All posts by admin5

25-0907 Efuza Nazuri

Mesegi (O’dukoti): 63-0630M Efuza Nazuri

BranhamTabernacle.org

Amuro Efuza Nazurini Leleturi,

Mika ovu mile orindini be ku, mi vani eri ku.  Te mile orindisi ri ni Okpo Munguniri ne ra aciria a’disikuni Eri ko’boru e’yo Munguniri be. Eri E’yo’i azini Mungu ma E’yo oja i tuaku. E’yo erini ‘yele okori, Eri curu’do e’yo aluri ‘yeria azini mile orindisi ‘diyi Eri ndre, Eri a’i azini ERI ERI.
    

Wudrikuru eco nga a’i ma be ku e’yo mani a’i ovuzu Mungu ma geri fe andruniri ma dria: O’duko orodriru ndeni le eyi ma eri ri ni O’duko Munguni tepu pi ma driari i ri.  Le emi ma avi tepuki emi kanisa eyi ma alea,  te EKA adaru O’dukoti ‘di a’ira, mi econi afa Mungu ma nabi ni ‘yori a’iku ku.

Sabato ‘disi ama nga ama oku tualu ekile anzi Ebraniani ‘diyi ni ndra ‘ye mana ‘bani fele yi dri ini alia, yini yi ma ta mbazu kpere o’du drusirisi isuzuri le. Ama nga ama oku ama Mana Orindisi ngapi ama dri okpo fepi ama Efuza amboru emupi mbeleruri ni.

Geri azi muke ndeni yo aga fezu O’duko Munguniri dri e’yo nzezu I ma ngulupisi, e’yo nzezu I ma dria, azini O’dukoti amani nga eri ‘di TRE!  

Mungu ‘du ndra agu alu angu rokodriari ma alia, imba eri ra.  ‘Ba eji eri vile, ‘du e’yo nde ra, ani eji ‘ba nde yi amve.  Ene afa mani ‘yori ma efi ra? Eri econi otita I vile ‘diyi oja ku.  Eri Mungu’i.

Ka’dini ‘dia Eri ‘yo ama dri kililiru kini I oja Ima otitaki ku.  E’yo Erini ‘ye e’dozu e’doria ri, Eri nga eri ‘ye dika asizaa, Erini azilerile.  Ka’dini le ama ma ni ra sawa ‘disi Otita Erini ndra ‘dasi ri Eri nga ovu Otita aluri le sawa ‘disi ri.

Eri ngani azi nga ongulumu eyi pie ku. Awini drio ‘ye ku. Eri e’yo ‘ye ‘ba alu alu be;  Eri ‘ye ndra ra, dika Eri nga kiri ‘ye ra. Eri azi ra, ata Malachi 4a, Eri nga eri ‘ye ra.

Eri ngani azi ongulumu eyi pie ku. Ka’dini, Eri azi o’du amani alia kini I nga ‘ba Alu ma ti pe, Malakai 4 i, ‘Di Opi ‘Yoni be.

‘Da ada. Ka’dini aziza Eriniri ci, Eri ndra a’dunni yari; azi afa ndra Erini ‘yo I ta mu ‘ye ri ra, ani ama di ‘di’i.  Le ama ma ovuki ‘ba ayikoru ni ku ngole; yi dri eceta nde feria, Eri ma eceta E’yo azizaruri vusi, E’yo azizaruri’i. Eri azi ndra ra I ta mu ‘ye ra.

Geri ndra Muguni pe Ima Amuro ma di cezu vule ‘daleri ngole?

Mungu pe, o’du efuzu ‘diyi alia, Eri omve ongulumu azi amve ra. Azini amuti ‘da ma aleasi, ale emi ma ndreki e’yo azi ra, Eri ovu lu ‘ba iri be mupi angu azizania ra ‘diyi. Afa Erini pe yi ‘duzu amve ri ngo’i? 

Eri ‘di’i. E’yo ‘di orodriru tu omi orindisiri ni vazu. Mungu pe ndra Amuro ma dri cezu azini jizu Angu Azizania ngoniru? 

