24-0908 Kristoni Ovu Ecezaru Eri Ma Ngulupi ma E’yo Aa

Mesegi (O’dukoti): 65-0822M Kristoni Ovu Ecezaru Eri Ma Ngulupi ma E’yo Aa 65-0822M

BranhamTabernacle.org

Branham Tabanakulu Leleturi,

Ama mile ki drilebarᴜ ‘doni ya; a’disukuni yi afa ne ra. Ama bi ki drilebarᴜ ‘doni ya; a’disikuni yi e’yo erira. Nabi kakaᴜ ‘ba kililirᴜ ‘diyi be le ndra afa emini ndreleri azini erileri ndre azini eri avasi, te yi ‘yeni kᴜ ye. O’DUKO MUNGUNIRI a NEKI AZINI ERIKI ERI ‘bo.

Mungu Ima Ngulupisi pe ndra Ima Bibilia sizu Ima Nabi pivusi. Mungu ma Ngulupi pe vini ndra Ima siriki ece sawa asizani ‘di ma aa Ima Amuro dri Ima nabi vusi. Eri Eri ma arakala obiniri’i, Eri ma E’yo eceri’i, fezu Erini ovuzu dria Eri ma eseleni.

Sawa ama ayi ni ecazurisi, Eri fe ndra Ima nabi ma eca sawa aluri alia. Eri vu ndra ava drinia azini nze ndra e’yo erizusi. Eri ndra Eri ma geri ‘ba okoru azini pe eri ‘yezu ri’i. Kile Bibilia le, Eri E’yo Munguniri’i, azini ovuni e’yo ‘ba adaniri’i ku.

Le ama ma ovuki Driariruri be ci, afa asizu ruatizu driniari be; E’yo asizuri’i. Agupi azi ‘diyi ‘yo kini Bibilia ni yi ma Drariruri’i, ovuni afa ovupi ‘yozaru tepu pi ma driari i ku; ekile yi afa ndunduki ‘yo rile. Eri onyiru tu geri Munguni E’yo Eceza adaru Ima E’yoniri zizu ci ‘ba kakau pivusi ri, te ece Eri azini ‘ba Eri nditiriru Ima Amuroni ra.  Azi ‘diyi ecoki lu eri ma azako ku, yi ma mile a’buzaru azini ovukini E’yo Eceza dria Mungu ma E’yo ecezaruri niri be ku.

Mungu nze ndra e’yo Ima E’yo (Bibilia) alia Ima nabi vusi ani lu amani, “Mungu, ndra e’yo ndᴜ ndᴜ ‘yopi drio geri ndᴜsi ndᴜsi ama a’bipi ma tia geri nabi vᴜrisiri”. ‘Dinile, Mungu ma nabi siki ndra Bibilia ni. Eri ovuni ndra yi i ku, te Mungu i ndra e’yo nzeria yi vu si.

Eri ‘yo ndra o’du amani alia Eri ta mu Ima Orindi e’yo adaniri ma ti epe amadri cezu e’yo ada driari alia. Eri nze nga e’yo ima ngulupi ma driaku; te afa ci erini nga eri ri, eri nga nze i: azini eri nga ama dri afa mupi emupi riki e’da.

O’dukoti tepu ma driari ki Mungu ma e’yo ada ecezaru riki. Leni efini eceza azi ku. Eri Mungu i E’yo Iniri efi eceria I ngulupisi Erini eri nzeria tepu pi ma dria.

E’yo ti eseza drile afa ‘ba azi nduri pini ‘yori ma aa yo, lu afa Munguni nzeri’i. Afa ovupi ‘yozaru tepu pi ma driari ni O’duko lu ngapi i OJAPI TUAKU ri’i. ‘Baki yi oja ra, egata yi oja ra, e’yo efi ecezaki yi oja ra; Mungu ma E’yo oja i tuaku. Eri Amuro ma Driariruri’i.

Nabi fe ama dri eceta ‘ba mupira vupiri vuri ni ovuzu ‘ba driariruri’i avita mupirani aliari i ri. Eri ma e’yo ni afa asizuri’i. Mi cani eri zi zitasi ku. Eri ka eri ‘yo ‘bo, be ‘da, deru’bo. Sawa ‘disi ‘ba mupira vupiri ovu buku azi azitani le ma ayu ni be ci. Eri lu erini angu ngo’i mupira vuri ni kani golo vuri ni, sawa mini ovuzu andaa ri ngoni azini ovaaruri ngo i rini; azita mupira ndeniriki ngoni yari niri.

Eri buku nde ‘da la azini oni ani eri ka e’yo nze, azini e’yo li yani, ‘da azita nde’i, ‘da e’yo asizuri’i. Le mi ma oa afa erini ‘yori be, zita yo, agata yo, afa ci erini ‘yori, ‘da geri le ma ovu ani ri i azini cani ovu ojazaru ku. Diza.

