Mete ha anɔpa yi a merenya ngosra mu atenka bi a ɛte saa ɛberɛ a metie, ɛkenkan na mesua saa Nkransɛm yi a Ayeforɔ no bɛtie Kwasiada. Me nipadua no nyinaa anya ngosra. M’akoma de anigyeɛ redi ahurusie a ɛte saa sɛnea menim, YƐN NYINAA DE NGOSRA KORƆ YI ARA BƐBOABOA YƐN ANO ABOM AFIRI WIASE AFANAA. Yɛbɛwɔ anigyeɛ mu, reyi Awurade ayɛ, ne nyinaa wɔ ɛberɛ korɔ mu, ɛberɛ a Ɔkasa kyerɛ yɛn mu baako biara na Ɔda N’Asɛm adi.
Ngosra no bɛyɛ kɛseɛ ara ma nkekamu ɛne nteatea mu bɛsi, “halelujah, amen, kamfo Awurade Din no” wɔ ewiase afanaa nyinaa wɔ ɛberɛ korɔ mu, ɛberɛ a yɛde yɛn ayɛyie nom ɛne yɛn som rebɔ aprɔ wɔ Ɔsoro.
Ɛdeɛn na ɛbɛsie? Onyankopɔn rebɛkeka N’Ayeforɔ abɔ mu na Wakasa akyerɛ wɔn. Yɛbɛyɛ Ɛkoro Bafua, wɔ adwene baako ɛne nteaseɛ baako mu ɛberɛ a Ɔda no adi na Ɔyi Ne ho adi kyerɛ yɛn.
Beaeɛ kɛseɛ biara nni hɔ a wobɛtumi akɔ, Ɛnne kɛseɛ biara nni hɔ a wobɛtumi atie; ngosra kɛseɛ biara nni hɔ a ɛsõ kyɛn Onyankopɔn Nne a ɛrekasa kyerɛ wo tẽẽ wɔ tapes no so.
Onyankopɔn ahwɛ N’Asɛm so firi mfitiaseɛ no na wama baabi a Ne mma nyinaa bɛtumi akɔ na wɔatie sɛ Ɔrekasa na Ɔkyerɛkyerɛ Ɔno ara Asɛm ase. Beaeɛ bi a ɛyɛ me sɛ, mewɔ anidasoɔ, mepɛ sɛ mehunu biara nni hɔ; Ɛyɛ Onyankopɔn beaeɛ a Ɔde ama sɛ tie SƐ AWURADE SEƐ NIE.
Sɛ wɔda no adi kyerɛ wo a, ɛte sɛ kanea kɛseɛ bi a wɔasɔ wɔ w’akoma ne wo kra mu…woteɛm sɛ, “ɛno nie. Mehunu. Me ne ONII NO A ƆNE ASƐM NO WƆ HƆ NO. ME NE ASƐM NO. ME NE AYEFORƆ NO. MADURU.”
Ɛrekɔ so, na wɔnnim. Hwɛ, ɛno ara ne no. Moahu? Yiw, owura. “Na baabi a Ɛnam-mono wɔ no, ɛhɔ na akɔdeɛ no bɛboaboa wɔn ano,” ampaniampaa ɛte sɛ wiase no. Moahu? Ɛno ne deɛ Ɛkaeɛ. Ɛdeɛn ne nam-mono no? Asɛm no. Ɔno ne Asɛm no, Ɛnam-mono no, Kristo! “Kristo a Ɔwɔ wo mu,” te saa ɛnora, ɛnnɛ ɛne daapem. Nokorɛ paa a Ɛyɛ!
Ɛberɛ a yɛboa yɛn ano sɛ yɛbɛtie Asɛm no, yɛn dadwene nyinaa, yɛn adwennwene nyinaa, yɛn haw nyinaa yera kɛkɛ. Yɛn ani gye ɛberɛ a yɛhunu sɛ yɛnni biribiara a ɛsɛ sɛ yɛha yɛn ho wɔ ho; yɛyɛ N’Ayeforɔ. Ɛnyɛ sɛ Ɔka yɛn ho nko ara, MMOM ƆWƆ YƐN MU. YƐN NA YƐYƐ ABA ASƐM AYEFORƆ NO. Biribiara yɛ deɛ ɛwiɛ pɛyɛ. Ne berɛ nhyehyɛeɛ wie pɛyɛ. Yɛwie pɛyɛ.
Yɛbo atɔ yɛn yam paa na yɛn ani asɔ paa sɛ yɛbɛka sɛ yɛyɛ N’Asɛm baabunu a wɔawo no a wɔada no adie; Yesu Kristo te saa ɛnora, ɛnnɛ ɛne daapem, Ɔwɔ yɛn mu ɛna Ɔte yɛn mu. Haleluia!
Yɛntumi ngo yɛn mudie mu wɔ ASƐM BAAKO HO. Ɛsɛ sɛ yɛtie Onyankopɔn Nne a ɛwɔ tapes so no.
Anyabiaa wohunuu ɔkɔdeɛ bi a wago ne mmudie mu pɛn? Dabi, owura. Mmudie ngogoeɛ biara nni ne mu. Saa ara na Kristoni kann nso ɛnyɛ saa. Ɔnyɛ mmerɛ. Ɔbɛkɔ ahayɔ kɔsi sɛ ɔbɛnya No. Amen. Yiw, owura. Ɔbɛnya ne Nam. Ɔpɛ Manna a ɛyɛ foforɔ. Ɔbɛsiane aba fam hɔ na wahwehwɛ kɔsi sɛ ɔbɛnya No. Ɔbɛtu akɔ ɔsoro na wakɔ soro. Sɛ biribibiara nni bonhwa wei mu a, ɔbɛma ne ho so akɔ soro kakra. Dodoɔ a wokɔ soro no, dodoɔ no ara na wotumi hunu. Enti ɛberɛ aso sɛ akɔdeɛ a wɔwɔ hɔ ɛnnɛ no ɛtu kɔ soro, hwehwɛ Onyankopɔn bɔhyɛ nom mu, ɛnsɛ sɛ monam mpɛtɛ aduane a wɔkumm no mfie bi a atwam so tena ase; firi mu fi.
Siesie wo ho Ayeforɔ, yɛbɛdi saa Manna foforɔ no, ɛberɛ a yɛretena ngosra kɛseɛ paa ɛwɔ hɔ no ase, Kwasiada yi wɔ prɛmtoberɛ ɛwɔ Jeffersonville berɛ mu ɛberɛ a yɛtie Aba No Ɛne Ɛhono No Renni Adeɛ Mmɔ Mu 65-0218.
Yɛto nsa frɛ Ayeforɔ no firi ewiase afanaa sɛ wɔmmɛka yɛn ho mma yɛnto nsa nnidi wɔ Onyankopɔn Kwan a ɛwie pɛyɛ a Ɔde ama ɛnnɛ no so. Beaeɛ baako pɛ a AYEFORƆ no bɛtumi agye Asɛm biara so amen. Faako a Honhom Kronkron ngosra a ɛkorɔn no kasa na Ɛma N’Ayeforɔ no wie pɛyɛ ɛnam Pressing Play so na woretie na woregye N’Asɛm.
Animuonyam ne akwanya paa a ɛyɛ sɛ yɛbɛka sɛ, “Yɛyɛ Onyankopɔn nwammaa, a Ɔsomaa Ne bɔfoɔ somafoɔ a ɔtɔ so nson sɛ ɔmfrɛ na ɔmma no aduane a ɛyɛ Ne Manna a ahinta na wakora no.”
Yɛbo atɔ yɛn yam na yɛgye di sɛ saa Nkransɛm yi yɛ Onyankopɔn Nne a wɔasoma sɛ ɛnkɔma N’Ayeforɔ no nwie pɛyɛ. Yɛgye di sɛ ɛhono no rehwane firi ayuo no ho, na seesei N’Ayeforɔ no da Ɔba no Animpa, a ƆREPRESSE PLAY ama no abere.
Na ɛno ne deɛ ɛnti a yɛwɔ ha, damfo, tena Ɔba no Animpa kɔsi sɛ yɛn nnipa kuo ketewa a wɔwɔ ha no, kɔsi sɛ ɛbɛbere paa ama Kristo, abɛyɛ paanoo wɔ Ne pono so. Ɛno ne deɛ mepɛ sɛ ɛyɛ.
Obiara a ɔnnye nni sɛ PRESSING PLAY ɛne sɛ ɔretie Onyankopɔn Nne a wɔasi no pi no yɛ Ɛnne a ɛho hia paa sɛ wotie no, yɛ obi a ɔredwane afiri Awurade animpa.
Ɛsɛ sɛ wonya akokoɔduru gyetom, anaa sɛ woyɛ ho biribi. Wowɔ asodie bi, obiara wɔ, na ɛsɛ sɛ wode akokoɔduru gye saa nneɛma yi tom.
Nokorɛ ɛne hia a ɛhia paa saa anumnsɛm yi ɛyɛ ma ɛnnɛ da yi. Mpaapaemu pii wɔ wɔn a Onyankopɔn afrɛ wɔn no mu. Anyabia ɛho abɛhia pii sɛ wɔbɛbɔ tapes wɔ asɔredan mu atie Onyankopɔn Nne, anaasɛ afei ɛho abɛhia pii sɛ ɔsom adwuma no bɛka Asɛm no?
