Obubaka: 65-1204 Duta ‘Buari

BranhamTabernacle.org

Amuro O’dukoniri La,

Ma ai ra ma eco e’yo nze ama alu alu ma paria ra ma ka ‘yo, ama enga nga oa wiki ma de ta Awadifo-fezani be idri amani alia o’di o’di ‘dini. DIZA!!  

Ama era ndra E’yo E’yo dria, E’yo Eceza E’yo Eceza ali dria. Vico amani ri ovura ambizaru ra afa lu alu ci ecopi ra ri si: Eri ma E’yo i, O’dukoti saa ni ri i, Kristo ma Ngulupi ni e’yo nzeria Eri ma Amuro dri ri i.

Saa ‘disi ama E’yo azizaru alu alu ‘da ne,Lukani, Malakini, aziza azi andru ‘diyi pie dria, ecazu ruati alia, oaria ama eselia, amani eri ama bi si ri; saa ‘disi ama ‘di Eri ne (ama mile ki si) I ma Ngulupi ma E’yo efi eceria, ama le kini e’yo fi eceza azi agu ba adaru ri ni ri ku.  Kiri kiri Kanisa Mungu idriru rini ri la, ‘dia ci azini fone alia si ‘diyi pie, emi engaki o’dua risi mbele ru, de nga ovuni vuti vuti ru ku! Mungu ma co cucu emi dria.

Mi eco ega mi dria ra kini ama ta ‘di neria ama mile ki si, E’yo Munguni idri ruri ni ovuzu e’dazaru ria? E’yo idriruri nezu ovuria ecezaru e’data ‘bani si, Munguni ama eselia! Osu ta yo adisiku ‘ba dra drio ‘da ki ‘baki ndra mile eyiniri o’du ‘di nezu, te SAA ‘DISI, ama di oa o’du ndra ovupi azizaruri pi alia, Eri neria azini eri ria ovuria e’dazaru mile azini bi amani ri ki si.    

Ama eri e’yo mi dria ra, kini Mi eco ra oyu ki o’bazu. Ama eri e’yo mi dria ra. kini Mi eco ra kabilo ago o’bazu. Te saa ‘disi ama Mi dre, ama mile kisi! E’data niri i, e’yo niza ovu ‘di e’dazaru ‘bo.  

Eri ‘di a’duni ‘di? E’yo ovupi efi ecezaru ‘bori eri e’data Ru Munguni ri ni ri.

‘Ba e’yo otrapiri kaki tro ‘yo ngoni ti, ama Eri ma ale kililiru alia amani ama etrazu aku amani pi alia, kanisa amani pi alia, kaniku pari ci amani ama etrazu alenia ri, O’duko Erini erizu beni risi si.

Ma ka acizu kanisaa ri ai ku, ma ovu ‘di kanisa be ci a’dusi? Ama ovu eyi pie suru ‘di ma alia dria ara, ovuku eizaru fonisi ondre ‘disi, mailo turu iri dia vutia Kanisa mavu aluni oa ci.

ERI ma kanisa ki eizaru foni si wudukuru si ara O’duko Munguni erizu e’yo nzezu, azini Amuro Eri ni omvezu. Akufi ama eselia yo, fezu oaza Munguni dria ruatisi ri ma oa ama eselia. Mvi ‘bani ni i ovu ecezaru, e’dazaru, kanisa ejizu ro tualu Oaza Munguni pie dria ama eselia. Eri amani eceta nezaru ra riki e’da azini I ma Ngulupi e’da ko’bo Erini ndra ‘ye e’doria Erini ndra e’dazu nyakua e’data Nabi-Mungururi si ri le.

Malaki 4 i, E’yo siza azi ‘diyi pie aziki ndra ra. Mi inzita ‘ye ngoa? Jo Munguni, rizaru (I ‘yeria sa ‘disi).

Ma awa’difosi tu Opi dri afa dria eri ni ‘ye Eri ma Amuro dri o’du asizu ‘diyi pi alia riki si. Enga amani okpo fe, ama oruzu, kini ama Eri ma ‘Ba Eri ni pele’bo riki, kini ama ndra eri alia de nga wudukuru vuti ovuni o’bazaru ku. Saa azi onyiru Eri ma Amuro dri ‘do ngoi ya. 

Opi ‘ba asi mani alia muzu drile O’dukoti asizu ndra ovupi Tambazaru ero alia Eri ma Amuro dri diyi pie. Ma ama ma cucu cozaru egazu kini, Ata fe ndra geri amani ecozu ama etrazu tualu, egazu wudukuru si ara, O’dukoti ‘diki erizu. Eri adaru, Ecita Tualu Amuro Kristoni Nele Kuri i.  

Amani engazu inzita ‘yezu aku ageyia tualu ku Corona ma e’yo si risi, azini vini kanisa o’diri ni nga ovuzu sizaru risi, afa iri amani ‘ye ku azini aleki ‘year riki. Afa iri Opi ni ndra ‘yo Eri ma Amuro ma ‘ye ra kpere Eri ma dri egota si ri ki: Kumunya ki Pa Ojita be.

Mani Mungu ziria azini Opi ni ndaria, Eri ‘ba asi mani alia amani ovuzu Kumunyo azini Pa Ojita be iritro aku amani pie. Ma ovu ndra cucu cozaru azini ayikosi Eri ni ‘da ‘bazu asi mani alia risi, azini geri amani ecozu ‘yezu risi. Ama nga mu ovu eri be mba o’du alu alu inzita Kumunyoni asizu Adripi Branham ni ndra ‘yezu dere eri ama pie nga nyakua dia ci risi, Ba Mundrini Iri, 12, 1965 si. Ama nga vini mu oa cucu cozaru fezu erini inzita Kumunyoni azini Pa Ojizani ‘ye amani pale alu dika.

Ma nga mu emi dri waraga idri ra, azini ki ‘ba Branham Tabanakulu ma intanetia, e’yo ‘diyi ma dria dria ri ki o’du were ‘diyi alia. Ma eco azi emi dri ra kini eri mu oa saa azi Amuroni mu ca aviku ‘dileni. Ma asi’baza ‘dileni ma dria Eri ma cucu coza Eri ni mu efe amani ri.

E’dozu o’du Azia ‘disi, ama nga mu ama O’duko eri O’dukoti: ‘Duta ‘Buari 65-1204 ejiria amani, saa na o’butisi (9AM), Jeffersonvile saa si. Eri mu oa eli 56 vule ‘dale ecazu o’du ndra Munguni e’yo nzezu Eri ma ‘ba o’dukoti ojipiri vusi, dika Eri ma O’duko ‘bazu tepu ma dria ‘davu si, ani Amuro eco ani beni ta nyazu alenia, Erini nizu beni, I ma Ngulupi ‘bazu gonde ‘Duta ‘Bua emupi mbeleko cici ‘dini beni.   

Ama nga mu drile otita nde be amani ama etrazu Sabato si risi saa Aro etualasi (2PM), Jeffersonvile saa si: Afa Mupi Oapi Riki 65-1205 erizu.

O’du Alusi ama nga: E’yo O’diru Riki Ovu E’dazaru Gboru E’yo Nabiru Ri Si 65-1206 ni eri, azini o’du Iri si: Driceta 65-1207. Mi eco eri ra sa ci mini azini mi akuni‘yeke ri alia. Ko’bo wiki aji ri le, ama mu ki ‘ba redio Voice Radio ru ‘di alia saa na o’butisi (9am) azini saa Alu ondresi (7pm), Jeffersonvile saa si. 

‘Bazaru ‘diari eri kalenda mba o’du nezuri o’du e’dapi, saa pie azini O’dukoti amani mu eri ri pie ri. O’du emupi were ‘diyipi alia, ama nga mu emi dri waraga idri azini otita ki ‘bazu Inzita Kumunyoni emupi ‘dini beni.

Ma angu ne drile ovuzu emi be, Eri ma Amuro nele ku ri i, Ogunga Erini vu.

Opi ma Co Cucu Mi dria,

Adri. Joseph Branham i.

Mesegi (O’dukoti): 65-0911 Okpo Munguni Ojata ‘Yezuri

BranhamTabernacle.org

Aji La, ama ma etra ama dria tualu O’dukoti 65-0911 Okpo Munguni Ojata ‘Yezuri erizu Sabatu ‘disi saa aro etu alasi (2Pm), Jeffersonville saa si.

