24-0804 Ba Oduosuzabe Sawa Asizani Alia Riki

Mesegi (O’dukoti): 65-0725M Ba Oduosuzabe Sawa Asizani Alia Riki

BranhamTabernacle.org

‘Ba Mana Zizaruri Nya’ba Leletu ‘Diyi,

Mungu epe Eri ma ‘ba o’dukoti ojipi malaika aziri zuri mati Amuro Ini dricezu;  ovuni agupi azi nduni i ku, ovuni ongulumu azi agupini niki ku, te AGUPI ALUNI, a’dikisuni O’dukoti ‘ba o’dukoti ojipiri be yi alu. Mungu ma E’yo leni e’yo efi eceza ku. Eri nze Eri Ima Amuro dri tile ‘ba adani vusi ani ama a’iki Eri lu geri Erini Eri ‘yozuri si.

Le ama ma ovuki andru milesi o’duko ngo ni ama driceni ya risi, azini eri ama dri a’du lu yari si. Ama asiza ‘dani ‘daniri ati’i peta nde o’da ma dria; ani le di ama ma peki o’duko ngoni o’duko orodriru ndeni le ama ma eriki ri i ri. O’duko engapi ovupi e’dazaru Mungu vusi ra ri ngo’i?  O’duko ovupi ‘Di Opi ‘Yoni beri  ngo’i? Eri econi ovu ma o’dukoni. ma e’yoki, ma embata ki ku, te le Ma ovu E’yo’i, ani le di ama ma muki E’yo vu ani nezu Eri ama ni a’du lu yari.

Eri lu amani kini Eri nga azingaza geri-towisiri ki enga ama dricezu sawa asizani si i ya?  Ama ecoki ne nditiriru ra yi ovuki pari yini pie ci E’yo ma alia; pari amboruti ‘diyi, te E’yo ‘yo ANGUCINIA kini yi nga ovu o’duko orodrirutu LE ama ma eriki ani ovuzu Amuro’i beni riki ra ya?  

Nabi lu andra amani kini agupi kakauki nga emu ra o’du asizu ‘diyi ma alia mupi o’bipi azi azi ngapi Munguni isu dere eri Eri ma aleni kuri ki. Eri nga yi ma azingazani asindriza fe ra, te eri ovuni Eri ma geri kililiru Ima Amuro dricezu ri’i ku. Eri ‘yo kini Ima Ale kililiruri, azini sawa dria engapi ovupirisiri, ni O’duko Eri ma nabi ovupi ecezarurari niri erizu azini a’izuri’i. A’disikuni Eri, azini Eri’i a’dule, ovu ‘Di Opi ‘Yoni be ni. ‘Da di asisile Erini Ima Malaika mati epezaru ri’i; Eri pe eri’i a’dusi yari; Eri fe o’dukoni ‘duzuci a’dusi yari i. Eri Nyaka orindisi sawa ma alia ri, Mana zizaru, Ima Amuro dri ri’i.

Ayi aziri engazu aziri ‘diyi ma aa, Ma ndreni afa azini ni ku te ‘di lu ‘ba e’yo yini riki ‘bapi amboru Mavuri ma drilia ‘diyi. Ani di ayi ‘di ma asitasi Ma nga emi wi amve Ma tiliarisi ra. Eri di dria dezaru’bo. Ma mu e’yo nze muke. Ee, Ma Kanisa ma eselea ‘dia ci. Amena Munguvu ri’i, a’itabe azini ada i nga Ima ngulupi ece ra azini eri nga OVU MA NABI VUSI.” O Ee, ‘da ada.    

Ayi aziri engazu aziri ‘diyi ma aa ‘baki e’yo yini ‘ba amboru Mavuri ma drilia. Le mi zi nga mi ngulupi kini, ‘di ni i ‘yeria ama esele sawa vaa ‘disi ku ro? “Emi aviki tepuki kanisaa ku, te le mi ma eriki emi ocepi ni’i, emi ma aviki lu tepu ki aku emini pi alia.” .  Yi ‘duki Eri ma O’duko tepu driari ovuzu O’duko orodriru ndeniri ru ku, te yi ma o’dukoni.

