Category Archives: Uncategorized

22-0220 A’buza Suzuri

Amuro Atizaru Leleturi,

O’du ndra O’dukoti ni ri ka mu eca ‘bo, ama ndra dria e’yo alu alia, angu alu alia, engazu wudukurusi ara, saa noza azi ni enzuzu engazu ‘Bua ko’bo oli okporuri le ru’bu ri si. “Ondre onyiruni, agyipi la. Ama ma ngaki oru saa ‘disi saa were si e’yo zizu”. Orindi Alatararuri efi ndra ama aku azini kanisa amani ndra ruzu alenia ri ki Eri ma indikindi si.    

‘Daa ‘di okpo E’yo Eceza E’yoni ri e’do ‘di amani atita ayikoni fe, atita apitani fe; atiti ovupi e’dazaru ra, ecezaru ra, kini ama Amruo Yesu Kristoni aluzaru pele’bo riki.  

Ama teria asi’baza angiri ni be Ovi-gaza Aziri ‘daa pini eyi O’duko ecezu amani, a’disikuni aniki saa ‘disi ra kini, abaza azi aluni koko, ama ongulumu E’yo Munguni ‘dupi ra ri’i. Ama nga afa asi azini lii Eri si. Ama ecoki ‘bu ti opi ra, ama ecoki ‘di opi ra, kaniku ‘daa ‘ye ra, afa ci ama ni le ri. Ari’bo ni nga ovu ‘dizaru E’yo efupi engazu ama tia risi, a’disiku Eri cizaru aga sei ciza si be irilerileri ra. Ata ama ecoki ta ra onyukunyu eyi ma nzi ni ovu kilo billion alifu alu ‘dile ri ki omvezu. Afa ci AMANI ‘YO ri, eri mu i ‘year, a’disiku Eri E’yo Munguni efupi engazu tile Munguni aliari.   

Ama nga nyaku ma ti oji dria azini okpo driasi, a’disiku ama mungu wereru ri ki. Munguni Mungu angudri driari vuri, angu dria, te ama nga ovu ti jita nyaku ni ri be ama dria. Ama ecoki e’yo nze ra, ama ecoki afa ru ‘da ra, ama ecoki ‘yo ra, ama ecoki o’baza atrira, ama ecoki afa ci amani leri ‘year; eri awita amani ovupi ogozaru ‘bo ri’i.   

Sitanini ‘yo, “Te eyi ovuki tota be!” Te Eri tre our ‘yozu kini, “EYI ‘DALE KU. E’daki ezata eyini ki ‘bo azini eyi pasozaru ma drilia ‘ba dria ‘yeke ‘diyiru. Ma econi ata eri ega ‘dika ku. Eyi driadriaru Ma mvini.”

‘Da ovuni ama egataki ku, vini e’yo amaniki ku indi, te eri E’YO ERINI RI, ERI MA AZIZA NI, a’disiku Mungu ojani I ma otita kaniku geri Eri ni e’yoki ‘yezuri ku. Eri saa dria ‘ba ayu’I, azini Eri luria ama dri kini ama Eri ma Amuro oapi E’yo Eri ni be, ovupi ogozaru vule dria ‘bo azini e’dazaru ‘bo ri’i.

Ama engaki ovu afa azi cini ni be ku pe lu Eri ma E’yo Kpiri ri’i. A si nga agyi azi ku, ata aneki nga vini afa azi ndunini ku indi, te ama enga oa O’duko Munguni, E’yo Ruati alia ofupi ruatisi, Aci Piriru e’dazaru ra, Mvi ‘Bani, ‘Di Opi ‘Yoni ri be. Ama Eri ma Amuro Aliriaru E’yo ru ri’i.   

Mi nze e’yo atita E’yo Eceza si ri dria. Ko’bo ama amvi yi A’di tia ri le, le kini ama awiki te iniara kaniku tezu kpere ini azi risi ‘dini ku, ama ovuki Eri be saa ‘disi. Ama Eri ma Ori ni. Diza ‘daa e’bi’i ama dria ani afa azi alialeruni asii Idri o’diru ofuzu. Saa ‘disi ama gerikoa luria ‘ba dria dri, “A’yeki ‘di ‘bo. Abaza dria deki ‘di eyi ‘bo, Mungu ma Ngulupini e’yo nze ria ama ni O’dukoti alu alu amani eririsi, lu ria amadri: ‘Emi ‘ba mani enga te ri ki. Saa ‘disi ma ‘di mu emi ji Ama anyu alia. Ma e’de mi dri Aku azi ndrizaru lu ko‘bo mi afa dria lerile ni ‘bo. Ama mu oa ‘dani ‘dania tualu.”      

Amani ria, E’yo Ada E’yo Munguni azizaruri niri ovu e’dazaru azini ecezaru ‘bo. Yohana 14:12, Yoeli 2:28, 2 Timoteo 3, Malaki 4, E’yo Eceza 10. Ama saa ‘disi ovuki ‘di efizaru Odu si azini ‘di atizaru‘bo.

Mi le ta ‘di ovu atita alu ‘di be ra? Mi ecora, te angu lu cazu Eri esuzu ra ri lu alu. Ko’bo Yesu ni ndra oazu oku ‘buzaari le, ‘da si vino de’i te. Eyi ndra adaru vino mvurua, ani eri ‘di ndra eyi atita fe, te VINO NDEPINI ri enga ndra kpi Yesu ma Ngulupi vu.    

Mi emu Vino Ndepini ri mvuzu azini mi ma esu Atita ndepini ri E’yo Eceza vusi ama be Sabatusi saa azia etusi (12PM), Jeffersonvili saa si, amani: A’buza Suzuri 63-0321 ni eri ria.

Mi ma ovu gonde atizu Vino Orindi Alatararu riru ri si.

Adri. Joseph Branham i

E’yo Siza lazaru otatu e’yo oluza “A’buza Suzuri” 63-0321 ni ri ki

E’yo Ba  Matayoni 4
E’yo Ba Lukani 24:49
E’yo Ba Yohanani 6:63
‘Yeta 2:38
E’yo Eceza 2:18-23, 6:7-8, 10:1-7, 12:13, 13:1-14, 16:12-16, 19:15-17
E’doza 1:1
Zaburi 16:8-11
II Samueli 6:14
Yeremia 32
Yoeli 2:28
Amosi 3:7
Malaki 4

22-0213 A’buza Nazuri

Amuro Aliriaru Leleturi,

Ma enga e’yo zi azini Opini zizu afa Eri ni ta mu fe mani sizaru azini ‘yozaru ani eco ta ovu geri azisi cucu cozaru azini asi omizaru emi, Eri ma Amuro ru dri ri ma e’yosi. E’yo ma tia yo, azini ma nini a’du ‘yozuari ku. Ma ama ma drifuza kokoru tua e’yo wereru mani ‘ye ‘diyi sizu, te eri inzita amboru agarari’I idri mania afa azi ci ni ‘yezu Eri dri. 

Ma aira kini saa A’buza Aziri ‘diki erizuri ni kililiru tu. Ama ecoki ra nezu Mungu ma otita amboruri ni ovuria ecezaru azini nzizaru ama drilia. O’dukoti O’dukoti vutia eri ‘di ecaria E’yo Eceza angiriru E’yo Eceza vutia. Ama Eri ne Ima ngulupi eceria ama dri azini ama dri ceria. Ama ni ki ra kini ama e’yo ndra Eri ‘yo amani ama ma ‘yeki, “oazu E’yo be ri” ‘ye ria ko’bo. Geri azi amboru ‘da ‘yezu aga Play Mizu ri ni yo.