Politiki si? Amuti si? Eri pe ndra nabi azi, eceta okpo-uruleru Aci Piriruri ni ri be, ani ‘ba eyini ecozu abazuku beni. E’yo nabi ni ‘yo ri ndra E’yo Adani. Ani Mungu emu va, Aci Piriruri ma alia, azini e’da Ima Ngulupi ra, e’da I ma E’yo ra. ‘Da ada? ‘Da afa Erini eji ri’I, Eri ma efuza oko ri’i. Eri ma efuza irizuri…

Ani, lezu nezu ra kini ‘ba ngaki ni e’yo onzi ‘ye ku, Eri epe yini nabi azi ma ti eceta okpo-uruleru Aci Piriruri ni ri be yi ma efuza amborurini.

Afa Erini ndra ‘ye, efuza okorisi ri a’duni? Eri epe nabi azi ma ti, odu osuzaru Aci Piriruri be, ani Eri omve ‘ba nde ki amve ra. ‘Da ndra Eri ma efuza okoiri…

Efuza irizuri, Eri eji Nabi azi, odu osuza beni, ndra ovupi Eri ma Mvi’i ri, Nabi-Mungururi.  Musa ‘yo ndra Eri ta mu ovu Nabi ni; azini ovu ndra Aci Piriruri be indi, azini ‘ye ndra ecetaki osuta pie…

Ani ‘dia Eri azi afa aluri’i efuza o’du asizu ‘diyisiri alia, azinni Eri econi ku eri ojazu…

‘Ba kakau ki nga ai ra ‘yozu kini, ee, Eri epe nabi ma ti Amuro omve amve, te sawa ‘disi Orindi Alatararuri ni nga Amuro ma dri ce azingaza vusi ‘dini;  te Eri awini ndra ‘yo ‘dale ku…ama ma muki nga lu drile lazu.

Mi ne Aci Piriruri ndra ki omve amve ri, ce yi ma dri angu azizania, nabi odu osuzabe ri ma palaa. Aci Piriruri yini ndra eco ne rari, ce yi ma dri angu azizania, nabi odu osuzabe ri ma palaa.  Ani yi sawa driasi gaki eri si. ‘Da ada? Ada.

Eri Aci Piriruri alu ‘dini ‘ba pi ma dri ceria dika angu azizania, angu nyaza Eli Alifu aluri’i.

Aci Piriruri, driceza Munguniri palaa…Munguni ndra Aci nde i, azini Aci Piriruri osu lu ndra odu nabi nde ma dria. Aci Piriruri ni ndra pa sozu sadini ‘Buariru kini Musa ni ndra omvezaru amve.

Sawa ‘disi, emi ega ra, Musa ni ndra Aci Piriruri i ku. Eri ndra dricepi odu osuza beri, Aci Piriruri ma palaa, azini Aci Piriruri ni ndra lu eri ma O’dukoti ece i eceta kisi azini osuta pie.

Onzi azi yo, agyipi la. Eri ovuni afa Mani ‘yori i ku; Ma lu emi adripi ni. Te, eri afa Munguni e’da emidri ri’i, afa Eri ‘ba pi E’yo adaruri i ri. Aci Piriruri alu alu Erini ndra ayu azi iri ‘dapi niri, Eri eji Eri emi eselea andrusi, azini waa Eri ra geri sayansinisi.

Mungu ojani Ima otitaki aluni ku. Mungu ovu geri azi be fezaru Ima Amuro dri andrusi ci; Aci Piriruri’i, driceza Munguniri palaa…Munguni ndra Aci nde i, azini Aci Piriruri osu lu ndra odu nabi nde ma dria.   

O’duko lu alu, nabi alu, ovupi ‘Di Opi ‘Yoni beri, William Marrion Branham i. Eri Aci Piriruri i ku, te eri dricepi odu osuza be Aci Piriruri ma palaari i.

Aleki dria ovu Mungu ma ALE KILILIRU alia. Eri ma E’yo NI Eri ma Ale Kililiruri’i. E’yo ecezaru ra o’du amaniri niri ni O’dukoti ‘di i. Eri ma nabi ma ti ndra epezaru Ima Amuro ma dri cezu. Mi ka ‘da ai ku yani, mi econi ku ovuzu Eri ma Amuro’i.

