Mwebapala Kalasi Yãbusololi Ya Bandu,

Mūmo uswe tukuganila i lisyu, BUSETULI! U bupala bwa BÕSA u Busetuli Ubwabwanaloli ku mwitiki gwãnalòli bukabagila ukubindikisigwa mbukindilisi fiyo. Busetuli bukusanusya ukukinda ubumi ku Nsīngilìgwa; kabuno pa LYALABWE ILI, BUSETULI, Une nisa kuyenga i Kipãnga Kyangu, kangi ni lipyana ni kisa kya Kyāla, uswe yuswe Kipãnga Kyãke nu Busetuli Bwãke Ubwabwanaloli.

U Buku gwa Busetuli akabikigwa mma kuli aligwēsa. Akayako nayumo uyu abagìle ukupilikisya Ilyēne. Ilyēne lyo i Buku lyabusololi ili lyãsimbìgwe kuli, kangi libagile itolo ukupilikisigwa ni, kalasi yãbusololi ya bãndu: USWE, u Nsīngilìgwa gwa Yeso Kristi.

Ilyēne lyo lyene ili Buku ili Kristi ãsímbìle Mwēne mu i Bãngèli lyõsa, lõli Umwẽne ãtumìle nu kunangisya Ilyēne nu gwãndùmi Gwãke ku mbombi Gwãke Yõhàni. Abafundigwa bakãmènye amabwanaloli amegeleligwe aga. Ikyēne kyãkàli kikasetuligwe ku bēne pabutasi. Nayope Yeso akãbagìle ukubabūla abēne isyakufwana nu buyo Bwãke mu Kyēne; kabuno u Tãta ãkàli akasetwile ikyēne ku Mwēne.

Lõli lilino, ukufuma pa bufwe nu bisyuke Bwãke, kangi pakabalilo fiyo fiyo ngati aka, Umwẽne abagìle ukubika pãnja u Busetuli ubu ubwa Mwēne kwa Yõhàni, iki ulwímìko nu buyepo Bwãke mu kipãnga fyãbágìle ukusanusya nu kubomba.

Lõli na lilino, ukufuma ifyinja maelifu mabili, ikisu kīnogonìle, abafundakyala bafundile nu kuyobesania, lõli nayumo ali nu bulinganio ubutalusye nu Busetuli bwa kubutitu ifi fyãsímbìgwe mwa Buku lya Busetuli mpaka ilisiku ili, mpaka akabalilo aka, akabalilo kãko Kyāla ãtúmìle yula u gwãndùmi yulayula ku kīsu ukusetula kyõsa kya Ilyēne kwa USWE, u Gwãke u Nsīngilìgwa unsaligwe.

Ukugela ukupilikisya ubunywamu ukuti Kyāla ãsálìle une, kangi ãsálìle ugwe; ukuya nu Busetuli Ubwabwanaloli bwa Lisyu Lyãke kyo ukukindapo bulīngànio bwa būndu. Akabalilo kãko balipo bīngi aba bikwīyobèla abēne bikukonga i Ndumi kangi abēne bikwitika Kyāla ãtúmìle u nsololi, abēne bakaya nu Busetuli bõsa mu kumanya ikyakukonga kya kusita kutendekeka i Lisyu-lya-pakanwa Lyãke i lisyu-lya-pakanwa ililondigwe-fiyo abēne BIKUFIMBILISIGWA UKUPILIKA. Ukuya nu Busetuli ubu bwa Lisyu-lya-pakanwa Lyãke mu lisiku ili lyo naloli Lwambo lwa ntengo unkulumba.

Kyāla atusalile uswe ukusetulako bula u BUSETULI BWABWANALOLI. Polelo, uswe yuswe Kyãke KIPÃNGA KYÃNALOLI, abalwabwite abasitakuponjoligwa pankyeni pa bãbo Sētàno yo nsitamaka, kangi yo naloli atoligwe. Nu Busetuli Bwãke Ubwabwanaloli mu myumi gyitu, ifipata fya gehena fikabagìla ukutola ukulwana na uswe, lõli uswe twisakuponjola pamwanya pa fyene. Kikayapo NAKIMO iki kibagile ukwīma pankyeni pa uswe.

U Busetuli Bwãbwanalòli kangi ubumalisye kuli umwīsyùgu bo ukwãgània ukupala kwa Lisyu-lya-pakanwa lya Kyāla kuli ilisiku lyītu. Linga ukubuka ku kipãnga, ukwingila ikipãnga, ukutendeka amakemo, ukwiputa, nu kutufya Kyāla kyo kyõsa Kyāla ikulonda, polelo Kyāla ãngàli ukuya nsitabugolofu ukuntaga Kaini kuli ukubõmba katikati iki Umwẽne ãyobìle ukubõmba.

