All posts by admin5

Uncategorized

24-0324 O’du Miniri Amazu O’dukoti Eriniri Be

BranhamTabernacle.org

‘Ba Onyiru azini Leletu Leletu ‘Diyi,

Eri onyirutu nizu kini ama Eri ma Amuro onyiru azini leleturi’i ngole. Ama sizaru dria engazu wudrikurusi ara, ama ngulupi ki etraria tualu Eri ma E’yo ma ageia, O’duko Munguniri eriria nyaka feria ama idri pini.

Ama aiki Eri ‘bo Eri ma tre ma alia, azini okpo Eri ma e’datani azini E’yo Ecezani ri alia. Ama ecaki di Eri ma esele ni. Eri afa azi ama alia ni. Eri Idri ma drilea amaniria.

Ama amaki: Eri ma ‘Ba o’dukoti ojipi Malaika Azirizuri ruri ‘bo.

Ama amaki: O’dukoti Diza Ondreniri Ruri ‘bo.

Ama amaki: Ama A’diki Yari ‘bo.

Mungu ‘du Ima nabi ma E’yo ‘bo ani eli di ama amve ‘bo. Eri eli ama Malaki 4 si, Erini andra azi I mu ‘yeri le. Ama a’iki E’yo driari ra asi amanisi dria.

Engata o’doasi amboruni pari ‘duria ‘ba pi ma eselea. Yi indi orodri O’duko ‘da erizuriniri amaria. Yi le emuzu dri egozu vule ani tepu ki avizu kanisa yini pi alia.

Eri ovu fezaru nizaru yini Orindi Alatararuri vusi, kini ‘di Mungu ma Geri fe andruni ri’i. Yi ama ra kini ‘di O’duko le yi ma eriki ri’i. Eri Mungu ma Nyaka ta mba ci Ima Amuro ‘ba zu kililiruri’i.

E’yo azi andra Eri ni. Tepuki Eri eku. Yi Eri a’i.

Eri ‘ye andra a’duni? Eri eza andra atalu pima dri onzi, nezu ‘bapini kanisaki kuzu ani muzu. Eri ‘yo di, “Emi azi cini ka mu Eri ma tiecitaa ra yani, mi nga ovu drozaru amve. Ama nga mi ofu amve engazu dini nde aliasi.”

Ovuni a’izaruku, te eri eca di afa alu ri’i andrusi. Yi nga mi ofu yi ma kanisa pi aliasi te mi ka ‘yo, “Kirikiri, emi avi tepu ki.” Mi eco drio enga ra ya kini ‘dini nga ovu afa ‘ba ki awapi ndundu ri’i ri? O’duko Munguniri avizu kanisa pi alia ri’i?

Kanisa ovuki yi ma nabi pie ci. Yi “leki yi ki dika ku,” yi ‘yo ‘dale. Te Mungu ni le a’di ma ovu yi beni yari ra; Eri ‘ba Iniri ki eli E’yo Erini risi. Te Eri okpoloru yini ambamba o’du ‘di ma alia. 

Ama nga oa ama nabi be. Ama a’iki Eri ovuzu O’duko Eri ma Amuroni omvepi ri i. Amani ria, afa azi lu ini orodrirutu aga AVIZURI EKPAZU rari ni yo.

Kirikiri, kabilo Munguni la, emi eri O’duko Munguniri fo! “Kabilo Maniki O’duko Mani eri.”

Mi emu O’duko ‘da erizu azini amazu amabe, Sabatusi sawa azia etusi (12pm), Jeffersonivili saa si (7pm Ugandaa), amani, O’du Miniri Amazu O’dukoti Eriniri Be 64-0726M ni eriria.

Adri. Joseph Branham i 

Uncategorized

24-0225 Yarundu i

BranhamTabernacle.org

Agyipi Leletu ‘Diyi,

Eri sawa azia etusi (12PM), Jeffersonvilia, sawa 1 ondresi Afrikaa sawa 4 obitisi Arizonaa;  Amuro enga ovu etrazaru tualu engazu wudrikurusi ara. Ama engaki saa di te wikisi zu. Ama asi’baza azi amboruni alia, teria Munguni e’yo nzezu amani tile ‘ba adani vusi geri Eri ma ‘ba o’dukoti ojipi malaika amboru aziriri vusi. Ama ziria, “Opi Mi otu ma, Mi osu odu ma dria, Mi fe mani E’yo Eceza Mi E’yoniri dika dika.”  