Emi emu ani ruotuzu ama Efuza amborurini Mungu ma E’yo Kililiruri erizu risi amabe Sabatusi sawa azia etusi Jeffersonvili saasi (7pm Ugandaa), amani ‘di eri ria: Efuza Nazuri 63-0630M

Adri. Joseph Branham i

25-0817 Driceza

Amuro Kristoni Leleturi, ama ma emuki tualu Sabatusi sawa Azia Etusi, Jeffersonvili saa si (7pm Ugandaa), 65-1207 Driceza erizu.
Adri. Joseph Branham I

25-0727 Duta Oruri

Mesegi (O’dukoti): 65-1204 Duta Oruri

BranhamTabernacle.org

Amuro A’yota Kokoru Leleturi,

Opi fe amani sa’wa onyiru ‘dileni okuzaa sabiti ajerisi Erini Ima E’yo ecezu amadri ria. Eri e’da ra, E’yo Inisi, kini ama Driadriariru ni: Ima E’yoni, O’dukoti ‘Di’i, O’duko Munguniri tepu pi ma dria ri’i; yi dria alurile, Yesu Kristo alurile aje, andru azini ‘dani ‘dani.

Ama eriki ndra geri sitani ni o’bizu O’dukoti ma esele cozu ‘ba o’dukoti ojipiri be ri ra, te inzita ma ovu Opi Yesu vu, Mungu Ima ngulupisi nze ndra e’yo Ima malaika amboruri vusi ani luzu amadri:

Ama esu kini agu azi ka emu, tiepezaru engazu Mungu vu, Mungu ka ‘baa ni, ‘DI OPI ‘YONI adaru ri be, o’dukoti ki ‘ba o’dukoti ojipi ri be ki oa alu azini alurile. A’disikuni ovu ti epezaru pasozu ‘DI OPI ‘YONI ru, E’yo vusi E’yo vusi, ani eri i o’dukti eriniri be ki alu.

Mi cani O’dukoti pi ma esele co ‘ba o’dukoti ojipiri be ku, yi alurile, ‘DI OPI ‘YONI. ‘Ba odu osuzabe enzoru ‘diyi tro a’du ‘yo yari ti, Mungu ‘yo ndra kini yi alurile azini cakini ovu esele cozaru ku.

Eri ‘yodi vini ndra amadri kini alekini bongo keikeruri ku o’bu cini ki o’bizu amani tepu ki eriria, a’disikuni o’buki kani o’bu suki O’dukoti ‘Di ma alia yo. Eri Eri ma Yi a’di sawa dria rapi alaru azini ondikokoruri’i. Sawa dria egburia, nzuni tuaku, lu muria drile ruemiria azini ruemiria, amadri E’yo Eceza angiri azini angiritu Eri ma E’yoniri eferia.

Eri eji ndra ama omia AVIZU TUAKU kini Ima aziza amabe ri Gatakokoru, Aje-nzetakokoru, te angiri tu driari, A’yotakokoru.

Eri tro aleni ya, atitani ya, kani dri-suza ururi i yani, afa azi ka ovu a’yota kokoru eri DRIADRIARI azini ovuni ‘bazaru a’yota azini azita cini ma palaa ku; eri nga i ‘ye ra tro afa azi nduni ‘ye tro i ni ti.

Eri le ndra musumari nde pa mgbi, ani Eri ‘yo ndra amadri o’du ‘disi Ima E’yo Sizaki ecaria pari yinia ama miletia.

Etu (s-u-n) alualu engapi kala etuni efuriari ni s-u-n alualu ‘depi kala etuni ‘deriari’i. Azini S-o-n Munguni alu alu andra emupi kala etuni efurialeru ma aa andra Ima ngulupi ecepi Mungu ovupi ‘bazaru ruatisiri ruri, ni S-o-n alu alu kala etuni ‘derialeru ‘diari’i Ima ngulupi di e’daria kanisa pi alesi ovuzu alurile aje, andru azini ‘dani ‘daniri’i. Diza ondreni Mvi ni ri eca ‘bo. O’du ‘disi E’yo Siza ‘di eca i ma paria ‘bo ama drilea.

Mvi ‘Bani emu dika ra ruati ‘ba adani alia o’du amani alia, lu kile ndra Erini azi Eri ta rile, Amuro omvezu amve. Eri Yesu Kristo’i e’yo nzepi kpi amadri ri’i, ani Eri leni agu azi ma e’yo efi eceza ku. Afa dria amani leri, afa dria amani leri, O’duko Munguni e’yo nzepi tepu ma dria emuria engazu Mungu ma Ngulupi vu ri’i.

Eri e’yo eceza e’data E’yoni ovupi ‘bazaru adaruri’i. Azini ama oaria o’du ‘da ma alia; inzita ma ovu Mungu vu; e’yo eceza e’yo zizaru Eri ma Ngulupini ri’i.

