A’i’ba Adaru Leletu ‘Diyi,

Ama ko’bo anzi Isiraelini andra efupi amve engazu Misiriasi ani pasozu enyia ogogo Angu Azileri vu ri pi le. Ama enga dria ovu aci aa tualu. Aneki dria tali Munguni alu aluri ki ‘bo; aleki dria mana azini yi engazu Oni gbaleri vu alu aluri. A’yoki dria kini ama Aci Piriru ‘da ma vuti bi ‘dini. Te LU IRI caki andra Angu Azileri ma aa ni andra ‘dasi. A’dusi? LU IRI KI ANDRA A’I’BA ADARU KANIKU MGBA RI KI NI. Esele coza andra ‘dasiri pivu sawa ‘disi ri be ri a’duni?  A’i’ba adaru ri awiki andra oa E’yo be.

Ongulumu azi nduru ‘bapini ecopi afa Orindi ni ‘yori eripi ra ri lu alu. Ongulumu azi nduru aluni’i E’yo Eceza adaruri aipi ri. Ongulumu ‘da ni Munguni. Yi afa Orindi ni ‘yori eri azini Eri ai.

Ama ongulumu nduru ovupi Orindi Mungunirini ri be ri’i. Ama ‘ba osipi Munguvusi riki. Ama ‘ba fipi ruati Opi Yesu Kristoni ma aa baptizisi trai Eri ma Orindisi ri ki.

Sadini adaruri eri afa Orindini ‘yori ERIZURI i. Orindini e’yo ‘yoria. Orindi ni embaria. ‘Da lu ko’bo afa Yesu ni andra ‘yo Eri ta ‘ye sawa Erini andra emuzuri siri i. Yohana 14:26, “Eri nga emini afa driaki emba, azini afa driaki eji egata eminiri pi alia, afa dria Mani ‘yo emini ‘diki.”

Yesu azi andra amani Eri ta nga mu oa ama alu alu pi alia. Eri ta mu ama dri ce, amani geri e’da azini ece ‘ba ndundu ru. Te eli 72 vule ‘dale andrusi, Mungu nze andra e’yo Ima malaika amboruri vusi ani ecezu mgboru wudrikuru dri, “Ma O’duko Munguni ri i emi dri”. Eri lu andra afa dria idiri pie ‘diyi ni “Ma’i, Orindi Alatararuri’i, ovu O’DUKO azi be ci Mani nga ayu e’yo nzezu emini azini ma e’yo siriru riki ecezu ri”. Eri enga andra nga drio ovu driwala be ku Ima O’dukoni ovuzu ‘duzaru ani ama ecoki ani Eri ma O’duko eri e’yo nzeria amani tivu bivu beni.

Eri ma O’duko erizu tepu pi ma dria risi leni di mini osuzu, asi ‘bazu, kaniku ata zizu kini afa mini eri ri ni e’yo adaruri i ya ‘dini ku. Afa lu ci ‘BA AZI ni le ‘yeri eri Avizuri Ekpazu, ani yi ecoki O’duko Munguniri eri ra aziria mgboru yi dri, “‘Di Opi ‘Yoni”.

Mi le atita ni: Mi Ekpa Avizuri. Lezu ovuzu ‘duzaru: Mi Ekpa Avizuri. Lezu ovuzu sazaru: Mi Ekpa Avizuri. Ovu zita azi be asi mini aa ci: Mi Ekpa Avizuri. Mi aliria afa azi alesi ani leta embata asi tezani ri esu: Mi Ekpa Avizuri. Mi ovu peta azi orodriru tu mini le peni be ci: Mi Ekpa Avizuri. Mi ni a’du ‘yezu yari ku idri mini risi: Mi Ekpa Avizuri ani O’duko Munguni, Orindi Alatararuri erizu, e’yo nzeria mi dri tivu bivu.

Orindi Alatararuri ni nabi o’du nde niri i. Eri lu andra wudrikuru dri kini, ‘di O’duko mani ‘ba okoru ‘bo ovuzu Ma O’duko emi ri i. Ma nga azi ‘diyi efi ma Orindi Alatararuri si, azini Ma pe yi ma ti ‘bo emi aza kozu, te Ma ovu lu O’duko alu Mani azi mgboru ra ovuzu MA O’DUKO ru ri be. Ata Ma ‘du vini ma e’da eri be ra ani ecezu wudrikuru dri kini, Emi Eri Eri-i.

Kirikiri evaki ma onzi ku. Ee, agupi odu osuza be efizaru Orindi Alatararuri si Munguni omve Ima anzi pi ma aza kozu riki ci. Ma zi kini ma ma ovu yi ma azi. Yi indi ecoki mini asi embata, asiomiza fe ra, azini mini geri e’dazu aci idriniri ma aasi ra. Mungu ‘ba ki ‘dia asisile azi si. Te asi embata, asiomiza azini geri e’data ORODRIRU ndeni mini eco esuri eri O’duko Munguniri’i e’yo nzeria mi dri Avizuri Ekpazu risi. Afa ci mani lu mini, kani ‘ba azi cini ni ri, le ma emu nga okoria engazu O’duko Munguni tepu pi ma driari vu.