Ma ama omveza Eri ni ‘ba asi mani alia muzu drile O’dukoti ‘di be, Eri ma o’duko be, tepu ‘di pie emi drilia sa dria ri ra; orodri tepuki erizu ri ecezu kiliru emi dri. Ma ni ra kini ma econi e’yo nde ‘yo emi dri onyiru ‘dale ku, te MA NIRA ma ‘yeke luzu emi dri “Mi mi Play”, eri ni ovuzu ma egataki ku, ma orataki ku, vini e’yo mani ki ku, te E’yo Munguni ma Ngulupini nze Eri ma ‘ba o’dukoti ojipi 7 zuri vusi riki risi, luria amadri:  

Aziria amani lu la ria, azini, saa ‘disi, mi ovu mile be tu. Ani mini la ria, mi e’du tepuki, mi eri eyi kilili. A’disiku, mi nga eri esu tepu ma dria, a’disiku engaki tepu ‘daki avi ria, azini eyi onyiru azini kpi. Ani mi nga eri va kililiru ‘daa.

Mani enga ‘yo pale kakau oko ‘bo rile, ma ovuni azi ngaza kaniku afa ci Munguni ‘baa Eri ma Kanisiari ma rua onziku. ‘Da ni oa ovuzu E’yo Munguni ma rua onziri’i. Ma aira eyi odu osuza be azini Mungu omveniki. Te ma aira kini O’duko Munguni erizu azini ‘bazu ‘ba pi ma drilia ri le ma ovu afa orodriru tu agu ci Mungu-omveni ru ni ta ‘yeri’i.

Cani ku lu ‘yozu, “Ma ‘yo ma ongulumu pini tepu ki avizu ra.” Mi ka aira:

  • Odu osuza azi angiri aga O’duko Munguni tepu driari erizuri ni yo.
  • E’yo Eceza dria le ma emu engazu O’duko ‘da vu.  
  • ‘Duta oru aita alia amani le ri ni nga emu engazu afa O’duko ‘danni ‘yori vu.  

Olu’ba azi cini eco ‘di lezu ku O’duko ‘da erizu, kanisa eyini ri pie, ani AMENA ‘YOZU E’YO DRIASI beni ngoni ngoni?

‘Ba dria ovu afa azi eyini ama azini ai kini eri afa ORODRI RU TU eyini eco ‘ye ovuzu Amuro Kirstoni ru beni ni be ci. Le afa azi Munguni ORODRI RU NDENI azini Eri ma Ale kililiruni ni ma oa ci. ‘Da mi ocepi ma azi ngaza ni? Olu’ba azi ‘diyi erizu ri? ‘Yoria kini ki onzi ‘dini ni ku, tua yo, azini ‘da kililiru ‘yeke E’yosi ria, te mi aira kini afa ORODRI RU NDENI ri eri O’duko Munguni tepu dria e’dazaru ‘bo ri’i ra ya?”

‘Daa ka oa afa mini ai eri ORODRI RU NDENI mini eco ‘ye ri’ri, ani ‘di azi ngaza ‘da ni ‘di gasi O’DUKOTI KILILIRU ORODRI RU NDENI ‘da avizu azini erizu eyi ma ongulumu pie a’dusi? 

Mi zi nga mi ngulupi, kaniku mi ocepini zi ‘disi: Mi ai kini esele laza ‘di adari ra, kani eri enzoru azini eri lu Adripi Branham ni eri vazu onzi, kaniku eri ni o’bizu ima ngulupi epizuri’i?

Mi ne, ko’bo afa ta mupi pari ‘dupi sa ‘disi ri’i! Azini, kanisa niria, eri a’duni? E’yo ruati alia ovupi ‘bazaru ruatisi ‘ba Eri ni pima eselia dika ri’i. Ine ra? Azini eyi ai lu Eri ku tu.

Mi ka esele laza ‘di aira ovuzu adaru, azini mini ria eri ka oa O’DUKO MUNGUNI, E’yo ruati alia ovupi ‘bazaru ruatisi ri’i, ‘ba azi eco ‘di ku nezu kini AFA AZI ORODRIRU NDENI aga O’duko ‘da erizuri ra NI YO ri ngoni ngoni.

Mi ma enga aliria o’du kopi ri la, mi kaniku ovu E’yo Eceza ‘di be kaniku mi oa eri ni ‘yo rile: ”eyi ai lu Eri ku tu.”

Nabini ndra lu amani ri le, ama Buku ‘Yetani o’diri ki, Arakala o’diru ‘da’i, ‘Ba Erini pe ‘diyiki. Ani, kakauni ki ‘di amaria kini Orindi Alatararuri ni ‘di sa ‘disi ama alu alu ma dri ceria kaniku ama dri ceria azi ngaza vusi, te ovuni Eri ma nabi vusi ku. 

E’yo adaru tre ‘di alia ci, TE nabi otu vini ‘di ra, azini ece ama dri e’yo adari ra.  

‘Ba azi ri ndra e’yo nze mani ‘dia nga o’di o’di. ‘Yo kini “Te Adripi Branham…” [Adripi Branham ede ima oliko–Ed.] Ma ma ovu truzaru. ‘Yo kini, “Ovuni Orindi Alatararuri ni emuzu’bo risi ku, Malaika azi kanisa ocepini yo, kaniku ‘ba azi ocepini yo. Yo, culu.” ‘Yo kini, “Eri Orindi Alatararuri’i ama ocepi ri.”  

‘Da e’yo vaza ako Malaika pima eselia Orindi Alatararuri be ri. ‘DA ONZI NI, Malaika ceki ndra Kanisa ma dri drile ra, azini eyi nga kiri Kanisa dri ceria. Adaru.

Eri ma malaika ni Eri ma Kanisa oceria azini drini ceria. Ama ovuki para amani azini omveta amani be, te malaika ‘da a’dule eri Amuro dri cezu.

Mi eringa e’yo Mungu ma nabi ni ‘yo azi ngaza azi ‘diyi dria o’bizu afa Munguni ERI OMVEE ‘YEZU ri be ria,

Lu ko’bo agu azi simu ki otipi rile, eri mbaria ‘ba aci osepi ri’i ku. Agu ‘di eco azi ‘dale ni o’bi nga were ra. Azini ko’bo, agu azi ka ovu ‘baa telefoni baka osepini, muke, eri adaru… Agu azi ka ovu ‘ba ‘bule telefoni pati niri gapi ri’i, azini ka nga drio baka ose ku, eri cika erini muzu baka oseta vu ku; adisiku eco afa azi adroo kaniku afa azi ‘daleni ‘ye ra.    

Te saa nga Afa mba ‘da ni mu ovu ecezaru o’du asizu risi, Kanisa ma esele asizu rini, eri saa Mungu ni ndra ‘yo kini Eri nga mu efe amani, E’yo siza ni ‘yole rile ri si. Ama onda ‘di eri dika azini dika ‘bo, kini ondri ndra ra kini Orindi Eliyani ni ta mu dri ego agu azi ma alia. 

Te ‘ba azi ka le awa azini ‘yo mini, “eri aga lu tepu ki erizu’i ri ra. Adripi Branham ‘yo ndra tepu ma ovuku avizaru kanisaa ri ku ye. Eri nga azi ngaza ‘du’i Amuro ‘bazu kililiru;” kaniku afa ci ‘ba cini ni eco ‘yo mini, o’bizu azini fezu mini abazu, azini kini O’duko Munguni tepu pi driari erizu emi kanisaa ri onzi…

Lu ko’bo adu azi e’do, o’bizu awazu mi be; mi ka ni mi pa so ngua ari ra, mi ma ni afa erini ai ri.   

