All posts by admin5

23-0108 Nyaka Orindini Saa ‘Yekesiri

Mesegi (O’dukoti): 65-0718e Nyaka Orindini Saa ‘Yekesiri

BranhamTabernacle.org

‘Ba Angune’ba Drile Asi’bazabe Leletu ‘Diyi,

A’di azi E’yo Eceza egbipi egbiegbini ci e’buria oru ama aa ko’bo nga drio rile ku. Ama eriki O’dukoti ‘di idri amaniki si dria, azini drio E’yo ma dria ri a’i’bo, te SAWA ‘DISI Eri ovu’di e’dazaru ama a ko’bo nga drio ri le ku.

Sawa ni di sawa ‘disi, ayi ‘di di amani nyazu engazu afa zizaru Munguni ovupi zizaru ci engazu wudukuru vusi ri i. Afa ‘bapini guzu guguri ni afa amani Munguni zizuri i. Afa ‘bapini omve “azani” ri ama omve “Amboru!” Mungu ece amani ‘bo kini geri lu alu fele ovuzu Eri ma Amuroru ri eri, AVIZURI EKPAZU.

Te awa’difo Munguni, ama ovuki Nyaka zizaruni be ci, Nyaka orindisi, amani oazu ani onyi azini asindriza e’yo eceza Yesu Kristoni si o’du asizu ‘diyi ma alia ri siri, Eri ni Ima ngulupi e’dazu ‘ba Erini pi alia.  .

O’dukoti alu alu Amuroni eriri si, Eri e’da amani kini Eri Ima Ale kililiruri i. Eri ovuni afa amani EGA Eri ‘yo ri i ku, Eri vini afa amani EGA Eri ma efi ngoniyari i ku, ERI LU KO’BO afa Eri ni ‘yori i ani azi ‘diyi ecokini Eri neku; yi ma mifi ovu a’buzaru.  Mungu zi Eri ci. Yi Eri lu kpi, te neki ni Eri ku. Amani ria, ERI AFA DRIA AMANI NE RI I.

Amani ama traria wiki alu alusi, acakini te ku afa Erini mu lu amani azini ece amani ri erizu. Sabatu ‘disi, ovuni Eri mu amani afa onyiru azi zizaru wereru ‘dile riki fe ku, Eri mu amani ayia lonyisi tre ‘dileri efe ani ERI AHWEZU dika azini dika ani oazu ndindi kini ama esuki Eri ra.

  • Nabi nde enga andra ovu indikindi Munguni alia ezuru tu, nabi E’yo Okuri piniri, kaniku sawa cini siri, eyi pini oaria Indikindi Munguni alia kpere yi di eca E’yo i ria, O’dukoti eyiniri E’yo Ma ngulupi i. Azini, mi egara, ‘yo andra, “DI OPI ‘YONI.”
  • Ama esu kini agu azi ka emu, tiepezaru engazu Mungu vu, Mungu ka ‘baa ni, ‘DI OPI ‘YONI adaru ri be, o’dukoti ki ‘ba o’dukoti ojipi ri be ki oa alu azini alurile.  .

  • Ani agu azi ka emu ‘DI OPI ‘YONI be, eri i O’dukoti eriniri be ki alu.
  • ‘Buki eri e’da, Bibilia ni eri e’daria, O’dukoti ni eri e’daria, dria alurile.

  • Nabi i, Eyo i, O’dukoti i; ‘ba o’dukoti ojipi ri, O’dukoti, azini O’dukoti, andra alu rile.

  • ‘Ba azi cini o’dukoti erivu ri be ki alu.

Mi ka e’yo nze Angu Mele nzezuri ma dria ya ani.

Mi ka ovu e’yo eceza azi ciani be ci ya ani, mani egasi ‘ba ‘da kpi mgboru; O’dukoti ‘ba o’dukoti ojipiri be yi ALU. Mi afa erini ‘yo ‘bo ri eri ria…ALU!! Ani ecekini mi cani ‘ba o’dukoti ojipiri ma eseleco O’dukoti be ku, olu’bapi la.

Le mi ma ‘ba ‘BA O’DUKOTI OJIPIRI kanisa mini ri alea O’DUKOTI nde eri ni eji ribe ka adreku mi ovuni ‘di O’DUKOTI DRIA RI A’IKU. MI OVUNI AMURO I KU.

Kiri kiri! Dika, eri O’dukoti ki ‘ba ‘ba o’dukoti ojipiri be alu. Nyaka Orindisi ri gonde, azini Eri sawani alea sawa ‘disi.

Ama, ‘ba Mungu ma sawa amani oazu aleniari a’ipirari pini ria, ‘ba o’dukoti ojipi Erini ti eperi i, E’yo dria erini andra nze ri ki; afa ‘diki Nyaka zizaru ri ki.

Geri amani O’dukoti ‘di lezuri, lu mini egaria, “Eco di ovu ‘da ma dri lea ngoni ru?” Eri oni okururi ‘ba Eri dria luzu amani ama a’diki yari si.

Emi nekini okpo Mungu idriruri niri kanisa idriruri, Amuro, alia ku ya? ‘Ba azoruriki ovu atizaru, draza riki ovu engazaru, acopi riki aci ra, milekoko riki angu ne, E’yo Ba ri ni muria drile Okpo Erini alia, a’disikuni O’dukotiki ‘ba o’dukoti ojipi ri be yi alu.  . E’yo ni Kanisa aa, ‘ba nde aa.

E’yo AMA AA ‘da i. Ama O’dukoti nde i. Ama ovu okpo nde be. O’dukoti ‘di i amabe KI ALU!! Mi ka e’yo nze egbuzu dika dika dika ri ma dria ya ani.

Amuro Agupi ma eseleni, Kanisa ki Kristo be alu rile. “Azi mani nga riki emi nga vini ‘ye indi.”

Ama Agupi nde ma eseleni!!

AMA KO’BO KRISTO LE!!

