilihing sama-sama ang kawan at bigyan kayo at ituro kayo sa Salita, pero hindi ito ang tinutukoy ko. Kinakailangan n’yong magkaroon ng isang Pinagsasaligan, ang sukdulang pinagsasaligan na Salita. Mga Salita na LAHAT TAYO’Y MAKASASANG-AYON. Yamang tinawag at pinahiran ang isang tao, walang salita ng tao ang ganap, at walang pagmiministeryo ng sinumang tao ang makapag-iisa sa Nobya.

“Ideya mo lang ’yan at opinyon. Patunayan mo sa pamamagitan ng Salita, Brother Joseph.”

Dahil kung dalawang tao ’yan na mayroon kayo, dalawang opinyon ’yan na makukuha n’yo. At mangyaring kinakailangan talagang tumugaygay sa isa’t sukdulang pinagsasaligan, at ang pinaka saligan ko ay ang Salita, ang Biblia. At bilang isa pong pastor dito ng iglesya, ang pinaka saligan ko ay ang Salita, at gusto kong…Alam ko na kayo, na mga kapatiran natin, kayo nga’y tumitingala sa akin bilang inyong pinaka saligan sa anumang bagay…haya’t basta tumutulad ako sa Diyos gaya ng sinabi ni Pablo sa Kasulatan, “Tumulad kayo sa akin, gaya ko naman na tumutulad kay Cristo.”

Kaya, kapag ang propeta’y nagsasalita, ’yun ang Pinakasaligan para sa Nobya. Ang Kanyang Mensahe’y hindi niya salita, ni ang kanyang interpretasyon ng Salita. Ang Diyos ito na ibinibigay ang interpretasyon ng Kanyang Sariling Salita sa pamamagitan ng Kanyang tanging inilaang paraan ng paggawa: sa pamamagitan ng Kanyang propeta.

Kung sinasabi mo na sumasampalataya ka sa Mensaheng ito. Kung sinasabi mo na sinasampalatayanan mo ang sipi na ito. Kung sinasabi at sinasamplatayanan mo na ikaw ay Nobya ni Cristo, kung ganoon ang bagay na sinalita mismo sa teyp ay marapat lamang na iyong Pinakasaligan.

Kaya, anong makapaglalakip sa lahat na Nobya ni Cristo kundi ang ating Pinakasaligan?WALA. Ang mga teyp ang Kanyang Tinig, Kanyang Salita, ang Ating Pinakasaligan. Sinabi sa atin ng propeta na ang propeta para sa panahon ngayon ay ang Espiritu Santo. Ang Espiritu Santo’y pumili ng ISANG tao, ISANG Tinig para ihayag ang Kanyang Salita at ang Tinig na ’yun ay lumalakip sa Kanyang Nobya sa pamamagitan ng Kanyang inilaang daan sa panahon ngayon, SA PAMAMAGITAN NG PAGPINDOT SA PLAY.

Pinagsisikapan kong lubos na manatiling tama sa Salita, para dito sa mga inilagay sa mga kamay ko para sa Diyos, sapagkat nais ng mga tupa ang pagkain na pang-tupa, siyempre. “Dinirinig ng Aking mga tupa ang Aking Tinig.” At iyan ang bumubuhay sa atin, bawat Salita na lumalabas…Hindi lahat…Hindi lamang isang Salita ngayon at paminsan-minsan; kundi bawat Salitang lumalabas mula sa bibig ng Diyos, doon dapat mabuhay ang mga banal.

Kinakailangan nating mabuhay sa bawat Salita na lumalabas sa bibig ng Diyos. Ano ba ang pinagtibay na bibig ng Diyos para sa panahon ngayon? Ako ba? Hindi ako ang pinagtibay na ika-7 anghel na Mensahero, hindi rin ang inyong pastor o sinumang ibang tao; ang Diyos ito na ginagamit ang tinig ni WILLIAM MARRION BRANHAM.

Tayo’y hahatulan ng Mensahe na KANYANG BINIGKAS sa teyp. Hindi sa pamamagitan ng anumang interpretasyon o pangangaral na ipinangaral ng tao, kundi sa pamamagitan ng Salita SA TEYP. Tayo man ay pinahiran ng Espiritu Santo, maaari pa rin tayong magkamali. Hindi ko sinasabi na bawat ministro ay huwad o mali; tayo ay tinawag para mangaral, at magturo, at manatili sa Salita, pero ang katawagan sa amin ay ang ituro kayo SA SALITA, at ang TANGING GANAP NA PINAGTIBAY NA SALITA ay nasa Teyp.

