Nabi Mungu Ma ‘Ba Pini Leleturi,

Emi eri, Ma ovu afa azi be luzaru emini ci. Eri onyiru tu, eri lu veria asi mani alia saa ‘disi. Ma ‘ba asi kini emi avikini nga eri ku, enera. Ma ‘yo ‘di i, indikindi Erini alia. ‘Yeta anzutiru Erini risi, Eri fe vini mani ma ‘baki nezu, ovuni nga re ‘dale, bongo enveru pi alia.
    

Engazu Miri kala Etuni efuria kpere Etuni ‘deria, surusi dria, ama ama traria tualu. Ama esele coza sawasi ri re, te ama tualu ‘ba Mungu ma nabini ri piri. Ama SITA ALUNI.

Mungu ma nabini andra ovuria nyaku dria ‘dia ria, afa amboru, azini angu lu Amuroni andra lezu ovuzu ri, eri andra ovuzu ecizaru tualu e’ita fonisi ri vu, tezu o’duko ‘dani ‘yozu, “O’biti Onyiruni Agyipi La.”

Yi ta le tu rizu ongulumu ‘da ma eselia eje nzila Eighth and Penn niria ngole ya. Yi ta ayikosi oa ini ra pari ‘bani mutukari ‘bazuria lu ecozu kome isuzu beni, kaniku ecozu pasozu ri atizu abirua sawa pipi kakau. Yi ta afa dria yini ovuzu yi be ‘diyi ozira, kaniku azi yini ki avi ra, kata ecora ria lu ovuzu inzita ‘da pi ma aluni alia.

Yi ma idri driari andra ‘izaru E’yo dria nabini nzeri ma dria. Yi lekini andra afa azi eceku. Yi ni andra tro nizura kini o’du alu yi nga eri esu tepu dria ra ria, yi le andra ovu tualu Amuro be sawa dria Munguni e’yo nzezu tile ‘ba adanirisi ria.

‘Di andra yi ma idrini. ‘Di andra afa yini te wiki alu alusi ri’i. Afa azi andra asipi yini ni yo te lu O’dukoti emupiri erizu ri’i. Yi andra ayikosi tu yini nizu ra kini, SAWA ‘DISI, yi ovuki andra drileba be ci yi ma ngulupini, dria sawa aluri ali, E’yo vu E’yo vu, afa Mungu ma nabi malaika azirizuri ni ‘yo erizu.

Mungu ovu geri feri be ci.  Eri le andra Ima Amuro ma ovu ecizaru Eri ma O’duko ageyia. Eri le andra Ima Amuro ma eri Ima O’duko dria sawa aluri alia. Eri ni andra ra kini Ima O’duko nzi Ima malaika ‘ba o’dukoti ojipiri ruri vusi ri lu O’duko ta Eri ma Amuro ecipi tulau ri’i. 

Eri ma otita amboruri ni andra pari ‘duria.

Ocepi engazu United states si arari ki andra ‘ba ndindi yi ma kanisa ma ovuki e’izaru foni si. Yi vaki andra E’yo neza nde ra kini AFA AZI YO andra orodriru ndeni aga O’duko ‘Da erizuri.

‘Di afa andra yini emba yi ma ongulumu pini ri’i. “Mungu epe nabi azi te ra ‘Di Opi ‘Yoni be. Eri enga ovu ecezaru Aci Piriruri si. ‘Di O’duko Munguniri’i emi ni. ‘Di Malaki 4 i, azini E’yo Eceza 10:7 i. ‘Di agu Munguni omve Ima Amuro dri cezuri i. ‘Di nabi mani e’yo nzezu emini drinia ri i. Sawa ‘disi le ama ma eriki dria eri’i. Kile Yohana okurile, le ma ma eri ma azini Eri ma ovu otuzaru.

Mungu ma otita ni nga kiri pari ‘duria. Amuroni nga KIRI ruetraria Eri ma O’duko ageyia. Te sawa ‘disi ama ama eciria tuala ENGAZU WUDRIKURURISI ARA. Sabatu alu alusi, esele azi Eri ma Amuroni ni teria asi ‘baza amboruni si E’yo dria erizu, dria sawa aluri alia.

Ama ecoki ‘do O’dukoti nde eri pale turu turu oko’bo, te sawa ‘dini ama kile PAALE OKORI i le. Aniki ra ama nga mu E’yo Eceza azi AMBORUNI isu aga nga driori ra.

Pari azi nduni amani lezu oazu ni yo. Afa azi orodriru agara ni yo. Amani ria, ‘Di be ‘Da’i. ‘Di Mungu ma otita AMANI ri i. O’duko ‘dini Eri ma Amuro omve, eci azini ‘ba kililiru…AMA AMURO ‘DA I.

Ma emi ai ruecizu amabe Sabatu ‘disi sawa azia etusi (12pm), Jeffersonivili saa si (7pm Ugandaa), amani ama eciria azini O’duko Mungniri ERIRIA Erini amani: A’buza Aziazuri 63-0323 eceria.   

Adri. Joseph Branham i

E’yo Siza lazarᴜ de nga O’dukoti nde ovu erizaruku ki:

Efuza 10:21-23
Isaya 13:6-11
Danieli 12:1-3
Matayo 24:1-30
Matayo 27:45
E’yo Ba Yohanani 10:27
E’yo Eceza 6
E’yo Eceza 6:9-11 / 11:7-8 / 22:8-9