Yi ‘baki e’da yi ma ngulupi pi vu, azini orodri YI MA azingazaniri vu, YI MA omveta E’yo ejizu, Amuro ma dri cezuri vu; te Amuro cani mu paso erini ku. Yi mukini eri a’iku. Yi mukini eri ‘ye ku. Yi mukini enza ‘ba Eri ma driaku; Eri O’duko Munguniri azini afa azi nduni yo. ‘Da afa E’yoni ‘yo ri’i.

Zita ‘ba pi ma omia andruri: Mungu pe andra a’di’i Ima Amuro ma dri cezu, tepuki kani azingaza geri-towisiri i?  Azingaza nde ni nga Amuroni ‘ba kililirura ya? Azingaza nde ni nga Amuroni oce ra ya? E’yo Mungunisiria, ‘da enga nga drio ovu geri Eriniri’i ku.

Agupi ki kakau andrusi ‘yopi kini yi engaki O’dukoti ‘di ma vuti bi azini a’i eli kakau kakau di, te yi di sawa ‘disi azingaza NDE ‘ba di o’duko orodriru ndeni le emi ma eriki rikiru.

Azingaza di emini nga mu vutini biri di ngo’i? Azinigaza emini muzu emi asiza ‘dani ‘daniri ‘bazu drinia ri ngo’i? Yi dria ‘yo yi omvezaru Munguvusi O’dukoti oluzu. Ma gani kaniku zini ‘da ku, te olu’ba azi ‘ba esupi ndeni ‘diyi ma azi azingaza geri-towisiri aliariki ‘yo, ‘Eri ovuni O’duko Munguniri’i ku, eri lu o’duko William Branham vuri i”. Azi ‘diyi ‘yo, “o’du O’dukoti agu-aluniri aliki ‘bo” , kaniku “O’dukoti ‘di ka ovu ni E’yo Driariruri i ku”.  ‘Da di ‘ba midri cepiri’i?

Agupi e’yo olupi okuza turu turu ma aa ‘bo ‘dileriki; drileka amboru azingaza geri-towisirini riki, SAWA ‘DISI O’dukoti gasi ani ‘YO, “O’dukoti ‘di enzoru”.

Azingaza driari ma abari ki ‘yo andrusi, “emi ma eriki O’duko Munguniri ma malaikani kanisaaku, lu aku emini pi alia.” “Adripi Branham ‘yoni tepuki avizu kanisaa tuaku ye.”

‘Da di a’izaruri ma drilea.  Ma cani a’iku adripi kaniku amvipi azi ‘yopi kini yi a’iki O’dukoti ‘di ra, kini Adripi Branham ni Mungu ma ‘ba o’dukoti ojipi malaika azirizuri ri, Mvi ‘Bani i e’yo nzeria ri, ni ta e’dezu e’yo nzeza azi oletaru ‘daleni ni rari. Le ta ma fe emi ma ale ma susu. Mi ka ovu Amuroni, ERI NGA ‘YE RA.

Mungu ojani Ima omi E’yo Iniri ma dria ku. Eri nga drio agu aluni pe i Ima ‘ba pi ma dricezu. Azi ‘diyi ovuki pari yini pie ci, te le yi ma ceki ‘ba pima dri ‘ba Erini pe ‘bapi ma dricezuri vu. Mi engaaki ‘ba di. Emi eriki nga afa olu’ba ‘di pini lu emini ri. Esele elaza yini ayu yi ma azingaza ‘bazu nabi vuri ma drilea riki. ‘Ba azi ma azingaza eco di ovu orodriru nde aga Mungu ma O’dukoti ecezaru ovupi e’dazaru azini ecezaru ra ovuzu ‘Di Opi ‘Yoni i ri ra ngoni ru? 

