Amuro Kristoni Leleturi,

Le Kalivari ma e’yo ma ovu egazaru o’du dria. Azini ama engaki e’yo eri eri ma angiri tu, e’yo la eri ma dria angiri tu. Olu’ba engaki e’yo olu eri dria, engazu sawa ma e’dota si. ‘Ba ongo ngopi ‘diyi ngoki ongo eri dria, ayi pi aliasi zu. Nabi ondriki andra eri ra, eli alifu dere eri ‘yeni nga i ku. Azini nabi o’du ‘disiri ki angu e’da vule sawa andra erini i ‘yezuri vu. Eri o’du azi orodrirutu ‘dile ni! Eri o’du azi inzitaru ndeni o’du dria pi ma eselea Munguni drio fe ma owi nyaku ma driari ma azi.

Okuta azi onyiru engazu wudrikurusi ara Amuro ni muzu ovuzu eri be wiki deza Engataniri si ri ngo i. Ama nga jotile amani ki opi azini wudrikuru amveri anyu te. Foniki afa azi ‘diyi pie anyuzu te ani amakini ovu dri ezazaru ku, ani e’yo nzezu Eri be etuzu o’du dria. Ama nga o’duko amaniki enga Eri vu geri alusi, omi alu alea azini ‘yeza alu alea, Eri epizu, Eri inzizu, luzu eri dri aleki eri tu ngole yari.

Ama nga Eri ma O’duko eri e’yo nzeria ama asi pi dri amani ama idriki owiria o’di Eri vu. Afa azi mu ovu orodriru ndeni amani ku amani ama ngulupiki oturia Eri ma Emuta emupi mbeleru ‘dini. Amuro ni Ima ngulupi ‘ba ngonde kile nga driori le ku.

Ma le ta amani dria ama ecizu otita andraleru ‘diyi pini:

O’DU SU

Eri andra O’du Su ma inisi Opi Yesuni ovuzu Ondreta Asizuri be Ima ‘ba imbale ‘diyi beri, Agaza-‘ba-drilesi de nga anzi Israelini efukiku ri ma e’yo egazu. Drileba amani ovuzu eri be tiecizu Opi be aku amanipi aliari ngo’i, ama wiki-ma-deta alaruri ma drilea, azini Eri zizu ama truzu ama izataki si, azini afa dria amani le aci amaniri niri ki fezu.

Mi fe ma ‘ye’i fo, Opi. Mi ati ‘ba azoruriki. Mi omi ‘ba andezarᴜri pi ma asi fo. Mi fe ayiko ‘ba ovupi ecandizaru ‘diyi dri. Mi fe asianzuru ‘ba andezarᴜ ‘diyi dri, nyaka ‘ba abirisi ‘diyi dri, afa mvuza ‘ba yi viconi va ‘diyi dri, ayiko ‘ba canidiru ‘diyi dri, okpo kanisa dri. Opi, mi eji Yesuni ama eselea ondre ‘disi, amani ama oturia omuopini Eri ma ruati nyozaruri ecepiri ‘duzu. Ama zi, Opi, Erini drifuzu ama be geri azi nduru ‘dileni si…

Mi fe asindriza azi ‘diyini, Opi, wudrikurusi ara, ayikosi emuta Opini ri tepi riki, tala ‘baka be otruzaru, azini pari acikaniri pie dria trizaru, ani Diza E’yo bariniri diria angu iniciciri pi alia.

Ama ma e’doki sawa mudrini iri (6pm) sawa mivu akua ‘dale risi Omuopini 62-0204 ni erizu, ani ‘daa nabi ni di nga ama ji ama Inzita nduru Omuopini Pa Ojitaberi ma alia, mupi ovupi avizaru Lifeline appua (Mundutisi) ri, kaniku mi eco eri enze mi fonia ra Mundutisi kaniku ti azi ‘diyiki si geri ti andreleru ‘di mizuri si.

O’dukoti nde vutia, ama nga ama tra aku amani pie ama akupi alia ani Ondreta Opiniri ‘duzu.

O’DU TOWI

Ama ma muki aku amani pie ziza alia sawa Na O’bitisi (9am), ‘daa azini dika sawa Aziasi (12pm), Opi ni a’izu tezu amabe azini ama akuki efizu Orindi Alatararurisi amani ama ngulupiki owiria Eri vu.

Ama omi ma goki dri vule o’du Kalivaria ‘da vu, eli 2000 ma drilea vule ‘dale, ani ama ‘Ba ‘ba papiri nezu izaru patialaza sia, ani di ama ngulupiki vini owizu sawa dria afa Ata ni ayiko fepiri ‘yezu:

Azini o’du ‘di’i, ovuzu orodrirutu risi, o’du amboruti ‘diyi ma azi, ama ma neki afa ndundu na o’du ‘da ma efi amani a’duni yari ecepiri. Ama ecoki ta turuniki ‘du ra. Te, o’buti ‘disi, ma pe afa ndundu na, orodriru amani le mu ne riki, sawa were emupi ‘di ma aa, Kalivari ma efi amani a’duni yari. Azini ma zi kini ma ma to eza’ba dria ovupi ‘dia indi riki;  eri nga fe ‘ba dria alatararu ‘diyini mu dria kumu ‘yini ma dria; ngapi fepi ‘ba azoru driari pini a’ita yini engazu Mungu vu, ani muzu ‘di, atizaru; eza’ba dria, pazaru; ‘ba nzopi vuleri ni dri egozu vule, azini ovuzu drinzasi ima ngulupisi; azini ‘ba alatararu ‘diyi dria, ayiko zuzu, azini pa soza o’di ‘duzu azini asi’baza o’di be.

