All posts by admin5

23-0319 Amuro Azi Pezuri’i

Mesegi (O’dukoti): 65-0429e Amuro Azi Pezuri’i

BranhamTabernacle.org

‘Ba Efi Alu Engazu Milioni Alu Alia Leleturi,

Ma enga te sawa ezuru tu. Mi ma aluzaru leleturi, azini Ale mi ambamba.  Mani andra azi mini ri le, Ma enga mini Aku azi o’diru amani ngazu muzu oazu tualu ‘Dani ‘danisi dria ni ede.  Ma ede afa dria lu ko’bo mini lelerile ‘bo.

Sawa ‘disi ma ecodi mi nera ani nezu kini, mi e’data Ma ni mgbari i. Mi ovu Ma obi mgbari be, Ma za be, Ma fala be, Ma Orindi alu ri be, Ma afa dria alu ri be, lu ko’bo.  Mi eca di alu Ma be ‘bo.

Ma pe andra Ma malaika amboruri ma ti nyakua mi omvezu amve engazu Edeni Sitanini riasi. Ma pe andra eri ma ti ani eco ani Ma egataki ece, Ma arakala pie, azini e’yo luzu mini afa emupi nga emu emuri pi ma dria. Ma ayu andra eri ma ti azini eri ma o’dukoni yi ecezu ani. Erini yi ‘yozu ‘bori ma vutia, Ma fe andra ma ‘duki pari yiniri ra, a’disikuni ‘Bu ki nyaku be nga ali ra, te E’yo Mani miniri cani nga ede ku.

Ani andra ra mini Ma eriria e’yo nzeria, Ma malaika ma o’duko vusi, mi ta nira aliru asi mini aa, kini ‘da eri i ku, ‘da Ma’i e’yo nzepi mini ri i. Eri andra Ma i mini waraga aleni ri idripi ri i, luzu mi dri, A pe mi ‘bo ovuzu Ma Amuro leletu aluzaruri ru.

Mile mani pi alia, ‘ba azi mi leni yo. ‘Ba azi econi pari mini ri ‘du ku. Mi enga ovu a’daru azini a’itasi Ma vu. Ma ka mi ne ‘dini, Ma asini gu ayiko be.

Mani andra luria midri, mi ovu milesi leleturi la, afa mini eri ri si, ‘ba nga ovupi odu osuza be E’yo Maniri ayupiri ki nga ovu kakau, te yi enzoru ri ria. Mi va andra Ma bile ndu liza ra E’yo Ecezasi ani oadi adaru azini a’itasi O’duko Mani ri vu.

Ma andra afusi tu mini e’yo ziria asi driasi kanisa mini ti ecita ‘yezuri ma dria. Ma ‘yo andra mini peta ‘yekeri pezu, azini Ma fe andra midri eceta kanisa kililiruri vuri ngole yari ra.  Mi ega andra ra Mani ‘yoria yi ovuki dria orindi yini pie ri, ani mi pe andra di kanisa kililiruri i.

Ma ‘yo vini mini ra ovuzu milesi mi ocepi i a’di’i yari si. Ani mi eco di geri Ma asi ni mbuzu ayikosi Mani andra mi neria awiria ocepi andra mani ti pe mi egizu mavu ri be ria. Mi ni andra ra kini eri Ma Orindi Alatararuri i Ma nabi ma aa mi dri ecezu Mavu.

Ma ega odu andra mini ovuzu ayikosi tu, azini ayikobe tre, Mani andra Ma malaikani omvezu angu azi oruni ma aa ani Mani ecozu erini e’dazu mi e’da ngole yari beni risi. Aso di andra pa ‘daa mi neria mini pa ‘doria ama drilea ongo Asikari Kristayoniri Muria Drile ‘dasi ria.

