Mwebapala Mwebãbuligwe Bala
Lilino, kula, “abene,” komma u ntulwanongwa. “Abene,” ikyo kyo, i kipanga kya lisiku lila, abene babwagile u busobi nu Nyambala Uyu aali Lisyu. Ngimba ikyo kitalusye? Abene babwagile ubusobi nu Nyambala Uyu aali Lisyu. Lilino abene bikwaga ubusobi ni Lisyu likubombela mu nnyambala.
Ukufuma ku bwandilo i kisu kimpikile Umwene, kinkanile Umwene, kikanile ukwitugala ni Lisyu Lyake mu kukyunga inyiho syabo, utumanyisyo twabo, utufundo twabo. Abene akabalilo kosa bapondilwe u lubatiko lwa Kyala; Kyala, ngati Nyambala, uyu aali Lisyu, kangi lilino i Lisyu likubombela mu nyambala.
Loli mu lisiku lyitu Umwene aayobile, “Une nisa kuya na kabugutila akanini, abasaligwa abanandi. Abene bali mwa une ukufuma ku bwandilo. Abene bisakunyambilila Une nu kwiitika i Lisyu Lyangu nu nnyambala Une nsalilu ukusetula i Lisyu Lyangu. Umwene isa kuya Lisyu-lya-pakanwa Lyangu ku bene.”
“Abene batisa kuya baasoni ukufumusya i Lisyu-lya-pakanwa Lyangu. Abene batisa kuya baasoni ukukibula i kisu Une nisile kangi kangi niinaangisye Nimwene ukwisila mu nyofu ugwabundu bomumo une naayobile Une angali ngubomba. Akabalilo aka abene batisa kummwiputa u nnyambala yula, loli abene bisa kunyiputa Une, u Lisyu, lilyo lisakuyoba ukwisila mu nnyambala yula. Abene bisakungana Une nu lukole lulilosa lwa bundu bwabo.”
“Kokuti, Une mbapele abene fyosa abene bikufumbwa ukuya Nsingiligwa Gwangu. Une mbayengelile abene ni Lisyu Lyangu; kabuno abene BO LISYU LYANGU lipeligwe nyofu. Linga abene bikufumbwa ulubumbulusyo, abene bikuyoba i Lisyu Lyangu. Linga abene balinakyo kilikyosa ikyakwitabaniamo iki kikubapinga abene, abene bikuyoba i Lisyu. Linga abene bali nu mwana uyu akulile kubutali, abene bikuyoba i Lisyu Lyangu. Kilikyosa abene bali nakyo mbufumbwe, abene bikuyoba i Lisyu Lyangu, kabuno abene bo Lisyu Lyangu lipeligwe nyofu mu bene.”
“Abene bamenye uyu abene bali, kabuno Une niisetwile Nimwene ku bene. Abene basyele babwanaloli kangi basubiligwa ku Lisyu Lyangu kangi bikongana palikimo ukusyungutila i Lisyu-lya-pakanwa Lyangu. Kabuno abene bamenye i Lisyu-lya-pakanwa Lyangu, Lisyu Lyangu, Mbepo Mwikemo Gwangu. Abene bamenye, kuko i Lisyu liliko i Ngwasi sisa kutelengana.”
Bo u Nsololi Gwake ikuyoba i Lisyu Lyake nu kukemela i ngulilo iyi panongwa ya bukomelelo bwakibili bwa Yeso Kristi kangi ikufumusya abene bapyutigwe, u Nsingiligwa isa kusangalukaga. Kabuno uswe tumenye USWE TWE Nsingiligwa Gwake uyu iitikisye nu kwambilila i Lisyu Lyake. Uswe tukulila panja ukufuma mu mabusolofu ga ndumbula yitu nu kuyoba:
Une ne Gwako, Ntwa. Une ngwilambalika nimwene pa kigemo iki, itolo ukuya gwakwikemesya mumo unemmanyile ukwipela nimwene. Ega ikisu ukufuma mwa une, Ntwa. Ega ifindu ukufuma kwa une ifi fyakumalika; mbapo une ifindu ifisitakumalika, i Lisyu lya Kyala. Ndi yaga une gwakubagila ukwitugala i Lisyu lila kifuki fiyo, mpaka i Lisyu lisa kuyaga mwa une, kangi une mu Lisyu. Paga ikyene, Ntwa. Une ndingisamo siku ukusyumbutuka ukufuma ku Lyene.
Pala bulipo u bumi, kangi pala bulipo u bufwe. Yilipo I njila indalusye, kangi yilipo injila insobi. Pala bulipo ubwanaloli, kangi pala bulipo ubusyobi. I Ndumi iyi, i Lisyu-lya-pakanwa, lyo njila ya Kyala imbelelesye imbiigwe kuli umwisyugu. Isaga ilungisaniaga ni kiyabo kya Nsingiligwa gwamaka gwa Kyala bo uswe tukubungana ukusyungutila i Lisyu Lyake ilisetuligwe nu kupilika i Ndumi: U Lukemelo 63-0707M.
Nkundwe Yosefu Branham