Napakarami nga natin, bilang Nobya ni Cristo, na dapat pasalamatan.

Kung ang lahat ng mga dagat ay pupunuin ng tintang panulat,

At ang kalangitan naman ay yaong papel na paglalamnan,

Bawat tangkay sa sangkalupaan ay gawin mang panulat,

At ang bawat tao’y atasan man na pagsulat lamang ang pagtuunan;

Ang isulat yaring pagmamahal ng wala nang hihigit pang Maykapal

Ay makapagpapatuyong mainam nitong buong sangkatubigan;

Ni hindi kayang doon isulat sa balumbon ang lahat-lahat, Kahit pa banatin iunat ang buong sansinukob sa hustong sukat.

Tayo’y nakatakda nang magtamasa ng pinaka dakilang sanlinggo ng Pasasalamat sa buong buhay natin. Isang piging ng Espirituwal na Pagkain para punuin ang mga kaluluwa. Isang piging kung saan ang Nobya ay maglalakip at uupong magkakasama sa Presensya ng Araw upang mahinog.

Ang Diyos ay nangungusap sa pamamagitan ng Kanyang mensahero at sinasabi sa atin:

•        Tayo ang Kanyang Binibining Hirang.

•        Ang ating mga pangalan ay nasa Aklat ng Buhay ng Cordero.

•        Wala tayong mga kasalanan.

•        Tayo’y inaring-ganap na bago pa itatag ang sanlibutan.

•        Tayo ang mga tinawag palabas at mga pinili.

•        Tayo yaong hinihintay ng buong plano ng Diyos.

•        Tayo’y dalisay, malinis, walang sala na Nobya ng Anak ng buhay na Diyos.

•        Tayo’y sakdal sa Kanyang paningin.

Wala ngang katapusan kung isusulat ang lahat ng ihahayag at gagawin ng Espiritu Santo para sa atin.

Maipagmamalaking Pasasalamat nga!!!

Nararamdaman ko na inilalagay sa aking Espiritu mula sa Panginoon na ating ihandog ang buong sanlinggo, simula itong Linggo, bilang Pasasalamat sa Panginoon.

Naka-attach dito ang isang kalendaryo ng mga araw, oras at mga Mensage na pakikinggan natin.

Gaya ng nakikita n’yo, sa Linggo ay magsasama-sama tayo sa regular nating oras ng 2:00 P.M., oras sa Jeffersonville, para pakinggan ang Mensahe na: Pagkauhaw 65-0919.

Lunes — Miyerkules, nais kong pakinggan natin ang 3 magkakasunod na Mensahe na ipinangaral ni Kapatid na Branham nang sunud-sunod, noong 1965. Ipo-post namin ang mga ito sa Voice Radio nang 9:00 A.M. at ulit nang 7:00 P.M., oras sa Jeffersonville.

Alam ko na mahirap para sa marami na makapakinig sa itinakdang oras dahil sa kanilang iskedyul ng trabaho o iba pang responsibilidad, pero sana’y makapakinig kayo sa isa sa mga oras na ito kasama ang inyong pamilya.

Pagkatapos sa Huwebes, sa ika-25 ng Nobyembre, nais kong magsama-sama tayo nang 2:00 P.M., oras sa Jeffersonville, para simulan ang kahanga-hanga nating katapusan nang linggo na Pasasalamat habang tayo’y makikinig uli sa hook-up ng ihahatid sa atin ng Tinig ng Diyos na unang Mensahe sa sanlinggo nating ito: Ang Hindi Nakikitang Pakikipag-Isa Ng Nobya Ni Cristo 65-1125.

Isa ngang espesyal na pagpapala para sa akin ang mapagtanto na 56 na taon na pala ang nakararaan, sa araw na ito, ang Diyos ay nangusap sa pamamagitan ng Kanyang propeta para ihatid sa atin ang seryeng ito ng mga Mensahe. 56 na taon din ito mula nang ipanganak si Kapatid na Branham noong 1909, hanggang 1965, na kanyang ipinangusap ang mga Mensaheng ito.