Adripi Joseph Branham i

E’yo Siza lazaru ri ki:

E’doza  Chaputa 4 zu ri

Isaya 9:6 / 14:12-14

E’yo Ba Matayoni 5:6 / 24:24

E’yo Ba Yohanani 1:1

Rumi 12:1-2

2 Tesolonika 2:3-4

Ebrania 10:26-27

E’yo Eceza Chaputa 3

Mesegi (O’dukoti): 65-0829 Edeni Sitani

BranhamTabernacle.org

E’yodri O’dukoti vuri

Amuro Dizabe Ri La

Saa ni ndra muzu o’du ‘da si angiri ‘boria, ama ei ‘di ndra e’yo oluza olia siri ra, Eri emu ndra jo amani pi alia oazu amabe. Suru pi vu si ara, esele Ruati Kristoni, Eri’i Eri ma nabini ndra ovuzi okpo be fezaru erivu nyaka fezu eyini ri, ri ki ndra tualu angu Buari alia Eri ni ndra e’yo nzeria amani trai Eri ma malaika amboru Eri ni ndra ti epe ri vusi; fezu diza ma eca wudukuru dria Eri ma Orindi Alatararuri si eri vusi, Eri ma Amuro omvezu amve.   

Mungu epe ndra caputa 18 ‘di alia, malaika azi amboru ni ti, e’yo zizaru ‘daa ni ovu zu nizaru ‘boria, malaika azi amboru ni kaniku ‘ba o’duko ti ojipi ri….

Mungu epe ndra malaika azi ti ra, ‘ba azi o’dukoti ojipi ni (A’du ni?) omvezu amve, “Mi emu amve!” O’dukoti saa ni ri i!……

Emi efuki amve engazu eri alia risi! Mungu epe angiri…malaika amboruni, kaniku, ‘ba azi o’dukoti ojipi ni ma ti. Ani eri ma diza ovu ni ndra angu azi kurua ni alia ku, gbi ndra i nyakua dria dria…diza gbizu nyakua azini Eri ma ‘ba ki omve amve engavu eri alia ri si…

Saa ‘di si, eni ki di e’yo Adari ra, ‘Ba azi o’dukoti ojipi ni ovu ti epezarura engazu Bua, Mungu ma ‘ba ki omvezu amve engazu Babilonia si. Azini eri ma Diza fe ndra diza nyaku dria ra, Orindi Alatararu amboru ‘da i.  

Wiki aje ria olu’ba azi ‘yo i ma ongulumu pini kini ale ndra ‘ba pi ma ai ki kini Adripi Branham ni ndra malaika E’yo Eceza 18 ni ri, te olu’ba ‘da ‘yo kini malaika ‘da ni ndra engazu Bua, ani kini eco ‘di ndra oa Adripi Branham i ku. Adripi ‘da ka ndra lu afa nabi ni ‘yo ma ‘ye ri ‘ye i, e’yo ‘da andrizu E’yo si, ovu ni eri ma egata si ku ‘dini, ERI NDRA MU ERI RA, KINI ADARU, ERI NDRA ADRIPI BRANHAM I DRA ‘YO PI KINI I MALAIKA ‘DA I RI.

…Mi ne, ‘di malaika Diza ni ri i, mi ega nga, malaika asizu ri i, eri malaika ayi kanisani alia Lodokia niri. Eri Lodokia ma ‘ba o’dukoti ojipi ri, ‘da ri asizu ri i, a’disiku ni caputa ‘da vutia ri 19 zuri i, ovupi Amuro ma emuzu ni ri i.  

Adripi amvupi, MA LENIKU e’yo ‘diki ‘yo zu azini ki e’dazu mgboru. Adripi Branham ni ‘yo ri le, “Ma ovu vazaru ku tu”. Ma ni ‘yo ri kini olu’ba dria ki e’yo ‘diki ‘yo ni ni ku, ma ai vini kini olu’ba dria ki enzoru ‘dini ku indi kaniku ma olu ki e’yo ku ‘dini ku. YO, te abari ni ki ‘ba ki ole eyi ni azi ngaza eyi ni E’yo oluzu ri ‘bazu angiri aga avi (play) mivu ‘ba eyi ni pie ani ki KO’BO afa nabi ni ‘yori eri beni ri ra.

Mi ka ovu ndra ‘bazari oko ru, mi Eri nera. Geri azi yo Eri ni ovuzu zizaru mi vu siri. Mi nera dika mi ‘yo “Eri lu mgboru ma mile tia! Ma sa ‘di si Eri neria. I ne Eri ‘bo. Eri ‘di i, E’yo i, E’yo ma dria ri i, E’yo vusi E’yo vusi. Eri e’dazaru mani ma mile tia azini idri mani dria ovu trazaru Eri alia.” 

Ma ma fe nga emi ni esele O’dukoti ni di i ma adripi olu’baru ‘diyi, afa mani azini kaniza Opi ni fe ma dri ocezaru ri e’dapi, vini tepu ma aviza kanisaa ri aipi ra ri.

Ani ‘di ma oduko ka ovu ‘duzaru, olu’ba acini pini angu cinia, saa cinia, ‘di ovuni ‘yozu embata emini ki onzi ‘dini ni ku, ‘di ovuni fezaru kabilo emi ni pi ni ku. O’dukoti ‘di i, O’dukoti azi ma ni oluri pie dria, ki ongulumu maniri pini. Ovuni onglulumu eminiri pini ku pe lu ka ki le Eri ai eyisi ria. Te ‘di ri ‘ba ‘dia ‘di pini.

‘Ba tepu ‘diki jepi ri ki. ‘Ba ki wudukurusi ara tepu ‘diki jeria azini eyi ki aviria. Saa kakau alia eyi waraga esi. Ma sa dria ‘yo eyini, eyi ka ovu kanisa azi ni ni ani, kini “Mi ne mi ocepini i.”  

Ki ma ne i ovuzu eyi ma ocepi akua ri ru, ani mani ‘yozu eyini beni kini, “MA AI TEPUKI AIZU AZINI MI AVI (PLAY) MI ZURI ALIA. Adripi Branham ni ama ocepi i. Ama eri ma ongulumu ma esele.”

Saa ‘di si, ocepi, ma le mi ma ni kini, kini, ‘di lu ongulumu ma ni ri ni ma ni e’yo ‘di ki nzezuri. Azini ma ovu dri wala be ci ‘da ‘yezu a’disiku ma ti enga ovu epezaru Orindi Alatararuri vusi kabilo ‘diki onezu. Ani candi ma dri ma ka afa mani ega eri Adaruri azini geri Eri ni emuzuri lu eyi ni kuria. Te ovuni wudukuru ni ku kaniku kanisa azi ‘diyi ni ku. Mi ‘ye afa ci Munguni ‘yo mini mi ‘yeri. Ma cani omvita fe mi ma paria mi ni ma i ku, mi cani vini indi omvita fe ma ma paria mi i ku. Te le ama ecekokoru ma feki omvita Mungu ma drilia ra, e’yo o’luza amani ki si. 

Le ma ma ecekokoru fe omvita ra Mungu vu e’yo oluza Eri ni fe ma vu ri si ra. Ari ba dri ma oaza niri kisi ma aira kini le mi ma avi O’duko Munguni ovupi O’dukoti ‘duzaru ‘diki mi ma kanisa ra. Eri Mungu ma geri fe andru niri i Eri ma Amuro ni wazu. Eri LU geri alu ci Amuro ni ovuzu ani ajizaru tualu azini ‘bazu kiliru ri. 

O’dukoti amani mi eri Sabatu si ri ovu ndra nzezaru azini o’duko ni ‘duzaru ANDRU ni. Eri Nyaka Orindisi Saa ‘Yeke Siri. Ama ma nzi asi amani ani Orindi Alatararuri eco ra odu osuzu ama dria fezu amani e’yo Eri ni ndra ama bile ndu lizu amani nezaru beni o’du asizu ‘diyi alia ri riki erizu beni. 

Eri ‘yo ndra kini orindi iri ‘diki nga ovu e’dazaru mgboru o’du asizu ‘diyiki si. Eri ‘yo ndra amani kini eri nga oa ajizaru tu kpere eco ta ‘ba opele ri ki olezu ra ka ta eco ra ria. O’du ‘daa eri ‘di i.