Ka ki ‘yo aizu kini, “O’dukoti ‘di eri E’yo’i ‘dini. William Marrion Branham ni Mungu ma ‘ba o’dukoti ojipi malaika Azirizu ri’i. O’dukoti ‘dini eyi ma Driaruri’i. O’dukoti ‘di eri Mvi ‘Bani’i ima ngulupi ecepi ruatisi Eri ni ndra avi Eri mu ‘ye ri le…”

Eri lu ko’bo eto azi truzu jo eyini ma aa, esu dere mi opi ‘buleki dria ci rile. Mi so lu pa kaatia; eto ‘da ni nga emu ro. ‘Daa afa lu ‘ye ci ri’i. Mi ce ageyini kuru ‘bo. Mi ne ra? Eri nga mu dri ego ro kaatia dika, a’disikuni ‘da geri lu alu ci erini ca ayu fuzu amve ri’i. Eri nga ima dri esu kala ‘dosi, adani ima ombe nyozu nyonyo ru; azini eri nga mu ‘dale ru, ‘dale ru. Mi ma so lu pa eri nezu i, ani eri nga dri ego r ovule. Mi ne ra? Be lu ‘daa. 

Mi ma oa Embata Tepuni be. Mi ma ‘yo lu afa tepuni ‘yo ri’i. Mi ma oja E’yo aluni ku. Mi o’ba drinia kaniku nze E’yo anluni amve ku. Eri Mungu ma O’duko mini ri’i. Eri E’yo ruati alia ovupi ‘bazaru ruatisi ri’i. Eri E’yo afa e’depiku ri vuri ki. Eri mi ocepi’i. Eri ma malaika ni mi dri ce. Eri ‘Di Opi ‘Yoni ni.

Mi ka mini lu ovu E’yo ‘da aa, mi tambazaru.

Mi emu tala mini ma baka otruzu azini eri efizu Odusi Sabatu ‘disi saa azia etusi (12PM), Jeffersonvilli saa si (Saa Iri inisi, Ugandaa), Mungu ma malaika peleri ni A’buza Nazuri 63-0320 garia ovi le azini anyoria, azini Eri ceria Eri ma Amoru dri. 

Adri. Joseph Branham i.

E’yo Siza lazaru otatu e’yo oluza “A’buza Nazuri” ni ri ki

E’yo Sizaki:

E’yo ‘Ba Matayoni 25:3-4
E’yo ‘Ba Yohanani 1:1, 1:14, 14:12, 17:17
‘Yeta 2 Capta
I Timoteo 3:16
Ebrania 4:12, 13:8
I Yohana 5:7
‘Ba Levini 8:12
Yeremia 32 Chapter
Joeli 2:28
Zekaria 4:12

22-0206 Agbuza Irizuri

Arakala O’diru Leleturi La,

‘Ye’i ‘bo; afa ‘ba alatararu dria ama drilia ‘diyi ni enga andra dria teeri’i. Pati Okori ‘ba ‘di arakala azi o’diru ni ‘bo. Ama ecaki ‘bo. Ama Arakala O’diru ‘da’i. Orindi Alatararuri e’de’bo, azini Orindi Munguni eri ama dria. Pentecoti ma Aita andra Oko, ‘bati opeleri pini ri ovu ogozaru vule ‘bo Eri ma malaika 7 zu ri vusi. Saa ‘disi, Eri ma nabi ni ‘di aci aku vusi aku vusi, mukati andiria ama’be. Eceta amboru ki, e’yo osutaru ri ki, azini E’yo Eceza E’yo Eceza dria ki ovuria e’dazaru ama dria.  

Ama ama tala ki baka eyini be otruzaru azini Odu be alia tree. Ama oaria E’yo Oko ‘yeke ri be, Eri ni ndra ‘yo ama ma ‘yeki ri le. Azi ‘diyi eco Kanisa le ra, te ama LEKI AFA AZI KU TE O’DUKO MUNGUNI OKO ‘DA’I.

Saa ‘disi, mi ega nga lu eri saa ‘disi. Afeki nga – afeki nga lu ma ofi nga aa afa amani ai kini Orindi Alatararu ri ni ta fe amani nii ri. Saa ‘disi mi egara, “Afa azi ecezaru yo; Mungu cani afa azi ‘ye ku, tua, kpere Eri ni eceria Eri ma ati’bo, nabi pivu rakaka.”

Afa azi ovuni ecezaru Amuro dri ku; lu Eri ma nabi vusi ka oko. E’yo zizaru cini ka ki ovu ecezaru ci, e’yo eceza o’diruni ka oa ci, afa aci amani le ovuzi Eri ma Amuro ru azini muzu ‘duta ‘buari ma aa ani ra ri ka oa ci, le Ma emu okoria nabi vu ani ‘daa Eri di nga Eri ece ama Eri ma Amuroru dri ndo.  

A’du ece? E’yo Nileku Ovi Gaza Aziri Rini Ri Ki. ‘Daa ma efi ngoni? Efi ni afa iri ‘diyi ma aluri i. Eri kaniku tepu dria ci azini eri nga ovu ecezaru ama dri saa erini ngazu muzu ovuzu ecezaru ria, 

Te ma ega kini, e’yo nileku ‘da kaki e’do ovu ofuzaru ‘bo, Mungu ‘yo, “Mi atri Eri saa ‘disi ci. Mi te nga were. Ma nga Eri ece o’du ‘da si. Mi ma ci Eri dria vua ku, Yohana, a’disiku eyi nga aba eri dria aba aba. Mi fe lu–lu eri ma mu, mi nera. Te ma nga Eri ece o’du erini lezaru ovuzu ‘yezaru ‘da si.”   

Kaniku, Eri ka Eri ma nabi ti epe vule nyakua ama e’dazu Eri dri, daa ‘dii Eri ma nabi ni nga ama dri e’yo nileku Ovi gaza Aziri ri ni riki ece ra.  

Azini Ovi gaza aziri nileku ovupi ata sizaru vua tua ku ri ki nga eca ra. ‘Daa ada. Azini ma ai ra kini, Ovi gaza Aziri ‘da pivusi, eyi nga ovu ecezaru o’du asizu ‘diyi kisi Amuro etrazu tualu aita ‘duta buari niri esuzu. A’disiku, afa amani ovuzu eyi pie saa ‘disi ri, ama–ama cani ta nga e’yo nde ‘yezu ku. Afa azi ci. Le ama ma ‘ba pa dri le.

Cani mu ovu ongulumu agupi pini e’yo nileku ‘da ecepi ri ku, eri mu oa Eri ma ‘ba o’dukoti ojipi malaika 7 zu, William Marrion Branham’i. ‘Daa ovuni “ma” ‘yo ‘dale risi ku; eri a’disikuni E’YO ‘YO ‘DALE RISI!!  

“Eri Buku ‘da ‘du azini, Agbuzani ‘daa ki, ki ‘yo zu,” azini e’da malaika azirizu rini; a’disiku ‘di a’dule, e’yo nile ku Munguni riki, ri azi ngaza malaika azirizu ri ni ri.

‘Yo eri dria ‘daa ‘bo. E’yo nile ku Munguni riki azi ngaza nduni yo pe lu malaika azirizu ri ni ri. Ovu gaza Aziri riki nga Amuro etra tualu azini amani aita ‘duta ‘buari niri fe.

Afa mupi Amuro ejipi tualuri ka adre Ovi gaza ki, azini e’yo nileku Ovi gaza nde pini ri emu engazu malaika 7 zu ri vu, ece kini afa azi orodriru ndeni Amuro dri ‘yezaru aga PLAY MIZU ni yo. ‘Daa afa mupi Amuro etrapi tualu ‘Duta ‘Buarini ri’i.

Mi oa E’yo Okoru tepu dria ri be. MI MI PLAY.

Azini tepu ‘diki nga angiri ni ece ra, mi ni eyi oniria.

Cucu coza ma ovu Ru Opini vu! Diza Mungu vu!! Ama le amata onyiru amani esu engazu Mungu ma O’duko e’yo nzepi amani tepu pi dria ri erizu risi ri tu. Ama lu ama Orindi Alatararuri ni I weria ama ageyia amani aciria Eri be. Ama Eri ji akua ama’be. Ama Eri ‘bi pilo ama pi dria.  