Onyankopɔn afrɛ na ɔde ɔsom adwuma no asi ha sɛ wɔmfa Asɛm no nsi nkorɔfoɔ no anim. Wɔyɛ Nwanhwɛfoɔ. Asɛm no kyerɛkyerɛ wei. Ɛsɛ sɛ yɛde obuo ma wɔn na yɛdi wɔn ni sɛ nnipa a Onyankopɔn afrɛ wɔn na ɔde wɔn asi hɔ.
Yɛntumi, na ɛnsɛ sɛ yɛka da sɛ wɔnyɛ Ayeforɔ no. Ɛno yɛ MFOMSOƆ na ɛnyɛ sɛdeɛ odiyifoɔ no kyerɛkyerɛɛ yɛn ne no. Mate sɛ nkorɔfoɔ ka sɛ: “Sɛ wɔremmɔ tapes no wɔ wɔn nsɔre mu a, wɔtia Asɛm no.” Ɛnsɛ sɛ woka biribi a ɛte saa da. Ɛno kyerɛ me sɛ wowɔ honhom a ɛnyɛ papa.
Mate sɛ afoforɔnom aka sɛ, “Ɛsɛ sɛ wɔn nyinaa ne BT tie bɔ mu anyɛ saa a wɔn afiri Onyankopɔn pɛ mu”. Ɛnsɛ sɛ woka biribi a ɛte saa da. Onyankopɔn nkutoo na Ɔnim deɛ ɔyɛ ɛne deɛ ɔnyɛ Ayeforɔ. Ɛno nyɛ Ayeforɔ no honhom sɛ ɔbɛka biribi a ɛte saa.
Nkorɔfoɔ a wɔ ne BT retie bɔ mu no bi mpo reka sɛ, “sɛ wokɔ asɔre kɔtie tapes no na woanmmɔ wɔ wo fie a woayɛ mfomsoɔ!” Ɛno nyɛ nokorɛ nuammarima ne nnuamaa. Sɛ worekeka saa a, GYAE, woayɛ mfomsoɔ. Ɛsɛ sɛ obiara yɛ sɛnea WƆTE NKA SƐ AWURADE DI WƆN ANIM SƐ WƆNYƐ.
Asomfoɔ pii te nka sɛ asɛnka ne Onyankopɔn kwan a Ɔde ama ɛnnɛ. Yɛhunu nneɛma soronko kɛkɛ, ɛyɛ. Mpɛn dodoɔ sɛn na Onuabarima Branham yɛɛ ntotoho korɔ yi ara? Ɛnkyɛree koraa na yɛtee no wɔ Nsɛmmisa Ne Mmuaeɛ, ɛberɛ a na nkorɔfoɔ rekasa fa Onuabarima Jackson ho sɛ wayɛ mfomsoɔ no, ɔkasa tiaa wɔn sɛ wɔreka biribiara atia ɔne n’asafo.
Menam krataa yi so reka Asɛm no afa deɛ megye di sɛ ɛyɛ Onyankopɔn kwan a Ɔde ama Branham Tabernacle no. Wɔyɛ yɛn nuammarima ne mmaa. Wɔdɔ Awurade ɛne saa Nkransɛm yi. Ɛno ne sɛnea wɔte nka sɛ Awurade redi wɔn anim. Monyi Awurade ayɛ.
Wɔhunu no ɔkwan baako so ɛna yɛhunu no ɔkwan foforɔ so, ɛyɛ. Menhunu no wɔ wɔn kwan so na wɔnhunu me deɛ. M’afam no, akwan pii na ɛwɔ hɔ a Onyankopɔn de ama, nanso ƆKWAN BAAKO PƐ NA ƐWIE PƐYƐ, NA M’AFAM NO ƐNO NE PRESSING PLAY.
Mebɔ mpaeɛ obi mfa m’ano nsi bɔne wɔ ɛha. Nsa a wɔde gu nnipa so ɛne mpaebɔ yɛ sɛdeɛ Asɛm no seɛ ɔha mu nkyekyɛmu ɔha. Ngo a wɔde sra ɛne mpaeɛ a wɔbɔ ma ayarefoɔ yɛ Onyankopɔn Asɛm sɛdeɛ Twerɛnsɛm no kyerɛ no. Onuabɛɛma Branham kaa Asɛm no na ɔkyerɛkyerɛɛ yɛn sɛ ne mmienu yɛ Asɛm no. Nanso mepɛ ONYANKOPƆN KWAN A ƐWIE PƐYƐ A ƆDE AMA….GYE DI KƐKƐ ƐFIRI SƐ ONYANKOPƆN KAA SAA. Ɛno ne deɛ merebɔ mmɔden sɛ mɛyɛ.
Nanso afei ɛfa, ayaresa ho no, ɛyɛ Onyankopɔn mmɔborɔhunu ara kwa sɛ Ɔno, “Ɛnam Ne mmaa ntampeɛ so na wɔsaa wo yareɛ.” Afei, ɛdikan no Asɛm no ka saa, ɛsɛ sɛ ɛno dɔɔso, nanso sɛ wonnye ɛno nni wɔ Asɛm no mu a, ɛneɛ akyɛdeɛnom wɔ Asafo no mu, te sɛ mmarima a wɔwɔ nkanyan sɛ wɔnim sɛnea wɔkyerɛkyerɛ saa, ɛno bɛma ani ada hɔ pefee ama wo, ɛno, ɛne, gyedie sɛ wobɛgye adie.
Megye ɔsom adwuma num no di. Megye Onyankopɔn nnipa a Wafrɛ wɔn sɛ wɔnka na wɔnkyerɛkyerɛ Asɛm no di. Nanso, megye di sɛ woretie Onyankopɔn Nne a ɛwɔ tapes no so no yɛ Onyankopɔn KWAN A ƐWIE PƐYƐ MA ME.
Meretie tapes no, ɛnni sɛ mete aseɛ mpo, SƐ MƐGYE ASƐM BIARA A METE ADI KƐKƐ. Onipa biara nni hɔ, ɔsomfoɔ biara nni hɔ, baabi foforɔ biara nni hɔ a mɛtumi akɔ a mɛgye ASƐM BIARA adi na mede me Daa nkwa akwantuo awieɛ no bɛto so, gye sɛ tapes no so.
Ɛbi nsii da ɛfiri mmerɛ ahyɛaseɛ, a Onyankopɔn ama Ne nkorɔfoɔ akwanya ne tumi sɛ wɔn ankasa bɛtie Ne Nne sɛ Ɛkasa ano gu aso mu. Wɔada ahintasɛm biara adi wɔ tapes no mu. Wɔayi asɛmbisa biara ano wɔ tapes no so. Biribiara a Ayeforɔ no hia a ɛbama no awie pɛyɛ no wɔ tapes no so.
Asɛm biara a wɔaka wɔ tapes no so no yɛ Onyankopɔn Asɛm. Ebia mente aseɛ anaasɛ mentumi nkyerɛkyerɛ biribiara mu, nanso ɛnni sɛ meyɛ. Ɔhwehwɛ sɛ mɛka AMEN AMA ASƐM BIARA kɛkɛ, na TAPES no ɛne beaeɛ NKUTOO a mɛtumi ayɛ saa.
Nanso ɛberɛ a—ɛberɛ a ɛsɛ sɛ woyɛ biribi soronko, ɛberɛ a ɛsɛ sɛ wogyina ma wo gyedie a wonim sɛ ɛyɛ Nokorɛ no, ɛhɔ na ɔfã a ɛyɛ den no wɔ, ɛno na amaneɛ no ba no, ɛhɔ ara.
Mede deɛ ɛwɔ me mu nyinaa gye di sɛ, yɛwɔ Onyankopɔn Pɛ a ɛwie pɛyɛ mu na yɛwɔ suhyɛn a ɛrekɔ Niniwe. M’ani bɛgye ho sɛ wiase bɛka yɛn ho wɔ yɛn suhyɛn no mu Kwasiada yi prɛmtoberɛ wɔ Jeffersonville berɛ mu, ɛberɛ a yɛtie sɛ Onyankopɔn kasa kyerɛ Ne Nwammaa.
Onuabarima Joseph Branham.
Nkransɛm: a ɔkaa no Ogyefoɔ da du-nson wɔ afe apem ahankoron aduosia num mu (65-0217) “Onipa A Ɔredwane Afiri Awurade Animpa.”
Twerɛnsɛm a wobɛkeken:
Yona 1:1-3 Malaki 4 Ɔhoteni Yohane 14:12 Luka 17:30
Beaeɛ BAAKO pɛ na ɛwɔ hɔ a wɔasi no pi a wobɛtumi akɔtie sɛ Awurade nam Ne bɔfoɔ so na Ɔka kyerɛ wo, “Ɛberɛ biara monkae, moyɛ Onyankopɔn mma, Adehyeɛ Abusua a mowɔ Adehye Mogya. Mogya papa biara nni wiase a ɛkyɛn mo deɛ. Moyɛ Me mma, a ato apete wɔ asase so, a mawo ama Kristo.
Yɛyɛ Onyankopɔn Adehyeɛ Abusua a Adehye Mogya retene wɔ yɛn ntini mu. Mmɔfra a ɛnam Onyankopɔn Nne a ɛnam Ne diyifoɔ hoɔdenfoɔ a ɔrekasa so awo wɔn ama Kristo. Ɛrentumi nyɛ papa nkyɛn saa me nnamfonom.