Ama apizaru, a’disiku aniki adadaru ra, kini nabi’i, azini nabi’i a’dule, ovu E’yo Idrini sawa ‘diniri be ni. Ama ecoki ‘do Eri ece driaku ra, te anikira ama a’iki E’yo driari ra azini ama ava liria Eri ma dria.

Anikira, kile Opi ni andra ‘ye Musa be rile, Munguni i oturia diza fezu Ima nabi dri ama drilia. Sawa ‘dasi, Eri oya lu andra ‘be ki. Sawa ‘disi, Eri ‘buki oya nyaku be.

Sawa ni eca di ‘bo. Ama asiki ongu nzu ama alia.  Ama eri ama Kari Ongo ni e’doria aviria. ‘Yeza alu alia, Amuro engazu wudrikurusi ara ki nga pa yini ma dria ani e’do ngo, MI MA A’I, e’yo dria eco’i ra, Mi ma A’i.  Munguni i oturia e’yo nzezu amani.

Ama eri: “O’biti onyiruni agyipi.”

Ama asiki ayiko zu e’yo 3 e’yere ‘diki erizuri si. Nabi enga nga lu ma omve ima agi i. ‘Daa eri ‘di lu ama dri,

Ma ece emi dria tu. Ma—Ma asini ma mu ngoaya risi ku, Ma—Ma…ovuni, eri ovuni emi’i ku. Ma ovu agypi be, angu dria wudrikurusi ara, te eri—eri ovuni—eri ovuni emi dria ku. Afa azi ci ongulumu wereru ‘di be lu…ani niku. Ma e’yo ega yi ma dria…Ma ovuni nga ongulumu a—azi be nyakua, mani ni ra, pa sopi ma be kile ongulumu ‘di le ri be ku. Mungu ma fe ama ma ovuki awazaruku ambamba, kpere, Suru nga emupi ‘da ma aa, ama ma ovuki tualu fo; eri ziza mani ri i.

E’yo Eceza amboru Munguni mu ece amadri andruri a’duni? Ama mu a’du eri ya?  Ama eco ‘do Eri eri paale kakau, kakau ‘bo oko, te andru ni mu ovu ndu, azini kile o’du azini oko’bori pile ku.

Eri a’duni? A’i’ba Ma Nyaka ni. Mukati ecetaru engazu ‘Bua amani nga nya ri’i. Mukati Ecetaru lu ama, Eri ma Amuroni ri’i. Eri Diza Munguni Mukati Ecetaru ‘da ma dria ri’i ama tambapi engazu ruezazuteri vusi ri’i.

‘Ba amveleru ‘diyi ama ne azini zi, “‘Ba ‘di emi ‘di a’du ‘ye? Emi lu tepu ki eri?  Emi ada ada Yarunduki.” 

Diza!! Ama ayikosi tu, azini awa’difosi tu Opi dri ovuzu Yarunduki risi; ‘ba ondoaakori ki Erini azini Eri ma E’yo e’dazarura rini. Ama ayiko zu luria wudrikuru dri, “EE, MA A’I AZINGAZA TEPU NIRI ALIA. MA A’I AVIZURI EKPAZU RI RA. MA A’IRA ERI O’DUKO ORODRIRU NDENI MINI ECO ERI RI’I. EE, MA A’I TEPUKI ‘BAZU VULE PARI E’YO OLUZURIARI MA AA.”

A’buza a’biniri ka ki ovu wuzaru ‘bo, mi eco ne ra kini Mungu ni kiri Mungu Ima E’yoni ri’i. Eri kiri Ima ma E’yo tamba. Eri—Eri Mungu, Ima E’yo Sipi ri’i.

‘Ba azi nduni tro ‘ye, kani ‘yo ngoni yari ti, ama A’iki Eri ra, ani ama E’yo ‘ye Eri dria. Mi ka Eri vaku, ecekini mi a’ini Eri ku. Mi ovuni a’buza ma ngukua ku. A’buza ‘da ma e’i ni ‘ba aluni. O’dukoti ‘da alu. 

Ma ‘ba asi azini api kini—kini mi isu e’yo vaza orindisi afa Munguni o’bi eji Kanisa vu eri ‘yozu kpi ku ‘diniri ra. Enera? Eri afa azi, aziria, le ama ma ‘yo e’yoki geri azi erini ecozu kalafe esizu nisi, fezu ‘ba azi ‘diyi ma fuki ra, azi ‘diyi ma muki ra, azini azi ‘diyi ma—ma—ma egaki e’yo drinia.  Te ‘da ni ovu ‘yezaru asisile be. Le ma ovu ‘yezaru ‘da le.