Mi emu erizu ama’be Sabatusi saa azia etualasi (12PM), Jeffersonvili saa si (7PM Ugandaa), Orindi Alatararuri ni enzuria aku amani pi alia azini afa dria amani le ri ki eceria, amani: Agbuza Irizuri 63-0319 ni eriria.

Adri. Joseph Branham i

E’yo siza lazaru de nga O’dukoti ovu erizaruku ri ki:

E’yo Ba Matayoni 4:8 / 11:25-26 / 24:6
E’yo Ba Marakoni 16:16
E’yo Ba Yohanani 14:12
2 Tesalonika 2:3
Ebrania 4:12
E’yo Eceza 2:6 / 6:3-4 / Capta 17 zuri / 19:11-16
Yoweli 2:25
Amosi 3:6-7

22-0130 Agbuza Okori

Opi Okuru Buni Leleturi La,

Ma’i, Opi emini ri, ma nga mu Ga Oviru Emidri Sabatusi ‘yozu EMI dri, EMI Ma Amuro i. Ma ‘ba ndra EMI drio. Ma onze EMI ‘bo. Ma ‘Ba EMI alaru ‘bo azini ‘ba emi ruki Ma Kabilomva ma Buku Idriniri alia de nga wudukuru vuti ovuni nda o’bazaru ku. EMI Ma Opi Okuru aluzaruri’i.

Ma enga EMI tee azini tee ani Ma eco ta ani afa dria ma Adamu oko ri ni ndra avi riki ogazu vule. Awita eri ni erini ndra avi dria ri ki. Ti ecita erini dria azini driwala erini idrini ri. Ma fe ndra eri dri okpo dria azini oruru nyaku dria. Eri ndra munguni wereni nyakua Ma ni ovuria Mungu i wudukuru dria dri.

Eri ovu ndra nyaku ‘di be ojizaru eri ma palaa. Eco ndra ra e’yo nzezu, eco ndra ra afa pini ru fezu, eco ndra ra o’bata atrizu, eco ndra afa ci eri ni le ri ‘ye ra. Te avi ndra afa ‘daki dria te.

Saa ‘disi, mani azii EMI dri E’yo Mani alia ri le, Ma ogo ro afa dria erini ndra avi riki ‘bo azini ma fe ki EMI ndri ro vule. Ovu onzezaru ‘bo. Afa dria azitani lerile ndra ovupi avizaru Adamu vusi ru ki saa ‘di si EMINI. Karatasi e’yo Idri ‘dani ‘dani ni sizaru wereru azitani lerile o’daa ‘di ovuzaru ci,  efi ni ecezu kini, saa ‘disi EMI ovuki ‘di afa dria andra Adanu ni avi ri pie ‘bo. 

Ma eca ndra emi ori’ba ‘Ba Onzepi ri i. Ma rii ndra afa Mani ri  ra. Ma ‘du ndra buku onzetani ri engazu Ma ati ma dria risi, ma onyo agbuzaki engazu buku nde vusi azini ma efe eri vua Ma ‘ba o’dukoti ojipi malaikaru azirizu ri vu eri ecezu EMI dri. Eri nga EMI dri Aita Bibiliani ndra okori ogo vule azini eri nga e’yo zizaru Mani dria riki ece EMI dri. 

Ma ece azini e’da afa ‘diki ‘bo Ma Adamu oko Mani ogo dria ‘bo risi; Ma ‘ba o’dukoti ojipi malaika nabiru azirizu ri i. Eco ndra ra e’yo nzezu ani oyu o’bazu beni, idri fezu ro e’bi azi vu, angu oliari ti jizu azini angumile akukuru ti pezu vule angu erini engazu ria. Eco ndra ra e’yo nzezu ani ‘ba draza engazu beni. Ma fe vini ndra MA e’da ma ovu ‘duzaru eri be e’dazu wudukuru dri, ‘di Ma Adamu oko ovupi ogozaru vule ri i, emi eri eri’i. Saa ‘disi EMI, Ma Opi Okururi, ovu ‘di afa dria ndra Adamu ni avi ri pie ‘bo.  

Mi ma egara kini, Ma ‘ba o’dukoti ojipi malaikaru azirizu ri ni nga ovu nyaku dria ci saa nga Mani Emuzuri si. Eri nga EMI e’da Ma dri. Guka asizu ‘da ni nga wura ani ‘ba drazaru Kristo alia riki nga engara. ‘Ba ovupi idriru azini ngapi awipi riki nga ovu ‘duzaru ‘bua tualu eyi pie, dri fuzu Ma be oli alia saa alu alu Ma malaika azirizu ri ni i O’dukoti fe ria. Agbuza asizu ri ni ovu nzizaru. Guka asizuri ni nga wu ra; Ma nga emi drile ra afa maniri ki ‘duzu, EMI’i, azini ‘daa Ma nga EMI ji AMA Ondreta Oku-bizaniri aa.     

Ma Opi Okuru leletu ri la, emi emuki Ma erizu e’yo nzezu EMI dri azini afa dria EMI ni le ri ki ecezu emidri. Ma mba nyaka ‘di ma ta EMI ni ani EMI ecoki eca beni Ma Opi Okururi ru. Ma nga mu e’yo nze EMI ni saa azia etusi (12PM), Jeffersonvili saa si (Saa 1 ondresi Ugandaa), Mani muria EMI dri Agbuza Okori 63-0318 ni garia

Adri. Joseph Branham i

E’yo siza lazaru ‘bani ‘ba oturia o’dukoti nde erizuria ri ki:

E’yo ‘Ba Matayoni 10:1 / 11:1-14 / 24:6 / 28:19
E’yo ‘Ba Johanani 12:23-28
‘Yeta 2:38
2 Tesalonika 2:3-12
Ebrania 4:12
E’yo Eceza 6:1-2 / 10:1-7 / 12: 7-9/ 13:16 / 19:11-16
Malaki 3rd and 4th Chapters
Danieli 8:23-25 / 11:21 / 9:25-27

22-0123 A’befe Ayi Kanisani Aziri Ri Pi Eselia E’yo Agbuza Aziri Ri Pie Ri

Amuro Otrepi Azini Ayiko Zuupiri La,

Ama E’yo Alia azini ovuki saa amboru tu idri amani alia ri pie. Embatani, ru ‘bazu alaruri, azini e’yo ecezani. Afa azi orodriru tu aga O’duko Munguni tepu ma driari erizu ri ra.  

O’dukoti oa’di ni afa driani amani. Eri ama dri apita dria ri fe. Afa lu ci eco pi vico idri amaniri niri atipiri eri Munguni erizu e’yo nzezu amavu Eri ma nabi vusi ri’i.

O’du alu alusi Eri ama dri e’yo eceza Ima ngulupini azini amanini fe dika dika. Asi ‘baza aliru azi o’diru “mi mi play” vurisi, ama E’yo Erini eri azini ‘yeria lu ko’bo Eri ni ndra azi ama ma ‘yeki ri le. Ama Eri ma kabilo ki, azini kabilo cani ima dri ce ceni ceni ku; le ma ovu dricere be. Ani Orindi Alatararuri ni ama dri ce Eri ngulupi vu, Eri ma O’duko e’yo E’yo e’depiku tepu dria ri nzepi ri’i.  

Ovuni kini ama O’dukoti ‘diki eri dria jege jege su ku, Eri pe dra amani ni. “Pa ‘baza ‘ba alatararuri niri Opi ni o’bani.” Asisile azini ‘dale ci. Ama cani azani ko ku. O’dukoti tepu dria ri eri afa dria Amuroni le ri’i. Eri erizu risi, Eri amani dri Aita ni okporu ru bizu azini E’yo dria aizu ri fe.