Saa dizaru Amuroni ovuzu eri be ‘do ngo’i, rularia indikindi Mvini ri ma alia, niria. Le nganu ma emu vule nganu ru ra, azini akufi azi ama eselea yo. Lu O’duko Munguni nditiri e’yo nzepi amadri ri’i, ama siria azini ama ‘baria e’da Kristoniri, E’yo alia.

Ama agianzi azini ezopi Munguni ki, Eri ma arakala obini Erini ndra pe okoru emuzu ayi ‘di, ayi amboru ndeni adi wudrikuruniri ma alia. Eri ni ndra ra ama cani ta e’de ku, ama cani ta aparaka o’ba ku, te ama ta mu ovu Eri ma Amuro E’yoru adaru azini a’itaruri’i, Eri ma Ori Iburahimuni Opiru Amboru ndra mupi emupi ri’i.

‘Duta-ururi ni ogogo. Sawa eca’di asiza ma alia ‘bo. Eri emuria Ima Amuro ima ngulupi ‘bapi ngonde ‘bo te ‘dilu rizaru Indikindi Mviniri alia, eriria Eri ma O’dukoni Ima Amuroni osuria rini. Mbeleru ama nga e’do ama ‘ba leletu mupi a’buza sawaniri ma drilea ‘daleru ‘bo, ‘ba tepi azini avataza be ama nezuri ki ne.

Tepuki Mungu ma geri fe Ima Amuroni ‘bazu kililiru ri’i. Tepu ‘di afa lu ngapi Eri ma Amuro ecipi tualuri’i. Tepu ‘diki O’duko Munguni Eri ma Amuro dri ri’i.

Ma mi ai emuzu erizu esele Amuroni ri be, Sabatusi sawa azia etusi, Jeffersonvili saa si (Saa Alu ondresi Ugandaa): amani e’yo driari eriria afa i otupi pari ‘dupi mbeleruri ma dria: ‘Duta Ururi 65-1204.

Adri. Joseph Branham i

25-0706 Ma Eri Ndra Ra Te Ma Ndre Curu’do ‘Bo

Amuro E’ile-bo Leleturi,

Andru, E’yo Munguni nze geri Ima ‘Ba O’dukoti Ojipi ri vurisi ‘diyi nga KIRI yi ‘yeria AMA, AMURO YESU KRISTO niri vusi.

Maka e’yo muzu kanisaari a’iku, ma ovu kanisa be ci a’di e’yosi? Ama ovu yi be kari ‘di ma alea dria, e’izaru ini azi ndra ‘dasi, angu mailo turu iri alu alu vusiri ma vutia kala driasiri alia ma kanisa azini ci.

Eyi ndra kanisa eyi ma alea, aku pi ma alea, jo nyiria ‘diyi ma alea, azini pari odu esuzu ‘diyi ma alea; erezaru kari United States niri ma alea ndulu, e’yo eriria, sa’wa aluri ma alia E’yo Munguniri ni ndra fuzuri.

Azini andru, ama nga kiri ERI VILE KANISA ‘DIYI MA AZI. Eri nga KIRI AMA OCEPI’I. E’yo Eriniri LENI NGA KIRI E’YO EFI ECEZA KU, dika ama nga KIRI trazaru wudrikuru ma kalasi dria, E’IZARU-SIMUSI, O’DUKO Munguniri erizu, Amuro Yesu Kristoniri ‘bazu kiliru.

O’du ‘disi, E’yo ‘dini nga kiri pari ‘duria.

Eyi ‘ye ndra ‘da sa’wa ‘dasi a’dusi? Ocepi opiki ndra yi ma kanisa ma ti ki ci O’dukoti nde erizu sa’wa ‘dasi a’dusi? Eyi ecoki lu ndra te tepuki esuzu, vutinia di O’dukoti nde oluzu yi ma ‘ba pini vulevuleru; azini ma nii ra kini ‘ba karakara E’yo Eceza kokori ‘yeki ndra ‘da ni.

Kani ‘ba azi ‘diyi ‘yo ongulumu yini ‘diyi dri kini, “Emi eri nga sawa ‘disi, ama a’ira kini Adripi Branham ni Mungu ma nabini, te ‘yo kini ama ma eri eri kanisa amavile ‘diyi ma alia ‘diniri ku. Ma e’yo olu Sabatu ‘disi, azini sabatu dria ma alia; le emi ma esu lu tepuki ani emi ma eri yi emi akua.”