Mi ne, Yesu emu ndra ra, i nera, Sitani ni ndra trata Yahudi ma emba’ba pini, azini rabi ki azini atalo ‘da pi alia ci, o’bizu fezu eyini azita Musani ma vuti bezu i, isu dere E’yo ma ada ‘yo ndra kini o’du ‘da si Mvi ‘bani i ta ovu e’dazaru, i nera, kini Eri nga I ma Ngulupi ‘eda. Ani ki ndra o’bi, eyi dra eyi ma e’yo dini ni azita Musani ma dria ‘da pi ma ta mbaria….Mi ne ‘ye a’du ari ra? Eri ndra o’bi lu eyini kini, “Esele E’yo ‘da niri ni ko’bo ‘yeke, te Agu oa’di ovuni ‘Ba ‘bani e’yo nzezu drinia ri ku.” Mi ne eri enzo eli ngoniari ra? ‘Da o’du oleta ni ‘da i   

Ama CANI KU ovuzu olezaru, ama Amuro i. Ama anzi Mungu NIKI. Ama Mungu ma arakala ndra ovupi Eri ma alia, ovupi ‘bazaru ruati alia ko’bo eri ni ndra ovuzu ‘bazaru ruati alia ri le RIKI, ani ama ecoki ani ovu ti ecita ma alia ama eselia aku Mungu niriru nyaku dria beni. Ama eco ni ega sa ‘disi ku, te ama ndra ‘daa indi. Ni ndra ra. Ani Le di ndra ra ama ma eca ki ‘dile ani Eri e’yo ‘ye ama be beni, e’yo nzezu ama be, ama lezu, azini ama dri zizu, DIZA!!!

Azini ‘di dika yo, “MA NI EGASI MA Eri ma Amuro ni. MA ‘BA ASI MA Eri ma Amuro ni.” AMA NIKI RA KINI AMA ERI MA AMURO NI.

Orindi Alatararuri ni azi nga ria ama alia. Eri idri ni, ovuni amata azini ni ku; oani sadini azi ama ruati alia ‘dini ni ku, te eri ‘Ba ada azi ni, Yesu Kristo i, E’yo Munguni ovupi sizaru ama asia, idri fezu E’yo ma dria ayi ‘di alia ri i.

Mi ovu aizaru ru ecizu ama be oliasi Sabatu si saa aro etualasi (2PM) Jeffersonvili saa si, Orindi Alatararuri ni amani diza feria Eri ma E’yo ovupi nzezaru Eri ma malaika vusi ri ma dria, azini O’dukoti: Edeni Sitani 65-0829 ‘di ejiria amani.

Adripi. Joseph Branham i.

E’yo siza lazaru ri ki

2 Timitio 3:1-9

E’yo Eceza 3:14

2 Tessalonka 2:1-4

Isaya 14:12-14

Matayo 24:24

Mesegi (O’dukoti): 65-0822e Agupi Egata ‘Beri Ma Afa E’yo ‘Yazuri

BranhamTabernacle.org

E’yodri O’dukoti vuri

Ai’ba Bibiliani ‘Diyi La,

O’du dizaru amani oazu alenea ‘do ngo i. Ama asi ni ve ama alea Eri ni e’yo nzeria amani geriko si ria o’du dria. Kristo enga ovu ecezaru amadri ‘bo E’yo Erini risi. Eri E’yo Eceza Yesu Kristoni, E’yo ma Ngulupi I ovupi e’dazaru ruati alea ri i. Eri O’duko Munguni I Amuro omvepi amve ri.

Ama ovu afa azi oru ndeni ni be ci, e’yo asizuri, amani Dria ri; ‘da Eri ma E’yoni, Bibiliani. Saa ‘disi “Bibilia” ka ‘di ovu ama Dria ri, ama neki nga nabi ‘yo ndra Bibilia di a’dunia ri.   

‘Yo kini Mungu si ndra Bibilia lu nabi pivusi. ‘Da ndra eri ma geri ‘yezuri i. ‘Da ndra geri Eri ni ovuzu eri be I ma E’yo ejizu ‘ba pivu ri i: trai tile Erima nabi pivuri ki si. Eri ma E’yo emu ndra lu nabi vu.     

Nabi ‘ba ndra i ma omi sa dria afa Munguni ‘yori dria; ovuni afa ‘ba ada ni ega, afa ayi ‘dani ega, afa kanisani ega, afa suru ni ega ri dria ku, te afa Munguni ega ri ma dria! Ece lu ndra Mungu ma egataki ofuzu E’yo ru. Mungu ka ndra mu I ma egataki ece eri dri ‘bo, ece di ndra Eri E’yo ovupi sisi risi.  

Ani Bibilia ma dria ri ovuni e’yo ‘ba adani ki ku, Eri ovu vini sizaru ‘ba ada si ‘dini ku, ‘ba ada ejini ’dini ku, kaniku Eri eco ovu ecezaru ‘ba ada vusi ‘dini ku. Eri E’yo Munguni ovupi ecezaru Mungu ma Ngulupi siri i, Eri ma Ngulupi ma E’yo efi ecezani. Eri ma E’yoni.  

Sa ‘disi nabi ‘di ‘yoki di, “Eri ma i ku. Ma ovuni afa azi ‘yezaru ni be ku ‘da be, te eri ‘DI OPI ‘YONI NI”. Ani, Bibilia ni ‘DI OPI ‘YONI NI nabi pivusi. Nabi ‘di nzeki azini siki ndra E’yo siza lu a’dule ku, te eri ndra LU ‘ba e’yo efi ecepi Munguni te epe E’yo ovupi sizaru ‘dani ri i.

Ani Bibilia ni Mungu ma egata adaru ovupi sizaru nabi pivusi ri i. Nabi ni ‘ba Bibilia ma e’yo efi ecepi Munguni te epe niri i. O’dukoti ni, E’yo ni, Bibiliani azini ‘ba o’dukoti ojipi ri ki dria alu. Ani, ama ma e’yo ni nga ovu lizaru e’yo efi eceza Bibiliani ovupi nzezaru nabi vusi risi.   

 “Mi ovu ti epezaru oazu dri cere ru. Azini Mungu ni nga emu ra. Ani Eri ka nga emu’bo, Eri nga mi e’yo li afa ndra mini emba eyini risi, oko, ki fi ani aa ra kani yo ari beni. Ama nga mu aa embata mini embari si.”

‘Yo nga lu sa ‘disi ‘dia ngoni? Eri ma e’yo ni nga ovu lizaru oko afa ERI ni emba amani riki si. Ama eco LU fizu aa ERI ma embataki si. Ani eri orodriru tu lu afa ovupi ‘yozaru tepu ma dria ri ‘yozu i ngole ama e’yo ni ngazu ovuzu lizaru ERI MA E’YO TEPU PI DRIA RI SI; ovupi e’yo efi eceza Bibilia niri i ria.

Mi nga mu mi asiza ‘Dani’daniri ‘ba afa azi agu azini ‘yoni ma dria? Ovuni Amuro i ku!! Ama nga mu a’du ‘ye azini ‘yo ngoni?  

Ani yi dria treki o’duko alusi, “Aniki ‘da ra! Ama ava liria asi ‘baza angiri ri ‘be”

Ani Amuro ni ava li E’yo dria nabi ni ‘yori pi dria, ndra ovupi e’yo efi eceza egata Munguni ovupi sizaru nabi pivusi ri i, azini o’du asizu ‘diyi alea Munguni nze I ma Ngulupisi tile I ma nabi vusi ri dria. 

 “Mi nga ama e’da Eri dri, azini ‘di ama nga emu vule nyakua dika, emuzu oazu ‘dani’dani.”  

Kiri kiri adripika azini omvupika, emi engaki o’dua risi de ovuni nga vuti vutiru ku. ‘Di Eri ma omveza asizuri i. Emi nzi asi emini ani emi neki le te emi ma eriki O’duko Munguni tepu pi dria ri ki ngole ari beni. Ama ma e’yo ka mu ovu lizaru O’dukoti Munguni nze tepu dria Eri ma ‘ba o’dukoti ojipiri vusi ri si, mi eco di neku ngoni ngoni eri orodriru tu azini eri lu geri ci ovuzu ‘yeke azini ru otizu Eri ma E’yo be ri, eri O’duko Munguni tepu ma dria ri erizu risi.     

Ada, Mungu omve azi ngaza 5 riki ra, te le ma ‘baki orodri tepu ki erizuri aga azi ngaza eyi ni riki ra. Ma ni ‘yori mi ocepi ma olu e’yo kaniku ma emba e’yo ku ‘dini ni ku. Ma ‘di ‘yo kini emu di kanisaa ku ‘dini ni ku; le mi ma mu kanisa ra, te mi ocepi ka tepu ovupi O’duko Munguni mi ma e’yo ngazu ovuzu lizaru ani ‘diki ‘ba oko azini emi drilia emini erizaru ku, emi ovu afa e’yo yapi onzi ni be. 

Mi zi nga mi ngulupi, olu’ba azi ka ‘yo mini kini mi ma avi lu tepu ki mi akuaa te kanisa ku ‘dini, ‘dani ada ada efi ‘be? Ada ada mi ovuni olezaru ‘dale ku. O’duko azini E’yo alu alu mi ma e’yoni muzu ovuzu lizaruri ma ovu LU erizaru aku emi niaa te kanisaa ku ‘dini? Adripi Branham ‘yo ndra tepu ma ovuki Avizaru kanisa ‘diniri kuye, te le lu mi ma eri lu ma i mi ocepi ru mi ka emu kanisa ‘boria. Mi ovu e’yo eceza azi be ci ada ada?