Ama aiki kini eri orodriru tu ‘ba dria eyi omvepi “Amuro Munguni diyi” ruri pini tepuki erizu a’disu ya?

E’yoni gboru luria amani kini Bibilia ma mba ovu sizaru nabi pivusi. Ovu ni ndra eyi ma orate i ku, vini egatak eyini niki ku indi, te Orindi Alatararu ri’i eyi dri cepi Bibilia sizuri’i. Bibilia ni vini ‘yo amani kini Opi Mungu cani AFA AZI ‘YE KU kpere Eri ni Eri ma E’yo eceria Eri ma nabi vu. ‘Ba azi ‘diyi eco Eri nze azini Eri eko ra, te afa LU eyini eco ‘yo ra ri eri afa nabi ni ‘yo oko ‘bori’i. 

Mi ka aira kini William Marrion Branham ni Mungu ma ‘ba o’dukoti ojipi malaikaru 7 zu e’dazarura ri’i dini, ecekini afa eri ndra ‘yo TEPU DRIARI ovuki ni eri ma e’yo ki ku, te Mungu ma Ngulupi ma egata ovupi e’dazaru riki. Mi ava liza fe mima asiza ‘Dani ‘daniri niri E’yo dria eri ni ndra nze tepu pi driari ma dria, mi ni eri aizu ovuzu ‘DI OPI ‘YONI NI ri si. Cani ovu o’bazaru drinia kaniku nzezu erivusi ‘dini ku, leni vini e’yo efi eceza azi drinia ku indi; Eri Mvi ‘Bani’i e’yo nzepi agu Eri ni pe Ima E’yo ma ecani ima paria beni ani ri vusi ri’i.   

Amuro adaruri ni orodri tepuki erizuri a’duniari ra. Amani ria, tepuki e’yo kulu riki ani azi ngaza azi riki dria e’yo nyiriru riki. ‘Ba dria ma zi nga eyi ngulupi kani eyi ma asiza ‘Dani ‘daniri niri sopa E’yo dria Mungu ma nabi ni ndra nzeri aizuri ma dria kuari. Ma ka aira kini eri O’duko Munguni e’yo nzepi azini Eri ma Amuro omvepi ri’i ‘dini, ecekini afa azi orodriru tu aga PLAY MIZU ri’i ni yo, ma e’yoni ngazu muzu ovuzu elizaru E’yo dria MUNGU MA NABI NI NDRA ‘YO ri kisi…ovuni ‘ba azini ‘yo kini nabi ‘yo dale risi ri ku.   

Mi ka ai kini mi le azini ki tepu pi ma dria dika, ece kini ovuni midri orodriru tu ‘dale ku e’yo ‘baza ‘bazu tepu pi ma erita dria, te orodriru midri ndeni ri azi ngaza pi dria. Mi ovu lu e’yo kuluru aluni be. 

Amani muria tepu eriria Sabatu ‘disi, Mungu ma Ngulupi ni nga mu e’yo nze amabe azini lu ama dri ama ovu karatasi wereru Idri ‘Dani ‘dani ri ni azita ni le ri be bo. Ama ovu afa dria andra Adamu pini avi Eva beri pie ‘bo. Eri mu ovu ejizaru ama dri e’yo eceza alia, azini engazu dri Munguni alia ecetani vusi. 

Ani ‘daa Eri nga ama dri a’du ‘ye’i bua ni ari lu. Geri ndra Yesu ma Ngulupi ni buku ‘da ‘duzu, agbuza ‘daki ‘yozu, ‘daa efe di eri nabi Eri ni pe ri vu azini Eri ‘yo eri dri eri fezu Eri ma Amuro dri….mika e’yo nze otreta dria!!!! Afa dria nyakua azini Bua ‘diyi nga ama eri treria azini otreria amani ama ru ne ria sizaru Kabilomva ma Buku Idrini ri alia ria.  

Ani Eri ‘du ndra Buku ‘da, (Diza) nzi Buku nde ti, ani onyo di agbuza ‘da ki; azini efe Eri vua nyakua, Eri ma malaika azirizu ri vu, Eri ecezu ‘ba Erini pini! Mi ‘di be da. Kiri kiri! A’du ‘ye’I ni? Otreta ‘da ki, treta ‘da ki, haleluya ‘da ki, ‘ba o’du osuza be ri, okpo ‘da’i, diza ‘da’i, e’data ‘da’i!  

Azini Yohana dezari, ndra ovupi pasozaru ‘daa, ama adripi’i owuria! “Adusi,” ‘yo ndra kini, “afa dria Bua, afa dria nyakua, azini afa dria miri alia ‘diyi, eri ma treria, Amena! Amena! Asi ndriza pi. diza pie, ondᴜa pie, awa’difo pie, inzita pie, okpo pie, okpo e’yo ‘yezᴜri pie, ma ovᴜ Mungu amani vᴜ kpere ‘dani ‘dani!”

Mi eco e’yo eceza angiri ‘di eri ngua? LU TEPU PI DRIA. Afa azi lu ndu ru ni ci Amuro dri eyi ni Mungu ma Ngulupi ni eri ria e’yo nzeria ti ‘ba ada ni si azini ‘yoria eyi dri, “EMI MA AMURO ALUZARU RI’I.”

Mi emu ri indikindi Orindi Alatararuri niri alia Play Mizurisi, sabatusi sa azia etusi (12PM), Jeffersonvili saa si, amani Eri ma malaika aziri zuri eriria O’duko: A’befe Ayi Kanisani Aziri Ri Pi Eselia E’yo Agbuza Aziri Ri Pie Ri 63-0317E ni ejiria.  

Ama nga ovu otreria azini ayiko zuria azini ‘yoria haleluya.

Adri. Joseph Branham i

E’yo siza lazaru ‘bani ‘ba oturia o’dukoti nde erizuria ri ki:

‘Ba Levini: 25:47-55
Yeremia: 32:1-15
Zecharia: 3:8-9 / 4:10
Rumi: 8:22-23
Efeso: 1:13-14 / 4:30
E’yo Eceza: 1:12-18 / 5th Chapter / 10:1-7 / 11:18

22-0116 Munguni Ima Ngulupi Zizu Geri Mazaru Fu Risi, Di Vini Ima Ngulupi Ecezu Geri Aluri Siri

Elia Ma Kabilo Wereru Leletu Ri La,

Ama ‘ba azi ndu ‘dile ni ki, ndu azini ani’boru wudukuru dri, azini ai’ba kakau ni pi dri, te ngoni ti, ama atalo orindisi, suru opini, edeta edeza orindisiri edepi Mungu dri ‘diyiki, efi kaza tile amanisi inzita fezu Eri Ru vu. Ama le lu wudukuru dri kini ama ayikosi tu, awa’difo si tu, azini inzita amboru be ovuzu Eyi Ma Azi.   

Ama ozi ki ama bongo azi ‘diyi ki dria ‘bo, Eri ni ama ni Bongo aje be tu, E’yo Eceza Eri ma Ngulupini ri fele risi. Ama E’yo Munguni mbari ovuria E’dazaru. Aziza adaru o’du asizuri pini ri, Diza ondreni adaru ndra emupi diipi ri.  

Enga ovu ecezaru aliru asi amania kini O’duko amani eri tepu dria ri eri Mvi ‘Bani i Ima ngulupi eceria. O’duko ‘daa ‘yo ndra amani: Emi oa ‘dia, emi ne Nyaka tambazaru mani o’ba ‘bo emini tepu pi dria ‘di i. Mi ka ovu zita azi ci ni be, mi go ro tepu pi vu. Ata eco ovu mini osutaru were ra, te mi ma avi tepu nde vule eri erizu muke beni. Mi ka ovu Amuro i, Orindi Alatararuri ni nga Eri ece mi dri ra. Mi ma egara kini, tepu lekini e’yo efi eceza ku, mi ‘yo lu afa ovupi tepu pi dria ri i. Ma emi ocepi i azini emi ma kabilo wereru riki, emi oaki embata tepuni ri be. 