Mi ega eri eku amboru sawa ‘disi, ani yiki feria asi mini rini esele o’dukitoni ‘diyi ki la ria, mi te nga lu kpere mini O’duko Munguni eriria luria yi dri tivu bivu Sabatu ‘disi sawa azia etusi, Jeffersonvili saa si, amani: 65-0718E Nyaka Orindisi Sawa ‘Yeke Siri eri ria.

Mi ovu aizaru emuzu ruecizu ama be. Mi ka ecoku, MI EKPA AVIZURI sawa ciri aa, O’dukoti ci ri i, angu ciri aa, ani mi eri Mungu ma ‘ba o’dukoti ojipiri i mini Mungu ma O’dukoti eji ria.

Adri. Joseph Branham i.

Eri vini ‘dale andru, kini Mukati Idrini anzi pini nyari ni O’dukoti Munguni ma vuti bizu ri, eyi ta mbazu sawa abirini risi..

E’yo siza lazaru riki

1 Opi 17:1-7
Amosi 3:7
Yoweli 2:28
Malaki 4:4
Luka 17:30
E’yo Ba Yohanani 14:12

22-1231 Baka Seza & Kumunyo

Kabilo Enyia Ogogo Leletu ‘Diyi,

Ale ta ama ma ovuki Kumunyo be dika aku amani pi alea Ini Asizu Dere Eli O’diri ecani ngaku risi, Mba Mudrini rir 31 si. Embata wino ni i esu ngwa yari ki geri mukati Kumunyoni ri edezu ri be ri eco i esu geri intaneti ni andraleru ‘disi. Geri ti o’duko avizaru inzitani ri ni nga mu ovu ‘bazaru mbeleru pari amani intanetini ri alea. Kaniku, mi eco inzita nderi avi engazu app Lifeline niri alea ra.

‘Ba angu Jeffersonvilia ogogo ‘di pini, mi eco wino Kumunyoniri ‘du ra O’du Towisi, Mba Mudrini Iri 30 si, e’dozu sawa aziri kpere Sawa Mudri etu alasi, indrika VGR niri ma vutia.

Ama nga mu 62-1231 Baka Seza, ni eri e’dozu sawa Mudrini alu ondresi (5pm) Sawa Etuni Efurialeru risi o’du Aziasi, Mba Mudrini Iri o’du 31 si. Adripi Branham ni O’dukoti Eli O’diniri ejizu’bori ma vutia, ama nga tepu nde fe paso ‘daa ani ovuzu minisi ogogo 10 nibe Ongo Inzitaniri ki ngozu amani ama oturia Omu Opini ni. Ama di nga mu drile tepu nde be pari Adripi Branham ni inzita Kumunyoni ri e’doria. Tepu ‘di ma dria, ku esele inzitani pa ojizani ri amve, ama nga mu ‘ye indi vini.

Amani ecaria eli azini ma aa Inzita Eriniri alea ria, ama ma owiki idri amaniki Erivu dika, okoria E’yo erizurisi, azini di ‘da ma vutia Ondreta Eriniri ‘duzu risi. Driwala azi onyiru amani ovuzu eri be amani pale alu dika aku amaniki ‘bazu Jo azi Opi Opipiniri a’izu emuzu aania azini ruecizu amabe ‘doleni ngoi ya.

Mungu ma co tusu midria,

Adripi Joseph i

Krisimasi

Adripika azini Amvupika Leletu ‘diyi,

Krisimasi ni ovuzu Sabatusi eli ‘disi ri si, Ma ama asi mania sawa azi pezaru ‘dileni ‘ba ku amani O’dukoti erizu o’du ‘dasi. Aku kakau ovuki anzi nyiri ayikoni fu onzi afa ‘bani fee yini fetaruri pi ma ti nzizu Krisimasi ma o’butisi, ani eri mu ovu ewa ewa yini rizu ndi O’dukoti erizu kaniku fezu yini tezu sawa azi vuti vutiru nisi. 

Esu dere, Krisimasi si, ini ra, anzi nyiri ki, mi cani yini e’yo azi nduni lu ku. Yi, lu, eri sawa Krisimasini ri i yini. Ani yi cakini ta sokisi yini wereru ri ‘yizu oru ku, afa azi ni ta ovu ci. Eri a’bini, ata vini suru amaniri alea, yini sokisi ‘yizu oruri i, azini afa azi ‘diyiki. A’dusi, a ‘ye andra ra, mani nga ovuzu mvaasirisi, ani-ani tro eri ni ovuzu re tu engazu E’yo Sizavu ri le, erini ovuzu nizaru ‘ba kakauni rile. Esu, anzi nyiriki dale, yi eri anzi nyiri azi ‘diyiki ‘yo, “Muke, ma ovu ‘dibe Krisimasi ni. Ma ovu ‘dibe”. Anzi nyiri ndeki paso ara ‘daa, dilu angu nezu, inira. Mi i, mi cani fe yini vazu ku. Inira? Ani, lu, Krisimasi ni ‘dia oazu. Ee.

Azi niki vini ‘do ci lu lepi engapi drioru ani O’dukoti erizu i riki, yini ovuzu otita be ci ‘ba aku yinia ‘diyi pie ‘da ma vutia o’du ‘da ma aa risi. Ani ma ama di aku alu aluni sawa yini ama ‘yeke yi ma ngulupi pini ri pezu O’dukoti erizu beni. Ama nga mu O’dukoti nde avi engazu Lifeline pale na sawa ndundu alea o’du krisimasini si: Sawa na obutisi (9am) Sawa azia etusi (12pm) Sawa mudrini alu ondresi (5pm). Ka ecorasi mi omi mi sawa ‘diyi ma alu vusi erizu ku, te mi pe sawa mini azini aku mini rini muke ndeni ri i. Afa orodriru tu ndeni ri, AVIZURI EKPAZU ri i.

