‘Ba Aruru Leletu ‘Diyi,

Idri mini oa sawa ‘disiri ni nga idri mini ta oa alenia mi ka ta ovu o’du Noani kisi kaniku Musa kisiri e’da, adisikuni mi ovu orindi aluri be mi aa.  Orindi alu mi aa sawa ‘disiri ni andra ‘ba ‘da pima aa.

Mi ka andra oa o’du Noani kisi, kala andra mini mu pe ri ni andra ovu ngo’i? Mi andra mu fi o’bo aa Noa be a’iria ra kini eri andra ‘ba Munguni ‘baa maburu sizu azini ‘ba pima dricezu ri’i, kani mi ta mu ‘yo, “Ma eco vini maburu si indi ra. Ma vini ‘ba o’boti ojipi azini o’bo sipi onyiruni ‘i” dini ya?

Te mi ka andra oa o’du Musaniki si ria? Mi andra mu oa Musa be azini a’ira kini eri andra ‘ba Munguni pe ‘ba pima dricezu ri’i, kani mi ta mu mu Datani be azini Kora be yini andra ‘yoria, “Ama vini alatararu indi, ama ovu vini afa azi be ‘yozaru ci. Mungu pe drai ama indi.”?

Le ama alu alu ma peki, o’du ‘disi, dra pima eselea idri be.

Ma asini mi ‘yo mi kala ngo ma driari si ku. Afa mini ‘ye, o’du driari, ni e’da mi a’duni yari ni. Ama Avizuri Ekpa O’DU DRIASI.

Mi E’yo ma aa o’du driasi ya? Mi e’yo zi, Opi ma Ale kililiruri nda afa dria mini ‘yeri pi alia ra ya? Mi avizuri ekparia azini O’duko Munguni e’dazaru eriria o’du dria ya? Mi a’i eri driadriariru orodri Avizuri Ekpazu ya? Mi a’ira kini O’duko tepu pi ma dria da O’duko Munguniri andruniri’i ri ra ya?

Amaniria, omvitani ri EE. Ama luria wudrikuru dri kini ama Aruki E’yo Munguniri ni, Eri ma O’dukoti ni, Mungu ma O’duko ovupi ecezaru ra o’du amaniri ni ri. Ee, ama a’iki asi amani driarisi Avizuri Ekpazuri alia.  Ee, ama a’iki kini ‘ba o’dukoti ojipi ayi kanisan 7zuri niri ni omvezaru Amuro ma dri cezu. Ee, O’duko tepu pi ma dria ‘da ni O’duko orodriru ndeni erizaru ri’i.

Ale Munguni, Eri ma O’duko, O’dukoti ‘di i, osutaru ambamba, E’yo Eceza azi ‘dileri ama dri, ani ama ecoki ru edazuku Erivu risi. Ama ecaki Aruni Eri dri ‘bo.

Ama oziki afa dria nduniki ‘bo. ‘Ba azi nduni tro ‘yo ngoni yari ti, ama ovuki bizaru Eri dri ‘bo. Afa azi ci Eri dria ani ama ecoki lu ama eda Erivu risi ku. Eri ayiko idri amaniri pini ri’i. Ama econi ku oazu Erikokoru.

Ama ayikosi tu, awa’difosi tu, ofusi tu ovuzu Aruki Opi dri azini Eri ma O’dukoti dri; a’disiku yi afa alu aluri ki. Eri Idri ma drilea amaniria. O’du alu alusi eri eca mgbori agara azini adadaru agara kini Ama Eri Amuro’i ri. Ama eri ma Ale kililiruri alia. Ama ecoki E’yo nze ra, a’disiku ama E’yo ovupi ‘bazaru ruati aliari’i.

Ama ovuni icizaruku afa azi cini be te Kristo’i azini Eri ma O’dukoti sawani ri’i; ata ama ati’i, ama andri’i, ama adripi’i, ama amvi’i, ama agupi’i, ama oku’i, ‘ba cini’i ku. Ama lu icizaru Kristo be, azini Eri be a’dule. Ama icizaru azini o’izaru O’dukoti ‘di vu, O’duko ‘divu, a’disiku eri Mungu ma Geri fe o’du ‘dini ri’i, AZINI GERI AZI NDUNI YO.

Ama dika di aruki ama oaza ekpereruri pi vu ku, e’yo amani le ‘yeri pivu ku. Ama owiki ama ngulupi ki driadria azini ovuki o’izaru Eri dri ‘bo. Wudrikuru asipiri ka tro ega ngoni yari ti, wudrikuru asipiri katro a’du ‘ye, ama o’izaru baka aleniri kisi Eri vu azini Eri ma O’duko vu.

Ama awa’difosi ovuzu Aruki. Mi lu mani, Ata, a’du ‘yezu sekondi alu alu minati alu alu o’du alu aluniri vusi. Mi O’duko ma fe ama dri azita afa dria amani ‘ye, amani ‘yo, azini geri amani ‘yezurisi ri ni. Aleki ni afa azi nduni ku te Mi’i.

Mi emu ovuzu bizaru ama be E’yo Munguni vu azini Eri ma O’duko vu Sabatu ‘disi sawa azia Etusi (12PM) Jeffersonvili saa si (Saa Alu Ugandaa), amani ‘ba eca geri ngosi: ARU AZI 63-0717 yari eriria.

Adri. Joseph Branham i

E’yo siza lazaru riki

Filemoni 1:1

PS: Adripi Branham, ALEKI geri mini Filemoni ri omvezuri tu, eri KILILIRU Amuro dri.