22-0116 Ang Diyos Ikinukubli Ang Kaniyang Sarili Sa Kasimplihan, Pagkatapos Ay Inihahayag Ang Kaniyang Sarili Sa Gayun Din

Mensahe: 63-0317M Ang Diyos Ikinukubli Ang Kaniyang Sarili Sa Kasimplihan, Pagkatapos Ay Inihahayag Ang Kaniyang Sarili Sa Gayun Din

PDF

BranhamTabernacle.org

Minamahal na Munting Kawan ni Elias,

Tayo’y kakaibang mga tao, naiiba’t kakatwa sa mundo, at maging sa maraming mga mananampalataya, pero sa kabila nun, tayo’y espirituwal na pagkasaserdote, isang maharlikang bansa, nag-aalay ng espirituwal na mga handog sa Diyos, ng mga bunga ng ating mga labi na nagbibigay papuri sa Kanyang Pangalan. Nais nating sabihin sa mundo na tayo’y lubos na masaya, lubos na nagpapasalamat, at lubos ang karangalan na Isa Tayo Sa Kanila.

Ipinagbili natin ang lahat ng ating mga perlas, yamang ibinigay Niya sa atin ang Perlas na may dakilang halaga, ang Kapahayagan ukol sa Kanyang Sarili. Nakikita natin ang mismong Salita ng Diyos na nahayag. Ang mismong pangako ng huling araw, ang mismong Liwanag sa gabi na magliliwanag.

Inihayag sa kaibuturan ng ating mga puso na ang Tinig na napapakinggan natin sa teyp ay ang Anak ng Tao na inihahayag ang Kanyang Sarili. Ang Tinig na ’yun ay sinasabi sa atin: Manatili kayo rito, tumingin kayo sa naiimbak na Pagkain na Ito na aking inilatag para sa inyo sa mga teyp. Kung mayroon kayong anumang katanungan, bumaling kayo pabalik sa mga teyp na ito. Marahil ito’y nakakalito nang kaunti sa inyo, pero i-play n’yo ang teyp at makinig na maigi. Kung kayo’y Nobya, ihahayag sa inyo Ito ng Espiritu Santo. Alalahanin n’yo, hindi kailangan ng mga teyp ng interpretasyon, sabihin n’yo lamang ang sinasabi ng mga teyp. Ako ang inyong pastor at kayo ang munti kong kawan, manatili sa kung ano ang itinuturo sa teyp.

Alam ko na marami ang hindi nauunawaan kung ano ang ginagawa natin sa pakikinig lagi sa parehong Mensahe tuwi-tuwina, pero ayos lang ’yan, sila’y ating mga kapatid na lalaki’t mga kapatid na babae pa rin at minamahal natin sila at hindi dapat tayo magsalita ng anumang laban sa kanila. Ang bawat isa’y kailangang gumawa sa paraan na pakiramdam nila’y pinapatnubayan sila ng Panginoon na gawin. Ang Diyos ang kumikilos at nagpapatnubay sa atin bilang mga indibiduwal.

Sinabi ng propeta na kailangan nating isangguni ang lahat sa Salita, at patunayan ito sa pamamagitan ng Salita, gaya ng ginawa niya noon. Ang Salita para sa panahon na ito, at lagi sa tuwina, ay ang Biblia. Sinasabi sa atin ng Biblia na sa huling mga araw Kanyang ganap na ihahayag ang lahat ng mga hiwaga at mga lihim na nasa Kanyang Biblia sa pamamagitan ng isang propeta na Kanyang isusugo. Siya Mismo ay mangungusap sa pamamagitan ng propetang ito at ihahayag ang Kanyang Sarili sa laman gaya ng ginawa Niya noon kay Abraham. Ang Kanyang Salita’y hindi magiging mga salita ng isang tao, kundi ang mismong Mga Salita ng Diyos Mismo. Kinakailangan na GANITO ANG SABI NG PANGINOON, kaya ang Biblia at ang Tinig na ’yun ay magiging isa’t siya rin.