Le andra geri emini emi suzu bongo emi kari emini engazu rikisi ria; ko’bo engazu Switizalandia, Girimania, azini engazu wudrikurusi ara. Emi alu alu andra dribi emi ezururi pie edezaru onyiru. Emi sikati ki andra pere ele onyiru. Ma andra afusi ambamba azini ayikosi emi e’dazu erini, ani eco ani drigo vule emi asini okpo fezu beni ani ‘yozu i ne emi ‘Daa ra ri.

Mile dria andra Ama dria. Ezuanzi azi were, laini ma aa vule ‘daleru kaki andra mu e’do angu one ra pari azi ‘diyipi alia ‘bo, eri tre andra ra, “Emi ‘yeki ‘da ku! Emi fuki pa’duza ndrondrori aliasi ku!”

Mani andra ‘yoria mini Ma mu nyaka tamba ero aa mini nyazaru ria, mi ni andra ko’bo ra Ma e’yo nze a’du ma dria yari. Mi le andra ovu Ma Amuro E’yoru Aliriaru ondikokori i. Ma awini mi bi agoyisiria ‘ba azi nduni be ku ye. Eri andra lu sawa dria Ma i, Ma E’yo i. ‘Da fe andra Mani ovuzu ayikosi tu.

Ma pe mi ‘bo, MI I, ovuzu Ma Amuro ru. Ma aliru ale alia mi be, ko’bo mini ovuzu ale alia Ma be rile. Mi ese avaako ku, mi ovu ava be, mi ovu ayikosi, mi zu ayiko, o’du Mani ngazu emuzu mini ri ni ecaria mbeleru. Sawa onyiru amani nga ovuzu eri be ‘da ngo’i.

Emi asi asipi ‘diyini, EMI OJA ASI, nyakuni ‘duria. Odu alu, Los Angeles ni nga ovu lazaru miri ma vutia, lu ko’bo mani andra lu emidri eri nga ovu rile. Ma andra ni ‘duria kpi engazu eri ma vutia. Ma cani nga cinya amboru yini edroni ‘da bi sawa ezuru di ku. Emi nga nzo miri alia mailo alu aliru, kpi Miri Salton niria vule ‘dale. Eri nag ovu onzitu aga o’du asizu Pompeiini ri ra.

Ma mu nyaku ‘di oji acisi mbeleru. Ma afa dria eri ma dria azini eri ma vutia ‘diyi o’di dria. Mi ne afa pari ‘dupi wudrikurisi ara ‘diyi ra, lu mani andra ‘yo emini ‘bo rile. Emi ne Amuro Maniri ni i traria E’yo mani ageyia ara ri ra, lu mani andra ‘yo emini ‘bo rile.

Sawa ni di sawa ‘disi. Ewu ni di sawa ‘disi. Emi otuki emi ngulupi!

Sawa Eri ma adra vuri eca nyaku ma dria ‘bo. Emi apaki esu sawa nga ci apazu, ani emi emu Kristo alia.

________________________________________________________________

Emi ovu aizaru emuzu ruecizu ama, esele Eri ma Amuroru be, amani ama ‘baria ngonde Eri ma Emutani, O’duko Munguniri erizu e’yo nzeria amani azini O’dukoti: Amuro Azi Pezuri 65-0429E Sabatu ‘disi sawa azia etusi, Jeffersonvili saa si risi (Sawa Alu ondresi Ugandaa).
    

Adri. Joseph Branham i

E’doza 24:12-14

Isaya 53:2

E’yo Eceza 21:9

23-0312 Aku Drozi IZio ‘Buari Pini Amuro Nyakuari Beri

BranhamTabernacle.org

Amuro Nyakua Leleturi,

Malaki 4 ni Mungu ma E’yoni, azini Eri ofu ima wura vusiri ‘bo, AMA’I, Eri ma Amuro i. Eri Orindi Alatararuri i, Oaza Yesu Kristoni, azi ngapiri i, sizaru asi amanipi alia. Ama ‘bazaru idriru E’YO DRIA Erini andra nzeri pivu, a’disikuni “Kabilo Maniki O’duko Mani eri; ani’bo ma vuti cakini nga bi ku.” amani Avizuri Ekpazu ria.

