‘Ba Opezaru Leletu ‘Diyi,
Mi ne, ma pa so jotile kpozᴜ; ‘ba azini ka o’duko mani eri, ka jotile zi, ma nga fi eri vᴜ, ama nga nyaka nya eri be, azini eri’i ma be.
Azingaza e’yo oluzani la, mi nzi jotile miniriki malaika Munguni rini dere ovuni nga vutivutiru ku. Emi ‘baki O’duko Munguniri vule alitara emini pi ma dria tepuki avizurisi. Eri O’duko Munguni lu alu o’du amanirini E’yo enzolipikuri be ri’i. Eri O’duko lu alu ‘Di Opi ‘Yoni beri’i. Eri O’duko lu Amuro driari ni ecozu AMENA ‘yozu erinira ri’i.
Eri ayi amborutu driari pini ri’i. Yesuni amani e’yo ece Ima ngulupi ma dria o’du Eri ma yiki niri pini yi deria. Sawa eca’di asiza ama alia ‘bo. Eri ece Ima obi mbgariki amani ‘bo ayi asizu ‘di ma alia. Eri fe amani Ima Oaza Munguru dizaru azini ururi nezu paale asizurisi ‘bo. Ayi ‘dini onidri e’yo eceza Eri ma Ngulupiniri’i.
Mungu emu ndra ayi Lodikeani ‘di ma aa azini nze ndra e’yo ruati ‘ba adani vusi. Eri ma O’duko ovu ‘duzaru azini tambazaru Ima Amuro ma dri cezu azini ‘bazu kililiru. O’duko azi lu nduni ‘yo ecopi Eri ma Amuroni ‘bapi kililiruri te Eri ma Ngulupi ma O’dukoni.
Ayi asizu ‘di ma aa, Eri ma O’duko tepu ma driari enga ovu ‘bazaru kalaa; ‘duzaru amve kanisa pi ma aasi. Yi aviki lu tepu ki ku. Ani Mungu ‘yo di, “Ma emuria emi rua dria onzi. Ma nga emi wi amve Ma tiliarisi. ‘Di asiza ni.”
“Ayi aziri engazu aziri ‘diyi ma aa, Ma ndreni afa azini ni ku te ‘di lu ‘ba e’yo yini riki ‘bapi amboru Mavuri ma drilia ‘diyi. Ani di ayi ‘di ma asitasi Ma nga emi wi amve Ma tiliarisi ra. Eri di dria dezaru’bo. Ma mu e’yo nze muke. Ee, Ma Kanisa ma eselea ‘dia ci. Amena Munguvu ri’i, a’itabe azini ada i nga Ima ngulupi ece ra azini eri nga OVU MA NABI VUSI.”
Kile erini engazu alipi’bori le, yi nzuria adaru rusizu kile yi ma abipika o’du Ahabunisi ri pile. Yi ndra ‘ba turu su azini yi ndra dria ti eciza ma alia; aziini yini dria afa aluri ‘yozurisi, yi oleki ndra ‘baki ra. Te nabi ALUNI, LU ALU, ni ndra ‘yeke azini asipiriki ndra dria enzoru a’disiku Mungu fe ndra e’yo eceza nde LU ‘BA ALU VU.
‘Di ovuni ‘yoria azingaza azi ‘diyi dria enzoru azini ‘baki eci ‘dini ku. Ma ‘yoni vini kini ‘ba ovupi omvezaru e’yo oluzuri eco e’yo olu kani emba ku ‘dinini ku. Ma ‘yoria kini azingaza geri-towisiri ADARURI ni nga TEPU, Mungu ma O’duko Amuro driri, KI ‘ba O’duko orodriru ndeni LE emi ma ERIKI riru. O’duko tepu pi ma driari O’duko LU engapi ovupi e’dazarura Mungu ma Ngulup vusi ovuzu ‘Di Opi Ni ni ri.
Emi te emi agei nabi inzorᴜ ‘diyisi, a’disikuni yi ‘balau adrarᴜri ki.
Mi nga adaru geri ‘yeke andruniri ni ngoni ru? Awata a’i’ba pi ma eselea tu. Ongulumu aluri ni ‘yo azingaza geri-towisiri ni nga Amuro ni ‘ba kililiruni, isu aziri ni ‘yo mi Ekpa lu Avizuri’i. Le ama ma ovuki awazaruku; Le ama ma eci ama AMURO ALURU. Omvitani ‘yekeri ngo’i?
Ama ma nziki ama asi amaniki tualu ani afa Munguni ‘yo trai Ima nabi vusi Amuroniri erizu. A’disiku ama dria a’i tualu ra, Adripi Branham ni ‘ba o’dukoti ojipi Malaika azirizuri’i.