A’du ecota ovu orudriru ndeni emini emuzu tualu kanisa Opi ni inziria, zoria e’yo vaza E’yo ma driari alea, ru i sizu enyia Mungu vu, aga ovuzu wazaru mini LU…LU O’duko Munguni ovupi ecezaru ‘bo ‘di erizu risi ri ra.   

Mi eco ora ra Yoshuani ‘yoria Israeli dria pini, Ma nira ama ovuki e’yo Musani ‘yori be ko’bo, te Musa ‘yoni dra kini ama ma etraki ama tualu eri ma e’yo si riki lazu ‘dini ku. Ma ‘di emi dri ceria sa ‘di si azini ma nga e’yo Musani riki nze emini ma i.

Ani ‘da vutia eri la ndra e’yo azita alea ‘diyi dria ra, e’yo cucu coza riki azini tritani ri pie, ko’bo erini dria ovuzu sizaru buku azitani alea ri le

E’yo azi ndra Musani fe azitaru ra Yoshua ni awi la kuye ongulumu Israeli ni ma drilea deri oku ki ‘daa indi, anzi nyiri pie azini ani’bo eyi agiruri pie ni yo

Geri azini si, Yoshua ka ndra ovu afa o’duko ‘duzu ri be o’du irini si ci ‘dini, eri ni ‘ba ki etrazu tualu ‘boria, eri talu MI AVI (PLAY) MI I.

Malaki 4 emu ‘DI OPI ‘YONI be ‘bo, azini mi ma e’yo ni nga ovu lizaru e’yo dria ovupi nzezaru tepu pi ma dria risi, O’dukoto oa’dini mi ma afa ‘eyo yazu ri i. Mi eri eri ovuzu idriru, mi ga eri si drazu. 

Ama eco drile ba ma aparaka o’ba ngoni ngoni ya deri ama asiza Ewule ewuleri ma kpiri nga yo? Le ama ma eriki sa dria E’yo ri ra, aku amani pi alea, motoka amani pi alea, bongo ojiria, anzi amani ki embaria, ama motoka ki ojiria, amani aciria, azini amborutu ri, ama ni ama traria kanisa amani pi alea. 

Mi ovu aizaru ru ecizu esele Eri ma Amuroni, E’YO DRIA tepu ma dria ri ki aipira ri be, amani O’dukoti: Agupi Egata ‘Beri Ma Afa E’yo ‘Yazuri 65-0822E, ni erizu Sabatu ‘disi sa aro etu alasi (2PM) Jeffersonvili sa si. Kaniku mi oru mi ocepini tepu azi avizu mi ma kanisa ani emi indi ecoki O’duko alu alu ngapi emi e’dabi ama Opi Yesu Kristo vuri eri beni, azini ama nga ‘di ‘daa ani dri go vule nyakua dika oazu ‘dani’dani beni. CANI ECA CIKA AGA ‘DA RA KU.     

Adri Joseph Branham i

Mesegi (O’dukoti): 65-0822m Kristoni I Ece I Ma E’yo Alea

BranhamTabernacle.org

E’yodri O’dukoti vuri

Amuro Ava-vuza be ri la, 

Ama ovuni drio nga ayikosi ndeni ku, kaniku apizaru ndeni idri amani alea ku. Ama ovu Atita E’yo Ecezasi ri be ko’bo nga drio ri le ku. Wudukuru ni e’deria ndundu. ‘Ba eca ki di azazaru. Ama di afa amani ndra e’yo erizu dri nia idri amanisi dria ri ki neria sa ‘disi pari eyini ‘duria ama miletia ‘di.

O’dukoti alu alu amani eri ri lu ‘yeke sa dria azini eri be afa amani le eri ri i. Eri Nyaka Orindini Saa ‘Yeke Siri i. Ama apiki ra kini Ovu ni egata agu azini ni ki ku, Eri vini E’yo agu azini niki tu indi, Eri E’yo Munguni ovu nzezaru Agu azi vusi, Eri ma Amuro omvezu ani amve ri i.  

Ama eco di ‘yo engazu asi amani alea ra kini:

• O’dukoti oa’di ’Di Opi ‘Yoni Ni.
• Eri Mungu ma geri fe andru ni ri i.   
• Le ni e’yo efi eceza azi ku.  
• Eri E’yo capi e’depi ku ri ni ri i.

O’dukoti ovu pi otizaru amani eri ndra asizu ‘diki enga ki oa oru tu idri ma ni alea. Ale ta lu esele ni ki fe lazaru ‘ba dria ni azini dria azini dria. “Mi eri ndra esele ‘di ra ya… Ma eri ni nga Eri drio ‘daleri ku… Ma eri ca tepu ‘da pale su ‘bo o’du were alipi ‘bo ‘di pi alea te avani nga drio eri ko’bo mani vaa andruri le ku. O’dukoti oa’di ni o’diri aga eri ni ndra ovuzu oluzaru eli 56 vule ‘daleri si ri ra”.  

Afa azi ayiko adaru ri le ni yo nizura kini mi ‘di O’duko Munguni kililiru ovupi e’dazaru ‘bo ri eriria. Le ni ku mini afa mi ta mbazuri ‘bazu oru. Le ni ku mini osuzu kini ‘di oti ‘di i E’yo be ra ri si. ‘Da eri ma egataki kaniku eri ma e’yo efi ecezaki? Le ma ma andri nga ‘da E’yo si ra. 

Oa ni ama i ku, ama lu ri vua, e’yere, azini ‘yo AMENA e’yo dria si, amani nizu ra kini e’yo dria amani eri riki ‘DI OPI ‘YO NI ri ki ri si. 

Cani eca cika kaniku ewakoko ndeni aga ‘dara ku.

Ma enga Mungu zi azini Opi ni ndru azini Eri ma dri ceria muzu drile O’dukoti nabi ni olu asizu ‘diyi pie. Ani ra ama engaki O’dukoti emupi ‘diki nga lu eri emba were alipi ‘diyi aa, te sa dria amani eyi erizurisi, Eri e’yo eceza fe amani eyi dria dika dika.

Aka e’yo ega Amuro Eri ni dria, ru etraria tualu wudukuru si ara, teria, asi ‘baza angiri ni be O’dukoti eyi ni e’dozu erizu Munguni e’yo nzeria eyini engazu Eri ma nabi ma tiasi, ma ece ayikosi tu. Afa erini mu ece amani andrusiri a’duni?

Engaza o’dua risi amboruni pari ‘duria wudukurusi ara. Amuro ni wuria ‘yoria:

“Ale ki tepuki eri. Ale ki play (mi avi) mii. Ale ki ovu ecizaru tualu Amuro be wudukuru si ara”.

Ama ama eciria tualu azini riria tualu indiki indi Mvi niri alea, nizu, ecezu ngonde ‘Duta buari ni. Ale mi ai emuzu nizu ama ‘be sa aro etuala si (2PM), Jeffersonvile sa si, amani eriria Munguni e’yo nzeria Amuro I ni be azini O’dukoti, Kristoni I Ece I Ma E’yo Alea 65-0822M ni egizu.

Adri Joseph Branham i

E’yo siza la de nga ‘ba eri O’dukoti ku ri ki:

Efuza 4:10-12
Isaya 53:1-5
Yeremiya 1:4-9
Malaki: 4:5
E’yo Ba Lukani 17:30
E’yo Ba Yohanani 1:1 / 1:14 / 7:1-3 / 14:12 / 15:24 / 16:13
Galatia 1:8
2 Timiteo 3:16-17
Ebrania 1:1-3 / 4:12 / 13:8
2 Petero 1:20-21
E’yo Eceza 1:1-3 / 10:1-7 / 22:18-19

Mesegi (O’dukoti): 65-0815 Azini Niki Ndra Eri Ku

BranhamTabernacle.org

E’yodri O’dukoti vuri

Aji Ru Etrapi Tualu ‘Diyi La,

Kiri kiri, saa ngoleni ya, saa ngoleni ya! Afa azi ovupi ‘yezaru ku ni yo. Mungu ma Aji ki ru etraria Za o’diru ageyia. E’yo nabiruri ni pari ‘duria. Sa azi aluni yo Erini e’dezuri, azini Eri cani nga ku, a’disiku ama, ovupi ndra ‘bazaru drio Eri nezuri, ki Eri neria.