Anong gagawin natin kung nabalitaan natin na si Kapatid na Branham ay pupunta ng Shreveport, LA sa sanlinggong ito para dalhin ang mga Mensaheng ito? Wala…Ang ibig kong sabihin ay WALA ngang makapipigil sa atin sa pagpunta. Ang Diyos ay may plano para sa Kanyang Nobya sa araw na ito, at WALA mismong makapipigil sa atin.

Dalangin ko na ang bawat isa sa inyo ay manabik nang lubos para sa kahanga-hangang sanlinggo na magkakaroon tayo na sama-sama kasama ang Panginoon; na pinasasalamatan Siya, pinupuri Siya at sinasamba Siya para sa lahat ng Kanyang ginawa, at lahat ng gagawin pa Niya para sa bawat isa sa atin, na KANYANG BINIBINING HIRANG.

Bro. Joseph Branham

21-1114 Ang Kapangyarihan Ng Diyos Na Makapagpabago

Mensahe: 65-0911 Ang Kapangyarihan Ng Diyos Na Makapagpabago

PDF

BranhamTabernacle.org

Minamahal na Mga Agila, lahat tayo’y magtipon-tipon at makinig ng Mensahe 65-0911 Ang Kapangyarihan Ng Diyos Na Makapagpabago sa Linggong ito nang 2:00 pm, oras sa Jeffersonville.

Brother Joseph Branham

Mga Kasulatan na babasahin:

Genesis ika-4 na kabanata

Isaias 9:6 / 14:12-14

Sn. Mateo 5:6 / 24:24

Sn. Juan 1:1

Mga Taga-Roma 12:1-2

2 Mga Taga-Tesalonica 2:3-4

Mga Hebreo 10:26-27

Apocalipsis ika-3 Kabanata

21-1024 Si Cristo Ay Nahahayag Sa Kanyang Sariling Salita

Mensahe: 65-0822m Si Cristo Ay Nahahayag Sa Kanyang Sariling Salita

PDF

BranhamTabernacle.org

Minamahal na Nobyang Binigyang-Buhay,

Wala na ngang mas ikagagalak pa, o mas ikasasapat pa ang ating buhay. Walang katulad nito na kamit natin ang Pagbibigay-Buhay sa pamamagitan ng Kapahayagan. Gumugulo na ang sanlibutan. Ang mga tao’y ganap nang nawawala sa sarili nilang katinuan. Nasasaksihan natin ang mga bagay na di pa natin naririnig sa buong buhay natin na nangyayari mismo sa harap ng ating paningin.

Bawat Mensahe na napapakinggan natin ay ganap na napapanahon at sadyang ang kailangan nating mapakinggan. Ito’y Espirituwal na Pagkaing Napapanahon. May kasapatan tayo na Ito’y hindi hinuha ng isang tao, hindi rin Ito mga Salita ng isang tao, Ito’y mga Salita ng Diyos na nangungusap sa pamamagitan ng isang Tao, na tinatawag palabas ang Kanyang Nobya.

Masasabi natin sa kaibuturan ng ating puso:

•        Itong Mensahe ay Ganito Ang Sabi Ng Panginoon.

•        Ito ang inilaang daan ng Diyos para sa panahon ngayon.

•        Hindi Nito kailangan ng anumang interpretasyon.

•        Ito’y ang mga Salita na hindi maaaring magkamali.

Naging katangi-tanging bahagi ng buhay ko ang pakikinig sa huling serye ng Mensaheng ito. Ninanais ko lamang magbahagi nang sipi-sa-sipi sa bawat isa.  “Napakinggan mo ba ang sipi na ito…Hindi ko pa Ito naririnig nang tulad nun noon…4 na beses ko nang napakinggan ang teyp na ’yun nitong huling mga araw at hindi ko pa kailanman nasasalo ’yun nang tulad ng pagkakasalo ko ngayong araw na ito. Itong Mensaheng ito’y mas kasalukuyan kaysa sa noong ipangaral ito 56 na taon ang nakararaan”.