Eri lu amani azini lu amani ‘bo kini, agupi adaru ovu odu osuzabe, Orindi Alatararu adaru be yi ma driari, ecoki ovu enzoru ra.   GERI lu ALU ovuzu ndindiri, OAZU E’YO OKORURI BERI’I, a’disikuni O’dukoti ‘dini ‘ba o’dukoti ojipiri be alu.  O’duko Munguni pe Ovuzu ‘Di Opi ‘Yoniruri lu alu…ALU.

Azingaza adari ni nga lu midri kini AFAAZI YO orodriru ndeni aga E’yo Munguni engazu O’duko Munguni tepu ma driari vuri. Yi eco e’yo olu, emba, kaniku afa ci yini ovuzu omvezaru ‘yezuri ‘ye ra, TE LE YI MA ‘BAKI O’DUKO MUNGUNIRI OKO; TE YI ‘YEKI ERI KU, TE YI MA AZINGAZA ‘BARIA OKO. Yi ma ‘yetaki afa yini a’iri e’da.

Yi omvita zita O’duko Munguniri niri ‘bazu yi ma pari e’yo oluzuriari tru ‘yozu kini, Adripi Joseph a’ini olu’ba ki ku risi.  Eri a’ini e’yo muzu kanisari ma dria ku.  Yi ‘ba ada azi inzi. Yi Joseph ma embata ma vuti bi.  Eri dini ede tepu aluriki avizu azini erizu risi. Yi lu ‘ba pi ma dri atri zita kuluri vusi. Yi ma ‘yetani afa yini a’iri e’da afa yini emba yi ma ‘bapini risi, AZINGAZA YINIRI OKO.

Yi ‘yo, fezu ‘bapini tepu aluri erizu sawa aluri aliari ni dini azini ni. Eri ovuni ko’bo afa Adripi Branham ni andra ‘ye erini ovuzu ‘diarisi; ‘baki e’izu fonisi O’dukoti aluri erizu dria ani sawa aluri ma alia ri’i ku?

Mi zi nga mi ngulupi, Adripi Branham ka ta ovu ‘dia andru ruatia ci, muni ta fe Amuroni dria ovuzu E’IZARU eri erizu sawa aluri ma alia ku? Eri mu ta di o’bi Amuroni ejizu tualu IMA AZINGAZA ageyia kile ndra erini ‘ye dere Mungu ‘duni nga eri akua ku ria ku?

Ma ma isu nga afa azi ‘dia. ‘Ba e’yo onzopiri ki nga ‘yo, mi ne, eri di mu ‘da, ambamba agu nde ma dria; yi agupi azi ma vuti bi, William Marrion Branham i!!  Ama ma nedi lu nga afa E’yoni ‘yo ‘da ma driari vini:

O’du ‘ba o’dukoti ojipi azirizurini ‘diyisi, o’du Ayi Lodikeani ‘diyisi, eri ma ‘ba o’dukoti ojipiri nga e’yo zizaru Munguni riki ece kile ndra ecezaru Pauloni rile. Eri nga e’yo nze ra ani ‘ba nabi ‘da aipi eri ma ngulupi ma rusiri ki nga orodri efikaza nabi ‘da ma azingazaniri isu ra.

‘Di ni mu awoko fe sitani dri aga ‘ba azi ra, azini eri nga mu angu egba muvuleru dika tu di, te ‘ba di, cikani emi andriki ‘di E’yosi.  Ovuni agbari ma ‘yo eri ma’i si ku, yo, ecekini ma ta di ovu agu azi cini le, te eziki asi emini ki omi pie ani eri andrizu E’yo si. Ovuni afa azi agu azi cini ni ‘yo kaniku efini ece emi driri i ku, te afa Mungu ma nabini ‘yo ri’i.