Amuro sawa ‘dasiri, ekile Amuro sawa ꞌdisiri le, ovu ndra Eꞌyo E’yo Eceza be, azini yi le ndra Oꞌduko Munguniri eri yi ma ngulupi si. Eyi le ndra ti eci Amuro be kari ndesi ndulu O’duko Munguniri erizu erini muria drile. Eyi le ndra ovu e’dazaru eri ma kanisa ma eseleru, akuru, kani pari ci eyini aa’zu ‘diyi ma alea, O’dukoti be, O’duko be, azini curu’do, tepu pie.

O’du ‘disi, E’yo ‘dini nga kiri pari ‘duria.

Eyi ndreki ndra/Ama ndre Eri ra te ‘ba azi ‘diyi awini ku a’dusi? E’yo nizu okorurisi, ‘ba ‘ba ndra ama dri e’yo ‘Di ndrezu. Te mi ‘bani ti pe ku ‘dini, mi ngani Eri ndre ku. Nganu ni Eri ndreria azini e’do i nze kalasi ‘bo.

Eri ma efi adrini kini le mi ma ku muzu kanisaa ja ni ku. Kani efini adrini kini le ocepi miniri ma ku azi ngaza ja ni ku. Eri ma efi lu kini ati’bo karakara ki ocepi pie aviki E’YO KULURI ‘bo, azini eyi luki ‘ba eyini dri kini O’DUKO ORODRIRU NDENI le eyi ma eri ri ni O’DUKO Munguni tepu pi ma driari i ‘dileri ku.

Muzu kanisaa o’du dria wiki ma aliari ‘bani mi Amuroru ku; ‘da ovuni afa Munguni leleri’i ku. ‘Ba Farisai ru azini Sadusi ru ‘diyi ovuki ndra embata ‘da be. Eyi ni ndra waraga dria E’yo dria ma alea ‘diyi ra, te E’yo Idriru ni ndra pasoria KPI ‘DAA rua ‘ba ada ma alea, te eyi ‘ye ndra a’duni? E’yo aluri ‘ba karakara ki ‘ye andru.

Yi nga ‘yo kini, “‘da ndra diniki erini e’yo nze yi driari’i. Eyi leni ndra adripi Branham ni emu kanisa eyi vu ‘diyi alea e’yo oluzu ku, te ama E’yo olu azini lu afa erini ndra ‘yori ‘yo.”

‘Da ꞌi onyiru tu. Opi ma ovu inzizaru. ‘Da e’yo le mi ma ‘ye ri’i. Te di ‘yozu, andru eri ndu, eri onzi ‘bani Adripi Branham ma tepuki avizu emi kanisa. Mi ovuni ndu ‘ba Farisai azini Saduki ru kaniku dini ni ‘diyi pie ku.

Mi ‘ba lokiriruni’i.

Ekile sawa ‘dasiri le, eri Yesu i, pa soria jotilea kporia, lezu fizu e’yo nzezu Kanisa Eriniri be, te eyi ngani eyi ma jotile nzi ku, dika eyi ngani tepu ki avi eyi ma kanisa pi ma alea ku. “Eri cani emu kanisa amaniria eꞌyo oluzu ku” .

Ariboni nga mu e’yo ‘da oja azini opi geri karakara alia erini NGUZU ONZI ovuzu e’dazarurisi, te ti, eri ovu e’dazaru ra ama milea azini ‘ba karakara yi efuria.

“Okokelesi ndra” [Ongulumu ‘yoki, “E’yo i.”—Ed.] “E’yo nde ovu ndra” “Mungu be,”] “azini E’yo nde ndra” [“Mungu i,”] “E’yo nde ofᴜ ‘ba rua berirᴜ, Eri ovᴜ ama eselia.” ‘Da ada ya? Sawa ‘disi ama E’yo azizaru aluri ndre, Luka niri, Malakai niri, e’yo aziza azi andru ‘diyi dria, ‘bazaru rua ru, aaria ama eselea, amani eri ama ma bile siri; sa’wa ‘disi ama Eri ndre (ama mile si) Ima Ngulupi ma E’yo efi eceria, ama leni e’yo efi eceza ‘ba adani ri ku. Kanisa Mungu idriruri niri ni, ‘dia azini simu driari la, emi enga mbeleru, de nga sawa ecani vutivutiru ku!