Onuabarima Branham, ɛho bɛhia sɛ Ayeforɔ no tu kɔtena Jeffersonville anaa Arizona na ama wɔn akɔ Ohwim no mu anaa?
“Mmienu bɛda mpa so; Mɛfa baako na magya baako; na mmienu wɔ afuo mu, na Mɛfa baako na magya baako.” Moahu? Enti ebia wɔn…Wɔ wiase nyinaa no, wɔremmoa wɔn ano wɔ baabi baako sɛ wɔbɛnya nneɛma korɔ. Mmom wɔn mu akuo nketewa bɛpete asase so nyinaa.
Enti honam fam no, yɛrentena baabi baako ɛberɛ koro mu. Nanso animuonyam nka Onyankopɔn, Na Ɔwɔ nhyehyɛeɛ kɛseɛ mpo sɛ Ɔbɛka N’Ayeforɔ no abom.
Yɛbɔ mpaeɛ ma nsɔrensɔre ɛne asafomma a wɔn aboaboa wɔn ano atwa ɛ—ɛ—ɛ akasamu nketewa no ho ahyia ɛfiri ɔman no mu, ɛkɔ ara kɔsi Atɔeɛ Mpoano, foro kɔ Arizona mmepɔ no so, ɛsiane ba Texas mpaperɛ so, kɔwura Apueeɛ Mpoano, wɔ ɔman no mu nyinaa, Awurade, baabi a wɔn aboa wɔn ano. Nnɔnhwere pii da wɔn ntam, yɛwɔ ɛberɛ mu, nanso, Awurade, yɛaboa yɛn ano abom anadwo yi sɛ ɛkoro bafua, agyidifoɔ, a wɔretwɛn Messiah no Mmaeɛ no.
Ɛnnɛ, ɛnyɛ sɛ Ɔreboaboa N’Ayeforɔ ano afiri ɔman yi mu nko ara, mmom Ɔreboaboa YƐN ano afiri ewiase asasetam nson no so. Ɛfiri Afrika kɔsi Antarctica. North America ne South America, Asia, Australia ɛne Europe. Ɔreboaboa ɛna Ɔreka N’Ayeforɔ no abom sɛ ƐKORO BAFUA ama wɔn atie Onyankopɔn Nne.
Ɔka kyerɛɛ yɛn sɛ yɛnkɔ asɔre; mpo baabi a wɔkyerɛkyerɛ Asɛm no fã, KƆSI sɛ yɛbɛtumi anya asɔre bi a wɔkyerɛkyerɛ ASƐM MUA NO NYINAA. Ayɛyie nka Onyankopɔn afei Ayeforɔ no ahunu saa beaeɛ no, Onyankopɔn Nne a ɛwɔ Tape so no ɛne ASƐM MUA NO NYINAA.
Sɛ́ wowɔ wo Fie Tape asɔre mu, w’asɔre a mmusua pii ahyia wɔ ɛmu, anaasɛ apata bi ase wɔ kwaeɛ biretuo mu wɔ Amazon anaa Africa, baabibiara a wobɛtumi Apresse Play atie Onyankopɔn Nne sɛ Ɛkasa ano gu aso mu kyerɛ wo, wo bɛwɔ ASƐM MUA ASƆRE mu.
Yɛahunu saa Asɛm mua asɔre no na yɛto nsa frɛ mo sɛ mommɛka yɛn ho Kwasiada yi prɛmtoberɛ wɔ Jeffersonville berɛ mu ɛberɛ a yɛtie Nsɛmmisa Ne Mmuaeɛ #4 64-0830E
Ɛbɛyɛ dɛn na obi atumi de onipa anumsɛm kɛkɛ akyerɛ ɔdɔ ne anigyeɛ a ɛwɔ yɛn akoma mu sɛ yɛnim N’Asɛm mu nokorɛ Adiyie wɔ yɛn da yi mu? Sɛ yɛbɛdwene sɛ, na yɛnni hwee yɛ wɔ ho, nanso ƆNO, Okokroko ME YƐ, ɛnam Ɔno ankasa Ne yie so, hyɛɛ YƐN too hɔ sɛ yɛbɛnya adekɛseɛ paa a na Ɔbɛtumi de ama yɛn, N’ASƐM MU ADIYIE A ƐWƆ HƆ MA YƐN DA YI MU.
Ɔtwɛnee, kɔsii sɛ na ɛberɛ awie du no aba, sɛ Ɔbɛhome nkwa home agu yɛn mu, sɛdeɛ ɛbɛyɛ a yɛbɛte sɛ Ɔkasa kyerɛ yɛn na Ɔka sɛ:
Afei, mabɔ me ho mmɔden biara sɛ—sɛ—sɛ mɛka akyerɛ mo nkorɔfoɔ yi na madi mo anim te sɛ deɛ agya bi bɛdi ne mma anim. Moyɛ me mma; Menam saa Asɛmpa a meka ho asɛm yi so awo mo ama Kristo. Moahu? Na me—me—Mepɛ sɛ moyɛ mmɔfra anaa—nkɔdaa a woatete mo ama moanyini koraa. Na mepɛ sɛ mede mo kyerɛ Kristo saa da no, sɛnea Paulo kaeɛ no, “Ɔbaabunu a efi nni ne ho.” Biribiara nni saa Asɛm no mu gye sɛ deɛ w’akoma bɛgye “amen” wɔ so.
Onyankopɔn, a Ɔnam Ne bɔfo-hoɔdenfoɔ so rekasa, rema yɛn Kristo Ayeforɔ no akwankyerɛ na Ɔredi yɛn anim. Yɛyɛ Ne mmaabunu mmɔfra a efi nni yɛn ho a yɛanyini koraa. Na ɛnam N’adom nwanwasoɔ no so no, yɛde AMEN gye Asɛm biara a yɛteɛ so! Ɛyɛ Asɛm no nkyerɛaseɛ a ɛwie pɛyɛ a Ɔsoro da ɛmu nokorɛ adi!
Sɛ Ɛnne a yɛretie wɔ tapes no so yɛ: Asɛm no mu nkyerɛaseɛ a ɛwie pɛyɛ a, ɛdeɛn bio na Yesu Ayeforɔ no hia?…HWEE!
Wayi yɛn, Ne kuo ketewa a Ɔde Ne nsa ayie, sɛ yɛbɛnya N’Asɛm mu nokorɛ Adiyie ɛwɔ yɛn da yi mu. Yɛn ne wɔn a Ɔyii sɛ yɛbɛwɔ asase so, wɔ nnipadua honam so, wɔ Millennium mfie apem ahennie no mu.
Me nnamfonom, momma yɛnyina ɛno so simma baako kɛkɛ.
Yɛbɛnya nipadua a wɔahyɛ no animuonyam wɔ asase so ha yi ara. Yɛbɛdidi, anonom, asisi adan, atena ase te sɛ deɛ yɛyɛ seesei ara yi wɔ mfie apem. Ɛbɛyɛ yɛn ayefohyia akyi ahomegyeɛ berɛ a Ayeforɔ no (YƐN) ne Ayefokunu no (Awurade Yesu Kristo) abɛyɛ BAAKO.
Yɛrehwɛ na yɛretwɛn saa animuonyam berɛ yi simma biara da biara. Ɛbɛn paa ɛte sɛ deɛ ɛkame ayɛ sɛ yɛbɛtumi de yɛn nsa aka. Mede m’akoma nyinaa gye di, wei ɛne deɛ ɛrekɔ so wɔ yɛn so ɛnnɛ:
Oh, saa honhom mu nkabom a ɛfa Kristo ne N’Asafo ho seesei, ɛberɛ a honam no reyɛ Asɛm, na Asɛm no reyɛ honam, a ɛda adi, ɛsi no pi. Sɛdeɛ Bible no kaa sɛ ɛbɛsi wɔ ɛnnɛ da yi mu no ara pɛ, ɛrekɔ so, da biara da. Adɛn, ɛreboaboa ano ntɛmntɛm wɔ adihɔ, wɔ saa ɛserɛ nom no so, ɛna nneɛma a na ɛrekɔ so, a mantumi amfa m’ani anni akyire mpo. Yɛabɛn Yesu Mmaeɛ no, sɛ yɛne N’Asafo no bɛka abom, baabi a Asɛm no bɛyɛ Asɛm no.
Nkransɛm biara a yɛtie no, Adiyie bebiree na Ɔde rema yɛn. Ɛreboaboa ano ntɛmntɛm a yɛntumi mfa yɛn ani nni Akyire. Yɛrehunu sɛ Asɛm no reyɛ Asɛm sɛnea ɛbi nsii da. Akyinnyegyeɛ baako ho sunsum nni hɔ; Ɛnam Adiyie so, yɛnim nnipa ko a yɛyɛ pɛpɛɛpɛ.
Ɔreka N’Ayeforɔ no abom sɛdeɛ Ɔkaa sɛ Ɔbɛyɛ no ara pɛ, na yɛyɛ Ɛno fã bi. Yɛde yɛn ankasa ani rehunu sɛ Ɛrekɔ so. Ebia afoforɔnom renhunu Ɛno anaasɛ wɔrente Ɛno ase. Ɛnyɛ wɔn dea, ƐYƐ YƐN DEA, NE MMA A WƆAWO WƆN NO.