Mba asizu ‘diyi engaki ovu onyirutu ngole ya, nabi ma vuti biria engazu Jeffersonvilia.  Mungu enga e’yo ‘yoo Eri ma malaika amboruri vusi ani amani nyaka fezu Erima Nyaka engazu Eri ma EROJO WERERU ALU suru ma alia ndulu ri vusi risi. Eri Mana zizaruri i, lu Erima Amuro dri.

O’dukoti alu alu amani eririsi, ama tieci azini ayiko zu ama eselia; “Ani ra Ma eri O’dukoti ‘diki paale kakaub’o, te DRIO ma eri nga ki KU ko’bo sawa ‘disi ri le”. Eri a’daru yi a’di Yi Idrirurini e’bupi engazu ama ma aasi ni. Ama ecoki mgbaria ama ‘ba okunazaru ku. Eri afa dria amani lezu e’yo nzezu drinia ri i. Ama engaki ovu ndindiru ndeni idri amani pi alia, ama a’di-ki azini ama muria ngoa ya risi.

Osuta azi di dika yo:

“Ani lu ku. Ma ‘ye afa drifupikuni ki kakau ‘bo idri mani alia. Ma e’de Opi i paale kakau. Eri e’da ekile MA SADRIA e’yo eza ri le.”

Asi’baza dika ya:

“Ma adaru asi ‘ba kini ma mva Munguni ni. A LE ovuzu. Ma zi Ma ‘dale.”

O’du ‘da deki yi DRIA ‘BO. Sawa ‘disi ANIKI RA. Diza Munguvu!!

Aniki ngoni ru? Mungu ibi e’yo nze kpi amani Eri ma O’duko tepupi ma driarisi, luria amani dika azini dika, “Ma emi aa, emi Ma aa. Ama ALU. A pe andra EMI denga wudrikuru ma vuti ovuni ‘bazaru ku. Emi za Za manirini ri i, fala Fala manirini ri i.

O’dukoti onyiru Munguni andra nze amani Sabatusi luzu amani wudrikuru amani oazi aania ‘di ovuni amani ku, eri Sitani ma Edeni ri ‘da andra ngo i ya. Geri andra eri ni Eva ni olezu okokelesi lu E’YO ALU zizu zitasi azini abazu ‘da i. Eri tru andra Mungu ma A’buta Alatararururi te, ani su di a’buta onitaniri i, ani eri ma mile ki di andra nzizaru azini ni di andra ra kini i pililiru.

Sitani pi andra E’yo okori wiyoru, ani sawa ‘disi a’budi eri ma mile ci ani kiri eri pililiru te niniku. Eri eca’di Sitani ma opi okururi i azini nyaku di ni eri ma suru Edenini ri i.

Sabatusi, ama Izio ‘Buari le Eri ma Amuro nyakuari ega ama Aku Droziri ngoa azini Eri nga ovu ngole ya risi. “Aluzaru leleturi, sawa ‘disi mani di mini e’yo nzezu wudrikuru di ma dria dria’bo azini geri erini ovuzu Sitani ma Edeni ni ‘bo risi, Ma le lu emini PAALE ALU DIKA EMI Aku Drozi Ma be ri ma dria.

A le lu emini aliru tu. Anira emi eri ki ma Eri luria emi dri paale kakau ‘bo, te ite ngalu, saa ‘disi eri mu ovu kile emi eriki nga drio ma luria emi dri ku ri le.

A le fe eri be aliru tu. A le ece emi dri emi ma Ale kililiruri alia Oazu E’yo mani azini nabi mani be risi. A le emi dri eceta azi emi andrusi a’du ‘ye yari ma dria eceta kililiru Aku ambo o’diru emini nga oazu alenia ri ma dria.