Engazu Ata ni I ma nabi ni ‘duzu akua ‘boria, Eri ma Amuro drio ovuni nga ecizaru Eri ma O’duko ageyia ko’bo andrusi ri le ku. Pe ndra geri Eri ma E’yo ngazu emuzuri ra, ani ‘da Eri ma nabi, ovupi ndra ‘bazaru drio azini okoru ‘diyi pivu si. Ama apizaru azini aizaru, kini ‘di Yesu Kristo i fe pi I ma ngulupi nipi, I ma ngulupi e’dapi e’yo nabi ruri si ri i.  

Geri ndra Eri ni anzi Israili ni pi ma dri cezu roko dria si, aci eyini aliari, ecetaru ‘ba ovupi omvezaru-amve’bo andrusi ri pini ri. Eri di ‘dia indi, e’yo oneza science ni si, ata fe I ma ngulupi nizu ra science ma drilea. Azini Eri ma e’yo ‘yeza alu aluri ki si azini Eri ma e’yo ondriza nabiru alu alu ri ki si, afa ndra ovupi ondrizaru kini Eri mu ‘ye o’du ‘di alea ri ki, fe pi I ma oa alurile aje, andru azini ‘dani ‘dani ri, ovu ‘yekeru ecezaru ‘bo. ‘Da cani ku ya fezu ama asini vezu ale amania?   

Ko’bo ‘ba ti opele o’du ndra ‘daki siri le, ama ovu ‘bazaru Idri alea ‘bo. Afa lu ci amani ‘yeri lu fezu Eri ma O’duko ma ovu nizaru ri i. Azini O’duko alu alu ‘da eri Mungu ma egata ovupi e’dazaru ri i. Ama aiki Eri ma dria ri ra. Le ni amani e’yo nde e’dazu geri science nisi ‘dini ku, kaniku Sadukai azi kaniku Farasai azi kaniku ‘ba azi cini zizu ani ‘dini ni ku. Eri ‘yo ndra Eri ra azini ama aiki Eri ra. Eri ma kabilo ki Eri ma O’duko eri, e’yo nzeria Eri ma nabi vu si.

O’dukoti oa’di eri O’duko Munguni tepu ma dria ri i. Eri E’yo Eceza dria Yesu Kristo ma dria ri i, E’yo Oku ki O’di ri be ‘bazaru tualu. E’yo zizaru dria ri ki, ovu ki ecezaru ‘bo. Ama o’bani dri nia ku kaniku ‘duni Erivu si ku. Ama lu ‘ye Eri ndra yo ama ma ‘yeki ri le, EMI OA E’YO BE. 

Di be ‘da. Eri agu aaleru ri i. Aa E’yo ma ti ape pi, i iipi E’yo be ri i, ka tro ovu a’duni.

Ondri ndra nabiru’bo azini lu ndra amani kini ‘da ni nga pari ini ‘du ra. Wudukuru dria ni nga ovu etrazaru aza alea, azini eri nga eca onzi azini onzi azini onzi, kpere ki nga eca aza’ba azi kakau ni ki.

Eri ‘yo ndra kini sa ‘di enyia akaki ‘di e’do afa ‘di ki ne eyi ‘yeria, afa azi ni nga I ‘ye ra. Azini O’dukoti o’diki dria ndra eti ‘baza ni azini eyi ndra eti ‘baza ‘ba O’dukoti wereru, mbele mbele ngapi suru dria oyapi ri ni. Ma aira kini ama di afa nde ki neria pari eyini ‘duria sa ‘disi.

Azini ani ra kini, mani muzu nyakua ‘diarisi ‘boria, tepu oa’diki azini buku ‘di pie nga oa idriru, azini emi oderu ‘di ma kakau ki nga isu o’du ngapi emupi ri ki si, kini oa’di ri ko’bo e’yo Adani, adisiku Ma eri nze Ru Opinirisi.

Ama ma eriki azini fe ki asi enyia e’yo dria orobiru nabi ni ndra olu ama ni ri ki vu. Geri ndra eyini eri nezu pa soria oni azi e’dopi engazu etuni efuria kpere etuni ‘deria ri dria ‘da i, oni ‘da ndra dri mbiliru ko’bo afa piramidi ruri le. Geri ndra erini oazu akanya azi eyini drio ne idri eyini alea ku ‘dileri dria; akanya amboru emve ni, ovupi ‘biko dria emveru i e’yipi vua ni be.

Geri ndra iriti emveru ni esizu vua azini eri ‘bizu azini eri ‘duzu oru ‘da i. ‘Da ma vutia sa were si ovu di ‘bazaru dri mesa ni ria azini eri ndra emve sisili. Eri ndra pasozaru ‘daa azini nze ndra e’yo okpo be. Abaza azi ndra erisi yo. Agupi ‘da pi ma alu alu dria va ndra ko’bo afa erini ‘yo ri ra.  

“Ma nga nzu geri ‘di alesi pale alu dika!”

Ma aira ama ‘da neria pari ‘duria andrusi. O’dukoti oa’diki nzuria geri ‘da alesi pale alu dika. Mungu ni I ma Aji ki omveria tualu engazu wudukuru si ara. Ki eyi etraria Eri ma E’yo ageyia, Eri ma O’dukoni azini O’dukoti oa’di i.  

Wudukuru pililiru, ocokoru, anzuzaru, mile koko, azini niki eyi ‘dale ari ku. Te Amuro i suzaru E’yo si, dizaru Orindi alea, ayikoru Eri ma Yikii si, azini ama eco ne ra azini aniki ra kini ama: ERI MA AMURO I. 

‘Yo ndra amani eri ni nizu risi ria, neni ndra afa azi aluni ku Emuta Opi Yesuni ri atripi sa ‘di aleari, pelu Eri ma Kanisa ni ovuzu otuzaru ri i.  

Aji la, ama ma ‘baki ama gonde. Ma emi ai ru trazu amabe Za o’diruri ageyia Sabutusi saa aro etualsi (2PM) Jeffersonvili sa si, O’duko Munguni o’du amani ri niri erizu ama ‘bazu gonde ‘Duta oru emupi mbeleko cici ‘dini amani: 65-0815 Azini Niki Ndra Eri Ku ni erizu.

Adri Joseph Branham i.
    

E’yo Eceza 3:14-19

Kolossai 1:9-20

Mesegi (O’dukoti): 65-0801e E’yo ‘Yezaki Ovu E’dazaru Gboru E’yo Nabirurisi

BranhamTabernacle.org

E’yodri O’dukoti vuri

Kristo Ma Aliria Wereru, E’yo, Kabilo, Amuro La,

Ama Eri ma Amuro E’yoru ri i ama Izio E’yoruri azini Eri ma oaza anyu aa Eli alifu aluri teepiri ki. Ama nga lu O’duko alu eri i. “Ma kabilo niki Ma O’duko ci. Caki ni nga ani’bo vuti bi ku.” Eri ma O’duko a’duni?

 ‘Ba cini ma o’duko eri eri ma e’yoni. Ani ‘di di be i, Bibilia ni, e’yo azi aluni ma ovu o’bazaru Eri dira ku kaniku ‘duzu Eri vusi ku. Emi oa lu O’duko ‘daa be ogogo. “Caki ni nga ani’bo vuti bi ku,” dini azi ni.

O’duko ‘daa Eri ma O’dukoni, e’yo nzepi tepu ma dria ‘daa i trai lu ‘ba e’yo efi Eri ma E’yo niri ecepiri i, Eri ma nabi i, William Marrion Branham i. Eri Yesu Kristo i e’yo nzeria tile ‘ba ada nisi. Ama asiki ‘ba ma e’yo nzeri kisi ku, ‘ba ma egata kisi kaniku ‘ba ma e’yo efi ecerisi ku, ama lu asi O’duko ovupi edazaru’bo o’du amani ri si. Eri ‘DI OPI ‘YO NI NI.   

Mungu oji ndra ama nabi ma driki. Mungu oji ndra eri ma miliki e’yo nezapi alea. Econi ndra afa azi e’yo ku pelu eri ndra ne riki. Econi ndra afa azi nze ku, a’disikuni eri ma idre, erim ma driki ki ndra dria Mungu ma dria, afa eri ma rua riki ndra dria aci Mungu ‘be. ‘Ba osu niku Bibilia ni ‘yozu kini Eri ma nabi ki ndra munguki risi; ki ndra Mungu ma esele ki! Eri ndra Mungu ma E’yo ovupi e’dazaru o’du amaniri aleari.     

Bibilia oadini e’yo lu drioru, e’yo nabirurisi, o’du azini saa amani oazu alenia ri. E’yo ta mupi pari yini ‘dopiri ki ngokiari. Eri ki olu drioru lu ko’bo nukutani pi vu, azini awini nga ece ayi aluni ma aa ku. ‘Ba ovupi ndra drio ‘bazaru nezu riki nga Eri nera. Eri E’yo i ru ecipi E’yo be ri.