Wala ngang maipapantay sa lubos na kagalakan na malaman na nakikinig ka sa puro’t pinagtibay na Tinig ng Diyos. Hindi mo kailangang magbantay. Hindi mo kailangang magwari, kung ito ba’y lumilinya sa Salita. Ito ba’y kanya lamang kaisipan o kanyang interpretasyon? Kinakailangan kong ihambing ’yun sa Salita.

Hindi tayo, mauupo lang tayo, nang hindi nag-aalala at magsasabi ng AMEN sa bawat Salita, dahil alam natin na ang lahat ng napapakinggan natin ay GANITO ANG SABI NG PANGINOON.

Wala na ngang mas iinam pa’t mas sisimple roon.

Ako’y matagal nang nananalangin at hinahangad ang Panginoon at Kanyang pinangungunahan ako na magpatuloy sa huling Mensahe na ito na sinalita ng propeta. Alam ko na napakinggan na natin ang kasunod na Mensaheng ito mga ilang buwan pa lang ang nakararaan, pero sa tuwing mapapakinggan natin ito Siya ay naghahayag ng mas marami’t mas marami pa sa atin.

Sa tuwing naiisip ko ang Kanyang Nobya, na nagkakatipon mula sa buong palibot ng mundo, na naghihintay nang may higit na pananabik para simulan ang kanilang Mensahe na pakinggan ang Diyos na nagsasalita sa kanila mula sa mga labi ng Kanyang propeta, ako’y labis na natutuwa. Ano kaya ang ihahayag Niya sa atin sa araw na ito?

May malakihang paggising na nangyayari sa buong mundo. Ang Nobya’y sumisigaw nang malakas, sinasabi: “Nais naming pakinggan ang mga teyp. Nais naming pindutin ang play. Nais naming makiisa kasama ang Nobya sa buong Mundo”.

Tayo’y nagkakaisa’t umuupo nang magkakasama sa presensya ng Anak, nahihinog, naghahanda para sa Pag-agaw. Nais kong anyayahan kayo na mahinog kasama namin nang 2:00 P.M., oras sa Jeffersonville, habang makikinig tayo sa Diyos na nagsasalita sa Kanyang Nobya at ihahatid ang Mensahe, Si Cristo Ay Nahahayag Sa Kanyang Sariling Salita 65-0822M.

Bro. Joseph Branham

Mga Kasulatan na kailangang basahin bago pakinggan ang Mensahe:

Exodo 4:10-12

Isaias 53:1-5

Jeremias 1:4-9

Malakias: 4:5

Sn. Lucas 17:30

Sn. Juan 1:1 / 1:14 / 7:1-3 / 14:12 / 15:24 / 16:13

Mga Taga-Galacia 1:8

2 Timoteo 3:16-17

Mga Hebreo 1:1-3 / 4:12 / 13:8

2 Pedro 1:20-21

Apocalipsis 1:1-3 / 10:1-7 / 22:18-19

21-1017 At Hindi Ito Nalalaman

Mensahe: 65-0815 At Hindi Ito Nalalaman

PDF

BranhamTabernacle.org

Minamahal na Mga Nagtitipong Agila,

Oh, grabeng sandali, grabeng panahon! Wala nang natitira pa na kailangan gawin. Ang Mga Agila ng Diyos ay nagtitipon sa palibot ng Sariwang Laman. Ang propesiya’y natutupad na. Ni minsan ay hindi Ito pumalya, at hindi Ito papalya, dahil tayo, na itinalaga na noong una para makita Ito, ay nakita Ito.

Mula noong kunin ng Ama ang Kanyang propeta Pauwi, wala ngang tulad nito na ang Kanyang Nobya’y nagkakatipon sa palibot ng Kanyang Tinig gaya ngayon. Pinili Niya ang paraan para ang Kanyang Salita’y dumating, at ’yun ay sa pamamagitan ng Kanyang mga propeta, na pauna nang pinagpasyahan at pauna nang itinalaga. At tayo’y may kapunuan, at kumbinsido, na ito’y si Jesus Cristo na inihahayag ang Kanyang Sarili, ipinakikilala ang Kanyang Sarili sa propesiya.