Ama adaru feria afa azi alia. Ma nga mu emi ni afa azi wereruni e’be; Anira emi nga Eri vaa ra. Emi nga oa Aku ambo ‘da aa Mabe. Nabi Maniri ni nga ovu jo ejeleni mi be. Eri nga ovu mi jo ejeleni. Emi nga aci nzila meleru ‘da pi driasi azini mvu engazu Ma A’divu. Emi nga aci paradisi Munguniri aasi, Malaika pie ongaria azini ongo karini ngoria.

Emi nga oa nyoro Ma nabi ma oku ma driari ki. Emi nga di aga afa dria wudrikuru ma aari ra, o’du ‘dasi. Afa kakau Mani le ece emidri Sabatusi riki. O’du azi onyiruni ngo i ya amani nga muzu ovuzu atruni tualuri i”.

Eri ovu angiri ni pie ci ero aa amani wiki wereru emupi ‘diyi alia, Eri ka emu ani ama ‘duzu oko kuria. Wiki vutia wiki vutia, luria ama dri, ama a’diki yari, ama mu ngoa yari, Eri nga ovu ngole ya kala ‘Da ma dria.  Eri nga mu ama dri ce wiki Engatani onyiru ndeni amani drio ovuzu rari vu, efizaru afa azisiku pelu Eri inzizu azini ecuzu ri i.

Saa ndrinzaruni ngo i yani. Ama neria e’yo ondrizani pari ‘duria ama miletia. Ama nedria E’yoni ovuria e’dazaru AMA AA. Eri ma emuta eco ovu sawa ci ri aa ra. Ama di pa soria jotilea mawa be ama dria. Ama ecoki eri ra akanya pi ma pa pini yi gbaria azini cinyakini i liria gari pa pi ma rua.

Gari okururi ni nga ovu atrizaru mbele ru. Ama nga mbu amve jotile ruati okuru ‘divuri ma aasi ani ngazu Eri ma dria. Eri nga ama ne ani ‘yo, “dedi i dria ‘bo sawa ‘disi, anyu la, Ma di mi ji sawa ‘disi Aku ni Droziri ma aa.”

Mi ovu aizaru ovuzu esele o’du amborutu wudrikuru ni drio ne ra ri pi ru. Aji nyiri yi nga ru tra engazu wudrikurusi ara O’duko Munguniri erizu e’yo nzeria Eri ma Amuro dri ani e’yo luzu eri dri: Aku Drozi IZio ‘Buari Pini Amuro Nyakuari Beri 64-0820 ma dria, sawa azia etusi (12Pm), Jeffersonvili saa si saa si.

Adri. Joseph Branham i

E’yo egazaruri: Emi aviki e’yo Sawa Daylight Savingsniri ma dria ku.

E’yo siza lazaru O’dukoti nde ma drilia riki:

E’yo Ba Matayoni 19:28
E’yo Ba Yohanani 14: 1-3
Efeso 1:10
2 Petero 2:5-6 / Chapta 3 zuri
E’yo Eceza 2:7 / 6:14 / 21:1-14
‘Ba Levini 23:36
Isaya Chapta 4 zuri / 28:10 / 65:17-25
Malaki 3:6

23-0226 Agu Egataberi Ma Keike

BranhamTabernacle.org

Adripi Branham ma Ongulumu Leleturi,

A leta wudrikuruni ai ruecizu amabe afa e’i simusi ‘di ma aasi Sabatu ‘disi sawa azia etusi (12PM), Jeffersonvili saa si (Sawa Iri inisi Uganda), ama Aji pini rutraria tualu angu milo turu iri paale turu iri alu alunisi nabi ma kanisa aluni ma aa ri ma aariaa. Ama nga mu Munguni eri e’yo nzeria Ima ‘ba o’dukoti ojipiri malaikaru azirizuri visu ani luzu amani: 

O’dukoti ‘di’i, azini O’dukoti azi dria mani e’yo nzezu yi ma dria ‘bo riki, yi ki ongulumu maniri pini. Eri ongulumu mini rini ku pelu yi kaki le Eri ai ni ria ka. Te Eri ovu ‘yozaru ‘ba ‘dia ‘di pivuleru.