Ná Ayeforɔ no wɔ nsɛmmisa a wɔbɛbisa odiyifoɔ no.
Ɛno ara yɛ sɛ wobɛtie Onyankopɔn Nne NKUTOO wɔ tapes no so? Onyankopɔn maa mmuaeɛ na Ɔkaa sɛ: YIW!!
Anyabiaa yɛn mma nso nsa bɛtumi aka deɛ wɔhia nyinaa ama wɔayɛ Kristo Ayeforɔ no ɛnam sɛ wɔretie tapes no kɛkɛ: YIW!!
Ene sɛ, deɛ Ayeforɔ no hia nyinaa WƆ TAPES NO SO.
Yɛnim nso sɛ Onyankopɔn de akwan foforɔ pii ama Ne mma.
“Ɛnam Ne mmaa-ntampeɛ so na wɔsaa wo yareɛ”. Afei, deɛ ɛdikan no Asɛm no ka saa, ɛsɛ sɛ ɛno ara ɛyɛ, nanso sɛ wonnye nni wɔ Asɛm no mu a, ɛneɛ akyɛdeɛ nom wɔ Asɔre no mu, te sɛ mmarima a wɔnam nkanyan so nim sɛdeɛ wɔkyerɛkyerɛ ɛno, ɛno bɛma ayɛ pefee ama wo, ɛno ne gyidie sɛ wobɛgye adie.
Yɛn ani asɔ sɛ Onyankopɔn ayi mmarima a wɔnam nkanyan so nim sɛdeɛ wɔkyerɛkyerɛ ayaresa ɛne N’Asɛm ɛma no yɛ pefee ma afoforɔnom, nanso N’Ayeforɔ no pɛ NE KWAN A ƐNO ARA WIE PƐYƐ A ƆDE AMA. Ɛno ne DEƐ YƐHIA nyinaa.
M’ani bɛgye ho sɛ mɛto nsa afrɛ wo sɛ bra bɛka Branham Tabernacle ho Kwasiada yi prɛmtoberɛ wɔ Jeffersonville berɛ mu, ɛberɛ a yɛtie Nsɛmmisa Ne Mmuaeɛ #3 64-0830M
Sɛnea ɛyɛ nwanwa sɛ yɛbɛnya N’Asɛm no mu Adiyie na yɛahunu sɛ yɛn ɛne Asɛm no a ayɛ honam no.
Baabi a Ɛnammono no wɔ no, ɛhɔ na wɔbɛboaboa Ayeforɔ no ano. Na yɛn afam no, baabi a ɛwie pɛyɛ baako pɛ a ɛwɔ hɔ a yɛbɛtumi anya saa Manna nnamono no: ɛne sɛ yɛre Pressing play na yɛretie Onyankopɔn Nne a ɛwɔ tapes so no.
Kasa fa Manna FOFORƆ ho, yɛbɛtumi afiri aseɛ mpo adwennwene deɛ yɛwɔ wɔ yɛn nsatea ano no ho pɛɛ? Onyankopɔn Nne ankasa a Ɛrekasa akyerɛ N’Ayefo-dɔdoɔ wɔ tape so, baabi a adwene bubuo biara nnie, mfeefeemu pɛ biara nnim, asɛmmisa biara nnim saa ara nso na adwene mu naayɛ biara nnim deɛ yɛretie yɛ Onyankopɔn, a Ɔde onipa nne, reka Sɛ Awurade Seɛ nie kyerɛ N’Ayeforɔ.
Ɛnam Adiyie so, yɛgyedi sɛ Ɛyɛ beaeɛ NKUTOO a yɛbɛtumi akɔ ama yɛn kra nom anya ahomegyeɛ sɛ Nsɛm no a yɛretie no ɛnyɛ onipa asɛm, saa ara nso na ɔmfaa ne nkyerɛaseɛ anaa n’adwenkyerɛ nkaa Ɛho, mmom ɛyɛ Onyankopɔn Asɛm korɔgyenn no a Ɛrekasa kyerɛ yɛn akɔdeɛ mma, Ɛreda N’Asɛm adi.
Yɛbɔ fekuo ɛwɔ Asɛm no ho. Yɛkenkan N’Asɛm wɔ yɛn Bible nom mu. Yɛtie mpo sɛ mmarima a Onyankopɔn ahyɛ wɔn ɛne mmarima a wɔafrɛ wɔn a Ne Honhom Kronkron ahyɛ wɔn ma, wɔreyi N’anum Asɛm ka na wɔreka Onyankopɔn Asɛm, nanso yɛn da yi mu no, Onyankopɔn ama beaeɛ bi a yɛbɛtumi atie N’ASƐM A WAKA A ƐWIE PƐYƐ, ɛnam pressing play.
Agya mpo ma N’Ayeforɔ akwanya ma no bisa nsɛm no a na ɛda yɛn akoma so sɛnea ɛbɛyɛ a yɛbɛnya mmuaeɛ a ɛwie pɛyɛ:
Anyabia Satan bɛtumi de kasahoroɔ anaa nkɔmhyɛ akyɛdeɛ a ɛwɔ obi mu adi dwuma anaa?
Ɛdeɛn na na Yesu kyerɛ wɔ Mateo 12, nkyekyɛmu 32?
Anidie mu kyerɛkyerɛ Korintofoɔ nwoma a ɛdikan 13:8-12.
Anyabiaa wɔma ho kwan ma mmaa yɛ aban adwuma wɔ ɛberɛ a wɔwɔ okunu ne mmɔfra a wɔwɔ apomdene?
Ɛyɛ mfomsoɔ sɛ ɔbaa bɛkontonokonoto ne tiri nwi?
Onyankopɔn ama akwan pii a Ɔfa so hyira na Ɔde hyɛ N’Ayeforɔ den, nanso baabi baako pɛ na Ɔde ama a N’Ayeforɔ bɛtumi anya ɔha mu nkyekyɛmu ɔha awerɛhyɛmu sɛ deɛ wɔretie no yɛ N’ASƐM A ƐWIE PƐYƐ. Asutire baako Nkwa Nsuo beaeɛ a Akɔdeɛ mma bɛtumi anom afiri baabi a ɛnyɛ adeɛ a efĩ biara bɛtumi aba mu no. PRESS PLAY.
Meto nsa frɛ mo sɛ mommra mmɛnom mfiri saa Asutire no mu Kwasiada yi prɛmtoberɛ ɛwɔ Jeffersonville berɛ mu, baabi a yɛbɛtie
“Nsɛmmisa Ɛne Mmuaeɛ #2.” Nkransɛm a ɔkaa no Ɔsanaa da a ɛtɔ so aduonu mmiɛnsa anwummerɛ wɔ afe apem ahankoron aduosia nan mu
Nkyea nkɔma Yesu Kristo Ayeforɔ a wɔwɔ wiase afannaa nyinaa, a wɔgye di sɛ Branham Tabernacle, Onyankopɔn Nne, na ɛyɛ wɔn fie asɔre baabi a wɔde Manna a ahinta a wɔakora na wɔde agu hɔ no rema Kristo Ayeforɔ no honhom aduane die no.
Wei ne me fie adwosuo; wei ne me headquarters; ɛha ne baabi a yɛ hyɛɛ aseɛ. Afei, fa ɛno to wo tiri mu ɛmfa ho deɛ ɛbɛsie biara. Afei, sɛ woyɛ ɔba nyansafoɔ a, wobɛkyere biribi. Ɛmfa ho deɛ ɛbɛsie biara, ɛha ne yɛn headquarters, ɛha yi ara aaa!
Ɛberɛ nyinaa agyedifoɔ bebree anya nteaseɛ a ɛyɛ mfomsoɔ anaa sɛ wɔde wɔn ankasa adwenkyerɛ anaa wɔn nkyerɛaseɛ ato deɛ ɔdiyifoɔ no kaa wɔ ha no so, nanso ɔreka akyerɛ ayeforɔ no tẽẽ, “Sɛ woyɛ ɔba nyansafoɔ a, wobɛkyere biribi, ɛha ne yɛn headquarters, ɛha yi ara!”
Ɛdeɛn na na ɔde ɛno kyerɛ?
Ɛberɛ a na Onuabarima Branham wɔ ha no, dodoɔ no ante no ase na wɔdwenee sɛ ɛsɛ sɛ Ayeforɔ no kɔ Arizona na wɔkɔdi n’akyi wɔ hɔ, ama wɔn aka Ohwim no ho. Onuabarima Branham maa wɔn mmuaeɛ a na ɛmu da hɔ pefee: MONTENA HA, BEAEƐ NO NIE.
Wɔn mu ekuo kɛseɛ no de wɔn ani kyerɛɛ saa kwan no so, na wɔpɛɛ sɛ wɔbɛkɔ wei na wɔayɛ saa, ɛwɔ ɛberɛ a meka kyerɛɛ wɔn sɛ wɔn ntena hɔ akyi. Montena hɔ, montena ɛha yi ara; beaeɛ no nie.
Nkorɔfoɔ maa wɔn ho so firii United States baabibiara sɛ wɔ kɔ Arizona, nanso ɔkaa no pefee kyerɛɛ wɔn: Montena ɛha yi ara, beaeɛ no nie!
