AMURO TI-ECIZA ALIA E’YO Nzepi I Leletu ‘Diyi,

‘Di sawa azi amborutu idri mani alia ‘dileni ma agyipi la! Ama E’yo Munguni neria ecaria pari eyi nia ama miletia aga nga drio ri ra. Eri drizaru tu amazu Eri A’di’i yari, ‘ba o’dukoti ojipi Eri ni ti epeeri a’di’i yari, azini di NIZU AMA A’DIKI YARI! Awa’difo Ata. A’bani ndra asi kini e’yo diki mu eyi ‘ye ‘dileyari ku, te eyi ‘di eyi ‘yeria ama mileti mbaria, ko’bo geri Mi nabi ni ndra ‘yi tepu driari le.   

Ma asi‘baza angirini alia nezu Eri ma Orindi Alatararu ni ama ese ria enyia Eri vu aga nga driori ki ra wiki Engatani ‘disi. Ma le di emi alu alu omve ti ecita ‘yezu ama be O’dukoti di ageyia, Eri ma Amuro wudukuru si ara ri be. 

 “Ani, afa azi werea ‘dileni ka eca ‘bo, mi e’yo ‘ye o’dekua le a’dusi? Le mi ma ovu agupi ni. Mi ma nze e’yo ‘ba di pini,” amena, “ani emu di drile!” Amena, Mi di be ‘da. “Mi ma wu ku. Mi nze E’yo!” Amena. Kiri kiri, Ale ‘da tu. Mi owu mavu a’dusi? Mi ma nze e’yo ‘ba di pini ani emu di drile azi mini le nga ri vu. Eri tro a’dunia ti, ka ovu azoni, kaniku tro a’dunia ti, ‘ba draza ki engazu, kani tro a’dunia ti, Mi nze e’yo! Ma e’da eri ‘bo. Mi ma nze e’yo ‘ba di pini. 

Drile’ba amani esu ‘dole atita fezu a’ita amani pini, ani ama eco vini E’YO nze ani indi ‘do ngoleni. Mi emu ru trazu Amuro be wiki Engatani si, amani ama oturia Efuza asizu ri ni. Le idri amani ma fudri ra E’yo ‘Ba risi, a’disikuni a’bianzi di eri Tota alia. TE asisile azi di yo SAWA ‘disi Eri ma Amuro ni owuzu, TE E’YO NZEZU I! Emu di drile azi mini le nga ri vu. Inzita ma ovu Opi vu!

Amani drio ‘ye wiki Engatani si rile, ama ma a’buki ama engazu wudukuru vuri si amani eco dria ri si foni ki anyuzu te risi kani ka lu ovu e’daki ‘duzu, Esele O’duni riki erizu, azini tepu ki avizu engazu Lifeline appua kaniku angu ‘bani ecozu eyi enzezu intanetia si ria. Ama ma feki wiki alatararu di pi Opi dri, azini a’bakini Engata di afa raru o’bipini ri ni ku, te idri ‘bazu alaru E’yo vu, aku amani pi alia. Ma le ta amani dria ama etravu otita andraleru ‘di pini, Sawa Eastern Daylight Time (EDT) ni risi, pe kani ojata azi ma ovu ci ria.

O’DU SU

Eri ndra O’du su ma inisi Opi Yesu ni ndra ovuzu Ondreta Asizu ri be Eri ma ‘ba vutini bipi ‘diyi pie ani omu Agaza-drilesi de nga anzi Israelini efuki nga amvekuri yuzu risi. Drile’ba ‘di ngoleni ti ecizu Opi be aku amani pi alia, de nga ama wiki alaru ri ecaku, ani Eri zizu tusu cozu ama dria azini ama aku pi dria, azini amani afa dria amani le aci amaniri niri fezu.  