Eri e’yo ‘yoria amani, DIZA, eri ma ongulumu i. Ovuni emi ‘yopi kini, “Adripi Branhamni nabi i, te ovuni ma ocepi’i ku.  Ama ocepi ni ‘yo kini tepu ma avita kanisaari ovuni E’yo andruriniri ni lelerile kuri” pini ku. “Ama ocepi ‘yo amani le ama ma eriki i’i. E’yoni lelerile risiria, eri ama dri ceria sawa ‘disi Orindi Alatararuri vusi.”

Nabi ovu omvitabe mini azini mi ocepini ci.

Olu’ba cini ni pari ciri alia, saa ciri aa, ‘di ovuni ‘yozaru embata emini riki mazu fu ‘dini ku, ‘di ovuni vini ‘yozaru kabilo mini ri pini ku indi.

Alekini ku e’yo alezu emi adripika azini amvipika pie. Avaki ra, Eri ovuni ‘yozaru emini ku, te ama, a’ipi ra kini Orindi Alatararuri ‘ba Eri ma ‘ba o’dukoti ojipi malaika azirizuru ovuzu ama ocepiru azini ama, Eri ma kanisa ma dricezu ri pini.  Ama a’iki kini tepuki avizuri ni GERI LU ‘YEKE ri i.  Mi ‘yeke azini mi afa nabini andra ‘yo MI ma ‘yeri ‘ye:

Azini ma sawa dria eceta fe yisi, yi kaki ovu esele kanisa azinini riki yaani, “Mi ne mi ocepi i.”

Le mi ma ‘ye mi ocepini ‘yo mi ‘yeri le.

Ani dika nabi ‘yo di mi ocepi ni pale alu dika, lu fezu erini vazu muke muke.

Sawa ‘disi, ocepi, a le mi ma ni ‘da ra, kini, ‘di lu ongulumu maniri pini mani e’yo ‘diki nzezuri. Azini ma ovu drilembo be ci ‘da ‘yezu, a’disiku Ma ovu ‘bazaru Orindi Alatararuri vusi kabilo ‘di pima orule gazu.

Eri ma ti ovu epezaru ama, eri ma kabilo pima orule gazu; ‘ba Munguni ‘baa ERI MA TAMBAZA ma aa ‘diki. Orindi Alatararuri ni ama ocepi i Erini e’yo nzezu amani azini ama dricezu o’dudria Eri ma O’duko ovupi e’dazaru ra risi risi.

‘Di afa Opi ni amadri cezu ‘yezu ri i. Ama ovuni mi rua kaniku mi ocepi ma rua, kaniku geri mini ama Opi ni mi dri ce ‘yezu ‘daleri ma rua onzi ‘dini ni ku. ‘Ba alu alu ma ‘ye yini amazu eri driceza Opi ni yini ‘yezu ‘dale E’yoni lelerisi ri’i.

Ama ovuki afa afandrapi alu ni be, O’DUKOTI ‘DI’I. Le afa dria amani eri ri ma ali afa afadranpi ‘da ma alesi. O’duko amani eri tepu pima dria ri ni O’duko lu alu ci amani ovuzu asimbaza 100% ribe ovuzu ‘Di Opi ‘Yoni niri i.

Mi a’i ‘da ra kini odu osuza ‘ba ‘da pima dria ri ma efi kini eri odu osuza Orindi Alatararuri ni ri i ri ra? Ee, culu, Orindi Alatararu Munguni ada ri i ‘ba azi ma dria, te yi enzoru.

