22-0710 ‘Ba A’i’baru Esele Na Riki

BranhamTabernacle.org

‘Ba A’ipira Leleturi,

Mi ega nga lu e’yo drinia, Mungu, afa dria o’bapi azini ‘bapi ma ovuki otizaru ‘yekeri, emu andra vaa azini ovu andra e’dezaru ruati alia ama eselia, ama onzezu. ‘Daa di Eri ovudi inzita be amani too Eri ma Indikindi inzitarurisi, ani Eri ni Pa sozu ‘dia nyaku ezataru ‘di ma dria o’du asizu ‘diyi ma alia, ani Ima E’yo e’dazu ovuzu ada, a’disikuni le’ira ecekokoru Erini pasozu E’yo ‘da ma ngukua.  

Orindi Alatararuri ‘ba E’yo ‘da idriru amani ‘bo. Ece di idri be ‘bo. A’itasi ama eri ne. Anikira eri ada a’disikuni E’yo ‘yo eri ‘dale, azini Orindini E’yo ‘da ‘ba idriru ama dri. Sawa ‘disi ama ovu ejizaru tualu E’yo Muguni ovupi e’dazaru ruatisi ri vusi, lu ko’bo nabi ni andra ‘yo Eri mu ovu ri le.   

‘Ba a’ipirari a’i Eri ra, a’i (a’duni?) E’yo’i. Ovuni a’izani ku; E’yo’i! Ovuni dini ni ku; E’yo’i! Ovuni afa azi ‘ba azini ni ‘yo ri i ku; afa E’yo ni ‘yo ri i! Sawa ‘disi, mi ega di ra, ‘da ‘ba a’ipira ri i. ‘Ba a’ipirari vu zita yo. ‘Ba a’ipirari cani ‘yo, “Eri eco ovu ngoniru?Eri ma efi ka ta ovu ecezaru mani ra dini!” ‘dale ku. ‘Da ‘ba a’ipiku ri. Uh-huh. Eri ‘ba a’ipira ri’i, erini, Eri ka tro ovu ngole ti, “Eri ka ovu E’yo i, Eri E’yo i! ‘Da ada.” ‘Da ‘ba a’ipirari i.   

Le mi ma a’i e’yo dria e’dapi azi koko indi, azini afa dria ovupi ‘yozaru ‘Daa ri i. Le ma ovu ada. Mi ka ‘yo “Ma a’i ‘da ku. Azi riki Munguni, azi riki ‘ba adani, azi riki lu a’diko dorini riki” dini. Muke, ece kini mi ‘ba a’ipiku ri i. ‘Ba a’ipirari vu zita yo. ‘Ba a’ipirari ni Eri a’ira, ka tro eku ngole tii kaniku ‘ba azi ka tro ovu e’yo be nzezau drinia ngoniari, Eri e’da ewakku ewaku Erini ovuzu ‘yezaru ngoni ‘yari ti, AMA A’IKI ERI RA!

‘Ba dria ‘dia indi ri, ‘ba dria ‘di eripi tepua si ri; azini ata o’du azisi ma ka nga wudukuru ‘di kura ya ani, tepu ‘diki nga oa dri le. ‘Da ada. Enera? Ani mi kilasi ‘da pi ma aluni ma alia. Le mi ma ovu eyi ma aluni ma aa.

Ama oaria o’du asizu ‘diyi ma alia ani le mi ma ne nga idri mini ri ani nezu kilasi ‘ba pini mini aazu alenia ri ngo’i yari beni. Mi di ‘yo kini, “Ma a’ira Mungu epe andra nabi azi andra Aci Piriru ri ni e’dani ‘dileri ma ti ra” ‘dini? ‘Yo andra amani kini ama ma a’iki E’yo ma driari. Afa KO’BO ovupi tepu pima dria ri ‘yozu i azini E’yo aluni ojazu ku. Ama ma e’yoni nga ovu lizaru afa ERINI ‘YO risi, ovuni afa azi ‘ba azi ni ‘yo kini ‘yo andra ‘daleri si ku, kaniku afa azi ‘ba azini ‘yo kini eri ni andra ‘yori ma efi ‘dini risi ku, te afa ‘yozaru tepu pima dria risi.  