Adripi Branham awini ndra ‘yo mi ma olu e’yo kaniku emba ‘ba ku ‘diniri ku ye; ndu ‘davusiria, eri ‘yo ndra e’yo oluzu, azini ocepi miniri erizu, te le O’duko Munguni tepu pi ma driari ma ovu mi ma Driariruri’i. 

Le idiafe azi ma ovu ci; geri azini si, afa asizuri’i. Le ‘ba dria ma ovu afa asizu ‘da be. Eri e’yo asizuri’i. Mungu fe angu lu alu ‘da isuzu, O’duko Munguni tepu pi ma driari. Eri e’yo efi eceza E’yo Mungunirini geri mungururisiri’i. Eri E’YO ASIZURI’I, AMENA I, ‘DI OPI ‘YONI I.

Yesu ma Ngulupi omve yi “munguki,” ‘ba ndra Eri ma E’yo nzepiri ki ria; ani yi ndra munguki. Eri ‘yo sawa nabi pini ndra ovuzu odu osu alia Orindi Mungunirisi risi, yi ejiki ndra E’yo Munguniri lu ko’bo. Eri ndra E’yo Munguniri i e’yo nzeria yi vusi.

‘Da asisile ama nabi ni andra ovuzu orikoko ri’i. Eri ndra tijizaru Orindi Alatararuri vusi E’yo Munguni enzokokori nzezu. Mungu pe ndra eri’i ayi amaniri ni. Eri pe ndra O’dukoti erini ta mu nzeri, ata obi ama nabini ri pie azini afa ta mupi i ‘yepi ayi amaniri aliari pie.

E’yo ndra erini nzeri ki, geri erini ndra e’yo ‘yezuri, a’bu azi ‘diyi ma mile ci, te zi azi ‘diyi mile ra. Eri osu vini eri bogo ma obi erini ndra surisi ni. Eri ma obi, afa ominiari, afa driaki geri lu erini ndra ovuzuri si. Eri ndra kililiru pezaru ama, Amuro Munguniri ni.

‘Da asisile, sawa AMANI EMUZU TUALU ‘BO RISI, Eri O’duko nde’i aleki ‘ba OKO erizuri i ri. Ama a’ikira ama E’yo nzezaru Kililiru engazu Mungu ma ‘ba o’dukoti ojipi pele azini perivuri eriria.

Anikira azi ‘diyi cakini ‘da ne kani va ku, te eri ‘yo ndra i eri nzeria ima ongulumu pini a’dule.  Afa Munguni fe azi ‘diyi pivu ocezaruri ovuki ndra eri ma opidria ku; afa ndra eri ma opidria ri lu Nyaka obi erini fe amaniri ngoleri yari i.

‘Da asisile amani ‘yozu ama Branham Tabanakulu i ri i, a’dikisu eri ‘yo ndra O’dukoti nde lu ‘ba ini Tabanakuluaru ri pini, kabilo wereru ndra lepi tepu nde isupi azini eripi riki. Eri ndra e’yo nze afa Munguni ndra fe i dri dricezuri pini.

Eri ‘yo ndra, “‘ba kaki le nyaka omu afa azi amve ‘daleni pie ya ani, ma esuki e’yo eceza nde engazu Mungu vu ani ma ‘yeki afa Munguni ‘yo yini ma ‘ye ki ri. Ma nga afa trotrori ‘ye vini indi. Te O’dukoti ‘diki, tepu ma dria ‘diyi, ma kanisani a’dule.”

Geri ndra Erini adaru Eri ‘bazu ewakokoru Ima Amuroni O’duko Munguniri nezu azini erizu azini Ima aziza pi ma vuti bizu ri. 

Mi ka ta le rueci ama be O’duko ‘da erizura yani, ama nga mu eri eri dria sawa aluri alia Sabatu ‘disi sawa azia etusi (12pm), Jeffersonivili saa si (7pm Ugandaa),: 65-0822M – “Kristoni Ecezaru Ima Ngulupi Ma E’yo Aa” vu.

Mi ka eco rueci amabe ku, Ma mi oru O’dukoti ‘di erizu sawa ci mini ecozura ria.

Adri. Joseph Branham i

E’yo Siza lazarᴜ de nga O’dukoti nde ovu erizaruku ki:

Efuza 4:10-12
Isaya 53:1-5
Yeremia 1:4-9
Malaki 4:5
E’yo Ba Lukani 17:30
E’yo Ba Yohanani 1:1 / 1:14 / 7:1-3 / 14:12 / 15:24 / 16:13
Galatia 1:8
2 Timoteo 3:16-17
Ebrania 1:1-3 / 4:12 / 13:8
2 Petero 1:20-21
E’yo Eceza 1:1-3 / 10:1-7 / 22:18-19