Montena Jeffersonville? Ɛno ne deɛ ɔkaeɛ!
M’adiyie ne sɛ, na ɛyɛ Onyankopɔn, a ɔnam Ne diyifoɔ so rekasa na Ɔreka akyerɛ nkorɔfoɔ no, “MO NE TAPES NO NTENA.” Ɛno ne BEAEƐ NO!
Ɛhaa no paa ɛna ɔkaa sɛ na ɛsɛ sɛ ɔne saa nkorɔfoɔ no nyinaa yɛ biribi. Ɛdeɛn na ɛsɛ sɛ ɔyɛ? Asɔre bɛn mu na na ɔde wɔn bɛkɔ? Ɛhe na ɛsɛ sɛ wɔ kɔ? Ɛdeɛn na Onuabarima Branham kaa sɛ ɛsɛ sɛ ɔyɛ?
Enti seesei, ɛsɛ sɛ mede mmɔfra no san ba ha ma wɔnya biribi die. Wɔ wɔ ɛserɛ no so aseɛ hɔ a ɔkɔm de wɔn.
Wanka sɛ ɛho bɛhia sɛ wɔbɛkɔ asɔre bi a ɛwɔ mpɔtam hɔ na wɔn akɔtie nsɛm kumaa bi a ɛsomboɔ a wɔbɛtumi adidi wɔ ho. Ɔkaa sɛ ɛsɛ sɛ ɔde wɔn SAN BA HA ma wɔnya biribi di, anyɛ saa a ƆKƆM BƐKUM wɔn.
NNAMFONOM, M’ADIYIE.
Afei, ɛnyɛ sɛ prɛko bio yɛrente n’aseɛ yie, anaa sɛ yɛbɛka biribi a wanka, ɛnam sɛ yɛreka sɛ, “Onuabarima Branham pɛɛ sɛ ɔgyedini biara tu kɔ Jeffersonville na ama no ayɛ Ayeforɔ no.” Na Onuabarima Branham nim sɛ saa nkorɔfoɔ no nyinaa, ɛne ɔgyedini BIARA a wɔwɔ ewiase afanaa nyinaa, ntumi ntu nkɔtena Jeffersonville. Ɛno bɛyɛ deɛ ɛrentumi nyɛ yie. Enti na ɔpɛ sɛ ɔkyerɛ sɛn? Na ƆREKA Kristo Ayeforɔ a wɔwɔ ewiase afanaa nyinaa no ABƆ MU wɔ TAPES a wɔatwe agu ahoma so no na wɔde asie sɛ ɛbɛyɛ aduane ama Ayeforɔ no.
Saa Nkransɛm yi, Saa Ɛnne yi, yɛ Onyankopɔn Asɛm a Waka ama ɛnnɛ na Ɛno bɛka Yesu Kristo Ayeforɔ no abom na ama no awie pɛyɛ.
Nam-mono ɛne deɛ akɔdeɛ die. Afei, wɔbu ɔkɔdeɛ wɔ Bible mu sɛ, odiyifoɔ. Odiyifoɔ yɛ ɔkɔdeɛ. Onyankopɔn—Onyankopɔn frɛ Ne Ho sɛ Ɔkɔdeɛ, ɛneɛ na yɛyɛ “akɔdeɛ nkumaa”, ɛɛ– agyedifoɔ no. Moahu? Na ɛdeɛn ne nam-mono no a ɔɔmo die no? Ɛno ne Asɛm no. Baabiara a Asɛm no wɔ no, ɛsu ankasa a ɛwɔ anomaa no mu no bɛyi ne ho akyerɛ.
Ɛhefa na Asɛm korɔgyenn, a wɔasi no pi, a mfomsoɔ nni ne nteaseɛ mu, a ɛyɛ Sɛ Awurade Seɛ nie ma ɛnnɛ no wɔ? Ɛwɔ baabi baako pɛ, Tapes No.
Mɛtumi akɔ so akɔ so, quote by quote, nanso saa Nkransɛm yi ɛne deɛ Onuabarima Branham kaaeɛ no gye Adiyie firi Onyankopɔn hɔ. Ɛsɛ sɛ yɛnam adiyie so kenkan nkyerɛaseɛ a asuma no, mmom ka deɛ ɔkaeɛ no. Ɛfiri sɛ Ɛno ne ASƐM KORƆGYENN no.
Asɛmbisa ne Mmuaeɛ a ɛwɔ hɔ ma ɛnnɛ ɛne deɛ MEGYE DIE.
Ɛnnɛ, asomfoɔ bebiree reka akyerɛ nkorɔfoɔ no sɛ ɛnam sɛ yɛwɔ Efie Tape Asɔre nti no yɛafiri Asɛm no mu ɛne deɛ Onuabarima Branham kaa sɛ yɛnyɛ no. Ɛyɛ wɔn sɛ ɛsɛ sɛ yɛkɔ baabi wɔfrɛ na wɔbu no sɛ asɔre no.
Ampa quotes bebiree wɔ hɔ a Onuabarima Branham ka wei pefee.
Afei, wo deɛ kɔ Full Gospel asɔre papa bi mu na nya efie asɔre.
Na mede m’akoma nyinaa gye di, ɛfiri sɛ ɔkaa saa. Nanso megye di yɛreyɛ saa ɛnam sɛ YƐREYƐ EFIE TAPE ASƆRE. Yɛn beaeɛ no ɛnyɛ deɛ ɛho hia ma Awurade. Ɛno yɛ ɛdan bi kɛkɛ. Mmom yɛn asɛdeɛ ma Awurade ne sɛ yɛne N’Asɛm bɛtena, ƐNYƐ BEAEƐ ANAA ƐDAN BI. Beaeɛ no ɛmma nkwa na ɛmma AYEFORƆ no nwie pɛyɛ, ASƐM NO YƐ SAA.
Sɛ mekɔ asɔre dan bi mu, nanso wɔn werɛ afiri ADEƐ TITIRI NO A: sɛ mɛte Onyankopɔn Ɛnne ɛnam Pressing Play so, ɛna deɛ wɔde asi ɛno ananmu ne sɛ woretie asomfoɔ a wɔreka Nkransɛm no ho asɛm NKUTOO, anyabiaa ɛno bɛma wo kra no adidi na ama wo amee paa? Ebia ɛbɛmee wo kra, me nuabarima ne me nuabaa, nanso ɛremmee Ayeforɔ no.
Ma memfa wei nhyɛ mu wɔ ha na menka sɛ nnipa mpempem pii na wɔwɔ hɔ a wɔnni asɔre dan a wɔbɛkɔ mu. Wɔn ayera anaa? Sɛ wɔnni ɔsɔfoɔ anaa asɔre a, ɛno kyerɛ sɛ wɔntumi nyɛ Ayeforɔ no anaa? Sɛ ɛfiri baabi a woteɛ no kɔ asɔredan bi mu yɛ borɔfo-kwansini ɔha a, ɛsɛ sɛ wokɔ saa asɔre no? Nanso sɛ mete akyirikyiri a, ɛnsɛ sɛ mekɔ? Ɛsɛ sɛ metie ɔsɛnkafoɔ wɔ ahoma so, nanso mentumi ntie tapes no? Ɛdankora no na odiyifoɔ no reka sɛ ɛyɛ adeɛ a ɛho hia paa a ɛsɛ sɛ yɛkɔ anaa?
Ɛhefa na na odiyifo no pɛ sɛ ɔde Ayeforɔ no ba?
Sɛ wontumi mma Tabernacle ha a, nya asɔre bi wɔ baabi; Kɔ ɛhɔnom.
Prɛko bio, ɛhefa ne baabi ɔdikan yii sɛ ɔde nkorɔfoɔ no bɛkɔ no? Ɛkɔ Branham Tabernacle, Asɛm no, tapes no. Ɛno ne deɛ Onyankopɔn de ama N’Ayeforɔ sɛ ɔnyɛ wɔ saa awieɛ-berɛ yi mu, na yɛreyɛ no da-biara ƐNE Kwasiada biara.
Sɛnea ɛbɛyɛ na obi ɛnte me aseɛ yie no. MERENKA SƐ ɛsɛ sɛ wo ne Branham Tabernacle tie tapes no na ama wo ayɛ Ayeforɔ no. MERENKA sɛ ɛnsɛ sɛ wo kɔ asɔre. MERENKA sɛ wontumi ntie asomfoɔ. Sɛ wogye ɛno di a woamane afiri Asɛm no ho. Mereka sɛ woretie Onyankopɔn Enne a ɛwɔ tapes no so no ɛne Ɛnne a ɛho hia paa a ƐSƐ SƐ WO TIE, na megye di sɛ ɛsɛ sɛ ɔsɔfoɔ biara bɔ saa Ɛnne no, tapes no, wɔ wɔn nsɔredan mu. Nanso wɔama anoyie biara a ɛwɔ hɔ SƐ WƆREMMƆ TAPES NO. Sɛ ɛno ne w’asɔre a, ɛnnyɛ Asɛm no na ɛrema wo aduane die.
Ɛda adi pefee sɛ wei ne deɛ na ɔmpɛ sɛ ɛbɛsie ɛne deɛ na nkorɔfoɔ no reyɛ.
Na kɔ asɔre; ntena fie, nkɔ mpataayie, ɛne ahayɔ, ɛne nneɛma a ɛtete saa Kwasiada.
