Mwebapala Kyāla Ni Kipapa Pa Ikyēne,

Uswe tukaya kunyuma ku kikīngo kangi mma, banini Umwe, Kyāla īsìle ukuya mbubonekeli bõsa kwa uswe. U Kyāla gwamaka gwa Kumwanya na pãsi, Uyu bwīla ikikīngìle Mwēne ku bandu ngati Mbanda ya Moto iyi yãlísìle ukufuma kwa Kyāla nu kwītúgàla mu mbili gwamfu gwákólelìgwe Yeso; polelo gwabuyile ku Mbanda ya Moto kangi yilinkuboneka kwa Pauli pa nsebwe gula ku Damasko, yo lilino yīsìle kangi mu bubonekelo bõsa kangi yitūgele kangi mu nyõfu gwabūndu mu gwãndùmi ntumigwa Gwãke, William Marrion Branham, yikubilikila pãnja u Nsīngilìgwa Gwãke ku Mwēne.

Kyāla ãbíkìle u gwãndùmi Gwãke pa kīsu ukwiyimila Mwēne ngati mwimilili Gwãke unsayiligwa ikubuka nkati ikikīndakipeligwa ikikulumba ikisitakumanyigwa. Umwẽne ikumanyila-ngani nu kutwala pãnja ifindu ifi ilīnogonèlo lyakipeligwa likabagila ukwēnèsya. Umwẽne ãtumìgwe ukutwala pãnja ikyãkubutìtu nu kuyobela-ngãni ifindu iki kili, kangi ifindu ifi fifumile ukuya, ni findu ifi fisa kuya. Umwẽne yo Lisyu lya Kyāla ku Nsīngilìgwa.

Ngimba ikyēne kyo fiki? Kyāla, Kyāla kunyuma ku fipapa, ikipapa kyãbùndu. Ikyo kyo katikati kitalusye.

Abalondesya-busobi bīngi umwīsyùgu bakabagila ukutupilikisya uswe bãnalòli bītìki banaloliloli. Ku bēne uswe twīsìle ukuya náti yimo. Abēne bikuti uswe yuswe bītìki babukyala nikuti uswe tukwīpùta u nsololi…

U ndondabusobi yumo, ãyobìle kwa une, ukusuluka mu Tucson. Umwẽne ãtìle, “Ugwe tumenye, abãndu bamo bikukupela ugwe náti yimo, kangi abãngi bikukupela ugwe u kyāla yumo.” Une ndinkuti, “Ena, ikyo mu luko lumo kikwenda lõsa kanunu.” Une nãmènye umwẽne ãgélàga ukulonda-ubusobi mwa une. Muketile? Umwẽne alinkuti, “Abãndu bikwīnogòna ugwe gwe kyāla yumo.”

Bomūmo ukwēne kwayīlìle akabalilo kãko Yeso ãli apa pa kīsu, ukwēne kuli lulalula umwīsyùgu nu nsololi Gwãke. Abãndu bakaya kunyuma kwa kikīngo mma; abēne bagogigw’amaso ku bwãnaloli. Uswe tutikulonda nakimo lõli injila imbīgwe na Kyāla kuli umwīsyùgu: Mwēne ãkīngisìgwe mu nyõfu, i Lisyu-lya-pakanwa lya Kyāla ili lyãlyēgwelélìgwe nu kupayigwa lõsa kuli u Nsīngilìgwa.

Akabalilo kãko Kyala ãbonekile-pabwēlu mu kīsu, Umwẽne, Umwẽne īfísàga kunyuma ku kikīngo kimo; kunyuma ku kipapa kimo kya Nyãmbàla unkõlelìgwe Yeso. Umwẽne ãkīngìgwe kangi īfísàga kunyuma ku kipapa kya nyãmbàla unkõlelìgwe Mõse, kangi abẽne bãli bakyala komma baKyala; lõli abēne Kyāla, u Kyāla yumo-ntiga, itolo ikwandula … Kyãke, ikubomba ikindu kilakila kila kabalilo, ikutwala i Lisyu ili. Kyāla ãpelìle ikyēne injila yila.

Uswe twe itolo tulukiligwe ku Lisyu, i Ndumi ya sala. Ikyēne lilino kitupelile uswe ukuya Lisyu likīngìgwe kunyuma kwa nyõfu gwabūndu. U Nsīngilìgwa nu Nyãmbàla Bali yumo. Kyāla yo yumo, kangi i Lisyu lyo Kyāla. Uswe tulukiligwe ni Lisyu.

Nubusulumanie, u bwīpãgulanio pakati pa bītìki umwīsyùgu bo bwakuti abēne bikwīpilìka uswe tukubīka fingi fīyo pa nsololi unsisimikisigwe na Kyāla. Pa bukīndàne, abēne bikulonda ukubīka ubulóngòsi bula pa batimi bãbo.

Kyāla atikwandula ulubãtìko Lwãke; Umwẽne ikutuma u NYÃMBÀLA YUMO-NTIGA ukulongosya u Nsīngilìgwa Gwãke. Ikyēne kyo Mbepo Mwīkèmo Gwãke mwa kila yumo gwa uswe, ukutulõngòsya uswe ukwīsìla mu I MBANDA YA MOTO.