Eri eco e’da andrurura, o’buti ‘disi koti mani angiri ri suzu alitara ma dria ‘dia, te ma ta ayikosi tu koti mani ndrizaru kanisa ‘dini fe mani ‘di e’dazu. Ani andra Adripi Neville i oru ‘doa o’du azi ‘dasi, suti ini ndrizaru ri be, su andra i irini lu ndriza ngole yari, ani ma ega di, muke, ma-ma…e’da andra ndrizaru tu, azini ongulumu ki andra e’yo nze dri nia, ma ega di, “Ma nga mu ma koti su muzu alitara ma dria”. Ma lu…

Inira, Ma a’ira acakini zozu mbazu teketeke ku. Ama sawa driasi…Azini aleni ku zozu mbazu ‘dale. Te di ‘da i ria, Adripi Luther? Yo, Ale mani andra zozu mbazu ambo ‘dile ku. Alekilu sawa dria awi anzi nyiri ki.

Opi ma fe emini Sawa ava lizu gapi Eri ma indikindisi tre ‘dile ri.

Adri. Joseph Branham i

22-1204 Melekizedeki ‘Di A’di I?

Mesegi (O’dukoti): 65-0221E Melekizedeki ‘Di A’di I?

BranhamTabernacle.org

Egata Munguni Leletu ‘Diyi,

A’ba asi kini mi gonde Sabatu ‘dini. E’yo nzezu geri ama asi pini muzu vezu ama ma aa Eri ni o’yoria amabe gerikoasi aku amani pi alea kanisa pie ria…ETE NGALU!

Emba ajeri alea Eri lu andra amani ovuzu ndindi kini ama o’bo ‘yekeri alea…ani ama ‘dale. Eri lu andra amani kini Orifi Munguni adaru ri cani nga ovu karimvani jorovu be ku…’daa Eri ‘yo di, AMA ORIFI ‘DA I. ‘Daa di, ama eriki di ama bile si, Munguni e’yo nzeria agu azi vusi ani ecezu gboru ama dri, O’du ‘Disi, E’yo Siza ‘Di Ece Ima Paria’bo ama mileti gbaria ‘di.

Eri ‘yo amani Sabatu ‘da ma vutia risi kini ama Munguma Pari Pe Inzitaniri alia, ani a’disiku Amani ovuzu ‘daa risi, a’bakini nga alu KU E’yo Erini risi. Ani, ama Eri Ma Amuro Kililiru E’yoru ri i.

Sabatu ‘disi, Eri mu ama etra dria tualu dika ani e’yo nzezu trai Eri ma nabi malaikaru amboruri vusi ani ‘yozu ama dri, MA MELEKIZEDEKI ‘DI I, Ma ma ngulupi ece emi dri ruati ‘ba adani aasi, lu Mani ‘yo E’yo Mani alea Ma ta mu ‘ye rile.

DIZA! Mi ayikosi ya? Mi ovu tusucozaru aga e’yoni nzeri i ri ra ya? ‘Yeke, AZI ANGIRI TU EMUPI NI NGA KIRI CI. Eri mu a’diko amboru ‘di ma ti etra.

Mi ega ngalu ‘eyo drinia, AMA,  andra egata Munguni gbari pi alea engazu okokele si. Eli alifu su denga Yesu emuni nyakua kuria, eli alifu kakau denga mi emuni nyakua kuria, Yesu, Omi Munguniri alea, dra andra ezata amani ki si. AZINI VINI ‘DAA, AMA RU ovuki andra di sizaru Kabilomva Ma Buku Idriniri alia.

‘Dani ce firia omi miniri alia? Mungu ‘ba andra ama ruki okoru ani ‘badi andra yi Kabilomva Ma Buku Idriniri alia denga wudukuru gbari ma vuti ovuni ‘bazaru ku.  Eri ni andra ama mileki ra, geri amani ovuzu sizaru riki, afa dria ama ‘aduni yari pie. Ama andra Eri ma egata ma alia okokelesi….Mungu ma egata alia! Ani di, afa lu ci amani ovuzuri eri Mungu ma E’yo e’dazaru’bo ri i ri. Eri ni Eri egazu’bo ri ma vutia, Eri nze eri ra. ani ama di be ‘di.

Eri ewaewa vazu. Munguni amani afa ‘diki luria dria. Eri le ama tu kpere ani ledi andra ovu ndindi kini ama ma eriki Eri kpi engazu Eri ma Ngulupi vu, ani fe di andra Eri ma o’duko ma ovu ‘duzaru ci ani Sabatusi, ‘Ba Mudrini iri, 4, 2022 si, Eri ecota ani pale alu dika Amuro Ini ejizu tualu ra beni ani luzu ama dri: “Ma ‘ye ‘di dria lu emi ni.  Ma le ta emi eriki Eri kpi engazu Ma vu. ALE EMI TU. EMI MA AMURO I. MA EMURIA EMINI MBELERU AMBAMBA.”

‘Da di asisile amani nizu ra kini akaki emu Indikindi Munguni alea ‘dini, afa azi ama aani ni luria amani kini ama engaki angu azia, ani ama di dri goria vule ‘dale dika Okpo ama esepi ‘dasi.

Mungu ‘du di afa afa’da a’bupi dria ri ‘bo ani ama ecoki di Eri nera. Mungu i, zizaru, a’buzaru Aci Piriruri alea. Mungu i, zizaru, Agu omvele Yesu ri alea. Mungu i, zizaru, Kanisa Eri ni alea. Mungu ama dria oru, Mungu amabe, Mungu ama aa; geri Munguni I erizu eleri i.

Ama ovuki afa azi be orizaru tuaku. Afa azi orazu ani ni yo, ata dra ni. Akaki angu di ku’bo, ata ama ovukini drazaru ku. Jorovu nyakua di ka ovu anzuzaru’bo, ama ovuki azini be ci GONDE ama teria, Zizaru.