Ayi dria alea, ‘baki fe agu pini eyima e’yo efi eceza yini riki ‘ba E’yo oada dria, azini eri fe eyi ma mile ma ovu o’buzaru e’yo ‘yeza e’yepiri nezu. Afa alu alu erini ndra ‘ye Farasai pini Sadukai pie ri.

‘Yoki ndra ‘ba pini, “Ama ‘ba odu osuza ‘be Mungu niri ki. I leki ama ra E’yo ‘yo ngoniari luzu emini. I leki ama ra Eri ma e’yo efi ecezu emini.”

Kile erini ndra ovuzu o’du ‘da siri le eri vini andru. Afa di ‘ba olepiri eyi ni ovuzu odu osuza Orindi Alari niri be ci risi. Ovuki omveta be engazu Mungu vu E’yo bari oluzu. Ki ta mbaria olu ‘ba pini nabi ‘yo ngonia ri, te eyi ma kakauki E’YO EFI ECEZA YINI NIKI ‘BA ERI ALEA eyi ni fezu eyi ma azi ngza ma ovu orodriru ndeni aga O’duko Munguni mbari ra risi.

Ene nga geri eyi ni lezu ‘baki etrazu eyi ma azi ngaza ma ageyia ri, eyi ma e’yo efi eceza Mungu ma nabi ‘yo ndra ngoniari ma ageyia, te ewakokoru caki ni ‘ye ku.

Ki yi ozi vule azini ‘ba pini ori fezu ani ma aviki tepuki kanisa eyinia ku beni, eyini ‘yozu kini, “’Ba ‘daki agu ‘da ma e’yo epi amba mba azini ki eri inzi i Yesu Kristoni inzizuri ma paria. Eri dini ni o’dukoti azi erizu dria tualu sa alu alea engazu pari alunia. Adripi Branham ‘yoni ndra kini tepu ma ovuki avizaru kanisa aari ku ye”, ‘daa ki di asisile mba ‘da tru te, leki lu mbaria tepuki avi kanisa eyi pi ma alea ku. Eyi ma azi ngaza, eyi ma e’yo vaza, eyi ma omveta eri omboru ndeni aga tepuku erizu kanisa eyini alea riki ra. Caki ni nga ECO I KURI ‘yo gbo ku, te eyi ma a’yo ‘yezaki e’yo nze eyi ma paria ni.

Oluba ci adaru, ‘yopi kini i ai kini ‘di O’dukoti adaru sa asiza nisi, ovupi O’duko Munguni o’du amaniri i ri, cakini nga eyi truzu tepuki avizu kanisa eyini alea ku ‘dini ku. MI ANDRI NGA E’YO NZEZA OA ‘DAA AMURO E’YORURI RISI. 

A ‘yoni nga kini ‘ba dria ma eriki sa aro etualasi, Jeffersonvili sa si, ka adreku mi Amuroni ku ‘dini ri kuye, TWAYO. Ma inzini nga agupi azi ku. Eri Yesu Kristo i diza dria esupiri. Ma Mungu agu ‘da aleari inzi i E’YO ni ‘yo ama ma ‘yeki rile. Ki enzoru azini mili koko ngole ya. Mi la lu E’yo siza i ma adripi, eri ‘daa ogogo.

Sitani NIRA kini olu’ba cini, kaniku ongulumu olu’ba pini niki, cakini nga Amuru egizu tualu KU; ata eciki vini ti azi ni’be ku. Ko’bo lu Methodisti pile, Baputisti pile, Pirisbiteria pie azini Pentekostali pie ri le, eyi ma cini kaniku amuti eyini ecoki Amuro etra tualu ngoni ngoni… ECO BE LU INI I KU 

AFA LU CI ECOPI AMURO ECIPI TUALU RI O’DUKO MUNGUNI TEPU MA DRIARI I…AZINI ERI ERI ‘YERIA!

Ari’bo ngu ‘da onzi, ani eri ‘di o’bi eri anzu, te econi nga i ku ‘yezu ‘da le….DIZA!

Ko’bo driorile, ki sa dria, ayi ni i ‘deria, ovu abaza azi alea eyi ma embapi dini ni azini eyi ma atalo pivusi kpere eri sa dria oa abazaru. Sa dria eyi ma e’yo efi eceza enzoru, sa azi alu ni yo eyi ni e’dezu ovuzu enzoru kuri. Azini sa azi alu ni yo Mungu ma E’yo ni drio e’dezu oazu adaru te ri.      

Geri lu ewakokoru erini ovuzu nizaruri, mi ni oazu E’yo beri i, O’duko Munguni tepu pima dria ri. Mi la Bibilia mini, eri nga lu mini e’yo ta mupi pari ‘dupi o’du ‘di ma aleari ngo ki ari ‘beni. Eri nga mini e’yo nze Ima malaika amboru ngapi emupi o’du ‘di aleari ma dria. Eri nga lu mini kini mi ma oa O’duko Oa’da be, mi oa ‘ba o’dukoti ojipi     Erini pe’bo ri be.

Sitani ka Buku azi ngu onzi Bibilia aa ra ani, eri buku E’yo Ecezani ri. Ovu ndra sizaru Kristoma Ngulupisi. Ani orindi ‘da ni yorisi, Kristo ma Ngulupi le ma ‘ba ndra e’yo nzeza Eri ma malaika 7 zuri dria amba mba.

Azini e’yo ‘diyi ma vutia Ma ndre ndra malaika nduni emuria vaa engazu ‘bua, okpo amboru be; azini nyaku ovu ndra dizaru erima diza si.   

Kristo ma Ngulupi yo ndra kini nyaku ma dria ri ESU NDRA DIZA RA ERI MA DIZA SI. ‘Yoni ndra kini ovu dizaru “MA DIZASI” ‘dini ku. Ani mi vatasi, mi di ‘di Kristo ma Ngulupi ni to Eri ni e’yo ipizu amba mba Ima ‘ba o’dukoti ojipi malaikaru 7 zuri ma dria ri si.   

‘Ba o’dukoti ojipi ovupi nyakua ‘da ni ndra enyia ogogo Kristo ma Ngulupi be, Yohana obi ndra eri dri inzita fe, PALE IRI, te ‘yo “YO!, mi inzi Mungu i.” ‘Da di lu ko’bo afa ama ni ye ri i, Munguni inzizuri i. Ama ipini e’yo amba mba angu ‘da ma dria ku, ama lu e’yo KRISTO E’YO I NI ‘YORI ‘yo i….”nyaku ovu ndra dizaru eri ma diza si”. ‘Dani amani Atita fe E’yo Eceza si.

Munguni Ima Ngulupi ma peta peni, ovuzu ‘bazaru ndra oko risi, pe ndra nabi ki ayi dria pini. Mi ne eri. Eri nabi ‘da ma obi ‘ba oazu ayi ‘da alea beni. E nera, Eri eri ma e’yo ‘yeza ‘ba, afa dria erini ‘yeriki. Eri eri ‘ba ka tro oa onita’bea kani onita koko ti. Eri fetaki .’ba, geri eri ni muzu e’yo oluzuri pie, feta eri ni mu ovuzuri pie. Azini O’dukoti sa ‘da ni ri ni, Mungu ‘ba ndra drio’bo kini afa azi ni mu i ‘ye azini afa azi nduni mu pi ‘da ma pari ‘dupi ni yo.  

Mi avi tepu azi, tepu cini, Sabatu ‘disi, afa azi cani Eri ma pari ‘duku. Mi ka le mi eci Branham Tabanakulu be ra amani tepu azi eriria, mi ovu aizaru azini mi aizaru mi ecizu ama’be Sabtatu ‘disi saa aro Etualsu (2PM), Jeffersonvili saa si ama ni E’yo ‘Yezaki Ovu E’dazaru Gboru E’yo Nabirurisi 65-0801E ni eriria.