Ama asiza ‘dani ‘daniri su pa afa ERI NI ‘YO TEPU MA DRIA RI ma dria, ovuni afa agu azi kaniku ongulumu agupi pini cini ni ‘yori pi ma dria ku. Ani, acakini ku, azini caki vini nga ku azi ndu cini ni erizu.  ‘Ba azi eco di o’bi ‘da ‘yezu dere ni eri muke ya kani onzi yari ku ngoni ru?

Mi emu rutrazu amabe ndenini nezu ra kini o’du nde ni di ecaria risi.

‘Ba ecoki ri kpi engazu aku yini pi alia kaniku yi ma…trazaru pari yini pi alia, kanisa pi alia, azini afa azi ‘diyi pie, ani inzita nde erizu beni.

‘Da, ma agyipi la, nabi Munguni ri ni ‘yorisi ria, ovuni agu azi ma e’yo efi eceza Bibilia ni a’du ‘yo yari ma driari vu ri i ku, eri amani ama ngulupi trazu tualu E’yo ma ageyia ara ndeni ni amani nezu ra o’du nde ni di eca eca risi ri i.

Orodri sanduku vuri di a’duni Mungu kokoru? Eri lu sanduku mbawusi ri i, oni ‘bani afa azi sizu drinia ci ri pie.  

Mi emu rutrazu amabe amani Mungu ma afa fe afandrazuri eri ria, Erini amani O’dukoti: Agupi E’yo Egapirari Ma Afa Afandripi Ri I 65-0822E ni ejiria.

Adri. Joseph Branham i

Mi andri afa amani afu fuzu ani ri i. Mi andri ama ‘dia a’duni yari. Mi andri mi mu kanisa a’du e’yosi yari. A’duni fe mini…Eri muke muzu kanisaa, te mi ma mu lu kanisaa a’dule ku; ‘da cani mi pa ku.

23-0219 Kristoni Ovu Ecezaru Eri Ma Ngulupi ma E’yo Aa

Mesegi (O’dukoti): 65-0822M Kristoni Ovu Ecezaru Eri Ma Ngulupi ma E’yo Aa 65-0822M

BranhamTabernacle.org

Ma Kabilo Wereru ‘diyi,

Zita emini azini emi esupi simusi ‘di pini vini, ovupi onyiru onyirutu ‘di i. Ma awa’difosi tu Opi dri emini ecozu rizu lu kpi aku emini pi alia, ruokuzu angu emini pi alia, kanisa eminipi alia ani inzita ‘di erizu beni risi. Anguci ma o’dukoni emuzuri alia, ongulumu wereru ‘da ma ovuki tusu cozaru fo.

Andru, ale waraga wereru aleni ‘di si engazu asi mani alia emini asiembaza fezu. Emi ‘ba Munguni pe ovuzu Erima Amuroru denga wudrikuru ma vuti ovuni ‘bazaruku riki; emi tepu ‘diki eripi riki. Ma enga ‘yo emini’bo paale kakau, tepu ‘diki lu emini, emi ma ongulumu ki. Afa Munguni fe olu’ba azi ‘diyi pivu oceri ki ma opidria ku; afa ma opidria lu Nyaka obi mani fe eminiri ngoleri i yari. Tepu ‘diki emini, ma kanisani a’dule, afa Munguni fe mani ovuzu ocepiru riki. Eri mana zizaru ri i, azi ‘diyi cakini Eri ‘du ku.

Sawa ‘disi, ‘ba azi ka le nyaka omu afa azi amve ‘daleni pie ya ani, ma esuki e’yo eceza nde engazu Mungu vu ani ma ‘yeki afa Munguni ‘yo yini ma ‘ye riki, ma nyaki afa ci yini leri. Ma nga afa trotrori ‘ye vini indi. Te O’dukoti ‘diki emini lu.