Emi nzi emi asiki ani emi e’yo Munguni lu nze mi dri ‘diyi, kanisa erini ‘diyi dria. Sawa ‘disi ama ERI ndre, ama ma milesi, IMA NGULUPI MA E’YO EFI ECERIA. Alekini e’yo efi eceza ‘ba adani cinini ku!! EMI ENGAKI O’DUASI DERE OVUNI NGA VUTIVUTIRU KU!!

Ama eri e’yo afa ‘diyi ma dria idri amani ‘diyi ma alia dria ra e’yo ngapi pari ‘du sawa asizuri ma alia ‘diyi. Sawa ‘disi ama e’yo nderi ndre ama ma milesi pari ‘duria.

Eri ‘yo ndra ama dri kini, GERI ALU LU, ‘DA MUNGU MA GERI ERINI EDE IMA AMURO DRIRI’I. LE EMI MA OAKI O’DUKO MUNGU TEPU MA DRIARI BE.

Ma mi ai emuzu ruecizu amabe Sabatu ‘disi sawa azia etusi (12pm), Jeffersonivili saa si (7pm Ugandaa), ani Mungu ma Geri fele andruri erizu. ‘Dini mi eco vini ‘yo kini, “Ma eri ndra e’yo Mi dria ra, te di sawa ‘disi ma ndre Mi ‘bo” .

Adri. Joseph Branham i

O’dukoti: 65-1127E Ma Eri Ndra Ra Te Ma Ndre Curu’do ‘Bo

E’yo Sizaki:

E’doza 17
Efuza 14:13-16
Yobu Chaputa 14zuri azini 42:1-5
Amosi 3:7
Marako 11:22-26 azini 14:3-9
Luka 17:28-30

25-0615 Ruecita Amuro Kristoni Ri Vu Nelekuri

Mesegi (O’dukoti): 65-0615 Ruecita Amuro Kristoni Ri Vu Nelekuri

BranhamTabernacle.org

Mungu Ma Oku Pezaru’bo Leleturi,

Geri azi eri ma ageyia ara yo, mi Ori Munguni Orindisiri’i, arakala obini egata Erini ni ‘diyi ecepiri, dika emi ndra Eri ma alia de nga wudrikuru e’doni ku.

Ama econi mu drile ku, ama lu ko’bo ori ndra mupi nyakua ‘da’i. Ama Yesu aluri’i, wura Amuroni alia, okpo aluri be, kanisa aluri be, E’yo aluri be idriru azini aaria ama ma alia isiria dri aziru, NGONDE ‘DUTA URURINI.

Eri ‘yo ndra amani kini ama esele ovu cozaru engazu ama ecita ndra okori vurisi ‘bo, dra orindisiri vusi, dika ‘di curu’do ama osi o’diru’bo, kani ovuki ‘duzaru dika, ama ti ecita o’diru Orindisi ri vu. Idri ama vile oku azini e’yo wudrikuru ni ‘diyi dika you, te Idri Ewulerini ri’i. Ori andra ama ma alia e’doria, ri isu ama ‘bo!

‘Da ma efi ngoni? Eri ma efi kini ama buku okuri mu ama aje okuri be ‘bo, ‘ba oja eri ra. Eri SAWA ‘DISI Mungu ma ꞌBuku Oꞌdiri” ma aliaku; adrini buku idriniri ma alia ku…yo,yo,yo…te Buku Idrini Kabilomvaniri alia. Afa Kabilomvani onze’bo ri. Eri ama kokobi ajeni angu ama Ori adaru Ewule Ewuleri ni ovuzu ri’i.

Emi ngonde? Eri emu ‘di. Le mi ma ndi mi ngulupi azini mi otu mi trezu azini zazu diza, aleluya, Opi ma ovu inzizaru, eri osuti irile irile egbizaru engazu ‘buari.

“Mi le ‘yo ma dri kini ma buku okuru ma e’yo onzi dria be, e’yo mani e’dezu ‘diyi pie dria…”
Mungu ‘ba eri yi miri Ima E’yo-avizaniri ma alia, azini mi ovu lu truzaru a’dule ku, te mi ꞌbazaru ‘bazaru alaru…Diza! “‘Bazaru alaru.”