Ɛnyɛ saa na yɛyɛ. Yɛreboa yɛn ano hyia wɔ adeɛ baako pɛ a ɛbɛka Ayeforɔ no abom no ho, Saa Nkransɛm yi, Saa Ɛnne yi.
Prɛko bio, megye asɔrekɔ di. Nsɔre pii na ɛwɔ wiase a wɔde tapes no redikan wɔ wɔn asɛnkannua so, ayɛyie nka Awurade. Anyabiaa megye di sɛ ɛsɛ wo tena fie anyɛ saa a wonyɛ Ayeforɔ? DAABI DAABI, DAABI….menwenee ho da, ɛnye nii da. Mepɛ sɛ wo PRESS PLAY kɛkɛ ɛmfa ho baabi a wowɔ anaa asɔre ko a wokɔ.
Sɛ wo nni deɛ ɔreka no ho Adiyie a, ɛneɛ wobɛtumi aka no pefee sɛ, “Ɛho nhia sɛ mɛtie Ɔnuabarima Branham anaa sɛ mpo ɛsɛ sɛ me ne no yɛ ADWENE wɔ deɛ ɔka no nyinaa ho. Ɔkaa saa mpo, nnipa afoforɔ pii wɔ hɔ a Onyankopɔn-afrɛ wɔn”
Kɔ so. Yɛhyɛ no nso wɔ ha, ka sɛ, “Ɛsɛ sɛ yɛkɔ asɔre foforɔ a ɛne wo nyɛ adwene no mu?” Aane, me nnyɛ…ɛnyɛ me nko ara na me yɛ mpoano aboba, wo nim. Ɛwɔ hɔ—Onyankopɔn nkorɔfoɔ afoforɔ wɔ baabiara kɛkɛ; Mewɔ anidasoɔ sɛ meyɛ wɔn mu baako.
Onyankopɔn Nne a ɛwɔ tapes no so no na ɛyɛ M’ABOBA, ME BOTAN. Ɛyɛ Ɛnne no na mepɛ sɛ metie ɛne Ɛnne a mepɛ sɛ Branham Tabernacle tie.
Sɛ wopɛ sɛ woka yɛn ho a, yɛma wo akwaaba mmorosoɔ me nuanom mmarima ne mmaa. Ka yɛn ho Kwasiada prɛmtoberɛ wɔ Jeffersonville berɛ mu, ɛbere a yɛtie Onyankopɔn Nne sɛ ɛkasa na ɛyi nsɛmmisa pii a ebia wowɔ wɔ w’akoma mu ano. Na wo ankasa tie sɛ nneɛma a maka wɔ krataa yi mu no amane afiri Asɛm no ho na mayɛ nteaseɛ mu mfomsoɔ wɔ deɛ Onyankopɔn reka akyerɛ N’Ayeforɔ no a.
Deɛ ɔka wɔ tapes no so no yɛ Sɛ Awurade Seɛ nie. Ɛnyɛ deɛ meka sɛ ɔreka, anaa deɛ megye di sɛ ɔreka, na Onyankopɔn NKUTOO na Ɔbɛtumi ama wo nokorɛ Adiyie no.
Dɔfoɔ Kristo Ayeforɔ, Momma yɛnhyiam Kwasiada prɛmtoberɛ wɔ Jeffersonville berɛ mu a yɛtie Nkransɛm a ɔkaa no Ɔsanaa da a ɛtɔ so du nsia wɔ afe apem ahankoron aduosia nan mu- Ɔreda N’Asɛm Mu Nokorɛ Adi.
Medɔ wo paa ara. Woyɛ Me honam mu honam, ɛne Me dompe mu dompe. Mpo ansa na mebɔɔ nsoromma no, bosome no, M’adeɛ biara a ɛwɔ hɔ nyinaa no, Mehunuu wo ɛna Medɔɔ wo saaberɛ no. Na Menim sɛ woyɛ me fã bi, M’akoma mu dɔfoɔ baako a ɛbi nka ho. Na Wo ne Me yɛ BAFUA.
Ɛda no a M’ani agyina na matwɛn ɛfiri ɛberɛ a Mehunuu wo saa ɛberɛ no aba n’awieɛ. Afei Menam Me Nne so refrɛ wo ɛna mereka wo abom afiri apueɛ ne atɔeɛ, atifi ne anafoɔ. Wo ne Me nsusueɛ nom, M’Asɛm, M’Ayeforɔ, a wada ne ho adie.
M’ani agyina sɛ Mɛka biribiara a ɛwɔ M’akoma mu akyerɛ wo, enti Menam M’adifoɔ so twerɛeɛ ɛna Mede Ɛno ato hɔ abɔ Ɛho ban ama wo wɔ mfie mpempem. Dodoɔ na akenkan Ɛno, ɛna wɔn agye Ɛno adi wɔ mfie ɔha pii mu, nanso mede nneɛma pii ahinta kɔsii sɛ MO BƐDURUEƐ. MO nko ara ne NNIPA a Mɛka akyerɛ MO.
Na wɔn ani agyina sɛ wɔbɛhunu na wɔate saa anwanwadeɛ nom a Mede ahinta no, nanso sɛnea Mehyɛɛ wo bɔ no, Matwɛn na mede ahinta de bɛsi saaberɛ yi, ama WO, M’ADEƐ BAAKO A ƐBI NKA HO.
Mehyɛɛ wo bɔ sɛ Mɛba na Mabɛda Me ho adi prɛko bio wɔ onipa honam mu, sɛnea ɛbɛyɛ a Mɛtumi aka akyerɛ wo, na Mada saa nneɛma yi nyinaa adi akyerɛ wo. Na mepɛ sɛ wote ME NNE sɛ ɛkasa kyerɛ wo tẽẽ.
Mede Me Honhom Kronkron asra afoforɔ pii sɛ wɔbɛka Me dɔ ho asɛm akyerɛ mo, nanso sɛnea mayɛ no ɛberɛ nyinaa no, na Mentumi nsesa da no, meyii ɔbarima baako: Me bɔfoɔ, Me diyifoɔ, sɛ ɔnyɛ Me Nne sɛnea ɛbɛyɛ a Mɛtumi aka Sɛ Awurade Seɛ nie akyerɛ mo.
Na Mepɛ sɛ Meka kyerɛ wo sɛ ɛnyɛ ɛda pɔtee bi na wɔgyee wo nkwa. Ɛberɛ nyinaa na wɔagye wo nkwa. Mebaeɛ bɛgyee wo sii hɔ bio kɛkɛ. Wɔgyee wo firii mfitiaaseɛ no ɛfiri sɛ ɛde firi aseɛ no na wo wɔ Daa Nkwa. Ɛne sɛ, M’ani so no, Mentumi nhunu wo bɔne nyinaa mpo, adeɛ nkutoo a Me teɛ ne wo nne. Mehunu w’ananmusie kɛkɛ.
Sɛnea M’ani agyina sɛ Mɛka nneɛma pii akyerɛ wo no. Anigyeɛ rebu fa M’akoma so. Sɛnea M’ani agyina ama yɛn Ayefohyia Anwummerɛ Apontoɔ no, yɛbom wɔ yɛn mfirinhyia Apem Millennium no. Sɛ Mɛdɔ mu sukɔ aka akyerɛ wo deɛ ɛfa Yɛn Daakye Fie a yɛbɛtena abom no ho, sɛdeɛ Masiesie biribiara ama wo, a biribiara ayɛ krado ama wo pɛpɛɛpɛ.
M’akoma mu tɔfe, sɛ wodwene sɛ ɛyɛ nwanwa saa ɛberɛ yi sɛ woretie sɛ Me Nne ɛkasa kyerɛ wo a, wo deɛ twɛn, wei yɛ sɛdeɛ ɛbɛyɛ no, ne sunsum kɛkɛ sɛ yɛtena bom wɔ saa Kuro no mu a. Wo diyifoɔ no dan mpo bɛtoa wo deɛ so; ɔbɛyɛ wo fipam ni.
Yɛbɛtu mpasa afa saa sika kɔkɔɔ mmɔntene no so na yɛabom anom afiri asutire no mu. Yɛbɛnante akɔ Onyankopɔn paradise nom no mu ɛne Abɔfoɔ a wɔresesɛn wiem wɔ asase so, reto ahokeka nnwom no….Ɛda bi paa a ɛbɛyɛ!
Menim sɛ ɔkwan no ayɛ te sɛ monkyimɔnka, na ɛtɔ mmerɛ bi a ɛyɛ den ma wo, nanso ɛbɛyɛ ketewa bi, ketekete bi, ɛberɛ a Yɛne yɛn ho yɛn ho wɔ hɔ no.
Seesei deɛ, prɛko bio merebɛsan aboaboa mo ano na Makasa akyerɛ mo Kwasiada wei prɛmtoberɛ wɔ Jeffersonville berɛ mu, na Maka biribiara a ɛfa “Ɔsoro Ayefokunu No Ɛne Asase So Ayeforɔ No Daakye Fie” ho asɛm akyerɛ mo. Ɛneɛ Merepɛ ntɛm ne mo aka abom saaberɛ no.