May kalaliman na tumatawag sa kalaliman na nasa ating mga puso para pakinggan ang pinagtibay na Tinig na ‘yun. Nais nating pakinggan ang Tinig ng Diyos nang direkta mula sa Kanyang piniling propeta. Ganoon na lamang ang pag-ibig sa ating mga puso na pakinggan ang Tinig na ’yun at magpahinga at malaman na hindi na natin kailangang kuestyunin ang anumang pinakikinggan natin, sadya lamang manampalataya sa BAWAT SALITA.

Walang ibang lugar na magagawa natin ’yan. Hindi ’yun sa dahil may magsasabi sa atin ng bagay na mali o pangungunahan tayo sa mali, dahil sila man ay may Espiritu Santo, pero nalalaman natin na maaari silang makapagsabi nang hindi sinasadya sa atin ng bagay na mali. Pero kung pakikinggan natin ang pinagtibay na Tinig ng Diyos sa teyp, kahit na hindi natin alam ang sinasabi, sinabi ng Diyos Ama na magsabi lamang tayo ng AMEN, SINASAMPALATAYANAN NAMIN ANG BAWAT SALITA. Hindi natin puwedeng magawa ’yan sa iba pang tinig.

Tayo’y inatasan ng Tinig na ’yun din:

Huwag kayong makinig sa akin; bagkus ay makinig sa bagay na sinasabi ko. Ang bagay na sinasabi ko ay ang Mensahe. Huwag n’yong pansinin ang mensahero; antabayanan n’yo ang Mensahe. Panatilihin n’yo ang inyong mga mata, hindi sa mensahero, kundi sa Mensahe. Kung ano ang sinabi Nito, ’yan ang bagay na kailangan n’yong pagtuunan.

Kung ano ang sinabi niya AY ang Mensaheng napapanahon. Kinakailangan nating panatilihin ang ating mga mata sa Mensahe; Yun ang bagay na kailangang tingnan.

Siya’y naghahayag sa atin ng mga bagay na hindi pa tulad noon. Bawat Mensahe na marinig natin ay parang isang bagong Mensahe na hindi pa natin napapakinggan. Gayong napakinggan na natin ang mga ito nang daan-daang beses na noon, hindi natin maipaliwanag ’yun, na para bang unang beses pa lang nating napapakinggan ito at Siya’y nagbibigay sa atin nang higit at higit na Kapahayagan.

Hindi natin lubos-maiisip na mayroong iba na ayaw makinig ng mga Mensaheng ito kasama natin. Hayan nga ang pagkakaisa at Kaisahan ng Nobya at ng Kanyang Salita. Tayo’y ganap na kuntento mismo nang hindi pa natin nararanasan sa buong buhay natin.

Muli tayo’y nasa ilalim ng dakilang pag-aasam. Tila ba ang Mga Tatak ay binubuksan pa lang ngayon. Kanyang ipakikita sa atin ang mga bagay na hindi pa natin nakikita noon at magdadala ng Liwanag sa mga bagay na narinig na natin nang marami’t, maraming beses na noon; pero ngayon, nakikita na natin Ito nang malinaw.

Alam natin na ang lahat ng kailangan natin para sa Kanyang nalalapit na parating na Pag-agaw, ay ang Tinig na ’yun sa mga teyp.

Isinugo ng Diyos ang Kanyang propeta sa pamamagitan ng isang pangitain sa likurang bahagi ng disyerto sa Arizona kung saan siya’y iniangat ng pitong anghel, at pagkatapos ibinalik sa Jeffersonville para ihayag ang mga natatagong hiwaga ng Pitong Tatak sa Nobya.

Halikayo at tumutok kasama namin habang ang Diyos ay mangungusap sa atin nang labi-sa-tainga sa Linggong ito nang 10:00 A.M., oras sa Jeffersonville, at pakikinggan natin ang: Ang Diyos Ikinukubli Ang Kaniyang Sarili Sa Kasimplihan, Pagkatapos Ay Inihahayag Ang Kaniyang Sarili Sa Gayun Din 63-0317M.

Sisimulan natin ang Mensahe sa talata #94, pagkatapos ng gawain ng pagdededika.

Bro. Joseph Branham

1 Mga Cronica 17:1-8

Isaias 35:8 / 40:1-5 / 53:1

Malakias ika-3 Kabanata

Sn. Mateo 11:10, 11:25-26

Sn. Juan 14:1-6

1 Mga Taga-Corinto ika-13 Kabanata

Apocalipsis ika-21 Kabanata