Amuro A’ita Ndeepini-ribe Leleturi,  

Anira ‘di lu waraga azi e’yoni ni ovuzu sizaru mukemuke ku ‘dileni, te ale wudukuru ma nira kini ama a’iki e’yo dria ama nabi ni andra nzeri ra azini aiki Eri ovuzu ‘Di Opi ‘Yoni ru. Akaki eri eri afa azi ‘yo tepu dira, ama Eri a’ira, ama Eri aira, ani di ama ngulupisi Eri ai kile Mungu ma Ngulupini e’yo nze amabe kpi ni rile.

Eri enga ovu oluzaru, azini ndindi e’dazaru E’yo Munguni risi, ani econi ta ovu ‘ba ada ni ku, le ma aa Mungu i.

Ma a’iki ra kini eceta e’dazaru ra riki ovuki e’dazaru nyaku dria andrusi andra e’dapi dere Yesuni ‘dia ci riki. Aci Piriru alu alu andra ‘Baalaru Pauloni ne obi aluri be, afa aluriki ‘yepi ‘da, emu ra o’du amani si. Eri Mungu e’yo nzepi kpi amabe ri:

Eceta orindisi alulu andra Erima ngulupi e’dapi Messia ruri, ni vini Eri e’da andrusi!

Mi eco lu tusu coza amboru ‘diki esu mi KA E’yo ma driari a’i ovuzu ‘Di Opi ‘Yoni ni, play ekpazu risi. Mi ka ovu ‘ba azi ‘da a’ipiku ni, azini mi ka pet ape omisi kaniku ‘ba azini lu mini risi: “‘Di E’yo Opini ri, aziniru ‘di lu Adripi Branham i e’yo nzepi ri,” ecekini ‘di ovuni mini ku.

Sawa Musa ni andra anzi Israelini pi dri cezuri si, ‘ba andra lu alu, ‘da andra Musa i. Azi asipi ‘diyi biki andra lu O’dukoti nde ma vuti i. Enera?

Te andru, ama ‘DA A’IPI ‘DALERI pini, ama asi ga ki ayiko treru azini e’bupi e’bu ni si, ama econi ovuzu ndi nde ewaewa. 

Ma ama kini Eri onze ama ‘bo. Ma ama kini ama ruki Eri ma Buku aa. Ma a’ira kini ama ovuki onzezaru ‘bo Ari Kabilomvani si.

Agbari amani a’izu kini O’dukoti ‘di ni O’duko Munguni e’yo nzepi kpi amavu ri’i risi, ama aiki ‘di ovuzu Mungu ma Ngulupi i e’yo nzepi amabe tivu bivu ri. ADAZA YO ama ru pini ovuzu Eri ma Bukua ri. 

Ma ma ‘ba nga eri ‘dini ka ecora, azi ngaza Yesu Kristoniri efi ruatia vule Kanisa Erini alia o’du asizu ‘disi. ‘Da afa ama abari pini a’iri. Ma a’i mi be.

‘Da be geri amani eri a’izuri ko’bo, Yesu Kristo efi ruatia vule, e’yo nzeria Amuro Erini dri tepu dria.

Sawa dria amani play ekpazu ria ama a’ita ni tu angu oru o’dinia. ‘Di ovuni lu olu’ba azini e’yo nze ‘dini ku, ‘Di Mungu ma Ngulupi i e’yo nzeria ama dri. Aleki lu 100% E’yo kililiruri. 

Ma zi nga mi afa azi si. William Marrion Branham ni mi ocepi ni? Eri Mungu ma ‘ba o’dukoti ojipi malaika aziriru ovupi e’dazaru ra ri i? Mi a’ira kini afa andra erini zi Mungu ma ‘ye riki, Mungu ‘yeki ra ri ra? Mi a’i kini eri andra O’duko Munguni o’du andrusi rini ri i ri ra? Mi a’i e’yo dria andra erini ‘yori ki ra? Ece kini mi nga mu ovu tusu cozaru pale alu dika aga e’yoni eco nzeku ri Sabatusi. 

Geriko azi yo mini ecozu tusu coza ‘di esuzu pelu mi tepu ki eri ka azini mi a’i afa mini eri ri ovuzu ‘Di Opi ‘Yoni ru. Le mi ma a’ira kini afa erini nzeri eri Mungu i e’yo nzepi kpi mi dri ri’i.

Ma’i, emi ocepi ru, mi adripi ru, a’ita mani ovuzu ri be, ma zi Munguni ‘bo eri ‘bazu mi dria. Ma a’ira kini ma nga afa mani ai di esura. Sawa ‘disi mi ka eri a’i ma be; a’ita mani ovuzu eribe ‘disi, Ma fe midri sawa ‘di ni.

Amani ria, eri ama ocepi i. ‘Ba azi wudukurua ovupi A’itabe ndeni kaniku angiri aga AMA OCEPI, Mungu ma nabini ra ni yo. Sawa ‘disi Mugnu ma nabi zi di Munguni ama ERI MA A’TA AMBORURI fezu. Mi ka Eri a’I asi mini si dria, Eri di sawa ‘disi MI A’ITA ni…DIZA, AMA ‘YERA!!! Ama A’ita eco ‘do ovu okpokoko, te dika yo, a’disiku ama ovuki di sawa ‘disi eri ma A’ITA be.

Ani sawa ‘disi, Ru Yesu Kristoni, Mvi Munguni ni si, mi ga afa mi ecandipi riki, mi azoki, ani e’yo eri ni, “Le mi ma mu te,” a’disiku mi ovu mi a’itabe, o’bazu ma a’itabe, okpo Yesu Kristoni ri be, Eri ma indikindini ovuzu ‘dia indi e’dazu azini ecezu Eri dia ci ri, ni nga mi ‘ba kililirura sawa ‘disi.

Ma eco ta a’du ‘yo ta fezu mi emu mi ecizu amabe ani tusu coza amboru ‘di esuzu beni? Mi ega e’yo drinia, afa ci mini ava ta ri, mi eco ovu eri be ra mi ka lu emu erizu azini Eri a’izu ria.

Emi emu erizu Sabatusi sawa Azia etusi (12PM), Jeffersonvili sa si (Alu ondresi Ugandaa), Amuro be. Ama nga ovu ru etrazaru azini eriria engazu kalaa Etuni efuria, Etuni nderia, Oruleru azini Andraleru, dria sawa alu alia, ‘Di Opi ‘Yoni ni e’yo nzeria azini e’yo dria luria ama dri: Agu Mi Ma Aari 63-1110E ma dria. 

Mi ka eco erizu amabe sawa aluri aa Sabatusi ku, e’yo yo, mi ekpa lu play sawa ciria ani mi eri azini a’i afa mi ni eri ri ovuzu O’duko Munguni ri i e’yo nzepi midri ri.

Adri. Joseph Branham i