Ata ‘buari, ama awa’difosi ‘di si, sawa azi dika ru etrazu tualu, ‘dani ‘dani ma kala ‘doleru ria. Azini ama o’buti ‘disi okpo idriza ndru engazu Mivu, amani ava fezu aci nga ovupi ama drilia ‘di ni. Ama tra ama ‘doa ko’bo anzi Ebraniani pini ndra ‘ye o’buti drio drio rile, nyaka manaru ndra ovupi fezaru eyi dri ini alia ‘da esuzu ria, ani eyi ta mbazu o’du emupi ‘dani beni. Ama ama tra tualu Mana orindisi rini, o’buti ‘dosi, okpo fezu ama dri aci nde ni. 

Ama ma e’doki sa Mudrini iri (6PM) sawa amavu akua ‘doleruri si, ani ama ma eriki Eri luria ama dri kini ama di Efuza asizuria, amani ama traria Ogunga Erini ma ageyia O’dukoti ‘di erizu: Efuza Nazuri 63-0630M.

O’dukoti nde vutia, ama nga ama tra aku amani pie aku amania ani Omu Opini aizu beni.

Ama ‘ye sawa were vutia ovu angu intanetia ‘bani cazu ani tepu anzini inzita Kumunyo vuri ki esuzu alia ri be, kaniku, eri nga ovu ‘bazaru otita inzita pini ri alia redio The Voice Radio ru, esule Lifeline appua di alia.

O’DU TOWI

Ama ma fiki Mungu ziza alia aku amani pie san a obutisi (9AM), azini dika sa azia si (12PM), Opi ni omvezu tezu amabe azini Eri ma Amuro be wudukuru si ara wiki ama deta ndu ‘di alia; azini aku amani ki efizu Eri ma Orindi Alatararu si amani ama ngulupi owiria inzita fezu Eri ni ria. 

Ka ecora ama ma omi ma mu vule o’du ndra Kalivaria eli 2000 ma drilia alipi’bo da vu, ani ama ma neki ama Papi’i izaru pati alaza si, ani ama ma owi di vini ama ngulupi ‘dale indi afa Ata ni ayiko feepiri ki ‘yezu:

Mi ne de di sawa ‘disi, Eri ni ndra emuria wudukurua, esu ndra sawa ‘dasi a’itaako ovu ndra angiri tu wudukurua sa ‘da alia, te awini ndra Eri atri aluni ku. Eri mu ndra drile e’yo oluzu alurile, ‘ba ki atizu alurile. ‘Da feni ndra Erini asi oyata ku ye. ‘Ba e’yo onzopi ‘diyi ndra ci. Agu ‘da ndra onzozaru e’dozu Odekua ru kpere Eri ni draria pati alaza sia. ‘Da atri ndra Eri ra? Yo, culu. Afa ndra Eri ni leeri a’duni? “Sawa dria afa Ata ndra sii ri ‘yezu. Sawa dria afa Eri ni ayiko feepi ri ‘yezu.”  

Vutinia sawa azia nusu (12:30PM) ama ma egaki e’yo zita azi orodrirutu idri amani ma alia ‘dileni ma dria, amani ama traria Ogunga Erini ma ageyia O’dukoti ‘di erizu: IMi Idri Fudri E’yo Bari Si Ra Ya? 63-0630E.

Vutinia ama ma eci ama dika tualu ziza alia sa oroni etusi (3PM) Opi ni dizu pati alaza sia ri ma e’yo egazu.

O’DU AZIA

Ama ma etra ama dika ziza alia sawa na o’butisi (9AM) azini azia si (12PM), azini ama otu ama asiki afa angiri kulukulu Erini mu ‘ye ama eselia ri pi ni,

 “Tota ‘di ejizu ma–ma ageyika olu’baru amve ‘dale ru pini ‘bo ri vutia, ani e’yo kongoloko ‘diki ‘yoria ‘boria, te, Opi, ma ‘ye ‘dale avavuza Mini so. Ma amara kini Mi ‘yo mani ‘yo ‘dale ri ni. Sawa ‘disi eri di ‘duzaru engazu ma opi driarisi ‘bo Opi. Ma–ma awa’difo si eri di ma dria ku. Eyi ma ‘yeki di afa eyi ni le ‘yeri eri si, Ata. Ma zi kini ma aiki eri ra. Ma zi Mini ‘ba dria pazu, Opi. Ava engaza azi ma e’do di kiri kiri, ani Okpo amboruni ma emu Kanisa ma alia de nga mu ni ku. Ma…Ovuni ewaewa ‘da zizu ku a’disikuni Mi azi ndra eri ra. Azini ama di angu one, Opi, eseta nazu amani ni ra kini eri nga mu afa amboru ki ‘ye ama eselia ‘davu”     