E’yo ni andra ecezaru Mungu ma nabi vu. Ongulumu azi yo, Fariseiki, kani Sadukeiki, kani suru azi kani enyati azi. Eri NABI I! Mungu ovu agu alu be. Eri isuni andra omi iri kaniku na ‘dini ni ku. Eri ‘du andra agu aluni. Agu nde ovu E’yo be, azini eri’i a’dule. 

‘Dini ecodi ovu ‘ba azini ni ‘yo kini, “Mi le ‘yori Mungu eco afa azi ‘daleni ‘ye asisileni be ra?” Eri ‘ye andra ra adada. Eri kiri ‘ye.

Kile yini andra ‘yo eli turu turu vule ‘daleri le, ama afa aluri eri andrusi: “Te agupi azi Munguni omve ni ki vini ‘dia ci.” ‘Da ada. Yini vutini biria azini muria indi, Amena, te aluni ka di le emu uru azini Mungu ma pari Munguni fe ama nabi, andra Erini ‘ba okoru azini otu azini ‘daniri vuri ‘duzu, le ama ma oaki E’yo ovupi e’dazarura ri be, O’duko Munguni o’du amaniri nir’i.

Mi ne, dra, oazu Eri vusi ziri sawa ‘disi. Le mi ma ali Eri ma aliasi fezu a’buza ‘di ma aa, kani ku mi cani ‘ye ku. Mungu eco andra ovu yikisi yini ngole yari, te mi ma ega eri andra a’duni yari ra, kini Mungu ni andra afa a’buza ‘da ma ngukuari e’da. Mi ne afa andra a’buza nde ma ngukuari a’duni yari, E’yo ni! Eri a’bu andra a’duni? E’yo’i! Eri andra a’duni? Eri sanduku alia. Eri andra E’yo’i andra a’buza ‘dani zi ri’i. Enera? Ani Yesuni andra E’yo ‘da’i, azini Eri E’yo ‘da’i, ani a’buta Eri ma ruatiniri zi andra Eri ni.

Amani ria, eri e’datani! Eri di sawa ‘disi e’yo nzeza azi ni ku, eri e’yo ada ni! Amena!

Anikira ‘ba azi ‘diyi piniria ama Yarunduki, ani eco eku azaru ra wudrikuru dri, te eri ‘ba driaki ese Eri vu.

Emi emu ani ovu o’yizaru E’yo vu ama be Sabatusi sawa azia etusi (12pm), Jeffersonivili saa si (8pm Ugandaa), amani nabi ni eriria luria wudrikuru dri ama Yarunduki 64-0614E ngule yari.  Ama ayikosi tu, azini awa’difosi tu ‘yozu ama ‘dale.

Adri. Joseph Branham i

E’yo Siza lazarᴜ de nga O’dukoti nde ovu erizaruku ki:

I Korinto 1:18-25
II Korinto 12:11

Uncategorized

24-0218 Mungu Ma A’buta Wuzuri

BranhamTabernacle.org

Amuro A’buza Ma Vutia Leleturi,

Ma mu drile luria emi dri dika azini dika, “AVIZURI EKPAZU ri ni afa orodriru ndeni emi eco ‘yeri i” a’dusi ya ? Ma mu drile luria ocepi pini, “Emi ‘baki Adripi Branhamni vule emi pari e’yo oluzuri pi alia” a’dusi??

Eri lu ewakokoru ‘dinile. O’duko ‘ba o’dukoti ojipi malaika azirizuri vuri erizu tepu ma dria ri, eri E’YO IDRIRURI erizu ri i.

‘Ba pi ma drilea, Mungu a’buzaru dika ani e’da andra Musa’i, a’buza nde vusi, Ima ngulupi a’buzu Aci alu alu risi, Aci Piriruri alu alu risi emu vaa ra. Engazu—engazu ‘dasi…Engazu yi vu, ani yi ecoki andra lu ani Mungu ma E’yo erizu a’dule. Emi vaki ra? Lu E’yo i, yi eriki andra O’duko Erini ri’i. A’disiku, Musani andra, yini ria, E’yo idriruri’i.

Mi nze nga e’yo Olu’ba Indikindi be nezarura ri ma dria! O’duko amani eri tepu ma driari ni O’duko E’yo Idribe o’du amaniri niri vuri’i. Eri cani lu eca angiri tu aga ‘Da ra ku.