Afa azi orodriru ndeni idri mini ri alia, aga O’duko Munguni e’yo nzepi mini ri erizuri ni yo. Mi zi nga mi ngulupi, afa azi wudrikuru ‘di ma aa AMBORU TU mani eco ‘ye ni ci, kaniku ovupi orodriru idri mani ri alia, aga Mungu ma O’DUKO e’dazaru ra ri erizu ri ra ri ci? Erizu engazu Adri. Joseph vu, YO. Agupi azi ndu cini eri zu, YO. Afa azi yo AMBORU TU AGA O’DUKO ‘DA RA RI.

‘Ba azi cini ka ovu E’yo Eceza azi cini ni be ci azini Orindi Alatararuri be yi ma aa leki ma ‘yo ki AMENA. Afa azi wudrikuru ‘di ma aa amboru nde aga Avizuri Ekpazu ri ni yo.

Le ama ma ovuki milesi sawa asizani ‘di aa oazu E’yo ‘da be ngole. Engazu e’yo nzeza papa ni, ‘yopi kini i di be ‘Ba Mungu ma paria mgbari i ri vusi, ‘dini kpere afa ovupi nzezaru’bo ri ma ndumba kaniku sere aluni ojazu ri vu. Mile Munguni alia, eri DRIA E’YO RUA ONZI RI I, KRISTO MA RUA ONZI RI I.

Ma leni ovu ko’bo ‘ba andra o’du Samuelini kisi ‘da pile ku.

Yini andra emuzu Samueli vu ani opi azi aizu ria. Samueli esu andra candi tu kpere eri ma asi le di andra e’de. Mungu enga andra Ima ‘bapi ma dri ce trai nabi e’dezaru, E’yo Sizani e’dani ‘di vusi ani ama di andra kini i ovu di gazaru si…

Ama awa’difosi tali, ondoa, feta azini tambata Munguni ‘diki si. Ama a’iki eri ma aa ra. Aleki eri ra. Azini o’bazaru ‘da dria alekini oa eri kokoru ku. Afa ‘diari di belu ini amani lezu opi azi ma ce ama dri a’dia ni ri i…

 “…ALEKI OPI AZI OVUPI AMA MA AZI NI I AMA DRI CEZU.”

Ani Mungu ‘yo di Samueli dri, “Mi ndre, yi gaki ni mi i ku, te yi gaki MA’I engazu ovuzu yi ma dricereru.”

Kalasi ndu, ama ama ama ko’bo Elisa le eri andra o’yoria Eliya be. Eliya ‘YO ANDRA ERI NI MGBORU, (andru eri mu ovu afa erini andra yo tepu ma dria ri i,) mi oa dia mani muria. Elisa eco andra ku, azini cani andra ku ‘da ‘yezu, ovu andra E’yo Eceza E’yoni o’du iniri niri be ci.

 Sawa ‘disi, ama yi neria yini aci ‘duria, emuki di sukulu vu. Ani ‘yo di, “Mi oa ‘dia sawa ‘disi. Mi oa ‘dia, ani mi ri di ‘dia ani ovuzu embapi azi e’yo dini ni embapi ala ‘dile ni, azini afa azi ‘diyi pie. Azini mi eco ‘do, o’du azini si, eca ambo sukulu ‘dini ri i ra. Te le ma ma mu andra leru nga were dika.”

57 Mi eco ega kini agu azi Munguni ‘dileri eco api ovuzu ambo sukulu azini ni ni si, esu dere Okpo Munguniri ci kpi angu erini pasozu ria ‘dile ri ra? Yo, culu. Eri ‘yo di, “Kile Yehovani ovule idri ri le azini orindi mivuri ni ovule idriru ri le, Ma cani nga mi ku ku. A le ‘da tu. Mi oa eri be, avaako ka tro emu, ata eri emu engazu mi ayia vu, mi ati vu, kaniku mi ocepi vu ngopi yari ti. Mi oa Eri be.

Kile Yehovani ovuzu idriru ri le, Ma nga oa O’duko Munguniri be Avizuri Ekpazu risi, a’disikuni Eri ‘Di Opi ‘Yoni ni mani.

Mi emu ruecizu ama kabilo be, Sabatu si sawa azia etusi (12PM), Jeffersonvili saa si (Sawa alu ondresi Ugandaa), amani ama traria Eri ma O’duko eriria E’yo nzezu amani ani amani E’yo Eceza: Ayi Kanisa Simurinani Ri 60-1206 ejiria.

Adri. Joseph Branham i

E’yo Eceza 2:8-11