Ma ni ra kini ‘ba kakau vakini ku afa amani ‘ye O’dukoti alu ri erizu dria sa alu aa ri, te eri muke, eyi kiri ama adripika azini amvupika ki azini ama le eyi ra azini le ama ma nze ‘eyo eyi rua onzi ku. ‘Ba dria ma ‘ye afa eyini ama eri dri ceza Opini ri i. Munguni azi nga ama be azini ama dri ce ‘ba ndunduru. 

Nabi ‘yo ndra amadri kini le ama ma andri afa dria E’yo si, azini o’biki eri E’yo si, lu ko’bo erini ndra ‘yeri le. E’yo andruni ri, eri azini enga saa dria ovu Bibiliani. Bibilia ni ‘yo amani o’du asizu ‘diyiki si Eri nga e’yo dria zizaru azini nileku Bibilia Erini alia ri ki ece dria ra nabi azi Eri ni mu te epe ni vusi. Eri Erima ngulupisi ta nga e’yo nze nabi ‘di vusi azini Ima ngulupi ecezu ruati alia lu ko’bo Eri ni ndra ‘ye Iburahimuni ri le. Eri ma E’yo cani ovu ani nga ovu e’yo agu azini ni ku, te E’yo Mungu ma Ngulupini mbari i. Eri ta nga ovu ‘DI OPI ‘YONI NI, ani Bibilia ki O’duko ‘da be ta nga ovu alu azini aluri le.   

Omveza azi aliru ci aliru asi amaniri omvepi O’duko ovupi e’dazaru ‘bo ‘da erizu ri. Ama leki O’duko Munguni eri kpi engazu Eri ma nabi pele ri vu. Ale azi ci asi amani pi alia O’duko ‘da erizu azini ‘dilu tezu e’yere azini nizu ra kini le ama ma zi zita azi afa azi ci amani eri nisi ku, te lu E’YO DRIA aizu i.  

Angu azi amani ecozu ‘da ‘yezu nduni yo. Ovuni kini ‘ba azini amani afa azi enzoru nil u kaniku amadri cezu onzi ‘dini ni ku, eyini vini ovuzu Orindi Alatararu be ciri si, te ama nira kini ecoki ale eyini si ku ra amani afa azi onzini luzu. Te ama ka Mungu ma O’duko e’dazaru ‘bo ovupi tepu ma dria ri eri, ata am aka afa ovupi ‘yo zaru ‘da vaa ku ani, Mungu Ata yo kini ama ma ‘yo lu AMENA, AMA AI E’YO DRIA RA. Ama cani ‘da ‘yeku o’duko azi ci nduni ni.

Ama ovu aizaru O’duko ‘dasi yezu dini:

Mi eri ma i ku; te mi ma eri afa mani ‘yo ri i. Afa mani ‘yo ‘bo ri Eri Meseji ni. Mi ‘ba asi mini ‘ba o’dukoti ojipi ri vu ku; Mi ne O’dukoti nde i. Mi ‘ba mile mini, ovuni ‘ba o’dukoti ojipiri ma dria ku, te O’dukoti dria. Afa Eri ni ‘yori, ‘da afa angu nezu vunia ri i.

Afa ndra erini ‘yori ERI O’dukoti saa ni ri. Le ama ma ‘baki mile amani ki O’dukoti vu; Eri afa amani ne ri i.

Eri ama dri afa ki ece ko’bo drio ri le ku. O’dukoti dria amani eri ri ni eku O’dukoti o’diru amani drio eri nga kuri le. Amani tro eyi erizu pale turu ‘bo drio ri ra ti, ama caki ni eri eceku, eri lu ko’bo ama nga eri eri pale okorisi ri le azini Eri ama dri E’yo Eceza fe dika azini dika.

Ama eco lu ega ku kini ‘ba azi ni ga O’dukoti ‘diki erizu si ama be ‘dile ri. Ti ecita azini ovuzu Aluru ni ci Amuro pi eselia E’yo Erini be. Ama ovu apizaru tre ‘bo aga sa azi drio idri amani alia ‘dileri ki ra.

Pale alu dika amani ovuzu asi ‘baza angiri alia ri. Eri ekile E’yo Agbuzaru ki ovu ti nzizaru sa ‘disi ri le. Eri mu amani afa amani nga ne drio ku riki e’da azini Diza eji afa amani eri pale kakau kakau ‘bo ri pi dria; te saa ‘disi, ama nga Eri ne gboru. 

Ama ni ki ra kini afa dria amani le Eri ma ‘Duta oru emupi mbeleru ‘diniri, eri O’duko tepu pi dria ri i.

Mungu pe ndra Eri ma nabi ma ti e’yo niza si roko Arizonani ma vutia ‘dale ndra eri ni ovuzu ‘bizaru malaika aziri ‘daki si ria, ani ‘di ti ni epezu vule Jeffersonvilia e’yo nileku zizaru E’yo Agbuzaru Aziri riki ecezu Amuro dri.    

Mi emu ‘baa amabe Munguni e’yo nzeria amabe engazu ti vu bi vu Sabatu ‘disi saa su o’butisi (10AM), Jeffersonvili saa si (Saa 5.00 PM Uganda), ani ama nga: Munguni Ima Ngulupi Zizu Geri Mazaru Fu Risi, Di Vini Ima Ngulupi Ecezu Geri Aluri Siri 63-0317M ni eri ria.   

Ama nga O’dukoti nde e’do eyi nyiri #94 zu ria, inzita owitaniri niri vutia.

Adri. Joseph Branham i

1 Suru Ma E’yo 17:1-8

Isaya 35:8 / 40:1-5 / 53:1

Malaki Chapter 3 zuri
E’yo Ba Matayoni 11:10, 11:25-26
E’yo Ba Yohanani 14:1-6

1 Koronito Chapter 13 zuri
E’yo Eceza Chapter 21 zuri

22-0109 Di Ri Eceta Asizani Ya, Culu?

Ekalu Munguni La,

O’dukoti ‘di ma okpo deni i ku. Eri kililiru Eri ngulupi alia. Eri E’yo asizu afa dria aliari. Afa azi nduni yo Amuro dri te O’duko ovupi nduzaru ‘bo tepu dria ri i. Eri Mungu ma O’dukoti saa ni ovupi ecezaru ‘bo ri i. Eri ama Driariru ri i.

Ama aci amania muria Angu Azizani alia, Orindi Alatararuri ni ama dri ceria ni, Aci Piriru ri i. Nyaka amani Orindi si ri ovu ta mbazaru ‘bo ero alia aci amani ni. Afa dria amani le ri ovuki fezaru ‘bo.

Daudi otu ndra afa dria ndra lezaru jo Opiniri sizu ri ki dria raka de nga draniku. Fe ndra azita kini le jo nde ma ovu okporu tu, ru be, azini dizaru suru dria milia.

Ani nze ‘di e’yo Sulumani ni, azini fe eri vu afa dria eri ni ndra otu Ekalu Opini sizu ri ki. Fe ndra eri vu baraza ma e’data ki, jo nde ma e’data pie, kurujo eroru jo aliari pie, kurujo urururi pie, kurujo alia ‘daleri pie azini angu ogua asindriza ni ri pie.

Fe ndra eri dri e’data jo Opi ni ‘da ni ma angu ndundu eri ni ndra ne Orindi si ri. Kurujo jo ‘dani ki dria, kurujo ero ru jo Munguni ‘da ni ri ki, azini ero afa ovupi  owizaru owi owi ri pivu ri i.