Aca di gbaria te ku Eri ni e’yo nzeria ama dri azini afa ‘diki eceria dria ama dri Sabatu ‘disi sawa azia etusi, Jeffersonvili saa si. Mi emu ruecizu ama be pari lu ci mini ecozu O’duko Munguniri ovupi e’dazaru’bori erizu luria mini tivu bivu Eri A’DI I YARI, ama A’DIKI YARI, azini ama muria ngwa yari.  MI EKPA AVIZURI.

Melekizedeki ‘Di A’di I?  65-0221E

Adri. Joseph Branham i

E’yo siza lazaru riki

E’doza Capta 18 zuri

Efuza 33:12-23

E’yo Ba Yohanani 1:1

Rumi 8:1

2 Koronito 5:1

2 Tesalonika 4:13-18

Timoteo Okori 3:16 / 6:15

Iburania 7:1-3 /13:8

E’yo Eceza 10:1-7 / 21:16

22-1127 Ru ‘Duzu Azini Ru Erezuri

BranhamTabernacle.org

Nabi Ma Kabilo Leletu ‘Diyi,

Mi egara, Ma lu ‘di ‘yo ongulumu mani rini. Ani amve olia ‘daa, ma lu ‘di ‘yo ‘ba ma vuti bipiri pi ma ngulupi ni. O’dukoti ‘di lu yini, azini afa mani mu ‘yo ‘diari.

Olu’ba cini, eri ‘ba ini ri pini, ee, ‘da eri ma kabilo oceriki, ma ‘ye afa ci ini leri i. ‘Da eri ma eselea Mungu be. Atalo cini, olu’ba cini, ‘da ini pi mi dria, ma adripi.

Ma lu e’yo nze ‘dia Jeffersonvilia, angu lu ci mani ta e’yo nzezura ri i, a’disikuni eri kabilo mani ri pini. Eri kabilo Orindi Alatararuri ni fe madri vazaru eri onezuri, azini Eri nga matia zita zi ani ra ri i. Ani ‘ba oa’diki engaki asi oja ‘dia engazu angu ‘disi ara, mani dri niki ecezu Kristo vu riki.

Okuu ‘dole wiki Awa’difofezani ri ngo i. Ma awa’difosi tu ovuzu esele kabilo wereru erini nga kiri oneri ki emi alu alu be. Angu azi ‘duni yo amani ta muzu ra ri.

Ata efe amani aji azi amboru ngapi ngangani Eri ma Amuro dri cezu. O’duko ‘bapi ma asi orupi azini E’yo Eri ma nabi ni enga nze’bori nzepi riki kakau, te O’DUKO ovupi ti epezaru Amuro Erini ma dri cezu azini etrazuri lu ALU.

E’yo Mungu ma nabini nze tepu ma dria riki ama Driaruri i.  Ama ovu vazaru onzi a’disikuni ama ‘yo ama a’iki E’YO DRIARI, te Mungu ma nabi fe andra amani azita ‘da ‘yezu ko’bo ‘dale.

Ani am ‘yo Ru Yesu Kristoni si: Mi o’bani afa azi aluni ku, mi ‘duku, kaniku egata miniki ‘bazu Eri dria, mi ‘yo lu afa ovupi ‘yozaru tepu pi ma dria ri i, mi ‘ye lu ko’bo afa Mungu Opi ni fe azitaru ‘yezaru ri i; mi o’bani Eri dria ku!

Mi engaa wudukuru. Sawa ‘di enyia ogogo. E’yo Mungu ma nabini andra nze riki, MUNGU FE AZITARU amadri; a’izu, ‘yozu azini ‘yezu, KO’BO erini andra ‘yo tepu pi dria rile. Ovuni afa mani ‘yo ri i ku, ovuni afa mi atolo kaniku olu’ba pini ‘yo ri i ku, te afa Mungu ma nabini ‘yo ‘bo TEPU MA DRIA RI I.

Afa azi orodriru cikani yo erizaru aga O’duko ‘Daa ovupi tepu ma dria ‘da ra, AFA AZI YO. Ama e’yoni mu ovu lizaru afa ovupi nzezaru TEPU PI MA DRIA riki si. Ovuni afa mani ‘yoriki ku, te afa ERINI ‘YORI.

Ma le ONYIRU NDENI ri i mi dri. E’yo mani were ‘diki lu emi asi embazu, lu ko’bo ocepi cini ni ‘ye rile, E’yo dria a’izu. Ma embani emi ku: afa ci mini eri tepu ma driani abazu, ‘yozu e’yo ‘yekeku riki tepu pi ma dria ci, ‘yozu le emi eriki ma trotro emini nabini erizu ri le. Ma e’yo wereru riki si emi oruzu OAZU E’YO ADARU OKO RIBE, MI EKPA AVIZURI.  Ma le mi ma ovu Amuro E’yoru alatararu, ondikokori i.

Mungu fe Ima o’duko ma ovu ‘duzaru o’du ‘disi ani afa idribe riki dria ecoki ta Eri ma O’duko erira beni. O’du Pauloni kisi, yi ovuki lu andra karani pie afa erini andra oluriki sizu vaa, ‘da Bibilia ni. Te ANDRU, Mungu le eri ma ovu ata ANGIRI AGA. Ama ecoki avizuri ekpazu ra ani ama ngulupi pi ma bile si Yesu Kristo engapi ‘bori erizu e’yo nzeria amabe tivu bivu.

O’du amani oazu alenia ‘do ngo i. Gbaria wudukuru ni di i awaria ama ageyisi ara ria, ama ovuki pari azi fezaru ni be ci amani muzu ani lu ava lizu ri i. Ama eri isu TEPU  ma dria. Rizaru anzu ama kurijo pini ri alea ani Ta Ovupi Tambazaru engapi ovupi ‘bazaru erojoa ri nyazu. Ama nabi eco ovu di muzaru sawa ezu ra, te ama kiri egara kini afa ‘diki ada, ani lu ko’bo Munguni fezaru amani azitaru yi ‘yezu ri le, MI OA TEPU PIE.

