MENSAHE: 63-1124E Tatlong Uri Ng Mga Mananampalataya

PDF

• 24-0128 Tatlong Uri Ng Mga Mananampalataya
• 22-0710 Tatlong Uri Ng Mga Mananampalataya
• 17-0917 Tatlong Uri Ng Mga Mananampalataya

BranhamTabernacle.org

Minamahal na Mananampalataya,

Mantakin n’yo, ang Diyos, na Siyang gumawa ng lahat na mga bagay at ibinunsod ito sa pagkakaayos, ay bumaba at nagsalaman sa kalagitnaan natin, para tubusin tayo. At pagkatapos ay Kanyang kinikilala tayo sa Kanyang kapita-pitagang Presensya, na Siya’y tumatayo sa makasalanang lupa na ito sa huling mga araw, at pinatutunayan ang Kanyang Salita na ganoon mismo, dahil Siya’y may obligado sa Salita na ‘yun.

Binigyang-buhay ng Espiritu Santo ang Salita na ‘yun sa atin. Ito’y nabuhay. Sa pamamagitan ng pananampalataya ay nakikita natin ito. Batid natin na ganoon nga dahil sinabi ‘yun mismo ng Salita, at binibigyang-buhay ng Espiritu ang Salita na ‘yun sa atin. Ngayon tayo’y pinaglalakip ng Salita ng Diyos na nahayag sa laman, gaya ng sinabi ng propeta na Ito’y magkakaganoon nga.

Sinasampalatayanan Ito ng mananampalataya, sinasampalatayanan (ang ano?) ang Salita. Hindi kredo; ang Salita! Hindi denominasyon; ang Salita! Hindi kung ano ang sinasabi ng kung sinong iba; kung ano ang sinasabi mismo ng Salita! Ngayon, alalahanin n’yo, ‘yun ang mananampalataya. Ang mananampalataya ay hindi nangunguwestiyon? Hindi sinasabi ng mananampalataya, “Papaano ‘yun nagkaganoon. Kung maipapaliwanag ko lang!” Di-mananampalataya ang ganyan. Uh-huh. Ang mananampalataya, hayan nga, kahit na ano pa Ito, “Kung Ito ang Salita, Ito talaga ang Salita! Totoo ‘yun.” Ganoon ang mananampalataya.

Kinakailangan n’yong sampalatayanan ang bawat kuwit at bawat kudlit, at ang lahat mismo na sinasabi Roon. Anupa’t totoo mismo. Kung sasabihin mo, “Hindi ako naniniwala riyan. Ang iba kasi nito’y Diyos, ang iba’y tao, ang iba’y kuwento-kuwento lamang tungkol sa pangangaso.” Buweno, kung ganoon ay isa kang di-mananampalataya. Hindi nangunguwestiyon ang mananampalataya. Sinasampalatayanan Ito ng mananampalataya, kahit na ano pa ang tila dating Nito sa pandinig o kung ano ang sabihin ng kung sinu-sino ukol Dito, kahit na gaano pang kaimposible Ito, SINASAMPALATAYANAN NATIN ITO!

Bawat tao rito, na nandito, bawat tao na nakikinig sa teyp; at kahit na balang araw ay lilisanin ko ang mundo, ang mga teyp na ito’y mananatiling buhay. Ganoon nga. Kita n’yo? At nariyan kayo sa isa sa mga klase na ito. Siguradong naroon kayo.

Tayo’y nabubuhay sa huling mga araw at kinakailangan n’yong tingnan ang inyong buhay at tingnan kung saang uri ng mga tao kayo naroon. Sinasabi n’yo ba, “Sinasampalatayanan ko na ang Diyos ay nagsugo ng isang propeta na pinatotohanan ng Haliging Apoy?” Sinabi Niya sa amin na sampalatayanan ang bawat Salita. Na sabihin nang EKSAKTO kung ano ang mga nasa teyp at huwag ibahin ang isa man na Salita. Tayo’y hahatulan sa kung ano ang SINABI NIYA, hindi sa kung ano ang sinabi ng iba na sinabi niya, o sinasabi ng iba na ganoon daw ang ibig niyang sabihin, bagkus ay sa kung ano ang sinasabi ng mga teyp.