Buronya paa bi ɛne Afe Afoforɔ nom a yɛanya. Yɛagye atom na yɛabue Onyankopɔn akyɛdeɛ nom a Ɔde akɔma N’Ayeforɔ no so. Y’ɛAkyɛdeɛ a ɛdi kan ne Buronya akyɛdeɛ kɛseɛ paa a wɔde ahyɛ boa mu pɛn. Onyankopɔn no Ankasa kyekyeree Ne Ho hyɛɛ onipa honam mu ɛna Ɔde saa boa-mu-adeɛ no kɔmaa ewiase. Na ɛyɛ N’Akyɛdeɛ kɛseɛ a ɛdikan sɛ Ɔbɛsan de N’Ayeforɔ abɛsi hɔ.
Afei Onyankopɔn de boa mu adeɛ kɛseɛ foforɔ kɔmaa N’Ayeforɔ. Ɔdɔɔ yɛn pii ara ma Ɔba bɛdaa Ne Ho adi wɔ honam mu prɛko-bio sɛnea ɛbɛyɛ a Ɔbɛtumi akasa afiri ano agu asom akyerɛ yɛn. Ná Ɔpɛ sɛ Ɔno Ankasa ne N’Ayeforɔ no yɛ Bafua.
Ɛna afei, nnamfonom, monnye m’ano nsi bɔne. Ma me mfa anidie mapa a ɛwɔ m’akoma mu nka wei, a menim sɛ deɛ ɛteɛ biara no meyɛ onipa a mewɔ Daa nkwa na mɛgyina Atemmuo anim ɛda bi: Nnipa mpempem pii na wɔrehwere wɔn akyɛdeɛ. Moahu? Wɔntumi nte aseɛ. Na wɔhwɛ, na wɔaaka sɛ, “Oh, ɔyɛ onipa ara kɛkɛ.” ɛno yɛ nokorɛ. Anyabiaa na ɛyɛ Onyankopɔn anaa Mose na ɔgyee nkorɔfoɔ no? Na ɛyɛ Onyankopɔn a ɔwɔ Mose mu. Moahu? Wɔsuuiɛ pɛɛ ɔgyefoɔ no. Na ɛberɛ a Onyankopɔn somaa ɔgyefoɔ no kɔmaa wɔn no, wɔhweree sɛ wɔbɛhunu, ɛfiri sɛ na ɛnam onipa so, nanso na ɛnyɛ onipa no, na ɛyɛ Onyankopɔn a Ɔwɔ onipa no mu.
Ɛnnɛ, prɛko bio, nnipa mpempem pii na wɔrehwere wɔn akyɛdeɛ ɛna wɔreka sɛ, “Ɛnsɛ sɛ wotie tapes no, seesei yɛwɔ mmarimma afoforɔ a wɔasra wɔn ngo”, a ɛyɛ nokorɛ, nanso wɔnhunu sɛ ɛno NKUTOO ne Ɛnne a Onyankopɔn asi no pi, a ɛreka Sɛ Awurade Seɛ nie ɛnam saa ɔbarima no so. Saa Ɛnne no yɛ Onyankopɔn Urim ɛne Thummim, deɛ ɛyɛ Ne Osiwieɛ a ɛwɔ hɔ ma ɛnnɛ.
Sɛ yɛretie Ne Nne wɔ tapes no so a na ampa ara yɛrenom afiri Onyankopɔn Asutire Asubura mu, a ɛnhia sɛ yɛbɛ pɔmpe, atwetweatwetwe biara nnim, nkekabom biara nnim, hwammɔdie biara nnim; yɛregye di kɛkɛ na yɛregye yɛn ahome wɔ Asɛm biara a Wɔaka so.
Ɛnam sɛ yɛretie saa Ɛnne no a ɛwɔ tapes no so no, sɛnea Yesu Ankasa kyerɛ no, yɛwɔ nokorɛ adansegyeɛ a ɛfa Honhom Kronkron no ho ɛwɔ yɛn da yi mu.
Enti ɛhɔ na Honhom Koronkron no adanseɛ turodoo no wɔ! Ɔnkaa biribiara a ɛyɛ mfomsoɔ nkyerɛɛ me da. Sɛ, “Ɛno ne Honhom Kronkron no adansegyeɛ, ɛne onii a ɔtumi gye Asɛm no di.” Wobɛtumi agye No.
Onyankopɔn ama yɛn Asutire a yɛbɛtumi anom afiri mu simma biara wɔ ɛda biara. Ɛberɛ nyinaa ɛyɛ foforɔ. Ɛnyɛ biribi a ɛtaa faako bi, Ɛyɛ N’Asutire a ɛnsa da, ɛno ara boa ne ho; wo deɛ ɛwɔ sɛ Press Play kɛkɛ.
Sɛ worekasa afa AKYƐDEƐ a ɛfiri Onyankopɔn hɔ a, wobɛtumi de w’adwene abubu ampaniampaa sɛnea saa Akyɛdeɛ yi ɛsi yɛ KƐSEƐ? Ɛnam sɛ wo Presse Play kɛkɛ na woretie Ne Nne ɛwɔ tapes so, ɛno nkutoo ne… ƐNNE KORO PƐ a ɛwɔ wiase a wonhia sɔneeɛ, ahuhuamoa anaa biribiara. Deɛ ɛwɔ sɛ wo yɛ ara ne sɛ tie kɛkɛ, gye di, na gye Asɛm biara so Amen.
Onyankopɔn Ankasa de saa kwan yi ama, NE KWAN BAAKO PƐ, sɛ wobɛnya daa nkwa, na mpo deɛ ɛhia dodoɔ paa, SƐ WOBƐYƐ N’AYEFORƆ. Yɛbɛtumi ada Ne kokom kɛkɛ na yɛama yɛn ahoɔden aduane afiri sɛ yɛretie afiri N’Asutire, Ne Nne, El Shaddai a Ɔrekasa akyerɛ N’Ayeforɔ.
Ma afe wei ɛnyɛ afe a Ɔbɛfa yɛn no, N’Ayeforɔ dɔfoɔ no. Yɛnam animhwɛ kɛseɛ so rehwɛ na yɛretwɛn. Ɛnkyɛ koraa yɛbɛhunu wɔn a yɛafe sɛ yɛbɛhunu wɔn no sɛ wɔayi wɔn ho apue. Yɛbɛhunu, wɔ ɛberɛtia bi mu, ani bɛbɔ ateɛ no, na yɛnni ɛhanom, wɔafrɛ yɛn akɔ yɛn anwumerɛ Ayeforɔ Apontoɔ no.
Awurade, sɛnea a yɛhunu sɛ wɔatrɛ saa didi-pono kɛseɛ no mu wɔ hɔ ama saa anwummerɛ aduane no, a ne tenten yɛ borɔfo-kwansini mpempem pii, redi yɛn ho-yɛn-ho anim-hwehwɛ ɛtwam wɔ didi-pono no ho, asraafoɔ dadaa a wɔwɔ akotwa, anigyeɛ mu nnisuo retene ɛsiane fa yɛn anim…Ɔhene no firi adi wɔ N’ahoɔfɛ mu, kronkron-yɛ mu, tu mpasa fa didi-pono no ho na Ɔde Ɔno Ankasa nsa pepa nnisuo no firi yɛn anim, reka sɛ, “Monnsu bio, ne nyinaa kɔ awieɛ. Monwura Awurade anigyeɛ nom no mu”. Ɔbrɛ nom a ɛwɔ kwan no so no renyɛ hwee ɛmma yɛn saa berɛ no, Agya, sɛ yɛduru ɛkwan no awieɛ no a.
Bra bɛka yɛn ho na nom, na nom, na nom firi Onyankopɔn Asutire a Ɔde ama ɛnnɛ no Kwasisda wei prɛmtoberɛ wɔ Jeffersonville berɛ mu. Ɛhɔ ne beaeɛ KORO PƐ a wobɛtumi adwodwo wo ho koraa na woaka AMEN ama Asɛm biara a woteɛ. Ɛno ne N’Asutire Asubura a Ɔde ama N’Ayeforɔ sɛ ɔnom mfiri mu.
Onuabarima Joseph Branham.
Nkransɛm: Kitawonsa da a ɛtɔ so aduonu nsia anwummerɛ wɔ afe apem ahankoron aduosia nan mu “Mmura A Apaepae.”
Ɛnnɛ, asafo no werɛ afi wɔn diyifoɔ. Wɔnhia no bio sɛ ɔbɛka asɛm no wɔ wɔnbnsɔre mu. Wɔn na wɔseɛ sɛ wɔwɔ wɔn asɔfoɔ a wɔbɛka asɛm akyerɛ wɔn na wɔayi anumsɛm na wɔn akyerɛ Asɛm no ase. Asɛnka ho hia sene sɛ wɔretie Onyankopɔn Ɛnne wɔ tapes so wɔ wɔn nsɔre mu.
Nanso na Onyankopɔn nim sɛ ɛsɛ sɛ Ɔnya Ne diyifoɔ; ɛno ne sɛnea ɛberɛbiara Wafrɛ na Wadi N’Ayeforɔ anim. Ɔnam Ne Nkrantɛ nifanu no so atwitwa yɛn afiri amanaman a aka no mu, Ne Honhom Kronkron, Ne Nne a ɛnam Ne diyifoɔ so kasaeɛ.