Mi emu ovuzu omu Awa’difofezani onyiru ndeni mini drio nyara ri be Sabatu ‘disi sawa azia etusi, Jeffersonvili saa si O’duko Munguniri ni O’dukoti: Ru ‘Duzu Azini Ru Erezuri 65-0221M ni nzeria ama dria.

Adri. Joseph Branham i

E’yo Ba Matayoni 5: 31-32 / 16: 18 / 19: 1-8 / 28:19

‘Yeta 2:38

Rumi 9:14-23

Timoteo Okori 2:9-15

Koronito Okori 7:10-15 /14:34

Iburania 11:4

E’yo Eceza 10:7

E’doza Capta 3 zuri

‘Ba Levini 21:7

Yobu 14:1-2

Isaya 53

Ezekieli 44:22

22-1113 O’du ‘Disi E’yo Siza ‘Di Ece Ima Paria’bo Ri

BranhamTabernacle.org

Mesegi (O’dukoti): 65-0219 O’du ‘Disi E’yo Siza ‘Di Ece Ima Paria’bo Ri

BranhamTabernacle.org

Oriefi Iburahimuni Opiru Orindisi Leleturi,

Kanisa mi ni ecozu muzu ra ani nizura ‘baza wereni kokoru kini E’yo dria mini eri ri eri ‘Di Opi ‘Yoni ri ngo i? Angu azia yo, pelu mi ka O’duko Munguniri e’yo nzeria midri tepu pi dria ria.

Ama aji Munguni riki ani acakini nga enza o’ba E’yo aluni ma dria ku. Aleki lu Mana o’diruri i inzita alualusi azini eri cani emu o’diru ndeni aga eri erizu kpi engazu Mungu ma Ngulupi vu ri ku. Ama nga oru azini oru dika amani O’dukoti alualu eri ria. Amani muria oru oruria, ama afa angirini ki ne. Mana ka ovu kanisa ‘di ma aa yo yani, aji Munguni riki eyi engaria were oru drile kpere yini Eri esuria.

Geri ama asi pini mbozu ayikosi amani Munguni eriria e’yo nzeria amani azini luria amani kini ama Eri ma Kanisa Munguni ovupi adaru, osizaru-o’diru, E’yo Munguni dria a’ipira afa dria ma drilea eri ka tro ovu a’duni ti yari riki ri, a’disikuni ama Eri ma Amuro E’yoru aliriaru ondikoko riki.

Ngiri ngiri azi ci ‘bapi ma eselea andrusi. Eri ni andra ovuzu o’du Yesuni ki si ri le, ‘ba ‘yo’ba kini yi a’ira iniani ‘da ki andra e’yo efi eceza afa ataloni ‘yo E’yo Siza ma driari vuri ‘du i. Yi andra ‘ba ada ma e’yo efi eceza E’yoni ri ‘du i. ‘Da asisile yini andra e’dezu te E’yo Ada Munguniri nezu ri i, a’disikuni e’yo efi eceza E’yo Munguni rini ‘ba adani ejini ri ki andra kakau. Mungu leni ‘ba azi ku Eri ma E’yo efi ecezu. Eri ‘ba Ima Ngulupi ma E’yo efi ecepi ri i.

Mi a’ira kini mi ka andra oa sawa Yesuni si, mi andra mu E’yo dria Erini ‘yori a’ira, atalo ka andra tro ‘yo ngoni yari ti ri ra? Mi eco andra ‘yo mi ataloni kini Yesuni erizuri eri afa orodriru tu mini eco ‘yera ri i ri ra? Mi eco andra ‘yo erini kini Yesu ma E’yo lekini e’yo efi eceza ku ri ra? Yi kaki andra oa tepu Yesuni e’yo oluzu ri pie ci, mi eco andra lu mi ataloni kini mi le ma ekpa avizuri ani mini ecozu afa Yesuni ‘yori erizu ko’bo azini geri Erini Eri ‘yozu ri ngoni yari ra?

Muke, ‘da ovuni andra ayi mini ri ku; ‘di ayi miniri, ‘di sawa mini ri. Bibilia ‘yo kini, Eri alurile aje, andru azini ‘dani ‘dani. Afa mini ‘ye azini ‘yo sawa ‘disi ri eri lu ko’bo afa mini andra mu ‘ye vule ‘dale ri i.

Ama a’iki kini Mvi Munguni (S-o-n) andra emupi engazu kala etuni efuria ani Ima ngulupi e’dapi Mungu ru ruati alea ri, eri Mvi Munguni (S-o-n) alualu kala etuni ‘deria Ima ngulupi e’dapi ama eselea ri i. Ama a’ikira o’du ‘disi E’yo Siza ‘di ece i ma paria ‘bo ama drilea.

Ma a’i ‘adaru ra kini ‘di eli ovupi aizaru ra ri i, eli yubilivu ri i. Mi ka le awi ati’boru ani O’dukoti ‘di a’izu ovuzu ‘Di Opi ‘Yoni ri ru ku; O’dukoti ‘di ka ovu mi E’yo Driariruri i ku yani; mi ka a’i kini le agu azi ma fe e’yo efi eceza O’dukoti ndevu ri ni; mi ka a’i kini eri onzi tepu ki avizu kanisa mini pi alea; Ece kini mi ‘du ‘di ‘bo azini ‘bule ovu’di luzaru mi bilea ayasi ‘bo, ani mi di nga opi ati’bo pini ‘da dri azi nga o’du mini kisi dria .

Te Kanisa Amuroni adaruri ni E’yo Munguni dria ri a’iria Eri ma tre ma alea azini Eri ma Okpo ma alea. Ama Kanisa Pezaru i esepi amve azini i ‘bapi kala engazu afa ‘da pivu si ri ki, azini e’data Munguniri ese asi amani riki ‘bo. Ama Oriefi Opiru Iburahimuni orindisi riki.