Adri Joseph Branham i

E’yo Siza ki

Edoza: 22:17-18

Zaburi: 16:10 / Chapter 22 / 35:11 / 41:9

Zakaria 11:12 / 13:7

Isaya: 9:6 / 40: 3-5 / 50:6 / 53:7-12

Malakai: 3:1 / 4th chapter

E’yo Ba Yohanani 15:26

E’yo Ba Lukani: 17:30 / 24:12-35

Rumi: 8:5-13

Ebrania: 1:1 / 13:8

E’yo Eceza: 1:1-3 / Chapter 10

Mesegi (O’dukoti): 65-0801m Mungu Ayi Onzi ‘Di Vuri

BranhamTabernacle.org

Amuro Atipi E’yo Ecezasiri La

A’duni ndra i ‘ye wudukurusi ara wiki ma deta alipi ‘bo ‘di alea ni ya? A’du ri pari ‘duni? Kelele da ndra a’du dria? Amuro engazu wudukuru si ndulu ki ndra ecizaru tualu, ‘be amboru e’dezu simiti si, odri si, cinya si azini kalika ki si. Rutraria aci yuza ageyia, ongo inzitani azini ru ecutani ‘diki ngozu Opi dri. ‘Ba odeki dezari pie alurile, bongo satiru eyini su ri agetia ‘yo kini Atita Eyo Ecezasiri. Ki ndra engazu angu Micigania pere Floridaa, engazu Maine pere Kalifonia, engazu suru Amerika ma kale oruria pere kale andra Amerika ni ria, Mundu anguasi, Afrikaa si, Asiaa si, Australiaa si, angu dria nyaku vuri alea. Ki ndra eriria simu eyini ki si aku yi nia, eriria O’duko Munguni ni e’yo nzeria eyi pie kpi.  

Afa ndra ‘ba asi esepi ri adu? Ori fi Munguni ‘ba drio ‘bo afa azi nduni ma vuti bizu ku te lu O’dukoti sa niri bizuri, E’yo dria tile Munguniri ni ndra nze ‘bori aipi rari, traki ndra yi tualu ru ecuza alea, inzita alea and ayiko zuza alea e’yo ‘yeza ndra amboru pari ‘dupi o’du amani alea ‘Be Sunset ni ma dria.

Eri ndra Mungu i  I ma E’yo e’dapiri. Kalele ‘di di be e’yo ndesi. Ine nga, eri Mungu i I ma E’yo aziri feria pari ini ‘duzu dika, Eyo Eceza 10:1 pere 7 ni ‘da i, Te o’du, O’duko malaika aziririnisi, erini ‘O’dukoti vuria, e’yo zizaru Munguniri de i ra. 

Eri ndra Mungu i adi e’deria. Munguni ndra e’yo ondriza fe pari ini ‘du. Eri ndra ovita nabi ma e’yo ondri ri niri. Azini aleki ndra oa ‘daa ci afa ci Erini ndra ‘ye I ma nabi vusi riki esuzu azini erizu.

Afe asi amani e’yo nze ama rua onzi engazu ‘ba aibaku azini aiba nusururi pivu ku. Aga agata eyi pie ku. Ama ovu afa ‘yezaru aluni be, ‘da lu aizu azini e’yo dria amani eco birari ki bizu. Ama ama tra tualu wiki alu alu si ‘ba aluru O’duko Munguni erizu, amani Emuta Messiani teria.   

Saa amani oazu alenia amboru ‘do ngo i. Ne ria E’yo siza pini pari ‘duria idri amani mbari alea. Te li ama bile ra E’yo Erini alea kini odu osuza enjoruriki nga ovu ejizaru, eco ta ra ‘ba opeza Munguni riki olezu KATA i ecoraria. Te rukuza ma ovu Mungu vu, cani mu ovu ecozaruku Amuri Erini olezu, adisiku ki nga oa O’duko Munguni oko, I e’dapi’bo azini ru ecepi ‘bo daa be azini cakini e’yo wereru kaniku ndumba aluni ojaku. Cakini nga e’yo eyi ma omi ni o’ba Alenia ku, te lu E’YO DRIA ai i.  

Ama oadi milisi ngole ya afa nde ka oa ENYIA ‘DALE. Ama osu, eri nga ovu kanisa dini diyi ya? Ki e’da re ambamba azini oakini enyia ku. Eyi nga ovu a’diki?

Saa ‘disi, lu kanisa ambiza, tozaru, avakoko diyiki, azini pie, agupi pima e’yo edeni dini drai diyi pie, ‘da cakini; ‘Ba Pele’bori feni asi ini e’yo da riaku. Te eri oru ‘daa adani ko’bo afa mbari le. Lu e’yo E’yoni aluni kuzu amveri belu afa mini eco ‘yeri i.  

 ‘Yoni ndra kini Eva fulu ndra muzu amve azini ‘yozu ale inisi kini i ai Munguniku ‘dini ku. Eri ndra enzoni erini airi. Sitani ai ndra ra kini Eri ndra E’yo Munguni, te e’yo  ndra ewaruri ndra erini i ma e’yo vaza ini ‘bazu Eri aleniari i azini fe’di oku da ni e’yo aizu ani ovu’di ndra tozaru. 

Ngukuni ovu’di nzizaru ‘bo. Piramid ovu’di nzizaru’bo. E’yo siza ovuki ti nzizaru’bo. E’yo Eceza ovu fezaru ‘di Amuro dri’bo. Eri Yesu Kristo alurile aje, andru azini ‘dani ‘dani ri i. 

‘Dani fe Sitani ma asi ve amani tu. Nira kini i nga mu emu asiza inia ra. Eri le aziki ama ama a’diki ari. Ama mu obeta pi aleasi azini o’bita kongolo aga amani drio alizu aleaniasi drio riki ra. Aziria ama osu, ‘diki dria yi ‘ye amabe a’dusiya? 

Asisile niri, eri Eri o’bizu, Eri ma Amuro i. Eri… Ka I e’dabo, ovu o’bizaru’bo, ovu e’dazaru ‘bo, e’dai’bo Sitanini.

Dizaa!!! Ama obetaki o’bita pie ki lu Eri I eceria Sitanini kini AMA ERI MA AMURO E’DAPI’BORI I.

Ama isu sa si, ayi onzi oa’diri e’dazu Sitanini, Ovuni (Amuro) Eva le ku, Ovuni oku azi ‘daleni i ku. Eri nga ovu o’bizaru E’yo Erinisi, Amuro i, ko’bo Adamu ma amuroni ndra ovuzu o’bizaru E’yosi rile. Ani Adam ma amuro ai ndra E’yo ma alu alu ra, dria, te aba ndra aziza alusi. 

Te acani nga aba E’yo ma e’yo alusiku kaniku muzu eyi ma a’bi vutisi, kani eyi ma e’yo eceza E’yo dria ri si, ama nga oa E’YO OKO ‘YEKERI ‘BE.

A kaki ovu afa tepu avipiri ‘be ci, ama nga ongulumu ‘ba pinini ki etra tualu eri avizu, azini erizu enyia, lu erini ndra ‘yo ama ma ‘yeki rile.

Lu ko’bo ama adriza azini e’data pini ovuzu efezaru emivu geri emi ata ni tizurisile, vini ‘dale indi Orindi Munguni, ndra ovupi ‘bazaru denga wudukuru vuti ovuni ‘bazaru kuri.     

Ama awa’difosi tu Orindi Munguni, amani ovuzu tizaru ri, ovu ndra ‘bazaru ‘bo denga wudkuru vuti ovuni ‘bazaru kuria ovuzu E’yo Eceza Adaru O’dukoti ‘Diniribe.

Mio vu aizaru emuzu atita E’yo Ecezasiri esuzu ama’be Sabatusi sa aro etualasi (2PM), Jeffersonvili sa si, amani: 650801M Mungu Ayi Onzi ‘Di Vuri eriria.

Adri Joseph Branham i

E’yo siza la riki:

E’yo Ba Matayoni chapter 24/27:15-23

E’yo Ba Lukani 17:30

E’yo Ba Yohanani 1:1 / 14:12

‘Yeta 10:49

1 Koronito 4:1-5 / chapter 14 

2 Koronito 4:1-6

Galatia 1:1-4

Efeso 2:1-2 / 4:30

2 Tessalonika 2:2-4 / 2:11

Ebrania 7 

1 Yohana Chapter 1 / 3:10 / 4:4-5

E’yo Eceza 3:14 / 13:4 / Chapter 6-8 and 11-12 / 18:1-5

E’yo Obeza 3:5

Isaya 14:12-14

Mesegi (O’dukoti): 65-0725m Ba Odu Osuza Be Saa Asizani Siri Ki

BranhamTabernacle.org

E’yodri O’dukoti vuri

Amuro Pele’bo leleturi,

Asisile Yesuni ndra ‘yo ‘Ba opezaruri pini cazu ovuzu olezaru kuri, eri adisiku, ki E’yo ‘da i. Cakini ovu afa azi nduni ni ku. Cakini afa azi nduni ni eri ku. Nikini afa azi nduni ni ku.