O’du Musani alia, anzi Israelini lu andra ovupi angu hema asozuriari ecoki Eri ma O’duko eri ni.  Te andru, Mungu le andra WUDRIKURU ma eri Ima O’duko, ANI ERI FE ANDRA MA OVU ‘DUZARU TEPU MA DRIA, ani Eri ma Amuro eco O’duko E’yo Idriruri niri eri beni.

Mungu a’bu andra Ima ngulupi Ima nabi ma aa, Ima E’yo ki nzezu yi ni. ‘Da afa andra Eri ni ‘ye ri’i. Musa ni andra E’yo idriru ‘da i ‘ba nde pi ni, a’buzaru Aci Piriruri si.

Mi ka ovu E’yo Eceza ‘da ni o’du amaniri niri be ku, mi econi ku ovuzu Amuro Yesu Kristo niri. Mi ka ovu yi be, ecekini mi Amuro Yesu Kristoni RI i azini nga mu ‘yo, “afa azi orodriru cika ni yo aga tepuki erizu rira ri, a’disiku Eri O’duko Munguniri’i e’yo nzeria mi dri tivu bivu.”

‘Ba kakauki o’bi ‘baki ole azini ‘yo kini ama odro nabi ma dria ambamba; ama eri inzi ‘dini. Ma agipi la, Eri ‘Ba e’yo ‘diki ‘yopi ri i, ovuni ma’i ku. Ma lu E’yo ma esele elaria.

Erini ovu ‘yezaru ayi dria ma alia rile, Munguni a’buzaru ruati ‘ba adani alia. Mi ne, Eri ‘ye ra. Nabi ki andra Mungu’i, a’buzaru. Yi andra E’yo Munguni ri’i (‘da ada ya?) a’buzaru ruati ‘ba adani alia. Ani, yi amaki andra ama Musani ku indi, mi nera, Yesu’i.

Ama ovuni agu azi inzi ni ku, te Mungu, Ovupi a’buzaru azini Ima ngulupi ecepi nabi vusi ri’i. ‘Da vazu azini a’izu, le mi ma ‘ye ‘di i.

Emi di dika ku a’buza ‘da ma ngukua, ‘Ba wereru ‘diyi la, Mungu ni di e’dazaru dria ‘bo.

Ama di dikaku a’buza ‘da ma ngukua, ama eco ne ra Eri Mungu’i Ima ngulupi ecepi nezaru nditiriru ri’i. Eri enga ovu ecezaru kini O’duko tepu pi ma dria ‘da erizuri ni Munguni eriria e’yo nzeria Ima Amuro dri ri’i.  Ama a’ira Eri Eri ma Geri fe andruni ri’i.

Ama lu AMENA ‘yo O’duko ‘dani, nduni yo. O’duko ‘dani nga e’yo olu, emba azini afa dria amani le ni riki ece ama dri. O’duko ‘da ni nga ama e’da ama Opi Yesu Kristo ni. O’duko ‘da i afa dria amani le azini ava ta ri’i.

Ama awa’difosi azingaza geri 5-si Mungu ni ayu ‘baki e’dazu O’duko ‘da vu risi; ocepi e’yo vaza nde nepi ‘bo azini ovupi e’yo eceza be kini tepu ma avita kanisa yi aliari ni afa amboru ndeni yini eco ‘ye yi ma ‘bapini ri pini.

Ama mi ai emuzu O’duko E’yo Idrirurini okpoberi erizu ama be Sabatu ‘disi sawa azia etusi (12pm), Jeffersonivili saa si (8pm Ugandaa), amani: Mungu Ma A’buta Wuzuri 64-0614M ni eriria.

Adri. Joseph Branham i

Uncategorized

24-0204 Agu Azi ‘Dia Ci Ecopi ‘Diza ‘Baapi ‘Dizu Ra Ri

BranhamTabernacle.org

Wura E’daza Yesu Kristoni Leleturi,

‘Baki ega ama ababaru, riria aku azini kanisa amani pi alia, tepuki eriria. Yi ega kini abiri ni di ama furia drazu te ‘dini. Yi niki wereru kini ama riria indikindi Diza Mvi Amborurini ri alia, niria, azini Nyaka Tambazaruci ri isuria kile kuja icoari pi le ri.