Ama awa’difo si mini ovuzu ‘dia aluza tiecita ‘diniri etumuzu ama be risi, ‘ba ovu pi asi ‘baza be kini Munguni mu amani afa azi fe tiecita ‘di ma aa ra ‘diyi.

Ani ama ni ai ruecizu amabe Sabatu ‘disi sawa azia etusi, Jeffersonvili saa si, amani 65-0219 O’du ‘Disi E’yo Siza ‘Di Ece Ima Paria’bo Ri eriria. Ama asi ‘baza angiri ni be afa Munguni ye tiecita ‘di pi ma aa ri ma dria. Diza ondreni Mvi ni ri eca ‘bo.

Adri. Joseph Branham i

E’yo Ba Yohanani Capta 16 zuri
Isaya 61:1-2
E’bo Ba Lukani 4:16

22-1106 Ori Ovuni Karimvani Orima Jorovu Be Ku

BranhamTabernacle.org

Amuro Aliria E’yoruriru Leleturi, 

Ama ‘di. Ama ecaki’bo. Sawa ‘di enyia ogogo. Jorovu oriniri co’di esele engazu ori vusi ‘bo. Ama enga ovu lazaru Indikindi Mvi niri alea, niria. Ama nga oa Indikindi ‘da ma aa kpere ama ongulumu wereruri ni ecazu nizaru Kristo dri, kpere amani ecaria mukatini Eri ma mesa tia.  Awania ma ovu Mungu vu! 

O’dukoti ‘di e’da Malaki 4 i, e’da Luka 17:30 i, eda Iburania 13:8 i, E’yo Ba Yohanani 14:12 i, e’da E’yo Eceza capta 10 zuri i, A’buza Aziriri pi ma ti nzita i, e’yo zizaru Munguni riki, ori orini ri i, ru’duzu azini ruerezu ri i azini e’yo zizaru azi engapi ovupi zizaru ediafe pi ma vutia ewu ‘dikisi dria ri ki. 

Ama aliriaki E’yo ni. Ama ecokiku azini cakini nga vini ku afa azi nduni elozu. O’dukoti alu alu amani eriri si, eri o’diru azini o’diru; Mana o’diru nga lu e’depi engazu ‘Bua ri i. 

Te le andra ama bile ra kini sawa asizanisi orindi iri yi nga ovu ejizaru ambamba, kpere ecota ‘ba opezaru riki olera, ka ta i ecora ria.  Ani, le di ama ma suki mile orindi ‘da nezu ra erini nga e’dazu Amuro ma ngulupile risi. 

Mi ne di, mi ne ovu ejizaru ngole yari. Matayo ‘yo kini, E’yo Ba Matayoni 24:24, ‘yo kini, “Orindi iri ndeki o’du asizu ‘diyisi,” orindi kanisani ‘ba kanisani pivu ri, azini Orindi Amuroni ‘Ba Amuroruri pivu ri, “yi nga ovu ejizaru ambamba, kpere ecota ‘Ba opezaru riki olera, ka ta i ecora ria”. ‘Da eri enyia ngole yari. 

‘Yo andra ORINDI ‘ba kanisaniri pini ri azini ORINDI ‘ba Amuroruri pini ri be nga ovu enyia ejizaru ambamba yi ma eselea. Le di ‘da ma efi ma ovu kini orindi ‘ba kanisaniri pini ri le ma ‘yo kini eyi a’i O’dukoti sawani ri ra ‘dini ani ecozu ovuzu ENYIA ‘DALE NDO.  

‘Da cani ta ovu Methodist ki, Baptisti ki, Presipiteria ki, kaniku ata Pentekoti ki ‘dini ku; yi ziritu engazu E’yovusi azini yi gaki vini ata O’dukoti nde si. Yi ma azi aluni yo ovupi orindi be enyia Amuro vuri le ri.  

Sitani o’bira, azini enga agaara, oleta ma ‘yeta si.  Ata engazu okokelesi, ‘yolu andra ewakoko kini, “Adaru,” ani luzu Evani ima omi ayuzu e’yo vasi azini le ma eri engazu i vu ani ovuni lu E’yo vu a’dule ku.  Afa andra azitaru ovupi fezaru eri dri ‘yezaruri andra alu: mi oa E’yo be.  

E’yo adaruriki: 

Mi ka ovu zita azi be ci, le omvita azi ma aa ci. ‘Da afa nabini andra ‘yo amani ri i. Le omvitani ma emu engazu E’yo vu. E’yo ni lu emu nabi vu.  nabi ni ‘ba lu E’yo efi ecepi ni ri i. Agu azi kaniku oku azi ka omvita azi fe yani, le ma ovu afa nabi ni ‘yo ‘bo ri i. Eri cani ovu yi ma e’yo efi ecezani, egatani kaniku e’yo vazani ku. Le mi ma fe erini atita E’yo ovupi nzezaru Mungu ma nabi ovupi e’dazarura ri vu risi. Ovuni e’yo nabi niri riki azini driania ‘dale ku, eri lu afa nabi ni ‘yo’bo ri i. 

Egataki kuluru iri.  

1: Le mi ma a’i E’yo dria tepu pi driari kini Eri O’dukoti orodriru ndeni le mi ma eri ra ri ki.  

2: Le ni mi ma a’i E’yo dria tepu pi dria riki ‘dini ku, azini azi ngaza sawa ‘disirini o’dukoti orodriru ndeni le mi ma eri ra riki ‘dini. 

Esele egata irizu ‘divu riki kakau kakau tu: Orindi Alatararuri nga ma dri ce kaniku ma ocepi ma dri ce luzu amani E’yoruri ngo i azini E’yoruku ri ngo i yari ni.  Aleki angiri tu aga afa andra lu Adripi Branham ni ‘yo tepu ma dria riki. Le mi ma ovu azi ngaza be ci E’yo ecezu kilili kaniku opiizu vazaru ani beni. Azi ngaza kokoru mi econi oa Amuro i ku. 