Ma ma ngulupisi ri o’bi oazu lu E’yo be, emi ovupi ‘bazaru dri mani alia engazu Munguvu ‘dipini, a’disikuni kabilo le nyaka kabiloni ri i.  “Kabilo Mani riki Ma O’duko eri”. Ani ‘da afa amani oazu ani ri i, E’yo dria efupi risi. Ovuni lu E’yo azi ‘dua azini ‘daa ‘diniku, te E’yo dria efupi engazu tile Munguni ri alia risi. ‘Da afa emi ‘Ba alatararu ‘di pini oazu ani ri i.

Le ‘ba dria ma ovu afa azi eyini ru bizu ruaniari be ci. Le afa azi ma ovu ediaferu ci, geri azini si, e’yo oru ndeni asizuri i. Azini le ‘ba dria ma ovu e’yo oru ndeni asizuri be kanisiku drariruri be ci. Mani ria, azini ‘ba mani asi ‘ba kini ma yi ma drice Kristo vu azini Kristosi ‘di pini, Bibilia ni ama e’yo oru ndeni asizuri i.

Sawa ‘disi, ama amara kini Mungu epe andra amani Eri ma nabi ma ti ra. ‘Da geri Erini ovuzu eribe Ima E’yo ejizu ‘bapini ri i, trai tile Erima nabi pivu ri vusi. Sawa ‘disi o’du asizu ‘diyi aa, Eri azi ra Ima ngulupi ecezu eri ma treri ma aa dika, Eri ma ruati si, Orindi alia. Eri Mungu ma ngulupi i nukuta aasi, nabi aasi, ovupi ecezu ruati alia ri i.

Le ma ma oa buru ki siri be Indikindi Agu E’yo sipiri vu alia kalamu mani ri be ngonde saa ciri aa e’yo ci Erini ‘yori sizu vaa. Ma ovu omi maniri be ‘bazaru egata Erini pi aa; ovuni afa ‘ba adani egari pi aa ku, afa ayini ega ri aa ku, afa kanisani egari pi aa ku, afa suru pini egari pi ma aa ku.  Lu Mungu ma egata ki! Ma lu Mungu ma egata E’yo vu ri ki e’da i.

Mungu ka Ima egataki ece ma vu, Ma eri e’da E’yo ma aa emi dri tepu ma dria, “‘DI OPI ‘YO NI.” Ovuni, ‘Di a’yo Ma-i.” dini ku. Eri “‘DI OPI ‘YO NI.” Ma eco lu efini ece ‘Ba sipiri ni mani drilemgbo fezu mavu eri ma efi ecezu emi dri risi; a’disikuni Eri E’yo Munguni e’depiku ri i.

‘Ba kakau azini ki ci o’bipi ma o’bipi geru lokiri si riki, ko’bo atalao pile, azini azi ‘diyi pie. Ani yi a’du ‘ye? Lu afaki tro, lu ‘da. Yi ecokini ta ku ‘yezu. Mungu epe andra ma ti i, Eri ma napi i, Eri Amuro ma dri cezu; ovuni agupi azi nduni i ku, vini ongulumu azi agupini niki ku indi.

E’yo mani ‘yo riki, azini geri mani e’yo ‘yezuri, nga aziri pi ma mile a’bu i, te aziri pi ma mile eri nga nzi.  Osu ma bongo ta ovupi lezaru mani suri vusi, obi maniri be, afa mani le ri be, afa dria lu le ma ma ovu ngoni ya risi. Pe ma kililiru emi ni. Azi ‘diyi yi ki pa so azini angu ne ani ‘yozu, “Muke, Ma econi ku. A’dua di…Ma-Ma econi ne ku.” Yi mile be a’buzaru.

Eri nga Eri ece ‘ba Erini mu ecezu ri dri. Eri ovu sizaru kpere Eri eco Ima ngulupi zi E’yo Siza aa, ‘ba dini ma e’yo onipi onduabe ‘di vu si ci. Eri eco lu Ima nulupi zi, lu kpi E’yo Siza aa ‘dia, yi ecoki ndre etu zu te cakini eri nezu ku; eri ndre idri yinisi dria, te caniki ni eri ne aluni ku. Eri eco lu Ima ngulupi zi, ‘bazaru ‘daa.