Ɔnam saa Ɛnne no so anwene yɛn. Ɛno nti na Ɔmaa wɔtwe guu ahoma so no na wɔde too tape so no. Yɛnam Adiyie so hunu sɛnea Twerɛnsɛm no wie pɛyɛ! Ayeforɔ no ntumi mmere gye sɛ Ɔba no ma no bere.
Ɛmfa ho dodoɔ sɛnea wobɛka asɛm no, deɛ wobɛyɛ biara no, ɛntumi mmere, ɛntumi nna no adi, ɛntumi ɛnna ɛmu nokorɛ adi; gye sɛ Ɔno nkutoo a Ɔkaa sɛ, “Mene ewiase Hann no,” Asɛm no.
Asɛm no ka kyerɛɛ yɛn sɛ Honhom Kronkron no Ankasa bɛba na abɛma yɛn abere, ada ɛmu nokorɛ adi, ama nyinasoɔ na Wama Ne ho ada adi. Anwummerɛ berɛ Hann no aba. Onyankopɔn a Ɔreda Ne Ho adi wɔ honam mu ama Wafrɛ N’Ayeforɔ.
Ɔno ne Ɔnii no a Ɔde Ne Honhom Kronkron afrɛ WO, N’Asɛm, Ne Nne. Ɔno ne Ɔnii no a Ɔyii WO no. Ɔno ne Ɔnii no a Ɔkyerɛkyerɛ WO no. Ɔno ne Ɔnii no a Ɔɔdi W’anim no. Ɛnam deɛn so? Ne Honhom Kronkron, Ne Nne a ɛrekasa KYERƐ WO TẼẼ.
Nanso ɛnnɛ yi Ɛyɛ atete-kwaa dodoɔ ma wɔn. Wɔatwam sɛ wɔrebɔ tapes wɔ wɔn nsɔre mu. Wɔnhu Ɛno. Ɛno nti na wɔwɔ tebea a wɔwɔ mu no. Nanso wo deɛ, wɔada No adi sɛ ɛyɛ ɔkwan a Onyankopɔn de ama no, ƐYƐ SƐ AWURADE SEƐ NIE MA WO.
Enti ɛsɛ sɛ ɛ—ɛ—ɛ Tumi bi ba, Honhom Kronkron no Ankasa, ɛba bɛbere, anaasɛ ɛbɛsi no pi, anaasɛ ɛma nyinasoɔ, anaasɛ Ɔbɛma deɛ Waka atohɔ sɛ ɛbɛsie ɛda wei mu no ada adie. Anwummerɛ berɛ mu Hann no ɛyɛ saa. Ɛberɛ paa ni!
Yɛyɛ Onyankopɔn Asɛm Ayeforɔ a ɛwie pɛyɛ a Ne diyifoɔ no hunuu wɔ anisoadehunu no mu no. Yɛn ne wɔn a Ɔsomaa Ne diyifoɔ sɛ ɔmfa N’Asɛm so mfrɛ yɛn no, na seesei yɛrenya NKANNYAN, ɛfiri sɛ seesei yɛnim nnipa ko a yɛyɛ.
Kanyan, ɛhɔ, na asɛmfua korɔ no ara a wɔde dii dwuma wɔ baabi foforɔ biara no, meyɛɛ ɛho nhwehwɛmu kɛkɛ, ɛkyerɛ sɛ, “Nkanyan.” “Ɔbɛkanyan yɛn wɔ nnaanu akyi.” Ɛno bɛyɛ, “Da a ɛtɔ so mmiɛnsa no mu no Ɔbɛkanyan yɛn bio, ɛberɛ a Ɔbɔɔ yɛn peteeɛ, na Ɔfiraa y’ɛani, na Ɔtetee yɛn mu.”
Agya somaa Ne diyifoɔ no sɛ ɔnkɔhwɛ N’Ayeforɔ no sɛnea ɛbɛyɛ a na yɛrenfiri anamɔn santene no mu. Kae, na wei yɛ anisoadehunu!
Ayeforɔ no twaa mu wɔ beaeɛ korɔ no ara a na Ɔwɔ no ɛberɛ a na Ɔwɔ mfitiaaseɛ no. Nanso na merehwɛ No sɛ Ɔrefiri anamɔn santene no mu, na merebɔ mmɔden sɛ mɛtwe No akɔ N’akyi.
Nanso ɛbɛyɛ dɛn na “ɔno” atumi atwe no akɔ n’akyi ɛnnɛ? “Ɔno”, ɔbarima no, ɔnni asase so ha. ƐNAM ASƐM NO SO! Ɛdeɛn ne Asɛm NKUTOO a wɔasi no pi ma ɛnnɛ? Onyankopɔn Nne a ɛwɔ tapes so.
Wɔafrɛ asomfoɔ sɛ wɔmfa odiyifoɔ no anum asɛm a ɔkaaeɛ so pɛpɛɛpɛ na ɛnka Asɛm no. Sɛnea odiyifoɔ no ankasa kyerɛ no, ɛnsɛ sɛ wɔka hwee ka ho.
Nokorɛ nie, wɔafrɛ wɔn sɛ wɔn nkyerɛkyerɛ na ɔɔmo nka saa Asɛm no. Nanso ƐNNE BAAKO PƐ NA ONYANKOPƆN ANKASA ASI NO PI SƐ ƐYƐ SƐ AWURADE SEƐ NIE.
Enti saa ara na me ka, wɔ Yesu Kristo Din mu: Mfa adeɛ baako nka ho, mfa, mfa w’ankasa w’adwene nhyɛ Mu, wo deɛ ka deɛ wɔaka no wɔ saa tapes no so kɛkɛ, wo deɛ yɛ deɛ Awurade Nyankopɔn ahyɛ sɛ yɛ no pɛpɛɛpɛ; Mfa nka Ho!
Sɛ woka “amen” ma asɛm biara a wo sɔfoɔ anaa ɔsomfoɔ ɛka a, woayera. Mmom sɛ woka “AMEN” MA ASƐM BIARA A ONYANKOPƆN NAM NE DIYIFOƆ SO KAAEƐ ƐWƆ TAPES SO A, WO YƐ AYEFORƆ NO NA WO BƐNYA DAA NKWA.
Onyankopɔn diyifoɔ ne ɔbarima a Onyankopɔn yii no sɛ Ɔbɛfa ne so akasa. Na Ɛnam ONYANKOPƆN ƐYIE SO sɛ Ɔbɛfa ne so aka N’asɛm na Ɔde ato tapes so sɛnea ɛbɛyɛ a ƐBERƐBIARA AYEFORƆ NO BƐNYA SƐ AWURADE SEƐ NIE ATIE.
Ɔmpɛ sɛ N’Ayeforɔ no de Ne ho bɛto deɛ mmarima afoforɔ ɛka so, anaa wɔn nkyerɛaseɛ a ɛwɔ N’Asɛm ho. Ɔpɛ sɛ N’Ayeforɔ tie firi N’ano gu wɔn aso mu. Ɔmpɛ sɛ N’Ayeforɔ de Ne ho bɛto obi foforɔ so gye Ɔno ankasa.
Sɛ yɛsɔre anɔpa a, y’ɛani gye sɛ Ɔka akyerɛ yɛn sɛ, “Mema mo akye nnamfonom. Merebɛkasa akyerɛ mo ɛnnɛ na maka dodoɔ sɛnea medɔ mo ɛne sɛnea mo ne Me yɛ BAFUA akyerɛ mo. Mewɔ dodoɔ a mede daa nkwa bɛma wɔn, nanso MO nkutoo ne M’Ayeforɔ a Mede nsa ayiyie. Mo nkutoo na mede Adiyie no ama ansa na wiase fapem.
Afoforɔ pii ani gye ho sɛ wɔbɛtie me, nanso mayi wo sɛ bɛyɛ M’Ayeforɔ. Ɛfiri sɛ woahu me na wo ne M’Asɛm atena. Wongoo wo mmudie mu, wonyɛɛ ahohyehɛ basabasa, mmom wo ne M’Asɛm atena wɔ nokorɛdie mu.
Ɛberɛ aso. Ɛrenkyɛ koraa Mereba abɛfa mo. Ɛdikan no, mobɛhunu wɔn a wɔwɔ me nkyɛn saaberɛ yi no. Oh, sɛnea wɔn kɔn dɔ sɛ wɔbɛhunu mo na wɔne mo atena. Monha mo ho mmɔfra nkumaa, biribiara wɔ ɛberɛ mu pɛpɛɛpɛ, monkɔ so mpem nkɔ kɛkɛ.”
Sɛ́ Asɛmpa no mu ɔsomfoɔ no, mentumi nhunu adeɛ baako a aka, gye sɛ Ayeforɔ no nkorɔeɛ no.
Ɔnuabarima Joseph Branham.
Nkransɛm: Nkransɛm a ɔkaa no Kitawonsa da a ɛtɔ so aduonu nsia anɔpa wɔ afe apem ahankoron aduosia nan mu “Worehunu Wo Da Ɛne Ne Nkransɛm.” 64-0726m
Ɛberɛ: Prɛmtoberɛ wɔ Jeffersonville berɛ mu.
Twerɛnsɛm a wobɛkenkan ansa na woatie Nkransɛm no: Hosea: Ti 6 . Hesekiel: Ti 37 . Malaki: 3:1 / 4:5-6. II Timoteo: 3:1-9. Adiyisɛm: Ti 11 .