Vutinia sawa azia nusu (12:30PM), ama nga dria emu tualu E’YO erivu: Tota 63-0707M. O’DU NUKUTA EKARU SI mu pi ovupi Eri ma Amuroni wudukurusi arari ni mu ovu ngole. 

Vutinia ama ma eci ama dika tualu ziza alia sa oroni etusi (3PM) Opi ni dizu pati alaza sia ri ma e’yo egazu.

SABATU

O’du amboru wuzu dika ku ‘do ngoi ya, te E’YO NZEZU! O’buti engatani ‘do ngoleni ya! Ama ma engaki drioru ko’bo Adripi Branham ni ndra ‘ye o’buti eri ma agyi wereru, aria robini ru ‘da ni eri enga sawa mudrini alu o’butisi (5AM) ri le. Ama fe lu awa’difo Opi dri Yesu ni engazu dra aliasi risi:

Sawa mudrini alu o’buti ‘disi, ma agyi wereru agate be ikaruri esa ta mavu dirisaa ma engazu. E’data ko’bo eri ma asi wereru ‘da ni mu ahwete rile, eri ni ‘yo ria “Enga’bo.”

Sawa na o’butisi (9AM) ama etra ama asi alusi pale alu dika ziza amani ri ti idrizu, e’yo zizu ama alu alu ni azini amani ama oturia O’duko Munguni eriria.

Sawa aziasi etusi (12:30PM) ama nga emu tualu O’duti amani Engatani ri erizu: Mi Wu A’dusi? Mi Nze E’yo! 63-0714M.

Inzita ‘di ma vutia, ama ma etraki ama dika e’yo ziza alia, awa’difo fezu Eri dri WIKI MA DETA ONYIRU ERINI FE AMA NI I’BE AZINI AMURO ERINI WUDUKURUSI ARA RI BE ri si.

Eminiria ma adripi azini amvupi miri kala ‘daleruria ri pini, ma le emi ai indi ruecizu ama’be e’yo pari ‘dupi Jeffersonvili sawa si ‘di alia, sawa Mungu zizani otita di pi alia dria azini tepu mu avi Sabatu o’butisi ‘da si. Ma ama ra kini, Tepuki avizu O’du Susi, Towisi azini Aziasi etualasi sa Jeffersonvilinisi ri ki nga ovu ewa ewa emi abari pini, ani mi driwala ci O’dukoti ‘daki avizu sawa mi ama eri mini ‘yeki o’du nde alia ri alia. Te, ama le ta, amani dria ru ecizu tualu Sabatu si sawa azia nusu (12:30PM), Jeffersonvili sawa si O’dukoti Sabatuni ri erizu tualu.  

Ma le ta vini emi azini emi anzi ki ai tezu Creations ma karatasi azini embata pi ma eseleru indi, azini YF ma zita, emi aku ni eco ta ‘ye dria tualuri ki ‘yezu. Amani egarisi emi nga eyi lera eyini dria ovuzu engazu dria E’YO amani mu eri wiki ma te da siri ma aa risi. 

Otita wiki ma detani rini, e’yo otuta inzita Kumunyo niri ma dria pini ri pie, afa ngapi ovupi lezaru azi ngaza Creations niri pie, Engata ma Zitaki pie, azini e’yo azi oniza ndundu ‘diyi pie, mi ma ndre angu andraleru ‘di’i.  

Eri inzita amboruni ma dri emi azini aku emini ki aizu emuzu tualu Amuro be wudukurusi ara wiki ma deta ngapi tre INZITA SI, RU ECUZA SI AZINI ATITA SI ri. Ma a’ira eri adaru wiki ma teda azi mupi mi idri ojaapi drile aluru ni.

Adripi Joseph Branham i