Mwebapala Bapilikisya Matepi,

Akabalilo kafikile ukuti aligwesa ikufimbilisigwa ukwilalusya mwene: “Akabalilo kako une ngupilikisya amatepi, lyo Lisyu-lya-pakanwa nki une ngupilika? Ngimba ilyene lyo itolo lisyu-lya-pakanwa lya William Marrion Branham, pamo ngimba une ngupilika i Lisyu-lya-pakanwa lya Kyala kuli ilisiku lyitu? Ngimba ilyene lyo lisyu lya mundu, pamo ngimba une ngupilika u Isi Syo Ikuti U Ntwa? Ngimba ngufumbwa umunduyumo ukulingania iki une ngupilika, pamo ngimba i Lisyu lya Kyala litikufumbwa ubulinganio nabumo?”

Ilyamulo lyitu lyo: Uswe tukupilika i Lisyu Iliyobigwe lipeligwe nyofu. Uswe tukupilika u Alfa na Omega. Uswe tukupilika Umwene, u Mbanda ya Moto, ikuyoba ukwisila mu milomo gwabundu bomumo Umwene aayobile Umwene aabagile mu lisiku lyitu.

Uswe tutikupilika u nyambala, uswe tukupilika Kyala, yulayula mmayolo, umwisyugu, na bwilanabwila. I Lisyu-lya-pakanwa lya Kyala ili lyo lyengoko, lyamakako ukukinda ulubo ulwa lwenge-kubili, likutumula na pakati pa kifupa, kangi mmanyila-ngani gwa minogono aga gali mu ndumbula.

Ikyene kisetuligwe kwa uswe ukuti iki Umwene aali akabalilo kako Umwene aalyeendile mu Galilai kyo kindu kilakila Umwene ali ikilo iki mu Jeffersonville; kindu kilakila Umwene ali ku Branham Tabernacle, kangi isa kuyaga bwilanabwila. Iki Umwene aayobile Umwene aangali ikubomba, Umwene abombile.

U nyambala yula akaya Kyala, loli Kyala yo akaali mumi kangi ikuyoba ku Nsingiligwa Gwake ukwisila mu nyambala yula. Uswe tutikusulwa mma ukwiputa u nyambala yula, loli tukwiputa Kyala mu nyambala yula; kabuno umwene yo nyambala uyu Kyala aasalile ukuya LISYU-LYA-PAKANWA LYAKE nu kulongosya u Nsingiligwa Gwake mu masiku gabumalikisyo aga.

Panongwa yakuti Umwene atupele uswe ubu ubukulumba u Busetuli bwa kabalilo kabumalikisyo, uswe lilino tubagile ukusyagania YWANI USWE TULI, i Lisyu lipeligwe nyofu mu lisiku lyitu. Setano akabagila kangi mma ukutusyoba uswe, kabuno uswe tumenye uswe yuswe Gwake umpyanikisigwe losa mfunde Nsingiligwa gwa Lisyu.

I Lisyu-lya-pakanwa lila lyaatubuulile uswe: Kyosa uswe tufumbilwe KITALILE kipigwe kwa uswe. Bukayapo nabumo ubufumbwe ukuguulila. Ikyene kiyobigwe, IKYENE KYO KYITU, IKYENE KYOMBO KYA USWE. Setano akaya na maka pamwanya pa uswe; umwene aponjoligwe.

Naloli, Setano abagile ukusopa ububine, ubusulumanio, ni ndumbula-mbabe pa uswe, loli Tata atalile atupele uswe ububagili ukunkaga umwene PANJA…USWE ITOLO TUKUYOBA I LISYU, kangi umwene ikufimbilisigwa ukusookapo…komma panongwa yakuti uswe tukuyoba lulo, loli panongwa yakuti KYALA AAYOBILE LULO.

U Kyala yulayula uyu aapelile abalukoti, akabalilo kako bakaaliko abalukoti nabamo. Kila kyalimpele Kalumbu Hattie ikinyonywo kya ndumbula yake: abanabalumiana bake babili. Kila kyaabumbulwisye i lyulu-lya-kansa lya Kalumbu Branham bo kikaali ikiboko kya dokotala ukumpalamasya umwene. Umwene yo KYALA YULAYULA uyu yo akaya kwene kukuya na uswe, LOLI UMWENE MUMI KANGI IKWITUUGALA MWA USWE. USWE YUSWE LISYU LIPELIGWE NYOFU.

Akabalilo kako uswe tukuketa nu kupilikisya ku Lisyu-lya-pakanwa pa matepi, uswe tukuketa kangi tukupilika Kyala ikwisetulwa Mwene mu nyofu gwabundu. Uswe tukuketa kangi tukupilika ywani Kyala aatumile ukutulongosya uswe ku Kisu Kyalufingo. Uswe tukusyagania mwene u Nsingiligwa isakuya nu Busetuli bula, kokuti uswe twisile ukuya basita-kutila. Nakumo ukufumbwa ukuya bateteme, batolwe, basulumanisigwe, bakuswiga pamo bakupasya…USWE YUSWE NSINGILIGWA.

Pilikisya kangi iya’mumi, nkundwe gwangu, iya’mumi!
Pilikisya kwa Yeso lilino kangi iya’mumi;
Buno Ikyene kisimbigwe pa matepi, haleluya!
Ikyene kyo kwene ukuti uswe tupilikisye nu kuya bumi.

O, Nsingiligwa gwa Yeso Kristi, lyo lisiku ilikulumbanki uswe tukwitugalamo. Iki uswe tukuguulila, miniti pa miniti. Itolo ilisiku lililyosa lilino uswe tukuyaga pakuketa abaganigwa bitu bala, polelo, nkabalilo ka kukupisya i kisige, uswe twisa kuya panja pa apa kangi na bene pa lubafu ulungi. Ukwene kyo kifuki fiyo ikyene kikufwana ngati uswe tukabagila ukwipilika ikyene…LWIMIKO!

Isaga Nsingiligwa, unko uswe tongane kamokene kangi ukusyungutila i Lisyu-lya-pakanwa lya Kyala Pandungu ugu pa 12:00 PAMUSI, akabalilo ka Jeffersonville, bo uswe tukupilika Umwene ikuyoba kwa uswe i Lisyu lya Bumi Bwasyepwa.

Nkundwe Yosefu Branham

Ndumi: 63-1229E Keta Kubungi Kwa Yeso

Masimbo:
Mbalilo 21:5-19
Yesaya 45: 22
Sekaria 12:10
Mwikemo Yohani 14:12