I Lisyu likwisa ku yumo-ntiga. Mu ngulilo yiliyõsa, lulalula, na mu ngulilo sya kipãnga, ukufuma ku kyakipanda kilakila mpaka ku kyangwangu. Abãngi bali na mabuyi gãbo, uko ko kutalusya, kēkèsya lõli syala kibutali ni Mbanda ya Moto yila. Muketile?

LOLI KYO FIKI USWE TUKUPILIKA UMWĪSYÙGU…I KINDU KILAKILA.

Umwe mukukumbuka iki Datani na bala bãyobìle pãnja kula? Abẽne bãtile, “Lilino, Mõse, gulila apa itolo i miniti! Ugwe kwega fingi fīyo pa gwīmwène, muketile. Lilino balipo abanyambàla abãngi apa aba Kyāla akõlìle.”

Uswe tutikulwana nu butumigwe; Kyāla abakõlìle abẽne, lõli bakundwe na bãkalumbu, linga untimi gwãko atikubīka lilala i Lisyu-lya-pakanwa lya Kyāla ukuya lyo Lisyu-lya-pakanwa ilipala-ukukinda ugwe kufimbilisigwa ukupilikisya mu ukwīsìla mu kukina amatepi mu kipãnga kyīnu, umwẽne atikubalongosya umwe ku njila imbīgwe na Kyāla.

Ikyo kyo kyãbwãnálòli. Abēne, kila mūndu, bakõngàga kanunu akabalilo kõsa abẽne bakõngàga mula, lõli akabalilo kãko yumo ãgelìle ukufyūka mmwanya nu kwega ubuyo bwa Kyāla ubu Umwẽne ãpèle Mõse, uyu yo asūngulìgwe-ngani nu kusayiligwa ku mbombo yila, ãgelìle ukwega ubwēne umoto gwãsulwìke pãsi nu kwīgùla ikisu nu kibamila abẽne mulamula nkati mu kyēne. Muketile? Muketile? Mwamdege pakikisyaga. Muketile?

Uswe tukufīmbilisìgwa ukulukililigwa ku Lisyu lila ili lyãyóbìgww nu kubĩkigwa pa matepi. Ikyo yo Kimalisye gwa Kyāla. Ilyo lyo lyēne Lisyu ili u Nsīngilìgwa abagile ukwitikisyapo. U butumigwe butisamo siku ukubūngania u Nsīngilìgwa, lyēne li Lisyu-lya-pakanwa lya Kyāla pa matepi.

Une mbagile ukubõmba nakimo kisita ugwe; ugwe ubagīle ukubõmba nakimo kisita une; napamo gwãbagìle ukubõmba kalikõsa kisita Kyāla. Popãpo, palikimo ikyēne kikupela ubulūndiko bumo, ubulūngisanio. Kyāla ãlindumile une kuli ulubīngililo lumo; ugwe kwitika ikyēne; kangi pala ikyēne kikubõmbigwa. Ikyo kyo itolo ikyēne, muketile, kisisimikisigwe nubupelelesye.

PENE palikimo ikyēne kikupela KILUNDIKO kimo, u bulungisanio. Kyāla ãtumìle William Marrion Branham kuli ulubīngililo lula. Polelo, PENE linga kwītika Ikyēne, kisa Ikyēne ukubõmbigwa; kisisimikisigwe nubupelelesye.

Une ngaya yo yūne ne nguyoba ikyo, bakundwe na bãkalumbu. IKYENE YO KYĀLA IKUYOBA IKYO UKWĪSÌLA MU NSOLOLI GWÃKE. Komma ukundeka u mūndu aligwēsa ukukubula ugwe ikikīndàne pamo ukugela ukulīngania ikyēne mbukīndàne kwa ugwe. LYĒNE LI LISYU-LYA-PAKANWA LYA KYĀLA PA MATEPI LISA KÕNGANIA NU KUPELESYA U NSĪNGILÌGWA. INJILA YILIYOSA IYINGI, UGWE UTISA KUYA NSĪNGILÌGWA.

Popãpo une ngwinogona ukuti ikilundiko kyosa kya uswe bakusi tukwinogona i kindu kilakila. Kyāla, ni Kipapa pa Ikyēne! Kyāla, ni kipapa pa Ikyēne! Ikyēne kibagile ukupilikigwa ngati nsyutano, ku kīsu, lõli ikyēne kikuwaba abãndu bõsa ku Mwēne.

Ngimba ugwe ukupilika iki umwẽne ãyobìle lululu? Kyāla ni kipapa pa ikyēne ikukwãba abãndu bõsa ku Mwēne.

Bo i kīsu kikulukililigwa kuli i nati yimo, uswe tukulukililigwa ku Lisyu-lya-pakanwa lya Kyāla kangi tukukõlelìgwa Nsīngilìgwa. Ilyēne likutukwabila uswe pãnja pa bufuluganiko ubu, ukubīka nkati mu Buyepo bwa Kyala. Uswe twe nàti iyi yilukililigwe-ku-Lisyu lya Kyāla.

Isaga kangi yaga ndukililigwe ku Lisyu-lya-pakanwa lya Kyāla na uswe Pandungu ugu pa 12:00 PAMUSI, akabalilo ka Jeffersonville, bo Ilyēne likukwaba abãndu bõsa ku Mwēne.

Nkundwe Yosefu Branham

Ndumi: I LIKĪNDÀNE 64-0614E

Masimbo: Gwãkwànda Bakorinti 1:18-25./ Bakibili Bakorinti 12:11