Afa azi idri alea ovupi angiri ndeni aga nizu kini Mungu pe ndra I ma nabi ni E’yo ‘diki nzezu denga wudukuru ma eti ovuni ‘bazaru kuri ni yo. ‘Daa ani, fe di Eri ma O’duko ma ovu ‘duzaru, ani ama, Eri ma Amuro ‘bazaru drio’bori ru, ecoki di luzu vule ra O’duko Erini ndra ovupi ‘duzaru azini ta mbazaruri erizu, a’disiku Eri le ndra ama ma niki:

• Ama E’yo i
• Acakini ovu olezaru ku
• Acakini ovu afa azi nduni ni ku
• Acakini afa azi nduni eri ku
• Anikini afa azi ndunini ku

Ni ndra ra kini ama nga ava engata le andrusi tu ovupi nga o’du a’diniri ma aa kuri. A’dini ‘di ‘daa nga ovu angiri aga drio ri ra. Eri ma Amuro ni nga ovu ‘bazaru o’bita alea ra. Te Eri ka ta eco Eri ma Amuroni egazu ki a’diki aria ra, ecoki ta ayiko zura asi yi nia, nizu ra kini yi ki Eri ma ‘ba aluza ovupi Eri ma ale ‘yekeri alea ri ki.

Afa dria sitani ni e’be amavu ri ki, afa dria amani muzu alizu ale nia ri ki, saa ‘disi aniki ra kini, Eri Amuro Azi Peria, azini ama Amuro ‘da i. Ama ovuni Drinzasi ama E’yo-vaza E’yo ni ri siku. Acakini mu O’bi Azi Azi Ngazu Mungudri Dere Ovuni Ale Munguni Ri Ku ‘Dini Ku. Amani ria, eri Nyaka Orindini Saa ‘Yekesiri. Ama amaki ra kini ‘Ba Odu Osuza Be Saa Asizanisiri ki nga ovu ra, te ama nga OA E’YO BE.

I kata ‘di asi baza alu alu ‘di le ra, mi emu mi ecizu amabe Sabatu ‘disi sa aro Etu alasi (2PM), Jeffersonvili saa si (Saa na inisi Ugandaa) emuzu: 65-0725M ‘Ba Odu Osuza Be Saa Asizani Siri Ki erizu.

Adri Joseph Branham i

E’yo ba Matayoni 5:44-45 / 7:21 / 24:15-28

E’yo ba Lukani 17:30 / 18:1-8

E’yo ba Yohanani 14:12

Efeso 1:5

II Timitoyo 3:1-8 

Ebrania 6:1-8 / 11:4

E’yo Eceza 10:1-7 / 16:13-14

Malakai 4:5

I Opi 22:1-28

Yeremia: Capta 27 & 28

Mesegi (O’dukoti): 65-0718e Nyaka Orindini Saa ‘Yekesiri

BranhamTabernacle.org

E’yodri O’dukoti vuri

Kabilo Munguma Kabilo ma Joa leletu ‘diyi,

O’du ndra ama Opi Yesu ni oazu nyakua ‘dia ruati aa risi, ‘ba aibaku azini omi ejipi ku ‘diyi ‘yoki ndra Erini:

Mi nga ama ‘ba abaza alea pere ngopi? I ka oa Kristo i, mi lu amanni gboru. 

Pale alu diki, Eri mu e’yo nze ama’be gboru azini luzu ‘ba Eri e’depiri pini azini Eri ma Amuroni, “Ma agu azi engapi Munguvu ni, Munguni ti epe ni ni, Munguni ‘ba ni ni, ‘Di OPI ‘YONI adaru ri be ri. Ma enga oa indikindi Erini alea saa ezu, Ma mu ‘eyo nze emini kobo Mungu ma Ngulupi le. 

Aleni abaza ma oa ku, azini mini iazu, Ma mini ria Munguma ‘ba o’dukoti ojipi ri i. O’dukoti mani oluri i, azini ‘ba o’dukoti ojipiri ki afa aluni. Ama alu azini alurile. Epe ma ti emivu pasozu ‘Di OPI ‘YONI be, E’yo alu alu be tia.

Mi egara kini, Mungu ma E’yo ‘yo kini I cani nga afa azi ‘yeku kpere Ini ecezu mani rakaka. Agupi leki yi ma efi eceza yini riki ‘ba e’yo mani ‘yori dria, te E’yo mani lu emini ‘di lekini efi eceza azi ku. Mi ‘yo LU afa Mani ‘yori i.

Ale vini enikira kini E’yo alu alu mani lu eminiri, ni vini oa idriru ama alea. Mi ovu okpo Mungu idriruri niri be mi ma alea. Mi Kanisa Amuroru idribe ri i. 

Mani muzu ‘boria, te denga yi liki e’doku, Mungu fe midri angu azi zizaru mini mi zizu denga e’yo liza eca nga nyakua ku. Mi nga ovu daa teria, Nyaka zizaru Erini nga ku mini di nyaria. Mi nga oa onyi azini yiki E’yo eceza Yesu Kristoni si Erini I ma ngulupi e’daria mi dri o’du dria.

Mini ria, Eri nga oa Nyaka orindini saa ‘yekesiri. Eco fe azi ‘diyi ma ovuki azuru ale yinia ra. Ma nga ovu amabamba eyini. Tee mi ni, Eri ma Kabiloru, Eri nga oa Mikati Idriniri, Yesu Kristo alurile aje, andru azini ‘dani ‘dani.   

Mi aviku, Ma nga mi dri ta fe “DAA”; oani angu azi ndunia ku, “DAA”. ‘Ba ki nga mi gu azini ‘yo mi azazaru, te afa eyini omve azazaru azini efikokori, Munguni nga omve Ambo.”

‘Yo ndra amani kini azingaza amboru Munguni fe I dri ri ndra eceta ‘yeke saa Elia niri niri i. Saa yi akoniri ka di mu eca ru’deria, omve eri amve eri jizu andre awizi azi ma AKUA kpere yi liki ni e’deria.

‘Yo ndra kini awizi daa ecini ndra i ‘ba ai’baku diyi pie ku ye kaniku ‘du ni ndra ala nguruniri kuye saa yi liki nisi, ani Mungu omve di Elia ni oku ‘da tambazu. Eri ndra ngonde drazu erini ndra awizu lu mikati wereru alu berisi, afa alu wereru ci erini ndra acezu eri beri.

Elia ‘yo oku ndeni, “Mi fe ‘daa madri raka, adisiku ‘DI OPI ‘YONI, afajo ‘daa cani nga eca gboruku vini afajo oduniri cani nga nzuku, kpere o’du nga Opi Munguni ozo ti epezu nyakua ri si.” 

‘Ba di ndra be Munguni oko. Aidi ndra azini bi ndra be E’yo dria ‘ba o’dukoti ojipi oada ni ‘yo riki. Ni ndra ra kini ‘ba o’dukoti ojipiri ki O’dukoti erini ri be afa aluki. E’yo ndra erini ‘yo erini riki ndra di be ece pari yi nia ra, adisiku eri ndra ‘Di Opi ‘Yoni ni.  

Vini eri ‘dale andru, kini Mikati Idrini anzi pini nyari ni, O’dukoti Munguni ma vuti be, eyi mata mbazu saa yi liki nisi.   

E’yo alu alu daa emu amavu ‘bo azini eri ama alea azini ama di Afa Munguni zizaru ovupi zizaru engazu wudukuru vusi diki nyaria. Ece amani ‘bo kini O’dukoti ki ‘ba o’dukoti ojiri be alu. Nyaka orindisi ri gonde, azini Eri saa ini ‘yekeri alea saa di si.

Mi ovu aizaru kiri O’DU AZI AMURONI NUKUTA-EKARU NDUNI ALEA. Ama nga ama afajo Odu be ri bira, azini eri nga ga tre. Ama nga vini anyafura endi afajonia ra, Eri nga ga tre kpere ti nia. Ama nga ri tualu angu Bualeru ria wudukuru si ara, ovuzu zizaru angu zizaru alea, aluza Mana zizaruri niri etumuria Munguni Ima ngulupi e’daria amadri.    

Mi emu ru trazu Kabilo ma joa ama be Sabatusi saa aro etulasi (2PM), Jeffersonvili saa si, amani eriria ‘ba Mungu ma o’dukoti ojipiri  ni O’dukoti: Nyaka Orindini Saa ‘Yekesiri 65-0718E ni ejiria.  

Ama dra sende dolla alu efi kali aro si mu kanisa jo si, ‘ba ka kau motoka e’edepiri ‘yoki ndra ‘da ni mu ovu angu eyini nga motoka e’dezuri i. Te eri nga kiri Kabilo jo Mungu ma Kabilo niri. 

Adri. Joseph Branham i

Scriptures to read

1 Opi 17:1-7

Amosi 3:7

Yoweli 2:28

Malakai 4:4

Luka 17:30

E’yo ba Yohanani 14:12