Angu atalau pivu ‘ba Levini pie, azini azi dria inzitani jo Opini ma vuri pie dria. Fe vini ndra eri vu afajo ayu inzitani jo Opini ma aa ri ki dria. Dahabu azini mele afa ayuzaru obi ndundu pivu ri ki dria. Nzi dahabu pivu melebe talapati alu alu vuri. Mele azini dahabu mesa mukatini, aya za izu ri pie, bakule ni pi azini bafu ni pie.

Altari owitani rini, mele onyiruri ma nzi ngopi; mele akanya cerubimu opipi eyini erepi sanduku azizani Opi ni ri ma dria ri ombo pie.

Ovu ndra dria otuzaru azini ta mbazaru jo nde ni. Afa azi ndra ecepi ni yo. Le ama obi e’data jo ‘da vuri ma vuri lu ko’bo Ekalu Opi ni ‘di siria.

Te o’du amani alia, Mungu ni Ekalu azi siria, Eri ma Amuro i. Ekalu ‘di cani nga ovu ezazaru ku, te eri nga oa idriru Eri be ‘dani ‘dani. Eri otu afa dria azini mba afa ma ta angiri ‘bo ovupi lezaru Ekalu Erini o’diruri sizuri.

Mungu Ki si , Ori Orivuri, Wiki Kali Aziri Danieli Niri, Ayi Kanisani Aziri Riki, E’yo Agbuzaru Aziri Riki, O’du Mini Nizuri, Ru ‘Duzu azini Ru Gazu, Mungu Ni E’dazuri, Eceta, Driariru, ‘Ba Odu Osuzabe ‘diyi, Nyaka Orindi Siri, Kristoni E’yo Zizaru Ri, azini turu turu azi ‘diyi lepi eyi vuti bizu lu ko’bo ‘diyi no.

Mba afa dria amani le ri pi ma ta ero aa ‘bo, te le ama ma obi vuti ni eri ma e’daa ri le ko’bo, ojata azi alu dumba runi kaniku e’yo dri alu ni ma plaza koko.

Saa ‘disi, afa mani ‘yo obuti ‘disi ri ‘dini, Nyaka ta mbazu ri. Nyaka ta mbazu, ani mi nga ovu afa azibe nyazaru beni, ani mi nga ovu afa azibe nyazu ani. Mi ma esu Eri tepu dria. Mi ri anzu kurujoni alia. Eco ‘do oa sa ezu mani muzu ‘bori vutia, mi nga kiri egara kini e’yo ‘diki e’yo ada ki. Mi ri kurujo mi nia lu erizu. Mi me re? Ani Nyaka ‘di be ‘di i, ovuria ta mbazaru ero alia.

‘Yo ndra kini kanisa ‘dini i ama eri ni aku ru aga angu azi cini ra. Eri angu ndra Nyaka ni ovuzu ta mbazaru ri.

Amve ti ecita pi alia mani aciria ‘dale, mi eri ni ma O’dukoti ‘diki oluria ku. Yo, ma azi ndra emini ra, emuzu kanisaa ‘die. Eri vaa ‘dia mani ma O’dukoti ki oluzu ri i. Ma ovu na kaniku su ni pia dika ‘die, Opi ni fe mavu ri ki, ma ovu E’yo siza ni pie ci, mani le olu angu azia ku pelu ‘dia ri ki. ‘Di angu E’yo Munguni ni e’dozu fuzu amveri. Ani kpere Mungu ni eri oja, ma oa vua ‘dia azini eri ofu engazu ‘dia. ‘Da ada. 

Nabi Opini nze ndra ra kini ongulumu azi ‘bapini ki nga i aira azini ki abiriru azini eyi e’yo dria eri ni nzeri ki bi. Emi ongulumu ‘ba pini oa’da i. Emi eri ma trata ni. Emi eri ma kabilo ni.

Ma enga ovu Mungu ziza alia azini ma ama dri ceza Opini ra O’dukoti Eri ni ndra fe Eri ma nabi ni ta mba ero Eri ni si ri alia ombo angirisi Eri ma Amuro sizu ri pi vuti bizu.

Ama nga mu drile Eri ma nabi vuti bizu amani: ‘Di Ri Eceta Asizani Ya, Culu? 62-1230E ni abiria. Ma le emi ai emi ecizu amabe Sabatusi sa su obuti si (10AM), Jeffersonili saa si, Nyaka ‘bani ede ambari azini ta mbazu ci, mi sizu ani Ekalu Opini ru beni ‘di erizu.

“Saa di dika yo.” Ka oa ‘dale, ama ma otu ama agyipi la, dri fuzu Mungu amani be. Nyaka ovu ‘di ta mbazaru sa ‘disi angiri ‘bo. Ama ma fe azi Eri dri.  Ama ma fe azi Eri dri saa ‘disi.

Adri. Joseph Branham i

22-0102 Driaruri

Amuro Agu Alu Ma O’dukotini La,

Eli waraga Ekarusi engapi ovupi Amuro dri ‘do ngo i. Etra ama tualu engazu wudukuru si ara afa lu ecopi Eri ma Amuro etrapi tualu ra ri si, O’dukoti saa ni ri i, O’duko Munguni adaru Amuro Erini omvepi amve ri i.

Ani sa ’disi ma aira kini Eri ‘di gonde angu arasi ri ma ti elozu, Aita capi fepi Kanisa ma ovu ‘duzaru Dizaari ejizu. Azini ovu ‘bazu Meseji pi alia. 

E’yo Eceza O’dukoti ‘di vuri eri ‘di saa ‘disi ‘yizaru aliru asi amani pi alia. E’yo ‘yeza amaniki lu ko’bo E’yo be. Ama niki ra kini embata amaniki kililiru E’yo be, ama o’baki afa azi Eri dria ku kaniku ‘duki afa azi engazu Eri vusi ku. Amani ria, eri afa azi nduni ku te E’yo tepu dria ri i. 

Eri enga ama ‘ba gonde ti ni asizu rivu Aita amani le ‘Duta ‘buari ni erini fe amani ri si. Aita ‘da eri ama alia SA ‘DISI. Edri Kristoni ni ovuria ofuzaru o’diru adani kile ari oa amani ni le, ama alesi ko’bo eri ndra ovu Kristo alia ri le. 

Ama eco idri Erini ne ra. “Azi mani ‘ye riki emi nga vini ‘ye indi, ‘ba aipira ri ni.” Ovuni ‘ba aipi agavusi ri ‘dini ku, ‘ba egapi I aira ‘dini ri ku, te, “Agu aipi ra ri i.” “’Ba aipi Ma alia ra ri, azi mani ‘ye riki eri nga vini ‘ye indi.” A’dusi? Eri ‘yezaru Oni alu ‘davu. Oni ‘da ndra a’duni? E’yo ni, sad ria. Mi ovu ‘yizaru ‘daa. Eri mi ‘bi’bio oruleru ri i mi ka avite miri alia ria. 

Ama ovuku ‘yizaru Oni ‘davu. Ama niki Eri ci. Asi amani fe i Eri vu. A’dukini agu azi nduni ma E’yo i ku, ama awi ‘Di Opi ‘Yoni be. Ama emuki’bo ama Driari vu.

Ama ovu apizaru tre ra azini ca amani ra. Abaza azi andaarii ko’bo o’du ndra ‘Ba E’yo Lipiri kisi rile ni di dika ya, vini ‘dale indi ‘ba kakau ‘be andrusi, ‘ba ci ri ni ecozu afa ci i ma milia ‘yeke ri ‘yezuria, ‘ba dria ovuki ndra eyi ma driariru ri be eyi ngulupisi azini eyi ‘yeki ndra lu e’yo eyini le riki i. Mungu ojani Ima azitaki ku, Eri econiku ovuzu Mungu i ria. Mungu adri afa azini ‘yo kaniku afa azini ‘ye, le Eri ma ‘ye afa alu ‘da saa dria.     

