Amuro Drinzasiku Leleturi,

Sawa azi kaniku ‘ba azi engaki nga drio ovu andru ri le ku. Ama Eri ma aa, karimvaki afa Dria Eri ni je amani ri pini. Eri Ima alatara ale amabe, kpere Eri ma aa, ama ecaki di alatara Munguniri ma mgbari’i.

Eri ni andra ama okoru aziza Mungururi si, kini ama nga ta ovu Eri ma Amuroni. Eri pe andra ama’i, apekini andra Eri ama’i ku. Ama emukini andra ama cenisiku, eri andra Eri ma peta ni. Sawa ‘disi Eri ‘ba di asi azini idri amani pi aa E’yo Eceza treru Eri ma E’yoni ri.

O’du vusi o’du vusi, Eri Ima E’yo eceria ama dri, Ima Orindi osuria ama dria, Ima idri mgbari e’deria ama aa. Drio nga yo Eri ma Amuroni ovuzu ‘izaru asi yini pi ma aa niria ra kini eyi Eri ma ale kililiruri ma aa, azini Eri ma otita aa, oazu Eri ma E’yo be, Eri ma O’duko eririari si.

Ale Munguni azini O’dukoti ‘dini ama asi ki efi kpere eri di e’buria e’bue’bu. Afa azi nduni yo ama le eri, e’yo nze drinia, ticita ‘yezu ageinia, kaniku lu eseleni wereru amani nga lu eri ri alezu azini Opi ni inzizuri.

Ama ekile Musa le rokodri ma ngukua. Ama aciki andreti andreti Mungu Okpo-ei be ‘bo, azini andreki O’duko ndeni e’yo nzeria ma dri ‘bo; lu ko’bo otizaru E’yo be azini aziza sawaniri be. Eri ‘ye afa azi ama dri ‘bo. Ama ovukini drinzasi Erisi ku. Aleki tu Eri ekuzu wudrikuru dri. Ama a’ikira Opi Yesuni O’dukoti sawaniri’i azini ama ERI MA AMURO’I.

Eri ce ama agei Ima E’yosi. Endrilendri azi abazani ni yo, ‘di Mungu ma geri fe ri’i. Mungu ojani Ima omi E’yo Iniri ma dria ku. Eri pe andra Ima malaika azirizuri Ima Amuroni omvezu, azini di Oku nde ma ta mbazu laini alia E’yo Erini be.

Afa azi yo idri ‘di ma alea te lu Eri’i azini Eri ma E’yoni. Acakini Eri esu cara ‘dini ku. Eri idri ma drilea amaniria. E’yo ba azini Okpo Mungu Okpo-einiri eri di i wudrikurusi ara kile nga driori le ku. E’yo ni di sawa ‘disi dri azini bile Amuroniri pi aa. Sawa eselecozaniri ni di pari ‘duria, Mungu ni Amuro azi omveria, azini Sitani kanisa omveria.

Aleki M azini E’yo Mini tu, Opi. Acakini isu cara ‘dini ku. Ama riria indikindi Mi E’yoni ri alia o’du dria, niria, ecaria ngonde Mi Emuta mbaleruri ni. Ata, le di ma ovu enyia tu. Ama ecoki eri ama ra, Opi. Ama teria asi’bata azi amboruni si.

Ata, mi fe ama ma oaki asi adarusi agara azini a’baki ama oyoki o’diru. Anikira ama A’ita E’yo Mini aleari ni veria asi amani alia. Mi ‘du ama abataki dria ‘bo. Afa azi ‘daa yo pe lu E’yo Miniri’i. Ama ndindi, azini ama ovukini drinzasiku luzu wudrikuru dri, ama Mi Amuro Tepunirikiri. 

Ma le wudrikuruni a’i emuzu erizu amabe Sabatu ‘disi sawa azia etusi (12pm), Jeffersonivili saa si (7pm Ugandaa), amani O’dukoti ‘di eriria: Drinzasi 65-0711.

Adri. Joseph Branham i

E’yo Ba Marakoni 8:34-38