Ama Nganu di wapi’bo, ngonde ‘duzaru ri’i.  Yi kaki le oa yi ma a’bi ma aa, emu drile. Ovuni AMA’i ku, ama oaria Diza o’du amaniri niri alia.

Diza o’du amaniri niri a’duni ya? Mungu epe Wudrikuru dri Eri ma malaika amboru azirizuri ma ti Eri ma Amuro ma dri cezu. Eri andra a’duni? Eri andra nabi ni. Afa andra erini ‘yori ‘du pari ra. Eri andra E’yo Munguni ovupi e’dazarurari’i. Eri andra e’data Diza Mungu ma E’yoniri’i. Eri andra Mungu ma Diza andruniri’i.

Musa mu di andra lu drile, lu i, a’disiku eri andra Idri nde’i, eri andra Diza sawani ri’i. Afa andra erini ovuzu eri be ri, eri andra a’duni? Mungu’i Ima E’yo azizaruri e’daria Musa vusi, azini Musa ni andra Diza nde’i.

Eliya ni andra Diza nde’i… Diza nde’i! Haleluya! Eri andra Diza nde’i. Diza nde’i! Eri andra E’yo Munguni ovupi e’dazarurari’i.

Yohana i, erini andra emuzu nyakua risi… Yesu ‘yo, “Eri andra Diza azi dizaru azini lerelereni.” Haleluya! A’dusi? Eri andra E’yo ovupi e’dazaruri’i.

‘Dinile E’yo vusiria, Diza o’du amaniri niri ni Mungu ma nabi, William Marrion Branham i. ‘Ba wupi nyamuko Babuloni ni aa, “Emi ma efᴜ eri ma aliarisi ra, ‘ba Mani la, emi kazᴜ ti ecizᴜ eri be azi onzi erini ma alia kᴜ beni” ri’i.

Eri andra Malaki 4:5, azini E’yo Eceza 10:7 ma ecaza ima pariari’i.  Eri ‘yolu andra ra ani ‘yozu, “eri nga ovu indi,” ani eri di andra ‘daa indi, afa nduni kokoru. Eri ovu andra a’yoro be aluni ku; aluni andra ‘daa yo. Eri ‘yo ‘di lu, “Eri ma ovu indi,” ani ovu andra di ra.

Mungu ma E’yo e’deniku, azini le Eri ma ‘du pari ra. Ama neki Diza nde ‘bo; Eri ma E’yo andra Erini azi o’du ‘dini ri i. Eri enga e’dazaru azini ecezaru kini Eri E’yo Adari i. Eri Diza sawani ri’i.

Ojata azi yo nizu ra kini afa amani eriri ni E’yo ovupi e’dazarura o’du amaniri i ri siri. Eri MA AA O’BU YO… OGBO. ‘Ba azi ‘diyi ka api afa azi nduni si ra, emu drile, te ovuni ama’i ku.

Eri ma efi kini mi econi mi ocepini eri ku, kaniku olu’ba oluki e’yo ku ‘dini ku; twayo, te LE mi ma ndra e’yo dria mini eri ri Mungu ma keke amboruri si, O’DUKOTI TEPU MA DRIA ‘DI I. 

Yi kaki ‘yo o’du O’dukoti agu-aluniri aliki ‘bo ‘dini, ‘da O’BU KI. Yi kaki ‘yo O’dukoti ‘di ovuni yi ma Driariruri’i ku yani, ‘da O’BU KI.  Yi kaki ‘yo tepu pi ma eri ta caniku ‘dini, ‘da O’BU KI.

Afa azi angiri tu agara ni yo aga Avizuri Ekpazuri, niria ra kini mi eco ra AMENA ‘yozu e’yo dria ni ri. Pari azi nduni yo mini ecozu ‘da ‘yezuri pelu O’dukoti sawaniri eriria ka.

Sawa ‘disi ama wura e’daza Yesu Kristoni andru ri’i. Ama Eri ma E’yo e’dazarurari’i. Ama ‘ba Erini andra pe Eri ma E’yo Eceza saa-detani amboruri aipi riki. Ama ERI MA AMURO I.

Eri ma Amuro ni lu nga ovu E’yo Eceza adaru Diza o’du ‘diniri be ni. Yi nga ni ra, Diza ‘di ni nga yi ‘ba kililiru. Diza ‘di ni Orindi Alatararuri e’yo nzepi Eri ma ‘ba o’dukoti ojipi malaikaru ri vusi ri’i.