E’yo rueripiku riki tre ‘diyi ma drilea, te eri ecozaruku yi otizu dria olazaru. Te ojata azi kaniku erita-ako azi yo oko ‘dani. Eri lu, MI A’I E’YO MA DRIARI I. 

‘Ba O’dukoti sawa ma asizani ‘di a’ipiri ru, mi zi nga mi ngulupi zita ‘diki si:   

1: Mi a’i afa nabi ni ‘yo tepu pi driari ovuzu mi E’yo Driaruriru, kani mi a’i kini eri Orindi Alatararu mi ma aa kaniku mi ocepi ma aa ri i?  

2: Mi a’i kini azi ngaza geri towisi riki o’dukoti orodriru tu ndeni le Amuro ma eri ri ki ya, kani eri O’dukoti tepu ma dria riki? 

Mi ocepi i, olu’ba i, embapi i, ‘ba e’yo bari olupi ri i kaniku nabi ka lu mini kini tepu pi ma erita ki O’DUKOTI ORODRIRU TU NDENI le mi ma eri ra riki ‘dini ku, eri ‘ba azi ENZORUNI, AZINI ORINDI ANDRA NABI NI AMA BILE LIZU KINI ERI NGA EMU RA RI I. 

Eri ka ‘yo YI KI O’dukoti orodrirutu ndeni mi eco erira ri i, te ka kiri ga tepu ki avizu ima kanisaa si, AFA AZI ONZI CI. Eri ka adaru a’i kini tepu ma erita ki afa orodrirutu ndeni mi ni eco ‘yera ri i ‘dini, ece kini eri ta mu tepu ki avi OKO, ‘daa ‘di e’yo oluzu ndo ka ama i dri ovu cezaru ‘dale ria. 

E’yo azi ecezaru geri ewakokosi ni:   

Ma ka ta ‘yo mini, yi mvuza alaruri mvuzuri ni afa lu alu orodriru ndeni mi eco ‘ye alata mi idrini ra ri i, esu yi mvuza ovupi e’dazaru azini sizaru kini eri kililiruri lu alu ‘dini…te mi ka emu jo maniaa nyaka ondreni ri nyazu, a fe midri yi nde nizarura kini eri kililiru ‘da ku. Ma ‘di ‘yo mini, “mi eco yi ‘da mvu engazu aku miniaa ra te ma joaa, le mi ma mvu afa mani fe mini ri i.” 

Yi ‘da ka ovu AFA MUKE NDENI mani eco fe mi ni alata mi idriniri ni ra, mi ni nga idri fe pi ri i, ece kini afa oko mani mu fe mini mi ka efi aku mani aa ‘bori eri yi mvuza kililiru ‘da i.  

Ma onzi ya ‘yozu kini, “TEPU PI MA AVITA EMI KANISAA RI, eri afa muke ndeni mini eco ‘ye ‘ba mini pini ra ri i ri. Eri ‘Di Opi ‘Yoni i ri.”  

Kani, eyi onzi yini ‘yozu kini, “Eri onzi tepuki avizu kanisa pi alea, Adrpi Branham ‘yoni andra emi avi tepuki emi kanisaa ‘dini ri ku ye. Ama ‘yo ‘bapi ni tepu ki avizu aku yini pi alea, motoka emini pi alea, sawa driasi, TE kanisaa ria le ma eri ki MA I.” 

Orindi ngo ni mi dri ceni? Mi ‘yo kini, “afa ovupi ‘yozaru tepu pi ma dria ri ni ma E’yo Driaruriru ri i azini afa orodrirutu ma ni eco eri ra ri i”? Kani, mi ‘yo, “E’yo tepu vuri cani ku. Eri ovuni ma E’yo Driaruriru ri i ku azini ovuni afa orodriru ndeni erizu ri i ku, eri azi ngaza i”? 

Sawa ‘disi eri sawa Orini ri i kaniku sawa Amuroni ri i. Jorovu orini riki drazaru. Jorovu orini riki ‘wizaru. Sawa E’yo aliriaruri niri, nga elozaru ku. Eri aliria ni, mi egara, sawa E’yo aliriaruri niri. 

Mi emu Mana o’diru ngalu e’depi engazu ‘Buari erizu Sabatu ‘disi sawa azia etusi, Jeffersonvili saa si amani: 65-0218 Ori Ovuni Karimvani Orima Jorovu Be Ku ni erizu. 

Adri. Joseph Branham i 

22-1030 Agu Azi Apapi Engazu Indikindi Opini Ma Aari Siri I

BranhamTabernacle.org

Opi Ma Kabiloanzi Leletu ‘Diyi,

Ama asi ki o’du ‘di ma ava ta wiki alu alusi amani ecozu ama etrazu tualu engazu wudukuru si ara O’duko Munguniri erizu E’yo Idriniri nzeria amani ngole ya. Afa azi ndu apita fepi idri amanirini azini vico amaniri atipini yo pele O’duko Munguniri.

Mi ‘yo andra amani, Ata, kini amvu amboruri ma ori di emve, wazaru azini ori efi di sawa ‘disi gonde o’biza amboruri ni. Ori efi ni di sawa ‘disi elaria Indikindi Mvini ri aa azini wazaru Suru Munguniri dri.

Ama pa so, Ata, afa asi amaniri ni ni eri E’yo Adani risi; Mi O’duko tepu ma dria ri ni LU O’duko mupi ama, Mi Amuro i ‘bapi kililiru ri i.

