‘Ba Mana Lepi Leletu ‘Diyi

Ama ayikosi a’disikuni amani ecozu Nyaka ovupi foloko kaniku efi azi koko eri ma aari nyazu risi. Mukati esi vaa engazu ‘Bua, ‘ba omve “Mana ni”, angu dria a’buzu alizu ‘Buni risi.

E’yo Eceza Orindisi risi Eri ece amani kini angu lu amani ecozu Mana O’diru ori-eri koko ‘di esuzuri lu alu; O’duko Munguni Erini fe Ima Amuro dri ‘bo ri erizu risi.

Eri Eri ma matu ‘baza mburu azini siri ayi alu alusi kini kanisa ma eriki O’duko Opiniri i ri. Ayi asizu ‘di alia, Eri ma matu ‘baza ‘di oru aga ayi azi cinini risi ri ra; a’disikuni ‘di o’du Emuta Opini ri’i. Li ama bile, mbeleru driari si, kini le ama ma eriki Eri ma O’duko adaru, ovupi e’dazaru ra ri’i.

Kaka, o’duko ki kakau wudrikurua — e’yo ewaruki azini afa ‘ba ko yi azara riki tre; te o’duko azi muni ovu orodriru ambamba azini fudri ra e’yo erivuri ‘yezu o’duko Orindivu ri le ni yo.  Ani, “‘Ba ovupi bile be e’yo erizuri, ma eri e’yo Orindini ‘yole kanisa tiari.”

Eri ‘di be ‘da, Eri ma bile liza kanisa pini ri i, eri orodriru tu O’DUKO Orindi vuri erizu ngole yari’i. Ada adaru ‘da angu ari’bo ni omba ‘bazu ani ri’i, o’bizu orodri O’DUKO ‘DA erizuri vusri ‘bazu re ‘bapi vusi.

Eri lu amani kini O’DUKO KAKAU ki indi.  E’yo ewaruki azini afa ‘ba ko yi azara riki tre; te mi ma avini aluni ku, le mi ma eri ERI MA O’DUKO OVUPI E’DAZARU’BO RI RA.   

Ka mi su su ‘da ‘yozu yani, mi tru ma ra, te, Ma ama ra ‘dani mu ovu gazarusi, te Ma O’duko Munguniri i emini.

Omvitani ‘di be ‘da: MA O’DUKO MUNGUNI RI I EMINI.

Eri mgboru ambamba Eri ma Amuro dri.  Ovuni zizaru ku, Eri kpi ‘daa nezaru ra; ‘ba ci ri eco Eri la ra. Ovuni ‘di ma ‘ba pini afa azi erini awi ‘yoku ye ni olu ‘dini ku…ovuni ma ‘di eri si masi ‘dini ku. Eri lu amani mgboru afa orodriru ndeni le ama ma ‘yekiri a’duni yari. Ale Munguni kililiruri eri ERI MA O’DUKO ERIZU RI’I AZINI ERI MUNGU MA O’DUKO AMANI RI’I.

Adripika azini amvupika, ovuni ‘di ma ‘yo emi ma eriki emi ocepiki ku ‘dini ni ku.  Ovuni ‘di ma ‘yo yi enzoru kaniku onzi yi ka ki e’yo olu ‘dini risi ri ku. Mgboru Opi ‘ba ama ‘dia ovuzu azakomani Amuro dri azini emi e’dazu VULE E’yo andra okori vu; O’duko ‘da ‘bazu emi drilea afa orudriru ndeni emini eco erira ri i ri ru. Ama RO Mungu ma ALE KILILIRURI ALIA. Adamu ovupi ogozaru ro ri i, cezaru kuru E’yo vutia. Mungu nze andra e’yo Adam be tivu bivu Amvu aa, ani andrusi, Eri afa alu ri ‘ye.

Le ama ma soki pa a’befe aa ani ‘yozu, “ama adripika ki!” Ama ovukini awazaru ku, Ruati aluni ama Dria; asi’baza azini Embata Aluni, (Embata Bibiliani ri’i.)

Ama adripika ki. Ma ‘di o’bi kanisaki awa ‘dini ni ku, ma o’biria ama ejizu tualu afa LU ecopi Amuroni ejipi tualu ra ri si. Acakini dria a’i ‘BA AZI BE, KANIKU ONGULUMU OLU’BANI ni pie ku; yi dria ndu azini yi afa ndu ki ‘yo. ‘Ba o’dukoti ojipi malaikaru azirizuri lu ALU. O’duko Munguniri lu ALU. O’duko Munguni fe Amuro Iniri dri tepu ma dria ri’i.

Ma nga ovu kpi. Ma E’yo vaza eri: O’duko Munguni tepu ma driari erizuri NI ALE MUNGUNI KILILIRU RI I.

Kile o’du andra Samuelini riki si, andra ‘ba pini emuzu erivu ani ‘yozu yi leki opi azi ma ce yi ma dri ni rile.  Nyo andra eri ma asi tu. Mu ‘di andra Mungu vu ani Erini afa andra yini leri oluzu. Mungu ‘yo andra Samueli ni, yi gakini mi’i ku, Samueli, yi gaki Ma’i, ani Ma ma ce yi ma drini ‘dini ku.

Eri andra yi ma dri ce ngoni ru? ERI MA NABI, SAMUELI VUSI. ‘Da andra Eri ma ALE KILILIRU ri’i, ani yi gaki andra eri si. Ovuzu Eri ma Amoruni le mi ma go dri RO Mungu ma Ale Kililiruri alia. Mi cani ovu ALE KILILIRU 2 ni pie ku.

Ma le te tu Amuro driarini emuzu tualu engazu wudrikurusi ara O’duko Munguniri erizu dria sawa aluri alia ngole ya.  Ovuni a’bari “Ma” ‘yoria risi ku, te a’disikuni Munguni ERI ‘YERIA risi. Eri afa lu Eri ma Amuro ejipi tualu ra ri’i.

Ma mi ai emuzu erizu esele Amuroni ri be, Sabatusi sawa azia etusi, Jeffersonvili saa si (Saa Alu ondresi Ugandaa): Aliria Mudri, Azini Yahudi Alifu Turu Alu Kali Su-Drini Suri Ki 60-1211M erizu.

Mi ka eco rueci ama be ku, mi oru ocepi mini ri O’duko Munguniri erizu Sabatu ama o’butisi kanisa mini ri alia. Mi eco egara, Amuro’i wudrikurusi ra, kanisa alu alu alia, aku alu alua, kani mi tro ngwa yari ti, Mana O’diru a’buzaru dria dria aluza ‘Bunisi ri eriria ‘dini ri.

Adri. Joseph Branham i