Mi le ta di ri indikindi Mungu ma Diza sawaniri alia ra roo? ‘Dini Ma mi ai emuzu ruecizu amabe Sabatu ‘disi sawa azia etusi (12pm), Jeffersonivili saa si (8pm Ugandaa), amani Agu Azi ‘Dia Ci Ecopi ‘Diza ‘Baapi ‘Dizu Ra Ri 63-1229M ni eri ria.

Adri. Joseph Branham i.

E’yo siza lazaru inzita ma drilia riki:

E’doza 1:3, Chaputa 2
Zaburi 22
Yoweli 2:28
Isaya 7:14, 9:6, 28:10, 42:1-7
E’yo Ba Matayoni 4:12-17, Chaputa 24 azini 28
E’yo Ba Marakoni Chaputa 16
E’yo Eceza Chaputa 3

Uncategorized

24-0128 ‘Ba A’i’baru Esele Na Riki

BranhamTabernacle.org

A’i’ba Leleturi,

Eri onyiru tu ‘yozu, MA A’I’BANI ri ngole ya. Ovuni a’iza azi ma aa ku; E’yo’i! OVuni dini azi ma aa ku; E’yo’i! Ovuni afa azi ‘ba azini ‘yori’i ku; te afa E’yoni ‘yo ri’i!

Azikini afa azu zitasi ku, ama lu Eri a’i i. Eri tro eku ngole yari ti kaniku ‘ba azi cinini ecozu e’yo ‘yozu Eri dria ngoni yari ti, ama a’i’ba azi adadaru ‘dile riki. Ama ovuki e’yo eceza orindisi E’yoniri be ci.

Ama sawa amani oazu alenia ‘di ne. Ama O’dukoti sawaniri ne. Ama ‘ba o’dukoti ojipiri ne. Ama Munguni ne Ima ngulupi eceria Ima E’yo ma aa. Ama neria afa azi nduni ‘yo pe lu O’dukoti ‘Di’i, ‘ba o’dukoti ojipi ‘Di’i, E’yo ‘Di’i.

A’i’ba adaruri erini afa azi ku pe lu E’yo ni. Dria ‘da. Eri E’yo nde One’i. Eri ovuni drifuza-ako ki onda ku. Eri ovuni akiri asi esezuri ki onda ku. Eri a’i Mungu ra, azini ‘da de’i ‘da, azini eri di lu mu dri le. Enera? A’i’ba mbgari di ‘da.

Ama ecokini afa azi cini eri ku pe lu E’yo nde’i; E’yo lu emupi nabi vu ri’i. Drifuza-akoki yo, ovuni ‘ba azi ma e’yo ma efi ecezani ku, E’yo Kililiru andra ovupi nzezaru azini ‘bazaru tepu pi ma dria Amuroni ri’i.

Orindi ‘ba ‘di E’yo ‘da ama aa idriru ‘bo ani eca’di idribe ‘bo. A’itasi, ama Eri ne azini Eri a’i. O’duko azinini nga emu engazu ‘Bua ngazu baptizi Orindini Alatararu niri ifizu Amuro ma aa, ani ama ‘duzu engazu nyakuasi beni, ‘Duta Uru Asindrizaruri alia.  Mungu azi andra eri ni.

Ama ovu ‘bazaru obeta alia sawa dria, o’du dria. Sitani ni o’bi lu amani ama o’bita ‘diki obeta pie Munguni ‘di amani panga fe ‘dini.  Te INZITA MA OVU MUNGU VU, eri ‘dini ku, eri Sitani’i ‘yepi ri’i azini Mungu’i eri kupi ma ‘ye ri’i.

Mungu ni ama embaria, azini siria nezu ama mu a’du ‘ye yari.  Obeta ki emu ama oya, ama ‘bazu vaa ele, nezu ama nga paso ngoa yari. Te ama agaza isu a’di alu alu ma dria, a’disiku ama eceta idriruri ki; E’yo Munguni ni oaria ama aa azini ama eselea.

Ama orodriru tu Eri ma milia ngole?

‘Ba azi cani pari mini ri ‘du ku, ka tro ovu wereru ngole ti. Mi ‘yo, “Ma lu oku akutambapi ni’i.” ‘Ba azi eco mi pari ‘duku. Mungu’i, kari Erini ambori alia, oti ‘dinile, Ruati Kristoni, otita alia, pere ‘ba azi ‘yo ecopi pari mini ri ‘dupi ri’i.

