Gwempala Kipanga kya Branham,

Mbonio ku Nsingiligwa ya Yeso Kristi ukufuma ukusyungutila ikisu-kya-pasi, aba bikwitika i Kipanga kya Branham, i Lisyu-lya-pakanwa lya Kyala, lyo kipanga kyabo kya kukaaya kuko abene bikuswiligwa mwambepo na Mana amafisigwe aga gabikigwe-mu-ndamba nu kukyungigwa kuli u Nsingiligwa gwa Kristi.

Aka ko kaya kangu kalwalo; ili lyo likulumba lyangu; kuno ko kuko uswe tubambikigwe. Lilino, kolelela ikyo mu linogono kali kyo fiki kikuboneka pa buyo. Lilino, linga ugwe gwe gwamahala, ugwe kwisa kukola ikindukimo. Kali kyo fiki kikuboneka pabuyo, ili lyo likulumba lyitu, papapa apa!

Bingi abitiki bwila batoligw’ukupilikisya pamo babikile ilinogono lyabo pamo ubulinganio ku iki u nsololi aayobile apa, loli umwene ikumbula u Nsingiligwa nukutalula, “linga umwe mwe bamahala, umwe mwisa kukola ikindukimo, ili lyo likulumba lyitu, papapa apa!

Ngimba umwene aasanusyaga fiki na iki?

Akabalilo kako Nkundwe Branham aali apa, bingi batoligw’ukupilikisya umwene kangi balinkwinogona u Nsingiligwa aafimbilisigwaga ukubuka ku Arizona nu kunkonga umwene kula, ukuya mu Bunyakiligwo. Nkundwe Branham aalyamwile abene pabwelu, SYALA KUNO, UBU BO BUYO BULA.

I kibugutila kyosa ikinywamu kya bene kili nkusokapo injila yila, kangi abene balondaga ukubuka iki nu kubomba kila, ukufuma papo une nababulile abene ukusyala kula. Syala kula, syala papapa apa; ubu bo buyo bula.

Abandu balinkusumuka ukusokapo ukufuma kulikosa ukusyungutila United States ukubuka ku Arizona, loli umwene pabwelu aababulile abene: Syala papapa apa, ubu bo buyo bula!

Syala mu Jeffersonville? Ikyo kyo iki umwene aayobile!

Ubwangu u Busetuli bobwakuti, ikyene aali Kyala, ikkuyoba ukwisila mu nsololi Gwake nu kubabula abandu, “SYALA NA MATEPI.” Bula bo BUYO BULA!

Umwene aasulumenie fiyo kangi aayobile umwene afimbilisigwaga ukubomba ikindukimo na bandu bosa bala. Ngimba ikufimbilisigwaga ukubomba fiki? Kyo kipanga nki umwene angali ukubatumako? Kokugu abene babagile ukubuka? Ngimba Nkundwe Branham aayobile fiki umwene aafimbilisigwaga ukubomba?

Popapo lilino, une ngufimbilisigwa ukubatwala abana bala ukugomokela apa kuli ikindukimo ukulya. Abene bali ukusuluka kula mu lulangalanga bikususilwa.

Umwene akaayobile abene angali bikufumbwa ukubuka ku kapanga kamo akankaya nu kwegako utu utupooso utunini abene baabagile ukuswiligwapo. Umwene aayobile umwene aafimbilisigwaga ukutwala abene UKUGOMOKELA APA kuli ikindukimo ukulya, kisita-ikyo abene angali BIKUSUSILWA KU BUFWE.

UBWANGU U BUSETULI, BINANGU

Lilino, kisita kamokene kangi ukusita-kupilikisya, pamo ukuyoba ikindukimo umwene akaayobile mma, ukwisila mu kuyoba, “Nkundwe Branham aalondaga umwitiki aligwesa ukusamila ku Jeffersonville ukuya Nsingiligwa.” Nkundwe Branhama aamenye bosa abandu bala, kangi umwitiki ALIGWESA ukufuma ukusyungutila i kisu-kya-pasi, akabagile ukusamila nu kwitugala mu Jeffersonville. Ikyo angali kya kusitakubagila. Popapo umwene aasanusyaga fiki? Umwene ONGANIAGA u Nsingiligwa gwa Kristi ukusyungutila a MATEPI aga galyegeleligwe nu kubikigwa-mu-ndamba kuli u Nsingiligwa ukuswiligwapo.

Iyi i Ndumi, Ili i Lisyu, lyo Lisyu Iliyobigwe lya Kyala kuli umwisyugu kangi Ilyene lisa koongania nu kupelelesya u Nsingiligwa gwa Yeso Kristi.