Munguni sad ria nabi azi te epe ‘ba Eri ni pi dri cezu. Eri epe ndra amani Eri ma malaika nabiru 7zuri; Mvi ‘bani I Eri ma ngulupi eceria za ‘ba adani ma aa, Eri ma Amuro omvezu amve azini drini cezu. Tepuki O’duko Munguni Eri ma Amuro ni ri i. ‘DAARI AMA DRIARI I.  

Eri mu ndra oru ‘daa. Eri ni ndra ra. Ani Ma le ‘da tu, geri erini emuzu ri. Eri emu ndra eri ma driaru rivu, idia fe erini i ‘yizu ri.

Munguni Eri ma Amuro omveria tualu. Eri cani otita Ini oja ku. Cani ku ongulumu azi agupi pini ni ma ti pe Ima Amuro etrazu. Eri ma Amuro ni I tra lu E’yo kiliru ri ageyia, ‘da O’duko Munguni Tepu pi dria ri i. Eri Mungu ma azi ngaza adaru andruni ri i.    

Geri azi cika ni yo Eli O’diru e’dozu aga emuzu tualu ama idia fe, ama Driaru ri erizu e’yo nzeria amani. Ma leta emi alu alu ai emuzu erizu ama ‘be Sabatusi saa su o’buti si (10AM), Jeffersonvili saa si, O’dukoti: Driaruri 62-1230M ni erizu. 

Mi ka eco ru eci ama’be ku, Ma mi oru O’dukoti azi pezu avizaru aku eminia, kaniku, mi oru ocepi mini ri O’dukoti azi e’duzu ani emini ecozu rizu tualu indi beni, odu osuza ndepi ni ri vutia, Amuro ma Driariru ovupi ecezaru ra ri erizu beni. 

Adri. Joseph Branham i.   

21-1226 Betelehemu Wereruri Ka A’dusia

Kilasi La,

Ale lu ta e’yo olu azini emi emba andrusi geri waragani alia si. Okoria, ama ne nga afa ndra amani oni Sabatu alipi ‘bo ‘disiri.

Mi orifi Munguni ndra ovupi o’azaru okori bi ngoni ngoni? MI MI PLAY.

Yoshua ‘yo ndra i ma olu’ba ma ‘yeki a’duni? Emu ki Yerikoa, emi olu e’yo ‘ba ‘da pi dri PLAY MIZU RI SI, ani emi azini jo emini pie ki nga ovu pazaru.

Eri ma ‘ba o’dukoti ojipiri ego ki dri, azini ‘yo kini, “Ma obi azita mini pi vuti ra. Azini oku azi amani esu ‘dale ni ki, ama ndra tepuki avizu ria.

Ama ovuni drinza si ku. Ama asikini a’dini Eri nenia risi ku. Aleki ndra ‘ba dria ma ne Eri azini eri Eri. A’ba ki eri aku amani pi alia, kanisa amani pi alia, angu dria amani muzuria, ani ‘ba dria alipi ama ageyi si riki nira kini ama ovu e’dazaru Alama amaniri be ‘bo; Yesu Kristo I, Eri ma E’yo I, Orindi Alatararu ri I, O’dukoti sa ni ri I, Tepuki, O’duko Munguni ri I.

Ama ecoki nee ra kini adra ni ‘di ngonde emuzu ali angu dria si, ani afa dria ovupi Alama ma palaa ku riki nga dri ja ra. Te Eri ka nga Alama ne’bo, Eri nga alia ma drile si. Eri afa Munguni le sa ‘di alia ri i. O’dukoti ondre-saa niri, Eri Alama fezu ma nga azi ri i. 

Kilasi, Eri ‘yo ndra amani kini eri mu oa ejizaru tu ngole ya?   

  • Lu ‘yozu Ma ai eri ra…ri cani ku.
  • Acizu ara angu Eri ni ovuzuria…ri cani ku, eri mi ‘ba ‘di onzi agara.  
  • Ma ogu afa ku.  
  • Ma fi Branham Tabanakulua.
  • MA AI O’DUKOTI ‘DI RA.
  • MA AI E’YO DRIA MINI ‘YORIKI RA ADRIPI BRANHAM…KAKA!!!

‘Da onyiru, ‘da ma efi lu kini mi eco afa lazu ra.

Mi ma emu lu kpere ‘di pi´ku, ‘yozu kini, “Ma ai O’dukoti ra”. Mi ma ru ‘ba o’dukoti ojipiri indi. Mi ma efi Kristo alia!

Mi ‘du O’dukoti, Mi ji Eri asi mi nia, ani mi ma ovu Alama be beni, Idri alu alu ndra Kristo alia ri ma ovu mi alia. “Ma ka ‘Daa ndre, Ma nga ali emi drisi.”

Mungu enga I ma Amuro dri ‘yo ngoni ya O’dukoti vutia O’dukoti vutia? TEPU KI, TEPU KI, TEPU KI. Eri muke Meseji oluzu azini Meseji embazu, te le mi ma AVI MESEJI I.

‘Ba azi eco ‘yo eyi le Meseji ‘di tu te leki Meseji nde avi ‘ba pi ma drilea ku ngoni ngoni? Ovukini agyia O’dukoti ‘di be ma ni ovu rile ku, a’disiku ma le ‘ba dria ma emuki tualu O’duko Aci Piriru ni e’da’bo ‘di erizu.

Ama ovuki AITA oyapiku ri be E’yo Erini alia. Ama ovuki Eva I ku. Ama ovuki ‘ba abazaru riki ku kaniku ‘ba enza o’bapi Setanisi riki ku. Ama ama e’bi E’yo Munguni dria Bibilia aliari ma rua, azini E’yo dria Tepu dria ri pi rua. A’disiku tepu ki Mungu ma egata mbariki, ovupi nzezaru azini ecezaru Eri ma Amuro dri riki, azini le ni e’yo efi eceza azi agbari ku. Eri angu alu ci amani ecozu AMENA ‘yozu E’yo driasi ra ri i.  

O’dukoti ‘dini mukati o’diru emupi mvua engazu Bua, aci amani rini ri i. Eri  Mukati Idrini ri i, azini o’du dria ama o’diruri esu engazu Kristovu, engazu Bua, Orinidi Alataruri, emuzu azini idri amaniku efizu.

Ama ovuki rizaru tualu e’yo alu si, E’yo Munguni si, azini ama E’yo ‘Da nyaria. Ama Mungu ma Betelehemu orindi siria, Mungu ma Mukati orindisi ri nyaria, azini idri amani ki E’yo dria Eri ni ndra nzeri pi ma ti ape “Amena” si! Ama ayiko zu Nyaka Buni malaika pini ovupi ta mbazaru amani, ama nya ani beni ‘disi.  

Mi emu ru ecizu ama’be Eri ma Mesa tia ani Nyaka Buni malaika piniri nyazu tualu ama’be Sabatu ‘disi saa su o’butisi (10AM), Jeffersonvili saa si.

Emi ‘ba tepu niru ‘dia riki, tepu ‘diki eripi riki, Ma le ta ra emini ‘da erizu: Yesu Emu Ndra Betelehemua Ka A’dusiari. ‘Ye ndra ‘da le a’dusi?

Ata nze e’yo pale alu dika ‘bo amani Eri ma Nabi vusi azini ai emi dria ‘Ba Tepuni ‘diki emuzu O’dukoti: Betelehemu Wereruri Ka A’dusia 63-1214 ri erizu.

Ma e’yo oluza azini embaza de di i ‘bo, saa ‘disi ama MI PLAY di.  

Adri. Joseph Branham i