Ani ‘da ma efi ngoni? Eri ma efi kini mi ‘yeni nga e’yo nde Mungu ma milea ku.
Mi pa tu kililiru Mungu ma drilea. DIZA! Yesu, E’yo i, ‘du mi ma pari ni. Eri eca mi ru, ani mi, ‘ba ezapi ondiruri, ni ecozu ecazu Eri i, E’YO I. Ama E’yo i.

E’yo ‘di fe ama eca Eri ma Ori werea ‘bani o’bale drioru e’dozu e’doria riki. Ama E’yo emupi E’yo ma dria, E’yo ma dria, E’yo ma dria, E’yo ma driari ki, azini ama emuria sita Kristoni treri ma alia, Erini ani emuzu ama ‘duzu ovuzu Ima Amuroru beni.

A’di afani pari ‘du SAWA ‘DISI ni?

Eri Ruecita Amuro Kristonirini ruetrapi tualu wudrikurusi ara engazu wudrikurusi ara ri’i.

E’yo ‘di mu kari ‘di ma alea ndulu. New Yorkia, sawa ‘disi eri di sawa towi minati kaliiri-drini-towi. Uru Philadelphia azini ara ‘daa dria, ‘ba alatararu ‘daki rizu ‘daa eriria, sa’wa ‘disi, kanisa pi ma ma alea ndulu. Uru ‘dale, kpere ele kari Mexico vu ara, kari Canada niri vu ara azini dria ara, ndulu. Mailo turu iri, pari ci angu America ma kala uruleruri ma alia, ‘dia, adanisi, angu ‘ba pini ovuzuria, eriria sawa ‘disi. Elifu pale alifuki, eriria.

Ani ‘Da ma O’dukoti emi dri ri i, Kanisa, emi ovupi ecita azini ‘diki, ecita orindisi E’yo vusiri’i,

Eri ‘yo kini Eri ecita orindisi Kristo pi ni Ima Kanisa beri ‘i, dika Eri PARI ‘DURIA SAWA ‘DI MA ALIA. Rua ni ecaria E’yo ru azini E’yo ni ecaria rua ru. Ama e’dazaru, azinie ecezaru; e’yo Bibilia ni ‘yo eri ta nga pari ‘du o’du ‘di ma alia ri le, ani Eri i ‘yeria curu’do, o’du driasi ama alu alu ma alia.

Mungu ni mu aa Kanisa onyibe ni be. Eri ma Amuro adaru, a’itaru E’yoruri i. AMA OKU PEZARU ama Opi Yesu Kristoni ri i.

Sawa ‘di si, ‘ba ambo?

Ama esu e’yo eceza o’du asizu ‘diyi ma alia ra, O’dukoti Opi Munguniri ni Ima Amuro ni trazu tualu. Ba awini azi ayi azini ni ku ye. Eri azizaru ayi ‘di ma alia: Malakai 4, Luka 17:30, E’yo Ba Yohanani 14:12, Yoeli 2:38. Aziza ‘da ki ekile Yohana Baptista ni i ma ngulupi ece E’yo Siza ma aa ri le.

A’dini e’yo siza ‘diyi eji yi ma paria ni?

Eri ma malaika azirizu okporu, William Marion Branham i. Eri ri sawa driasi e’yo ‘ye otita ndesi. Eri ebi ‘ye sa’wa driasi otite ndesi. Eri eri ‘ye dika ama o’du ma alia, Ima Amuro onyiruri omveria amve azini traria o’du asizuri ma alia Ima nabi vusi.

Saa dizaru Amuroni ovuzu eri be ‘do ngo’i. Okuta alu alu ni eca uru azini uru tu azini aluzaru azini aluzaru tu. Sa’wa ‘dile ‘di ebi ovuni nga ku. Abaza dria aviki ‘bo.

Mi emu rueci ama be amani E’yo azizaru o’du amavileriniri eriria e’yo nzeria, azini luria ama dri ama a’diki azini a’duni i ‘ye o’du amani ma alia niri ma dria. Ru Ecita Ndreleku Amuro Kristoniri Nir’i 65-1125.

Adri. Joseph Branham i

E’yo Sizaki:
E’yo Ba Matayoni 24:24
E’yo Ba Lukani 17:30 / 23:27-31
E’yo Ba Yohanani 14:12
‘Yeta 2:38
Rumi 5:1 / 7:1-6
2 Timoteo 2:14
1 Yohana 2:15
E’doza 4:16-17 / 25-26
Danieli 5:12
Yoweli 2:28
Malaki 4