Iki kyo iki I Lisyu-lya-pakanwa pa matepi kikusanusya kwa uswe:

U Busetuli bwa kindu kyõsa bubikigwe kunyuma kuno nu lusayo lumo kwa yūyo ikubala Ilyēne kangi ukupilika Ilyēne, ni kigune kimo ku bãbo aba bisa kõngelélàko pamo ukusosyapo. Ikyēne kyo mpuguto ummalisye, o, i kimalisye. Nakimo kibagile ukõngeleligwàko ku Lyēne. Kãngi akabalilo kãko u mūndu ikugela ukwegako kalikõsa ukufuma ku Lyēne, pamo ukõngelélàko kalikõsa ku Lyēne, Kyāla ãyobìle Umwẽne isa kwegako ikiyabo kyãke ukufuma kwa Buku, linga umwẽne alyõngelílèko ku Lyēne.

Ngati nasiku pabutasi, Kyāla apèle INJILA IMBELELESYE komma ukõngelélàko pamo ukwegako ukufuma ku Lisyu Lyãke. Umwẽne atupele uswe ulusako ukupilika i Lisyu-lya-pakanwa Lyãke bo Umwẽne ikuyoba kangi ikusetula i Lisyu Lyãke kwa uswe. Pala mbupepe pakabagila ukuyapo kalikõsa akanywamupo ukukinda ikyo.

Ubu bo BUSETULI UBWABWANALOLI kuli umwīsyùgu.

Une nsangalwike fiyo kangi ndi pãsi pa bugūlìlo ubukulumba kuli fyõsa u Ntwa alinafyo mu ndãmba kuli uswe bo uswe tukupilika, tukubala, nu kufunda i Ngulilo Ihano-na-ibili sya Kipãnga. Kyāla ãsímbìle Ilyēne, ãtúmìle u gwãndùmi Gwãke ukunãngìsya Ikyēne kwa Yõhàni, polelo agūlìle kuli uswe ukuya apa pa kīsu-kya-pãsi ku kabalilo kakaka aka ukuti ãbagìle ukutuma u gwãndùmi yulayula kwa uswe ukusetula Ilyēne.

Pala pafumile ukusita kuyamo siku akabalilo akalwimiko ulwingipo mu syambukulu sya kīsu-kya-pãsi ukukinda umwīsyùgu. Pala pakãlimo siku ulugīndìko ulukulumbapo ukupilika i Lisyu-lya-pakanwa lya Kyāla ku bēne. Pakãlìmo siku akabalilo pãpo u Nsīngilìgwa Gwãke ãbagìle ukuya mõngàne palikimo ni Lisyu-lya-pakanwa Lyãke ku kabalilo kamokene.

Yaga bīténdekèsye, Kyāla ikuyaga pakupa uswe u Busetuli bubwingipo bwa Mwēne na uyu uswe tuli: Abãke abalwabwite abasitakuponjoligwa, Abãke abasaligwa, u Mwēhe unsunguligwe, u Ndumbula-nyafu Gwãke Umwẽne agūlìle ukufuma bwãndìlo bwa kabalilo.

Nakimo kibagile ukwega ikyo ukufuma kwa uswe. Ikyēne kingimisigwe mu syītu indumbula ni myoyo ngati nasiku pabutasi. Ikyēne kyo lilino kiyīle bwãnalòli iki kikutupapo uswe Lwītìko lwãkunyakiligwamo.

Uswe twisa kwanda injila yitu ingulumba Pandungu ugu pa 12:00 PAMUSI, akabalilo ka Jeffersonville, bo uswe tukupilika i Ndumi yitu iyakwanda: 60-1204M U Busetuli Bwa Yeso Kristi.

Une ngulonda ukubakasya umwe ukwega ilibuku lyīnu lya Ngulilo Ihano-na-ibili sya Kipãnga, bala ilyene mu kimyemye gwa kyumba kyãko kangi funda Ilyēne mõsa, ntu ukufuma pa ntu, u ndungu guligosa. Uswe tukuyaga ba kõngàna palikimo tukupilikisya ku Lisyu-lya-pakanwa Lyãke, polelo ukufunda i Lisyu Lyãke.

Nkundwe Yõsèfu Branham.