Kung papaano mismo na Kanyang pinangunahan ang mga anak ni Israel sa ilang, sa kanilang paglalakbay, bilang isang tipo ng bayan na tinawag palabas sa panahon ngayon. Heto Siya, sa pamamagitan ng siyentipikong pananaliksik, mangyari na maging sa siyensya’y ipinagkikilanlan Niya ang Kanyang Sarili. At sa pamamagitan ng Kanyang mismong mga gawa at sa pamamagitan ng Kanyang propesiya mismo, ang mga bagay na iprinopesiya ukol sa Kanya na gawin sa panahon na ito, upang ipaging Siyang siya pa rin kahapon, ngayon, at magpakailanman, ay ganap mismo na pinatotohanan. Hindi ba’t sapat na mismo ’yan para pag-alabin ang mga puso natin sa kalooban natin?

Kagaya ng mga alagad noong panahon na ’yun, tayo’y itinalaga sa Buhay. Ang tanging bagay na kailangan na lang nating gawin ay mapagkilanlan ang Kanyang Tinig. At ang Tinig na iyan ay ang mga kaisipan mismo ng Diyos na nahayag. Sinasampalatayanan natin ang lahat ng Ito. Hindi natin kailangang patunayan ang anumang bagay sa pamamagitan ng siyensiya, o magtanong sa kung sinong Saduceo o Fariseo, o sinuman tungkol Dito. Siya ang nagsabi Nito at sinasampalatayanan natin Ito. Pinakikinggan ng Kanyang mga tupa ang Kanyang Tinig, na nagsasalita sa pamamagitan ng Kanyang propeta.

Ang Mensaheng ito ay ang Tinig ng Diyos na nasa teyp. Ito ang buong Kapahayagan ni Jesus Cristo, ang Luma at Bagong Tipan na pinaglakip. Lahat ng mga lihim ay nahayag. Hindi tayo nagdadagdag o nag-aalis man lang mula Rito. Ginagawa natin mismo ang Kanyang iniutos sa atin na gawin, MANATILI SA SALITA.

Hayan na. Ito ’yung panloob na tao. Ang nasa loob na umaayon sa Salita, nananatiling kasama ng Salita, sa kabila ng lahat.

Siya’y nagpropesiya’t sinabi sa atin kung ano ang mangyayari. Ang buong mundo’y mangangapa sa kabaliwan, at lalala at lalala at lalala, hanggang sa sila’y maging sangkumpol ng mga wala sa katinuan.

Kanyang sinabi na ang oras ay malapit na kung kailan makikita natin ang isang bagay na mangyayari, may bagay na magaganap. At lahat ng Mga Mensaheng ito ay paunang pambungad at naglalatag ng pundasyon para sa isang maikli’t, mabilis na Mensahe na yayanig sa lahat ng mga bansa. Naniniwala ako na nakikita na natin ang mga bagay na ito na nangyayari na mismo ngayon.

At alam ko na, matapos akong lumisan sa mundong ito, ang mga teyp na iyan at ang mga aklat na iyan ay magpapatuloy, at malalaman ng marami sa inyo na mga batang musmos, sa mga darating pang araw, na ito ang ganap na Katotohanan, dahil nagsasalita ako sa Pangalan ng Panginoon.

Tayo nga’y makinig at magmatyag nang maigi sa lahat ng detalye ng mga panaginip na sinabi sa atin ng propeta. Haya’t kung papaano nilang nakita siya na nakatayo sa ibabaw ng isang bato na umabot mula sa silangan patungong kanluran, sa isang patusok na hugis na gaya sa isang piramide. Kung papaanong nakasakay siya sa isang kabayo na wala pa silang nakikitang ganoon sa buong buhay nila; isang magiting na puting kabayo, na may puting buhok na nakalaylay.

Kung papaanong may isang puting ulap na bumaba at kinuha siya at dinala siya palayo. Pagkatapos nang ilang saglit ay iniupo siya sa kabisera ng hapag at siya’y puti na gaya ng niyebe. Nakatayo siya roon at nagsalita na may kapamahalaan. Wala ngang humuhula-hula roon. Bawat isa’y naunawaan mismo ang kanyang sinabi.

“Tatahakin ko ang daang ito nang minsan pa!”

Naniniwala ako na nakikita na natin ’yan na nagaganap na ngayon. Ang Mga Mensaheng ito’y tumatahak muli sa daan nang minsan pa. Ang Diyos ay tumatawag sa Kanyang Mga Agila na maglakip-lakip mula sa buong palibot ng mundo. Sila’y nagkakaisa sa palibot ng Kanyang Salita, Kanyang Tinig, sa Mensaheng Ito.