E’yo di lu sawa ‘disi drifupi ri di lu ‘ba O’dukoti nde esupi asi yini pi aa ‘boriki, ma ovuki lazaru Indinkindi Mviniri alia, ani ovuzu nizaru beni. Mi ekpa Avizuri ani fezu Mvi ma ozo onufi driari mi aasi amve, fezu emini ovuzu Kristiani mile ongopi’bo riki.

Eri ni andra emuria okoria, eri andra ‘ba ada ni. Eri ni andra emuzu pale irizurisi ria; ese iri ribe, eri andra ‘ba ada ni. Eri ni andra emuzu e’data Yohana Batistani siria, eri andra ‘ba adani. Azi andra ra emuzu o’du ‘disi ani oazu azini Ima ngulupi ecezu pale alu dika agu azi ma aa; Mvi ‘Bani i oaria ruati ‘ba adani alia.

Ama di sawa ‘disi ayi Mile ni ri alia, nabi, Malaki 4 vuri. Afa azi awipini di yo erini emuzu te Eri Ima ngulupi alia ni efizu ‘da alia, a’disikuni ‘ada afa asizu ovupi indi ri i.

Emi eriki kabiloanzi mani wereru ‘diyi, emi Munguni fe mavu ocezaru ‘diyi. Sawa ‘di vutivuti ru. Eri emu mbeleru emini, Eri ma Amuro i. Emi oaki tepu ‘di pie, le ni e’yo efi eceza ku.

Ma mi Aji wereru ‘diyi ai emuzu ruecizu mabe afa lu ci ecopi Eri ma Amuro ejipi tualu ra ri be Sabatu ‘disi, sawa azia etusi (12Pm), Jeffersonvili saa si (sawa iri inisi Ugandaa). Mi nga ‘Di Opi ‘Yoni ni eri Munguni e’yo nzeria trai mavusi ani: Kristoni Ovu Ecezaru Eri Ma Ngulupi ma E’yo Aa 65-0822M ni ecezu.
    

Mi ega ra, MI OA AZINGAZA TEPUNI RI BE. MI EKPA AVIZURI O’DU DRIA.

Adripi Branham i

E’yo siza lazaru O’dukoti nde ma drilia riki:


Efuza 4:10-12
Isaya 53:1-5
Yeremia 1:4-9
Malaki 4:5
E’yo Ba Lukani 17:30
E’yo Ba Yohanani 1:1 / 1:14 / 7:1-3 / 14:12 / 15:24 / 16:13
Galatia 1:8
2 Timoteo 3:16-17
Ebrania 1:1-3 / 4:12 / 13:8
2 Petero 1:20-21
E’yo Eceza 1:1-3 / 10:1-7 / 22:18-19

23-0212 Ani Niki Andra Ku

Mesegi (O’dukoti): 65-0815 Ani Niki Andra Ku

BranhamTabernacle.org

Azini anira kini, mani muzu nyakua ‘diarisi ‘bori ma vutia, tepu ‘diki buku pie nga oa drile, ani emi kakau anzi oderu ‘diyi nga esura, o’du emupi ‘diyi si, kini ‘di lu ko’bo E’yo Adani, a’disikuni Ma nze eri Ru Opini risi.

Mi emu rutrazu ama Aji pie, Sabatusi sawa azia etusi (12PM) Jeffersonvili saa si, amani 65-0815 – Ani Niki Andra Ku ni eriria.

Adripi Joseph Branham i

23-0205 E’yo ‘Yezaki Ovu E’dazaru Gboru E’yo Nabirurisi

Mesegi (O’dukoti): 65-0801e E’yo ‘Yezaki Ovu E’dazaru Gboru E’yo Nabirurisi

BranhamTabernacle.org