Kaniku, mi di mu mu tualu Kora azini Datani pie, azini yi ‘yopi kini, “Eri ovuni ‘ba lu alatararu ri a’dule ku. ‘Ba aziri ovuki vini omvezaru ra afa erini andra ‘ye ‘diki ‘yezu. Mi e’yo epi ambamba Mungu ma nabi ma dria. Orindi Alatararuri ni ama dri ceria sawa ‘disi ni. ‘Di di ayi nduni’i” ri pie.  

Mi kilasi ‘da pi ma aluni ma alia. Mi ma oaza sawa vaa ‘disi ri alia, sawa mi omi ni vaa di alia, emi ‘dia ma eripi e’dapi ci ‘di pini, azini emi ngapi ovupi ‘ba tepu ‘di eripi e’dapi ‘dia ku ri pie, mi pasoza omini tepu ‘di erizu de ‘bori ma vutia ri ni nga ece mi dri kilasi mini ovuzuri ngo’i yari ni. Eri lu mini kpi mi ‘di ngua yari, mi ‘di a’i’ba E’yo ni ri i ya ani mi mu oa Eri be mi ka tro ta fu amve, kaniku tepu ‘da ma ti opici ri i rini.

Ru Opini ri ma ovu inzizaru, ama ‘BA A’IPIRA adaru ri ki, ovuni ‘ba azi ‘ba azi nduni pini omiomi ri ki ku; ovuni afa azi nduni si ku, te Orindi Alatararu ece amani E’yo ma Ngulupi ni ni. Ama E’yo i neria ovuria ‘bazaru gboru, ecezaru azini ‘bazaru e’dazaru ci.

Ama ovu ‘bazaru o’bita pi alia obeta pivu si, njila elifura ru pie, etu driza enzamatarani ri pie, te asi feza alu ama asini ri afa E’yoni ‘da gba lu i. Ama sawa ‘disi ngonde fizu afa ‘ba sipi ri alia. Ama Mungu ma anzi ki, ovupi e’dazaru kililiru Eri ma E’yo si riki. Ama eceta idriru riki, azini E’yo Munguni ri ni oaria ama aliasi. Obeta ki emi ama oyazu, ama ‘bazu ele vutia ‘dale, nezu ama nga paso ngua yari. Te acakini mu ovu yazaru ku, ama pa so E’yo dria ma dria. 

Mi eri nga Erini luria ama dri ama a’di’ki yari.

Mi ma ega lu ra kini esele mini dria riki andra ‘dia, sawa Munguni wudukuru ofuzu e’yo nzezasi risi. ‘Ba andra mi ruati vaa ‘dia ‘dasi. Azini afa azi ecopi eri ndupi te ni yo pelu Mungu i.

Afa azi ecopi Eri ndupi mivusi te ni yo. ‘Ba azi cani pari mini ri ‘du ku mi ka tro ovu wereru ngole yari ti. Mi ‘yo, “Ma lu oku akuani.” ‘Ba azi cani pari mini ‘du ku! Mungu i, eri ma kari amboru ri alia, oti Ruati Kristoni ri kililiru ‘bo. Kpere afa azi yo capi pari mini ri ‘dupi ra ri i.

Diza…Haleluya…Mungu ma Nyaka tambazaru ciri erizu ri ni ‘di ecaria angiri azini ANGIRI TU. Akaki Munguni eri e’yo nzeria Eri ma ‘ba o’dukoti ojipi pele’bo ri vusu dika dika luria ama dri ama a’diki yari ‘dini, A’ita amani riki eca angiri angiri tu. Ayiko adaru nizura kini: 

  • Ama “’BA A’IPIRA ADARU” riki
  • Ama “YI MA AZIKI”
  • Ama “AMURO I”

Ma le ta mi AI PLAY EKPAZU ma be, Branham Tabanakulu be, azini esele Amuroni engazu wudukurusi ara ri pie sawa azia etusi (12PM), Jeffersonvili sawa si (Sawa alu ondresi Ugandaa), amani muria ama traria tualu engazu kala Etuni efuria, Etuni ‘deria, Oruleru azini Andraleru: ‘Ba A’i’baru Esele Na Riki 63-1124E erizu. ‘Di afa Orindi Alatararuri ni ama dri cezu ‘yezaru ri i. Amani ria, ‘di otita Munguni ri i. 

  • Mi ekpa Play: Tepu ci Munguni ‘ba asi minia ri.
  • Mi ekpa Play: Mi eri sawa ci mini pezu ria.
  • MI EKPA PLAY: ‘Di ma o’dukoti mini ri i.

Adri. Joseph Branham i.

E’yo Ba Yohanani 6:60 – 71