‘Da osutaru ngole? Ama alu alu ovu pari azi be ci. Ama alu alu andra ‘dia ci sawa Munguni andra wudrikuru ‘yozu o’baza ma alia ri si. Eri ‘ba andra ama ruati ki kpi ‘dia ‘dasi. Mungu ‘ba andra ama nyaku sawa ‘di ma alia E’yo Erini ni pari ‘duzu azini ama dri Idri ‘Dani’daniri fezu.

Le ‘ba dria ma pe peta ra. Mi pasoza ngoa E’yo ‘di ma dria, O’dukoti ‘di ma dria, ‘ba o’dukoti ojipi ‘di ma dria? Eri orodriru tu ngole E’yo nzezaru tepu pi ma driari ki eri zu?

Wudrikuru kala ndundu ‘diyi pi alia, tepu ‘diki aci, trai azingaza tepuniri vusi.

Eri azingaza tepuni ti epele engazu Mungu vu Eri ma dri wudrikurusi arari’i.  Eri lu midri kpi mi ngua yari, mi a’di’i yari, azini kani mi a’i’bani E’yo ma aa yari.

Mi klasi aluni alia na ‘diyi eselea. Mi oaza sawa ‘disiri alia, oaza omi miniri ni, emi sawa ‘disi ongulumu nezaru ra ‘di ma aliari azini emi ngapi mupi ovupi ongulumu neleku tepu ‘diniri ru, mi oaza omini mini tepu ‘di erizu’bori risi, ni mu e’da mi klasi ngo ma aliari ni.

Tepu ‘di erizu’bori ma vutia, eri e’da mi ‘ba klasi esele ngo ma aa yari ni. Azi ‘diyi a’iki kini le mi ma ovu angiri tu aga E’yo kililiru ovupi nzezaru tepu pi ma dria’bori vuri be ci. Azi ‘diyi a’iki kini o’du O’dukoti agu-aluniri aliki ‘bo ‘dini; le mi ma eri mi ocepi’i kaniku mi avizaru ‘dini.

Awata ndeni O’dukoti ma aa andruri eri orodri ‘baa tepuki erizuri ma dria. Azi ‘diyi emba kini eri onzi tepu ki avizu kanisaa; ocepi ma olu lu e’yo ni. Azi ‘diyi ‘yo ma ovu trotro, te yi aviki tepu ki kanisaa aluni ku, kaniku yi ka ‘ye ra yani eri ndazaru.

Omi kakau be, egata kakau be, e’yo efi eceza E’yo kakau be, a’dini ‘yeke ni? Ama ma a’iki a’di’i?  ‘Da zita le ama alu alu ma ziki ri’i.

Nabi ‘yo andra ama dri eri andrizu E’YO SI, ovuni afa ‘ba azini ‘yorisi ku. Mi ‘da ngoni ru? GERI lu ALU ‘da ‘yezu, MI EKPA AVIZURI.

Le omvita azi ‘yekeni ma ovu ci, geri azi ‘yeke ni. ‘Ba alu alu ma peki yi ma ngulupi ni. Sabatu ‘dini nga e’yo drile ‘dile ‘ba dria O’dukoti ‘di eripiri pivuri e’da.

Afa azi le mi ma zi mi ngulupi ani ri: ‘Ba ‘Di Opi ‘Yoni beri a’di’i? Aci Piriruri e’da andra a’di’i? A’dini nga ama e’da Yesuni ni? A’di nze andra E’yo e’depikuri ni? ‘Ba andra e’yo nzezani ni ovuzu nyakua orodriru tu, yi amviki e’yo ma ale ‘buari a’di’i?

Mi ka le ovu omvita ‘yeke ri be, Ma le ta emi ai emuzu erizu Sabatu ‘disi sawa azia etusi (12pm), Jeffersonivili saa si (8pm Ugandaa), O’dukoti ‘divu: 63-1124E — A’i’ba Esele Na Riki.

Adri. Joseph Branham i E’yo Ba Yohanani 6:60-71

Uncategorized

24-0107 Idri Arujoa Sawa ‘Disi Riki

BranhamTabernacle.org

‘Ba Yazaru Ndu Leletu ‘Diyi,

Mungu emu andra o’du amani ma alia Ima ngulupi ecezu ruati ‘ba adani alia, agupi azi omvele William Marrion Branham ‘dini ma alia, ani Eri eco fe Ima E’yo ma eca ima paria beni. ‘Da E’yo Eceza Yesu Kristo ni o’du amaniri ma aa ri’i.