Eri ewaewa ama dripika azini amvipika pini ama vazu onzi ambamba risi. Ama ai azini zi eyini apazuku engazu Eri ma Indikindia risi, te ama nzuki Eri ma Indikindia

Aniki ra kini agupi ovupi odu osuzabe Mini pe azini ‘ba kabilo Miniki onepi riki kakau, eyi leki O’dukoti ‘di tu asi yinisi dria, te Ata yi e’de te O’duko Mini tepu dria ovupi e’dazarura ri ‘bazu. Yi e’de te luzu yini kini ‘di O’dukoti agupi-alunini azini kini Mi pe andra agu nde Mi Amuro ma dri cezu ri.  Yi e’de te lulu yini kini O’duko Mini ri ni O’duko LU mupi Amuro Miniri etrapi azini ‘bapi kililiru ri i.

Le ma ma “Wu rua nia onzi ra.” Wuzu afa dria ma rua, azini ‘ba dria ovupi Tepu Mini ma avitasi kanisa yini ma aari ma rua onzi pi ama rua onzi.   Wuzu azi ngaza yini pi ma rua onzi, wuzu kansa yini pi ma rua onzi, wuzu nabi yini pi ma rua onzi, wuzu olu’ba yini pi ma rua onzi, wuzu atalo yini pi ma rua onzi. Le ma ma wu afa nde ma driari ma rua onzi ra! 

 ‘Yozu, ma emu vaa ruecizu emi pie. Inira, Ma a’ira ma nga mini afa mani mu ‘yeru lu ra. Ma ovu lu afa azi wereru ni be ‘doa ci mani a’ira Ma eco eri fe ma….ama ejizu dria tualu ri, azini ‘yezu ‘dini, ‘dani kaniku geri azi ‘dasiri.”

Le ma ma wu rua nia onzi ra, Mi E’yo, Mi nabini nzeni ri ni lu ecozu AMA ejizu TUALURI si ri ni.  

Yi ma e’yo oluta eco ngoni ngoni? Yi eri dria yi yima eseleaku azini yi afaki ne ndundu engazu yi ma alualu vusi, pelu afa aluni, yi dria ecikiti a’izu…. TEPU KI AVIZUKU KANISA YINI PI ALEA. ‘Da eco ovu ngoni ru ya, Ata?

Mi ‘yo andra amani ama ma ovuki DRIARIRU ALU BE, Mi E’yo i. Mi ‘yo andra amani Mi E’yo ni emu LU Mi nabi vu.  Mi ‘yo andra amani eri ‘ba LU ecopi E’yo Miniri ma efi ecepira ri i. Mi ‘yo andra amani kini olu’ba dria, ‘ba dria e’yo eripi eriri, ‘ba ada dria, ma ‘YOKI LU AFA ERINI ANDRA ‘YO’BORI I. Eri ma O’duko ni O’DUKO LU ovupi e’dazaru ra Mi Aci Pirirurisi ovuzu ‘Di Opi ‘Yoni Ri i.

Ma ‘yoria kini yi enzoru azini ma oluki e’yoku ‘dileri ku. Ma vini ‘yoria kini Opi ni yi be indiku ‘dileri ku, kaniku yi odu osuza koko ‘dile azini ovuki omvezaru e’yo oluzuku ‘dileri ku, te le ma ma wu yi ma rua onzi ra yi kaki lu ‘ba yini pini kini tepu ma erita ni afa orodriru tu ndeni yini eco ‘ye ra ri i ri ku ria.

Ndumba alu kaniku afa wereru ndeni aluri ojazuri dra ni. Mi fe geri Amuro mini ri dri ‘bo ‘Di Opi ‘Yoni ri erizu bile yi ma ngulupi niri kisi. Yi eco di olu ‘ba yiniri pini ku ngoniru kini Eri O’dukoti orodrirutu nde yini eco erira ri i ri? Eri O’dukoti lu mani ecozu AMENA ‘yozu ra E’yo driani ri i, erini ovuzu ‘ba ada ma E’yoni ku risi, kaniku ‘ba ada ma e’yo efi eceza E’yo Miniri niri i ku risi, eri E’yo Mini Kililiru ri i.

Mi ‘yo andra kini O’dukotiki ‘ba o’dukoti ojipiri be alu. Mi nabu nze andra Eri ra azini Mi nga ta fe Eri ma eca pari ini ma aa ra ‘dini. E’yo Mini ovupi nzezaru nabi Mini vusi ri le ni e’yo efi ecaza KU erini ovuzu Mvi ‘Bani i e’yo nzeria kpi Amuro Erini ni ri i risi. 

Le ma ma maa ‘baki ra, emi emuki ro ale emini oko ri vu. Emi emuki afa emini ni eri ‘DI OPI ‘YONI ri vu. Mi ka enga osu geri mini muzuri ngoleru yari si kaniku a’du ‘yezu yari si, mi ne, mi efi ama be o’bo aa ondre ‘disi. Ama muria andra Ninevea, wurua yi rua. Ama ovuki azi le angakira ri be Mungu ma drilea, ‘da O’dukoti tepu ma dria ‘di’i.

Ama a’ikira kini emuta Opini ri enyia, azini Eri mu ovu Amuro azi be ci, ani ama di ecaria ngonde. Alekini afa azi ku pe lu E’yo Munguni Kililiru Eri ma nabini nze’bo ri i. Ama muria ‘Dizaa, me emu efizu o’bo amani alea.

Mi ka a’ira O’dukoti ‘di ni E’yo Adaru, drifupi ra oazu erini, drifupi ra drazu erini ri i, mi emu ruecizu amabe Sabatu ‘disi sawa azia etusi, Jeffersonvili saa si, amani O’dukoti azi amani a’ira eri orodriru azini le ama ma eriki mbeleru ni erizu: Agu Azi Apapi Engazu Indikindi Opini Ma Aari Siri I  65-0217.

Emi Kabiloanzi mani ki. Eri ngoniru ya? Emi Opi ma Kabiloanzi Erini fe mani nyaka fezu yini riki.

Adri. Joseph Branham i.

E’yo siza lazaru riki

Yona 1:1-3

Malaki 4

E’yo Ba Yohanani 14:12

Luka 17:30