Ang mundo’y hubad, maralita, aba, bulag, at hindi ito nalalaman. Pero ang Nobya’y nadadamitan ng Salita, maluwalhati sa Espiritu, may kagalakan sa Kanyang Biyaya, at nakikita natin at nalalaman natin kung sino tayo: KANYANG NOBYA.

Kanyang sinabi sa atin na yamang nalalaman niya, wala siyang nakikita na anumang sasagabal, sa panahon na ito, ng Pagparito ng Panginoong Jesus, sa labas ng kahandaan ng Kanyang Iglesya.

Mga Agila, ihanda natin ang ating mga sarili. Inaanyayahan ko kayo na makipagtipon kasama namin sa palibot ng Sariwang Laman sa Linggo ng 2:00 P.M., oras sa Jeffersonville, upang makinig sa Tinig ng Diyos para sa ating panahon na inihahanda tayo para sa nalalapit na Pag-agaw habang pinakikinggan natin ang: 65-0815 At Hindi Ito Nalalaman.

Bro. Joseph Branham

Apocalipsis 3:14-19

Mga Taga-Colosas 1:9-20

21-1010 Ang Mga Pangyayari Ay Ginawang Malinaw Sa Pamamagitan Ng Propesiya

Mensahe: 65-0801e Ang Mga Pangyayari Ay Ginawang Malinaw Sa Pamamagitan Ng Propesiya

BranhamTabernacle.org

Minamahal na Munting Birhen, Salita, Kawan, Nobya ni Cristo,

Tayo ang Kanyang Nobyang Salita na naghihintay sa ating Nobyong Salita at Kanyang Milenyum na honeymoon. Makikinig lamang tayo sa iisang Tinig. “Nakikilala ng Aking mga Tupa ang Aking Tinig. Ang sa iba’y hindi sila magsisisunod.” Ano ang Kanyang Tinig?

Kapag sinabing tinig ng tao ay ’yung salita ng taong ’yun ang tinutukoy. At ito na nga Ito, ang Biblia, walang kahit anong salita ang dapat idagdag Dito o alisin man mula Rito. Manatili lang kayo mismo sa Tinig na ’yun. “Ang sa iba’y hindi sila magsisisunod,” sa denominasyon nga.

Ang Tinig na ’yun ay ang Kanyang Tinig, na nagsasalita sa teyp sa pamamagitan ng nag-iisang makalangit na interpreter ng Kanyang Salita, ang Kanyang propeta, na si William Marrion Branham. Si Jesus Cristo ito na nagsasalita sa pamamagitan ng mga labi ng tao. Hindi natin alintana ang tungkol sa mga salita ng tao, mga pag-iisip ng tao o interpretasyon ng tao, ang tanging alintana lamang natin ay tungkol sa pinatotohanan na Tinig para sa ating panahon. Ito’y GANITO ANG SABI NG PANGINOON.

Iginagalaw ng Diyos ang mga kamay ng propeta. Iginagalaw ng Diyos ang kanyang mga mata sa mga pangitain. Hindi siya makapagsasabi ng anuman kundi ang nakikita niya. Hindi siya makapagsasalita ng anuman, dahil ang Diyos ay may ganap na kontrol ng kanyang dila, kanyang daliri, bawat laman-loob ng kanyang katawan ay nasa ganap na pagkumpas ng Diyos. Hindi nakapagtataka na sinabi ng Biblia na ang Kanyang mga propeta’y mga diyos; sila’y bahagi ng Diyos! Siya ang Salita ng Diyos na nahayag para sa ating panahon.

Paunang sinasabi ng Bibliang ito, sa pamamagitan ng propesiya, ang araw at panahon na kinabubuhayan natin. Kung ano bang uri ng mga kaganapan ang mangyayari. Paunang sinasabi Nito mismo nang eksakto hanggang sa pinaka letra, at hindi kailanman pumalya sa isa mang kapanahunan. Sila na mga predestinadong makita Ito, ay makikita mismo Ito. Ang Salita nga Ito na lumalakip sa Salita.