O’duko ‘da erizu azini E’yo driari a’izuri Mungu ma Geri lu alu fe andruni ri’i. Eri epe andra wudrikurua agupi kakauni pi ma ti odu osuza Orindi Alatararurini ri be, te Eri epe alu andra azini nze andra e’yo agu alu vusi E’yo Erini ecezu azini Ima Amuro ma dri cezu.

Eri ojani Ima otitaki kaniku Geri Erini e’yoki ‘yezuri aluni ku. Geri erini andra ‘yezu paale okorisiri, Eri ‘ye ‘dale sawa dria alia. Eri Ima ngulupi ma ‘ba pi ma dri ce ni, Aci Pirirurisi.

Emi avini aluni ku, EMI Mungu ma Amuro pele’bo peleri ki azini afa azi yo sitani ni eco ‘ye kaniku ‘yo ecopi ‘da ‘dupi mivusi teri, AFAZI YO! Eri ‘ba andra mi okoru denga wudrikuru ma vuti ovuni ‘bazaru ku. Eri ni andra mi ‘dasi ci, azini mi andra Eri be. Eri ni andra mi ru ra. Eri ni andra afa dria mi ma driari ra. Eri ni andra mi ma uruki ele pie ra. Eri ni andra mi ma e’detaki, onzi mini pie ra, azini Eri le andra kiri mi ra azini pe andra mi ra a’disiku mi andra Eri ma esele ni.

Idri mini ecolu Eri ma E’yo nya i. Afa azi mi dri apita fepi ni ‘yo pelu Eri ma E’yoni. Mi le tu E’yo Erini lazu azini e’yo egazu Eri ma dria, e’yo zizu engazu ele asi mini ma alia. Mi ka Eri ma o’duko eri e’yo nzeria kpi mi dri, eri emi enga uru a’buza sawaniri ma drilea. A’disiku mi ni ra mi riria Eri be pari ‘Bualeruri pi alia Erini e’yo nzeria tivu bivu mi dri, E’yo Ini eceria, mi egaria, MI MA AMURO’I.

Sitani eco mi osi azini osi azini osi ra. Aziria mi eco eca ele tu azini ama kini mi di ‘ba e’depi teketeke ‘dile ni; amazu kile mi e’dedi Eri aga ‘ba azi ‘diyi. Mi di ‘ba onzi ndeni engazu onzi ‘diyi ma eselia ri’i, te angu azia, ali idri mini alia, mi O’duko Ndi Wereru ‘da eri luria mi dri: “Afa azi eco mi eseleco MA be ku, MI MA E’YO NI.  Ma ‘ba andra mi ru Ma Kabilomva ma Buku Idrini ri ma aa, Ma ngulupisi.”

Ma eco andru a’du ‘yo mini asi okpo fezu?

Mi oa E’yo ma alia. Mi EKPA AVIZURI o’du dria azini mi eri O’duko Munguniri ‘Di Opi ‘Yoniri ‘yozu azini luzu mi dri;Ma emi eciria E’yo mani ma ageyia. Emi eco agaza isu AFA CIRI ma dria ra, a’disiku Ma E’yoni idri be azini oa mi aa.  Ma e’da emi dri ‘bo, emi ovuki A’ITA KILILIRURI be ci. Emi ayuki Eceta Nde ‘bo, ani Eri ‘ba di emi aa Avataza ‘bo. Ma nga pa so Ma E’yo vutia. Ma nga afa Mani andra ‘yo Ma mu ‘yeri ‘ye.

Eri ma E’yo Erini nze ama dri Tepu ma dria riki onyiru ngole ya. Aniki ra Eri ovuni agupi azi, ‘ba azi ‘ba adaru ‘dileri’i ku ama eselea ri. Eri Mungu ‘Dani ‘Daniri’i e’yo nzeria ama, Eri ma Amuro dri.

Emi ovu aizaru ruecizu Amuro be Sabatu ‘disi sawa azia etusi (12pm), Jeffersonivili saa si (7pm Ugandaa), amani ama etraria O’duko Ndi Wereru ‘Da Eriria: 63-1110M Idri Arujoa Sawa ‘Disi Riki.

Adri. Joseph Branham i

E’yo siza lazaru inzita ma drilia riki:

E’doza 15:16
E’yo Ba Matayoni 23:27-34
E’yo Ba Yohanani 4:23-24/6:49/14:12
1 Petero 3:18-22
2 Petero 2:4-5
Yuda 1:5-6