O, papanig kayo kina Core at Dathan, at sa kanila na nagsasabi, “Hindi lang siya ang nag-iisang banal na tao. May ibang mga tao rin naman na tinawag para gawin ang mga bagay na kanyang ginawa. Tumutuon kayo masyado sa propeta ng Diyos. Ang Espiritu Santo na mismo ang nangunguna sa atin ngayon. Iba nang kapanahunan ito”.

Kayo’y nasa isa sa mga klase na ito. Sa inyong kasalukuyang estado ngayon, sa kasalukuyang estado ng pag-iisip, na, kayo rito sa mga nandito na mga nakikinig, at sa inyo na nariyan na makikinig sa teyp na ito, ang kasalukuyang estado ng inyong pag-iisip pagkatapos pakinggan ang teyp na ito, ay nagpapatunay sa inyo kung nasaang klase kayo. Sinasabi n’yan mismo kung nasaan kayo, kung kayo ba’y isang mananampalataya sa Salita at mananatili Rito o kung kayo ba’y lalakad palayo, o pahihintuin ang teyp.

Purihin ang Pangalan ng Panginoon, tayo’y tunay na MGA MANANAMPALATAYA, hindi kung sino na nahimok lang ng kung sinong ibang tao; anupa’t hindi sa kung anong ibang bagay, kundi ang Espiritu Santo ang naghayag sa atin ng Salita Mismo. Nakita natin ang Espiritu Santo nang tahasan mismo, na pinatotohanan at inihayag.

Tayo’y sinusubok sa mga pagsubok na ito, sa maalikabok na mga daan, sa mainit na araw ng pag-uusig, pero ang katapatan ng ating mga puso ay pumipintig sa materyal ng Salita. Tayo’y handa na para dumako sa hulmaan. Tayo’y mga anak ng Diyos, hinubog nang tama sa Kanyang Salita. Tayo’y buhay na mga halimbawa, at ang Salita ng Diyos ay buhay na nananalaytay sa atin. Dumating ang mga pagsubok para alugin tayo, para ilagay tayo sa pinaka ibaba, para makita kung saan tayo titindig. Pero hindi tayo matitinag, tayo’y tumitindig sa bawat Salita.

Pakinggan n’yo habang sinasaysay Niya kung sino kayo.

Alalahanin n’yo na bawat bahagi n’yo ay narito, noong bigkasin ng Diyos ang mundo na umiral. Inilagay Niya ang inyong katawan dito noon pa lang. At walang makawawaglit nun maliban sa Diyos.

Walang makawawaglit Nito mula sa inyo. Walang makahahalili sa lugar n’yo kahit na gaano pa kayong kaliit. Sasabihin n’yo, “Maybahay lang ako.” Walang makahahalili sa lugar n’yo! Ang Diyos, sa Kanyang dakilang pamamalakad, ay inilagay na ang Katawan ni Cristo sa kaayusan, na anupa’t walang makakahalili sa lugar n’yo.

Maluwalhati…Hallelujah…Ang pakikinig sa inimbak na Pagkain ng Diyos ay nagiging mas higit at MAS HIGIT. Sa higit nating pakikinig sa Diyos na nangungusap sa pamamagitan ng Kanyang piniling mensahero na sinasaysay kung sino tayo, mas umiigting nang higit ang ating Pananampalataya. Ang higit na kaligayahan na malaman natin na:

•Tayo’y “MGA TUNAY NA MANANAMPALATAYA”

•Tayo’y “ISA SA KANILA”

•Tayo “ANG NOBYA”

Nais kong ANYAYAHAN kayo na I-PRESS ANG PLAY kasama ko, ang Branham Tabernacle, at ang isang bahagi ng Nobya mula sa palibot ng mundo nang 12:00 P.M., oras sa Jeffersonville, sa ating pagtitipun-tipon mula sa Silangan, Kanluran, Hilaga at Timog para pakinggan ang: Tatlong Uri Ng Mga Mananampalataya 63-1124E. Ito ang pangunguna sa atin ng Espiritu Santo na gawin. Para sa atin, ito ang programa ng Diyos.

•I-press ang play: Anumang teyp ang ilagay sa puso n’yo ng Diyos.

•I-press ang play: Makinig sa anumang oras na piliin n’yo.

•I-PRESS ANG PLAY: Ang mensahe ko sa inyo.

Bro. Joseph Branham.

Sn. Juan 6:60-71