Waraga ‘di ma vutia yi nga mu emini esele elaza fe esele elaza vutia esele elaza vutia, ani Ma AMENA ‘yo esele elaza driarini, TE DI NGA AFA MBGARI I RIA?  Yi esele elaza nde ki ayu luzu emi dri afa emini ‘yeri ma ovu nabini erizu ri’i, kani AZINGAZA YINIRI?  Yi kaki ‘yo O’dukotini, nabi i, ani di mi lu di yi dri O’duko ‘da ‘bazu OKO mi ma kanisaa.

Lu nga ini adriza ‘ba adani risi a’dule, ‘ba cini ni ra kini angu ‘ba kakauni ‘ba pini ovuzuria egata awazaruni ki vini indi e’yo werewereru embata kulu yini bi tualuri pi ma alia.

Eri ‘da’i. Esele elaza alu ‘dini lu mini eri cani, azini eri MUNI NGA KU OVUZU, ongulumu agupi piniri. Eri ovuni azingaza nde’i ku mupi ‘baki ecipiri a’disikuni adriza ‘ba adanisi a’dule, yi awazaru e’yo were were embata amboruriniri pi ma dria, yi ecokini dria a’i tulau ku, ani di le mi ma mu vule E’YO NDRA OKORI vu.

Te di a’dini nga mu ovu okpo onzi ‘yepiku ngapi mupu ovupi ogozaru ro ayi asizu ‘di aliari be ni, a’disikuni ayi asizu ‘di ni muria vule e’data Amuro E’yo Kililiruri vu.

A’dini nga ama dri ceni? O’DUKO ALU okpo onze ‘yepikuriniri beri le ma ci Amuro ma dri ni.

‘Da ma efi kini ama nga ovu E’yo be pale alu dika ekile erini ndra ovuzu fezaru kililiru, azini vazaru kililiru o’du Pauloni kisi rile.

Diza…Eri fezaru kililiru, azini vazaru kililiru. Eri leni efinieciza ku, Erini andra ovuzu fezaru kililiruri si, azini ama, Amuro’i, kililiru vaki azini a’iki E’yo driari ra.  

Eri ‘da’i. Eri nabi azi ovupi ecezarura ni ti eperia.

Eri nabi azi ma ti eperia ogogoni eli alifu iri ma vutia.

Eri ‘ba azi ovupi retu engazu amuti vusi, onita vusi, azini wudrikuru diniri vusiri ma ti epe ani kile andra Yohana Batista azini Elia okuri vu rile,

Eri nga lu e’yo eri engazu Mungu vu.

Eri nga ovu “di Opi ‘yoni be” azini e’yo nze Munguni.

Eri nga ovu tile Munguniri’i

ERI, KILE ERINI OVUZU AZIZARU MALAKI 4:6 RILE, NGA ASI ANZI PINIRI KI OJA VULE ATAPIKA PI VU.

Eri nga ‘ba opezaru o’du asizuri niri ki eji ro azini yi nga nabi ovupi ecezarurari eri e’yo ada mgbari fe kile erini andra ovuzu Paulo be rile.

Eri nga e’yo adari ma dri ogo kile yini andra ovuzu eribe rile.

Ani ‘ba opezaru eri be o’du ‘da ma aliari nga ovu ‘ba adaru Opi ni e’dapi azini ovupi Ruati Erini azini ovupi O’duko Erini azini azi Erini ngapiri ki. Haleluya! Eneki eri ra?   

Ama Eri ne Ama Eri a’i. Ama ava liria ERI ma dria.

Emi a’izaru emuzu ruecizu ama be amani tile Munguni, O’duko mupi Amuro Yesu Kristoniri ecipi, Eri ma nabi ecezarurari eriria, erini amani e’yo ada mbgari feria, sawa azia etusi (12pm), Jeffersonvili saa si (7pm Ugandaa).

Adri. Joseph Branham i  65-0725M — ‘Ba Odu Osuzabe Sawa Asizanisi Riki