U mfimba kyo iki i ngwasi sikuswiligwapo. Lilino, i ngwasi yikwinogoneligwa mu i Baangeli, u nsololi. U nsololi yo ngwasi. Kyala—Kyala ikwibilikila Mwene i Ngwasi yimo, kangi uswe yuswe “utungwasi” polelo, a—a bitiki. Umwe muketile? Kangi u mfimba go fiki ugu abene bikuswiligwapo? Lyo Lisyu. Kulikosa i Lisyu liliko, ikipeligwa kyanaloli kya njuni kisa kunangisya kyene.

Kokugu liliko ilipelelesye, ilisisimikisigwe, ilisita kusitakupilisya, i Lisyu lya Isi Syo Ikuti U Ntwa kuli umwisyugu? Bulipo ubuyo bumobwene, A MATEPI.

Une naabagile ukukindilila nu kukindilila, kyandisyo pa kyandisyo, loli i Ndumi iyi na iki Nkundwe Branhama aayobile fikwega u Busetuli ukufuma kwa Kyala. Uswe tukufimbilisigwa ukubala pakati pa mabung’wale ukwisila mu busetuli, loli ukuyoba iki umwene aayobile. Kabuno Ilyene lyo LISYU ILIPELELESYE.

Laalusyo na Maamulo kuli umwisyugu na iki une NGWITIKA

Umwisyugu, abalumbilili bingi bikuyoba ku bandu ukuti ukwisila mu kuya ni Kipanga Kyakukaaya Kyatepi uswe tuli panja pa Lisyu na iki Nkundwe Branhama aayobile ukuti tubombe. Abene bikwipilika uswe tubagile ukubuka ku iki abene bikukolela kangi bikwinogonela ukuya kipanga.

Galipo mbwanaloli mingi, mingi amaandisyo kuko u Nkundwe Branham ikuyoba iki.

Lilino, ugwe buka ki kimo ikinunu ikipanga kya Nongwainunu Inyisusye kangi iyegela ugwe ikipanga kimo kyakukaaya.

Kangi une gwitika ikyo ni ndumbula yangu yosa, panongwa yakuti umwene aayobile lulo. Loli une gwitika uswe tukubomba ikyo mu KUYA NI KIPANGA KYATEPI KYAKUKAAYA. Ubuyo bwitu bukaya bo ubu bupala kwa Ntwa mma. Ikyo kyo kiyumba itolo. Loli akabombo kiitu ku Ntwa ko kusyala ni Lisyu Lyake, KOMMA U BUYO PAMO IKIYUMBA. U buyo butikupoka nu kupelelesya u Nsingiligwa, I LISYU LIKUBOMBA.

Linga une ngubuka ku kiyumba kya kipanga, loli abene biibibwe IKINDU IKINYWAMU: ukupilika i Lisyu-lya-pakanwa lya Kyala ukwisila mu Kubinda Kukina, kangi bapyanikisye ikyene ukwisila mu ITOLO ukupilika a balumbilili bikulumbilila i Ndumi, ngimba kila kisa kwiikutisya kimalisye nu kuswila u moyo gwako? Ikyene kibagile ukwiikutisya u moyo gwako, nkundwe gwangu na kalumbu, loli ikyene kitisa kwiikutisya u Nsingiligwa.

Unko une niingisyepo apa nu kuyoba ukuti balipo maelifu ga bandu aba bakaya nakyo ikiyumba kya kipanga ikyakubukako. Ngimba abene bayongile? Linga abene bakaya nayo u ntimi pamo ikipanga, ngimba ikyo kikusanusya abene bakabagila ukuya Nsingiligwa? Linga ugwe kwitugala nkati mwa mamailosi 100 ga kiyumba kya kipanga, ngimba ugwe kufimbilisigwa ukubuka ku kipanga kila? Loli linga une ngwitugala pabulali ukongelelapo, une ndikufimbilisigwa ukubomba? Une ngufimbilisigwa ukuketelela-pa-sinema u ndumbilili yula, loli une ngabagila ukuketelela-pa-sinema amatepi? I kiyumba ikipalamasigwe kyo iki u nsololi ikuyoba kyo kindu ikipala fiyo uswe tukufimbilisigwa ukubukako?

Kokugu u nsololi aalondaga ukutwalako u Nsingiligwa?

Linga ugwe ukabagila ukwisa kuno ku kipanga iki, aga kimo ikipanga kubuyobumo; buka ku kyene.

Kamokene kangi, kokugu kuliko ulusalo lwake ulwakwanda ukutuma abandu? Ku Branham Tabernacle, i Lisyu, a matepi. Ikyo kyo iki Kyala apele u Nsingiligwa Gwake ukubomba mu kabalilo-kakuusulo aka, kangi uswe tukubomba ikyene ilisiku lililyosa KANGI Pandungu guligosa.