‘Daa di sawa Azia alibe (12:30pm), ama ma eciki ama tualu aku amani pi alia, O’du Kalivari Dria ‘Da’i 60-0925 ni erizu.

Ama ma rueciki ama ziza alia sawa Oromi etualasi (3pm) Opi ma dita patialaza ruari ma e’yo egazu.

O’DU AZIA

Ama ma eciki ama tualu paale alu dika ziza alia sawa Na obutisi (9AM), azini Sawa azia etusi (12PM), ani ama asi ki otuzu afa amboru Erini mu ‘ye ama esekelea ri ni.

Ma eco Eri erira ‘yozu, “Mi emu ‘doa, Sitani!” Eri di sawa ‘disi Ambo’i. Eju dri ra, pa fungua drani azini pari ‘ba drazaniri engazu eri ma ejeasi, ‘yi eri Ima Ngulupi ma ejea.  “Ma le mi ni e’yo aziza ‘di fe. Mi enga ‘baki eci enzosi ezuru ca’bo. Ma Mvi Mungu idriruri ni aliriani-tile niri’i Ari mani ri nga kiri ebiru musalaba sia, ani mari nde ovu di ofezaru dria ‘bo! Mi ovuni di driwala azi be dika ku. Mi ovu otruzaru ‘bo. Mi fe Ma dri fungua ‘daki!”

‘Daa di sawa Azia alibe (12:30Pm), ama nga emu tualu E’YO: Sata 57-0420 ni eri zu.

O’DU AMBORU NUKUTA EKASI nga pi mupi ovupi Eri ma Amuroni wudrikurusi ara ri ni nga mu ovu ngo’i ya.

Ama ma etraki ‘daa ama dika tualu ziza alia sawa Oromi etu alasi (3Pm).

SABATU

Ama ma egaki okoria drio drio ko’bo Adripi Branham ni andra ‘ye o’buti eri ma agyi wereru, robini, ni andra eri engazu sawa Mudrini Alu angu sarasi (5AM) rile. Ama ma feki lu Opi ni awa’difo Yesu ni engazu engazu drata ma aa risi:

Sawa Mudrini Alu o’biti ‘disi, ma agyi wereru agati be ekaruri engata derisa mania ani enga di ma o’duarisi.  E’data ko’bo eri ma asi wereruri ni mu ahwete ri le, ‘yoria “Enga ‘bo.”

Sawa Na O’bitisi (9AM) azini Azi etusi (12pm), ama eciki ama paale alu dika ruecita zizani ria, e’yo zizu amani ama eselia azini ama ngulupi ki oturia O’duko Munguniri erizu.

Sawa Azia alibe (12:30PM) ama nga emu tualu O’dukoti Engataniri erizu: Engata Ma A’buza Adaruri’i 61-0402.

Sawa Oromi etusi (3pm), ama eciki ama dika ziza alia, awa’difo fezu Eri dri WIKI MA DETA ONYIRU ERI NI FE AMANI ERI BE AZINI ERI MA AMURO WUDRIKURUSI ARA RI BE RI SI.

Ma adripika azini amvupika miri ma kalaa ‘daleruri pini, ko’bo eli ajerisi rile, Ma le emi ai ruecizu ama be e’yo pari ‘dupi ‘diki si Jeffersonvili saa si, otita zizani ri pini dria ko’bo otile’bo rile azini tepu avita Sabatu ma etu alasiri ni. Te ma amara, kini tepu ki avizu O’du Susi, Towisi azini Azia ma etu alasi Jeffersonvili saa si ri ni mu ovu ewaru emi azi ‘diyi pini, ani kirikiri mi ama mi drilegbo be O’dukoti ‘daki avizu saa ci o’duni mini ‘yekeri ma aa.  Ma leta, te, amani dria ruecizu tualu Sabatusi sawa azia alibe (12:30pm), Jeffersonvili saa si, O’dukoti amani Sabatusi ri erizu tualu.

Ma leta vini mi ai azini anzi emini pie ovuzu esele e’yo ‘yeza karatasi dria azini embata Creations vuri ru, azini zita wereru YF ni ri pie, aku eminiri ni ta eco ale ayikosi dria ra ‘dile ri i.  Amani egasi emi mu yi le ra yi ni ovuzu engazu dria E’YO amani mu eri wiki di ma detasi ri ki si risi.

Otita wiki ma detani rini, e’yo onizaru otuta inzita Omuopiniri niri pie, afa ovupi lezaru azi ngaza Creations niri pie, Zita wereru Engata ma driari pie, azini afa azi onizaru ri pie, mi ma ne geri ti intanetini eleleru ‘di i.

Ama ma anyuki ama simu ki dria te Wiki deza Engataniri ni pelu edaki ‘duzu, Esele Elaza O’duniri, azini tepuki avizu engazu Table appua, Lifeline appua kaniku geri ti ‘yini ecozu ovuzu enjezaru rari siri mizu.

Eri inzita azi amboru ‘dileni emi aizu aku emini pie emuzu tualu Amuro wudrikurusi ara ri be wiki ma deta tre INZITA SI, RU EKUTA PIE AZINI ATITA PIE ri vu. Ma a’ira eri adaru wiki deza ngapi mupi idri miniri ojapi drilealuru ri i.

Adripi Joseph Branham i