Sa bawat kapanahunan, hinahayaan ng tao na ilagay ng mga tao ang kani-kanilang sariling interpretasyon sa Salitang ito, at nagbunsod ’yun na sila’y mabulag sa kaganapan na nangyari. Ganoon din ang nangyari noon sa mga Fariseo at mga Saduceo.

Sinabi nila sa mga tao, “Kami ang pinahiran ng Diyos. Kailangan n’yo kami para sabihin sa inyo kung ano ang sinasabi ng Salita. Kailangan n’yo kami para ibigay namin ang kahulugan Nito para sa inyo.”

Kung papaano nga noon ay gayundin ngayon. Ang nakalilinlang na bahagi’y mga pinahiran sila ng Espiritu Santo. May tawag sila mula sa Diyos para iministeryo ang Salita. Marapat lamang sana na sabihin nila sa mga tao kung ano ang sinabi ng propeta, pero marami sa kanila ang NAGLALAGAY NG KANILANG INTERPRETASYON DITO sa pamamagitan ng pagbibigay ng higit na importansya sa kanilang pagmi-ministeryo kaysa sa mismong Salita ng Diyos.

Pansinin n’yo kung gaano nilang sinisikap na dalhin ang mga tao na magsama-sama sa palibot ng kanilang pagmi-ministeryo, sa palibot ng kanilang interpretasyon ng kung ano raw ang sinabi ng propeta, pero tunay nga na di nila magawa.

Nagtatago sila sa likod at tinatakot ang mga tao para ipangatwiran ang di pagpi-play ng mga teyp sa kanilang simbahan sa pagsasabi, “Ang mga taong ’yun ay nagbibigay ng higit na importansya sa tao at sinasamba na nila ang tao at hindi na si Jesus Cristo. Maka-denominasyon ang makinig ng isang mensahe nang sabay-sabay mula sa isang lugar. Hindi kailanman sinabi ni Kapatid na Branham na mag-play ng mga teyp sa simbahan”, na iniiwasan ang mismong pinaka dahilan, ayaw lang talaga nila mag-play ng teyp sa kanilang mga simbahan. Ang kanilang pagmi-ministeryo, kanilang pang-unawa, ang pagtawag sa kanila, ay mas importante kaysa sa pakikinig sa mga teyp sa simbahan. Hindi man nila tahasang sinasabi, AYAW NAMIN, pero halata ito sa kanilang mga kilos.

Sinumang tunay na totoong ministro, na nag-aangking naniniwala na ito ang tunay na huling-kapanahunang Mensahe, ang Tinig ng Diyos para sa ating panahon, ay hindi kailanman maghahanap ng dahilan para hindi mag-play ng teyp sa kanilang simbahan. SIYASATIN NINYO ANG PAHAYAG NA ‘YAN SA SALITANG NOBYA.

Hindi ko kailanman sinabi na ang lahat ay dapat makinig nang 2:00 P.M., oras sa Jeffersonville, o kung hindi’y hindi kayo Nobya, HINDI KAILANMAN. Hindi ako kailanman sumamba sa isang tao. Si Jesus Cristo ang tumatanggap ng lahat ng luwalhati. Sinasamba ko ang Diyos sa tao gaya ng sinabi NG SALITA na dapat nating gawin. Ganoon na lamang silang nalinlang at bulag. Basahin n’yo lamang ang Mga Kasulatan aking kapatid, nariyan mismo.

ALAM ng diyablo na WALANG ministro, o grupo man ng mga ministro, ang makapag-iisa sa Nobya; ni hindi sila nagkakasundo sa isa’t isa. Katulad mismo ng Methodist, ng Baptist, ng Presbyterian at ng Pentecostal, haya’t papaano nga na isa sa kanila o kombinasyon man nila ang makapag-iisa sa Nobya…talagang HINDI MAAARI.

ANG TANGING BAGAY NA MAKAPG-IISA SA NOBYA AY ANG TINIG NG DIYOS SA TEYP…AT GINAGAWA NA NITO ITO!

Hindi ito gusto ng kaaway, kaya sinusubukan niyang sirain ito, pero imposible ’yung mangyari…LUWALHATI!

Gaya noon, sila sa tuwina, sa dulo ng kapanahunan, sila’y humahantong sa isang kaguluhang dala ng kanilang mga teologo’t mga pari hanggang sa mauwi lagi sa kaguluhan. Sa tuwina’y mali ang kanilang interpretasyon, na ni minsan ay hindi ito nabigo na mamali. At ni minsan ay hindi nabigo ang Salita ng Diyos na tumama. Yun ang pagkakaiba.