Ukuti ndingayaga nsita-kupilikisigwa. UNE NDIKUYOBA ugwe kufimbilisigwa ukuketelela-pa-senema a matepi na ba Branham Tabernacle ukuya Nsingiligwa. Une NDIKUYOBA MMA ugwe ulingabukaga ku kipanga. Une NDIKUYOBA MMA ugwe ukabagila ukupilika abalumbilili. Linga ugwe kwitika ikyo, ugwe usokilepo pa Lisyu. Une nguti ukupilika i Lisyu-lya-pakanwa pa matepi lyo Lisyu-lya-pakanwa ilipala ukukinda UGWE KUFIMBILISIGWA UKUPILIKA, kangi une ngwitika u ntimi aligwesa ikufimbilisigwa ukukina i Lisyu-lya-pakanwa lila, a matepi, mu fipanga fyabo. Loli abene bapelile ululeyo lulilosa ulu luliko UKUSITA KUKINA A MATEPI. Linga kila kyo kipanga kyako, ugwe utukuswila pa Lisyu.

Iki kyo pabwelu iki umwene akaalondile mma ukuboneka kangi iki abandu baaboombaga.

Kangi ugwe buka ku kipanga; komma ukwitugasya ku kaya, ukubuka ku kulob’iswi, kangi ukufwima, ni fingu bo ifyo Pandungu.

Uswe tutikubomba ikyo mma. Uswe tukoongana ukusyungutila ikindu ki kilakila iki kisa koongana u Nsingiligwa, i Ndumi Iyi, i Lisyu-lya-pakanwa Ili.

Kamokene kangi, une naloli ngwitika mu kubuka ku kipanga. Filipo ifipanga fingi ukusyungutila i kisu-kya-pasi ifi fikubika a matepi ikyakwanda mu figemo fyabo, ntufye u Ntwa. Ngimba une ngwitika ugwe ubagile ukusyala ku kaaya kisita-ikyo ugwe ukaya Nsingiligwa? UMMA, UMMA, UMMA…Une nginogonamo siku ikyene, ngitikamo siku ikyene. Une itolo ngulonda u KUBINDA KUKINA kisita kupasya kuko ugwe uliko pamo kyo kipanga nki ugwe kubukako.

Linga ugwe ukaya nu Busetuli bwa iki umwene ikuyoba, polelo ugwe ubagile pabwelu ukuyoba, “Une ndikufimbilisigwa ukupilika kwa Nkundwe Branham pamo nu kufimbilisigwa u KWITIKISANIA na fyosa ifi umwene ikuyoba. Umwene aayobile nukuyoba lulo, balipo bingi fiyo abangi abanyambala abakoleligwe-na-Kyala.”

Kindililaga nkyeni. Uswe tukuketesya apa, kikuyoba, “Ngimba uswe tubagile ukubuka ku kipanga iki kitikwitikisania na ugwe?” Naloliloli, une ndinku…Une ngaya sangalabwe yene pa kiloboko, umwe mumenye. Balipo—balipo itolo abangi abanyambala abanyakyala kulikosa; une ngusubila une ne yumo gwa bene.

I Lisyu-lya-pakanwa lya Kyala pa matepi lyo SANGALABWE YANGU, LYALABWE LYANGU. Ilyene lyo Lisyu-lya-pakanwa une ngulonda ukupilika kangi i Lisyu-lya-pakanwa une ngulonda i Branham Tabernacle ukupilika.

Linga umwe mukulonda ukulungisania na uswe, umwe mwe bakukinda baambililigwe, bakundwe na bakalumba bangu. Lungisania na uswe pa 12:00 pamusi, akabalilo ka Jeffersonville, bo uswe tukupilika i Lisyu-lya-pakanwa lya Kyala likuyoba nu kwamula amalalusyo mingi ugwe ubagile ukuya nago pa ndumbula yako. Kangi pilika kuli gwimwene linga ifindu ifi une njobile mwa kalata uyu fyo panja pa Lisyu kangi une ngapilikisya iki Kyala ikuyoba ku Nsingiligwa Gwake.

Iki umwene ikuyoba pa matepi yo Isi Ikuyoba U Ntwa. Komma iki une nguyoba umwene ikuyoba, pamo iki une ngwitika umwene ikuyoba, kangi MWENE Kyala abagile ukupa ugwe u Busetuli bwabwanaloli.

Nkundwe Yosefu Branham

64-0823M – “Malalusyo Na Maamulo #1″