Lu nga ini adriza ‘ba adani risi a’dule, ‘ba cini ni ra kini angu ‘ba kakauni ‘ba pini ovuzuria egata awazaruni ki vini indi e’yo werewereru embata kulu yini bi tualuri pi ma alia. Te di a’dini nga mu ovu okpo onzi ‘yepiku ngapi mupu ovupi ogozaru ro ayi asizu ‘di aliari be ni, a’disikuni ayi asizu ‘di ni muria vule e’data Amuro E’yo Kililiruri vu? ‘Da ma efi kini ama nga ovu E’yo be pale alu dika ekile erini ndra ovuzu fezaru kililiru, azini vazaru kililiru o’du Pauloni kisi rile. Ma nga lu mi dri a’dini nga ovu eri’beni yari ra. Eri nga ovu nabi azi ovupi e’daru ada adaru ra ‘dile ni, kaniku ata ovupi e’dazru ndindi aga nabi azi ci nini ra ayi dria pi aa engazu Enoka vu kpere o’du ‘disi, a’disikuni angu ‘di ni nga ovu azi ngaza nabiru okuru ovupi lezaru ra ni me, azini Munguni nga eri e’da ra. Leni erini ku e’yo nzezu ima ngulupi ma dria, Munguni nga e’yo nze erini ni O’duko ovupi e’dazaru ra risi. Amena.
Ani, O’dukoti nzezaru Eri ma ‘ba o’dukoti ojipiri vusi ‘di ni ndra kililiru fezaru, azini eri kililiru vazaru.
Afa azi dika Munguni ndra ‘yo Ima ‘ba o’dukoti ojipi malaika azirizuri ma dria eri ma O’dukoti beri a’duni?
Eri nga lu e’yo eri engazu Mungu vu.
Eri nga ovu “di Opi ‘yoni be” azini e’yo nze Munguni.
Eri nga ovu tile Munguniri’i.
ERI, KILE ERINI OVUZU AZIZARU MALAKI 4:6 RILE, NGA ASI ANZI PINIRI KI OJA VULE ATAPIKA PI VU.
Eri nga ‘ba opezaru o’du asizuri niri ki eji ro azini yi nga nabi ovupi ecezarurari eri e’yo ada mgbari fe kile erini andra ovuzu Paulo be rile.
Eri nga e’yo adari ma dri ogo kile yini andra ovuzu eribe rile.
- Eri nga lu e’yo eri engazu Mungu vu.
- Eri nga ovu “di Opi ‘yoni be” azini e’yo nze Munguni.
- Eri nga ovu tile Munguniri’i.
- ERI, KILE ERINI OVUZU AZIZARU MALAKI 4:6 RILE, NGA ASI ANZI PINIRI KI OJA VULE ATAPIKA PI VU.
- Eri nga ‘ba opezaru o’du asizuri niri ki eji ro azini yi nga nabi ovupi ecezarurari eri e’yo ada mgbari fe kile erini andra ovuzu Paulo be rile.
- Eri nga e’yo adari ma dri ogo kile yini andra ovuzu eribe rile.
- Azini di Eri ‘yo ndra e’yo ama dria ngoni?
Ani ‘ba opezaru eri be o’du ‘da ma aliari nga ovu ‘ba adaru Opi ni e’dapi azini ovupi Ruati Erini azini ovupi O’duko Erini azini azi Erini ngapiri ki. Haleluya! Eneki eri ra?
Mi ka nga kiri ovu abaza azi cini alia, mi zi Munguni Orindi Eriniri si mi gazu azini mi dri cezu, a’disikuni E’yo ‘yo kini, “‘BA PEZARURI CAKINI NGA OVU OLEZARU KU”. ‘Ba azi yo ecopi mi olepi ra ri mi ka ovu Amuroni ria.
Metodist e’deki ra, Mungu enga ndra ‘ba azi ‘diyi ra ani di eri mu di drile ayi pi ma elesi kpere o’du asizu ‘di ma alea ‘ba azi ki di vini dika ci angu ma dria, mupi ovupi o’duko asizu ayi asizuri ni yi ma ‘ba o’dukoti ojipiri ma palaa ri’i.
Ee culu. Kanisa ovuni di dika ku “tile” Munguniri. Eri ima ngulupi ma tile ni. Ani Mungu ni di ruoja erivusi. Eri nga eri aba trai nabi vusi azini amuro vusi, a’disiku o’duko Mungu vuri ni nga ovu eri ma aa. Ee eri ‘dini, a’disikuni eri ‘yo capta asizu E’yo Ecezani ria vasi 17ia, “Orindi pi amurᴜoᴜ be yi ‘yora, Mi emu.” Pale alu dika wudrikuru ni nga e’yo eri kpi engazu Mungu vu kile ndra Pentekotisitiari le; te nile’borile Amuro E’yoru ‘da ni nga ovu gazarusu kile ndra ayi okori vuri le.
Amuro ovu o’duko be ci, te eri nga lu afa ovupi tepu pi ma driari ‘yo. A’disikuni O’duko ‘da ni KPI ENGAZU MUNGU VU, ani eri leni e’yo efi eceza ku erini ovuzu ndra fezaru kililiru azini vazaru kililirurisi.
Mi emu ruecizu amabe Sabatu ‘disi sawa azia Etusi (12PM) Jeffersonvili saa si (Saa Iri Ugandaa), amani O’duko ‘da eriria amani: Ayi Kanisa Lodikeaniri 60-1211E eriria.
Adri. Joseph Branham i