May isang paraan lamang para makasigurado, manatili sa Salita, sa Tinig ng Diyos na nasa mga teyp. Basahin n’yo ang Biblia, sasabihin nito sa inyo kung anong mga kaganapan ang mangyayari sa panahon na ito. Sasabihin nito sa inyo ang tungkol sa Kanyang malakas na anghel na paparito sa panahon na ito. Sasabihin nito na manatili kayo sa Tinig na Yaon, manatili sa Kanyang piniling mensahero.

Kung may Aklat sa Biblia na kinamumuhian ni Satanas, ’yun ang aklat ng Apocalipsis. Isinulat ’yun ni Cristo Mismo. Hayan nga na ayon sa espiritu, si Cristo Mismo’y naglagay ng higit na diin sa Kanyang ika-7 anghel.

Pagkatapos ng mga bagay na ito ay nakita ko ang ibang anghel na nananaog mula sa langit, na may dakilang kapamahalaan; at ang lupa ay naliwanagan ng kaniyang kaluwalhatian.

Sinabi Mismo ni Cristo na ang buong lupa’y NALIWANAGAN NG KANYANG KALUWALHATIAN. Hindi Niya sina na naliwanagan ng “Aking Kaluwalhatian”. Kung ganoon ayon sa inyong pagkaunawa, inaakusahan n’yo si Cristo Mismo na nagbibigay ng higit na diin sa Kanyang ika-7 anghel na mensahero.

Ang makalupang mensahero na iyon ay ganoon na halos ka pareho kay Cristo Mismo, na muntik na siyang sambahin ni Juan, NANG DALAWANG BESES, pero ang sabi niya, “HUWAG!, ang sambahin mo ay ang Diyos.” Yan mismo ang eksaktong ginagawa natin, sinasamba ang Diyos. Hindi tayo naglalagay ng higit na diin sa tao, ang sinasabi lamang nati’y kung ano ANG SINABI NI CRISTONG SALITA…“ang lupa’y naliwanagan ng kanyang kaluwalhatian”. Yan ang Nagbibigay-Buhay sa atin sa pamamagitan ng Kapahayagan.

Ang Diyos ang gumagawa ng Sarili Niyang pagpili, sa pamamagitan ng paunang pagtatalaga, pinili ang mga propeta para sa bawat kapanahunan. Pansinin n’yo ito. Inaayos Niya ang kalikasan ng propetang ’yun para umangkop sa kapanahunan na ’yun. Kita n’yo, inaangkop Niya ang istilo nito, kung ano mismo ang ikikilos nito. Inaangkop Niya ito kung ito ba’y edukado o hindi edukado. Inaangkop Niya ang mga kaloob, ang paraan ng pangangaral nito, ang mga kaloob na tataglayin nito. At ang Mensahe para sa partikular na kapanahunan na ’yun, itinalaga na noong una ng Diyos ang partikular na bagay na mangyayari at wala nang iba pang bagay ang maaaring humalili sa lugar nun.

Mag-play kayo ng teyp, alinmang teyp, sa Linggo, walang makahahalili sa lugar Nito. Kung nais n’yong samahan ang Branham Tabernacle habang makikinig sa isang teyp, malugod po kayong tinatanggap at inaanyayahan na samahan kami sa Linggo ng 2:00 P.M., oras sa Jeffersonville, habang pakikinggan namin ang: Ang Mga Pangyayari Ay Ginawang Malinaw Sa Pamamagitan Ng Propesiya 65-0801E.

Bro. Joseph Branham

Mga Kasulatan:

Genesis: 22:17-18

Mga Awit: 16:10 / Kabanata 22 / 35:11 / 41:9

Zacarias 11:12 / 13:7

Isaias: 9:6 / 40: 3-5 / 50:6 / 53:7-12

Malakias: 3:1 / ika-4 na kabanata

Sn. Juan 15:26

Sn. Lucas: 17:30 / 24:12-35

Mga Taga-Roma: 8:5-13

Mga Hebreo: 1:1 / 13:8

Apocalipsis: 1:1-3 / Kabanata 10